CNI Sport News

၂၀၂၂ ခုနှစ်၊ ဒီဇင်ဘာ ၉

ပြင်ပကအသံတွေလောက်နဲ့တော့ ဒီအစုအဖွဲ့က ပြိုပျက်စရာမရှိဘူးလို့ ပေါ်တူဂီ အသင်းခေါင်းဆောင် ရော်နယ်ဒို က ကမ္ဘာ့ဖလား လူစာရင်းကနေ ထွက်ခွာမယ်လို့ ခြိမ်းခြောက် ထားတယ်ဆိုတဲ့ သတင်းတွေနဲ့ ပတ်သက်ပြီး ပြင်းပြင်းထန်ထန် တုံ့ပြန်သွားခဲ့ပါတယ်။

ရော်နယ်ဒိုက “ ပြင်ပက ထွက်ပေါ်လာတဲ့ အသံတွေလောက်နဲ့တော့ ဒီအစုအဖွဲ့က ပြိုပျက်သွားစရာ အကြောင်း မရှိပါဘူး။ ကျနော်တို့က ဘယ်လို ရန်သူမျိုးကိုမဆို မကြောက်တဲ့ သတ္တိရှိတဲ့လူမျိုးပါ။ ကျနော်တို့က အိမ်မက်ကို အကောင်အထည်ဖော်ဖို့အတွက် အဆုံးထိ တိုက်ပွဲဝင်သွားမယ့် သူတွေပါ။ ကျနော်တို့ကို ယုံကြည်ပါ၊ ခွန်အား အပြည့်နဲ့ ပေါ်တူဂီ" ဆိုပြီး တွစ်တာမှာ ရေးသားခဲ့တာပါ။

ရော်နယ်ဒိုဟာ ဆွစ်ဇာလန်နဲ့ ၁၆ သင်းအဆင့် ပွဲစဉ်မှာ ပွဲထွက် မကစားရတဲ့ အပေါ်မှာ စိတ်ပျက်နေပြီး နည်းပြနဲ့ အဆင်မပြေမှုတွေလည်း ရှိတာကြောင့် ကမ္ဘာ့ဖလားလူစာရင်းကနေ ထွက်ခွာဖို့ ခြိမ်းခြောက်ခဲ့တယ်လို့ ပေါ်တူဂီ သတင်းစာ Record က ဖော်ပြခဲ့တာ ဖြစ်ပါတယ်။

ပေါ်တူဂီဘောလုံးအဖွဲ့ချုပ်က ဒီသတင်းတွေဟာ မဟုတ်မှန်ဘူးလို့ ငြင်းဆိုခဲ့သလို ရော်နယ်ဒိုကလည်း ပြန်တုန့် ပြန်ခဲ့တာပါ။

နည်းပြနဲ့ ရော်နယ်ဒိုကိုတွေ့ရစဉ်(Sport)

ရော်နယ်ဒိုဟာ မော်ရိုကိုနဲ့ ကစားမယ့် ကွာတားဖိုင်နယ် ပွဲစဉ်မှာတော့ ပွဲထွက်ခွင့်ရဖို့ မျှော်လင့်နေပေမယ့် နေရာ ရဖို့တော့ အာမခံချက် မရှိဘူးလို့ သတင်းတွေအရ သိရပါတယ်။

ဆွစ်ဇာလန်နဲ့ပွဲမှာ ဟတ်ထရစ် သွင်းယူခဲ့တဲ့ လူငယ်ကစားသမား ဂွန်ကာလိုရာမို့စ်ကိုပဲ ပေါ်တူဂီအသင်းက နေရာ ပေးဖွယ် ရှိနေတာကြောင့် ရော်နယ်ဒိုဟာ ပွဲထွက်ခွင့် ပြန်လည်ရဖို့ ကြိုးစားရဖွယ် ရှိနေပါတယ်။

ရော်နယ်ဒိုဟာ အခု ကမ္ဘာ့ဖလားပြိုင်ပွဲကို ၅ ကြိမ်မြောက်အဖြစ် ဝင်ရောက်ယှဉ်ပြိုင်နေတာ ဖြစ်ပြီး ဂါနာနဲ့ အဖွင့် ပွဲမှာ ဂိုးသွင်းယူခဲ့တာကြောင့် ကမ္ဘာ့ဖလား ၅ ကြိမ်ဆက် ဂိုးသွင်းနိုင်တဲ့ ပထမဆုံး ကစားသမားအဖြစ်လည်း မှတ်တမ်း တင်ထားပါတယ်။

အခုဆိုရင် ပေါ်တူဂီ အသင်းခေါင်းဆောင်ဟာ ပေါ်တူဂီအသင်းရဲ့ ကမ္ဘာ့ဖလား သွင်းဂိုး အများဆုံး ကစားသမား ဖြစ်တဲ့ အူဆီဘီယိုရဲ့ စံချိန်ကို လိုက်မှီဖို့အတွက်လည်း ပစ်မှတ်ထားနေပါတယ်။

အူဆီဘီယိုက ကမ္ဘာ့ဖလားသွင်းဂိုး ၉ ဂိုး သွင်းယူထားတာဖြစ်ပြီး ရော်နယ်ဒိုက ၈ ဂိုးနဲ့ ဒုတိယနေရာမှာ ရပ်တည် နေတာ ဖြစ်ပါတယ်။

Source: Goal

CNI Sport News

၂၀၂၂ ခုနှစ်၊ ဒီဇင်ဘာ ၉

အမေရိကန် ဘတ်စကတ်ဘောကြယ်ပွင့် ဘရစ်တနီဂရိုင်နာဟာ ရုရှားနဲ့ အကျဉ်းသား လဲလှယ်မှုကြောင့် လွတ်မြောက်လာခဲ့ပြီး ဖြစ်ပါတယ်။

သူမဟာ အမေရိကန်ကို ပြန်လာတော့မယ်လို့ သမ္မတဂျိုးဘိုင်ဒန်က ဒီဇင်ဘာလ ၈ ရက်နေ့မှာပဲ ပြောကြား လိုက်ပါတယ်။

ဂျိုးဘိုင်ဒန်က “ သူမ လုံခြုံပါတယ်။ သူမ လေယာဉ်ပေါ် ရောက်နေပါပြီ။ ရုရှားမှာ လပေါင်းများစွာ မတရား ဖမ်းဆီး ထိန်းသိမ်းခံရပြီးနောက် သူမ အိမ်ပြန်လာတော့မှာပါ။ ဒီလိုနေ့ ရောက်လာဖို့ ငါတို့ အချိန်အတော်ကြာ အောင် လုပ်ဆောင်ခဲ့ရပါတယ်။ သူမကို လွတ်မြောက်အောင် လုပ်နိုင်ဖို့အတွက် ငါတို့ ဘယ်တုန်းကမှ မရပ်တန့် ခဲ့ပါဘူး”လို့ အိမ်ဖြူတော်မှာ သတင်းထောက်တွေကို ပြောခဲ့တာပါ။

ရုရှားနိုင်ငံခြားရေးဝန်ကြီးဌာနက သူတို့ဟာ ဘရစ်တနီဂရိုင်နာကို လက်နက် ရောင်းဝယ်သူဟောင်းဖြစ်တဲ့ သူတို့ နိုင်ငံသား ဗစ်တာဘောက်နဲ့ လဲလှယ်ခဲ့တာလို့ ပြောခဲ့ပါတယ်။

သူတို့ ၂ ဦး လဲလှယ်မှုကို ယူအေအီးနိုင်ငံ အဘူဒါဘီလေဆိပ်မှာ လုပ်ဆောင်ခဲ့တာလို့ ရုရှားသတင်းအေဂျင်စီက ဖော်ပြထားပါတယ်။

ဘရစ်တနီဂရိုင်နာနဲ့ လဲလှယ်ခဲ့တဲ့ ရုရှားအကျဉ်းသားကိုတွေ့ရစဉ် (Black Enterprise)

အသက် ၃၂ နှစ်အရွယ်ရှိ ဘရစ်တနီဂရိုင်နာဟာ ဖေဖော်ဝါရီ ၁၇ ရက်က မော်စကိုလေဆိပ်မှာ ဆေးခြောက်ဆီတွေ သယ်ဆောင်လာတဲ့အတွက် ဖမ်းဆီးထိန်းသိမ်း ခံခဲ့ရတာ ဖြစ်ပါတယ်။

အမေရိကန်သမ္မတ ဂျိုးဘိုင်ဒန်၊ ဒုသမ္မတ ဟာရစ်တို့ဟာ ချီရယ်လ်ဂရိုင်နာနဲ့အတူ Oval Office မှာ ဘရစ်တနီ ဂရိုင်နာနဲ့ ဖုန်းပြောခဲ့ကြပါတယ်။

ဘရစ်တနီဂရိုင်နာဟာ ရုရှားက တားမြစ် ပိတ်ပင်ထားတဲ့ အရာတွေကို သယ်ဆောင်ခဲ့တာကြောင့် မူးယစ်ဆေးဝါး လက်ဝယ် တွေ့ရှိပြီး မှောင်ခိုရောင်းဝယ်မှု စွဲချက်ကြောင့် ထောင်ဒဏ် ၉ နှစ် ချမှတ်ခံခဲ့ရတာ ဖြစ်ပါတယ်။

ဘရစ်တနီဂရိုင်နာက သူမ အပြစ်ရှိကြောင်း ဝန်ခံခဲ့ပေမယ့် ရိုးသားတဲ့ အမှားကို ကျူးလွန်ခဲ့တာဖြစ်ပြီး ဥပဒေ ချိူးဖောက်ခဲ့ခြင်း မရှိဘူးလို့ ပြောခဲ့ပါတယ်။

ဂျိုးဘိုင်ဒန်က ဘရစ်တနီဂရိုင်နာ လွတ်မြောက်လာပြီးနောက် မရိန်းတပ်သားဟောင်းဖြစ်တဲ့ ပေါလ်ဝီလန် လွတ်မြောက်ဖို့ အတွက်လည်း ဆက်လက် လုပ်ဆောင်သွားမယ်လို့ ပြောခဲ့ပါတယ်။ ဒါ့အပြင် ဘရစ်တနီဂရိုင်နာ ပြန်လာနိုင်ဖို့အတွက် အဆင်ပြေအောင် ကူညီပေးခဲ့တဲ့ ယူအေအီးနိုင်ငံကို ကျေးဇူးတင်ကြောင်းလည်း ဂျိုးဘိုင်ဒန်က ပြောပါတယ်။

ဘရစ်တနီဂရိုင်နာဟာ အမေရိကန်အမျိုးသမီး ဘတ်စကတ်ဘော အသင်းနဲ့အတူ အိုလံပစ်ရွှေတံဆိပ် ၂ ကြိမ်နဲ့ ကမ္ဘာ့ဖလားချန်ပီယံဆု ၂ ကြိမ် ရယူထားတာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ ဒီဇင်ဘာ ၈

ခရိုအေးရှားအသင်း နောက်ခံလူ လိုဗရန်က ဘရာဇီးလ်အသင်းဟာ ကွင်းထဲမှာ ကစားဖို့ အရည်အချင်း ပြည့်မီတဲ့ ၂ သင်းစာ လူစာရင်း ရှိတယ်လို့ ပြောလိုက်ပါတယ်။

လိုဗရန်က “ ဘရာဇီးလ်အသင်းဟာ ပြိုင်ပွဲမတိုင်ခင် ကတည်းက ဗိုလ်စွဲဖို့ ရေပန်းစားနေတဲ့ အသင်းပါ။ သူတို့ဟာ ဒီလိုအဆင့်မျိုးမှာ ကစားနိုင်ဖို့အတွက် ၂ သင်းစာ ရှိပါတယ်။ လူစားလဲ ဝင်ရာက်တဲ့ ကစားသမားတိုင်းဟာ ချက်ချင်း ဆိုသလိုကို အကျိုးသက်ရောက်မှုတွေ ပေးပါတယ်”လို့ ပြောခဲ့တာပါ။

ဘရာဇီးလ်အသင်းဟာ ၁၆ သင်းအဆင့်မှာ တောင်ကိုရီးယားကို ၄ ဂိုး- ၁ ဂိုးနဲ့ အနိုင်ရခဲ့တာဖြစ်ပြီး ခရိုအေးရှား အသင်းက ဂျပန်အသင်းကို ပင်နယ်တီ အဆုံးအဖြတ်မှာ အနိုင်ရပြီး ကွာတားဖိုင်နယ်ကို တက်ရောက် နိုင်ခဲ့တာ ဖြစ်ပါတယ်။
ခရိုအေးရှားအသင်းဟာ ပြီးခဲ့တဲ့ ၂၀၁၈ ပြိုင်ပွဲမှာ ဒုတိယရရှိခဲ့ပြီး ဘရာဇီးလ်အသင်းက ကွာတားဖိုင်နယ်ကနေ ထွက်ခဲ့ရတာပါ။

ဘရာဇီးလ်အသင်းကိုတွေ့ရစဉ် (Forbes )

ကိုဗာဆစ်က “ ကျနော်တို့ဟာ ရုပ်ပိုင်းဆိုင်ရာ ကောင်းတဲ့ပုံစံကို ပြသခဲ့ပါတယ်။ ကမ္ဘာ့ဖလားပွဲစဉ်တွေမှာ ကျနော်တို့ဟာ အလုပ်တွေ အများကြီး လုပ်ဆောင်ခဲ့ပါတယ်။ ဂျပန်အသင်းဟာ စည်းကမ်းပိုင်းဆိုင်ရာမှာ အလွန်ကောင်းမွန်တာကြောင့် သူတို့ကို ဖြိုဖျက်နိုင်ဖို့က ခက်ခဲခဲ့ပါတယ်။ ဒါပေမယ့် ကျနော်တို့ ရုပ်ပိုင်းဆိုင်ရာ ကြံ့ခိုင်မှုကို အများကြီးပြသခဲ့ပြီး ပိုပြီးကောင်းမွန်အောင် ကစားနိုင်မယ်ဆိုတာ ယုံကြည်တယ်”လို့ ပြောခဲ့ပါတယ်။

ဘရာဇီးလ်အသင်းဟာ ဒဏ်ရာကြောင့် အုပ်စုနောက်ဆုံး ပွဲစဉ် ၂ ပွဲကို မပါဝင်နိုင်ခဲ့တဲ့ နေမာနဲ့ ဒန်နီလိုတို့ဟာ တောင်ကိုရီးယားနဲ့ ပွဲမှာ ပြန်လည် ပါဝင်လာခဲ့တာကြောင့် တိုက်စစ်ပိုင်းက ပိုမိုကောင်းမွန်သွားခဲ့တာပါ။

ဒါ့အပြင် နောက်ခံလူ တစ်ဦးဖြစ်တဲ့ အဲလက်စ်ဆန်ဒရိုလည်း ခရိုအေးရှားနဲ့ ကွာတားဖိုင်နယ်ပွဲစဉ်မှာ ပါဝင်နိုင်ဖွယ် ရှိနေပါတယ်။

လိုဗရန်က “ သူတို့ကို ကျနော်တို့ ဘယ်လို ရပ်တန့်မလဲဆိုရင်တော့ ရိုးရှင်းပါတယ်။ ကျနော်တို့ရဲ့ ရည်မှန်းချက်က ဘရာဇီးလ် တစ်သင်းလုံးကို ရပ်တန့်ဖို့အတွက် ကြိုးစားသွားမှာပါ။ ဒါဟာ အလွန်ခက်ခဲတဲ့ ပွဲဖြစ်လာပါလိမ့် မယ်”လို့ ပြောခဲ့တာပါ။
ခရိုအေးရှားနဲ့ ဘရာဇီးလ်အသင်းတို့ဟာ ဒီဇင်ဘာလ ၉ ရက်မှာ အခုနှစ် ကမ္ဘာ့ဖလား ကွာတားဖိုင်နယ် ပထမဆုံး ပွဲစဉ်အဖြစ် ယှဉ်ပြိုင်ကြမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ ဒီဇင်ဘာ ၈

အင်္ဂလန်အသင်းနောက်ခံလူ ကိုင်လီဝေါလ်ကာက ဘတ်ပီကို ကော်ဇောနီ ခင်းပေးပြီး ဂိုးသွင်းလို့ရအောင် လုပ်မှာ မဟုတ်ဘူးလို့ ပြင်သစ်အသင်းနဲ့ ပွဲမတိုင်ခင် ပြောကြားလိုက်ပါတယ်။

ကိုင်လီဝေါလ်ကာက “ ဒီပွဲက အင်္ဂလန်နဲ့ ဘတ်ပီပွဲ မဟုတ်ပါဘူး။ အင်္ဂလန်နဲ့ ပြင်သစ်ပွဲပါ။ ကျနော်တို့ လေးစား မှုတွေ ပေးပါမယ်။ ဒါပေမယ့် ကျနော် သူ့အတွက် ကော်ဇောနီခင်းပေးပြီး ဂိုးသွင်းလို့ရအောင်တော့ မလုပ်ပါဘူး။ ကျနော်တို့ ရှုံးရင် အိမ်ပြန်ရမှာဖြစ်လို့ အကောင်းဆုံးလုပ်မလား ဒါမှမဟုတ် အသေခံမလားပဲ ရှိတာပါ”လို့ ပြောခဲ့ တာပါ။

အင်္ဂလန်နဲ့ ပြင်သစ်အသင်းတို့ဟာ စနေနေ့မှာ ကမ္ဘာ့ဖလား ကွာတားဖိုင်နယ် ပွဲစဉ်အဖြစ် ယှဉ်ပြိုင်ရမှာဖြစ်ပြီး ဒီပွဲမတိုင်ခင် ပြုလုပ်တဲ့ သတင်းစာ ရှင်းလင်းပွဲမှာ ဘတ်ပီနဲ့ ပတ်သက်တဲ့ မေးခွန်းကို ကိုင်လီဝေါလ်ကာ မေးမြန်း ခံခဲ့ရတာ ဖြစ်ပါတယ်။

ကိုင်လီဝေါလ်ကာနဲ့ ဘတ်ပီတို့ဟာ ကလပ်အသင်းအဆင့် ချန်ပီယံလိဂ် ပွဲစဉ်တွေမှာ ထိပ်တိုက် တွေ့ဆုံမှုတွေ ရှိခဲ့တာပါ။

ကိုင်လီဝေါလ်ကာကို တွေ့ရစဉ် (ESPN)

ကိုင်လီဝေါလ်ကာက “ သူ့ကိုရပ်တန့်ဖို့ ကျနော် ဘာလုပ်ရမလဲဆိုတာကို နားလည်ပါတယ်။ ပြောရတာက ပိုပြီး လွယ်ကူပေမယ့် ကျနော်ကတော့ ကိုယ့်ကိုယ်ကို လျှော့မတွက်ပါဘူး။ ကျနော်ကတော့ ဘတ်ပီနဲ့ ထိုက်တန်တဲ့ လေးစားမှုကို ပေးမှာပါ။ ဒါပေမယ့် အများကြီးတော့ မဟုတ်ပါဘူး။ ဘာဖြစ်လို့လဲဆိုရင်တော့ ဒါက အင်္ဂလန် ဖြစ်နေလို့ပါ။ ကျနော်တို့ဟာ အသင်းလိုက် လုပ်ဆောင်ရမှာပါ။ ဒါက တင်းနစ် မဟုတ်သလို တစ်ဦးတည်း ကစား ရတဲ့ အားကစားနည်း မဟုတ်ပါဘူး”လို့ ပြောပါတယ်။

ဘီဘီစီရဲ့ အားကစား သုံးသပ်သူဖြစ်တဲ့ အင်္ဂလန် ကစားသမားဟောင်း ဂယ်ရီလိုင်နီကာက ဘတ်ပီရဲ့ ခြိမ်းခြောက် မှုတွေကို ထိန်းချုပ်နိုင်ဖို့အတွက် ဆီနီဂေါအသင်းကို အနိုင်ရတဲ့ ၁၆ သင်းအဆင့်ပွဲမှာ ဝေါလ်ကာကို အနားပေးဖို့ တောင် ပြောခဲ့တာပါ။

မန်စီးတီးအသင်း နောက်ခံလူဟာ ဘတ်ပီကို ချန်ပီယံလိဂ်မှာ တွေ့ဆုံခဲ့တုန်းက အကောင်းဆုံး ထိန်းနိုင်ခဲ့တာ ကြောင့် ဒီပွဲမှာလည်း ဒီလို လုပ်ဆောင် နိုင်မယ်လို့ အားလုံးက မျှော်လင့်နေကြတာ ဖြစ်ပါတယ်။

ဘတ်ပီကတော့ လက်ရှိ ကမ္ဘာ့ဖလားပြိုင်ပွဲရဲ့ အကောင်းဆုံး ကစားသမားတွေထဲက ၁ ဦးအဖြစ် သတ်မှတ်ခံ ရ လောက်အောင် ခြေစွမ်းပြ ဂိုးတွေ သွင်းယူနေတာပါ။

ပြင်သစ်တိုက်စစ်မှူး ဘတ်ပီဟာ ၂၀၂၂ ကမ္ဘာ့ဖလားပြိုင်ပွဲမှာ ၅ ဂိုး သွင်းယူထားပြီး ဂိုးသွင်းအများဆုံး ရွှေဖိနပ်ဆု ရယူဖို့ ဦးဆောင်နေပါတယ်။

CNI Sport News

၂၀၂၂ ခုနှစ်၊ ဒီဇင်ဘာ ၈

ယူနိုက်တက်အသင်းနည်းပြ အဲရစ်တန်ဟတ်က ကာဒစ်ဇ်အသင်းကို ၄ ဂိုး- ၂ ဂိုးနဲ့ အရေးနိမ့်ခဲ့တဲ့ ခြေစမ်းပွဲမှာ အသင်းရဲ့ စွမ်းဆောင်ရည်ဟာ လက်ခံနိုင်စရာမရှိဘူးလို့ ပြောလိုက်ပါတယ်။

အဲရစ်တန်ဟတ်က “ကျနော်တို့ မနိုးထသေးဘူးဆိုတာ ရှင်းပါတယ်။ပထမ ၁၅ မိနစ်အတွင်းမှာ ကျနော်တို့ အိမ်ပျော်နေတုန်းပဲရှိပါသေးတယ်။ကျနော်တို့က ပြင်ဆင်ခဲ့ပြီး ဒုတိယဂိုးရဖို့ မြင်တွေ့ခဲ့ရပေမယ့် ဒါက ဖြစ်မလာခဲ့ပါဘူး။ကျနော်တို့ ခံစစ်ပိုင်းရော ကွင်းလယ်ပိုင်းရော ဆိုးရွားခဲ့ပါတယ်။ဒါက မဖြစ်နိုင်သလို၊ လက်ခံစရာ အကြောင်းလည်းမရှိပါဘူး” လို့ MUTV ကို ပြောခဲ့တာပါ။

ယူနိုက်တက်အသင်းဟာ ကလပ်အသင်းပွဲတွေပြန်မလာခင် ခြေစမ်းပွဲအဖြစ် စပိန်ကလပ် ကာဒစ်ဇ်အသင်းနဲ့ ကစားခဲ့တာမှာ ပထမပိုင်း မိနစ် ၂၀ အတွင်း သွင်းဂိုး ၂ ဂိုးခွင့်ပြုခဲ့ရတာဖြစ်ပါတယ်။ယူနိုက်တက်အသင်းရဲ့ အဓိကကစားသမားအများအပြားဟာ ကမ္ဘာ့ဖလားပြိုင်ပွဲယှဉ်ပြိုင်နေတာကြောင့် ပထမပိုင်းမှာဆို ဒူဘရာကာ၊ ဝမ်ဘစ်စကာ၊ လင်ဒီလောဖ့်၊ တိုမီနေး၊ ဗန်ဒီဘိခ်နဲ့ မာရှယ်တို့ကို ပွဲထွက်အသုံးပြုခဲ့တာပါ။

ဒုတိယပိုင်းမှာတော့ ဂိုးသမား ဒူဘရာကာကလွဲပြီး လူငယ်ကစားသမားတွေကို ထည့်သွင်းခဲ့တာဖြစ်ပါတယ်။ ယူနိုက်တက်အသင်းဟာ ပထမပိုင်းမှာ ၂ ဂိုး၊ ဒုတိယပိုင်းမှာ ၂ ဂိုး ခွင့်ပြုခဲ့ရပြီး ချေပဂိုး ၂ ဂိုးကိုတော့ မာရှယ်နဲ့ လူငယ်ကစားသမား ကိုဘီမေနိုတို့က သွင်းယူခဲ့တာပါ။ယူနိုက်တက်အသင်းဟာ ဒီပွဲမှာ ဘောလုံးပိုင်ဆိုင်မှု ၄၈ ရာခိုင်နှုန်းနဲ့ ဂိုးပေါက်တည့်မှု ၃ ကြိမ်သာရှိခဲ့တာဖြစ်ပါတယ်။

အဲရစ်တန်ဟတ်က “ဒီပွဲအတွက် ကျနော်မပျော်ရွှင်ပါဘူး။ရှုံးသွားတယ်ဆိုရင်တောင် အပေါင်းလက္ခဏာဆောင်တဲ့ အရာတွေအမြဲရှိပေမယ့် အခုက အနုတ်လက္ခဏာဆောင်တဲ့အရာတွေပဲ ပိုပြီးရှိလာပါတယ်။ဒါပေမယ့် သေးငယ်တဲ့ အမှားလေးတွေက ကြီးမားတဲ့ အကျိုးဆက်ရနိုင်တယ်ဆိုတာ သင်ခန်းစာကောင်းတခုပါပဲ။ဒီလိုဖြစ်ခဲ့တာကြောင့် လည်း ပွဲကို အရေးနိမ့်ခဲ့တာ”လို့ ပြောခဲ့တာပါ။

ယူနိုက်တက်အသင်းဟာ စနေနေ့မှာ ဘက်တစ်အသင်းနဲ့ ခြေစမ်းပွဲယှဉ်ပြိုင်မှာဖြစ်ပြီး ဒီပွဲပြီးရင်တော့ ဒီဇင်ဘာလ ၂၁ ရက်မှာ ကာရာဘောင်းဖလားပွဲစဉ်အဖြစ် ဘန်လေအသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဒီဇင်ဘာ ၈

ကာတာကမ္ဘာ့ဖလားပြိုင်ပွဲမှာ ရွှေ့ပြောင်းအလုပ်သမားတဦးသေဆုံးတယ်လို့ ဖီဖာကအတည်ပြုခဲ့ပြီးနောက် ဒီလို အဖြစ်အပျက်ကို အလွန် ဝမ်းနည်းမိတယ်လို့ ပြောလိုက်ပါတယ်။

“ဒီအဖြစ်အပျက်ဆိုးကြောင့် ဖီဖာက အလွန်ဝမ်းနည်းရပါတယ်။ကျနော်တို့ရဲ့ အတွေးအမြင်နဲ့ စာနာမှုတွေဟာ မိသားစုနဲ့အတူ ရှိနေပါတယ်။ဒီမတော်တဆမှုကို ဖီဖာက သတိပြုမိပြီးတာနဲ့ အသေးစိတ်အချက်အလက်တွေကို တောင်းဆိုဖို့ ဒေသဆိုင်ရာအာဏာပိုင်တွေကို ဆက်သွယ်ခဲ့ပါတယ်။ အလုပ်သမားသေဆုံးတာနဲ့ ပတ်သက်ပြီး သက်ဆိုင်ရာလုပ်ငန်းစဉ်တွေ ပြီးဆုံးသွားတဲ့အချိန်မှာ ဖီဖာက နောက်ထပ်မှတ်ချက်ပေးဖို့ရှိတယ်” လို့ ကမ္ဘာ့ ဘောလုံးအဖွဲ့ချုပ်ရဲ့ထုတ်ပြန်ချက်မှာ ဖော်ပြထားတာပါ။

ဒီသေဆုံးမှုဟာ ဆော်ဒီအသင်းရဲ့ ကမ္ဘာ့ဖလားလေ့ကျင့်ရေးစခန်းအဖြစ် အသုံးပြုဖို့ ပြန်လည်ပြင်ဆင်ထားတဲ့ အပန်းဖြေစခန်း အနီးမှာဖြစ်ခဲ့တာဖြစ်ပြီး ပြုပြင်ထိန်းသိမ်းရေး အလုပ်သမားဟာ သေဆုံးသွားခဲ့တယ်လို့ The Athletic သတင်းဌာနက ဖော်ပြခဲ့တာဖြစ်ပါတယ်။ ကာတာအာဏာပိုင်တွေက ဒီ အဖြစ်အပျက်ကို စုံစမ်းစစ်ဆေး နေတယ်လို့ သိရတာပါ။ အဆိုပါ သေဆုံးသွားသူဟာ အသက် ၄၀ ကျော်အရွယ်ရှိ ဖိလစ်ပိုင်အမျိုးသားဖြစ်တယ်လို့ The Athletic က ဖော်ပြခဲ့ပါတယ်။

သူဟာ ပစ္စည်းတွေသယ်ယူရွှေ့ပြောင်းရာမှာ အသုံးပြုတဲ့ ကားတိမ်းမှောက်မှုမှာပါဝင်ခဲ့တယ်လို့ သတင်းတွေက ဖော်ပြထားပေမယ့် အတည်ပြုလို့တော့မရပါဘူး။ဖီဖာကတော့ ပြိုင်ပွဲကာလအတွင်း ဒိုဟာမှာ သေဆုံးမှု ဖြစ်ခဲ့တယ်လို့ ပြောထားခဲ့ပေမယ့် အသေးစိတ်အချက်အလက်တွေကိုတော့ ပြောဆိုခဲ့ခြင်းမရှိပါဘူး။ ကာတာ နိုင်ငံဟာ ကမ္ဘာ့ဖလားပြိုင်ပွဲမတိုင်ခင်ကတည်းက ရွှေ့ပြောင်းအလုပ်သမားတွေအပေါ် ဆက်ဆံပုံနဲ့ပတ်သက်ပြီး နှစ်ပေါင်းများစွာကြာ မီးမောင်းထိုးပြခြင်းကို ခံနေရတာပါ။

ကမ္ဘာ့ဖလားစီမံကိန်းတွေနဲ့ ဆက်စပ်ပြီး သေဆုံးသူဦးရေဟာ ၆,၀၀၀(ခြောက်ထောင်)ကျော်ရှိတယ်လို့ လူ့အခွင့် အရေးအဖွဲ့တွေက ပြောထားပါတယ်။ဒါပေမယ့် ကာတာအစိုးရဟာ မူလက သေဆုံးမှု ၄၀ လောက်သာရှိတယ်လို့ ပြောထားခဲ့ပေမယ့် ပြိုင်ပွဲစတင်ပြီးချိန်မှာတော့ သေဆုံးသူ ၄၀၀ နဲ့ ၅၀၀ ကြားရှိတယ်လို့ တာဝန်ရှိသူတဦးက ဝန်ခံခဲ့တာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဒီဇင်ဘာ ၇

ဂျူဗင်တပ်စ်အသင်းဟာ သမိုင်းတလျှောက် အပြင်းထန်ဆုံး စုံစမ်းစစ်ဆေးမှုတွေနဲ့ ရင်ဆိုင်နေရပြီး တန်းဆင်းသွား နိုင်တယ်လို့ အီတလီရှေ့နေတစ်ဦးက ပြောပါတယ်။

အီတလီရှေ့နေ ဂရက်စ်ဆာနီက “ ဒါက ဂျူဗင်တပ်စ်သမိုင်းမှာ အပြင်းထန်ဆုံး စုံစမ်းစစ်ဆေးမှုလို့ ထင်ပါတယ်။ ၂၀၀၆ က ကယ်လ်ဆီယိုပိုလီ ထက်တောင်ပိုပြီး ပြင်းထန်ပါတယ်။ စည်းမျဉ်းတွေအရ စာရွက်စာတမ်းတွေကို ပြောင်းလဲခဲ့တယ်ဆိုရင် ကြီးမားတဲ့ ပြစ်ဒဏ် ချမှတ်ခံရနိုင်ပါတယ်။ ရိုးရိုး ပြစ်ဒဏ်ထက် ကြီးမားတဲ့ အကျိုးဆက် တွေလည်း ဖြစ်လာနိုင်ပါတယ်။ သူတို့ဟာ စီးရီးအေကနေ တန်းဆင်းသွားနိုင်ပြီး စကူဒတ်တိုကိုလည်း ဆုံးရှုံးနိုင်ပါ တယ်”လို့ ရေဒီယို Rai1 ကို ပြောခဲ့တာပါ။

ဂျူဗင်တပ်စ်အသင်းဟာ အီတလီဘောလုံးလောကကို အချိန်အကြာကြီး လွှမ်းမိုးထားနိုင်ခဲ့ပေမယ့် ပြီးခဲ့တဲ့ ၂ ရာသီ ဆက်တိုက် အမှတ်ပေးဖလားကို ဆုံးရှုံးခဲ့တာ ဖြစ်ပါတယ်။

အခုဆိုရင် ဂျူဗင်တပ်စ်အသင်းဟာ မကြာသေးခင်ကမှ ဥက္ကဋ္ဌ အက်ဂ်နယ်လီ၊ ဒုဥက္ကဋ္ဌ နတ်ဗတ်တို့ အပါအဝင် ဘုတ်အဖွဲ့ဝင်တွေ အားလုံး ရာထူးကနေ ထွက်ခွာခဲ့တာကြောင့် အီတလီကလပ်ရဲ့ ကွင်းပြင်ပ အရာတွေက ပိုပြီး လေးနက်လာခဲ့တာပါ။
ဂျူဗင်တပ်စ်အသင်း အနေနဲ့ ကိုဗစ်ကာလ အတွင်းက ဘဏ္ဍာရေး အခြေအနေတွေကြောင့် စုံစမ်းစစ်ဆေးမှုတွေကို ခံနေရတာ ဖြစ်ပါတယ်။

ဂျူဗင်တပ်စ်အသင်းနဲ့ အားကစားဒါရိုက်တာများကိုတွေ့ရစဉ် (Sports)

သူတို့တွေဟာ ၃ လစာ လုပ်ခလစာ လျှော့ချမယ်လို့ တရားဝင် ကြေညာခဲ့ပေမယ့် ကစားသမားတွေနဲ့ နည်းပြ ဆာရီတို့ကို လျှို့ဝှက်စာချုပ် ချုပ်ဆိုခဲ့တယ်ဆိုပြီး စွပ်စွဲခံနေရတာပါ။ ဂျူဗင်တပ်စ်အသင်းဟာ ၂၀၀၆ က ကယ်လ်ဆီယိုပိုလီ အရှုပ်တော်ပုံကြောင့် တန်းဆင်းခံရတဲ့ အဖြစ်အပျက် ရှိခဲ့တာ ဖြစ်ပါတယ်။

ဂျူဗင်တပ်စ်အသင်းဟာ ကိုဗစ်ကာလ ၂၀၁၉-၂၀ ရာသီက အမှတ်ပေး ချန်ပီယံဆုကို ရယူနိုင်ခဲ့ပေမယ့် ၂၀၀၆ တုန်းကလို အဖြစ်အပျက် ဖြစ်ခဲ့မယ်ဆိုရင် ဆုဖလားကို ပြန်လည် ရုပ်သိမ်းခံရနိုင်ပါတယ်။

အီတလီကလပ်ဟာ ဒီအရှုပ်တော်ပုံကြောင့် ၂၀၀၄-၀၅ နဲ့ ၂၀၀၅-၀၆ ရာသီတွေမှာ ဆုဖလားရုပ်သိမ်း ခံခဲ့ရပါတယ်။ ဂျူဗင်တပ်စ်အသင်းဟာ အမှတ်လျှော့ ပြစ်ဒဏ်နဲ့ စီးရီးဘီကို တန်းဆင်းခဲ့ရပေမယ့် ချန်ပီယံဆု ရယူကာ ၁ နှစ် အကြာမှာ စီးရီးအေကို တန်းပြန်တက် နိုင်ခဲ့တာပါ။

ကမ္ဘာ့ဖလားပြိုင်ပွဲကြောင့် ရပ်နားထားတဲ့ အခုနှစ်ရာသီ စီးရီးအေ ပြိုင်ပွဲမှာတော့ ဂျူဗင်တပ်စ်အသင်းဟာ ထိပ်ဆုံး နေရာက နာပိုလီအသင်းနဲ့ ၁၀ မှတ်အကွာ အမှတ်ပေး ဇယားအဆင့် ၃ နေရာမှာ ရပ်တည်နေတာ ဖြစ်ပါတယ်။

Source: Sportbible

CNI Sport News

၂၀၂၂ ခုနှစ်၊ ဒီဇင်ဘာ ၇

ဂန္တဝင်ကစားသမား ဒေးဗစ်ဘက်ခမ်းဟာ ဆီနီဂေါအသင်းနဲ့ ကစားမယ့် ၁၆ သင်းအဆင့် ပွဲစဉ်မတိုင်ခင် အင်္ဂလန်အသင်းရဲ့ လေ့ကျင့်ရေးစခန်းကို သွားရောက်ခဲ့တယ်လို့ သိရပါတယ်။

အသက် ၄၇ နှစ်အရွယ်ရှိ ဒေးဗစ်ဘက်ခမ်းဟာ ၁၉၉၆ ကနေ ၂၀၀၉ အထိ အင်္ဂလန်အတွက် ၁၁၅ ပွဲ ပါဝင် ကစားခဲ့ ပြီး ၁၇ ဂိုး သွင်းယူခဲ့တာပါ။

ဒေးဗစ်ဘက်ခမ်းဟာ လက်ရွေးစင်အသင်းနဲ့အတူ ၁၉၉၈ ကမ္ဘာ့ဖလား၊ ယူရို ၂၀၀၀၊ ၂၀၀၂ ကမ္ဘာ့ဖလား၊ ယူရို ၂၀၀၄ နဲ့ ၂၀၀၆ ကမ္ဘာ့ဖလားပြိုင်ပွဲတွေမှာ ပါဝင်ကစားခဲ့ပြီး ဘယ်လာရုစ်နဲ့ ၂၀၁၀ ကမ္ဘာ့ဖလား ခြေစစ်ပွဲမှာ နောက်ဆုံး ပါဝင်ခဲ့တာ ဖြစ်ပါတယ်။

ဒေးဗစ်ဘက်ခမ်းဟာ အင်္ဂလန်အသင်းရဲ့ အယ်လ်ဝါကရာ လေ့ကျင့်ရေး စခန်းကို သွားရောက်ခဲ့ပြီး နည်းပြ ဆောက်ဂိတ်က လက်ရွေးစင် အသင်းဖော်ဟောင်းကို သူ့ရဲ့ အထင်ကရ နံပါတ်ပါ ဂျာစီကို လက်ဆောင်ပေး ခဲ့ပါတယ်။

ဒေးဗစ်ဘက်ခမ်းဟာ မက်ဒီဆင်၊ ဝီလ်ဆင်၊ မက်ဂွဲယား၊ မေဆန်မောင့်၊ ဂရီလစ်ရှ်၊ ဟာရီကိန်း၊ ဆာကာတို့နဲ့ စကားပြောဆိုခဲ့ပြီး ဓါတ်ပုံ တွဲရိုက်ခဲ့ပါတယ်။

ဒေးဗစ်ဘက်ခမ်းနဲ့ ဟာရီကိန်းကိုတွေ့ရစဉ်

လက်ရှိ အင်္ဂလန်အသင်း ခေါင်းဆောင် ဟာရီကိန်းက ဒေးဗစ်ဘက်ခမ်း သူတို့ဆီ လာရောက်ခဲ့ပုံကို ပြန်ပြောင်း ပြောပြပါတယ်။

ဟာရီကိန်းက “ ဒေးဗစစ်ဘက်ခမ်း ရောက်ရှိလာချိန်မှာ ကျနော်တို့ ကောင်းမွန်စွာ စကားတွေပြောခဲ့ ကြပါတယ်။ ကျနော်ဟာ သူ့ကိုကြည့်ပြီး ကြီးပြင်း လာခဲ့ရတာပါ။ သူဟာ ကျနော်တို့ရဲ့ အကောင်းဆုံး အသင်းခေါင်းဆောင်တွေ ထဲက တစ်ဦးဖြစ်နိုင်ပါတယ်။ သူ့ရဲ့ အတွေ့အကြုံတွေ၊ ကျနော်တို့အသင်းနဲ့ ပတ်သက်ပြီး သူမြင်ရတာတွေနဲ့ ဘယ်လို ခံစားရလဲဆိုတာကို ပိုပြီး သိလာရပါတယ်။ သူက ကျနော်တို့ကစားပုံကို သဘောကျတယ်လို့ ပြောခဲ့ပြီး ဒီလို ကစားသမားဟောင်းတွေရဲ့ အားပေးမှုကိုရတာ အလွန်ကောင်းပါတယ်”လို့ ပြောခဲ့ပါတယ်။

ဒေးဗစ်ဘက်ခမ်းဟာ လက်ရှိ ကာတာမှာ ရှိနေပြီး ပေါင်သန်း ၁၅၀ နဲ့ ၂၀၂၂ ကမ္ဘာ့ဖလား မျက်နှာစာ အပါအဝင် နိုင်ငံရဲ့ သံတမန်အဖြစ် ၁၀ နှစ် စာချုပ် ချုပ်ဆိုထားတာကြောင့် ဝေဖန်မှုတွေ ခံနေရတာပါ။

အင်္ဂလန်အသင်းကတော့ လက်ရှိ ကမ္ဘာ့ဖလားပြိုင်ပွဲရဲ့ ၁၆ သင်းအဆင့်မှာ ဆီနီဂေါအသင်းကို ၃ ဂိုး- ဂိုးမရှိနဲ့ အနိုင် ရပြီး ကွာတားဖိုင်နယ်အဆင့်မှာ လက်ရှိချန်ပီယံ ပြင်သစ်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၂ ခုနှစ်၊ ဒီဇင်ဘာ ၇

စပိန်အသင်းနည်းပြ အင်းနရစ်က ကမ္ဘာ့ဖလားပြိုင်ပွဲ မတိုင်ခင် ကတည်းက ပင်နယ်တီ ၁,၀၀၀ လောက် ကန်သွင်း လေ့ကျင့်ထားပေမယ့် အဆုံးအဖြတ် ကန်သွင်းတဲ့အချိန်မှာ မလုံလောက်ခဲ့ဘူးလို့ ပြောခဲ့ပါတယ်။

အင်းနရစ်က “ အိမ်စာတွေ ပြီးဆုံးသွားပြီလို့ တွေးခဲ့မိပါတယ်။ လွန်ခဲ့တဲ့ ၁ နှစ်ကတည်းက စပိန်လေ့ကျင့်ရေး စခန်းမှာ အနည်းဆုံး ပင်နယ်တီ ၁,၀၀၀ လောက် ကန်သွင်းပြီး ကမ္ဘာ့ဖလားကို ရောက်လာဖို့ ပြောခဲ့ပါတယ်။ ပင်နယ်တီ လေ့ကျင့်ဖို့ ဒီကိုရောက်တဲ့အထိ စောင့်ရတာတောင် မလုံလောက်ခဲ့ဘူး”လို့ ပြောခဲ့တာပါ။

စပိန်အသင်းဟာ ၁၆ သင်းအဆင့် ပွဲစဉ်အဖြစ် မော်ရိုကိုအသင်းနဲ့ ကစားခဲ့တာမှာ ပင်နယ်တီ အဆုံးအဖြတ်နဲ့ အရေးနိမ့် သွားခဲ့တာ ဖြစ်ပါတယ်။

ပွဲချိန်အတွင်းရော၊ အချိန်ပိုမှာ ဂိုးမရှိသရေနဲ့ ပြီးဆုံးနေခဲ့လို့ ပင်နယ်တီ အဆုံးအဖြတ် ခံယူခဲ့ရတာပါ။ စပိန်အသင်း ဟာ ပင်နယ်တီ အများအပြား ကန်သွင်း လေ့ကျင့်ခဲ့တယ်လို့ နည်းပြက ပြောခဲ့ပေမယ့် အဆုံးအဖြတ် ကန်သွင်းတဲ့ အချိန်မှာ ဆိုလာ၊ ဆာရာဘီယာနဲ့ ဘတ်စ်ကွက်တို့ ၃ ဦးစလုံး ဂိုးမဝင်ခဲ့ပါဘူး။

အဲ့ဒါကြောင့် မော်ရိုကိုအသင်းက ၃ ဂိုး- ဂိုးမရှိနဲ့ အနိုင်ရပြီး ကွာတားဖိုင်နယ်ကို တက်သွားခဲ့ပါတယ်။

စပိန်အသင်းသားများနဲ့ နည်းပြ အင်းနရစ်ကိုတွေ့ရစဉ်

စပိန်အသင်း ကွင်းလယ်ကစားသမား ရိုဒရီက သူတို့အသင်း နောက်တဆင့်တက်ဖို့ ထိုက်တန်တယ်လို့ ပြောခဲ့ပါတယ်။

ရိုဒရီက “ အခုတော့ ကျနော်တို့ အိမ်ပြန်ရတော့မှာပါ။ ဒါဟာ တကယ်ကို ဆိုးရွားပါတယ်။ ကျနော့်အတွက်တော့ အဆိုးရွားဆုံး နေ့တနေ့ပါပဲ။ မော်ရိုကိုက ကျနော်တို့ မျှော်လင့်ထားသလိုပဲ နောက်တန်းမှာ ၁၁ ယောက်နဲ့ ကစားခဲ့ တာပါ။ ဒါပေမယ့် ဖြတ်ကျော်နိုင်မယ်လို့ မျှော်လင့်ခဲ့တာပါ။ ပင်နယ်တီဆိုတာ ထီထိုးရသလိုပါပဲ”လို့ ပြောခဲ့တာပါ။

စပိန်အသင်းဟာ ကမ္ဘာ့ဖလားပြိုင်ပွဲမှာ ပင်နယ်တီ ၄ ကြိမ်အထိ အရေးနိမ့်ခဲ့တဲ့ ပထမဆုံး နိုင်ငံအသင်းဖြစ်ခဲ့သလို ၂၀၀၆ က ယူကရိန်းနဲ့ ဆွစ်ဇာလန်ပွဲ နောက်ပိုင်း ပင်နယ်တီ အဆုံးအဖြတ်မှာ ၁ ဂိုးမှ မသွင်းယူနိုင်တဲ့ ဒုတိယ မြောက် အသင်း ဖြစ်ခဲ့ပါတယ်။

မော်ရိုကိုအသင်းကတော့ ကမ္ဘာ့ဖလား သမိုင်းတလျှောက် ပထမဆုံးအကြိမ် ကွာတားဖိုင်နယ်ကို တက်နိုင်ခဲ့တာ ဖြစ်ပါတယ်။

Source: Goal