CNI Sport News

၂၀၂၄ ခုနှစ်၊ ဇွန်လ ၆

ဘာစီလိုနာအသင်းဂိုးသမား တာစတီဂျန်က ယူရို ၂၀၂၄ ပြိုင်ပွဲမှာ ဂျာမနီအသင်းရဲ့ နံပတ်တစ် ဂိုးသမားအဖြစ် နူအာကိုသာ အသုံးပြုမှာဖြစ်လို့ သူ့ရဲ့အခြေအနေကို မပျော်ရွှင်ဘူးလို့ ဝန်ခံခဲ့ပါတယ်။

တာစတီဂျန်က “ဒါက သာယာဖွယ်ကောင်းတဲ့ အခြေအနေတော့ မဟုတ်ပါဘူး။ ဒါပေမယ့် နည်းပြက ဆုံးဖြတ် ချက်ချခဲ့ပြီး ကျနော်ဟာ ဒါကို သူနဲ့ သဘောမတူရင်တောင် လက်ခံရမှာပါ”လို့ သတင်းထောက်တွေကို ပြောခဲ့ တာပါ။

တာစတီဂျန်ဟာ ဘာစီလိုနာအသင်းမှာ နံပါတ်တစ် ဂိုးသမားအဖြစ် လက်စွမ်းပြသနေပေမယ့် ဂျာမနီအသင်းမှာ တော့ ဘိုင်ယန်မြူးနစ်အသင်း ဂိုးသမား နူအာရဲ့နောက် ဒုတိယဂိုးသမားအဖြစ် ရှိနေတာဖြစ်ပါတယ်။ 

အိမ်ကွင်းမှာ ကျင်းပမယ့် ယူရို ၂၀၂၄ ပြိုင်ပွဲမှာလည်း ဂျာမနီအသင်းနည်းပြ နာဂျယ်လ်စမန်းဟာ နူအာကိုသာ နံပါတ်တစ်ဂိုးသမားအဖြစ် အသုံးပြုဖို့ ဆုံးဖြတ်ခဲ့လို့ တာစတီဂျန်ဟာ အရန်ခုံမှာသာ ထိုင်ရဖို့ရှိနေတာပါ။

တာစတီဂျန်ကို တွေ့ရစဉ်

အဲဒါကြောင့် တာစတီဂျန်က နည်းပြ နာဂျယ်လ်စမန်းရဲ့ ဆုံးဖြတ်ချက်ကို လက်ခံပေမယ့် သဘောတူတာတော့ မဟုတ်ဘူးလို့ ပြောခဲ့တာ ဖြစ်ပါတယ်။ 

ဘာစီလိုနာအသင်း ဂိုးသမားဟာ ဂျာမနီအသင်းမှာ နံပါတ်တစ်ဂိုးသမား နေရာမရလို့ စိတ်ပျက်နေပေမယ့် နိုင်ငံအသင်းကနေ အနားယူမယ့် သတင်းတွေကို ပယ်ချခဲ့ပါတယ်။

ဒါ့အပြင် သူနဲ့ နူအာရဲ့ ဆက်ဆံရေးဟာ ကောင်းမွန်မှုရှိနေဆဲ ဖြစ်တယ်လို့ တာစတီဂျန်က ပြောခဲ့တာပါ။

တာစတီဂျန်က “ကျနော်ဟာ နိုင်ငံအသင်းကို တတ်နိုင်သလောက် အကူအညီပေးသွားမှာပါ။ နူအာနဲ့ ကျနော့်ရဲ့ ကြားမှာလည်း ဘာမှမဖြစ်ပါဘူး။ ကျနော်ဟာ သူအမှားအယွင်း လုပ်မှာကို ဘယ်တော့မှ လိုလားတဲ့သူ မဟုတ်ပါ ဘူး။ ဒါက ကျနော်မဟုတ်ဘူး”လို့ ပြောခဲ့ပါတယ်။

၂၀၁၂ ခုနှစ်မှာ ဂျာမနီအသင်းအတွက် ပွဲထွက်ခွင့်ရရှိခဲ့တဲ့ တာစတီဂျန်ဟာ ပွဲပေါင်း ၄၀ ပါဝင် ကစားထားတာ ဖြစ်ပါတယ်။

Source: Goal

CNI Sport News

 ၂၀၂၄ ခုနှစ်၊ ဇွန်လ ၆

ဖီနာဘာချီအသင်းနဲ့ ၂ နှစ်စာချုပ်ချုပ်ဆိုခဲ့တဲ့ နည်းပြမော်ရင်ဟိုဟာ တစ်နှစ်လုပ်ခလစာ ယူရို ၁၀.၅ သန်းကျော် ရရှိမယ်လို့ တူရကီကလပ်က ပြောခဲ့ပါတယ်။

ဖီနာဘာချီအသင်းဟာ မော်ရင်ဟိုကို နည်းပြသစ်အဖြစ် ခန့်အပ်ကြောင်း ပရိသတ်ထောင်ပေါင်းများစွာအရှေ့မှာ မိတ်ဆက်ခဲ့ပြီးနောက် ၃ ရက်အကြာ ဇွန် ၅ ရက်က စတော့ရှယ်ယာဈေးကွက်ကို အသိပေးတဲ့ကြေညာချက်မှာ ကိန်းဂဏန်းတွေကို ဖော်ထုတ်ခဲ့တာပါ။ 

ဒါပေမယ့် တူရကီကလပ်ဟာ မော်ရင်ဟိုနဲ့ ချုပ်ဆိုထားတဲ့ စာချုပ်ထဲမှာ ပါဝင်တဲ့ အပိုဆုကြေးပမာဏကိုတော့ ဖော်ပြခဲ့ခြင်းမရှိပါဘူး။ 

မော်ရင်ဟိုဟာ ဖီနာဘာချီအသင်း နည်းပြသစ် ဖြစ်လာအပြီးမှာ ၂၀၁၄ ခုနှစ်နောက်ပိုင်း ရယူနိုင်ခဲ့ခြင်းမရှိတဲ့ တူရကီလိဂ်ဖလားကို ရယူပေးဖို့ လုပ်ဆောင် ပေးရတော့မှာဖြစ်ပါတယ်။

ဖီနာဘာချီအသင်းဟာ ပြီးခဲ့တဲ့ရာသီက တူရကီလိဂ်ပြိုင်ပွဲမှာ ဂါလာတာစာရေးအသင်းရဲ့နောက် အဆင့် ၂ နေရာနဲ့ ရာသီအဆုံးသတ်ခဲ့တာပါ။

မော်ရင်ဟိုကိုယ်တိုင်ကလည်း ဖီနာဘာချီအသင်းရဲ့ သတင်းစာရှင်းလင်းပွဲမှာ အသင်းကို တူရကီလိဂ်ဖလားရယူပေးနိုင်ဖို့ အဓိကပစ်မှတ်အဖြစ် သတ်မှတ်ထားတယ်လို့ ပြောခဲ့တာဖြစ်ပါတယ်။ 

ပေါ်တူဂီ လူမျိုးနည်းပြဟာ ပေါ်တိုအသင်းကနေ ထွက်ခွာခဲ့တဲ့ ၂၀၀၄ ခုနှစ်ကတည်းက ဥရောပထိပ်တန်း ၅ လိဂ်ရဲ့ အပြင် ဘက်မှာ အလုပ်လုပ်ခဲ့ခြင်းမရှိတာပါ။

မော်ရင်ဟိုဟာ ပေါ်တိုအသင်းက ထွက်ခွာပြီးနောက် ချယ်လ်ဆီးအသင်းကို ကိုင်တွယ်ခဲ့ကာ ဒီနောက်ပိုင်းမှာ အင်တာမီလန်၊ရီးရယ်လ်၊ယူနိုက်တက်၊စပါးနဲ့ ရိုးမားအသင်းတွေကို ကိုင်တွယ်ခဲ့တာဖြစ်ပါတယ်။ 

မော်ရင်ဟိုဟာ စပါးအသင်းကလွဲပြီး ကိုင်တွယ်တဲ့အသင်းတိုင်းမှာ အနည်းဆုံးဆုဖလား ၁ လုံးရယူပေးနိုင်တဲ့ မှတ်တမ်းကောင်းကို ပိုင်ဆိုင်ထားပါတယ်။ 

အဲဒါကြောင့်လည်း ဖီနာဘာချီအသင်းဟာ အောင်မြင်မှုတွေရယူနိုင်ဖို့ မော်ရင်ဟိုကို နည်းပြ သစ်အဖြစ်ခန့်အပ်ခဲ့တာပါ။

ဖီနာဘာချီအသင်းဟာ ချန်ပီယံလိဂ်ပြိုင်ပွဲယှဉ်ပြိုင်ခွင့်ရဖို့အတွက် ဇူလိုင်အစောပိုင်းမှာ ခြေစစ်ပွဲအဆင့်တွေကို စတင်ယှဉ်ပြိုင်ရမှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၆

စပါးအသင်း ကွင်းလယ်လူ မက်ဒီဆင်ဟာ ယူရို ၂၀၂၄ ပြိုင်ပွဲဝင်မယ့် အင်္ဂလန်အသင်းရဲ့ အပြီးသတ် လူစာရင်းမှာ ချန်လှပ်ခံခဲ့ရတယ်လို့ ဗြိတိန်မီဒီယာတွေက ဖော်ပြထားပါတယ်။

မက်ဒီဆင်ဟာ ယူရို ၂၀၂၄ ပြိုင်ပွဲအတွက် လေ့ကျင့်မှုတွေ ပြုလုပ်နေတဲ့ အင်္ဂလန်အသင်းရဲ့ ပဏာမကစားသမား ၃၃ ဦးစာရင်းထဲမှာ ပါဝင်ခဲ့တာပါ။ 

စပါးအသင်း ကွင်းလယ်လူဟာ အင်္ဂလန်အသင်းက ဘော့စနီးယားအသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ ခြေစမ်းပွဲမှာ လူစားဝင် ကစားသမားအဖြစ် ပါဝင်ခဲ့သေးတာ ဖြစ်ပါတယ်။

ဒါပေမယ့် မက်ဒီဆင်ဟာ အင်္ဂလန်အသင်းက ထုတ်ပြန်မယ့် အပြီးသတ်ကစားသမား ၂၆ ဦးစာရင်းထဲမှာ ချန်လှပ်ခံရမယ့် ကစားသမား ၇ ဦးထဲက ၁ ဦးဖြစ်လာခဲ့တာပါ။

အသက် ၂၇ နှစ်အရွယ်ရှိ မက်ဒီဆင်ဟာ အင်္ဂလန်အသင်းအတွက် ၇ ပွဲ ပါဝင်ကစားထားပြီး ၂၀၂၂ ကမ္ဘာ့ဖလား ပြိုင်ပွဲဝင် အသင်းလူစာရင်းမှာ ပါဝင်ခဲ့ပေမယ့် တစ်ပွဲမှ ပါဝင်ကစားရခြင်းမရှိခဲ့တာ ဖြစ်ပါတယ်။ 

ပြီးခဲ့တဲ့နွေရာသီက လက်စတာအသင်းကနေ စပါးအသင်းထံ ပေါင်သန်း ၄၀ နဲ့ ပြောင်းရွှေ့လာခဲ့တဲ့ မက်ဒီဆင်ဟာ ရာသီအစပိုင်းမှာ ခြေစွမ်းပြသနိုင်ခဲ့ပေမယ့် ဒဏ်ရာကြောင့် အနားယူခဲ့ရပြီးနောက် ခြေစွမ်းပိုင်း တည်ငြိမ်မှု မရှိတော့တာပါ။

အင်္ဂလန်အသင်းကို တွေ့ရစဉ်

နည်းပြဆောက်ဂိတ်ဟာ အိုက်စလန်အသင်းနဲ့ ကစားမယ့် ခြေစမ်းပွဲအပြီးမှာ အင်္ဂလန်အသင်းရဲ့ အပြီးသတ် လူစာရင်းအတွက် နောက်ထပ် ၆ ဦးကို ချန်လှပ်ရမှာ ဖြစ်ပါတယ်။

ဒဏ်ရာကြောင့် ကာလရှည်ကြာ အနားယူခဲ့ရပြီး မကြာသေးခင်ရက်ပိုင်းကမှ အင်္ဂလန်အသင်းနဲ့ လေ့ကျင့်မှုတွေ ပြန်လည်ပြုလုပ်ခဲ့တဲ့ ဘယ်နောက်ခံလူ လုပ်ခ်ရှောဟာ ယူရိုပြိုင်ပွဲအတွက် အပြီးသတ်လူစာရင်းမှာ ပါဝင်လာဖို့ ရှိနေတာပါ။ 

ပြီးခဲ့တဲ့ ဘော့စနီးယားအသင်းနဲ့ ခြေစမ်းပွဲမှာ လူငယ်ကစားသမားတွေ ခြေစွမ်းပြသနိုင်ခဲ့တာကြောင့် နည်းပြ ဆောက်ဂိတ်က အပြီးသတ် လူစာရင်းရွေးချယ်ဖို့ ခက်ခဲတယ်လို့ ဝန်ခံထားပါတယ်။

အင်္ဂလန်အသင်းဟာ ယူရို ၂၀၂၄ ပြိုင်ပွဲမှာ ဆလိုဗေးနီးယား၊ ဒိန်းမတ်၊ ဆားဘီးယားအသင်းတို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၅

ယူနိုက်တက်အသင်း ကွင်းလယ်လူ ကတ်စမဲရိုးဟာ ပြီးခဲ့တဲ့ရာသီအကုန်မှာ စပိန်တတိယတန်းကို တန်းတက်နိုင် ခဲ့တဲ့ မာဘယ်လာအသင်းရဲ့ ရှယ်ယာရှင်နဲ့ ဒါရိုက်တာ ဖြစ်လာခဲ့ပါတယ်။

ကတ်စမဲရိုးဟာ စပိန်အောက်တန်းလိဂ် ကလပ်ဖြစ်တဲ့ မာဘယ်လာအသင်းမှာ ရင်းနှီးမြုပ်နှံမှု ပြုလုပ်ခဲ့တာပါ။ 

မာဘယ်လာအသင်းက ကတ်စမဲရိုးဟာ သူတို့အဖွဲ့အစည်းရဲ့ ရှယ်ယာရှင်အသစ် ဖြစ်လာတယ်လို့ ပြီးခဲ့တဲ့ရက်ပိုင်း က ကြေညာမှု ပြုလုပ်ခဲ့တာ ဖြစ်ပါတယ်။ 

အဲဒါကြောင့် ဘရာဇီးလ်ကွင်းလယ်လူဟာ စပိန်ကလပ်ရဲ့ ဒါရိုက်တာ ဘုတ်အဖွဲ့ဝင်အသစ်လည်း ဖြစ်လာခဲ့တာပါ။ 

အသက် ၃၂ နှစ်အရွယ်ရှိ ကတ်စမဲရိုးက မာဘယ်လာအသင်းမှာ ရင်းနှီးမြှုပ်နှံခွင့်ရတဲ့အတွက် ဂုဏ်ယူမိပြီး အသင်း နဲ့အတူ အမြင့်ဆုံးအဆင့်ကို ရောက်ရှိဖို့အတွက် အိပ်မက်အကြီးကြီး မက်ကြမယ်လို့ ပြောခဲ့တာ ဖြစ်ပါတယ်။

ကတ်စမဲရိုးဟာ သူ့ရဲ့ကလပ် ယူနိုက်တက်အသင်းနဲ့ ခက်ခဲတဲ့ ရာသီတစ်ခုကို ဖြတ်သန်းခဲ့ရပြီးနောက် မာဘယ်လာ အသင်းမှာ ရင်းနှီးမြှုပ်နှံမှု ပြုလုပ်ခဲ့တာပါ။ 

ကတ်စမဲရိုးကို တွေ့ရစဉ် 

၂၀၂၂ ခုနှစ်နွေရာသီက ရီးရယ်လ်အသင်းကနေ ရောက်ရှိလာခဲ့တဲ့ ကတ်စမဲရိုးဟာ ယူနိုက်တက်အသင်းအတွက် ပွဲဦးထွက်ရာသီမှာ ခြေစွမ်းပြသနိုင်ခဲ့ပြီး ကာရာဘောင်းဖလား ရယူနိုင်ခဲ့သလို ချန်ပီယံလိဂ်ဝင်ခွင့်ရရှိအောင် ကူညီပေးခဲ့ပါတယ်။ 

ဒီရာသီမှာတော့ ကတ်စမဲရိုးဟာ ဒဏ်ရာတွေကြောင့် ခြေစွမ်းပြသနိုင်ဖို့ ရုန်းကန်ခဲ့ရပြီး မန်စီးတီးအသင်းကို အနိုင် ရခဲ့တဲ့ FA ဖလားဗိုလ်လုပွဲမှာ ယူနိုက်တက်အသင်းအတွက် ပါဝင်ခွင့်မရခဲ့ပါဘူး။ 

ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်ရဲ့ INEOS အဖွဲ့အစည်းဟာ အသင်းရဲ့ ကစားသမား အများအပြားကို နွေရာသီမှာ ရောင်းချဖို့ လုပ်ဆောင်နေပြီး ဒီထဲမှာ ကတ်စမဲရိုးလည်း ပါဝင်နေတာပါ။ 

ကတ်စမဲရိုးဟာ ယူနိုက်တက်အသင်းမှာ တစ်ပတ်လုပ်ခပေါင် ၃၅၀,၀၀၀ ရရှိနေပြီး စာချုပ်သက်တမ်းက ၂ နှစ် ကျန်ရှိနေသေးတာ ဖြစ်ပါတယ်။ 

ကတ်စမဲရိုးကို ခေါ်ယူဖို့ သူ့ရဲ့ အသင်းဖော်ဟောင်း ရော်နယ်ဒိုရှိတဲ့ အယ်လ်နာဆာအသင်းက စိတ်ဝင်စား နေတာပါ။

ရော်နယ်ဒို ကိုယ်တိုင်ကလည်း ကတ်စမဲရိုး အပါအဝင် သူ့ရဲ့ အသင်းဖော်ဟောင်း အချို့ကို ပြန်လည်ခေါ်ယူကာ အယ်လ်နာဆာအသင်း အောင်မြင်မှုတွေ ရယူနိုင်အောင် လုပ်ဆောင်ချင်နေတာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဇွန်လ ၅

ဆားဘီးယားတင်းနစ်သမား ဂျိုကိုဗစ်ဟာ ဒူးဒဏ်ရာကြောင့် ကွာတားဖိုင်နယ်ပွဲစဉ် မယှဉ်ပြိုင်ခင် ပြင်သစ်အိုးပန်း ပြိုင်ပွဲက နုတ်ထွက်ခဲ့ပါတယ်။

ဂျိုကိုဗစ်ဟာ စတုတ္ထအဆင့် ပွဲစဉ်ဖြစ်တဲ့ အာဂျင်တီးနား တင်းနစ်သမား ဆီရန်ဒိုလိုကို အနိုင်ရတဲ့ပွဲအပြီးမှာ ဒဏ်ရာ ခံစားခဲ့ရတာကြောင့် ပြင်သစ်အိုးပန်းပြိုင်ပွဲရဲ့ မြေစေးကွင်းကို အပြစ်တင်မှုတွေ ပြုလုပ်ခဲ့တာပါ။ 

ဂျိုကိုဗစ်ဟာ သူ့ရဲ့ဒဏ်ရာ အခြေအနေကို စကန်ဖတ်စစ်ဆေးမှုတွေ ပြုလုပ်အပြီးမှာ ပြင်သစ်အိုးပန်း ဂရမ်းဆလမ်း ပြိုင်ပွဲက နုတ်ထွက်တယ်လို့ ကြေညာခဲ့တာ ဖြစ်ပါတယ်။

ဂျိုကိုဗစ်က “ပြိုင်ပွဲက နုတ်ထွက်ကြောင်း ကြေညာရတာကို အလွန်စိတ်မကောင်း ဖြစ်မိပါတယ်။ သေချာစဉ်းစား တိုင်ပင်ဆွေးနွေးပြီးနောက် ကျနော်နဲ့ အသင်းဟာ ခက်ခဲတဲ့ဆုံးဖြတ်ချက်ကို ချခဲ့ရတာ”လို့ ပြောခဲ့တာပါ။

 ဂျိုကိုဗစ် ဒဏ်ရာရသွားစဉ်

ဂျိုကိုဗစ်ပြိုင်ပွဲက နုတ်ထွက်ခဲ့တာကြောင့် သူနဲ့ ကွာတားဖိုင်နယ်ပွဲစဉ်မှာ ယှဉ်ပြိုင်ရမယ့် နော်ဝေတင်းနစ်သမား ကတ်စပါရုဒ်ဟာ အလိုအလျောက် ဆီမီးဖိုင်နယ်ကို တက်ရောက်သွားခဲ့ပါတယ်။

ဂျိုကိုဗစ်ဟာ ပြင်သစ်အိုးပန်းပြိုင်ပွဲမှာ လက်ရှိ ချန်ပီယံဖြစ်တာကြောင့် ချန်ပီယံဆု ကာကွယ်နိုင်မယ့် အခွင့်အရေး လက်လွှတ်ခဲ့ရသလို ဂရမ်းဆလမ်းဆုဖလား ၂၅ ကြိမ်မြောက် ရယူနိုင်မယ့် မျှော်လင့်ချက်ကိုလည်း အဆုံးသတ်ခဲ့ ရတာပါ။

ပြင်သစ်အိုးပန်းပြိုင်ပွဲအပြီးမှာ ဂျိုကိုဗစ်ဟာ ကမ္ဘာ့အဆင့် ၁ နေရာကို ဆုံးရှုံးရမှာဖြစ်ပြီး သူ့ရဲ့နေရာကို အီတလီ တင်းနစ်သမား ဂျန်နစ်စင်နာက အစားထိုး ရယူသွားမယ်လို့ သိရပါတယ်။ 

ဂျိုကိုဗစ်ဟာ ပြင်သစ်အိုးပန်းပြိုင်ပွဲက ထွက်ခွာခဲ့ရပြီးနောက် ချန်ပီယံဆု ၇ ကြိမ်အထိ ရယူထားတဲ့ ဝင်ဘယ်လ်ဒန် အိုးပန်းပြိုင်ပွဲမှာ ကြံ့ခိုင်မှုအပြည့်နဲ့ ပါဝင်ယှဉ်ပြိုင်နိုင်ဖို့ မျှော်လင့်နေတာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၅

မန်စီးတီးအသင်း ကွင်းလယ်လူ ဒီဘရိုင်းက မယုံနိုင်ဖွယ်ရာ ငွေကြေးပမာဏနဲ့ ကမ်းလှမ်းမှုတွေကြောင့် ဆော်ဒီပရိုလိဂ်ကို ပြောင်းရွှေ့နိုင်တယ်လို့ ပြောခဲ့ပါတယ်။

ဒီဘရိုင်းက “ကျနော့်ရဲ့ အသက်အရွယ်အရ အရာအားလုံးကို လမ်းဖွင့်ထားရပါမယ်။ ကျနော့်ရဲ့ ကစားသမားဘဝ အဆုံးသတ်ဖို့ ရောက်လာတဲ့အချိန်မှာ မယုံနိုင်ဖွယ်ရာ ငွေကြေးပမာဏအကြောင်းကို ပြောနေကြတာပါ။ ဒီအကြောင်းကို စဉ်းစားရမှာပါ။ ကျနော်အဲ့ဒီမှာ ၂ နှစ်လောက်ကစားရင် မယုံနိုင်လောက်တဲ့ ငွေကြေးပမာဏကို ရရှိမှာဖြစ်ပါတယ်။ ဒီမတိုင်ခင် ၁၅ နှစ်ကြာ ဘောလုံးကစားခဲ့ပေမယ့် ဆော်ဒီမှာ ၂ နှစ် ကစားရင်ရမယ့် ပမာဏကို မရရှိသေးပါဘူး။ အဲဒါကြောင့် ဒါကို စဉ်းစားရမှာပါ”လို့ ဘယ်လ်ဂျီယံသတင်းစာ HLN နဲ့ အင်တာဗျူးမှာ ပြောခဲ့ပါ တယ်။

မန်စီးတီးအသင်းနဲ့ စာချုပ်တစ်နှစ်ပဲ ကျန်ရှိတော့တဲ့ ဒီဘရိုင်းဟာ ဆော်ဒီပရိုလိဂ် ကလပ်အသင်းတွေရဲ့ ချိတ်ဆက် မှုတွေကို ခံနေရတာ ဖြစ်ပါတယ်။

ဒီဘရိုင်းရဲ့ ကိုယ်စားလှယ်တွေဟာ ပြီးခဲ့တဲ့လက ၃ ရက်အတွင်း ဆော်ဒီကလပ် ၁၀ သင်းဆီ သွားရောက်ခဲ့တယ်လို့ သတင်းရင်းမြစ်တစ်ခုက ESPN ကို ပြောခဲ့တာပါ။

ဒီဘရိုင်းကို တွေ့ရစဉ်

 ဘယ်လ်ဂျီယံ ကစားသမား ကိုယ်တိုင်ကလည်း ဆော်ဒီလိဂ်ရဲ့ မက်လောက်စရာ ငွေကြေးကမ်းလှမ်းမှုတွေဟာ သူ့ကို သွားရောက်ကစားစေဖို့ ဆွဲဆောင်နေတယ်လို့ ဝန်ခံခဲ့ပါတယ်။

၂၀၁၅ ခုနှစ်ကတည်းက မန်စီးတီးအသင်းမှာ ရှိနေခဲ့တဲ့ ဒီဘရိုင်းဟာ အသင်းနဲ့ ပရီးမီးယားလိဂ်ဖလား ၆ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အများအပြား ရယူထားနိုင်ခဲ့တာပါ။ 

မေဂျာလိဂ် ကလပ်အသင်းအချို့ရဲ့ ချိတ်ဆက်မှုတွေ ခံနေရတဲ့ ဒီဘရိုင်းက အပြောင်းအရွှေ့တွေကို စတင်စဉ်းစားရ မယ့် အချိန်ရောက်ပြီလို့လည်း ပြောခဲ့ပါတယ်။

အသက် ၃၂ နှစ်အရွယ်ရှိ ဒီဘရိုင်းဟာ လက်ရှိအချိန်မှာ ယူရိုပြိုင်ပွဲဝင်မယ့် ဘယ်လ်ဂျီယံအသင်းနဲ့အတူ ပြင်ဆင်နေ တာကြောင့် ပြိုင်ပွဲအပြီးမှ အပြောင်းအရွှေ့ကို ဆုံးဖြတ်ဖို့ရှိနေတာပါ။

ဒီဘရိုင်း ဦးဆောင်မယ့် ဘယ်လ်ဂျီယံအသင်းဟာ ယူရို ၂၀၂၄ ပြိုင်ပွဲမှာ ဆလိုဗက်ကီးယား၊ ရိုမေးနီးယား၊ ယူကရိန်း အသင်းတို့နဲ့ တစ်အုပ်စုတည်း ကျရောက်နေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၅

ဘာစီလိုနာအသင်းဥက္ကဋ္ဌ လာပေါ်တာက နည်းပြဟောင်း ဇာဗီဟာ အသင်းရဲ့ လူစာရင်းအပေါ် သံသယရှိတာတွေ ကို ထုတ်ဖော်ခဲ့တာကြောင့် သူ့ကို ထုတ်ပယ်ဖို့ ဆုံးဖြတ်ခဲ့တာလို့ ပြောခဲ့ပါတယ်။

လာပေါ်တာက “ဇာဗီဟာ အလုပ်ကို ကောင်းမွန်စွာ လုပ်နိုင်ခဲ့ပြီး အခက်အခဲဆုံးအချိန်မှာ အသင်းကို ကိုင်တွယ်ခဲ့ ကာ မနှစ်ကရာသီမှာ ဆုဖလားတွေ ရခဲ့ပေမယ့် ဒီနှစ်မှာတော့ အဆင်မပြေတဲ့ အရာတွေရှိခဲ့ပါတယ်။ သူ ဆုံးဖြတ်ချက် ပြန်ပြောင်းတဲ့အချိန်က အသင်းအပေါ် ယုံကြည်မှုရှိလားလို့ ကျနော်မေးခဲ့တဲ့ အချိန်မှာ ယုံကြည် တယ်လို့ သူပြောခဲ့ပါတယ်။ နောက်ပိုင်းမှာတော့ သူ့ဆီကနေ ပြောင်းလဲခဲ့တဲ့ မှတ်ချက်တွေ ထွက်ပေါ်ခဲ့ပါတယ်။ အဲဒါကြောင့် အခြေအနေတွေကို ပြန်စဉ်းစားဖို့ တွန်းအားပေးခဲ့ပြီး အသင်းအတွက် ပိုကောင်းမယ့်အရာကို လုပ်ခဲ့ရ တာ”လို့ ပြောပါတယ်။

ဇာဗီဟာ ၂၀၂၁ ခုနှစ်၊နိုဝင်ဘာလမှာ နည်းပြဟောင်း ရော်နယ်လ်ကိုးမန်းရဲ့ နေရာကို အစားထိုး ဝင်ရောက်ပြီး အသင်းဟောင်း ဘာစီလိုနာအသင်းကို နည်းပြအဖြစ် ကိုင်တွယ်ဖို့ ပြန်လည်ရောက်ရှိလာခဲ့တာ ဖြစ်ပါတယ်။ 

ဇာဗီဟာ ဘာစီလိုနာအသင်းကို ၂၀၂၂-၂၃ ရာသီက စပိန်လာလီဂါနဲ့ စူပါဖလားတို့ကို ရယူပေးနိုင်ခဲ့တာပါ။ 

 ဘာစီလိုနာအသင်း လေ့ကျင့်ခန်းဆင်းနေစဉ်

ဇာဗီဟာ ဒီရာသီမှာ အသင်းရဲ့ ရလဒ်ဆိုးတွေကြောင့် ရာသီအကုန်မှာ ထွက်ခွာမယ်လို့ ကြေညာခဲ့ပေမယ့် ဒီနောက်ပိုင်း အသင်းရဲ့ ရလဒ်တွေ ပြန်ကောင်းမွန်လာမှုကြောင့် လာပေါ်တာဟာ သူ့ကို အသင်းမှာ ဆက်ပြီးရှိစေဖို့ ကြိုးစားခဲ့တာ ဖြစ်ပါတယ်။ 

အဲဒါကြောင့် ဇာဗီဟာ သူ့ရဲ့ဆုံးဖြတ်ချက်ကို ပြန်ပြောင်းပြီး စာချုပ်ကုန်ဆုံးမယ့် လာမယ့်ရာသီအကုန်ထိ ဘာစီလိုနာအသင်းကို ကိုင်တွယ်မယ်လို့ ကြေညာခဲ့တာပါ။

ဒါပေမယ့် ဇာဗီဟာ အသင်းရဲ့ ဘဏ္ဍာရေး အခြေအနေတွေကို ပြောခဲ့တာကြောင့် လာပေါ်တာနဲ့ ဘာစီလိုနာ အသင်း ဘုတ်အဖွဲ့ဟာ သူ့ကို ဒေါသထွက်ပြီး ထုတ်ပယ်ဖို့ ဆုံးဖြတ်ခဲ့တာ ဖြစ်ပါတယ်။ 

ဘာစီလိုနာအသင်းဟာ အသင်းရဲ့ ဂန္ထဝင်တွေဖြစ်တဲ့ ဇာဗီ၊ ရော်နယ်လ်ကိုးမန်းနဲ့ မက်ဆီတို့ကို ပြုမူဆက်ဆံပုံတွေနဲ့ ပတ်သက်ပြီး ဝေဖန်မှုတွေ ခံခဲ့ရတာပါ။ 

ကတ်တလန်ကလပ်ဟာ ထုတ်ပယ်ခဲ့တဲ့ ဇာဗီရဲ့ နေရာမှာ ဘိုင်ယန်မြူးနစ်အသင်း နည်းပြဟောင်း ဟန်ဆီဖလစ်ကို နည်းပြသစ်အဖြစ် ခန့်အပ်ခဲ့ပါတယ်။

ဘာစီလိုနာအသင်းဥက္ကဋ္ဌ လာပေါ်တာက နည်းပြသစ် ဟန်ဆီဖလစ်ကတော့ လက်ရှိလူစာရင်းနဲ့ အသင်းအောင်မြင် မှု ရယူနိုင်တယ်လို့ ခံစားရကြောင်း ပြောခဲ့တာပါ။

ဘာစီလိုနာအသင်းဟာ ပြီးခဲ့တဲ့ရာသီက လာလီဂါပြိုင်ပွဲမှာ အဆင့် ၂ ၊ ချန်ပီယံလိဂ်ပြိုင်ပွဲမှာ ကွာတားဖိုင်နယ်က ထွက်ခွာခဲ့ရပြီး ဆုဖလားလက်မဲ့နဲ့ ရာသီအဆုံးသတ်ခဲ့ရတာ ဖြစ်ပါတယ်။ 

Source: CNA

CNI Sport News

၂၀၂၄ ခုနှစ်၊ ဇွန်လ ၄

ဖီနာဘာချီအသင်း နည်းပြသစ်ဖြစ်လာတဲ့ မော်ရင်ဟိုက အသင်းဟောင်း ရိုးမားအသင်းက ကစားသမားတွေကို ခေါ်ယူသွားမှာ မဟုတ်ဘူးလို့ ပြောလိုက်ပါတယ်။

မော်ရင်ဟိုက “ကျနော့်ရဲ့ ကစားသမားဟောင်းတွေ၊ အသင်းဟောင်းတွေအကြောင်း ပြောနေကြတာတွေ ရှိပါတယ်။ ကျနော့်ရဲ့ စကားတွေနဲ့ ၁၀၀ ရာခိုင်နှုန်းဖြစ်အောင် လုပ်ချင်ပါတယ်။ ကျနော်ဟာ ရိုးမားအသင်းမှာရှိတဲ့ ဘယ်ကစားသမားကိုမှ ခေါ်ယူဖို့ စိတ်ဝင်စားခြင်း မရှိပါဘူး။ လုံးဝကို စိတ်ဝင်စားမှု မရှိတာပါ”လို့ ဖီနာဘာချီ အသင်းနည်းပြအဖြစ် ပထမဆုံးအကြိမ်ပြုလုပ်တဲ့ သတင်းစာရှင်းလင်းပွဲမှာ ပြောခဲ့တာပါ။

မော်ရင်ဟိုဟာ ပြီးခဲ့တဲ့ရက်ပိုင်းက ဖီနာဘာချီအသင်း နည်းပြသစ်အဖြစ် ပရိသတ်ထောင်ပေါင်းများစွာအရှေ့မှာ မိတ်ဆက်မှု ခံယူခဲ့ပြီးဖြစ်ပါတယ်။ 

ပေါ်တူဂီလူမျိုးနည်းပြဟာ ဖီနာဘာချီအသင်း အောင်မြင်မှုတွေ ပြန်လည်ရရှိအောင် ကစားသမားသစ်တွေခေါ်ယူဖို့ ပြင်ဆင်နေတာပါ။

ဒီအချိန်မှာ မော်ရင်ဟိုဟာ ရိုးမားအသင်းရဲ့ ကစားသမားတွေဖြစ်တဲ့ လူကာကူနဲ့ ဒိုင်ဘားလားတို့ကို ဖီနာဘာချီ အသင်းအတွက် ခေါ်ယူဖို့ ပစ်မှတ်ထားနေတယ်လို့ သတင်းတွေ ထွက်ပေါ်လာခဲ့တာ ဖြစ်ပါတယ်။

 မော်ရင်ဟိုကို တွေ့ရစဉ်

မော်ရင်ဟိုဟာ ရိုးမားအသင်းကို ကိုင်တွယ်နေတဲ့အချိန်မှာ ဒီကစားသမား ၂ ဦးစလုံးကို ခေါ်ယူခဲ့တာပါ။

ဒါပေမယ့် မော်ရင်ဟိုက ရိုးမားအသင်းမှာရှိတဲ့ ကစားသမားတွေကို ဖီနာဘာချီအသင်းအတွက် ခေါ်ယူသွားမှာ မဟုတ်ဘူးလို့ ပြောခဲ့တာ ဖြစ်ပါတယ်။ 

မော်ရင်ဟိုဟာ လူကာကူနဲ့ ရိုးမားအသင်းအပြင် ယူနိုက်တက်၊ ချယ်လ်ဆီးအသင်းတွေမှာလည်း အတူလက်တွဲ ခဲ့တာပါ။ 

လူကာကူဟာ ရိုးမားအသင်းနဲ့ အငှားစာချုပ် ကုန်ဆုံးချိန်မှာ ချယ်လ်ဆီးအသင်းထံ ပြန်ရမှာဖြစ်ပြီး လန်ဒန်ကလပ် က သူ့ကို အပြီးသတ် ရောင်းချဖို့ ရှိနေပါတယ်။

မော်ရင်ဟိုဟာ ဖီနာဘာချီအသင်းကို ၁၀ နှစ်ကျော်ကြာ ဝေးကွာနေတဲ့ တူရကီစူပါလိဂ်ဖလား ရယူပေးဖို့ အဓိက ပစ်မှတ်အဖြစ် သတ်မှတ်ထားတယ်လို့ သတင်းစာ ရှင်းလင်းပွဲမှာ ပြောခဲ့တာပါ။ 

ဖီနာဘာချီအသင်းဟာ ပြီးခဲ့တဲ့ရာသီက တူရကီစူပါလိဂ်ပြိုင်ပွဲမှာ ချန်ပီယံ ဂါလာတာစာရေး အသင်းရဲ့နောက် အဆင့် ၂ နေရာမှာသာ ရပ်တည်နိုင်ခဲ့တာ ဖြစ်ပါတယ်။

Source: Metro

CNI Sport News

၂၀၂၄ ခုနှစ်၊ ဇွန်လ ၄

ပေါ်တူဂီအသင်းခေါင်းဆောင် ရော်နယ်ဒိုဟာ ယူနိုက်တက် အသင်းဖော်ဟောင်းဖြစ်ခဲ့တဲ့ ဂိုးသမား ဒီဂီယာကို ခေါ်ယူဖို့ အယ်လ်နာဆာအသင်းကို တိုက်တွန်းမှု ပြုလုပ်သွားခဲ့ပါတယ်။

အယ်လ်နာဆာအသင်း ဂိုးသမား အော့စပီနာဟာ ရာသီသစ်မတိုင်ခင် ထွက်ခွာဖို့ရှိနေတာကြောင့် ဆော်ဒီကလပ် ဟာ ဂိုးသမားအသစ်တစ်ဦး ရှာဖွေနေတာပါ။ 

ဒီအချိန်မှာ ရော်နယ်ဒိုက ဒီဂီယာကို ခေါ်ယူဖို့ အကြံပြုခဲ့တာကြောင့် အယ်လ်နာဆာအသင်း အကြီးအကဲတွေဟာ စပိန်ဂိုးသမားဟောင်းကို စိတ်ဝင်စားနေတယ်လို့ TBR Football က ဖော်ပြခဲ့ပါတယ်။ 

ဒီဂီယာဟာ ယူနိုက်တက်အသင်းက ထွက်ခွာပြီးနောက် ပြီးခဲ့တဲ့တစ်ရာသီလုံး အသင်းလက်မဲ့အဖြစ် ရှိနေခဲ့တာပါ။

ဒီဂီယာဟာ ပြီးခဲ့တဲ့ ရက်သတ္တပတ်တွေအတွင်းမှာ လေ့ကျင့်မှုတွေ ပြုလုပ်နေတဲ့ ရုပ်သံမှတ်တမ်းတွေကို သူ့ရဲ့ ဆိုရှယ်မီဒီယာပေါ်မှာ တင်ခဲ့ပြီး ကစားပွဲတွေထဲကို ပြန်လည်ဝင်ရောက်ချင်ကြောင်း ပြသခဲ့တာဖြစ်ပါတယ်။ 

ဒါပေမယ့် ဒီဂီယာဟာ ပြီးခဲ့တဲ့ရာသီက ဆော်ဒီကလပ်အသင်းတွေရဲ့ ကမ်းလှမ်းမှုကို စိတ်မဝင်စားခဲ့တာကြောင့် အယ်လ်နာဆာအသင်းကသာ ကမ်းလှမ်းမှုပြုလုပ်ရင် လက်ခံမလားဆိုတာ စဉ်းစားစရာအဖြစ် ရှိနေတာပါ။ 

ကတ်စမဲရိုးနဲ့ နာချိုကိုတွေ့ရစဉ်

ဒီဂီယာဟာ စပိန်ကလပ်အသင်းတွေမှာ ပြန်ပြီးကစားချင်နေပေမယ့် လာမယ့်ရာသီမှာ အသင်းသစ် ရရှိနိုင်ဖို့ဆိုရင် ဆုံးဖြတ်ချက်တစ်ခုကို အမြန်ဆုံးချမှတ်နိုင်ဖို့ လိုအပ်နေတာဖြစ်ပါတယ်။

ရော်နယ်ဒိုဟာ လာမယ့်ရာသီ အယ်လ်နာဆာအသင်းနဲ့အတူ အောင်မြင်မှု ရယူချင်နေတာကြောင့် ဒီဂီယာ အပါအဝင် အသင်းဖော်ဟောင်းအချို့ကို ခေါ်ယူနိုင်ဖို့ ကြိုးစားနေတာပါ။ 

ရော်နယ်ဒိုဟာ ရီးရယ်လ်နဲ့ ယူနိုက်တက်အသင်းမှာ အတူတွဲကစားခဲ့တဲ့ ကတ်စမဲရိုး၊ ရီးရယ်လ်အသင်းဖော်ဟောင်း နာချိုတို့ကို အယ်လ်နာဆာအသင်းထံ လာရောက်စေချင်နေတာ ဖြစ်ပါတယ်။ 

အယ်လ်နာဆာအသင်းဟာ ပြီးခဲ့တဲ့ရာသီက ဆော်ဒီပရိုလိဂ်၊ စူပါဖလားနဲ့ ဘုရင့်ဖလားတို့မှာ အယ်လ်ဟီလယ် အသင်းကို အရေးနိမ့်ခဲ့တာပါ။

အဲဒါကြောင့် ရော်နယ်ဒိုဟာ လာမယ့်ရာသီ အယ်လ်ဟီလယ်အသင်းနဲ့ ယှဉ်ပြိုင်နိုင်ဖို့အတွက် အယ်လ်နာဆာ အသင်း လူစာရင်းကို တောင့်တင်းအောင် လုပ်ဆောင်စေချင်နေတာ ဖြစ်ပါတယ်။

Source: Goal