CNI Sport News
၂၀၂၅ ခုနှစ်၊ မေလ ၂၆
ယူနိုက်တက်အသင်းနည်းပြ အာမိုရင်က အက်စတွန်ဗီလာအသင်းကို အနိုင်ရခဲ့တဲ့ ဒီရာသီ ပရီးမီးယားလိဂ် နောက်ဆုံးပွဲစဉ်အပြီးမှာ ဆိုးရွားတဲ့ရာသီအတွက် တောင်းပန်ခဲ့ပြီး ကောင်းမွန်တဲ့ နေ့ရက်တွေ ရောက်လာမယ်လို့ ပရိသတ်တွေကို ကတိပေးခဲ့ပါတယ်။
အာမိုရင်က “ပထမဆုံးအနေနဲ့ ဒီရာသီအတွက် ကျနော် တောင်းပန်ချင်ပါတယ်။ ပွဲအများအပြားမှာ ကျနော်တို့ကို အားပေးရတာ အလွန်ခက်ခဲမှန်းသိပါတယ်။ ဒီရာသီက ပြီးဆုံးသွားပြီဖြစ်တဲ့အတွက် ကျနော်တို့ အတူလက်တွဲပြီး ရှေ့ကိုဆက်ရမှာပါ။ လွန်ခဲ့တဲ့ ၆ လတုန်းက မုန်တိုင်းတွေ လာတော့မယ်လို့ ခင်ဗျားတို့ကို ကျနော် ပြောခဲ့ဖူးပါ တယ်။ အခုဒီဆိုးရွားတဲ့ ရာသီအပြီးမှာ ခင်ဗျားတို့ကို ပြောချင်တာက ကောင်းမွန်တဲ့ နေ့ရက်တွေ ရောက်လာမယ် ဆိုတာပါ။ ဘယ်လို အခြေအနေမျိုးကိုမဆို ကျော်လွှားနိုင်တယ်ဆိုတာ အတိတ်မှာ သက်သေပြခဲ့ပြီးဖြစ်တဲ့ ကမ္ဘာ ပေါ်မှာရှိတဲ့ အသင်းတစ်သင်းဟာ ယူနိုက်တက်အသင်းပါ”လို့ ပြောခဲ့တာပါ။
ယူနိုက်တက်အသင်းဟာ အက်စတွန်ဗီလာအသင်းကို ၂ ဂိုး-ဂိုးမရှိနဲ့ အနိုင်ရခဲ့ပြီးနောက် ဒီရာသီ ပရီးမီးယားလိဂ် ပြိုင်ပွဲကို အမှတ်ပေးဇယားအဆင့် ၁၅ နေရာမှာ ရပ်တည်ကာ ရာသီအဆုံး သတ်ခဲ့ရတာ ဖြစ်ပါတယ်။
ယူနိုက်တက်အသင်းဟာ ပြီးခဲ့တဲ့ရက်ပိုင်းက ယူရိုပါလိဂ် ဗိုလ်လုပွဲမှာ စပါးအသင်းကို အရေးနိမ့်ခဲ့သလို ပရီးမီးယားလိဂ်အဆင့် ရပ်တည်မှုကြောင့် လာမယ့်ရာသီ ဥရောပဝင်ခွင့်ကို ဆုံးရှုံးခဲ့ရတာပါ။
အာမိုရင်ကို တွေ့ရစဉ်
မန်ချက်စတာကလပ်ဟာ ပေါ်တူဂီလူမျိုးနည်းပြ အာမိုရင်လက်ထက်မှာ အဆိုးရွားဆုံးရာသီနဲ့ ကြုံတွေ့ခဲ့ရတာ ဖြစ်ပါတယ်။
အဲဒါကြောင့် နည်းပြအာမိုရင်ဟာ အက်စတွန်ဗီလာအသင်းနဲ့ပွဲအပြီးမှာ ပရိသတ်တွေကို တောင်းပန်ရင်းနဲ့ ကတိပေးမှု ပြုလုပ်ခဲ့တာပါ။
ဒါအပြင် အာမိုရင်ဟာ တခါတလေမှာ မမျှမတလုပ်ခဲ့တဲ့ အရာတွေကြောင့် ကစားသမားတွေကို တောင်းပန်မှု လည်း ပြုလုပ်ခဲ့ပါတယ်။
ယူနိုက်တက်အသင်းဟာ ရာသီနောက်ဆုံးပွဲစဉ်အပြီးမှာ အာရှခြေစမ်းခရီးစဉ်အတွက် ထွက်ခွာခဲ့ပြီး အသင်းမှာ အနာဂတ် မရေမရာဖြစ်နေတဲ့ ဂါနာချိုနဲ့ အိုနာနာတို့ကိုလည်း အသင်းလူစာရင်းထဲ ထည့်သွင်းခဲ့တာပါ။
ယူနိုက်တက်အသင်းဟာ မေလ ၂၈ ရက်မှာ အာဆီယံ All-Stars အသင်းနဲ့ မလေးရှားနိုင်ငံမှာ ခြေစမ်းပွဲယှဉ်ပြိုင်မှာ ဖြစ်ပြီး ဒီပွဲပြီးရင် ဟောင်ကောင်နိုင်ငံမှာ ဟောင်ကောင်အသင်းနဲ့ မေလ ၃၀ ရက်မှာ ခြေစမ်းပွဲယှဉ်ပြိုင်မှာ ဖြစ်ပါ တယ်။
Source: Goal
