CNI Sport News

၂၀၂၂ ခုနှစ်၊ စက်တင်ဘာ ၂၄

အင်္ဂလန်အသင်းဟာ စက်တင်ဘာ ၂၄ ရက်မနက်ပိုင်းက ကစားခဲ့တဲ့ နေးရှင်းလိဂ်အုပ်စုပွဲစဉ်မှာ အီတလီ အသင်းကို ၁ ဂိုး- ဂိုးမရှိနဲ့ အရေးနိမ့်ပြီး လိဂ် A ကနေ တန်းဆင်းသွားခဲ့ပြီဖြစ်ပါတယ်။

ဒီပွဲမှာ အီတလီအတွက် အနိုင်ဂိုးကို ရက်စပါဒိုရီက သွင်းယူခဲ့တာပါ။အင်္ဂလန်အသင်းဟာ ဒီရှုံးပွဲကြောင့် နေးရှင်းလိဂ်အုပ်စုပွဲစဉ် ၅ ပွဲ ကစားအပြီးမှာ ၂ ပွဲသရေ ၃ ပွဲရှုံးနဲ့ အုပ်စုတွင်း နောက်ဆုံးနေရာမှာ ရပ်တည် နေခဲ့တာဖြစ်ပါတယ်။အင်္ဂလန်အသင်းဟာ နောက်ဆုံးပွဲစဉ်အဖြစ် ဂျာမနီအသင်းနဲ့ ယှဉ်ပြိုင်ရဖို့ ရှိနေ ပေမယ့် တန်းဆင်းသွားခဲ့ပြီး နောက်တစ်ကြိမ်ကျင်းပမယ့်ပြိုင်ပွဲကျရင် လိဂ် B မှာ သွားရောက် ယှဉ်ပြိုင် ရတော့မှာပါ။

အင်္ဂလန်အသင်းဟာ ဒီ နေးရှင်းလိဂ် ၅ ပွဲမှာ သွင်းဂိုး ၁ ဂိုးသာ ရယူထားနိုင်တာဖြစ်ပြီး အဆိုပါသွင်းဂိုး ဟာ ပင်နယ်တီကနေ ရရှိထားတာကြောင့် တိုက်စစ်ပိုင်းအတွက် စိုးရိမ်စရာတွေရှိလာနိုင်တာ ဖြစ်ပါတယ်။အင်္ဂလန်အသင်းဟာ လက်ရှိအချိန်မှာ ကစားကွက်ကနေ ဂိုးမသွင်းနိုင်တာ မိနစ်ပေါင်း ၄၅၀ မိနစ်အထိ ရှိသွားပြီလို့ အချက်အလက်တွေအရ သိရတာပါ။ဒီပွဲမှာ အဝေးကွင်းကို လိုက်ပါအားပေးတဲ့ အင်္ဂလန်ပရိသတ်တွေဟာ လှောင်ပြောင်မှုတွေပြုလုပ်ခဲ့ကြပြီး နည်းပြဆောက်ဂိတ်ကို ကမ္ဘာ့ဖလား မတိုင်ခင် ထုတ်ပယ်ဖို့ တောင်းဆိုမှုတွေပါ ရှိလာခဲ့တာဖြစ်ပါတယ်။

ဆောက်ဂိတ်ကတော့ ဒီဖိအားဒဏ်တွေကို သူခံယူသွားမယ်လို့ ပြောခဲ့တာပါ။ “ကျနော်တို့ ရလဒ်တွေ ဆိုးရွားနေပါတယ်။ဒါကို လုပ်ကိုင်ဖို့ တစ်ခုတည်းသောနည်းလမ်းက ကျနော်တို့ ယုံကြည်ရတဲ့အရာ တွေကို ဆုပ်ကိုင်ထားဖို့ပါပဲ။ပြီးခဲ့တဲ့ ပြိုင်ပွဲတွေမှာလည်း ကျနော်တို့ဟာ အောင်မြင်မှု ရယူနိုင်တဲ့ အရာ တွေကို စွဲမြဲစွာ ကိုင်စွဲနိုင်ခဲ့ပါတယ်။ဖိအားတွေကို ခံယူဖို့က ကျနော့်ရဲ့အလုပ်ပါ။ စွမ်းဆောင်ရည်ကို ဝေဖန်ဖို့ဆိုတာ ကျနော့်အတွက် အလွန်ခက်ခဲပါတယ်။ရလဒ်မကောင်းပေမယ့် ဒီနေ့ညမှာ ကျနော်တို့ အတွက် အပေါင်းလက္ခဏာဆောင်တဲ့ အရာတွေအများကြီးရှိခဲ့ပါတယ်”လို့ ဆောက်ဂိတ်က ပြောခဲ့ပါတယ်။

အင်္ဂလန်ကွင်းလယ်ကစားသမား ဒီကလန်ရိုက်စ်က သူတို့ဟာ လက်ရှိအချိန်မှာ ရလဒ်ပိုင်းမကောင်း ပေမယ့် ကမ္ဘာ့ဖလားပြိုင်ပွဲမှာ ဒါကိုတွန်းအားပေးသွားမယ်လို့ ပြောခဲ့တာပါ။ဒီကလန်ရိုက်စ်က “ကျနော် တို့ ပိုပြီးကောင်းမွန်လာမယ်ဆိုတာကို ယုံကြည်လိုက်ပါ။ကျနော်တို့ဟာ ပြိုင်ပွဲတိုင်းကို အနိုင်ယူချင်လို့ ဒါဟာ စိတ်ပျက်ဖို့ ကောင်းပါတယ်။ဒီပွဲမှာ ကျနော်တို့ ထိန်းချုပ်နိုင်ခဲ့ပေမယ့် သူတို့ဟာ ရတဲ့ အခွင့်အရေး တစ်ကြိမ်ရတာကို ဂိုးအဖြစ်ပြောင်းလဲနိုင်ခဲ့တာပါ”လို့ ပြောခဲ့ပါတယ်။

အင်္ဂလန်အသင်းကို အနိုင်ရခဲ့တဲ့ အီတလီအသင်းဟာ နေးရှင်းလိဂ်နောက်ဆုံးပွဲအဖြစ် ဟန်ဂေရီနဲ့ ကစား ရမှာဖြစ်ပြီး အနိုင်ရတာနဲ့ နောက်ဆုံးအဆင့် ပြိုင်ပွဲယှဉ်ပြိုင်ခွင့်ရမှာ ဖြစ်ပါတယ်။

Source:Daily Mail

CNI Sport News

၂၀၂၂ ခုနှစ်၊ စက်တင်ဘာ ၂၃

ဂျိုကိုဗစ်ဟာ အခုနှစ်ရာသီ ဂရမ်းဆလမ်းပြိုင်ပွဲ ၄ ပွဲမှာ ၂ ပွဲက ကိုဗစ်ကာကွယ်ဆေးမထိုးခဲ့လို့ မပါဝင် နိုင်ခဲ့ပေမယ့် သူ့ရဲ့ ဆုံးဖြတ်ချက်အတွက် နောင်တမရဘူးလို့ ပြောလိုက်ပါတယ်။

ဂျိုကိုဗစ်က “ကာကွယ်ဆေးမထိုးလို့ ကျနော်နောင်တရစရာမရှိပါဘူး။ မကစားနိုင်ခဲ့လို့တော့ ကျနော် စိတ်မကောင်းဖြစ်ခဲ့ရပါတယ်။ဒါပေမယ့် ဒါတွေကို ကျနော်ဆုံးဖြတ်ခဲ့တယ်ဆိုတာ ခင်ဗျားတို့လည်း သိနေတာပါပဲ။ဘာတွေအကျိုးဆက်ဖြစ်လာမလဲဆိုတာလည်း သိပါတယ်။ဒါတွေကို ကျနော်လက်ခံ တယ်။ဒါပါပဲ” လို့ သတင်းထောက်တွေကို ပြောခဲ့တာပါ။

ဆားဘီးယားတင်းနစ်သမားဟာ ၂၀၂၁ မှာ သြစတြေးလျအိုးပန်း၊ ပြင်သစ်အိုးပန်းနဲ့ ဝင်ဘယ်လ်ဒန် အိုးပန်းပြိုင်ပွဲတွေမှာ ချန်ပီယံဆုရခဲ့တာဖြစ်ပါတယ်။ဒါပေမယ့် ကိုဗစ်ကာကွယ်ဆေး မထိုးလို့ သြစတြေးလျနိုင်ငံကနေ ပြည်နှင်ဒဏ်ပေးခံရတာကြောင့် ချန်ပီယံဆုကို ကာကွယ်ခွင့်မရတော့ပါဘူး။ ဂျိုကိုဗစ်ဟာ ရာသီနောက်ဆုံးပိတ် ဂရမ်းဆလမ်းပြိုင်ပွဲဖြစ်တဲ့ အမေရိကန်အိုးပန်းပြိုင်ပွဲကိုလည်း ယှဉ်ပြိုင်ခွင့် မရခဲ့ပါဘူး။

အသက် ၃၅ နှစ်အရွယ်ရှိ ဂျိုကိုဗစ်ဟာ ဂရမ်းဆလမ်းချန်ပီယံဆု ၂၁ ကြိမ်အထိ ရရှိထားတာပါ။ ဂျိုကိုဗစ်ဟာ သြစတြေးလျနိုင်ငံကနေ ပြည်နှင်ဒဏ်ခံရချိန်မှာ ခရီးသွားလာခွင့် ၃ နှစ်ပိတ်ပင်ခံရပေမယ့် ဝန်ကြီးချုပ် စကော့မော်ရစ်ဆန်က အဓိကပြိုင်ပွဲတွေမှာ ပါဝင်ယှဉ်ပြိုင်နိုင်ဖို့အတွက် ခွင့်ပြုနိုင်တယ်လို့ နောက်ပိုင်းမှာ ပြောခဲ့တာ ဖြစ်ပါတယ်။

ဂျိုကိုဗစ်က “ကျနော်သတင်းတွေကို စောင့်မျှော်နေတာပါ။အခုက ကျနော့်လက်ထဲမှာ မရှိသေးပါဘူး။ မကြာခင်မှာ အပေါင်းလက္ခဏာဆောင်တဲ့ သတင်းတွေကို ရရှိနိုင်ဖို့ မျှော်လင့်တယ်”လို့ ပြောခဲ့တာပါ။ ဆားဘီးယားတင်းနစ်သမားဟာ လက်ရှိအချိန်မှာ ဖက်ဒဲရားကို နှုတ်ဆက်မယ့် Laver Cup ပြိုင်ပွဲ အတွက် လန်ဒန်ကို ရောက်ရှိနေတာ ဖြစ်ပါတယ်။

Source:Reuters

CNI Sport News

၂၀၂၂ ခုနှစ်၊ စက်တင်ဘာ ၂၃

စပိန်လက်ရွေးစင်အမျိုးသမီးအသင်း ကစားသမား ၁၅ ဦးဟာ နည်းပြဖြစ်သူ ဂျော့ချ်ဗေလ်ဒါကို ထုတ် ပယ်ဖို့ တောင်းဆိုခဲ့ကြောင်း စပိန်ဘောလုံးအဖွဲ့ချုပ်က ပြောဆိုလိုက်ပါတယ်။

ကစားသမားတွေဟာ ဂျော့ချ်ဗေလ်ဒါကိုင်တွယ်နေတဲ့အချိန်အတွင်းမှာ သူတို့ရဲ့ စိတ်ပိုင်းဆိုင်ရာ အခြေ အနေနဲ့ ကျန်းမာရေးကို ထိခိုက်စေတယ်လို့ ပြောခဲ့ပြီး သူသာဆက်ရှိမယ်ဆိုရင် နိုင်ငံအသင်းကနေ နုတ်ထွက်မယ်လို့ ပြောခဲ့တာပါ။စပိန်ဘောလုံးအဖွဲ့ချုပ်ကတော့ နိုင်ငံအသင်းနည်းပြ ခန့်အပ်တာနဲ့ ပတ်သက်ပြီး မေးခွန်းထုတ်ဖို့ ခွင့်ပြုသွားမှာ မဟုတ်ဘူးလို့ ပြောခဲ့ပါတယ်။

“ဒီလိုဆုံးဖြတ်ချက်ချမှတ်ဖို့က သူတို့ရဲ့လုပ်ပိုင်ခွင့်ထဲမှာ မရှိပါဘူး။ဒီလိုလုပ်ဆောင်မှုတွေက စံနမူနာ ယူစရာမရှိပါဘူး။ဒါဟာ ဘောလုံးနဲ့ အားကစားတန်ဖိုးအပြင်ဘက်မှာ ရှိနေပြီး၊ အန္တရာယ်ရှိပါတယ်”လို့ စပိန်ဘောလုံးအဖွဲ့ချုပ်က ပြောခဲ့တာပါ။ဒါ့အပြင်နိုင်ငံအသင်းအတွက် ကစားဖို့ ငြင်းပယ်တာက အလွန် ဆိုးရွားတဲ့ ချိုးဖောက်မှုဖြစ်ပြီး ၂ နှစ်ကနေ ၅ နှစ်အထိ ဒဏ်ခတ်ပိတ်ဆို့နိုင်သလို သူတို့ ၁၅ ဦးကို ရွေးချယ်သွားမှာမဟုတ်ဘူးလို့လည်း ပြောခဲ့ပါတယ်။

စပိန်ဘောလုံးအဖွဲ့ချုပ်က “ဒီအချက်ဟာ အားကစားကနေ ဂုဏ်သိက္ခာရှိတဲ့ ကိစ္စတစ်ခုဖြစ်လာမှာ ဖြစ်ပြီး ရွေးချယ်မှုကို ညှိနှိုင်းလို့ရမှာ မဟုတ်ပါဘူး။ဒါဟာ စပိန်နဲ့ ကမ္ဘာတစ်ဝှမ်းရှိ အမျိုးသားနဲ့ အမျိုးသမီး ၂ သင်းစလုံးအတွက် ဘောလုံးသမိုင်းမှာ မကြုံတွေ့ဖူးတဲ့ အခြေအနေဖြစ်ပါတယ်။နိုင်ငံ အသင်းအတွက် ပေးဆပ်လိုစိတ်ရှိတဲ့ ကစားသမားတွေပဲ လိုပါတယ်” လို့ ပြောခဲ့တာပါ။

အဆိုပါကစားသမား ၁၅ ဦးရဲ့အမည်တွေကို ဖော်ပြခဲ့ခြင်းမရှိပေမယ့် သူတို့အနေနဲ့ အမှားကိုလက်ခံ တယ်ဆိုရင် ခွင့်လွှတ်ပြီး အနာဂတ်မှာ ထပ်မံရွေးချယ်သွားမယ်လို့ စပိန်ဘောလုံးအဖွဲ့ချုပ်က ပြောခဲ့ပါ တယ်။ အသက် ၄၁ နှစ်အရွယ်ရှိ ဗေလ်ဒါဟာ ၂၀၁၅ ကတည်းက စပိန်လက်ရွေးစင်အမျိုးသမီးအသင်းကို ကိုင်တွယ်ခဲ့တာပါ။ဗေလ်ဒါဟာ စပိန်အသင်းကို ပြီးခဲ့တဲ့ ယူရို ၂၀၂၂ ပြိုင်ပွဲမှာ ကွာတားဖိုင်နယ်အထိ ရောက်ရှိအောင် ဦးဆောင်နိုင်ခဲ့ပြီး အချိန်ပိုမှာ ချန်ပီယံ အင်္ဂလန်အသင်းကို အရေးနိမ့်ခဲ့တာ ဖြစ်ပါတယ်။

Source:BBC

မက်ဆီကြောင့် ပီအက်စ်ဂျီအသင်း အပိုဝင်ငွေ ယူရိုသန်း ၇၀၀ ရရှိ

CNI Sport News

၂၀၂၂ ခုနှစ်၊ စက်တင်ဘာ ၂၃

ပီအက်စ်ဂျီအသင်းဟာ မက်ဆီကို ခေါ်ယူပြီးနောက် စီးပွားရေးအရ သဘောတူညီမှုတွေကြောင့် အပိုဝင်ငွေ ယူရိုသန်း ၇၀၀ ရရှိခဲ့တယ်လို့ သိရပါတယ်။

မက်ဆီဟာ ပြီးခဲ့တဲ့နှစ် အပြောင်းအရွှေ့ကမှ ဘာစီလိုနာအသင်းနဲ့ စာချုပ်ကုန်ဆုံးပြီး ပီအက်စ်ဂျီအသင်းထံ အလွတ်နဲ့ ရောက်ရှိလာခဲ့တာပါ။

မက်ဆီဟာ ပီအက်စ်ဂျီအသင်းနဲ့ ချုပ်ဆိုခဲ့တဲ့ စာချုပ်အရ ပထမနှစ်မှာ ယူရိုသန်း ၃၀ ရရှိခဲ့ပြီး နောက်ဆုံးနှစ်မှာ ယူရိုသန်း ၄၀ ရရှိမှာ ဖြစ်ပါတယ်။ ပီအက်စ်ဂျီအသင်းဟာ မက်ဆီ ရောက်ရှိလာခဲ့ပြီး ကတည်းက နာမည်ကျော် အမှတ်တံဆိပ် အများအပြားနဲ့ သဘောတူညီမှု ရရှိခဲ့ပြီး သူတို့ရဲ့ ဝင်ငွေရရှိမှုဟာ ၁၃ ရာခိုင်နှုန်းအထိ မြင့်တက် လာခဲ့တာပါ။

EI Economista က ပီအက်စ်ဂျီအသင်းဟာ မက်ဆီကို ခေါ်ယူခဲ့လို့ ကုန်ကျစရိတ် ကြီးမားခဲ့ပေမယ့် စပွန်ဆာတွေနဲ့ အမှတ်တံဆိပ် အများအပြားနဲ့ သဘောတူညီမှုတွေကို တိုးတက်လာမှုတွေကို ဖော်ပြခဲ့တာ ဖြစ်ပါတယ်။

ပီအက်စ်ဂျီအသင်း စီးပွားရေးဒါရိုက်တာ မာ့ခ်အမ်းစထရောင်းက မက်ဆီ ရောက်လာပြီးနောက် အသင်းအပေါ် သက်ရောက်မှုတွေကို မာကာသတင်းဌာနနဲ့ ပြုလုပ်ခဲ့တဲ့ အင်တာဗျူးမှာ ပြောသွားခဲ့တာပါ။

မက်ဆီကိုတွေ့ရစဉ် (The Sun)

မာ့ခ်အမ်းစထရောင်းက “ဝယ်လိုအားတွေက ၃၀ ရာခိုင်နှုန်းကနေ ၄၀ ရာခိုင်နှုန်းကြား တိုးလာခဲ့ပါတယ်။ ဒီလို အပြောင်းအရွှေ့မျိုး ဖြစ်လာတယ်ဆိုရင် လူတွေက အင်္ကျီတွေရောင်းပြီး ပိုက်ဆံရှာတယ်လို့ ထင်ကြပါတယ်။ ဒါတွေက လုံးဝမဟုတ်ပါဘူး။ အပိုအင်္ကျီတွေလည်း အများကြီး မထုတ်နိုင်ခဲ့ပါဘူး။ အလွန်အရေးကြီးတဲ့ အနည်း ငယ် လောက်ကိုပဲ အကာအရံ လုပ်နိုင်ခဲ့တာပါ။ ဒါပေမယ့် မက်ဆီအင်္ကျီတွေရဲ့ လိုအပ်ချက်အားလုံးကို ဖြည့်ဆည်း မပေးနိုင်ပါဘူး”လို့ ပြောခဲ့ပါတယ်။

ပီအက်စ်ဂျီအသင်းဟာ မက်ဆီရဲ့ အပြောင်းအရွှေ့ကြောင့် စပွန်ဆာအသစ် ၁၀ ခုအထိ ရရှိခဲ့ပြီး စပွန်ဆာ အခကြေး ငွေကလည်း ပေါင် ၂.၆ သန်းကနေ ပေါင် ၆.၉ သန်းအထိ တိုးလာခဲ့တာ ဖြစ်ပါတယ်။ မက်ဆီရဲ့ နာမည်ပါ အင်္ကျီ ဟာ ပီအက်စ်ဂျီအသင်း အင်္ကျီရောင်းချမှု အားလုံးရဲ့ ၆၀ ရာခိုင်နှုန်းအထိ ရှိခဲ့တာပါ။

ပီအက်စ်ဂျီအသင်းဟာဆိုရင် မက်ဆီ ရောက်ရှိလာမှုကြောင့် ဆိုရှယ်မီဒီယာမှာလည်း ဖော်လိုဝါ ၁၅ သန်းအထိ မြင့်တက်လာခဲ့ပြီး စုစုပေါင်း သန်း ၁၅၀ အထိ ရှိလာတာဖြစ်ပါတယ်။

မက်ဆီဟာ ဒီရာသီမှာ ပီအက်စ်ဂျီအတွက် ခြေစွမ်းပြသနေပြီး ပြိုင်ပွဲစုံ ၆ ဂိုးသွင်းယူကာ ၈ ဂိုးဖန်တီးထားတာ ဖြစ်ပါတယ်။

Source: Mirror/the Sun

CNI Sport News

၂၀၂၂ ခုနှစ်၊ စက်တင်ဘာ ၂၃

ဂီရောဒ့်ဟာ သြစတြီးယားအသင်းကို အနိုင်ရခဲ့တဲ့ နေးရှင်းလိဂ်ပွဲမှာ ဂိုးသွင်းယူပြီးနောက် ပြင်သစ် အသင်းရဲ့ အသက်အကြီးဆုံးဂိုးသွင်းရှင်ဖြစ်လာခဲ့ပါတယ်။

ဒီပွဲမှာ ပြင်သစ်အသင်းဟာ သြစတြီးယားအသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဂီရောဒ့်နဲ့ ဘတ်ပီ တို့က ၁ ဂိုးစီသွင်းယူခဲ့ကြတာပါ။အေစီမီလန်တိုက်စစ်မှူးဟာ သြစတြီးယားဘက်ကို ဂိုးသွင်းယူချိန်မှာ အသက် ၃၅ နှစ်နဲ့ ၃၅၇ ရက်ရှိနေပြီး အရင်စံချိန်တင်ထားတဲ့ မာချီက ၃၅ နှစ်နဲ့ ၂၈၇ ရက် ဖြစ်ပါတယ်။ အဲဒါကြောင့် ဂီရောဒ့်ဟာ ပြင်သစ်အသင်းရဲ့ အသက်အကြီးဆုံး ဂိုးသွင်းရှင်ဖြစ်လာခဲ့တာပါ။ ဒီပွဲမှာ သွင်းယူတဲ့ဂိုးကြောင့် ဂီရောဒ့်ဟာ ပြင်သစ်အတွက် ၄၉ ဂိုးအထိသွင်းယူထားနိုင်ခဲ့ပြီ ဖြစ်ပါတယ်။

ဒါကြောင့် ပြင်သစ်အသင်းအတွက် ၅၁ ဂိုးနဲ့ ဂိုးသွင်းအများဆုံးကစားသမားအဖြစ် ရပ်တည်နေတဲ့ အွန်နရီ ရဲ့ စံချိန်ကို လိုက်မှီဖို့ ဂီရောဒ့်အတွက် သွင်းဂိုး ၂ ဂိုးသာ လိုတော့တာပါ။

ဂီရောဒ့်ဟာ ဒီရာသီမှာ အေစီ မီလန်အတွက် ခြေစွမ်းပြသနေသလို အဓိကတိုက်စစ်မှူး ဘန်ဇီမာ ဒဏ်ရာရနေတာကြောင့် ပြင်သစ် လက်ရွေးစင်အသင်း လူစာရင်းမှာ ပြန်လည်ရွေးချယ်ခံခဲ့ရတာ ဖြစ်ပါတယ်။အာဆင်နယ်နဲ့ ချယ်လ်ဆီး တိုက်စစ်မှူးဟောင်းဟာ ၂၀၁၈ ကမ္ဘာ့ဖလားရခဲ့တုန်းကလည်း ပြင်သစ်အတွက် ခြေစွမ်းပြသနိုင်ခဲ့တာပါ။

ဂီရောဒ့်ဟာ တိုက်ပွဲဝင်စိတ်ဓါတ်အပြည့်ရှိတဲ့သူလို့ လက်ရွေးစင်အသင်းဖော် ကလောစ့်က ချီးကျူးသွားခဲ့ ပါတယ်။ “ဂီရော့ဒ်ဟာ သူ့ကိုယ်သူသစ္စာရှိပါတယ်။သူဟာ ကွင်းထဲမှာဆို အသင်းအတွက် အရာအားလုံး ကို ပေးစွမ်းနိုင်တဲ့သူပါ။ကျနော်သူ့ကို ချီးကျူးဂုဏ်ပြုရမှာပါ။ဒါဟာ မလွယ်ကူပါဘူး။သူ့ဆီမှာ တိုက်ပွဲဝင် စိတ်ဓါတ်အပြည့်အဝရှိတယ်”လို့ ကလော့စ်က ပြောခဲ့တာပါ။

ဂီရောဒ့်ဟာ ပြင်သစ်အသင်းနဲ့အတူ ၂၀၁၄၊ ၂၀၁၈ ကမ္ဘာ့ဖလားပြိုင်ပွဲတွေမှာ ပါဝင်ခဲ့တာကြောင့် တတိယ အကြိမ်မြောက်အနေနဲ့ ၂၀၂၂ ကမ္ဘာ့ဖလားပြိုင်ပွဲမှာ ပါဝင်နိုင်ဖို့ မျှော်လင့်နေတာဖြစ်ပါတယ်။ ပြင်သစ် အသင်းအတွက်တော့ သြစတြီးယားကို အနိုင်ရတဲ့ပွဲဟာ နေးရှင်းလိဂ် ၅ ပွဲကစားအပြီးမှာ ပထမဆုံးရခဲ့တဲ့ နိုင်ပွဲလည်း ဖြစ်ခဲ့တာပါ။

ပြင်သစ်အသင်းဟာ စက်တင်ဘာလ ၂၆ ရက်မှာ နေးရှင်းလိဂ်အုပ်စုနောက်ဆုံးပွဲစဉ်အဖြစ် ဒိန်းမတ် အသင်းနဲ့ ယှဉ်ပြိုင်ရမှာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ စက်တင်ဘာ ၂၂

ဂျာမနီလက်ရွေးစင်အသင်းရဲ့ အဓိကကစားသမား ၂ ဦးဖြစ်တဲ့ နူအာနဲ့ ဂေါ်ရက်စကာတို့ဟာ ကိုဗစ်ကူးစက်မှု ကြောင့် ဟန်ဂေရီ၊ အင်္ဂလန်တို့နဲ့ ကစားမယ့် နေးရှင်းလိဂ်ပွဲစဉ်တွေကို ပါဝင်နိုင်တော့မှာ မဟုတ်ဘူးလို့ သိရပါ တယ်။

ဘိုင်ယန်မြူးနစ် ကစားသမား ၂ ဦးကို လက်ကျန် အသင်းသားတွေနဲ့ သီးခြားထားထားပြီး သူတို့တွေဟာ ဟိုတယ် ကနေ ထွက်ခွာသွားကြပြီလို့ သိရတာပါ။

ဒါ့အပြင် ဂျူလီယန်ဘရန့်ဒ်ကလည်း တုပ်ကွေးကြောင့် အသင်းလူစာရင်းကနေ ထွက်ခွာခဲ့ပေမယ့် ကိုဗစ်ကူးစက်မှု တော့ မရှိပါဘူး။ ဂျာမနီအသင်းဟာ နူအာရဲ့ နေရာမှာ အစားထိုးဖို့အတွက် ဟော်ဖန်ဟိန်းဂိုးသမား အိုလီဗာဘိုးမန်း ကို ခေါ်ယူခဲ့ပြီး သူဟာ လက်ရွေးစင်အတွက် တစ်ပွဲမှ ပါဝင်ကစားထားရခြင်း မရှိတာပါ။

ဂျာမနီအသင်းဟာ နေးရှင်းလိဂ် ၄ ပွဲကစားပြီးချိန်မှာ ၁ ပွဲနိုင် ၃ ပွဲသရေနဲ့ အုပ်စုတွင်း ဒုတိယနေရာမှာ ရပ်တည်နေ တာ ဖြစ်ပါတယ်။ ဂျာမနီအသင်းဟာ သောကြာနေ့မှာ အုပ်စုထိပ်ဆုံးနေရာက ဟန်ဂေရီနဲ့ ယှဉ်ပြိုင်ရမှာဖြစ်ပြီး အင်္ဂလန်အသင်းနဲ့ တနင်္လာနေ့ ဝင်ဘာလေမှာ ယှဉ်ပြိုင်ရမှာပါ။

ဂေါ်ရက်စကာနဲ့ နူအာကိုတွေ့ရစဉ် (Bavarian Football)

အသက် ၃၆ နှစ်အရွယ်ရှိ ဂျာမနီအသင်းခေါင်းဆောင် နူအာဟာ လက်ရွေးစင်အသင်းရဲ့ နေးရှင်းလိဂ် ပွဲစဉ် အားလုံး ကို ပါဝင်ကစားထားတာ ဖြစ်ပါတယ်။

ဂေါ်ရက်စကာကတော့ နေးရှင်းလိဂ် ပွဲစဉ် ၂ ပွဲသာ ပွဲစကတည်းက ပါဝင်ခဲ့ရပြီး မြူးနစ်မှာ ကစားခဲ့တဲ့ အင်္ဂလန်နဲ့ ပွဲမှာတော့ လူစားဝင် ကစားသမားအဖြစ်သာ ပါဝင်ခဲ့တာပါ။

ဂျာမနီအသင်းဟာ နည်းပြ ဟန်ဆီဖလစ်ခ် လက်အောက်မှာ ရလဒ်ပိုင်း ကောင်းမွန်နေပြီး ၁၃ ပွဲ ကစားထားခဲ့တာ မှာ ၉ ပွဲနိုင်၊ ၄ ပွဲသရေ ရှုံးပွဲ မရှိထားတာ ဖြစ်ပါတယ်။ ဂျာမနီအသင်းဟာ ကမ္ဘာ့ဖလားပြိုင်ပွဲ မတိုင်ခင် အိုမန်နဲ့ ခြေစမ်းပွဲကစားဖို့လည်း စီစဉ်ထားတာပါ။

ဂျာမနီအသင်းဟာ ၂၀၂၂ ကမ္ဘာ့ဖလားပြိုင်ပွဲမှာ ဂျပန်၊ စပိန်၊ ကော်စတာရီကာတို့နဲ့ တစ်အုပ်စုတည်း ကျရောက်နေ တာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ စက်တင်ဘာ ၂၂

ရှုံးပွဲမရှိ လက်ဝှေ့သမားဟောင်း မေဝယ်သာက UFC ဖိုက်တာ မက်ဂရီဂေါနဲ့ လာမယ့်နှစ်မှာ သရုပ်ပြပွဲ ထိုးသတ် ချင်တယ်လို့ ပြောလိုက်ပါတယ်။

မေဝယ်သာက “ဒါက သရုပ်ပြပွဲလား ဒါမှမဟုတ် တကယ်ထိုးသတ်ရမယ့် ပွဲလားဆိုတာ ကျနော်မသိပါဘူး။ ကျနော်ကတော့ သရုပ်ပြပွဲ ထိုးသတ်ရတာ ပိုပြီးကြိုက်နှစ်သက်တယ်လို့” ဒေးလီးမေးလ်နဲ့ အင်တာဗျူးမှာ ပြောခဲ့ပါတယ်။

မက်ဂရီဂေါကတော့ ဒီပွဲကို စိတ်ဝင်စားခြင်း မရှိဘူးလို့ သူတို့ နှစ်ဦး အရင်ထိုးသတ်ခဲ့တဲ့ပုံကို အင်စတာဂရမ်မှာ တင်ပြီး စာရေးသားခဲ့တာ ဖြစ်ပါတယ်။

မေဝယ်သာနဲ့ မက်ဂရီဂေါတို့ဟာ ၂၀၁၇ က အမေရိကန်မှာ ထိုးသတ်ခဲ့ပြီး မေဝယ်သာက ၁၀ ချီမြောက်မှာ အနိုင်ရ ခဲ့တာပါ အမေရိကန် လက်ဝှေ့ သမားဟောင်းဟာ ဒီတစ်ပတ်ထဲ ဂျပန်မှာ ပြုလုပ်မယ့် သရုပ်ပြပွဲမှာ MMA ကြယ်ပွင့် အဆာကူရာနဲ့ ထိုးသတ်ဖို့ ရှိနေပါတယ်။

မေဝယ်သာနဲ့ မက်ဂရီဂေါကို တွေ့ရစဉ် (Sky Sports)

ပရော်ဖက်ရှင်နယ် လက်ဝှေ့ပွဲပေါင်း ၅၀ ထိုးသတ်ထားတာမှာ ပွဲပေါင်း ၅၀ စလုံး အနိုင်ရခဲ့တဲ့ မေဝယ်သာဟာ ပြီးခဲ့တဲ့နှစ်က You Tube ကြယ်ပွင့် လိုဂန်ပေါလ်နဲ့ ပွဲစဉ်အပါအဝင် သရုပ်ပြပွဲ အများအပြား ထိုးသတ်ထားတာပါ။

မက်ဂရီဂေါကတော့ မေဝယ်သာကို အရေးနိမ့်တဲ့ ပွဲစဉ်အပြီးမှာ UFC ပြိုင်ပွဲတွေကို ပြန်လည် ယှဉ်ပြိုင်ခဲ့ပေမယ့် ရလဒ်ပိုင်း ဆိုးရွားခဲ့ပြီး နောက်ဆုံး ထိုးသတ်ခဲ့တဲ့ ၄ ပွဲမှာ ၃ ပွဲအထိ အရေးနိမ့်ထားတာ ဖြစ်ပါတယ်။

အိုင်ယာလန်ဖိုက်တာဟာ ၂၀၂၁ က နောက်ဆုံးထိုးသတ်ခဲ့တဲ့ ပွဲမှာ ဒတ်စတင်ပိုရီရာကို အရေးနိမ့်ပြီး ခြေထောက် ကျိုး သွားခဲ့တာပါ။ အဲ့ဒါကြောင့် ခြေထောက်ကျိုးတာကနေ ပြန်လည် သက်သာ ကောင်းမွန်လာအောင် မက်ဂရီဂေါ လုပ်ဆောင်နေတာ ဖြစ်ပါတယ်။

UFC ဝိတ်တန်း ၂ ခု ချန်ပီယံဟောင်း မက်ဂရီဂေါဟာ လာမယ့်နှစ် အစောပိုင်းမှာ ပြိုင်ပွဲတွေ ထိုးသတ်ဖို့ ရှိနေ တယ်လို့ သတင်းတွေ ထွက်ပေါ်နေတာပါ။ မက်ဂရီဂေါဟာ UFC ပြိုင်ပွဲကနေ အနားယူပြီးတာနဲ့ လက်ဝှေ့ကြိုး ဝိုင်းထဲ ဝင်ရောက်ဖို့ ရည်ရွယ်ထားကြောင်း ပြောထားတာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ စက်တင်ဘာ ၂၂

KFC ပြင်သစ်ဟာ စပွန်ဆာပေးနေတာကို ရပ်လိုက်မယ်ဆိုပြီး အမှုဆောင်အရာရှိရဲ့ ခြိမ်းခြောက်မှုတွေ အတွက် ဘတ်ပီနဲ့ ပြင်သစ်လက်ရွေးစင်အသင်းကို တောင်းပန်လိုက်ပါတယ်။

“KFC ပြင်သစ်က မနေ့က ပြောခဲ့တဲ့စကားတွေအတွက် နောင်တရနေပါတယ်။ဒါတွေဟာ ကိုယ်ပိုင် ထင်မြင်ချက်တွေဖြစ်ပြီး ကုမ္ပဏီရဲ့အနေအထားအပေါ် ဘယ်လိုမှထင်ဟပ်မှုမရှိပါဘူး။ ပြင်သစ်ဘောလုံး အဖွဲ့ချုပ်နဲ့ ပူးပေါင်းဆောင်ရွက်မှုဟာ ကျနော်တို့အတွက် အမြဲတမ်းဂုဏ်ယူစရာဖြစ်ပါတယ်” လို့ အဆိုပါ ကုမ္ပဏီက ကြေညာချက်ထုတ်ပြန်ခဲ့တာပါ။

ပြင်သစ်လက်ရွေးစင်တိုက်စစ်မှူး ဘတ်ပီဟာ KFC ရဲ့ ဈေးကွက်ရှာဖွေရေးလှုပ်ရှားမှုဖြစ်တဲ့ အသင်းလိုက် ဓါတ်ပုံ ရိုက်ကူးရာမှာ ပါဝင်ဖို့ ငြင်းဆန်ခဲ့တာ ဖြစ်ပါတယ်။အဲဒါကြောင့် KFC ပြင်သစ် ဒုဥက္ကဋ္ဌ ဘီရယ်လ် က ဘတ်ပီဟာ အသင်းရဲ့ အရောင်းမြှင့်တင်ရေးလုပ်ငန်းမှာ ပါဝင်ဖို့ ငြင်းဆန်ခဲ့တာကြောင့် နိုင်ငံ လက် ရွေးစင်အသင်းကို စပွန်ဆာပေးတာ ရပ်တန့်မယ်လို့ ပြောခဲ့တာပါ။ဒါပေမယ့် ကုမ္ပဏီက ဒီလို တောင်းဆို မှုတွေကို ငြင်းဆန်သွားခဲ့ပါတယ်။

ဘတ်ပီဟာ ဒီလိုမပါဝင်ဖို့ ငြင်းဆန်ခဲ့ပြီးနောက် ပြင်သစ်လက်ရွေးစင်အသင်းက သူတို့ရဲ့ကြော်ငြာနဲ့ ပုံရိပ် အသုံးပြုခွင့်ဆိုင်ရာ မူဝါဒတွေကို ပြောင်းလဲမယ်လို့ ပီအက်စ်ဂျီတိုက်စစ်မှူးကို ပြောကြားခဲ့ကြောင်း သတင်းမှာ ဖော်ပြထားတာပါ။ပြင်သစ်အသင်းဟာ ၂၀၂၂ ကမ္ဘာ့ဖလားပြိုင်ပွဲမတိုင်ခင် နောက်ဆုံး နိုင်ငံတကာပွဲစဉ်ဖြစ်တဲ့ နေးရှင်းလိဂ်ပွဲစဉ်အဖြစ် သြစတြီးယား၊ ဒိန်းမတ်အသင်းတို့နဲ့ ယှဉ်ပြိုင်သွားမှာ ဖြစ်ပါတယ်။

ဘတ်ပီဟာ ပြင်သစ်လက်ရွေးစင်အသင်းအတွက် ၅၇ ပွဲပါဝင်ကစားထားပြီး ၂၇ ဂိုးသွင်းယူကာ ၂၀၁၈ ကမ္ဘာ့ဖလားရယူခဲ့တုန်းက အသင်းအတွက် ခြေစွမ်းပြသနိုင်ခဲ့တာ ဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ စက်တင်ဘာ ၂၂

စပိန်သတင်းစာ EI Mundo ကတော့ မက်ဆီဟာ ၂၀၂၀ နွေရာသီက ဘာစီလိုနာအသင်းနဲ့ စာချုပ်သစ် ချုပ်ဆိုဖို့ အတွက် တောင်းဆိုခဲ့တဲ့ အချက်အလက်တွေကို ဖော်ပြလိုက်ပါတယ်။

ဒါပေမယ့် စာချုပ်သစ်အတွက် ဆွေးနွေးညှိနှိုင်းမှုတွေ ပြုလုပ်တာမှာ အဆင်မပြေခဲ့တာကြောင့် မက်ဆီဟာ ၂၀၂၁ နွေရာသီမှာ ၂၁ နှစ်ကြာ ကစားခဲ့တဲ့ ဘာစီလိုနာကနေ ထွက်ခွာပြီး ပီအက်စ်ဂျီအသင်းထံ အလွတ်ပြောင်းရွှေ့ကြေး နဲ့ ရောက်ရှိသွားခဲ့တာပါ။

မက်ဆီဟာ ဘာစီလိုနာနဲ့ စာချုပ်သစ်အတွက် တောင်းဆိုခဲ့တဲ့ အချက် ၉ ချက်အထိ ရှိခဲ့တာဖြစ်ပါတယ်။ ဒီထဲမှာ နံပါတ် ၁ အချက်ကတော့ မက်ဆီဟာ ၃ နှစ်သက်တမ်းတိုး စာချုပ်ချုပ်ဆိုဖို့ ပြောခဲ့တာပါ။

နံပါတ် ၂ မှာတော့ မက်ဆီဟာ သူ့ရဲ့ မိသားစုနဲ့ ဆွာရက်စ် မိသားစုတို့အတွက် နူးကမ့်ပ်မှာ သီးသန့်အခန်း ထားရှိ ပေးဖို့ ပြောခဲ့ပြီး နံပါတ် ၃ ကတော့ စာချုပ်သစ်မှာ လတ်မှတ်ထိုးကြေးအတွက် ယူရို ၁၀ သန်းပေးချေဖို့ဆိုတဲ့ အချက်တွေပဲ ဖြစ်ပါတယ်။

ဘာစီလိုနာကနေ မက်ဆီထွက်ခွာဖို့ နှုတ်ဆက်ပွဲ(Football Espana)

ဒီနောက်မှာတော့ နံပါတ် ၄ အချက်ကတော့ မက်ဆီဟာ အသင်းနဲ့ ချုပ်ဆိုထားတဲ့ စာချုပ်ဖျက်သိမ်းကြေး ယူရို သန်း ၇၀၀ ကနေ ယူရို ၁ သောင်းအထိ လျှော့ချေပေးဖို့ တောင်းဆိုခဲ့တာပါ။ နံပါတ် ၅ မှာတော့ မက်ဆီဟာ ကိုဗစ် ကာလအတွင်းမှာ လုပ်အားခ လျှော့ယူခဲ့ရတာနဲ့ ပတ်သက်ပြီး ဒီလျှော့ချမှုကို အတိုး ၃ ရာခိုင်နှုန်းနဲ့ ပြန်ဆပ်ဖို့ လိုချင်ခဲ့တာ ဖြစ်ပါတယ်။

နံပါတ် ၆ က မက်ဆီဟာ ခရစ္စမတ်လို အားလပ်ရက်အတွင်းမှာ ကိုယ်ပိုင်ဂျက်လေယာဉ်နဲ့ မိသားစုကို အာဂျင်တီးနား ပြန်ပို့ပေးဖို့နဲ့ နံပါတ် ၇ ကတော့ စပိန်အစိုးရက အခွန်တိုးကောက်မယ်ဆိုရင် သူ့ရဲ့ လစာကိုပါ တိုးပေးဖို့ တောင်းဆိုခဲ့တာပါ။

နံပါတ် ၈ မှာတော့ သူ့ရဲ့ လက်ထောက် ပီပီကော်စတာကို လစာပေးပြီး ဆက်ထားဖို့နဲ့ နံပါတ် ၉ ကတော့ သူ့ အစ်ကို ရီဒရီဂိုမက်ဆီကိုလည်း စာချူပ်သက်တမ်းတိုးပြီး အပိုဆုကြေးပေးရမယ်ဆိုတဲ့ အချက်တွေ ဖြစ်ပါတယ်။

ဘာစီလိုနာအသင်းဟာ ဒီထဲက အချက်အများအပြားကို လက်ခံခဲ့ပြီး ၂ ချက်ကိုသာ ငြင်းဆန်ခဲ့တယ်လို့ သိရပါ တယ်။ ဘာစီလိုနာအသင်းဟာ ဒီလိုပေါက်ကြားမှုတွေနဲ့ ပတ်သက်ပြီး ဒေါသထွက်နေကာ စပိန်သတင်းစာကို တရားစွဲသွားမယ်လို့ ခြိမ်းခြောက်ထားပါတယ်။

ဒါပေမယ့် ပေါက်ကြားလာတဲ့ အချက်အလက်တွေဟာ တရားစီရင်ရေး လုပ်ငန်းစဉ်ရဲ့ တစ်စိတ်တစ်ပိုင်း ဖြစ်တယ် လို့ စပိန်ကလပ်က ပြောခဲ့ပါတယ်။

Source: Daily Mail/Sportbible