CNI Sport News

၂၀၂၅ ခုနှစ်၊ ဖေဖော်ဝါရီ ၁၇

ရီးရယ်လ်အသင်း ကွင်းလယ်လူ ဘယ်လင်ဂမ်ဟာ အိုဆာဆူနာအသင်းနဲ့ လာလီဂါပွဲစဉ်မှာ ဒိုင်လူကြီးကို ဆဲဆိုမှု ပြုလုပ်ခဲ့တယ်ဆိုပြီး စွပ်စွဲခံထားရတာကြောင့် ၁၂ ပွဲပယ်ခံရဖွယ်ရှိနေတာ ဖြစ်ပါတယ်။ 

အိုဆာဆူနာနဲ့ ရီးရယ်လ်အသင်းတို့ ၁ ဂိုးစီ သရေကျခဲ့တဲ့ လာလီဂါပွဲစဉ်ရဲ့ ပွဲချိန် ၃၉ မိနစ်မှာ ဘယ်လင်ဂမ်ဟာ ရိုင်းစိုင်းတဲ့ ဘာသာစကား အသုံးပြုခဲ့တယ်ဆိုပြီး ကွင်းလယ်ဒိုင်လူကြီးက သူ့ကို တိုက်ရိုက် အနီကတ်ပြသပြီး ထုတ်ပယ်ခဲ့တာပါ။ 

ကွင်းလယ်ဒိုင်လူကြီးက ဘယ်လင်ဂမ်ဟာ သူ့ကို 'F*** you' လို့ပြောခဲ့တယ်လို့ စွပ်စွဲထားပေမယ့် အင်္ဂလန် ကစားသမားကတော့ ဒါကို ငြင်းဆန်ထားခဲ့ပါတယ်။

ဘယ်လင်ဂမ်က သူဟာ ကွင်းလယ်ဒိုင်လူကြီးကို ရည်ရွယ်ခဲ့တာ မဟုတ်ဘဲ သူ့ကိုယ်သူ စိတ်ပျက်ခဲ့တာကြောင့် 'f*** off' လို့သာ အသုံးပြုခဲ့တာလို့ ပြောထားတာပါ။ 

ရီးရယ်လ်အသင်းနည်းပြ အန်ဆယ်လော့တီကလည်း ကွင်းလယ်ဒိုင်လူကြီးဟာ ဘယ်လင်ဂမ်ရဲ့ အင်္ဂလိပ်စကားကို နားမလည်ခဲ့ဘဲ သူထင်မြင်ခဲ့တာနဲ့ ပြောခဲ့တာက မတူညီဘူးလို့ ပြောခဲ့ပါတယ်။ 

ရီးရယ်လ်အသင်းဟာ ဘယ်လင်ဂမ်ရဲ့ အနီကတ်ပြစ်ဒဏ်ကို အယူခံဝင်ဖွယ်ရှိတယ်လို့ သိရပြီး အယူခံမဝင်ခဲ့ရင် သူဟာ ၁၂ ပွဲအထိ ပွဲပယ်ခံရနိုင်တယ်လို့ သိရပါတယ်။ 

ဘယ်လင်ဂမ်ကို တွေ့ရစဉ်

စပိန်ဘောလုံးအဖွဲ့ချုပ်ရဲ့ စည်းကမ်းထိန်းသိမ်းရေး စည်းမျဉ်းတွေမှာ ကစားသမားအနေနဲ့ တာဝန်ရှိသူတွေကို စော်ကားတဲ့ အပြုအမူတွေပြုလုပ်မှုမှာ အပြစ်ရှိကြောင်းတွေ့ရရင် ၄ ပွဲကနေ ၁၂ ပွဲအထိ ပွဲပယ်ခံရမယ်လို့ ဖော်ပြထားတာပါ။

ဘယ်လင်ဂမ်အနေနဲ့ ၁၂ ပွဲသာ ပွဲပယ်ခံရမယ်ဆိုရင် ဒီရာသီ ရီးရယ်လ်အသင်းရဲ့ လက်ကျန်ပွဲ အများစုကို လွဲချော်တော့မှာ ဖြစ်ပါတယ်။

ဘယ်လင်ဂမ်ကတော့ အိုဆာဆူနာအသင်းနဲ့ပွဲမှာ ပြသခံရတဲ့အတွက် အနီကတ်အတွက် ရီးရယ်လ်အသင်း ဖော်တွေကို တောင်းပန်ခဲ့ပြီး ဒိုင်လူကြီးကို စော်ကားတဲ့ စကားလုံး ပြောခဲ့ခြင်းမရှိဘူးဆိုတာ ဗွီဒီယိုထဲမှာ ရှင်းရှင်းလင်းလင်း မြင်တွေ့နိုင်တယ်လို့ ပြောခဲ့တာပါ။ 

အသက် ၂၁ နှစ်အရွယ်ရှိ ဘယ်လင်ဂမ်ဟာ ၂၀၂၃ ခုနှစ် နွေရာသီက ဒေါ့မွန်အသင်းကနေ ရောက်ရှိလာပြီး ကတည်းက ရီးရယ်လ်အသင်းအတွက် ၇၆ ပွဲ ပါဝင်ကစားထားပြီး ၃၄ ဂိုး သွင်းယူထားတာဖြစ်ပါတယ်။ 

Source: Dailymail

CNI Sport News

၂၀၂၅ ခုနှစ်၊ ဖေဖော်ဝါရီ ၁၇

ယူနိုက်တက်အသင်းဟာ စပါးအသင်းကို ၁ ဂိုး-ဂိုးမရှိနဲ့ အရေးနိမ့်ပြီး ဒီရာသီ ပရီးမီးယားလိဂ် ပြိုင်ပွဲမှာ ၁၂ ပွဲမြောက် ရှုံးပွဲကြုံတွေ့ခဲ့ရပေမယ့် နည်းပြအာမိုရင်က သူ့ရဲ့နည်းပြရာထူးအတွက် စိုးရိမ်မှုမရှိဘူးလို့ ပြောခဲ့ပါ တယ်။ 

အာမိုရင်က “ကျနော် စိုးရိမ်မှုမရှိပါဘူး။ ဒါနဲ့ပတ်သက်ပြီး ကျနော်တို့ရဲ့ပရိသတ်တွေနဲ့ မီဒီယာတွေရဲ့ ထင်မြင်မှုတွေ ကို ကျနော် နားလည်ပါတယ်။ ကျနော်ဟာ ရှုံးနိမ့်ရတာကို မုန်းတီးပြီး ဒီခံစားချက်က ဆိုးရွားလွန်းပါတယ်။ တခြား အရာတွေကို မစဉ်းစားဘဲ ကစားသမားတွေကို ကူညီဖို့ ကျနော် ရောက်ရှိနေတာပါ။ ကျနော့်ရဲ့ အခြေအနေ၊ ကျနော့်ရဲ့ အလုပ်ကိုနားလည်ပြီး ပွဲတွေကို အနိုင်ရယူချင်ပါတယ်။ အမှတ်ပေးဇယား ရပ်တည်မှုက စိုးရိမ်စရာ ဖြစ်ပေမယ့် ကျနော့်အတွက်တော့ ကျနော်မစိုးရိမ်ဘူး”လို့ BBC ကိုပြောခဲ့တာပါ။ 

နည်းပြ အာမိုရင်ဟာ ယူနိုက်တက်အသင်းကို ပရီးမီးယားလိဂ် ၁၄ ပွဲ ကိုင်တွယ်အပြီးမှာ ၈ ပွဲအထိ ရှုံးပွဲကြုံတွေ့ ထားတာကြောင့် သူ့ရဲ့နည်းပြရာထူးဟာ ဖိအားတွေရှိနေတာ ဖြစ်ပါတယ်။ 

ယူနိုက်တက်အသင်းဟာ စပါးအသင်းကို အရေးနိမ့်ပြီးနောက် ပရီးမီးယားလိဂ် အမှတ်ပေးဇယား အဆင့် ၁၅ နေရာ ကို ရောက်ရှိသွားခဲ့ပြီး နှစ်ပေါင်း ၅၁ နှစ်အကြာမှာ အဆိုးရွားဆုံးအဆင့် ရပ်တည်မှုဖြစ်ခဲ့တာပါ။ 

ယူနိုက်တက်အသင်းကို တွေ့ရစဉ်

ယူနိုက်တက်အသင်းဟာ လက်ရှိအချိန်မှာ ဒဏ်ရာနှိပ်စက်မှုတွေကြောင့် အရန်ခုံတန်းပေါ်မှာ လူငယ်ကစားသမား အများအပြားကို ခေါ်ယူခဲ့ရတာဖြစ်ပါတယ်။ 

ဒါပေမယ့် နည်းပြအာမိုရင်ဟာ တိုက်စစ်မှူး ချီဒိုအိုဘီ တစ်ဦးတည်းကိုသာ စပါးအသင်းနဲ့ပွဲမှာ လူစားလဲ အသုံးပြုခဲ့တာပါ။

နည်းပြအာမိုရင်က ပရီးမီးယားလိဂ်ပြိုင်ပွဲဟာ ပြိုင်ဆိုင်မှု ပြင်းထန်တာကြောင့် လူငယ်ကစားသမားတွေကို သတိထားကိုင်တွယ်ဖို့ ကြိုးစားနေပြီး အပြောင်းအလဲ ပြုလုပ်ဖို့ မလိုဘူးလို့ ခံစားခဲ့ရကြောင်း ပြောခဲ့ပါတယ်။ 

ယူနိုက်တက်အသင်းဟာ အဓိက ကစားသမားဖြစ်တဲ့ အာမတ်ကို ဒဏ်ရာကြောင့် ရာသီအကုန်ထိ အနားပေးရဖို့ ရှိနေပြီး ကိုဘီမိုင်နူးနဲ့ အူဂါတေးတို့ကိုလည်း ဒဏ်ရာကြောင့် အနားပေးထားရတာပါ။

ယူနိုက်တက်အသင်းဟာ လာမယ့် ပရီးမီးယားလိဂ်ပွဲစဉ်အဖြစ် ရလဒ်ကောင်းတွေရရှိနေတဲ့ အဲဗာတန်အသင်းနဲ့ ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ယူနိုက်တက်အသင်းနည်းပြ အာမိုရင်က အသင်းအနေနဲ့ နွေရာသီမှာ ကစားသမားသစ်တွေ ဝယ်ယူချင်ရင် အသင်းမှာရှိနေတဲ့ ကစားသမားတွေကို ရောင်းချဖို့လိုတယ်လို့ ပြောခဲ့ပါတယ်။ 

အာမိုရင်က “ရိုးရိုးလေးပါ၊ တစ်ခုခုလုပ်ချင်ရင် ကစားသမားတွေ ရောင်းချဖို့လိုပါတယ်။ ကျနော်တို့ဟာ အခု အချိန်မှာ ကစားသမား ခေါ်ယူမှု မလုပ်နိုင်သလို အပြောင်းအရွှေ့ကလည်း ပိတ်သွားပါပြီ။ ကျနော်တို့ဟာ လာမယ့်ပွဲတွေကို အာရုံစိုက်ဖို့လိုအပ်ပြီး နွေရာသီကျရင်တော့ ဘာတွေဖြစ်လာမလဲဆိုတာ မြင်တွေ့ရမှာပါ”လို့ ပြောခဲ့တာပါ။ 

ယူနိုက်တက်အသင်းဟာ ပရီးမီးယားလိဂ်ရဲ့ ဘဏ္ဍာရေး စည်းမျဉ်းချိုးဖောက်မှုကို ရှောင်ချင်တာကြောင့် ပြီးခဲ့တဲ့ ဇန်နဝါရီက ကြယ်ပွင့်ကစားသမား ဂါနာချိုကို ရောင်းချဖို့ လုပ်ဆောင်ခဲ့ပါတယ်။ 

ဂါနာချိုကို ခေါ်ယူဖို့ ချယ်လ်ဆီးနဲ့ နာပိုလီအသင်းတို့က စိတ်ဝင်စားပြီး ဆွေးနွေးမှုတွေ ရှိခဲ့ပေမယ့် အပြောင်းအရွှေ့ မဖြစ်ခဲ့တာကြောင့် ကစားသမားဟာ ယူနိုက်တက်အသင်းမှာ ဆက်ပြီးရှိနေခဲ့တာပါ။ 

ယူနိုက်တက်အသင်းဟာ ပြီးခဲ့တဲ့ ဇန်နဝါရီအပြောင်းအရွှေ့က အသင်းမှာ လုပ်ခလစာ အများကြီးရရှိနေတဲ့ ရက်ရှ်ဖို့ဒ်နဲ့ အန်တိုနီတို့ကိုလည်း အငှားချခဲ့ပါတယ်။ 

အာမိုရင်ကို တွေ့ရစဉ်

ဂါနာချိုကိုခေါ်ယူဖို့ စိတ်ဝင်စားခဲ့တဲ့ ချယ်လ်ဆီးအသင်းဟာ ယူနိုက်တက် အကယ်ဒမီထွက် ကိုဘီမိုင်နူးကို ခေါ်ယူဖို့ နွေရာသီမှာ ကြိုးပမ်းလာဖွယ်ရှိနေတာပါ။ 

ယူနိုက်တက်အသင်းဟာ ကိုဘီမိုင်နူးကိုလည်း သူတို့သတ်မှတ်ထားတဲ့ ပြောင်းရွှေ့ကြေးရရင် ရောင်းချသွားဖွယ် ရှိနေပါတယ်။ 

မန်ချက်စတာကလပ်ဟာ ပြီးခဲ့တဲ့ ဇန်နဝါရီက လက်ချီအသင်း နောက်ခံလူ ဒေါဂူနဲ့ အာဆင်နယ်အသင်းကြယ်ပွင့် ဟီဗန်တို့ကိုသာ ခေါ်ယူနိုင်ခဲ့တာပါ။ 

ယူနိုက်တက်အသင်းဟာ လာမယ့် နွေရာသီမှာ စာချုပ်ကုန်ဆုံးမယ့် လင်ဒီလော့ဖ်နဲ့ အဲရစ်ဆန်တို့ကို ထွက်ခွာခွင့် ပေးမှာဖြစ်ပြီး ဆန်ချိုကို ချယ်လ်ဆီးအသင်းထံ အပြီးသတ်ရောင်းချကာ ရက်ရှ်ဖို့ဒ်နဲ့ ကတ်စီမီရိုတို့ကိုလည်း ရောင်းချဖို့ စီစဉ်ထားပါတယ်။

ယူနိုက်တက်အသင်းနည်းပြ အာမိုရင်ဟာ ဂါနာချိုနဲ့ ကိုဘီမိုင်နူးတို့ကို အသင်းမှာ ဆက်ထိန်းသိမ်းချင်ပေမယ့် သူတို့ထဲက တစ်ဦးကို နွေရာသီမှာ ဆုံးရှုံးရဖွယ်ရှိနေတာပါ။

ယူနိုက်တက်အသင်းဟာ ဖေဖော်ဝါရီ ၁၆ ရက်မှာ ပရီးမီးယားလိဂ် ပွဲစဉ်အဖြစ် စပါးအသင်းအိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: Metro

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ပီအက်စ်ဂျီအသင်းဟာ လီဗာပူးလ်အသင်း နောက်ခံလူ ကိုနာတေးကို နွေရာသီ အပြောင်းအရွှေ့မှာ ခေါ်ယူနိုင်ဖို့ မျှော်လင့်နေပါတယ်။ 

ပီအက်စ်ဂျီအသင်းဟာ လာမယ့် နွေရာသီအတွက် စီစဉ်မှုတွေ ပြုလုပ်နေပြီး လီဗာပူးလ်အသင်း နောက်ခံလူ ကိုနာတေးဟာ သူတို့ရဲ့ပစ်မှတ်တွေထဲက တစ်ဦးဖြစ်လာခဲ့တာပါ။

ပီအက်စ်ဂျီအသင်းနည်းပြ လူးဝစ်အင်းနရစ်ဟာ ဗဟိုခံစစ်ကို ပိုပြီးအားကောင်းစေဖို့အတွက် ကိုနာတေးကို ခေါ်ယူအားဖြည့်ချင်နေတာ ဖြစ်ပါတယ်။ 

ကိုနာတေးဟာ လူငယ်ကစားသမားဘဝက ပဲရစ်အကယ်ဒမီမှာ ၅ နှစ်ကြာရှိခဲ့တာကြောင့် သူမွေးဖွားရာမြို့ကို ပြန်လာဖို့ ဆွဲဆောင်ခံနေရတာပါ။ 

ကိုနာတေးကလည်း ပီအက်စ်ဂျီအသင်းထံ အပြောင်းအရွှေ့ကို စိတ်ဝင်စားပေမယ့် လက်ရှိအချိန်မှာ လီဗာပူးလ် အသင်းနဲ့အတူ ဒီရာသီ ပရီးမီးယားလိဂ်၊ ချန်ပီယံလိဂ်နဲ့ ကာရာဘောင်းဖလား ပြိုင်ပွဲတွေမှာ အောင်မြင်မှုရယူနိုင်ဖို့ အာရုံစိုက်နေတာ ဖြစ်ပါတယ်။ 

ကိုနာတေးကို တွေ့ရစဉ်

ပြင်သစ်လက်ရွေးစင်အတွက် ၂၁ ပွဲ ပါဝင်ကစားထားတဲ့ ကိုနာတေးနဲ့ လီဗာပူးလ်အသင်းတို့ရဲ့ စာချုပ်ဟာ ၁ နှစ်သာ ကျန်ရှိတော့ပြီး သူဟာ လီဗာပူးလ်အသင်းရဲ့ စာချုပ်သက်တမ်းတိုးဖို့ ကမ်းလှမ်းမှုကို ပယ်ချထားတာပါ။ 

လီဗာပူးလ်အသင်းဟာ ဒီရာသီအကုန်မှာ ဗန်ဒိုက်ကို အလွတ်နဲ့ ဆုံးရှုံးရဖွယ် ရှိနေတာကြောင့် ကိုနာတေးကို စာချုပ်သက်တမ်းတိုးပြီး ဆက်ထိန်းသိမ်းနိုင်ဖို့ ကြိုးပမ်းဖွယ်ရှိနေပါတယ်။ 

ကိုနာတေးဟာ ဒဏ်ရာတွေနဲ့ ရုန်းကန်ခဲ့ရပေမယ့် နည်းပြအာနီဆလော့ လက်ထက်မှာ လီဗာပူးလ်အသင်းရဲ့ အဓိက ကစားသမားအဖြစ် ပါဝင်ခွင့်ရရှိနေတာပါ။

၂၀၂၁ ခုနှစ်က လိုက်ပ်ဇစ်အသင်းကနေ ရောက်ရှိလာခဲ့တဲ့ ကိုနာတေးဟာ လီဗာပူးလ်အသင်းအတွက် ၁၁၆ ပွဲ ပါဝင်ကစားထားပြီး ၅ ဂိုး သွင်းယူထားပါတယ်။ 

လီဗာပူးလ်အသင်းဟာ ဖေဖော်ဝါရီ ၁၆ ရက်မှာ ပရီးမီးယားလိဂ် ပွဲစဉ်အဖြစ် ဝုလ်ဗ်စ်အသင်းကို အိမ်ကွင်း ယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ရီးရယ်လ်အသင်းနည်းပြ အန်ဆယ်လော့တီက ဆော်ဒီပရိုလိဂ်ထံ ပြောင်းရွှေ့ဖို့ ချိတ်ဆက်မှုတွေခံနေရတဲ့ ဗီနီစီးယက်စ်ရဲ့ အနာဂတ်ထင်ကြေးတွေနဲ့ ပတ်သက်တဲ့ မေးခွန်းတွေကို ဖြေရတာ ငြီးငွေ့နေပြီလို့ ပြောခဲ့ပါတယ်။ 

အန်ဆယ်လော့တီက “မေးခွန်းတွေက အများကြီးပါ၊ ဒီအကြောင်းအရာတွေအတွက် ငြီးငွေ့နေလားဆိုရင် ဟုတ်ပါ တယ်။ စိုးရိမ်မှုရှိလားဆိုရင် မရှိပါဘူး။ သူပျော်နေတာကို ကျနော်တို့ မြင်တွေ့ရပါတယ်။ ကျနော်တို့ဟာ ဒီအကြောင်းအရာကို ဒီနေရာမှာ မပြောချင်သလို သူကလည်း မပြောချင်ပါဘူး။ သူဟာ နောက်ဆုံးကစားခဲ့တဲ့ပွဲမှာ အလွန်ကောင်းမွန်စွာ လုပ်နိုင်ခဲ့ပါတယ်”လို့ သတင်းထောက်တွေရဲ့ မေးမြန်းမှုကို ဖြေခဲ့တာပါ။

ဆော်ဒီပရိုလိဂ်ဟာ ဗီနီစီးယက်စ်ကို လာမယ့်နွေရာသီမှာ ခေါ်ယူနိုင်ဖို့ အပြင်းထန် ကြိုးစားနေပေမယ့် ကစားသမားဟာ ရီးရယ်လ်အသင်းနဲ့ စာချုပ်သစ်ထဲမှာ လက်မှတ်ရေးထိုးဖို့ နီးစပ်နေပြီလို့ သတင်းတွေ ထွက်ပေါ်နေပါတယ်။

ဗီနီစီးယက်စ်ကို တွေ့ရစဉ်

ဗီနီစီးယက်စ်ဟာ ရီးရယ်လ်အသင်းက မန်စီးတီးအသင်းကို ၃ ဂိုး-၂ ဂိုးနဲ့ အနိုင်ရခဲ့တဲ့ ချန်ပီယံလိဂ် ပလေးအော့ဖ် ပထမအကျော့ပွဲစဉ်မှာ အကောင်းဆုံး ကစားသမားဆုရတဲ့အထိ ခြေစွမ်းပြသနိုင်ခဲ့တာပါ။ 

ဗီနီစီးယက်စ်က သူဟာ ရီးရယ်လ်အသင်းမှာ ကာလရှည်ကြာ ဆက်ရှိချင်နေပြီး သူ့ရဲ့အနာဂတ်နဲ့ပတ်သက်တဲ့ တိကျတဲ့အဖြေကို သိရမယ်လို့ ပြောထားပါတယ်။

ဗီနီစီးယက်စ်နဲ့ ရီးရယ်လ်အသင်းတို့ရဲ့ စာချုပ်ဟာ ၂၀၂၇ ခုနှစ်၊ ဇွန်လအထိ သက်တမ်းရှိနေသေးတာပါ။

၂၀၁၈ ခုနှစ်က ဖလာမင်ဂိုအသင်းကနေ ရောက်ရှိလာခဲ့တဲ့ ဗီနီစီးယက်စ်ဟာ ရီးရယ်လ်အသင်းအတွက် ၂၉၅ ပွဲ ပါဝင်ကစားထားပြီး ၁၀၁ ဂိုး သွင်းယူထားပါတယ်။

ရီးရယ်လ်အသင်းဟာ ဖေဖော်ဝါရီ ၁၅ ရက်မှာ လာလီဂါပွဲစဉ်အဖြစ် အိုဆာဆူနာအသင်း အိမ်ကွင်း သွားရောက် ယှဉ်ပြိုင်ရမှာ ဖြစ်ပါတယ်။ 

Source: CNA

CNI Sport News

၂၀၂၅ ခုနှစ်၊ ဖေဖော်ဝါရီ ၁၅

ချယ်လ်ဆီးအသင်းဟာ ဘရိုက်တန်အသင်းကို ၃ ဂိုး-ဂိုးမရှိနဲ့ ဂိုးပြတ် အရေးနိမ့်ပြီးနောက် နည်းပြမာရက်စ်ကာက ဒီပွဲဟာ သူ့ရဲ့လက်ထက်မှာ ချယ်လ်ဆီးအသင်းရဲ့ အဆိုးရွားဆုံး စွမ်းဆောင်ရည်လို့ ပြောခဲ့ပါတယ်။

မာရက်စ်ကာက “အရာအားလုံးကို စိတ်ပျက်မိပါတယ်။ ဒီပွဲကိုအားပေးဖို့ ရောက်လာခဲ့တဲ့ ပရိသတ်တွေအတွက် ကျနော် စိတ်မကောင်း ဖြစ်ရပါတယ်။ ကျနော်တို့ဟာ လက်ရှိအချိန်မှာ လွယ်လွယ်ကူကူနဲ့ သွင်းဂိုးတွေ ခွင့်ပြုနေရ သလို ဂိုးရဖို့ ရုန်းကန်နေရတယ်လို့ ခံစားရပါတယ်။ ကျနော်တို့ဟာ ပိုပြီးကောင်းအောင် လုပ်ဖို့အတွက် အတူ လက်တွဲ လုပ်ဆောင်ဖို့ လိုအပ်နေပါပြီ။ ကျနော်ဟာ အမြဲတမ်း ဖိအားတွေခံစားရပေမယ့် ဒီပွဲက ကျနော် ဒီကို ရောက်ပြီးကတည်းက အဆိုးရွားဆုံး စွမ်းဆောင်ရည်ပါ။ ကျနော်တို့ဟာ ဥရောပဝင်ခွင့်နေရာနဲ့ အဆုံးသတ်နိုင်ဖို့ ပြိုင်ဆိုင်မှုရှိနေဆဲပါ”လို့ Sky Sports ကို ပြောခဲ့တာပါ။

ချယ်လ်ဆီးအသင်းဟာ ဒီပွဲမှာ ဘရိုက်တန်အသင်းကို ဘောလုံးပိုင်ဆိုင်မှု အသာစီးနဲ့သာ ကစားနိုင်ခဲ့ပြီး ဂိုးပေါက်တည့်မှု တစ်ကြိမ်မှ မရှိခဲ့တာဖြစ်ပါတယ်။

ဘရိုက်တန်အသင်းကတော့ ဂိုးပေါက်တည့်တဲ့ ၅ ကြိမ်မှာ သွင်းဂိုး ၃ ဂိုး သွင်းယူနိုင်ခဲ့တာပါ။ 

ချယ်လ်ဆီးအသင်းဟာ ပြီးခဲ့တဲ့ FA ဖလား စတုတ္ထအဆင့် ပွဲစဉ်မှာလည်း ဘရိုက်တန်အသင်းကို အရေးနိမ့်ပြီး ပြိုင်ပွဲကနေ ထွက်ခွာခဲ့ရတာကြောင့် ဘရိုက်တန်အသင်းကို တစ်ပတ်အတွင်း ၂ ပွဲဆက်တိုက် အရေးနိမ့်ခဲ့တာ ဖြစ်ပါတယ်။ 

ချယ်လ်ဆီးနဲ့ဘရိုက်တန်ကို တွေ့ရစဉ်

ချယ်လ်ဆီးအသင်းဟာ ဘရိုက်တန်အသင်းကို အရေးနိမ့်ခဲ့တာကြောင့် နောက်ဆုံးကစားခဲ့တဲ့ ပရီးမီးယားလိဂ် ၉ ပွဲမှာ ၂ ပွဲသာ အနိုင်ရတဲ့အထိ ရလဒ် တွေဆိုးရွားနေတာပါ။

ဒါပေမယ့် ချယ်လ်ဆီးအသင်းဟာ ပရီးမီးယားလိဂ် အမှတ်ပေးဇယားအဆင့် ၄ နေရာမှာ ဆက်လက် ရပ်တည်နေ ပြီး မန်စီးတီးနဲ့ နယူးကာဆယ်အသင်းတို့ပွဲစဉ်မှာ တစ်သင်းသင်း အနိုင်ရခဲ့ရင် အဆင့် ၄ နေရာကနေ ဖယ်ပေးရ တော့မှာ ဖြစ်ပါတယ်။ 

ဘရိုက်တန်အသင်းကတော့ အမှတ်ပေးဇယား အဆင့် ၈ နေရာမှာ ရပ်တည်နေတာပါ။ 

ချယ်လ်ဆီးအသင်းဟာ လာမယ့်အပတ်မှာ ပရီးမီးယားလိဂ် ပွဲစဉ်အဖြစ် အက်စတွန်ဗီလာအသင်း အိမ်ကွင်း သွားရောက် ယှဉ်ပြိုင်ရမှာဖြစ်ပါတယ်။ 

Source: ESPN

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ယူနိုက်တက်အသင်းတိုက်စစ်မှူးဟောင်း ရော့စီက သူ့ရဲ့နှုတ်ဆက်ပွဲမှာ ဆာအဲလက်စ်ဖာဂူဆန်ဟာ နည်းပြအဖြစ် ဆောင်ရွက်မယ်လို့ ပြောခဲ့ပါတယ်။ 

ရော့စီက “ကျနော့်ရဲ့ပထမဆုံး ပရော်ဖက်ရှင်နယ်နည်းပြကြီး ဆာအဲလက်စ်ဖာဂူဆန် လာမှာကိုပြောရတာ အလွန် ဂုဏ်ယူမိပါတယ်။ သူက ကျနော့်ရဲ့ပထမဆုံးနည်းပြပါ။ ကျနော်ဟာ သူ့အတွက် ၃ နှစ်အတွင်းမှာ ပွဲအနည်းငယ်ပဲ ကစားခဲ့ရပေမယ့် သူ့ကို ကျနော်ခေါ်ယူခဲ့တဲ့အချိန်မှာ သူ့ဘက်က လာမယ်လို့ ချက်ချင်းပြန်ပြောခဲ့ပါတယ်။ ယူနိုက်တက်အသင်းမှာ သူ့ရဲ့ဆက်ဆံမှုတွေအတွက် ကျနော်အလွန်လေးစားပြီး သူ့ကိုမြင်တွေ့ရမှာ အလွန် ပျော်ရွှင်တယ်”လို့ နှုတ်ဆက်ပွဲကို ကြေညာချိန်မှာ ပြောခဲ့တာပါ။ 

အသက် ၃၈ နှစ်အရွယ်ရှိပြီဖြစ်တဲ့ ရော့စီဟာ ၂၀၂၃ ခုနှစ်မှာ ပရော်ဖက်ရှင်နယ်ကစားသမားဘဝကနေ အနားယူခဲ့တာဖြစ်ပါတယ်။

မတ်လ ၂၂ ရက် ဖီအိုရင်တီးနားအသင်းအိမ်ကွင်းမှာ ကစားမယ့်နှုတ်ဆက်ပွဲအတွက် ရော့စီဟာ ဂန္ထဝင်ကစားသမားတွေဖြစ်တဲ့ ဘာတစ္စတူတာ၊လူကာတိုနီ၊ကာဆာနို၊ဖရေးနဲ့ ဗယ်လာရိုတို့ကိုလည်း ဖိတ်ကြားထားတာပါ။ 

၂၀၁၉ ခုနှစ်က ယူနိုက်တက် 99 ဂန္ထဝင်အသင်းနဲ့ ဘိုင်ယန်မြူးနစ်အသင်းတို့ အိုးထရက်ဖိုဒ့် မှာကစားခဲ့တဲ့ ပွဲစဉ်ကို ကိုင်တွယ်ခဲ့ပြီးနောက် ဒီပွဲဟာ ဖာဂူဆန်အတွက် နည်းပြခုံတန်းကို ပြန်လည်ဝင်ရောက်မယ့် ပထမဆုံးပွဲဖြစ်ပါတယ်။ 

ယူနိုက်တက်အသင်းမှာ ကစားသမားဘဝစတင်ခဲ့တဲ့ ရော့စီဟာ ပွဲပေါင်း ၁၄ ပွဲကစားခဲ့ပြီး ၄ ဂိုးသွင်းယူနိုင်ခဲ့ကာ နယူးကာဆယ်၊ပါးမားအသင်းတွေထံ အငှားနဲ့ ပြောင်းရွှေ့ခဲ့တာပါ။ 

ရော့စီဟာ ယူနိုက်တက်အသင်းကနေ ထွက်ခွာ ပြီးနောက် ဗီလာရီးရယ်လ်၊ဖီအိုရင်တီးနား၊လီဗန်တေး၊ဆယ်လ်တာဗီဂို၊ဂျီနိုအာ၊ရီးရယ်လ်ဆော့လိတ်နဲ့ စပယ်လ် အသင်းတို့မှာ ပြောင်းရွှေ့ကစားခဲ့ပါတယ်။ 

ရောစီဟာ အမေရိကန်မှာ မွေးဖွားခဲ့ပေမယ့် အီတလီလက်ရွေးစင်အသင်းကို ကိုယ်စားပြုခဲ့ပြီး နိုင်ငံအသင်းအတွက် ပွဲပေါင်း ၃၀ ပါဝင်ကစားကာ ၇ ဂိုးသွင်းယူနိုင်ခဲ့တာဖြစ်ပါတယ်။ 

Source:Metro

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ပြင်သစ်အသင်းနည်းပြ ဒက်ချမ့်က မတ်လထဲကစားမယ့် နိုင်ငံတကာပွဲတွေအတွက် နိုင်ငံအသင်းလူစာရင်းမှာ ရီးရယ်လ်အသင်းကြယ်ပွင့် ဘတ်ပီ ပြန်ပါဝင်မယ်လို့ အတည်ပြုခဲ့ပါတယ်။ 

ဘတ်ပီဟာ ပြီးခဲ့တဲ့ ပြင်သစ်အသင်းရဲ့ အောက်တိုဘာနဲ့ နိုင်ငံတကာပွဲစဉ်တွေမှာ မပါဝင်ခဲ့ပေမယ့် အခုအချိန်မှာ နိုင်ငံအသင်း လူစာရင်းထဲ ပြန်ပါဝင်နိုင်ဖို့ အဆင်သင့် ဖြစ်နေပြီဖြစ်တာပါ။

ဘတ်ပီဟာ ပြင်သစ်အသင်း နိုင်ငံတကာပွဲတွေ ယှဉ်ပြိုင်ချိန် ဆွီဒင်မှာ ပါတီပွဲ ကျင်းပနေမှုတွေကြောင့် ဝေဖန်မှု တွေလည်း အများအပြား ခံခဲ့ရပါတယ်။

ပြင်သစ်ဂျာနယ်လစ် မိုလီနာက ဘတ်ပီဟာ နိုင်ငံတကာပွဲတွေ မပါဝင်နိုင်ချိန် ရရှိခဲ့တဲ့ တုန့်ပြန်မှုတွေကြောင့် လက်ရွေးစင်အသင်းကနေ အနားယူဖို့ စဉ်းစားခဲ့တယ်လို့ ဖော်ပြခဲ့တာပါ။ 

ဒါပေမယ့် ဘတ်ပီဟာ ဒီသတင်းတွေကို ငြင်းဆန်ခဲ့ပြီး ပြင်သစ်အသင်းထက် ပိုပြီးအရေးကြီးတာ ဘာမှမရှိဘူးလို့ ပြောခဲ့ပါတယ်။

ဘတ်ပီကို တွေ့ရစဉ်

ဒါအပြင် ဘတ်ပီက သူဟာ နိုဝင်ဘာနိုင်ငံတကာပွဲတွေ ကစားချိန်မှာ ပြင်သစ်အသင်းအတွက် ပါဝင်ကစားပေးဖို့ ဆန္ဒရှိခဲ့ပေမယ့် နည်းပြက သူ့ကိုလူစာရင်းထဲမခေါ်ယူခဲ့ဘူးလို့ ပြောခဲ့တာပါ။ 

အခုအချိန်မှာတော့ နည်းပြဒက်ချမ့်က သူ့ကို ပြင်သစ်အသင်း လူစာရင်းထဲ ပြန်လည်ခေါ်ယူမယ်လို့ L'Equipe ရဲ့မေးမြန်းမှုကို အတည်ပြုခဲ့ပါတယ်။ 

ပြင်သစ်အသင်းအတွက် ၈၆ ပွဲ ကစားထားပြီး ၄၈ ဂိုးသွင်းယူထားတဲ့ ဘတ်ပီဟာ ရီးရယ်လ်အသင်းမှာ ခြေစွမ်းပြသ နေပြီး သူ့ရဲ့အကောင်းဆုံး ပုံစံတွေကို ပြန်လည် ရရှိနေပြီဖြစ်ပါတယ်။ 

ဘတ်ပီဟာ ပြီးခဲ့တဲ့ မန်စီးတီးအသင်းနဲ့ ချန်ပီယံလိဂ် ပလေးအော့ဖ် ပထမအကျော့ပွဲစဉ်မှာ ဂိုးသွင်းယူနိုင်ခဲ့တာ အပါအဝင် ရီးရယ်လ်အသင်းအတွက် ကစားထားတဲ့ ၃၆ ပွဲမှာ ၂၄ ဂိုး သွင်းယူထားတာပါ။ 

ပြင်သစ်အသင်းဟာ မတ်လထဲမှာ နေးရှင်းလိဂ် ကွာတားဖိုင်နယ်ပွဲစဉ်အဖြစ် ခရိုအေးရှားအသင်းနဲ့ အိမ်ကွင်း၊ အဝေးကွင်းယှဉ်ပြိုင်ရမှာ ဖြစ်ပါတယ်။ 

Source: Goal

CNI Sport News

၂၀၂၅ ခုနှစ်၊ ဖေဖော်ဝါရီ ၁၄

ယူနိုက်တက်အသင်းကနေ အငှားနဲ့လာရောက်ကစားနေတဲ့ တောင်ပံကစားသမား အန်တိုနီဟာ ဘက်တစ်အသင်း အတွက် ဥရောပပွဲဦးထွက်ခဲ့တဲ့ ဂျန့်အသင်းနဲ့ ကွန်းဖရန့်လိဂ်ပွဲစဉ်မှာ ဂိုးသွင်းနိုင်ခဲ့ပါတယ်။

ဘက်တစ်အသင်းက ဂျန့်အသင်းကို ၃ ဂိုး-ဂိုးမရှိနဲ့ အနိုင်ရခဲ့တဲ့ ကွန်းဖရန့်လိဂ်ပလေးအော့ဖ် ပထမအကျော့ပွဲစဉ်မှာ အန်တိုနီဟာ အသင်းအတွက် ပွဲချိန် ၄၇ မိနစ်မှာ လှပတဲ့သွင်းဂိုး သွင်းယူနိုင်ခဲ့တာပါ။ 

ဘက်တစ်အသင်းအတွက် နောက်ထပ် သွင်းဂိုးတွေကို ဘာကမ်ဘူနဲ့ အယ်လ်တီမီရာတို့က သွင်းယူခဲ့တာ ဖြစ်ပါတယ်။ 

အန်တိုနီဟာ ပြီးခဲ့တဲ့ ဆယ်လ်တာဗီဂိုအသင်းနဲ့ လာလီဂါ ပွဲစဉ်မှာလည်း ဂိုးသွင်းနိုင်ခဲ့တာကြောင့် ဘက်တစ် အသင်းအတွက် ၂ ပွဲဆက်တိုက် ဂိုးသွင်းယူနိုင်ခဲ့တာပါ။

အန်တိုနီကို တွေ့ရစဉ် 

အန်တိုနီဟာ ယူနိုက်တက်အသင်းကနေ ရောက်ရှိလာပြီးကတည်းက ဘက်တစ်အသင်းအတွက် ၃ ပွဲ ကစားထား ပြီး ၂ ဂိုးသွင်းယူကာ ခြေစွမ်းပြသနေတာ ဖြစ်ပါတယ်။ 

ဘက်တစ်အသင်းဟာ အန်တိုနီကို အငှားစာချုပ် ကုန်ဆုံးမယ့် ရာသီအကုန်မှာ အပြီးသတ် ဝယ်ယူနိုင်ဖို့ မျှော်လင့်နေတာပါ။ 

ဒါပေမယ့် အန်တိုနီရဲ့ အငှားစာချုပ်ထဲမှာ အပြီးသတ် ဝယ်ယူခွင့် မပါဝင်တာကြောင့် ကစားသမားဟာ ရာသီကုန်ချိန်မှာ ယူနိုက်တက်အသင်းထံ ပြန်သွားရမှာဖြစ်ပါတယ်။ 

အန်တိုနီကတော့ သူဟာ ဘက်တစ်အသင်းမှာ အလွန်ပျော်ရွှင်နေပြီး ဂျန့်အသင်းနဲ့နိုင်ပွဲက သူတို့ကို ဘယ်တော့မှ မရပ်တန့်ဘဲ အားပေးနေတဲ့ ပရိသတ်တွေအတွက်လို့ ပြောခဲ့တာပါ။ 

ဘက်တစ်အသင်းဟာ ဂျန့်အသင်းကို အဝေးကွင်းမှာ အနိုင်ရခဲ့တာကြောင့် ၁၆ သင်းအဆင့်ကို တက်ရောက်နိုင်ဖို့ အခြေအနေ ကောင်းသွားခဲ့ပြီဖြစ်ပါတယ်။ 

ဘက်တစ်အသင်းဟာ လာမယ့် လာလီဂါပွဲစဉ်အဖြစ် ဆိုစီဒက်အသင်းကို အိမ်ကွင်းယှဉ်ပြိုင်ရမှာဖြစ်ပြီး လိဂ်မှာ ၂ ပွဲ ဆက်တိုက် နိုင်ပွဲပျောက်ဆုံးတာကို အဆုံးသတ်နိုင်ဖို့ မျှော်လင့်နေတာဖြစ်ပါတယ်။ 

Source: BBC