CNI News
၂၀၂၅ ခုနှစ်၊ စက်တင်ဘာ ၂၃
စစ်ကိုင်းတိုင်းဒေသကြီးအထက်ပိုင်း ဗန်းမောက်မြို့သည် ကချင်လွတ်လပ်ရေးတပ်မတော်(KIA) အတွက် ဘယ်လို အရေးပါတဲ့ အခန်းကဏ္ဍမှာ ရှိနေသလဲဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်မှုများရှိနေ ကြသည်။
KIA ဦးဆောင်သည့် ပူးပေါင်းတပ်ဖွဲ့သည် ဗန်းမော်၌ မြန်မာ့တပ်မတော်နှင့် စစ်ရေးပြင်းထန်ပြီး ရှုံးနိမ့်နေချိန်တွင် ဗန်းမောက်မြို့သို့ ၂၀၂၅ ခုနှစ်၊ စက်တင်ဘာ ၁၅ ရက်တွင် စတင်တိုက်ခိုက်ကာ စက်တင်ဘာ ၂၀ ရက်နေ့၌ သိမ်းပိုက်နိုင်ခဲ့သည်။
လက်ရှိ ဗန်းမောက်မြို့ကို KIA၊ PDF၊ ကဒူးတပ်ဖွဲ့တို့ ပူးပေါင်း၍ ထိုးစစ်ဆင် သိမ်းပိုက်လိုက်ပြီးနောက် တပ်မတော် က စက်တင်ဘာ ၂၁ ရက်တွင် လေကြောင်း တိုက်ခိုက်မှုများ ပြုလုပ်လာခဲ့သည်။
KIA အနေဖြင့် ဗန်းမောက်ကို ထိန်းနိုင်ပါက စစ်ကိုင်းတိုင်းအထက်ပိုင်းအား ရိက္ခာ၊ လူ၊ လက်နက် ပို့ဆောင်ရန် အတွက် အဆင်ပြေကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။
SNA တပ်ဖွဲ့ကို တွေ့ရစဉ်
၎င်းက “ဗန်းမော်ကတော့ သူတို့ရှုံးနေပြီပေါ့။ ရှုံးတဲ့အခါကြတော့ KIA ကတော့ သူ့အတွက်ကတော့ သိက္ခာဆယ်တဲ့ အနေနဲ့ ဗန်းမောက်ပေါ့၊ နောက်တစ်ခုက ဗန်းမောက်ကလည်း ရှမ်းနီ ဒေသပါပဲ။ ပြောရရင်တော့ ကချင်လုံးဝ မရှိ ပါဘူး။ ရှမ်းနီနဲ့ ဗမာနဲ့ပေါ့နော်။ မူးမြစ်ဝှမ်းထိပ်ပေါ့။ ဒီဗန်းမောက်ကို ထိန်းလိုက်လို့ရှိရင် စစ်ကိုင်းတိုင်းအထက်ပိုင်း ကို ရိက္ခာ၊ လူ၊ လက်နက် ပို့ဆောင်ဖို့အတွက်က အဆင်ပြေတယ်လေ။ ဒါကြောင့် သူ ဗန်းမောက်ကိုလည်း အရှက် ပြေ အားစမ်းတာပေါ့နော်။ အောင်မြင်ဘူး၊ မအောင်မြင်ဘူး ဆိုတာကတော့ နောက် ကျနော်တို့ မြင်လာရမှာပေါ့။ ဗန်းမောက်ကတော့ KIA က မူးမြစ်ဝှမ်းနဲ့ထိပ်က ဖြစ်နေတဲ့အတွက်ကြောင့် ဒါကြီးကိုတော့ ခြေကုပ်ယူမှာပေါ့နော် ဗန်းမောက်က။ ဗန်းမောက်မှာတော့ ဒီလိုပဲ လုပ်နေကိုင်နေကြမယ်။ ဒါပေမယ့် ရေရှည်မှာတော့ တပ်ကပဲ အသာစီး ရသွားမှာပေါ့ အဲဒါပဲ သွားတွေ့တယ်” ဟု ပြောသည်။
ဗန်းမောက်မြို့နယ်ကို ရှမ်းနီအမျိုးသားများတပ်မတော်(SNA)၏ တပ်မဟာ ၆၁၄ က အဓိက လုံခြုံရေးနှင့် တည်ငြိမ်အေးချမ်းရေးကို ဖော်ဆောင်ပေးလျက်ရှိပြီး တပ်မတော်၏ တပ်မ ၇၇ ကတော့ ဗန်းမောက်မြို့ပေါ်မှာ လုံခြုံရေးဆောင်ရွက်သည်။
လက်ရှိတွင် SNA တပ်ဖွဲ့သည် ဗန်းမောက်မြို့ အနောက်ဘက်ခြမ်းကို ထိန်းချုပ်ထားပြီး စစ်ပွဲအတွက် ပြင်ဆင်နေ သလို ဗန်းမောက်မြို့ ပြန်လည် ရရှိရေးအတွက်လည်း ပြင်ဆင်လျက်ရှိနေသည်။
ဗန်းမောက်မြို့အဝင်မှာ PDF များကိုတွေ့ရစဉ်
ဗန်းမောက်မြို့ကို ရှမ်းနီများ လက်လွှတ်လိုက်ရခြင်းသည် ခုခံနေသည့် အင်အားနှင့် စစ်ကူမလာနိုင်သည့် အတွက် ကြောင့် ဖြစ်နိုင်ကာ KIA အနေဖြင့် ၎င်းနယ်မြေထဲ စစ်ကြောင်းများ မဝင်လာရေးအတွက် ဗန်းမောက်ကို ဝင်ရောက်ခြင်း ဖြစ်နိုင်ကြောင်း ပအိုဝ်းအမျိုးသားလွတ်မြောက်ရေးအဖွဲ့ချုပ် (PNLO-NCA/S) မှ ဥက္ကဋ္ဌ ဗိုလ်မှူးကြီး ခွန်ဥက္ကာက CNI သတင်းဌာနသို့ ပြောသည်။
၎င်းက “စစ်ရေးကတော့ တချို့နေရာပေါ့လေ။ သာလွန်အင်အားနဲ့ ဗန်းမောက်မှာ ခုခံနေတဲ့အင်အားနဲ့ စစ်ကူ မလာနိုင်တာရယ်။ ဟိုဘက်ကလည်း KIA/KIO အပါအဝင် အဲဒီဒေသခံ PDF တွေနဲ့ ပေါင်းလိုက်တော့ နည်းနည်း လေး တိုက်စွမ်းအားပေါ့လေ။ စစ်အား၊ လူအား ပိုသာသွားတဲ့ သဘောနဲ့တူပါတယ်။ ဒါကြောင့် ဗန်းမောက်မြို့ကို ရှမ်းနီတွေက လွှတ်လိုက်ရတယ်ဆိုတာ သူ့ဘက် ကိုယ့်ဘက် စစ်ကူမလာနိုင်တဲ့အတွက် ဖြစ်နိုင်တယ်လို့ ယူဆပါ တယ်။ KIA က သူ့အထဲကို စစ်ကြောင်းကြီးတွေ မဝင်လာဖို့အတွက် ဗန်းမောက်က KIO ဝင်ပေါက် ဖြစ်တာကို။ KIA ထဲကို ဝင်သွားလို့ရတဲ့ စစ်ကိုင်းတိုင်းရဲ့ အစွန်ပေါ့လေ ရှမ်းနီဒေသဖြစ်တာကို။ အဲဒါကြောင့် KIA ကလည်း အသည်း အသန်ဝင်ပြီး ထိန်းတဲ့သဘောပါပဲ။ ဒါကြောင့် ဗန်းမော်နဲ့ ဗန်းမောက်ပေါ့။ ဗန်းမောက်ကတော့ ခုခံတဲ့ဘက်က အားနည်းတော့ ရသွားတာပေါ့။ ဗန်းမော်ကတော့ သိက္ခာအရ ဆက်တိုက်နေတဲ့ သဘောလို့ ယူဆပါတယ်။ အဲဒီ ၂ နေရာကတော့ နည်းနည်းကွာခြားပါတယ်” ဟု ပြောသည်။
KIA သည် ဟုမ္မလင်းမြို့နှင့် ကသာမြို့များကို ဆက်လက် ထိုးစစ်ဆင် တိုက်ခိုက်လာနိုင်ခြေလည်း ရှိကြောင်း၊ KIA သည် ဗန်းမောက်မြို့ကို မည်မျှ ကြာကြာထိန်းချုပ်နိုင်မလဲကိုမူ စောင့်ကြည့်ရအုံးမည် ဖြစ်ကြောင်း၊ KIA သည် ရှမ်းနီဒေသများကို ဦးတည်တိုက်ခိုက်နေခြင်းကလည်း SNA နှင့် ရှမ်းနီ အင်အားကို ဖြတ်တောက်ရန် ကြိုးပမ်းနေ လည်း ဖြစ်နိုင်ကြောင်း စစ်ရေးနှင့်နိုင်ငံရေးအကဲခတ်များကြား သုံးသပ်မှုများရှိနေကြသည်။
KIA သည် ကချင်ပြည်နယ်နှင့် စစ်ကိုင်းတိုင်းဒေသကြီးအတွင်းမှာ မြို့သိမ်းတိုက်ပွဲများ ဖော်ဆောင်နေခြင်းနှင့် အတူ တခြားတစ်ဖက်မှာလည်း မြန်မာ့တပ်မတော်နှင့် ငြိမ်းချမ်းရေးဆွေးနွေးရန် ကမ်းလှမ်း၍ ညှိနှိုင်းမှုများ ပြုလုပ်လျက်ရှိသည်။
