CNI Sport News

၂၀၂၃ ခုနှစ်၊ အောက်တိုဘာ ၁၆

ဘာစီလိုနာအသင်းက အပြီးသတ်ဝယ်ယူမယ်လို့ သတင်းတွေထွက်ပေါ်နေတဲ့အချိန်မှာ တိုက်စစ်မှူး ဂျာအိုဖီးလစ်က စပိန်ကလပ်မှာ ကစားရတာပျော်ရွှင်တယ်လို့ ပြောလိုက်ပါတယ်။

ဂျာအိုဖီးလစ်က “ခင်ဗျားတို့ မြင်တွေ့နေရသလို ကျနော် ဘာစီလိုနာမှာပျော်ရွှင်တယ်၊ ကောင်းမွန်တဲ့ ခံစားမှုတွေ ရတယ်၊ ယုံကြည်မှုအပြည့်နဲ့ ကောင်းမွန်တဲ့အခိုက်အတန့်တွေကို ဖြတ်သန်းနေရတယ်လို့ ခံစားနေရပါတယ်။ ကျနော့်အတွက် အခက်အခဲဆုံးအရာက ကောင်းမွန်တဲ့အဆင့်ကို ဆက်ပြီးထိန်းထားနိုင်ဖို့ပါ။ ကျနော်ဟာ နေ့တိုင်း အလုပ်လုပ်နေပြီး ဒီထက်ပိုမိုကောင်းမွန်တဲ့ အရာတွေကိုပေးဖို့ အမြဲတမ်းကြိုးစားနေပါတယ်။ ကျနော် ဘာစီလိုနာ မှာ ပျော်ရွှင်နေပါတယ်”လို့ ပြောခဲ့တာပါ။

ဂျာအိုဖီးလစ်ဟာ ပြီးခဲ့တဲ့နွေရာသီအပြောင်းအရွှေ့နောက်ဆုံးနေ့မှာ အသလက်တီကိုအသင်းကနေ ဘာစီလိုနာ အသင်းထံ အငှားစာချုပ်နဲ့ ပြောင်းရွှေ့လာခဲ့တာဖြစ်ပါတယ်။ အသက် ၂၃ နှစ်အရွယ်ရှိ ကစားသမားဟာ ဘာစီလိုနာအသင်းအတွက် ၈ ပွဲပါဝင်ကစားထားအပြီးမှာ ၃ ဂိုးသွင်းယူကာ ၃ ဂိုးဖန်တီးမှု ပြုလုပ်ထားခဲ့တာပါ။ ပေါ်တူဂီကစားသမားဟာ ဘာစီလိုနာအသင်းမှာကစားချင်တဲ့အတွက် လုပ်ခလစာအများကြီး လျှော့ယူပြီး လာရောက်ကစားနေတာဖြစ်ပါတယ်။

မကြာသေးခင်က ထွက်ပေါ်ခဲ့တဲ့ သတင်းတွေအရ ဘာစီလိုနာအသင်းဟာ လာမယ့်နွေရာသီမှာ ဂျာအိုဖီးလစ်ကို အပြီးသတ်ဝယ်ယူနိုင်ဖို့အတွက် အသလက်တီကိုအသင်းထံ သင့်လျော်တဲ့ကမ်းလှမ်းမှုပြုလုပ်ဖို့ ပြင်ဆင်နေတယ် လို့ ဖော်ပြထားတာပါ။ ဂျာအိုဖီးလစ်ဟာ ဘာစီလိုနာအသင်းထံ အပြီးသတ်ပြောင်းရွှေ့ချင်နေတာကြောင့် ဘာစီလိုနာအသင်းဟာ အသလက်တီကိုအသင်းနဲ့ ပြောင်းရွှေ့ကြေးညှိနှိုင်းပြီး အဆင်ပြေရင် အပြီးသတ် ဝယ်ယူ နိုင်မှာဖြစ်ပါတယ်။

စပိန်လာလီဂါလက်ရှိချန်ပီယံ ဘာစီလိုနာအသင်းဟာ ဒီရာသီမှာ ထိပ်ဆုံးနေရာက ရီးရယ်လ်အသင်းနဲ့ ၃ မှတ် အကွာ တတိယနေရာမှာ ရပ်တည်နေတာပါ။ ဘာစီလိုနာအသင်းဟာ အောက်တိုဘာ ၂၂ ရက်မှာ လာလီဂါ ပွဲစဉ်အဖြစ် ဘီလ်ဘာအိုအသင်းနဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ အောက်တိုဘာ ၁၄

အီတလီအသင်းကစားသမားတွေဖြစ်တဲ့ တိုနယ်လီနဲ့ ဇာနီအိုလိုတို့ဟာ အစိုးရရှေ့နေတွေရဲ့ စုံစမ်းစစ်ဆေးမှုတွေမှာ ပါဝင်ခဲ့တာကြောင့် လက်ရွေးစင်လူစာရင်းကနေ ထွက်ခွာခဲ့တယ်လို့ နိုင်ငံရဲ့ ဘောလုံးအဖွဲ့ချုပ်က ပြောလိုက်ပါ တယ်။

တိုနယ်လီနဲ့ ဇာနီအိုလိုတို့ဟာ ယူရို ၂၀၂၄ ခြေစစ်ပွဲတွေကစားဖို့ အီတလီအသင်းနဲ့အတူ လေ့ကျင့်မှုတွေ ပြုလုပ် နေချိန်မှာ တူရင်အစိုးရရှေ့နေတွေက စုံစမ်းစစ်ဆေးမှုတွေပြုလုပ်ဖို့ အကြောင်းကြားခဲ့တာပါ။ အီတလီ ဘောလုံး အဖွဲ့ချုပ်က စုံစမ်းစစ်ဆေးမှုနဲ့ ပတ်သက်ပြီး အတိအကျကို ပြောဆိုထားခြင်းမရှိပေမယ့် ဒီကစားသမားနှစ်ဦးကို အိမ်ပြန်ခွင့်ပေးဖို့ ဆုံးဖြတ်ခဲ့တာဖြစ်ပါတယ်။ 

အီတလီသတင်းအေဂျင်စီ ANSA က တိုနယ်လီနဲ့ ဇာနီအိုလိုတို့ဟာ တရားမဝင်လောင်းကစားမှုနဲ့ ဆက်စပ် နေတယ်လို့ ဖော်ပြထားတာပါ။ တူရင်အစိုးရရှေ့နေတွေဟာ တရားမဝင်လောင်းကစားပြုလုပ်ခဲ့မှုအတွက် နောက်ထပ် အီတလီဘောလုံးသမားတစ်ဦးဖြစ်တဲ့ ဖာဂီယိုလီကိုလည်း စုံစမ်းစစ်ဆေးမှုတွေပြုလုပ်နေတာ ဖြစ်ပါတယ်။ 

ဖာဂီယိုလီပြုလုပ်ခဲ့တဲ့ လောင်းကစားတွေမှာ ဘောလုံးပွဲတွေပါဝင်ခြင်းရှိ၊မရှိ စုံစမ်းမှုတွေပြုလုပ်နေတာဖြစ်ပြီး ဂျူဗင်တပ်စ်ကစားသမားအနေနဲ့ ဘောလုံးပွဲတွေလောင်းကစားပြုလုပ်ခဲ့မယ်ဆိုရင် ပွဲကစားခွင့် အနည်းဆုံး ၃ နှစ်ပိတ်ပင်ခံရနိုင်တာပါ။ ဒါ့အပြင် ဖာဂီယိုလီဟာ ဒဏ်ကြေးငွေအနည်းဆုံး ယူရို ၂၅,၀၀၀ ပေးဆောင်ရမှာ ဖြစ်ပါတယ်။ 

တိုနာလီနဲ့ ဇာနီအိုလိုတို့ဟာ ပရီးမီးယားလိဂ်ကလပ်တွေဖြစ်တဲ့ နယူးကာဆယ်နဲ့ အက်စတွန်ဗီလာအသင်းတွေမှာ ပါဝင်ကစားနေတာပါ။ တိုနယ်လီဟာ ပြီးခဲ့တဲ့ ဇူလိုင်လက အေစီမီလန်အသင်းကနေ နယူးကာဆယ်အသင်းကို ပြောင်းရွှေ့လာခဲ့တာဖြစ်ပြီး ဇာနီအိုလိုကတော့ အက်စတွန်ဗီလာအသင်းကို သြဂုတ်လက ဂါလာတာစာရေး အသင်းကနေ အငှားနဲ့ ပြောင်းရွှေ့လာခဲ့တာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ အောက်တိုဘာ ၁၃

စကော့တလန် အသင်းခေါင်းဆောင် ရောဘတ်ဆန်ဟာ စပိန်အသင်းကို အရေးနိမ့်ခဲ့တဲ့ ယူရို ၂၀၂၄ ခြေစစ်ပွဲမှာ ပြင်းထန်တဲ့ ပခုံးဒဏ်ရာ ရရှိသွားခဲ့ပါတယ်။

စကော့တလန်နဲ့ လီဗာပူးလ်အသင်း နောက်ခံလူ ရောဘတ်ဆန်ဟာ စပိန်အသင်း ဂိုးသမား အူနှိုင်းဆီမွန်နဲ့ ထိခိုက် မိပြီးနောက် ကွင်းထဲကနေ ထွက်ခွာခဲ့ရပါတယ်။

ရောဘတ်ဆန်ဟာ ဒဏ်ရာကြောင့် ဆက်မကစားနိုင်တော့တဲ့အတွက် စကော့တလန်အသင်းဟာ သူ့ကို ပတ်ဒါဆန်နဲ့ လူစားလဲခဲ့ရပြီး ရောဘတ်ဆန်ဟာ ကွင်းထဲကနေ ထွက်လာချိန်မှာ မသက်မသာဖြစ်သလို ခံစားနေရတာကို မြင်တွေ့ခဲ့ရပါတယ်။

စကော့တလန်အသင်းကို တွေ့ရစဉ်

စကော့တလန် အသင်းနည်းပြ စတိဗ်ကလာ့ခ်က “ရောဘတ်ဆန်ဟာ သူ့ရဲ့ကလပ်ကို ပြန်သွားတော့မှာပါ။ ကျနော် တို့ဟာ တီယာနေးကို ဆုံးရှုံးပြီးနောက် ရောဘတ်ဆန်ကလည်း ပခုံးဒဏ်ရာ ရရှိသွားခဲ့ပါတယ်။  သူဟာ ကလပ် အသင်းနဲ့အတူ အမြန်ဆုံး ပြန်ကောင်းမွန်ပြီး နိုဝင်ဘာလမှာ ကျနော်တို့ကို အကူအညီပေးဖို့အတွက် အဆင်သင့် ဖြစ်နေမယ်လို့ မျှော်လင့်ကြောင်း” ပြောခဲ့ပါတယ်။

ရောဘတ်ဆန်ဟာ ဒဏ်ရာကြောင့် ပြင်သစ်အသင်းနဲ့ ကစားမယ့် ခြေစမ်းပွဲမှာ စကော့တလန် အသင်းအတွက် ပါဝင်နိုင်မှာ မဟုတ်သလို အောက်တိုဘာ ၂၁ ရက်မှာ ကစားမယ့် အဲဗာတန်အသင်းနဲ့ မာဆေးဆိုဒ် ဒါဘီပွဲစဉ် ကိုလည်း လီဗာပူးလ်အသင်းအတွက် ပါဝင်နိုင်ဖွယ် မရှိတော့ပါဘူး။ 

စကော့တလန်အသင်းဟာ စပိန်အသင်းကို အရေးနိမ့်ခဲ့ပေမယ့် ယူရို ၂၀၂၄ ခြေစစ်ပွဲအုပ်စုတွင်းကို ဆက်လက် ဦးဆောင်နေပြီး တတိယနေရာက နော်ဝေအသင်းကို ၅ မှတ် ဖြတ်ထားပါတယ်။

စကော့တလန်အသင်းဟာ နိုဝင်ဘာလမှာ ကစားမယ့် ဂျော်ဂျီယာ၊ နော်ဝေအသင်းတို့နဲ့ ယူရိုခြေစစ်ပွဲမှာ ရလဒ် ကောင်း ရယူနိုင်ခဲ့မယ်ဆိုရင် အနိမ့်ဆုံး ပလေးအော့ဖ်အဆင့် ယှဉ်ပြိုင်ခွင့်ရဖို့ သေချာမှာလည်း ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ အောက်တိုဘာ ၁၃

ဘာမင်ဂမ်အသင်းနည်းပြသစ် ဝိန်းရွန်နီက အသင်းကို ပရီးမီးယားလိဂ် ပြိုင်ပွဲဆီ ပြန်လည်ပို့ဆောင်ပေးနိုင်ဖို့ ပစ်မှတ်ထားနေတယ်လို့ ပြောလိုက်ပါတယ်။

ဝိန်းရွန်နီက “ကျနော်ဟာ ဘာမင်ဂမ်အသင်းကို အကောင်းဆုံး တည်ဆောက်ပေးချင်ပြီး အသင်းရှိသင့်တဲ့ ပရီးမီးယားလိဂ်ပြိုင်ပွဲကို ပြန်လည် ပို့ဆောင်ပေးချင်ပါတယ်။ ဘာမင်ဂမ်က ကြီးမားတဲ့ကလပ်ပါ။ ကလပ်နဲ့ ကျနော့်ရဲ့ ရည်မှန်းချက်က ဘာမင်ဂမ်ကို ပရီးမီးယားလိဂ်ပြိုင်ပွဲထံ ပြန်ပြီးပို့ဆောင်ပေးဖို့ပါ။ ဒါက စိန်ခေါ်မှုဖြစ်ပြီး ဒီလိုလုပ်ပြနိုင်ဖို့ အခွင့်အရေးရှိပါတယ်”လို့ ပြောပါတယ်။

အသက် ၃၇ နှစ်အရွယ်ရှိ ဝိန်းရွန်နီဟာ အင်္ဂလန်ချန်ပီယံရှစ်ကလပ် ဘာမင်ဂမ်အသင်းရဲ့ နည်းပြသစ်အဖြစ် ၃ နှစ်ခွဲ စာချုပ်နဲ့ ခန့်အပ်ခြင်း ခံထားရတာ ဖြစ်ပါတယ်။ 

ဘာမင်ဂမ်အသင်းဟာ ၁၅ လကြာ ကိုင်တွယ်ခဲ့တဲ့ နည်းပြ ယူစတက်စ်ကို ထုတ်ပယ်ပြီးနောက် အင်္ဂလန်အသင်း ခေါင်းဆောင်ဟောင်းကို နည်းပြသစ်အဖြစ် ခန့်အပ်ခဲ့ပါတယ်။

ဘာမင်ဂမ်အသင်းကို တွေ့ရစဉ်

ဝိန်းရွန်နီ အတွက်တော့ ဘာမင်ဂမ်အသင်းဟာ ဒါဘီ၊ ဒီစီယူနိုက်တက်တို့ပြီးနောက် တတိယမြောက် ကိုင်တွယ်တဲ့ အသင်းဖြစ်လာခဲ့ပါတယ်။

ဘာမင်ဂမ်အသင်းနည်းပြသစ် ဝိန်းရွန်နီဟာ မျှော်လင့်ချက် ဖိအားတွေကို ကိုင်တွယ်ဖြေရှင်းဖို့ ပြဿနာမရှိဘူးလို့ လည်း ပြောခဲ့ပါတယ်။ 

ဘာမင်ဂမ်အသင်းဟာ ပရီးမီးယားလိဂ်ပြိုင်ပွဲမှာ ၂၀၁၁ ခုနှစ်က နောက်ဆုံး ကစားခဲ့တာဖြစ်ပြီး ဒီနောက်ပိုင်း ပရီးမီးယားလိဂ်နဲ့ ဝေးကွာနေတာ ဆယ်စုနှစ် တစ်ခုကျော်သွားခဲ့ပြီ ဖြစ်ပါတယ်။

ဝိန်းရွန်နီက “ကျနော်ဟာ ၁၆ နှစ် အရွယ်ကတည်းကနေ ကစားသမားဘဝ တစ်လျှောက်လုံး ဖိအားတွေနဲ့ ရင်ဆိုင် ခဲ့ရတာပါ။ အမှားတွေ လုပ်ခဲ့မိပြီဆိုရင်လည်း ဒီကနေပြန်ပြီး သင်ယူရမယ်၊ တိုးတက်အောင် လုပ်ရပါမယ်။ ကျနော် တို့မှာ မျှော်မှန်းချက်တွေနဲ့ ပစ်မှတ်တွေ ရှိပါတယ်။ ပရီးမီးယားလိဂ်ကို ပြန်သွားဖို့က ကျနော်တို့ရဲ့ ပစ်မှတ်ဖြစ်ပြီး ဒီလိုဖြစ်အောင်လုပ်ဖို့ ကျနော်ဒီကိုရောက်ရှိနေတာပါ”လို့ ပြောခဲ့ပါတယ်။

ဘာမင်ဂမ်အသင်းဟာ အင်္ဂလန်ချန်ပီယံရှစ်ပြိုင်ပွဲမှာ အဆင့် ၆ နေရာ ရပ်တည်နေပြီး နိုင်ငံတကာပွဲစဉ်အပြီးမှာ မယ်ဒယ်ဘရော့အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ အောက်တိုဘာ ၁၃

ဝင်ဘာလေမှာ ကစားမယ့် အင်္ဂလန်အသင်းရဲ့ ပွဲတွေမှာ အစ္စရေး-ပါလက်စတိုင်း ပဋိပက္ခကြောင့် ဒုက္ခရောက်တဲ့ သူတွေကို ထောက်ခံကြောင်းပြသတဲ့ အလံတွေ၊ အင်္ကျီတွေကို ခွင့်ပြုသွားမှာမဟုတ်ဘူးလို့ အင်္ဂလန် ဘောလုံး အဖွဲ့ချုပ်(FA)က ကြေညာလိုက်ပါတယ်။

အင်္ဂလန်အသင်းဟာ အောက်တိုဘာ ၁၄ ရက်မှာ သြစတြေးလျနဲ့ ခြေစမ်းပွဲ၊ ၁၈ ရက်မှာ အီတလီအသင်းနဲ့ ယူရို ၂၀၂၄ ခြေစစ်ပွဲကစားရမှာပါ။ အင်္ဂလန်နဲ့ သြစတြေးလျအသင်းကစားသမားတွေဟာ အနက်ရောင်လက်ပတ် ဝတ်ဆင်ကြမှာဖြစ်ပြီး၊ ပွဲမစခင်မိနစ်အနည်းငယ်ကြာ ငြိမ်သက်မှုပြုလုပ်သွားမယ်လို့ FA ရဲ့ ထုတ်ပြန်ချက်ထဲမှာ ဖော်ပြထားပါတယ်။ FA ဟာ ဝင်ဘာလေကွင်းအဝင်ဝမှာ အစ္စရေးအလံပါဝင်တဲ့အရောင်နဲ့ မီးမထွန်းပေးဖို့ ဆုံးဖြတ် ခဲ့တာကြောင့်လည်း ဝေဖန်မှုတွေခံခဲ့ရတာပါ။

FA ဟာ ရုရှားရဲ့ကျူးကျော်တိုက်ခိုက်မှုခံခဲ့ရတဲ့ ယူကရိန်းကို ထောက်ခံကြောင်းပြသခဲ့ပေမယ့် အခု အစ္စရေးကို ထောက်ခံကြောင်းမပြသတဲ့အတွက် ဝေဖန်မှုတွေနဲ့ ရင်ဆိုင်နေရတာဖြစ်ပါတယ်။ အင်္ဂလန်အသင်း နည်းပြ ဆောက်ဂိတ်ကတော့ FA ရဲ့ ဆုံးဖြတ်ချက်တွေကို ကာကွယ်သွားခဲ့ပါတယ်။

ဆောက်ဂိတ်က “ကျနော့်ဘဝမှာ အရှေ့အလယ်ပိုင်းဟာ အရှုပ်အထွေးဆုံးနဲ့ နားလည်ရခက်ခဲတဲ့အခြေအနေမှာ ရှိနေပါတယ်။ ဒါကြောင့် တရားမျှတမှုကို ၁၀ မိနစ်အတွင်းလုပ်ဆောင်နိုင်ဖို့ ခက်ခဲပါတယ်။ FA အနေနဲ့ မှန်ကန်တဲ့ အရာတွေကို လုပ်ဖို့ ကြိုးစားပါလိမ့်မယ်”လို့ ပြောခဲ့ပါတယ်။

ပြီးခဲ့တဲ့ရက်သတ္တပတ်က ပါလက်စတိုင်းစစ်သွေးကြွအဖွဲ့ ဟားမာ့စ်ရဲ့ တိုက်ခိုက်မှုကြောင့် အစ္စရေးမှာ လူပေါင်း ၁,၂၀၀ ကျော်သေဆုံးခဲ့ပြီး အစ္စရေးကလည်း ဂါဇာကမ်းမြောင်ဒေသကို လေကြောင်းတိုက်ခိုက်မှုတွေပြုလုပ်ကာ နယ်မြေဒေသအတွင်း အစားအသောက်၊ရေ၊လောင်စာဆီနဲ့ ဆေးဝါးတွေ ဝင်ရောက်ခွင့် ကန့်သတ်ခဲ့တာပါ။ ဒီလို တိုက်ခိုက်မှုတွေကြောင့် ဂါဇာမှာ လူပေါင်း ၁,၃၀၀ ကျော်သေဆုံးပြီး လူပေါင်း ၃၃၈,၀၀၀ အိုးမဲ့အိမ်မဲ့ ဖြစ်ခဲ့ရတယ် လို့ သိရပါတယ်။ 

Source:ChannelNewsAsia

CNI Sport News

၂၀၂၃ ခုနှစ်၊ အောက်တိုဘာ ၁၂

ယူနိုက်တက်အသင်းမှာ ပုံမှန်ကစားခွင့်ရဖို့ ရုန်းကန်နေရတဲ့ နောက်ခံလူ မက်ဂွဲယားက ဒီလိုသာဆက်ပြီး ပွဲထွက် ကစားခွင့် မရဘူးဆိုရင် ဇန်နဝါရီလ အပြောင်းအရွှေ့မှာ ထွက်ခွာသွားနိုင်တယ်လို့ ပြောလိုက်ပါတယ်။ 

မက်ဂွဲယားက “ဒီမှာအမြဲတမ်း ထိုင်နေပြီး တစ်လကိုတစ်ပွဲ ကစားမှာ မဟုတ်ပါဘူး။ ဒီလိုသာဆက်ဖြစ်နေရင် ကလပ်အသင်းနဲ့ စကားပြောဆိုမှုတွေ ပြုလုပ်ရတော့မှာပါ။ ယူနိုက်တက်အတွက် လာမယ့်ပွဲမှာ ပွဲထွက်ခွင့် ရ/မရဆိုတာ ကျနော့်ရဲ့ ဆုံးဖြတ်ချက် မဟုတ်ပါဘူး။ ကျနော်ဟာ ကျနော့်ရဲ့ အရည်အချင်းကို ယုံကြည်တဲ့အတွက် ဒါတွေက ခက်ခဲပါတယ်။ ကျနော်ဟာ ပွဲတွေကစားချင်ပေမယ့် အခုအချိန်မှာတော့ ကျနော်ကစားချင်သလောက် ကစားခွင့် မရသေးပါဘူး”လို့ ပြောပါတယ်။

မက်ဂွဲယားဟာ ပြီးခဲ့တဲ့ ရာသီကတည်းက ယူနိုက်တက်အသင်းမှာ ပွဲကစားခွင့် ဆုံးရှုံးခဲ့ပြီး အခုရာသီအစမှာ အသင်းခေါင်းဆောင် လက်ပတ်ပါ လွှဲပြောင်းပေးခဲ့ရပါတယ်။ 

ယူနိုက်တက်အသင်းဟာ ပြီးခဲ့တဲ့ နွေရာသီ အပြောင်းအရွှေ့မှာ မက်ဂွဲယားကို ဝက်စ်ဟမ်းအသင်းထံ ရောင်းချဖို့ လုပ်ဆောင်ခဲ့ပေမယ့် အပြောင်းအရွှေ့ ပျက်ပြယ်ခဲ့လို့ အသင်းမှာဆက်ပြီး ရှိနေခဲ့ပါတယ်။

ယူနိုက်တက် အသင်းဖော်တွေနဲ့ မက်ဂွဲယားကို တွေ့ရစဉ်

ဒီရာသီ ယူနိုက်တက်အသင်းရဲ့ ခံစစ်ပိုင်းဟာ ဒဏ်ရာတွေနဲ့ ရင်ဆိုင်နေရလို့ မက်ဂွဲယားဟာ ဘရန်ဖို့ဒ်အသင်းနဲ့ ပရီးမီးယားလိဂ်ပွဲစဉ်မှာ ပွဲထွက်လူစာရင်းမှာ ပါဝင်ခဲ့ပါတယ်။

မက်ဂွဲယားဟာ လာမယ့်ယူရို ၂၀၂၄ ပြိုင်ပွဲဝင်မယ့် အင်္ဂလန်အသင်းရဲ့ ပွဲထွက်လူစာရင်းမှာ ပါဝင်ချင်နေတာကြောင့် ကလပ်အသင်းမှာ ပုံမှန်ပွဲထွက် ကစားခွင့်ရဖို့ လိုအပ်နေတာ ဖြစ်ပါတယ်။

မက်ဂွဲယားဟာ အင်္ဂလန်အသင်းရဲ့ ပုံမှန်ပွဲထွက် လူစာရင်းမှာ အမြဲတမ်း ပါဝင်နေပေမယ့် ကလပ်အသင်းမှာ ကစားခွင့် ဆုံးရှုံးနေရင် ဒီအခွင့်အရေးကို လက်လွှတ်ရနိုင်တယ်လို့ နည်းပြ ဆောက်ဂိတ်က သတိပေးထားပါတယ်။ 

အသက် ၃၀ နှစ်အရွယ်ရှိ မက်ဂွဲယားဟာ လက်ရှိအချိန်မှာ သြစတြေးလျနဲ့ ခြေစမ်းပွဲ၊ အီတလီနဲ့ ယူရို ၂၀၂၄ ခြေစစ် ပွဲ ကစားမယ့် အင်္ဂလန်အသင်းနဲ့အတူ လေ့ကျင့်ပြင်ဆင်မှုတွေ ပြုလုပ်နေပါတယ်။ 

အင်္ဂလန်အသင်းဟာ ယူရိုခြေစစ်ပွဲ ၅ ပွဲ ကစားအပြီးမှာ ရမှတ် ၁၃ မှတ်နဲ့ ခြေစစ်ပွဲ အောင်မြင်ဖို့ နီးစပ်နေတာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ အောက်တိုဘာ ၁၂

အင်ဒိုနီးရှားဟာ ၂၀၃၄ ကမ္ဘာ့ဖလားပြိုင်ပွဲကို သြစတြေးလျ၊ မလေးရှား၊ စင်္ကာပူတို့နဲ့ ပူးတွဲအိမ်ရှင်အဖြစ် ကျင်းပဖို့ ဆွေးနွေးမှုတွေ ပြုလုပ်နေတယ်လို့ နိုင်ငံရဲ့ဘောလုံးအဖွဲ့ချုပ်ဥက္ကဋ္ဌ အဲရစ်သိုဟီရာက အောက်တိုဘာ ၁၁ ရက်က ပြောလိုက်ပါတယ်။

အဲရစ်သိုဟီရာက “ကျနော်တို့ အိမ်ရှင်အဖြစ် လျှောက်ထားဖို့ သြစတြေးလျနဲ့ ဆွေးနွေးမှုတွေ ပြုလုပ်နေပါတယ်။ ကျနော် မလေးရှားနဲ့ စင်္ကာပူကို သွားရောက်လည်ပတ်တုန်းက အင်ဒိုနီးရှား၊ သြစတြေးလျတို့နဲ့ ပူးပေါင်းဖို့အတွက် နှစ်နိုင်ငံစလုံးက စိတ်ဝင်စားကြောင်း ဖော်ပြခဲ့တယ်”လို့ Sydney Morning Herald ကို ပြောခဲ့ပါတယ်။

ကမ္ဘာ့ဘောလုံးအဖွဲ့ချုပ်(ဖီဖာ)ဟာ ၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ် လျှောက်ထားဖို့ အာရှနဲ့ သမုဒ္ဒရာ ပိုင်းဇုန်ကို ပြောထားခဲ့တာဖြစ်ပြီး အိမ်ရှင်အဖြစ် လျှောက်ထားမှုကို အောက်တိုဘာ ၃၁ ရက်အထိ နောက်ဆုံးရက် သတ်မှတ်ပေးထားပါတယ်။ 

အင်ဒိုနီးရှားဘောလုံးအဖွဲ့ချုပ် တာ၀န်ရှိသူကို တွေ့ရစဉ်

မလေးရှားဘောလုံးအဖွဲ့ချုပ် အကြီးအကဲကတော့ အင်ဒိုနီးရှားဘောလုံးအဖွဲ့ချုပ်ရဲ့ ပြောဆိုမှုကို ငြင်းဆန်ထားပြီး သူတို့ဟာ ၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပဖို့ ဘယ်နိုင်ငံမှ စကားပြောဆိုခြင်း မရှိဘူးလို့ ပြောထားပါတယ်။

လက်ရှိအချိန်မှာ ဆော်ဒီဘောလုံးအဖွဲ့ချုပ်ဟာ ၂၀၃၄ ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပဖို့ ဖီဖာထံ တရားဝင် လျှောက်ထားပြီးပြီဖြစ်ပြီး မလေးရှားဘောလုံးအဖွဲ့ချုပ်ဟာ ဆော်ဒီကိုထောက်ခံကြောင်းလည်း ပြောခဲ့ပါတယ်။ 

၂၀၃၀ ကမ္ဘာ့ဖလားပြိုင်ပွဲကို ပေါ်တူဂီ၊ စပိန်နဲ့ မော်ရိုကိုတို့က ပူးတွဲအိမ်ရှင်အဖြစ် ကျင်းပမှာဖြစ်ပြီး ဥရုဂွေး၊ ပါရာဂွေးနဲ့ အာဂျင်တီးနားတို့ဟာ အုပ်စုအဖွင့်ပွဲစဉ်တွေကို အိမ်ရှင်အဖြစ် ကျင်းပမယ်လို့ ဖီဖာက ကြေညာထားပါ တယ်။

အင်ဒိုနီးရှားကတော့ ၂၀၂၂ ကမ္ဘာ့ဖလားပြိုင်ပွဲကို ကာတာမှာ ကျင်းပခဲ့ပြီးဖြစ်လို့ အရှေ့အလယ်ပိုင်းဒေသမှာ ပြန်ပြီး ကျင်းပဖို့ စောနေသေးတယ်လို့ ယူဆထားပြီး ၂၀၃၄ ကမ္ဘာ့ဖလားပြိုင်ပွဲကို သူတို့ ပူးတွဲအိမ်ရှင်အဖြစ် ကျင်းပနိုင်ဖို့ မျှော်လင့်နေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ အောက်တိုဘာ ၁၂

ချယ်လ်ဆီးနဲ့ ရီးရယ်လ်အသင်း ကစားသမားဟောင်း ဟာဇက်ဟာ ပရော်ဖက်ရှင်နယ် ကစားသမားဘဝက အနား ယူဖို့ မဆုံးဖြတ်ခင်မှာ မေဂျာလိဂ်နဲ့ ဆော်ဒီကလပ် အသင်းတွေရဲ့ ကမ်းလှမ်းမှုတွေကို ငြင်းပယ်ခဲ့တာ ဖြစ်ပါတယ်။ 
ဟာဇက်ဟာ ပြီးခဲ့တဲ့ရာသီအကုန်မှာ ရီးရယ်လ်အသင်းကနေ ထွက်ခွာပြီးနောက် နွေရာသီ အပြောင်းအရွှေ့မှာ အသင်းတချို့ရဲ့ ချိတ်ဆက်မှုတွေကို ခံခဲ့ရပါတယ်။

အပြောင်းအရွှေ့ကျွမ်းကျင်သူ ဖာဘရီဇီယိုရိုမန်နိုက အသက် ၃၂ နှစ်အရွယ်ရှိ ဟာဇက်ကို ခေါ်ယူဖို့ မေဂျာလိဂ်နဲ့ ဆော်ဒီ ကလပ်အသင်းတွေက လွန်ခဲ့တဲ့ ၄ လက ကြိုးစားခဲ့ပေမယ့် အပြောင်းအရွှေ့ ဖြစ်မြောက်အောင် ကစား သမားကို ဆွဲဆောင်နိုင်ခဲ့ခြင်း မရှိဘူးလို့ ဖော်ပြခဲ့ပါတယ်။

ဟာဇက်ဟာ ပြီးခဲ့တဲ့ရက်ပိုင်းကမှ ၁၆ နှစ်ကြာ ကစားသမားဘဝကို အဆုံးသတ်ဖို့ အချိန်တန်ပြီလို့ ကြေညာသွား ခဲ့ပါတယ်။

ရီးရယ်လ်အသင်းမှာ ကစားခဲ့တုန်းက ဟာဇက်ကို တွေ့ရစဉ်

ဟာဇက်က “၁၆ နှစ်နဲ့ ပွဲပေါင်း ၇၀၀ ကျော် ကစားအပြီးမှာ ပရော်ဖက်ရှင်နယ် ဘောလုံးသမားတစ်ဦး အနေနဲ့ ကျနော့်ရဲ့ ကစားသမားဘဝကို အဆုံးသတ်ဖို့ ဆုံးဖြတ်လိုက်ပါပြီ။ ကျနော့်ရဲ့ အိပ်မက်ကို အကောင်အထည်ဖော် နိုင်ခဲ့ပြီး ကမ္ဘာပေါ်မှာရှိတဲ့ ကွင်းအများအပြားမှာ ပျော်ပျော်ရွှင်ရွှင်နဲ့ ကစားနိုင်ခဲ့ပါတယ်”လို့ ပြောခဲ့ပါတယ်။

ဟာဇက်ဟာ လိုင်လီ၊ ချယ်လ်ဆီးနဲ့ ရီးရယ်လ်အသင်းတွေမှာ ပွဲပေါင်း ၆၂၀ ကျော် ပါဝင်ကစားခဲ့ပြီး သူ့ရဲ့ ထင်ရှား တဲ့ ကစားသမားဘဝမှာ ပရီးမီးယားလိဂ်ဖလား ၂ ကြိမ်၊ လာလီဂါ၊ ယူရိုပါလိဂ်၊ ချန်ပီယံလိဂ်၊ ကလပ်ကမ္ဘာ့ဖလားနဲ့ လီဂူးဝမ်းဆုဖလားတို့ကို ရယူနိုင်ခဲ့ပါတယ်။

ဟာဇက်ဟာ ဘယ်လ်ဂျီယံ လက်ရွေးစင်အသင်းအတွက် ၁၂၆ ပွဲ ကစားခဲ့ပြီး ၂၀၁၈ ကမ္ဘာ့ဖလားပြိုင်ပွဲမှာ တတိယ နေရာ ရရှိအောင် ဦးဆောင် ပေးနိုင်ခဲ့ပါတယ်။

ကစားသမားဘဝက အနားယူခဲ့ပြီဖြစ်တဲ့ ဟာဇက်ဟာ နည်းပြလောကထဲကို ဝင်ရောက်လာဖွယ် ရှိနေတယ်လို့ သတင်းတွေ ထွက်နေပြီး သူကလည်း အတွေ့အကြုံသစ်တွေ ရယူဖို့ အချိန်ရောက်ပြီလို့ ပြောထားခဲ့ပါတယ်။

Source: Goal

CNI Sport News

၂၀၂၃ ခုနှစ်၊ အောက်တိုဘာ ၁၂

အာဂျင်တီးနားအသင်းခေါင်းဆောင် မက်ဆီဟာ ပါရာဂွေးအသင်းနဲ့ ကစားမယ့် ၂၀၂၆ ကမ္ဘာ့ဖလား ခြေစစ်ပွဲ(တောင်အမေရိကဇုန်)ပွဲစဉ်မှာ ပါဝင်နိုင်ဖို့ မသေချာသေးဘူးလို့ နည်းပြ စကာလိုနီက ပြောလိုက်ပါတယ်။

စကာလိုနီက “မက်ဆီအတွက် နောက်ထပ်လေ့ကျင့်ခန်းအစီအစဉ်တွေက အရေးကြီးပြီး သူပါဝင်ကစားမလား၊ မကစားနိုင်ဘူးလားဆိုတာကို ဆုံးဖြတ်ဖို့ ကျနော်သူနဲ့ စကားပြောရပါလိမ့်မယ်။ ကျနော်သူနဲ့ အရင်စကားပြောမှာ ဖြစ်ပြီး သူပွဲထွက်လူစာရင်းမှာ ပါဝင်နိုင်တယ်ဆိုတာ သေချာဖို့လိုအပ်ပါတယ်။ အရေးကြီးဆုံးအရာက သူ သက်သောင့်သက်သာဖြစ်နေဖို့ပါ” လို့ သတင်းထောက်တွေကို ပြောခဲ့တာပါ။ 

မက်ဆီဟာ ကြွက်သားပြဿနာကြောင့် အင်တာမိုင်ယာမီအသင်းအတွက် တစ်လကြာမကစားနိုင်ခဲ့ဘဲ နောက်ဆုံး ကစားခဲ့တဲ့ စင်စင်နာတီအသင်းနဲ့ ပွဲမှာ လူစားဝင်ကစားသမားအဖြစ် ပြန်လည်ပါဝင်နိုင်ခဲ့တာဖြစ်ပါတယ်။ ဒါပေမယ့် အာဂျင်တီးနားအသင်းကတော့ မက်ဆီကို ကမ္ဘာ့ဖလားခြေစစ်ပွဲတွေအတွက် အသင်းလူစာရင်းမှာ ထည့်သွင်းခဲ့တာပါ။ မက်ဆီဟာ လက်ရှိအချိန်မှာ အာဂျင်တီးနားအသင်းနဲ့ ပူးပေါင်းနေပြီး လေ့ကျင့်မှုတွေ ပြုလုပ်နေတာဖြစ်ပါတယ်။

အာဂျင်တီးနားအသင်းလူစာရင်းမှာ ဒဏ်ရာကြောင့် ဒီမာရီယာနဲ့ ကော်ရီယာတို့ မပါဝင်ခဲ့ပေမယ့် ရိုးမားအသင်း အတွက် ပါဝင်ကစားခဲ့ရင်း ဒူးဒဏ်ရာရရှိခဲ့တဲ့ ဒိုင်ဘားလားကတော့ ပါဝင်လာခဲ့တာပါ။ အာဂျင်တီးနား အသင်း နည်းပြ စကာလိုနီက ဒဏ်ရာကြောင့်မပါဝင်နိုင်ခဲ့တဲ့သူတွေဟာ အသင်းအတွက် အရေးပါတဲ့ကစားသမားတွေ ဖြစ်ပေမယ့် သူတို့နေရာမှာအစားထိုးမယ့် ကစားသမားတွေကလည်း လေ့ကျင့်ရေးကွင်းမှာ အကောင်းဆုံး အလုပ်လုပ်နေကြတယ်လို့ ပြောခဲ့ပါတယ်။

အာဂျင်တီးနားအသင်းဟာ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)ပွဲစဉ်တွေအဖြစ် အောက်တိုဘာ ၁၃ ရက်မှာ ပါရာဂွေး၊ ၁၈ ရက်မှာ ပီရူးအသင်းတို့နဲ့ ယှဉ်ပြိုင်ရမှာပါ။ အာဂျင်တီးနားအသင်းဟာ ခြေစစ်ပွဲ ၂ ပွဲကစား အပြီးမှာ ၂ ပွဲစလုံးနိုင်ပွဲရရှိထားတာဖြစ်ပါတယ်။

Source:ChannelNewsAsia