CNI Sport News

၂၀၂၂ ခုနှစ်၊ သြဂုတ် ၂

ယိုရှီမီ ယာမာရှီတဟာ ဂျပန်နိုင်ငံရဲ့ ပထမဆုံး အမျိုးသမီး ပရော်ဖက်ရှင်နယ် ဘောလုံးဒိုင်လူကြီး ဖြစ်လာခဲ့ပါတယ်။

အသက် ၃၆ နှစ်အရွယ်ရှိ ယာမာရှိတဟာ အခုနှစ် အကုန်ပိုင်းမှာ ကျင်းပမယ့် ကာတာ ကမ္ဘာ့ဖလားပြိုင်ပွဲမှာ ဒိုင်လူကြီးအဖြစ် ဆောင်ရွက်ဖို့ ဖရာပါ့တ်၊ မူကန်ဆန်ဂါတို့နဲ့ မေလက ရွေးချယ် ခံခဲ့ရတာပါ။

အမျိုးသား ကမ္ဘာ့ဖလားပြိုင်ပွဲမှာ ပထမဆုံးအကြိမ် အမျိုးသမီးဒိုင်လူကြီးတွေ တာဝန်ယူ ဆောင်ရွက်မှာ ဖြစ်ပါတယ်။ ယာမာရှိတဟာ အခုအချိန်မှာ ဂျပန်ဘောလုံးအဖွဲ့ချုပ်နဲ့ ပရော်ဖက်ရှင်နယ် စာချုပ်ချုပ်ဆိုထားပါတယ်။ ဂျပန်နိုင်ငံဟာ မကြာသေးခင်က သူတို့ရဲ့ ပထမဆုံး ပရော်ဖက်ရှင်နယ် အမျိုးသမီးဘောလုံးလိဂ်ကို စတင်ဖွင့်လှစ်ခဲ့တာ ဖြစ်ပါတယ်။

ဒီလိုဖွင့်လှစ်ပြီး ၁ နှစ် မကြာသေးခင်မှာ သူမရဲ့ အခန်းကဏ္ဍသစ် ထွက်ပေါ်လာခဲ့တာပါ။ ယာမာရှိတဟာ အမျိုးသား အာရှ ချန်ပီယံလိဂ် ပြိုင်ပွဲကို တာဝန်ယူခဲ့တဲ့ ပထမဆုံး အမျိုးသမီး ဒိုင်လူကြီးအဖြစ်လည်း မှတ်တမ်းဝင်ထားပြီး “အမျိုးသမီးတွေ အပေါ်မှာ အာရုံစိုက်တာ ကောင်းတယ်”လို့ သူမ ထင်မြင်ခဲ့တာ ဖြစ်ပါတယ်။

အမျိုးသမီး ဘောလုံးပွဲတစ်ခုကို ယာမာရှိတ ဒိုင်အဖြစ် ကိုင်တွယ်စဉ်

“အမျိုးသားပွဲတွေမှာ အမျိုးသမီး ဒိုင်လူကြီးလုပ်တာ သိပ်ပြီး ကြီးကြီးမားမားတော့ မဟုတ်ပေမယ့် ဒီအဆင့်မှာ ပွဲတွေက ကြည့်ကောင်းခဲ့လို့ ကျမ ဝမ်းသာရပါတယ်”လို့ ယာမာရှိတက ပြောခဲ့တာပါ။

ယာမာရှိတ၊ ဖရာပါ့တ်နဲ့ မူကန်ဆန်ဂါတို့ဟာ ကာတာကမ္ဘာ့ဖလားပြိုင်ပွဲရဲ့ ဒိုင်လူကြီးအဖြစ် ဆောင်ရွက်မယ့် ဒိုင်လူကြီး ၃၆ ဦး စာရင်းမှာ ပါဝင်ခဲ့တာ ဖြစ်ပါတယ်။ စည်းကြပ်ဒိုင်လူကြီး ၆၉ ဦး စာရင်းမှာလည်း အမျိုးသမီး စည်းကြပ်ဒိုင် ၃ ဦး ပါဝင်ခဲ့ တာ ပါ။ ယာမာရှိတက ကာတာမှာ ကမ္ဘာ့ဖလားလေထုကို ရှူရှိူက်ခွင့်ရဖို့ မျှော်လင့်နေပြီး သူမရဲ့ ဆုံးဖြတ်ချက် ချတာကို အရှိန် မြှင့်တင်နိုင်ဖို့ ကြိုးစားနေတယ်လို့လည်း ပြောခဲ့ပါတယ်။

ယာမာရှိတက “ ဒါက အမြဲတမ်း တိုးတက်နေတဲ့ အရာဖြစ်တဲ့အတွက် ဘယ်ပွဲပဲဖြစ်ဖြစ် ဒိုင်လူကြီးလုပ်မှာပါ။ ဆုံးဖြတ်ချက် ချတဲ့ အရှိန်ကို မြှင့်တင်နိုင်မယ်ဆိုရင် ဆုံးဖြတ်ချက် တစ်ခုချင်းစီကို ရှင်းရှင်းလင်းလင်း ချမှတ်နိုင်ပါတယ်”လို့ ပြောခဲ့ပါတယ်။

ယာမာရှိတဟာ ပြီးခဲ့တဲ့နှစ်က ဂျပန် ပြည်တွင်းလိဂ်ဖြစ်တဲ့ ဂျေလိဂ်မှာလည်း ကိုင်တွယ်ခဲ့တဲ့ ပထမဆုံး အမျိုးသမီး ဒိုင်လူကြီး ဖြစ်ခဲ့တာပါ။ ယာမာရှိတဟာ ကလေးငယ်တွေကို ဒိုင်လူကြီးတစ်ဦးရဲ့ အလုပ်တွေကို ရှင်းပြခဲ့ပြီး ဂျပန်ဘောလုံးအဖွဲ့ချုပ်မှာ သူတို့ရဲ့ မေးခွန်းတွေကို ဖြေကြားခဲ့ပါတယ်။

CNI Sport News

၂၀၂၂ ခုနှစ်၊ ဩဂုတ် ၂

ချယ်လ်ဆီးအသင်းနောက်ခံလူသစ် ကူလီဘာလီက အသင်းမှာ ကျောနံပါတ် ၂၆ ဂျာစီဝတ်ဆင်ဖို့အတွက် ဂန္တဝင် ကစားသမား ဂျွန်တယ်ရီဆီကနေ ခွင့်ပြုချက်တောင်းဆိုလိုက်ပါတယ်။

ကူလီဘာလီက “ဂျွန်ရေ ခင်ဗျားကို တစ်ခုလောက်တောင်းဆိုချင်လို့ပါ။ကျနော် နာပိုလီမှာ ၂၆ ဝတ်ခဲ့တာ ခင်ဗျား လည်းသိမှာပါ။အခု ဒီ ၂၆ ကို ခင်ဗျားထွက်သွားပြီးကတည်းက ဘယ်သူ့မှမဝတ်ဆင်ကြတော့ဘူး။ခင်ဗျား အနားယူ သွားလို့လား ဒါမှမဟုတ် ဘယ်သူမှမယူချင်လို့လားတော့ မသိပါဘူး။ကျနော်ဝတ်မယ်ဆိုရင်ရော ဝတ်လို့ရမလား ဆိုတာ သိချင်လို့ပါ”လို့ ပြောခဲ့တာပါ။

အသက် ၃၁ နှစ်အရွယ်နောက်ခံလူဟာ အခုအပြောင်းအရွှေ့မှာ နာပိုလီကနေ ချယ်လ်ဆီးအသင်းထံ ပေါင် ၃၃ သန်းဝန်းကျင်နဲ့ ပြောင်းရွှေ့လာခဲ့တာဖြစ်ပါတယ်။ဂျွန်တယ်ရီဟာ ချယ်လ်ဆီးကစားသမားဘဝမှာ ပွဲပေါင်း ၇၁၇ ပွဲ ကစားခဲ့ပြီး ဆုဖလား ၁၅ လုံးရယူနိုင်ခဲ့ကာ သူဝတ်ဆင်ခဲ့တဲ့ ကျောနံပါတ် ၂၆ ဟာ အထင်ကရဖြစ်ခဲ့တာပါ။

အင်္ဂလန်အသင်းခေါင်းဆောင်ဟောင်းဟာ ချယ်လ်ဆီးအသင်းကနေ ၂၀၁၇ မှာ ထွက်ခွာသွားခဲ့ပြီး အဲဒီကတည်းက ဒီနံပါတ်ကို ဘယ်သူ့မှ မဝတ်ဆင်တော့တာဖြစ်ပါတယ်။

ကူလီဘာလီရဲ့ တောင်းဆိုမှုနဲ့ပတ်သက်ပြီး ဂျွန်တယ်ရီက “နားထောင်ပါ။ဒီ ၂၆ က ငါ့အတွက်တော့ အလွန် ထူးခြားပါတယ်။ဒီလိုဖုန်းဆက်ပြီးပြောတဲ့အတွက် ကျေးဇူးတင်တယ်။ဒီနံပါတ်ကို မင်းယူလိုက်လို့ င့ါအတွက် ဘာ ပြဿနာမှမရှိပါဘူး။ လုံးဝ ဝမ်းသာပါတယ်။ငါမင်းကို ၂၆ ပေးဝတ်ပါတယ်”လို့ ပြောခဲ့ပါတယ်။

ကူလီဘာလီက ကျေးဇူးတင်ကြောင်းနဲ့ ဒါကို ဝတ်ရမှာ သူ့အတွက်တာဝန်ကြီးတယ်လို့ ပြောခဲ့တာမှာ ဂျွန်တယ်ရီ က “ဖိအားတွေမထားပါနဲ့ ငါတို့အတွက် ဆုဖလားတွေယူပေးမှာမလားလို့ “ ပြန်ပြောခဲ့တာပါ။

ချယ်လ်ဆီးအသင်းဟာ ကူလီဘာလီအတွက် ကျောနံပါတ် ၂၆ ဂျာစီဝတ်ဆင်ဖို့ အတည်မပြုခင်မှာ ဆီနီဂေါ နောက်ခံလူက ဂျွန်တယ်ရီဆီကနေ သေချာစေမယ့် ခွင့်ပြုချက်ကို ရယူခဲ့တာဖြစ်ပါတယ်။

ကူလီဘာလီဟာ မကြာသေးခင်က ချယ်လ်ဆီးအသင်းရဲ့ ခြေစမ်းပွဲတွေမှာ ကျောနံပါတ် ၂၆ ဂျာစီဝတ်ဆင်ပြီး ဝင်ရောက်ကစား သွားခဲ့တာပါ။ချယ်လ်ဆီးအသင်းဟာ အခုနှစ်ရာသီ ပရီးမီးယားလိဂ် အဖွင့်ပွဲအဖြစ် အဲဗာတန်အသင်း အိမ်ကွင်းမှာ သွားရောက်ကစားရမှာဖြစ်ပါတယ်။

Source:Sportbible

CNI Sport News

၂၀၂၂ ခုနှစ်၊ဩဂုတ် ၂

မက်ဆီဟာ သူ့ရဲ့ အချစ်ဆုံးသူငယ်ချင်းဖြစ်တဲ့ ဆွာရတ်ကို ဥရုဂွေးပြန်ဖို့အတွက် သူ့ရဲ့ ပေါင် ၁၂ သန်းတန်ကြေး ရှိတဲ့ လေယာဉ်ကို ငှားရမ်းပေးခဲ့တယ်လို့ သိရပါတယ်။

ဆွာရတ်စ်ဟာ မက်ဆီရဲ့လေယာဉ်နဲ့ ဥရုဂွေးကို ရောက်ပြီးချိန်မှာ နေစီယွန်နယ်လ်အသင်းရဲ့ ကစားသမားသစ် အဖြစ် တရားဝင်မိတ်ဆက်မှုပြုလုပ်ဖို့ အားကစားကွင်းဆီ သွားရောက်ခဲ့တာပါ။မက်ဆီနဲ့ ဆွာရတ်စ်တို့ဟာ ပြီးခဲ့တဲ့ အားလပ်ရက်က အိုင်ဘီဇာကမ်းခြေမှာ အတူတကွရှိခဲ့ကြတာ ဖြစ်ပါတယ်။

မက်ဆီဟာ နေစီယွန်နယ်လ်ကို ပြောင်းရွှေ့ခဲ့တဲ့ သူငယ်ချင်းဖြစ်သူကို ချီးကျူးမှုတွေလည်း ပြုလုပ်ခဲ့တာပါ။ နေစီယွန်နယ်လ်အသင်းဟာ ဆွာရတ်စ် ပြန်လာတာကို ကြိုဆိုတဲ့အနေနဲ့ ၃ နာရီကြာ ပြသခဲ့တဲ့ ရုပ်သံထဲမှာ မက်ဆီရဲ့ ပြောစကားလည်း ပါဝင်ခဲ့တာ ဖြစ်ပါတယ်။

မက်ဆီက “နေစီယွန်နယ်လ်အသင်းမှာ မင်းရဲ့ ကစားသမားဘဝ အောင်မြင်မှုတွေရဖို့ ငါ ဆုတောင်းပေးပါတယ်။ နေစီယွန်နယ်လ်နဲ့အတူ မင်းရဲ့နိုင်ငံမှာရှိပြီး ကမ္ဘာ့ဖလားပြိုင်ပွဲအတွက် ပြင်ဆင်ဖို့က ဘယ်လောက်အရေးကြီးလဲ ဆိုတာ ငါသိပါတယ်။မင်း အကောင်းဆုံးဖြစ်ဖို့ ငါဆုတောင်းပြီး မကြာခင်မှာတွေ့ကြဖို့ မျှော်လင့်ကြောင်း” ပြောခဲ့ တာပါ။

ဆွာရတ်စ်ဟာ ဇနီးဖြစ်သူ ဆိုဖီယာ၊ ကလေး ၃ ဦးနဲ့အတူ ဥရုဂွေးနိုင်ငံကို ရောက်လာခဲ့တာဖြစ်ပြီး နေစီယွန်နယ်လ် ဥက္ကဋ္ဌက လေဆိပ်မှာ တွေ့ဆုံခဲ့တာဖြစ်ပါတယ်။လမ်းတစ်လျှောက်မှာလည်း ဆွာရတ်စ်ဟာ သူရဲကောင်းတစ်ဦးလို ကြိုဆိုမှုတွေ ခံခဲ့ရပြီး ခန့်မှန်းခြေ ပရိသတ် ၅၀,၀၀၀ ဦးရေဟာ ကလပ်ရဲ အားကစားကွင်းမှာ သူ့ကို ကြိုဆိုမှုတွေ ပြုလုပ်ဖို့ စောင့်ဆိုင်းနေခဲ့တာပါ။ဆွာရက်စ်က သူ့ကို ကြိုဆိုမှုတွေပြုလုပ်တဲ့အပေါ်မှာ “မယုံနိုင်စရာနဲ့ မမေ့နိုင် စရာ” အဖြစ် ဖော်ပြခဲ့သလို “အိပ်မက်တစ်ခုအဖြစ် စတင်ခဲ့တာက ဒီနေ့မှာ လက်တွေ့ဖြစ်လာပြီ” လို့ ပြောခဲ့ပါ တယ်။

ဆွာရက်စ်ဟာ ပြီးခဲ့တဲ့ရာသီအကုန်မှာ အသလက်တီကိုအသင်းနဲ့ စာချုပ်ကုန်ဆုံးပြီးနောက် ပရော်ဖက်ရှင်နယ် ကစားသမားဘဝစတင်ခဲ့တဲ့ နေစီယွန်နယ်လ်အသင်းထံ ပြန်လာဖို့ ဆုံးဖြတ်ခဲ့တာပါ။ဆွာရတ်စ်ဟာ ဥရုဂွေးကလပ် ကနေ ထွက်ခွာခဲ့ပြီးနောက် ဂရိုနင်ဂျန်၊ အေဂျတ်စ်၊ လီဗာပူးလ်၊ ဘာစီလိုနာနဲ့ အသလက်တီကိုအသင်းတွေမှာ ကစားခဲ့ပြီး ဆုဖလားနဲ့အောင်မြင်မှု အများအပြားရယူနိုင်ခဲ့တာ ဖြစ်ပါတယ်။

Source:TheSun

CNI Sport News

၂၀၂၂ ခုနှစ်၊ ဩဂုတ် ၁

ပီအက်စ်ဂျီအသင်းဟာ တဲလ်အဗစ်မှာ ကစားခဲ့တဲ့ Trophee des Champions ပွဲမှာ နန့်တက်စ်အသင်းကို ၄ ဂိုး- ဂိုးမရှိနဲ့ အနိုင်ရပြီး ချန်ပီယံဆုကို ရယူနိုင်ခဲ့ပါတယ်။

ပီအက်စ်ဂျီအတွက်ဂိုးတွေကို နေမာက ၂ ဂိုး၊ မက်ဆီနဲ့ ရာမို့စ်တို့က ၁ ဂိုးစီသွင်းယူခဲ့ကြတာပါ။ဒီပွဲမှာ ပီအက်စ်ဂျီ အသင်းဟာ ပွဲပယ်ခံထားရတဲ့ တိုက်စစ်မှူး ဘတ်ပီကလွဲပြီး အဓိက ကစားသမားအစုံအလင်နဲ့ ပွဲထွက်လာခဲ့တာ ကြောင့် နန့်တက်စ်အသင်းကို ဂိုးပြတ်အနိုင်ရရှိခဲ့တာဖြစ်ပါတယ်။ပီအက်စ်ဂျီအသင်းဟာ အခု ၁ ကြိမ်အပါအဝင် နောက်ဆုံး ၁၀ ကြိမ်ကျင်းပခဲ့တဲ့ Trophee des Champions ပွဲမှာ ချန်ပီယံဆုကို ၉ ကြိမ်ရယူနိုင်ခဲ့တာပါ။

နေမာက “ဒီပွဲက ပွဲကောင်းတစ်ပွဲပါ။ဒီဆုဖလားကိုလည်း ကျနော်တို့ အရယူချင်ခဲ့တာပါ။လီယို၊ ကိုင်လီယန်နဲ့ ကျနော်တို့ ပျော်ရွှင်နေမယ်ဆိုရင် ပီအက်စ်ဂျီအသင်းက ကောင်းမွန်စွာ အလုပ်လုပ်နိုင်မှာပါ။ဒီရာသီမှာ ကျနော်တို့ ၃ ဦးစလုံး အတူတကွဆက်ရှိပြီး ဆုဖလားတွေရယူသွားမယ်” လို့ Prime Video ကို ပြောခဲ့တာ ဖြစ်ပါတယ်။ ပိုချက်တီနိုနေရာမှာ အစားထိုးဝင်ရောက်လာခဲ့တဲ့ ဂယ်လ်တီယာအတွက်တော့ ပီအက်စ်ဂျီနည်းပြဘဝ ပထမဆုံး ဆုဖလားကို ရယူနိုင်ခဲ့တာပါ။

ပီအက်စ်ဂျီအတွက် ၁ ဂိုးသွင်းယူပြီး ခြေစွမ်းပြသနိုင်ခဲ့တဲ့ မက်ဆီကို ဒီပွဲရဲ့ အကောင်းဆုံးကစားသမားအဖြစ် သတ်မှတ်ခဲ့ပါတယ်။ပြီးခဲ့တဲ့ရာသီက ပြင်သစ်ကလပ်ကို ရောက်ရှိလာခဲ့တဲ့ မက်ဆီအတွက်တော့ ပီအက်စ်ဂျီ ကစားသမားဘ၀ ဒုတိယမြောက်ဆုဖလား ရရှိခဲ့တာပါ။မက်ဆီဟာ ဒီဆုဖလားကြောင့် ကစားသမားဘဝ ဆုဖလား ၄၁ ခုအထိ ရယူနိုင်ခဲ့ပြီလည်း ဖြစ်ပါတယ်။

ပီအက်စ်ဂျီနည်းပြ ဂယ်လ်တီယာက “ကျနော်တို့ဟာ ကြယ်ပွင့်တွေအကြောင်း ပြောနေပေမယ့် သူတို့က ကစား သမားတွေအားလုံးထက် ဆုဖလားပိုပြီး ဆွတ်ခူးချင်ကြတဲ့သူတွေပါ။သူတို့နဲ့ ကျနော်သွားရမှာပါ။ဒါပေမယ့် ဒီ ကမ္ဘာ့ အဆင့်မီ ကစားသမားတွေနဲ့ဆိုရင်တော့ အရာအားလုံးက ပိုပြီးလွယ်ကူသွားတယ်ဆိုတာ သိသာလာခဲ့ပါတယ်” လို့ ပြောခဲ့တာပါ။

ပြင်သစ်လီဂူးဝမ်းပြိုင်ပွဲရဲ့ လက်ရှိချန်ပီယံ ပီအက်စ်ဂျီအသင်းဟာ ဆုဖလားကာကွယ်ဖို့အတွက် ရာသီအဖွင့်ပွဲစဉ် အဖြစ် သြဂုတ်လ ၆ ရက်မှာ ကလဲမောင့်အသင်းနဲ့ယှဉ်ပြိုင်ရမှာ ဖြစ်ပါတယ်။

Source:Besoccer

CNI Sport News

၂၀၂၂ ခုနှစ်၊ ဇူလိုင် ၁

ဂျာမနီအသင်းကို ဗိုလ်လုပွဲမှာ အနိုင်ရပြီး အမျိုးသမီး ယူရိုပြိုင်ပွဲမှာ ချန်ပီယံဖြစ်ခဲ့တဲ့ အင်္ဂလန်အသင်းကို ဘုရင်မကြီးက ဂုဏ်ပြုကြောင်း ပြောလိုက်ပါတယ်။

ဗြိတိန်ဘုရင်မကြီးက “ ဥရောပပြိုင်ပွဲမှာ ချန်ပီယံဖြစ်ခဲ့တဲ့ အင်္ဂလန် အမျိုးသမီးအသင်းကို နွေးထွေးစွာ ဂုဏ်ပြုချင်ပါတယ်။ ဒါက အသင်း တစ်သင်းလုံးအတွက် အရေးပါတဲ့ အောင်မြင်မှုပါ။ ဒီပြိုင်ပွဲမှာ စွမ်းဆောင်ခဲ့တဲ့ စွမ်းဆောင်ရည်တွေကြောင့် မှန်ကန်တဲ့ ချီးကျူးမှုတွေကို ရရှိခဲ့ပါတယ်။ ဒါဟာ ဒီနေ့ခေတ် မိန်းကလေးတွေ၊ အမျိုးသမီးတွေနဲ့ အနာဂတ် မျိုးဆက်သစ် တွေအတွက် အတုယူရမယ့် စံနမူနာအဖြစ် ရှိခဲ့ပြီ”လို့ ကြေညာချက် ထုတ်ပြန်ပြီးတော့ ပြောခဲ့ပါတယ်။

အင်္ဂလန် အမျိုးသမီးအသင်း အတွက်တောာ့ ယူရိုချန်ပီယံဆုကို ပထမဆုံးအကြိမ် ရယူနိုင်ခဲ့တာဖြစ်သလို ၁၉၆၆ ကမ္ဘာ့ဖလား ပြိုင်ပွဲ ပြီးကတည်းက နိုင်ငံအတွက် ပထမဆုံး အဓိကဆုဖလား အောင်မြင်မှုလည်း ဖြစ်ခဲ့ပါတယ်။

အင်္ဂလန်အသင်းဟာ နည်းပြ ဝီဂ်မန်း ကိုင်တွယ်ခဲ့တဲ့ ပြီးခဲ့တဲ့ ၂၀၂၁ စက်တင်ဘာလ ကတည်းက ပြိုင်ပွဲစုံ ရှုံးပွဲမရှိခဲ့ပဲ အကောင်းဆုံးပုံစံ ရရှိနေခဲ့တာပါ။ အင်္ဂလန်အသင်းဟာ ဝီဂ်မန်း လက်ထက် ပွဲပေါင်း ၂၀ ကစားထားခဲ့တာမှာ ၁၈ ပွဲ အနိုင်ရပြီး ၂ ပွဲသရေကျခဲ့တာ ဖြစ်ပါတယ်။

အင်္ဂလန်အမျိုးသမီးအသင်း

မင်းသားဝီလျံက “ စိတ်လှုပ်ရှားစရာ ကောင်းပြီး မယုံနိုင်စရာ နိုင်ပွဲပါပဲ။ တစ်နိုင်ငံလုံးက အသင်းအတွက် ဂုဏ်ယူလို့ မဆုံးဘူး ဖြစ်နေကြပါတယ်။ ဝင်ဘာလေမှာ သမိုင်းကြောင်း ဖန်တီးခဲ့တာကို မြင်တွေ့ခွင့် ရခဲ့တာက အံသြစရာပါပဲ။ ဂုဏ်ယူပါ တယ်” လို့ ကမ်းဘရစ်ချ်မြို့စားနဲ့ မြိုစားကတော် တွစ်တာအကောင့်မှာ ရေးသားခဲ့တာပါ။

ဗြိတိန်ဝန်ကြီးချုပ် ဘောရစ်ဂျွန်ဆင်ကလည်း နိုင်ငံရဲ့ အောင်ပွဲအတွက် ဂုဏ်ယူကြောင်း သူ့ရဲ့ ဆိုရှယ်မီဒီယာမှာ ရေးသားခဲ့ ပါတယ်။

“ဘောလုံးက အိမ်ကိုပြန်လာပြီ။ ခြင်္သေ့မယ်တွေရဲ့ အံ့မခန်းအောင်ပွဲပါ။ နည်းပြ၊ အသင်းခေါင်းဆောင်နဲ့ တစ်သင်းလုံးကို ဂုဏ်ပြုချင်ပါတယ်။ အမျိုးသမီး ဘောလုံးပွဲတွေ ကျင်းပတဲ့ အခါမှာ နိုင်ငံအနှံ့ ဘောလုံးကွင်းတွေမှာ လူပြည့်တော့မှာလို့” ပြောခဲ့တာပါ။

အင်္ဂလန်အမျိုးသားအသင်းရဲ့ ကစားသမားတွေဖြစ်တဲ့ အသင်းခေါင်းဆောင် ဟာရီကိန်းနဲ့ နောက်ခံလူ မက်ဂွဲယားတို့ကလည်း အမျိုးသမီးအသင်းရဲ့ နိုင်ပွဲအတွက် ဂုဏ်ပြုခဲ့ကြပါတယ်။

အင်္ဂလန် အမျိုးသားအသင်းကလည်း ပြီးခဲ့တဲ့နှစ်က ယူရိုဗိုလ်လုပွဲ တက်ခဲ့ပေမယ့် အီတလီကို ပင်နယ်တီ အဆုံးအဖြတ်မှာ အရေးနိမ့်ပြီး ဒုတိယသာ ရရှိခဲ့တာ ဖြစ်ပါတယ်။

Source: BBC

CNI Sport News

၂၀၂၂ ခုနှစ်၊ ဩဂုတ် ၁

အင်္ဂလန်အသင်းဟာ အမျိုးသမီး ယူရိုပြိုင်ပွဲ ဗိုလ်လုပွဲအဖြစ် ဂျာမနီအသင်းနဲ့ ကစားခဲ့တာ အချိန်ပိုမှာ ၂ ဂိုး- ၁ ဂိုးနဲ့ အနိုင်ရပြီး သမိုင်းတစ်လျှောက် ပထမဆုံးအကြိမ် ချန်ပီယံဆုကို ရယူနိုင်ခဲ့ပြီ ဖြစ်ပါတယ်။

ဝင်ဘာလေကွင်းရဲ့ ပရိသတ် ၈၇,၁၉၂ ရှေ့မှာ ကစားခဲ့တဲ့ ဒီပွဲမှာ ပွဲချိန်အတွင်း ၁ ဂိုးစီ သရေကျခဲ့တာကြောင့် အချိန်ပို ဆက် လက် ယှဉ်ပြိုင်ခဲ့ရတာပါ။

အချိန်ပိုမှာ ကယ်လီက အင်္ဂလန်အတွက် အဖိုးတန် အနိုင်ဂိုး သွင်းယူအပြီးမှာ ဂျာစီကို ချွတ်ကာ ဝှေ့ယမ်းပြီး အောင်ပွဲခံနေခဲ့ ပါတယ်။ အင်္ဂလန်အမျိုးသမီးအသင်းရဲ့ နိုင်ပွဲဟာ ၁၉၆၆ ကမ္ဘာ့ဖလား ရပြီးကတည်းက အဓိကပြိုင်ပွဲတွေမှာ ဆုဖလား မရ တော့တဲ့ အင်္ဂလန်နိုင်ငံအတွက် အခုချန်ပီယံဆုက ပထမဆုံး ဆုဖလား ကိုင်မြှောက်နိုင်ခဲ့ခြင်း ဖြစ်ပါတယ်။

ပရိသတ်တွေကလည်း အင်္ဂလန်ရဲ့ အောင်ပွဲအတွက် လမ်းမတွေပေါ်မှာ ပျော်ရွှင်စွာ အောင်ပွဲခံခဲ့ကြပါတယ်။

ပွဲအပြီး ပြုလုပ်တဲ့ အင်္ဂလန်နည်းပြ ဝီဂ်မန်းရဲ့ သတင်းစာရှင်းလင်းပွဲမှာ It’s coming home. Football is coming home ဆိုတဲ့ စာသားကို သီဆိုကာ တစ်သင်းလုံး ဝင်ရောက်အောင်ပွဲခံခဲ့ကြပါတယ်။

အင်္ဂလန်အမျိုးသမီး အသင်း ဂိုးသွင်းအောင်ပွဲခံနေစဉ်

နည်းပြ ဝီဂ်မန်းဟာ ပြီးခဲ့တဲ့ ယူရို ၂၀၁၇ ပြိုင်ပွဲမှာ နယ်သာလန်အသင်းကို ချန်ပီယံဖြစ်အောင် ကိုင်တွယ်နိုင်ခဲ့ပြီး အခု အင်္ဂလန် အသင်းကို ချန်ပီယံဖြစ်အောင် စွမ်းဆောင်နိုင်ခဲ့တာ ဖြစ်ပါတယ်။

အင်္ဂလန်ချန်ပီယံဖြစ်စေမယ့် အနိုင်ဂိုးရှင် ကယ်လီက “ တစ်ဦးချင်းစီတိုင်းကို ကျေးဇူးတင်ပါတယ်။ ရိုးရိုးသားသား ပြောရရင် လုံးဝအံ့သြဖို့ ကောင်းပါတယ်။ ဒါတွေက အိမ်မက်ကနေ ဖြစ်လာခဲ့တဲ့ အရာတွေပါ။ ဒီမှာရှိနေပြီး အနိုင်ဂိုး သွင်းဖို့ဆိုတာ မယုံ နိုင်စရာပါပဲ။ ဒီမိန်းကလေးတွေနဲ့ နည်းပြက အလွန်ထူးခြားပါတယ်။ ဒါက အံ့သြစရာပါပဲ”လို့ ပြောခဲ့ပါတယ်။

အင်္ဂလန်အသင်းဟာ ဒီပြိုင်ပွဲမှာ ကစားခဲ့တဲ့ ၆ ပွဲစလုံး အနိုင်ရခဲ့ပြီး ၂၂ ဂိုးသွင်းယူကာ ၂ ဂိုးသာ ခွင့်ပြုခဲ့ရတာပါ။

နည်းပြ ဝီဂ်မန်းက “လျှို့ဝှက်ချက်တစ်ခုမှ မရှိပါဘူး။ အခု ယူရိုပြိုင်ပွဲမှာ အောင်ပွဲခံပြီး ဖြစ်တဲ့အတွက် နောက်ထပ် မျှော်လင့် ချက်တွေက ထပ်ပြီး တက်လာဦးမှာပါ။ အခု ပါတီပွဲ လုပ်ရပါမယ်။ အရှေ့မှာ သွားခဲ့တဲ့သူတွေက ဒီအသင်းအတွက် လမ်း ကြောင်း ဖန်တီးပေးခဲ့ပါတယ်။ ဒီအသင်းကလည်း နောက်လာမယ့် မျိုးဆက်တွေအတွက် လမ်းကြောင်းတစ်ခု ဖန်တီး ပေးမှာ ပါ”လို့ ပြောခဲ့ပါတယ်။

အင်္ဂလန်အတွက် ၆ ဂိုး သွင်းယူခဲ့ပြီး ဂိုးသွင်း အများဆုံး ကစားသမားဖြစ်ခဲ့တဲ့ မိဒ်ဟာ ၂၀၂၂ အမျိုးသမီးယူရိုပြိုင်ပွဲရဲ့ အကောင်းဆုံး ကစားသမားအဖြစ် သတ်မှတ်ခြင်း ခံခဲ့ရပါတယ်။

Source: BBC

CNI Sport News

၂၀၂၂ ခုနှစ်၊ ဇူလိုင် ၃၀

ယူနိုက်တက်အသင်းရဲ့ ဂန္တဝင်နည်းပြကြီး ဆာအဲလက်စ်ဖာဂူဆန်ဟာ ဘုတ်အဖွဲ့ဝင်အဖြစ် အသင်းထံ ပြန်လည် ရောက်ရှိလာခဲ့ပြီ ဖြစ်ပါတယ်။

ယူနိုက်တက်အသင်းဟာ အသက် ၈၀ အရွယ်ရှိ ဖာဂူဆန်ကို အသင်းမှာ တရားဝင်ရာထူးပေးအပ်ခဲ့တာပါ။ ယူနိုက်တက်အမှုဆောင်ချုပ် ရစ်ချတ်အာနိုးလ်က အသင်းမှာကြုံတွေ့နေရတဲ့ ပြဿနာတွေနဲ့ ပတ်သက်ပြီး အကြံပေးနိုင်ဖို့ ဖာဂူဆန်ပါဝင်တဲ့ အကြံပေးပညာရှင်အဖွဲ့ကို တည်ထောင်ခဲ့တာဖြစ်ပါတယ်။ဒီအဖွဲ့မှာ အသင်း ခေါင်းဆောင်ဟောင်း ရော့ဘ်ဆင်၊ စီအီးအိုဟောင်း ဒေးဗစ်ဂီးလ်နဲ့ ဘောလုံးဒါရိုက်တာ ဂျွန်မာတော့ချ်တို့ ပါဝင် တယ်လို့ ဒေးလီးမေးလ်က ဖော်ပြခဲ့တာပါ။ဖာဂူဆန်ဟာ အင်္ဂါနေ့က ယူနိုက်တက်အကြီးအကဲတွေနဲ့ တွေ့ဆုံခဲ့ပြီး အဆိုပါနေ့မှာပဲ ရော်နယ်ဒိုက ပြီးခဲ့တဲ့ရာသီပြီးကတည်းက ပထမဆုံးအကြိမ်အဖြစ် ကာရင်တန်ကို ပြန်ရောက် လာခဲ့ပါတယ်။

အဆိုပါအဖွဲ့ဝင် ၅ ဦးဟာ ကလပ်အသင်းမှာ ကြုံတွေ့နေရတဲ့ ပြဿနာတွေကို ဖြေရှင်းနိုင်ဖို့အတွက် ပုံမှန်တွေ့ဆုံ နိုင်ဖို့ မျှော်လင့်နေကြတာပါ။ရစ်ချတ်အာနိုးလ်က ဖာဂူဆန်ကို ကလပ်အသင်း ကိစ္စရပ်တွေမှာ ပိုမိုပါဝင်စေချင် နေတာဖြစ်ပါတယ်။ဒေးဗစ်ဂီးလ်ဟာ အရင်က ယူနိုက်တက်အမှုဆောင်ချုပ်အဖြစ် ဆယ်စုနှစ်တစ်ခုကြာ တာဝန် ထမ်းဆောင်ခဲ့ပြီး ရော့ဘ်ဆင်ကတော့ ကလပ်အသင်းရဲ့ ထင်ရှားကျော်ကြားတဲ့ ကစားသမားတွေထဲကတစ်ဦးပါ။

သူတို့တွေဆွေးနွေးခဲ့တဲ့ အချက်တွေထဲက တစ်ခုကတော့ ကာရင်တန်နဲ့ အိုးထရက်ဖိုဒ့်ကို ပြန်လည်တည်ဆောက် ဖို့က အကောင်းဆုံးနည်းလမ်းလို့ ပြောခဲ့ကြပါတယ်။ဘောလုံးရေးရာ ကိစ္စရပ်တွေကိုလည်း ဆွေးနွေးမှာဖြစ်ပြီး ဘောလုံးဒါရိုက်တာ ဂျွန်မာတော့ချ်အနေနဲ့ ဝင်ရောက်စွက်ဖက်ခြင်းမပြုဖို့ အဖွဲ့က ကြိုးစားသွားမယ်လို့ သိရတာပါ။ဖာဂူဆန်ဟာ ၂၀၁၃ က နည်းပြရာထူးကနေ အနားယူပြီးကတည်းက ယူနိုက်တက်အသင်းမှာ သြဇာ အရှိဆုံးသူလည်း ဖြစ်ပါတယ်။သူဟာ အနားယူပြီးကတည်းက ဘုတ်အဖွဲ့မှာ အမှုဆောင်မဟုတ်တဲ့ ဒါရိုက်တာ တစ်ဦးအဖြစ်ရှိနေခဲ့ပြီး ဒါက ကြီးမားတဲ့ သင်္ကေတတစ်ခုပါ။

အခုအချိန်မှာတော့ ဖာဂူဆန်ဟာ ယူနိုက်တက်မှာ လုပ်ဆောင်နေတဲ့ အရာတွေနဲ့ ပတ်သက်ပြီး အမှန်အတိုင်း ပြောလာတော့မှာ ဖြစ်ပါတယ်။ရော်နယ်ဒိုဟာ ကာရင်တန်ကို ရောက်ရှိလာချိန်မှာ ဆရာဟောင်းဖြစ်သူ ဖာဂူဆန်နဲ့ စကားပြောဆိုဖို့ ခေတ္တရပ်ခဲ့တယ်လို့ သတင်းမှာ ဖော်ပြထားတာပါ။ပြီးခဲ့တဲ့နှစ်က ရော်နယ်ဒိုဟာ ယူနိုက်တက် အသင်းထံ ပြန်လာတာမှာလည်း ဖာဂူဆန်ရဲ့အခန်းကဏ္ဍက အဓိကကျခဲ့တာဖြစ်ပါတယ်။အဲဒါကြောင့် ဖာဂူဆန် အနေနဲ့ အခုတစ်ကြိမ်မှာရော ရော်နယ်ဒိုအသင်းမှာ ဆက်ရှိဖို့ လုပ်ဆောင်နိုင်မလားဆိုတာ စောင့်ကြည့်ရမှာလည်း ဖြစ်ပါတယ်။

Source:The Sun

CNI Sport News

၂၀၂၂ ခုနှစ်၊ ဇူလိုင် ၃၀

ယူကရိန်းဒိုင်လူကြီး မန်ဇဲလ်အား ဇူလိုင်လ ၃၁ ရက်မှာ ယှဉ်ပြိုင်မယ့် အင်္ဂလန်နဲ့ ဂျာမနီတို့ရဲ့ အမျိုးသမီးယူရိုပြိုင်ပွဲ ဗိုလ်လုပွဲကို တာဝန်ယူကိုင်တွယ်ဖို့ ခန့်အပ်ကြောင်း ယူအီးအက်ဖ်အေက သောကြာနေ့က ပြောလိုက်ပါတယ်။

အသက် ၄၁ နှစ်အရွယ်ရှိ မန်ဇဲလ်ဟာ ၂၀၀၄ ခုနှစ်ကတည်းက နိုင်ငံတကာဒိုင်လူကြီးဖြစ်ခဲ့ပြီး အမျိုးသမီး ကမ္ဘာ့ ဖလားပြိုင်ပွဲ ၃ ကြိမ် တာဝန်ထမ်းဆောင်ခဲ့တာပါ။သူမဟာ ၂၀၁၅ က အမေရိကန်နဲ့ ဂျပန်တို့ ကစားခဲ့တဲ့ အမျိုး သမီး ကမ္ဘာ့ဖလားပြိုင်ပွဲဗိုလ်လုပွဲမှာလည်း ဒိုင်လူကြီးအဖြစ် ဆောင်ရွက်ခဲ့ပါတယ်။မန်ဇဲလ်ဟာ ယူကရိန်း အမျိုးသားထိပ်တန်းလိဂ်ပြိုင်ပွဲမှာ တာဝန်ထမ်းဆောင်တဲ့ ပထမဆုံးအမျိုးသမီးဒိုင်လူကြီးအဖြစ်လည်း ၂၀၁၆ က မှတ်တမ်းတင်နိုင်ခဲ့တာပါ။

အမျိုးသမီးယူရိုပြိုင်ပွဲဗိုလ်လုပွဲရဲ့ စည်းကြပ်ဒိုင်လူကြီးတွေအဖြစ် ယူကရိန်းနိုင်ငံက မာရီနာနဲ့ ပိုလန်နိုင်ငံက ပေါ်လီနာတို့က ဆောင်ရွက်ကြမှာဖြစ်ပြီး စတုတ္တဒိုင်လူကြီးအဖြစ် ပြင်သစ်နိုင်ငံက ဖရာပါ့တ်က တာဝန်ယူ သွားမယ်လို့ ယူအီးအက်ဖ်အေက ပြောခဲ့ပါတယ်။မန်ဇဲလ်ဟာ ၂၀၂၁ အောက်တိုဘာလက အန်ဒိုရာအသင်းကို ၅ ဂိုး- ဂိုးမရှိနဲ့ အင်္ဂလန်အသင်းအနိုင်ရခဲ့တဲ့ ကမ္ဘာ့ဖလားခြေစစ်ပွဲကိုလည်း ဒိုင်လူကြီးအဖြစ် တာဝန်ယူခဲ့ပါသေးတယ်။

အဲဒါကြောင့် သူမဟာ အင်္ဂလန်အမျိုးသားပြိုင်ပွဲကို ကိုင်တွယ်ခဲ့တဲ့ ပထမဆုံးအမျိုးသမီးဒိုင်လူကြီးလည်း ဖြစ်ခဲ့ပါ တယ်။မန်ဇဲလ်ဟာ အမျိုးသားပြိုင်ပွဲတွေရဲ့ ယူရိုပါလိဂ်၊ ယူရိုပါကွန်းဖရန့်စ်လိဂ်နဲ့ နေးရှင်းလိဂ်တို့ကိုလည်း တာဝန်ယူကိုင်တွယ်ခဲ့တယ်လို့ သိရတာပါ။မန်ဇဲလ်ဟာ ၂၀၂၂ အမျိုးသမီးယူရိုပြိုင်ပွဲမှာလည်း ပွဲစဉ် ၃ ပွဲကို တာဝန်ယူကိုင်တွယ်ထားပါတယ်။ဒီပွဲတွေကတော့ စပိန်နဲ့ ဖင်လန်ပွဲစဉ်၊ သြစတြီးယားနဲ့ နော်ဝေပွဲစဉ်၊ဆွီဒင်နဲ့ ဘယ်လ်ဂျီယံတို့ ပွဲစဉ်တွေပါ။

အင်္ဂလန်နဲ့ ဂျာမနီတို့ဟာ ပြီးခဲ့တဲ့ ၂၀၀၉ က ယူရိုအမျိုးသမီးပြိုင်ပွဲဗိုလ်လုပွဲမှာ တွေ့ဆုံခဲ့ဖူးပြီး အဲဒီတုန်းက ဂျာမနီ အသင်းက ၆ ဂိုး- ၂ ဂိုးနဲ့ ဂိုးပြတ်အနိုင်ရကာ ချန်ပီယံဖြစ်ခဲ့ပါတယ်။ဂျာမနီအသင်းဟာ ယူရို အမျိုးသမီးပြိုင်ပွဲမှာ ချန်ပီယံဆု ၈ ကြိမ်ရယူနိုင်ခဲ့ပြီး ပြိုင်ပွဲရဲ့ အအောင်မြင်ဆုံးအသင်းအဖြစ် ရပ်တည်နေကာ အင်္ဂလန်အသင်းကတော့ အမြင့်ဆုံး ဒုတိယနေရာသာ ရရှိထားတာဖြစ်ပါတယ်။

Source:Reuters

CNI Sport News

၂၀၂၂ ခုနှစ်၊ ဇူလိုင် ၃၀

ဘန်လေအသင်းဟာ အခုနှစ်ရာသီ အင်္ဂလန်ချန်ပီယံရှစ်ပြိုင်ပွဲ ပွဲစဉ် ၁ အဖွင့်ပွဲစဉ်အဖြစ် ဟတ်ဒါဖီးစ်အသင်းနဲ့ ကစားခဲ့တာ ၁ ဂိုး- ဂိုးမရှိနဲ့ အနိုင်ရရှိသွားခဲ့ပါတယ်။

ပြီးခဲ့တဲ့ရာသီက ပရီးမီးယားလိဂ်ကနေ တန်းဆင်းပြီး ချန်ပီယံရှစ်ကို ရောက်ရှိလာခဲ့တဲ့ ဘန်လေအသင်းအတွက် တစ်လုံး တည်းသော အနိုင်ဂိုးကို မာတ့်ဆန်က သွင်းယူခဲ့တာပါ။

မန်စီးတီး နောက်ခံလူဟောင်း ကွန်ပနီ ကိုင်တွယ်နေတဲ့ ဘန်လေအသင်းဟာ ဒီပွဲမှာ ဟတ်ဒါဖီးစ်အသင်းကို တစ်ပွဲလုံးနီးပါး ဖိကစားသွားခဲ့ပြီး ပြိုင်ဘက် ဂိုးသမားနဲ့ နောက်ခံလူတွေ ကောင်းမွန်နေလို့ ဂိုးမပြတ်ခဲ့တာ ဖြစ်ပါတယ်။ ပြီးခဲ့တဲ့ရာသီက ချန်ပီယံရှစ် ပလေးအော့ဖ် ဗိုလ်လုပွဲအထိ တက်နိုင်ခဲ့တဲ့ ဟတ်ဒါဖီးစ်အသင်းဟာ နည်းပြသစ်လက်အောက်မှာ ရုန်းကန် နေရပါတယ်။

ဒီပွဲမှာ ဘန်လေအသင်းဟာ ဘောလုံးပိုင်ဆိုင်မှု ၇၀ ရာခိုင်နှုန်း၊ ဂိုးပေါက်ကန်သွင်းမှု ၁၆ ကြိမ်နဲ့ ဂိုးပေါက်တည့်မှု ၇ ကြိမ်အထိ ရှိခဲ့ပြီး ဟတ်ဒါဖီးစ်အသင်းကတော့ ဘောလုံးပိုင်ဆိုင်မှု ၃၀ ရာခိုင်နှုန်း၊ ဂိုးပေါက်ကန်သွင်းမှု ၂ ကြိမ်နဲ့ ဂိုးပေါက်တည့်မှု မရှိခဲ့ပါဘူး။

ဘန်လေနဲ့ဟတ်ဒါဖီးစ်တို့ ယှဉ်ပြိုင်နေစဉ်

ဘန်လေအသင်းနည်းပြ ကွန်ပနီက “ကစားကွက် နည်းစနစ်တွေ အကြောင်း အများကြီး ကြားခဲ့ရပါတယ်။ ဒါပေမယ့် ကျနော် လိုချင်တာက ဘန်လေဖြစ်ပြီး၊ ဘန်လေက အလုပ်ကြိုးစားရပါမယ်။ ရဲရဲရင့်ရင့် ကစားနိုင်တဲ့ ကစားသမားတွေကို ကျနော် တွေ့ခဲ့ပါတယ်။ ဒီမှာ အခြေခံ ကောင်းတွေလည်း ရှိပါတယ်။ ဒါကို တစ်ချိန်ချိန်မှာ ပုံမှန်ထုတ်လုပ်နိုင်မှာပါ။ ဒီနေ့မှာတော့ ကောင်လေးတွေအတွက် ဂုဏ်ယူစရာဖြစ်ခဲ့ပြီး မနက်ဖြန် ထပ်သွားကြတာပေါ့လို့” ပွဲအပြီးမှာ ပြောခဲ့တာပါ။

ဟတ်ဒါဖီးစ် အသင်းနည်းပြ ဒန်နီက “ဘန်လေအသင်းရဲ့ ကွင်းလယ်ပိုင်း စိုးမိုးထားတာကို မဖြေရှင်းနိုင်ခဲ့ပါဘူး။ ဒုတိယပိုင်းမှာ အပြောင်းအလဲတွေ လုပ်ခဲ့လို့ ပြိုင်ဆိုင်မှု ပိုမိုကောင်းမွန်လာတယ်လို့ ထင်ပါတယ်။ ဘောလုံး ပေးပို့မှုတွေကလည်း မကောင်း မွန်ခဲ့ပါဘူး။ ဒါက ရာသီရဲ့ ပထမဆုံးပွဲပါ။ ဘန်လေနဲ့ ပွဲက ခက်ခဲတဲ့စမ်းသပ်မှုတွေ ဖြစ်ခဲ့တာကြောင့် ဒီကနေ သင်ယူစရာတွေ သင်ယူပြီး တိုးတက်အောင်လုပ်ကာ လာမယ့်ပွဲအတွက် အဆင်သင့် ဖြစ်နေရမယ်”လို့ ပြောခဲ့ပါတယ်။

ဘန်လေအသင်းဟာ ချန်ပီယံရှစ်ပြိုင်ပွဲ ပွဲစဉ် ၂ အဖြစ် လူတန်တောင်း အသင်းနဲ့ ယှဉ်ပြိုင်ရမှာဖြစ်ပြီး ဟတ်ဒါဖီးစ် အသင်း ကတော့ ဘာမင်ဂမ်အသင်းနဲ့ ယှဉ်ပြိုင်ရမှာဖြစ်ကာ ဒီပွဲတွေကို သြဂုတ်လ ၆ ရက်မှာ ကျင်းပသွားမှာ ဖြစ်ပါတယ်။

Source: Daily Mail