CNI Sport News

၂၀၂၂ ခုနှစ်၊ ဩဂုတ် ၁၉

ယူနိုက်တက်အသင်းဟာ ရီးရယ်လ်မက်ဒရစ်အသင်းရဲ့ အဓိက ကွင်းလယ်လူ ကတ်စမဲရိုးကို ၄ နှစ်စာချုပ်နဲ့ ခေါ်ယူဖို့ သဘောတူညီမှုရရှိသွားပြီး သောကြာနေ့မှာ ဆေးစစ်မှုခံယူမယ်လို့ သိရပါတယ်။

ယူနိုက်တက်အသင်းဟာ ကတ်စမဲရိုးအတွက် ရီးရယ်လ်အသင်းကို ပေါင်သန်း ၆၀ ပေးချေရမှာဖြစ်ပြီး စာချုပ် သက်တမ်းကုန်ဆုံးရင် နောက်ထပ်တစ်နှစ်သက်တမ်းတိုးဖို့ ရွေးချယ်ခွင့်ရှိနေတာပါ။စပိန်သတင်းစာ မာကာက ကတ်စမဲရိုးဟာ ရီးရယ်လ်အသင်းရဲ့ ခွင့်ပြုချက်နဲ့ သောကြာနေ့မှာ ဆေးစစ်မှုခံယူဖို့ မန်ချက်စတာကို သွားရောက် မယ်လို့ ဖော်ပြခဲ့ပြီး အပြောင်းအရွှေ့ဟာ လျင်မြန်စွာဖြစ်ပျက်နေတာပါ။

ရီးရယ်လ်အသင်းဥက္ကဌ ပီရတ်ဇ်ကလည်း ကတ်စမဲရိုးကို စိတ်ကြိုက်ဆုံးဖြတ်ခွင့်ပေးပြီးနောက် ကစားသမားဟာ နည်းပြ အန်ဆယ်လော့တီနဲ့ တွေ့ဆုံကာ ယူနိုက်တက်ကို ပြောင်းချင်တဲ့ ဆုံးဖြတ်ချက်ကို ပြောခဲ့တာပါ။အသက် ၃၀ အရွယ်ရှိ ကစားသမားဟာ ယူနိုက်တက်အသင်းမှာ ရီးရယ်လ်အသင်းမှာရတဲ့ လုပ်ခလစာထက် ၂ ဆဖြစ်တဲ့ တစ်ပတ်လုပ်ခ ပေါင် ၃၅၀,၀၀၀(သုံးသိန်းခွဲ) ရရှိမှာပါ။အဲဒါကြောင့် ဘရာဇီးလ်ကစားသမားဟာ မန်ချက်စတာ ကလပ်မှာ လုပ်ခလစာအများဆုံးရတဲ့သူတစ်ဦးဖြစ်လာမှာပါ။

သူ့ရဲ့အထက်မှာ အများဆုံးရတဲ့သူတွေအဖြစ် ရော်နယ်ဒိုက ပေါင် ၄၈၀,၀၀၀(လေးသိန်းရှစ်သောင်း) နဲ့ ဒီဂီယာက ပေါင် ၃၇၅,၀၀၀(သုံးသိန်းခုနှစ်သောင်းခွဲ) ဖြစ်တယ်လို့ သိရပါတယ်။ယူနိုက်တက်အသင်းဟာ ပြီးခဲ့တဲ့ ပရီးမီးယား လိဂ်အဖွင့်ပွဲစဉ် ၂ ပွဲဆက်တိုက် ရှုံးပွဲကြုံတွေ့ခဲ့ပြီးနောက် နည်းပြ တန်ဟတ်က လိုအပ်နေတဲ့နေရာတွေမှာ ကစား သမားအင်အားဖြည့်တင်းပေးဖို့ အသင်းထံ ပြောခဲ့တာပါ။

အဲဒါကြောင့်လည်း အပြောင်းအရွှေ့ မပိတ်ခင် ၂ ပတ်အလိုမှာ ကစားသမားသစ်ရရှိဖို့ ကြိုးပမ်းနေတာဖြစ်ပါတယ်။ ယူနိုက်တက်အသင်းဟာ ကတ်စမဲရိုးကို အမြန်ဆုံးစာချုပ်ချုပ်ပြီး လီဗာပူးလ်နဲ့ ပွဲစဉ်အတွက် အသင်းလူစာရင်းမှာ ပါဝင်နိုင်ဖို့အထိ ရည်ရွယ်ထားတာပါ။ကတ်စမဲရိုးဟာ ရီးရယ်လ်အသင်းမှာ ကစားတဲ့ ၉ ရာသီအတွင်းမှာ ချန်ပီယံ လိဂ် ၅ ကြိမ်အပါအဝင် ဆုဖလား ၁၈ ခုအထိ ရယူနိုင်ခဲ့ပြီး မိုဒရစ်၊ တိုနီကရူးစ်နဲ့အတူ ကွင်းလယ်အသက်သွေး ကြောဖြစ်ခဲ့ပါတယ်။

ယူနိုက်တက်အသင်းဟာ လက်ရှိအချိန်မှာ တိုက်စစ်မှူး၊ ညာနောက်ခံလူနဲ့ အရန်ဂိုးသမားတစ်ဦးကို ခေါ်ယူဖို့ ဈေးကွက်မှာ ဆက်လက်ရှာဖွေမှုတွေ ပြုလုပ်နေတာပါ။အဲဗာတန်ဂိုးသမား ဘီဂိုဗစ်ကို ဒီဂီယာရဲ့ အရန်ဂိုးသမား အဖြစ်ထားရှိဖို့ စိတ်ဝင်စားနေတယ်လို့ သိရပါတယ်။

Source:DailyMail

CNI Sport News

၂၀၂၂ ခုနှစ်၊ သြဂုတ် ၁၈

ပြီးခဲ့တဲ့ အပတ်က စတမ်းဖို့ဒ်ဘရစ်ချ်မှာ ကစားခဲ့တဲ့ စပါးအသင်းနဲ့ ပရီးမီးယားလိဂ်ပွဲစဉ်မှာ ဆွန်ဟောင်မင်ကို ရည်ရွယ်တဲ့ လူမျိုးရေး ခွဲခြားမှုနဲ့ ပတ်သက်ပြီး ချယ်လ်ဆီးအသင်းက စုံစမ်းစစ်ဆေးမှုတွေ ပြုလုပ်နေပြီ ဖြစ်ပါ တယ်။

ဆွန်ဟောင်မင်ဟာ ဒုတိယပိုင်း ထောင့်ကန်ဘော ကန်သွင်းမှု ပြုလုပ်ခဲ့ချိန်မှာ ဒီဖြစ်ရပ်ဟာ မေးခွန်းထုတ်စရာ ဖြစ်သွားခဲ့ပါတယ်။

The Athletic က ဆွန်ဟောင်မင်ကို လူမျိုးရေးခွဲခြားနေတဲ့ အမူအရာပြ ရုပ်သံဖိုင် ထွက်ပေါ်လာခဲ့တယ်လို့ ဖော်ပြခဲ့ ပါတယ်။ ဆွန်ဟောင်မင်ဟာ အရင်ကလည်း အင်္ဂလန်မှာ လူမျိုးရေး ခွဲခြားမှုတွေ ခံခဲ့ရပါသေးတယ်။

ယူနိုက်တက်အသင်းက စပါးအသင်းကို ၃ ဂိုး- ၁ ဂိုးနဲ့ အနိုင်ရတဲ့ ပွဲစဉ်အပြီးမှာ ဆွန်ဟောင်မင်ကို အွန်လိုင်းပေါ်မှာ လူမျိုးရေး ခွဲခြားမှု ပြုလုပ်ခဲ့တာကြောင့် ၂၀၂၁ ခုနှစ်၊ ဧပြီလမှာ ယူနိုက်တက်ရဲ့ တစ်ရာသီစာ လက်မှတ် ကိုင် ဆောင် ထားတဲ့သူ ၃ ဦးကို ပိတ်ပင်ခဲ့တာ ဖြစ်ပါတယ်။

ဒီမတိုင်ခင် ၂ နှစ်လောက်ကလည်း ဝက်စ်ဟမ်း ပရိသတ်တစ်ဦးဟာ ကာရာဘောင်း ဖလားပွဲစဉ်မှာ ဆွန်ဟောင်မင် ကို လူမျိုးရေး ခွဲခြားမှုပြုလုပ်ခဲ့လို့ ဒဏ်ရိုက်ခံခဲ့ရတာပါ။

ဆွန်ဟောင်မင် ဒေါင့်ကန်ဘော ကန်ဖို့အသွား လူမျိုးရေးခွဲခြားခံရ

ချယ်လ်ဆီးနဲ့ စပါးအသင်းတို့ရဲ့ ပွဲစဉ်ကတော့ ၂ ဂိုးစီ သရေရလဒ်နဲ့ အဆုံးသတ်ခဲ့တာ ဖြစ်ပါတယ်။ ဒီပွဲမှာ နည်းပြ တွေဖြစ်တဲ့ တူချယ်လ်နဲ့ ကွန်တီတို့ဟာ ပွဲချိန်အတွင်းမှာ အချင်းများခဲ့ကြသလို ပွဲအပြီး လက်ဆွဲ နှုတ်ဆက်တာ မှာလည်း ပြဿနာတက်ခဲ့ကြလို့ ကွင်းလယ်ဒိုင်လူကြီးက အနီကတ်ပြ ထုတ်ပယ်ခြင်း ခံခဲ့ရတာပါ။

ဆွန်ဟောင်မင်ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ ဂိုးသွင်း အများဆုံး ရွှေဖိနပ်ဆုရ ပထမဆုံး အာရှ ကစား သမား အဖြစ်လည်း မှတ်တမ်းဝင် ထားပါတယ်။ သူဟာ ပြီးခဲ့တဲ့ ရာသီက ပြသခဲ့တဲ့ ခြေစွမ်းကြောင့် ၂၀၂၂ ဘောလွန်းဒီအောဆုရဲ့ ဆန်ကာတင် စာရင်းမှာ ပါဝင်ထားပါတယ်။

တောင်ကိုရီးယား ကစားသမားဟာ ဒီရာသီမှာလည်း ပုံစံကောင်းတွေကို ဆက်ထိန်းထားပြီး ခြေစွမ်းပြသနေတာ ဖြစ်ပါတယ်။

ပရီးမီးယားလိဂ်ပွဲစဉ် ၂ ပွဲ ကစားအပြီးမှာ ၁ ပွဲနိုင် ၁ ပွဲ သရေရလဒ် ရရှိထားတဲ့ စပါးအသင်းဟာ ဒီတစ်ပတ်မှာတော့ ဝုလ်ဗ်စ်အသင်းကို အိမ်ကွင်းမှာ လက်ခံယှဉ်ပြိုင်ရမှာ ဖြစ်ပါတယ်။

Source: The Sun

CNI Sport News

၂၀၂၂ ခုနှစ်၊ သြဂုတ် ၁၈

ဂျပန်နိုင်ငံရဲ့ အစိုးရရှေ့နေတွေဟာ လာဘ်ပေးလာဘ်ယူမှု သံသယနဲ့ ၂၀၂၀ တိုကျိုအိုလံပစ်ပြိုင်ပွဲ ဘုတ်အဖွဲ့ဝင် ဟောင်း တာကာဟာရှီကို ဖမ်းဆီးခဲ့တယ်လို့ Asahi Shimbun သတင်းစာမှာ ဖော်ပြထားပါတယ်။

တာကာဟာရှီဟာ ပြီးခဲ့တဲ့နှစ်က ကျင်းပခဲ့တဲ့ ပြိုင်ပွဲအတွက် ဝတ်စုံလက်လီ ရောင်းချသူနဲ့ စပွန်ဆာပေးသူ Aoki Holdings ထံကနေ ယန်းငွေဘီလီယံ ရာနဲ့ချီတဲ့ လာဘ်ငွေကြေးတွေ ရရှိခဲ့တယ်ဆိုတဲ့ သံသယနဲ့ ဖမ်းဆီးခဲ့တာလို့ Asah Shimbun က ရေးသား ဖော်ပြထားပါတယ်။

တာကာဟာရှီ အပြင် အစိုးရရှေ့နေတွေဟာ Aoki Holdings ဥက္ကဋ္ဌဟောင်း ဟီရိုနိုရီနဲ့ အခြားနှစ်ဦးကိုလည်း ဖမ်းဆီးခဲ့ပါတယ်။ ဇူလိုင်လကုန်ပိုင်းက စုံစမ်းစစ်ဆေးသူတွေဟာ တာကာဟာရှီရဲ့ နေအိမ်နဲ့ ဂျပန်ကြောငြာ ကုမ္ပဏီ Dentsu Group ရဲ့ ရုံးခန်းကို ဝင်ရောက် စီးနင်းခဲ့ပါတယ်။

တာဟာဟာရှီဟာ Dentsu Group ရဲ့ အမှုဆောင်ဟောင်း ဖြစ်တယ်လို့ သိရပါတယ်။ Aoki Holdings က တာကာဟာရှီကို ဒေါ်လာ ၁ သန်းကျော် ပေးချေခဲ့တယ်လို့ သတင်းတွေ ထွက်ပေါ်နေပြီး တိုကျိုရှိ အစိုးရ ရှေ့နေတွေက စုံစမ်းစစ်ဆေးနေပါတယ်။

တိုကျိုအိုလံပစ်ပြိုင်ပွဲ (JRT Post)

Aoki ဟာ ၂၀၁၇ က Dentsu လက်အောက်ခံ ကုမ္ပဏီတစ်ခုကို ဒေါ်လာ ၁.၇ သန်းပေးချေခဲ့ပြီး ဒီငွေတွေကို တာကာဟာရှီ လည်ပတ်နေတဲ့ ကုမ္ပဏီထံ ပြန်လည် လွှဲပြောင်းပေးခဲ့တယ်လို့ Nikkei စီးပွားရေး နေ့စဉ်သတင်းမှာ ဖော်ပြထားပါတယ်။

ယန်း သန်းပေါင်းများစွာကို အားကစားအဖွဲ့အစည်း နှစ်ခုထံ အမှန်အကန် လွှဲပြောင်း ပေးခဲ့ပေမယ့် တာကာဟာရှီ ရဲ့ ကုမ္ပဏီက လက်ကျန် ဒေါ်လာ ၁.၁ သန်းကို သိမ်းဆည်းထားတယ်လို့ Nikkei က ဖော်ပြခဲ့ပါတယ်။

တာကာဟာရှီဟာ ၂၀၁၃ နဲ့ ၂၀၁၄ မှာ ထုတ်ဖော် ပြသခြင်း မရှိတဲ့ လှုပ်ရှားမှုတွေအတွက် ၂၀၂၀ တိုကျိုအိုလံပစ် ပြိုင်ပွဲ လေလံကော်မတီထံကနေ အမေရိကန်ဒေါ်လာ ၈ သန်းကျော် ရရှိခဲ့တယ်လို့ ၂၀၂၀ ခုနှစ်၊ မတ်လမှာ ရိုက်တာက ဖော်ပြခဲ့ပါတယ်။

တာကာဟာရှီရဲ့ အရှုပ်တော်ပုံနဲ့ အခုသတင်းပတ်အတွင်း ဖမ်းဆီးမှုဟာ တိုကျိုအိုလံပစ်ပြိုင်ပွဲရဲ့ အမွေအနှစ်ကို ညှိုးနွမ်းစေခဲ့ပါတယ်။ တိုကျိုအိုလံပစ်ပြိုင်ပွဲကို ၂၀၂၀ မှာ ကျင်းပဖို့ စီစဉ်ထားခဲ့ပေမယ့် ကိုဗစ်ကပ်ရောဂါကြောင့် တစ်နှစ်နောက်ကျပြီးမှ ကျင်းပခဲ့ရပါတယ်။

Source: အာတီ

CNI Sport News

၂၀၂၂ ခုနှစ်၊ ဩဂုတ် ၁၈

စနေနေ့ညမှာ ထိုးသတ်မယ့်ပွဲစဉ်မှာ အူဆက်ခ်ကိုထပ်ပြီး အရေးနိမ့်ခဲ့မယ်ဆိုရင် လက်ဝှေ့ကနေ အနားယူမယ် ဆိုတဲ့ ထင်ကြေးတွေကို အန်သိုနီဂျိုရွှာက ငြင်းဆန်လိုက်ပါတယ်။

အန်သိုနီဂျိုရွှာက “ကျနော်အနားယူဖို့ မစဉ်းစားထားပါဘူး။ကျနော့်ဘဝရဲ့ အကြီးမားဆုံး ထိုးသတ်ပွဲတွေ ကြုံတွေ့ ခဲ့ရပြီး အနားယူဖို့ စဉ်းစားနေခဲ့တယ်ဆိုရင် စိတ်ထဲမှာ သံသယကြီးကြီးမားမား ဖြစ်သွားပါလိမ့်မယ်။ ကမ္ဘာ့ အကောင်းဆုံးတိုက်ခိုက်ရေးသမားကို ရှုံးနိမ့်တဲ့အချိန်မှာ အနားယူမယ်လို့ ပြောတာက မိုက်မဲရာကျပါတယ်။ လူတွေရဲ့ထင်မြင်မှုကိုတော့ ကျနော်လေးစားပေမယ့် အနားယူမှာမဟုတ်ဘူးလို့” ပြောခဲ့တာပါ။

ဆော်ဒီမှာထိုးသတ်မယ့် ဂျိုရွှာနဲ့ အူဆက်ခ်တို့ရဲ့ မကျေပွဲအတွက် ဗုဒ္ဓဟူးနေ့က သတင်းစာရှင်းလင်းပွဲ ပြုလုပ်ခဲ့တာ ဖြစ်ပါတယ်။သူတို့နှစ်ဦးဟာ ပထမအကြိမ်အဖြစ် ပြီးခဲ့တဲ့နှစ် စက်တင်ဘာလက လန်ဒန်မှာ ထိုးသတ်ခဲ့တုန်းက အူဆက်ခ်က အမှတ်နဲ့အနိုင်ရပြီး အန်သိုနီဂျိုရွှာဟာ ပရော်ဖက်ရှင်နယ်ကစားသမားဘ၀ ဒုတိယမြောက်ရှုံးပွဲနဲ့ ကြုံတွေ့ခဲ့ရတာပါ။ဗြိတိန်ဟဲဗီးဝိတ်သမားဟာ ရှုံးပွဲနဲ့အတူ IBF, WBO နဲ့ WBA ချန်ပီယံခါးပတ်တွေပါ အူဆက်ခ်ကို ပေးခဲ့ရတာဖြစ်ပါတယ်။

အန်သိုနီဂျိုရွှာကတော့ ချန်ပီယံခါးပတ်တွေ ပြန်ရအောင်ယူဖို့ အာရုံစိုက်နေခဲ့ပေမယ့် ဒီပွဲရှုံးနိမ့်ခဲ့ရင် လက်ဝှေ့လော က ကနေ ထွက်ခွာရနိုင်ကြောင်း ကမ္ဘာ့ချန်ပီယံဟောင်းတွေက ပြောထားကြတာပါ။

ဒါပေမယ့် အန်သိုနီဂျိုရွှာ ကတော့ လက်ဝှေ့ကြိုးဝိုင်းကနေ ထွက်ခွာဖို့ ရည်ရွယ်ထားခြင်းမရှိပါဘူး။ “ဒါက ကျနော့်ရဲ့ ၁၂ ကြိမ် ဆက်တိုက် ကမ္ဘာ့ချန်ပီယံထိုးသတ်ပွဲဖြစ်ပြီး ဒါက ကမ္ဘာ့အဆင့်ဖြစ်လို့ ကမ္ဘာ့အဆင့်ရှိတဲ့ ပြိုင်ဘက်တွေနဲ့ ထိုးသတ်ရမှာပါပဲ။ ဒါက ကျနော့်အတွက် တတိယမြောက်အိုလံပစ်ရွှေတံဆိပ်ဆုဖြစ်ပေမယ့် ဒီနေရာမှာ ဖျော်ဖြေသွားမှာပါ” လို့ အန်သိုနီဂျိုရွှာက ပြောခဲ့တာပါ။

အူဆက်ခ်က “ဒီပွဲမှာ ကျနော်ပိုပြီးကောင်းမွန်လာမှာပါ။ပထမပွဲတုန်းက ကျနော်တို့ အချင်းချင်းသင်ယူခဲ့ကြရ တယ်။သူကလည်း ကျနော့်ဆီကသင်ယူပြီး၊ ကျနော်ကလည်း သူ့ဆီက သင်ယူပါတယ်။ကျနော်တို့ဟာ တိုက်ခိုက် ရေးသမားအသစ်တွေမဟုတ်သလို ပြိုင်ဆိုင်မှုအသစ်လည်း မဟုတ်ပါဘူး။စာကျက်ဖို့ အချိန်အလုံအလောက် ရထားပြီးဖြစ်လို့ စနေနေ့ညဟာ ကောင်းမွန်တဲ့ည ဖြစ်ပါလိမ့်မယ်”လို့ ပြောခဲ့ပါတယ်။

ဒီပွဲကို သြဂုတ်လ ၂၀ ရက်မှာ ထိုးသတ်သွားမှာဖြစ်ပြီး အနိုင်ရတဲ့သူဟာ တိုင်ဆန်ဗျူရီအနားယူသွားလို့ လစ်လပ် ခဲ့တဲ့ The Ring ဟဲဗီးဝိတ်ခါးပတ်ကိုလည်း ရရှိမှာဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဩဂုတ် ၁၈

ဗြိတိန်ဘီလျံနာ တစ်ဦးဖြစ်တဲ့ ဆာဂျင်မ်ရက်ကလစ်ဖ်က ယူနိုက်တက်အသင်းကို ဝယ်ယူချင်နေတယ်လို့ သူ့ရဲ့ ပြောရေးဆိုခွင့်ရှိသူက အတည်ပြု လိုက်ပါတယ်။

ရက်ကလစ်ဖ်ရဲ့ ပြောရေးဆိုခွင့်ရှိသူက “တကယ်လို့ ယူနိုက်တက်ကို ရောင်းချမယ်ဆိုရင် ဂျင်မ်က ဝယ်ယူဖို့ အလားအလာ ရှိတဲ့သူဆိုတာ အသေအချာပါပဲ။ ဒီလိုမျိုး ဖြစ်လာခဲ့မယ်ဆိုရင်တော့ ရေရှည်ပိုင်ဆိုင်ဖို့ အတွက် ရည်ရွယ်ပြီး ဆွေးနွေးမှုတွေ ပြုလုပ်ဖို့ ကျနော်တို့ဘက်က စိတ်ဝင်စားတယ်”လို့ The Times ကို ပြောခဲ့ပါတယ်။

ဂလေဇာ မိသားစုဟာ ယူနိုက်တက်ရဲ့ အစုရှယ်ယာ အနည်းစုကို ရောင်းချဖို့ ဆန္ဒရှိနေတယ်ဆိုတဲ့ သတင်းကြောင့် ရက်ကလစ်ဖ်ရဲ့ စိတ်ဝင်စားမှုဟာ အခုလို ထွက်ပေါ်လာခဲ့တာ ဖြစ်ပါတယ်။

ယူနိုက်တက်အသင်းဟာ ဒီရာသီ ပရီးမီးယားလိဂ် ၂ ပွဲ ကစားအပြီးမှာ၂ ပွဲစလုံး အရေးနိမ့်ကာ အမှတ်ပေးဇယား အဆင့် ၂၀ နေရာမှာ ရပ်တည်နေတာကြောင့် ဂလေဇာမိသားစုရဲ့ အသင်းအပေါ် ရင်နှီးမြှပ်နှံမှု မရှိတာကို ပရိသတ် တွေက စိတ်ပျက်နေကြတာပါ။

ယူနိုက်တက်အသင်းဟာ ဆာအဲလက်စ် ဖာဂူဆန် ထွက်ခွာခဲ့တဲ့ ၂၀၁၃ ကတည်းက ရုန်းကန်ခဲ့ရပြီး ၂၀၁၇ နောက် ပိုင်း ဆုဖလားလက်မဲ့ ရာသီတွေကို ဖြတ်သန်းနေရတာ ဖြစ်ပါတယ်။ အဲ့ဒါကြောင့် ပြီးခဲ့တဲ့ နှစ်တွေက ဂလေဇာ မိသားစုကို ဆန့်ကျင်တဲ့ ဆန္ဒပြမှုတွေကို ယူနိုက်တက် ပရိသတ်တွေက ပြုလုပ်လာခဲ့ကြပါတယ်။

ယူနိုက်တက်အသင်း (Football365)

ယူနိုက်တက်အသင်း ပရိသတ်တွေဟာ တနင်္လာနေ့ အိုးထရက်ဖို့ဒ်မှာ ကစားမယ့် လီဗာပူးလ်အသင်းနဲ့ ပရီးမီးယား လိဂ်ပွဲစဉ်မှာ ဂလေဇာမိသားစုကို ဆန္ဒပြဖို့ စီစဉ်နေကြတယ်လို့ သိရပါတယ်။

ရက်ကလစ်ဖ်ဟာ ဓာတုဗေဒအုပ်စု Ineos ရဲ့ ရှယ်ယာ အများဆုံး ပိုင်ဆိုင်တဲ့သူဖြစ်ပြီး ငယ်ဘဝကတည်းက ယူနိုက်တက် ပရိသတ်အဖြစ် ရှိခဲ့တာပါ။ သူဟာ ဘောလုံးအသင်းတွေဖြစ်တဲ့ ပြင်သစ်ကလပ် နိုက်စ်နဲ့ ဆွစ်ဇာလန် ကလပ်တစ်သင်းကို ပိုင်ဆိုင်ထားပါတယ်။

ပြီးခဲ့တဲ့ ရက်ပိုင်းက ကမ္ဘာ့အချမ်းသာဆုံးပုဂ္ဂိုလ် အီလွန်မတ်စ်က ယူနိုက်တက်ကို ဝယ်ယူမယ်လို့ နောက်ပြောင် ခဲ့ပါသေးတယ်။ ရက်ကလစ်ဖ်ဟာ ချယ်လ်ဆီးအသင်းကို အေဘရာမိုဗစ်ချ် ရောင်းချပြီးနောက် ပေါင် ၄.၂၅ ဘီလီယံ နဲ့ ဝယ်ယူဖို့ ကြိုးစားခဲ့သေးပေမယ့် မအောင်မြင်ခဲ့ဘဲ ဖြစ်ခဲ့ပါသေးတယ်။

အဲဒီ အချိန်ကတည်းက ရက်ကလစ်ဖ်ဟာ ယူနိုက်တက်အသင်းရဲ့ ပရိသတ်အဖြစ် ရှိနေဆဲဖြစ်တယ်လို့ BBC Sport နဲ့ အင်တာဗျူးမှာ ပြောခဲ့ပါတယ်။

ဒါပေမယ့် ယူနိုက်တက်အသင်းက ရောင်းချလိုခြင်း မရှိတာကြောင့် ဝယ်ယူဖို့အတွက် ကမ်းလှမ်းမှု မပြုလုပ်ခဲ့ ရတာလို့ ရက်ကလစ်ဖ်က ပြောပါတယ်။

Source: BBC

CNI Sport News

၂၀၂၂ ခုနှစ်၊ ဩဂုတ် ၁၇

အင်္ဂလန်ချန်ပီယံရှစ်ကလပ် နောဝစ်ချ်အသင်းဟာ လုံခြုံရေးစိုးရိမ်မှုတွေကြားက ဒီရာသီ Carrow Road မှာ ၂ နှစ် အောက်ကလေးတွေကို ဝင်ရောက်ကြည့်ရှုခွင့် ပိတ်ပင်လိုက်ပြီဖြစ်ပါတယ်။

ပရိသတ်တွေရဲ့ အော်ဟစ်အားပေးမှုကြောင့် ထွက်ပေါ်လာတဲ့ ဆူညံသံတွေဟာ ကလေးငယ်တွေရဲ့ အကြားအာရုံ ကို ထိခိုက်စေနိုင်တယ်လို့ သုတသနပြုချက်တွေအရ အခုလို ပိတ်ပင်ခဲ့တာလို့ နော်ဝစ်ချ်အသင်းက ပြောခဲ့တာပါ။ လူငယ်ပရိသတ်တွေရဲ့ ဆူညံသံဟာ ရေရှည်အကျိုးသက်ရောက်မှုအတွက် စိုးရိမ်မှုတွေ ပိုပြီးတိုးလာတာကြောင့် ပြီးခဲ့တဲ့နှစ်ကတည်းက အက်ဖ်အေရဲ့ ပွဲတွေမှာ အသက် ၂ နှစ်အောက်ကလေးတွေကို ကြည့်ရှုခွင့် ပိတ်ပင်ကြောင်း ဝင်ဘာလေက ကြေညာခဲ့ပါတယ်။

ဝက်ဖိုဒ့်အသင်းကလည်း သူတို့ရဲ့ အိမ်ကွင်းမှာ အော်တစ်ဇင်ပရိသတ်တွေအတွက် အာရုံခံဧရိယာကို တပ်ဆင် ထားခဲ့တာပါ။အားပေးသူပရိသတ်တွေနဲ့ ပတ်သက်ပြီး သိပ္ပံနည်းကျဆောင်ရွက်ဖို့ ကလပ်အသင်းတွေ ကြားမှာ လမ်းကြောင်းအသစ်ရဲ့ အစိတ်အပိုင်းတစ်ခုဖြစ်လာခဲ့ပါတယ်။နော်ဝစ်ချ်အသင်းဟာ ဝင်ဘာလေ ကိုယ်စားလှယ် တွေနဲ့ စကားပြောခဲ့ပြီး ဆုံးဖြတ်ချက်မချခင်မှာ သုတေသီတွေနဲ့ ဆွေးနွေးတိုင်ပင်ခဲ့တာပါ။

နော်ဝစ်ချ်အသင်းက “အသက် ၂ နှစ်အောက်ကလေးတွေကို အားကစားကွင်း လာရောက်ခွင့် ပိတ်ပင်ခဲ့ပါတယ်။ ဒီဆုံးဖြတ်ချက်က အသက် ၂ နှစ်အောက်ကလေးတွေကို ထိခိုက်မှုနဲ့ ကြီးမားတဲ့အန္တရာယ်ကနေ ကာကွယ်ဖို့ လုပ်ခဲ့တာပါ။အသင်းအနေနဲ့ ပွဲနေ့တွေမှာ ပရိသတ်တွေကို ဘေးကင်းအောင် ပြုလုပ်ဖို့ ကတိပြုထားပါတယ်”လို့ ပြောခဲ့ပါတယ်။

EFL ကတော့ သူတို့ဟာ ကလပ်အသင်းတွေရဲ့ ပွဲတွေမှာ ကလေးသူငယ်တွေ ဝင်ရောက်မှုနဲ့ပတ်သက်ပြီး တစုံတရာ အကြံပြု ထုတ်ပြန်ထားခြင်းမရှိကြောင်း ပြောခဲ့ပါတယ်။ဒါပေမယ့် ကလပ်အသင်းတွေအနေနဲ့ သူတို့ရဲ့ ကိုယ်ပိုင် မူဝါဒ၊ လမ်းညွှန်ချက်တွေကို လွတ်လွတ်လပ်လပ် ကျင့်သုံးလို့ရတယ်လို့ ပြောခဲ့ပါတယ်။ နော်ဝစ်ချ်အသင်းဟာ ပြီးခဲ့တဲ့ရာသီက ပရီးမီးယားလိဂ်ပြိုင်ပွဲကနေ တန်းဆင်းပြီး ဒီရာသီ ချန်ပီယံရှစ်ပြိုင်ပွဲမှာ ကစားနေရတာပါ။

နော်ဝစ်ချ်အသင်းဟာ ချန်ပီယံရှစ်ပွဲစဉ် ၄ ပွဲကစားအပြီးမှာ ၁ ပွဲနိုင် ၁ ပွဲသရေ ၂ ပွဲရှုံး ရမှတ် ၄ မှတ်နဲ့ အမှတ်ပေး ဇယားအဆင့် ၁၆ နေရာမှာ ရပ်တည်နေတာဖြစ်ပါတယ်။

Source:TheSun

CNI Sport News

၂၀၂၂ ခုနှစ်၊ သြဂုတ် ၁၇

ရော်နယ်ဒိုကတော့ မီဒီယာတွေဟာ လိမ်ညာပြီး ပြောနေတယ်လို့ ဝေဖန်လိုက်ပြီး ယူနိုက်တက် အသင်းနဲ့ ပတ်သက်တဲ့ အနာဂတ်အကြောင်းကို အမှန်အတိုင်း ပြောပြမယ်လို့ ကတိပေး လိုက်ပါတယ်။

ရော်နယ်ဒိုက “ လာမယ့် ရက်သတ္တပတ် အနည်းငယ်အတွင်း အင်တာဗျူး ဖြေတဲ့အခါမှာ အမှန်တရားကို သိရမှာ ပါ။ မီဒီယာတွေက လိမ်ညာပြီး ပြောနေတာပါ။ ကျနော့်မှာ မှတ်စု စာအုပ်ရှိပါတယ်။ ပြီးခဲ့တဲ့လ အနည်းငယ် အတွင်းမှာ ကျနော်နဲ့ ပတ်သက်ပြီး လုပ်ခဲ့တဲ့ သတင်းအပုဒ် ၁၀၀ မှာ ၅ ပုဒ်ပဲ မှန်တာပါ။ တွေးကြည့် လိုက်စမ်းပါ” လို့ မှတ်ချက် ရေးသားခဲ့တာပါ။

ရော်နယ်ဒိုဟာ ချန်ပီယံလိဂ်ပြိုင်ပွဲ ကစားချင်ပြီး ဆုဖလား အောင်မြင်မှုတွေ ရယူချင်တာကြောင့် အခုနွေရာသီ အပြောင်းအရွှေ့မှာ ယူနိုက်တက်ကနေ ထွက်ခွာဖို့ စိတ်အား ထက်သန်နေတာ ဖြစ်ပါတယ်။

ပေါ်တူဂီ လက်ရွေစင်းအသင်းရဲ့ ကစားသမားဟာ ဘရိုက်တန်အသင်းကို အရေးနိမ့်ခဲ့တဲ့ ပရီးမီးယားလိဂ် အဖွင့်ပွဲ မှာ လူစားဝင် ကစားသမားအဖြစ်နဲ့သာ ပါဝင်ခဲ့ရပေမယ့် ဘရန်ဖို့ဒ်နဲ့ ပွဲမှာတော့ ပွဲအစကတည်းက ပါဝင်ခဲ့ရတာပါ။ လက်ရှိ အချိန်မှာ ရော်နယ်ဒိုဟာ အသင်းက ထွက်ခွာဖို့ ဆန္ဒရှိနေဆဲ ဖြစ်ပါတယ်။

ရော်နယ်ဒိုရဲ့ တုံ့ပြန်ချက်

ယူနိုက်တက် အသင်းကတော့ ရော်နယ်ဒိုကို ရောင်းချဖို့ မရည်ရွယ်ထားပေမယ့် မကြာသေးခင်က သတင်းတွေမှာ ကစားသမားကို ခေါ်ယူဖို့ ကမ်းလှမ်းလာမယ့် ကမ်းလှမ်းမှုတွေကို နားထောင်သွားဖို့ ရှိနေတယ်လို့ ဖော်ပြခဲ့တာပါ။

လက်ရှိ နွေရာသီ အပြောင်းအရွှေ့ ပိတ်ဖို့ ၂ ပတ်ခန့်သာ ကျန်ရှိတော့တာကြောင့် ရော်နယ်ဒို အနေနဲ့ အနာဂတ်နဲ့ ပတ်သက်ပြီး ဖြေရှင်းဖို့ အချိန်တန်လာခဲ့ပြီ ဖြစ်ပါတယ်။ ရော်နယ်ဒိုနဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ ၁ နှစ် ကျန်ရှိနေတာပါ။

ရော်နယ်ဒို အပါအဝင် ယူနိုက်တက်အသင်းရဲ့ စီနီယာ ကစားသမားတွေဟာ ရလဒ်ဆိုးနေတဲ့ အသင်းအတွက် နောက်ထပ် ကစားသမားသစ် အားဖြည့်ဖို့ တာဝန်ရှိသူတွေထံ ပြောထားတယ်လို့ သိရပါတယ်။

အဲ့ဒါကြောင့်လည်း ယူနိုက်တက်အသင်းဟာ အပြောင်းအရွှေ့ မပိတ်ခင်မှာ လိုအပ်နေတဲ့ တိုက်စစ်နဲ့ ကွင်းလယ် ပိုင်းကို ဝယ်ယူဖို့ ဈေးကွက်ထဲမှာ လှုပ်ရှားနေတာပါ။ ယူနိုက်တက်အသင်းဟာဆိုရင် ဂျူဗင်တပ်စ် ကွင်းလယ်လူ ရာဘီယော့ကို ခေါ်ယူဖို့ ကြိုးစားခဲ့ပေမယ့် တောင်းဆိုမှုများပြားလို့ လက်လျှော့လိုက်ပြီး ရီးရယ်လ်အသင်းက ကတ်စမဲရိုးကို ချိတ်ဆက်နေပါတယ်။

တိုက်စစ်ပိုင်းအတွက် အသလက်တီကို အသင်းက မိုရာတာ၊ ပီအက်စ်ဂျီ အသင်းက အိုင်ကာဒီ အပါအဝင် ကစား သမား တချို့ကို ယူနိုက်တက်အသင်းက စောင့်ကြည့်နေပါတယ်။

Source: Daily Mail

CNI Sport News

၂၀၂၂ ခုနှစ်၊ ဩဂုတ် ၁၇

ယူကရိန်းဘောလုံးဂန္တဝင် ရှက်ဖ်ချန်ကိုက ရုရှားတပ်ဖွဲ့တွေရဲ့ အန္တရာယ်တွေကို ရင်ဆိုင်နေရဆဲဖြစ်တာကြောင့် ကျေးဇူးပြုပြီး သူတို့ကို မမေ့ကြပါနဲ့လို့ ကမ္ဘာကြီးကို တိုက်တွန်းခဲ့ပါတယ်။

ရှက်ဗ်ချန်ကိုက ပုဂ္ဂိုလ်ရေးအရ ဒါဟာ ကျနော့်အတွက် တကယ်ကိုခက်ခဲပါတယ်။ဖြစ်ပျက်ခဲ့တာတွေနဲ့ ပတ်သက် ပြီး အခုထိ စိတ်ပျက်နေတုန်းပါပဲ။တစ်ခါတစ်ရံမှာ တူညီတဲ့ မေးခွန်းကိုမေးပြီး အဖြေမရှာနိုင်ခဲ့ပေမယ့် ကျနော်တို့ မှာ ဦးတည်ချက်က တစ်ခုတည်းပဲရှိပါတယ်။ဒီစစ်ပွဲကို အနိုင်ယူဖို့ လိုအပ်ပြီး တိုင်းပြည်ကို ပြန်လည်တည်ဆောက် ရမှာပါ”လို့ CNN Sport ကို ပြောခဲ့တာပါ။

ယူကရိန်းမှာ တိုက်ပွဲတွေဟာ နေ့တိုင်းလိုလိုဖြစ်ပွားနေဆဲဖြစ်ပြီး လူသန်းပေါင်းများစွာဟာ နိုင်ငံအတွင်းကနေ ထွက်ပြေးခဲ့ရတာဖြစ်ပါတယ်။ဖေဖော်ဝါရီ ၂၄ ရက်ကစတင်ပြီး ကျူးကျော်မှုဖြစ်ပွားခဲ့ကတည်းက ရှက်ဖ်ချန်ကိုဟာ နိုင်ငံအတွက် အသိပညာနဲ့ ငွေကြေးထောက်ပံမှုတွေရဖို့ သူ့ရဲ့ ဆိုရှယ်ပလက်ဖောင်းကို အသုံးပြုနေတာပါ။ ယူကရိန်းအသင်းခေါင်းဆောင်နဲ့ နည်းပြဟောင်းဖြစ်သူ ရှက်ဗ်ချန်ကိုဟာ စစ်ပွဲဒဏ်ကို ပြင်းထန်စွာခံခဲ့ရပြီး အိမ်ပြန်ရောက်တဲ့အချိန်မှာ သီတင်းပတ်များစွာ အချိန်ယူခဲ့ရတယ်လို့ ပြောခဲ့ပါတယ်။

ယူကရိန်းသမ္မတ ဇာလန်းစကီးက စစ်ပွဲအတွက် အလှူငွေတွေလှူဒါန်းနိုင်ဖို့ ရည်ရွယ်ပြီး ရှက်ဗ်ချန်ကိုနဲ့ တင်းနစ်အကျော်အမော် စဗီတိုလီနာတို့ကို UNITED24 ရဲ့ သံတမန်တွေအဖြစ် ခန့်အပ်ကာ အဖွဲ့အစည်းတစ်ခု တည်ထောင်ခဲ့တာပါ။ဒီလိုလုပ်ဆောင်မှုကနေ အခုအချိန်ထိ ဒေါ်လာ ၁၆၆ သန်းစုဆောင်းထားမိပြီး အခုထက်ပိုမို ရရှိနိုင်ဖို့အတွက် နောက်ထပ်ပရောဂျက်များစွာလည်း ရှိနေသေးတာဖြစ်ပါတယ်။

“သတင်းစကားက အလွန်ရှင်းပါတယ်။စစ်ပွဲစတင်ပြီးကတည်းက ယူကရိန်းက အကူအညီတွေအများကြီး လိုအပ်ပါတယ်။လူသားချင်းစာနာမှု၊ဆေးဘက်ဆိုင်ရာအကူအညီတွေအတွက် ရံပုံငွေရှာဖွေဖို့နဲ့ စစ်ပွဲအကြောင်း အသိပညာပေးဆွေးနွေးဖို့တွေအတွက် ဒီပလက်ဖောင်းရဲ့ အစိတ်အပိုင်းအဖြစ် ကျနော်ဒီကို ရောက်လာခဲ့တာပါ။ ဒါက အခုအချိန်မှာ ယူကရိန်းရဲ့ လိုအပ်ချက်ပါ။ကျနော်တို့ရဲ့ အနာဂတ်၊ ကျနော်တို့ရဲ့ လွတ်လပ်ရေးနဲ့ ကျနော်တို့ရဲ့ ဒီမိုကရေစီလမ်းစဉ်ကို ဆက်သွားနိုင်ဖို့ ထောက်ပံ့မှုအချို့လိုအပ်ပါတယ်”လို့ ၂၀၀၄ ခုနှစ် ဘောလွန်းဒီအောဆုရှင် ရှက်ဗ်ချန်ကို က ပြောခဲ့တာပါ။

CNI Sport News

၂၀၂၂ ခုနှစ်၊ ဩဂုတ် ၁၇

ကမ္ဘာ့အချမ်းသာဆုံးပုဂ္ဂိုလ်ဖြစ်တဲ့ အီလွန်မတ်စ်က ယူနိုက်တက်ကို ဝယ်ယူဖို့ လုပ်ဆောင်နေတယ်လို့ သြဂုတ်လ ၁၇ ရက်နေ့က သူ့ရဲ့ တွစ်တာမှာ ရေးသားခဲ့တာဖြစ်ပါတယ်။

ဒါပေမယ့် အသေးစိတ်အချက်အလက်တွေကိုတော့ အီလွန်မတ်စ်က ဖော်ပြခဲ့ခြင်းမရှိပါဘူး။အီလွန်မတ်စ်ဟာ သမားရိုးကျမဟုတ်တဲ့ တွစ်တာပို့စ်တွေကို ရေးသားတဲ့ သမိုင်းကြောင်းရှိပြီး ယူနိုက်တက်ကို ဝယ်ယူနိုင်ဖို့ သဘော တူညီမှု ရရှိခြင်း ရှိ၊ မရှိဆိုတာကို မသိရှိရသေးပါဘူး။ယူနိုက်တက်အသင်းကို ဝယ်ယူမယ်ဆိုတဲ့ ပို့စ်နဲ့ပတ်သက်ပြီး မှတ်ချက်ပေးဖို့ တောင်းဆိုထားတာကို အီလွန်မတ်စ်နဲ့ မိသားစုတွေက ချက်ခြင်းတုံ့ပြန်ခြင်း မရှိသေးဘူးလို့လည်း သတင်းမှာ ဖော်ပြထားတာပါ။

ယူနိုက်တက်ကို ဂလေဇာမိသားစုက ပိုင်ဆိုင်ထားတာဖြစ်ပြီး ပေါင် ၄ ဘီလီယံထက်ပိုပြီး ရရှိမှသာ ရောင်းချဖို့ ပြင်ဆင်ထားတယ်လို့ ဗြိတိန်သတင်းစာ ဒေးလီးမေရာက ပြီးခဲ့တဲ့နှစ်က ဖော်ပြခဲ့တာ ဖြစ်ပါတယ်။ ယူနိုက်တက် အသင်းဟာ ကမ္ဘာပေါ်မှာ ပရိသတ်အင်အားအခိုင်အမာရှိတဲ့ အသင်းတွေထဲကတစ်သင်း အဖြစ်လည်း ရှိနေတာပါ။ သူတို့ဟာ ပရီးမီးယားလိဂ်အမှတ်ပေးဖလား စံချိန်တင် အကြိမ် ၂၀ ရရှိထားပြီး ချန်ပီယံလိဂ်ဖလား ၃ ကြိမ် အပါ အဝင် အောင်မြင်မှုအများအပြား ရယူထားနိုင်တာဖြစ်ပါတယ်။

ယူနိုက်တက်အသင်းဟာ နည်းပြကြီး ဆာအဲလက်စ်ဖာဂူဆန်ထွက်ခွာခဲ့တဲ့ ၂၀၁၃ နောက်ပိုင်း ပရီးမီးယားလိဂ် ဖလားနဲ့ ဝေးကွာနေသလို ၂၀၁၆-၁၇ နောက်ပိုင်း ယူရိုပါလိဂ်ရပြီးကတည်းက ဆုဖလားတွေနဲ့ ဝေးကွာနေခဲ့ တာပါ။ပရိသတ်တွေကတော့ ထိပ်တန်းကစားသမားတွေခေါ်ဆောင်ပေးဖို့ ငွေကြေးသုံးစွဲလိုစိတ် မရှိတဲ့ ဂလေဇာ မိသားစုအပေါ်မှာ မကျေနပ်မှုတွေ ပိုပြီးပြင်းထန်နေခဲ့တာဖြစ်ပါတယ်။ယူနိုက်တက်ပရိသတ်တွေကတော့ ဂလေဇာ မိသားစုကို အသင်းက ထွက်သွားဖို့ ဆန္ဒပြမှုတွေပြုလုပ်နေကြတာပါ။

ယူနိုက်တက်ပရိတ်သတ်အချို့ဟာ အရင်ကတည်းက အသင်းကို ဝယ်ယူဖို့ အီလွန်မတ်စ်ကို တောင်းဆိုမှုတွေ ရှိခဲ့တာပါ။Forbes ရဲ့ ခန့်မှန်းမှုအရ အီလွန်မတ်စ်ရဲ့ ကြွယ်ဝချမ်းသာမှုဟာ အမေရိကန်ဒေါ်လာ ၂၇၀ ဘီလီယံ ဖြစ်တယ်လို့ သိရပါတယ်။အီလွန်မတ်စ်ဟာ ဒေါ်လာ ၄၄ ဘီလီယံနဲ့ တွစ်တာကို ဝယ်ယူမှုကနေ နုတ်ထွက်ခဲ့လို့ တရားစွဲဆိုမှုခံနေရတယ်လို့ သိရပါတယ်။

Source:ChannelNewsAsia