CNI Sport News

၂၀၂၄ ခုနှစ်၊ ဇွန်လ ၂၁

စပိန်အသင်းနည်းပြ ဒယ်လာဖွန်အန်တေက အီတလီအသင်းကို အနိုင်ရကာ ယူရို ၂၀၂၄ ပြိုင်ပွဲမှာ သူတို့အသင်း နောက်တစ်ဆင့် တက်နိုင်ခဲ့ပြီးနောက် စပိန်အသင်းထက် ပိုကောင်းတဲ့ အသင်းမရှိဘူးလို့ ပြောလိုက်ပါတယ်။

ဒယ်လာဖွန်အန်တေက “ဒါက အနိုင်ရရုံတင် မဟုတ်ဘဲ လက်ရှိ ဥရောပချန်ပီယံနဲ့ ယှဉ်ပြိုင်ခဲ့ရတဲ့ ပုံစံပါ။ ကျနော်တို့ဟာ အီတလီအသင်းကို လွှမ်းမိုးထားနိုင်ခဲ့ပြီး ကျနော်တို့ရခဲ့တဲ့ အခွင့်အရေးနဲ့ ဒီထက်ပိုပြီး အနိုင်ရ ခဲ့သင့်တာပါ။ စပိန်အသင်းထက် ပိုကောင်းတဲ့အသင်း မရှိပေမယ့် ကျနော်တို့က သတိရှိရမှာဖြစ်ပြီး လွယ်ကူမှာ မဟုတ်ပါဘူး။ စပိန်အသင်းဟာ ကမ္ဘာ့အကောင်းဆုံး ဘောလုံးအသင်းဖြစ်ပေမယ့် ကျနော်တို့ ဘာမှမလုပ်ရသေး ဘူးဆိုတာ သိပါတယ်”လို့ ပြောခဲ့တာပါ။

ယူရို ၂၀၂၄ ပြိုင်ပွဲအုပ်စု ဒုတိယပွဲစဉ်အဖြစ် ကစားခဲ့တဲ့ ပွဲစဉ်မှာ စပိန်အသင်းက လက်ရှိချန်ပီယံ အီတလီအသင်းကို ၁ ဂိုး- ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။ 

စပိန်အသင်းဟာ ဒီနိုင်ပွဲကြောင့် အုပ်စုပွဲစဉ် ၂ ပွဲကစားအပြီးမှာ ၂ ပွဲစလုံး အနိုင်နဲ့ ၁၆ သင်းအဆင့်ကို တက်နိုင်ခဲ့ တာပါ။ 

စပိန်အသင်းဟာ ဒီပွဲစဉ်မှာ အီတလီအသင်းဘက်ကို ဂိုးပေါက်ကန်သွင်းမှုအကြိမ် ၂၀ အထိပြုလုပ်နိုင်ခဲ့ပြီး ဂိုးပေါက်တည့်မှု ၉ ကြိမ်အထိ ရှိခဲ့ပါတယ်။ 

စပိန်အသင်းကို တွေ့ရစဉ်

အီတလီအသင်းကတော့ ဂိုးပေါက်ကန်သွင်းမှု ၄ ကြိမ်နဲ့ ဂိုးပေါက်တည့်မှု ၁ ကြိမ်သာရှိခဲ့တာပါ။

အီတလီအသင်းကို အနိုင်ရခဲ့တဲ့ပွဲမှာ စပိန်အသင်းအတွက် အကောင်းဆုံး ခြေစွမ်းပြသနိုင်ခဲ့တဲ့ နီကိုဝီလီယံစ်ဟာ ဒီပွဲစဉ်ရဲ့ အကောင်းဆုံးကစားသမားအဖြစ် UEFA က ချီးမြှင့်တဲ့ဆုကို ရရှိခဲ့ပါတယ်။ 

အီတလီအသင်းနည်းပြ စပယ်လက်တီက စပိန်အသင်းအတွက် ထိုက်တန်တဲ့ရလဒ်ဖြစ်ပြီး သူတို့ဟာ ဒီပွဲစဉ်မှာ အသင်းတစ်သင်းအနေနဲ့ ကောင်းမွန်စွာ မလုပ်နိုင်ခဲ့ဘူးလို့ ပြောခဲ့ပါတယ်။ 

အီတလီအသင်းဟာ စပိန်အသင်းကို အရေးနိမ့်ခဲ့တာကြောင့် နောက်တစ်ဆင့် တက်ဖို့အတွက် အုပ်စုနောက်ဆုံး ပွဲစဉ်ဖြစ်တဲ့ ခရိုအေးရှားအသင်းနဲ့ ပွဲစဉ်မှာ ရလဒ်ကောင်း ရယူနိုင်ဖို့ လိုအပ်နေတာပါ။

ယူရို ၂၀၂၄ ပြိုင်ပွဲအုပ်စု B ပွဲစဉ် ၂ ပွဲ ကစားအပြီးမှာ စပိန်အသင်းက ၆ မှတ်နဲ့ ပထမ၊ အီတလီအသင်းက ၃ မှတ်နဲ့ ဒုတိယ၊ အယ်လ်ဘေးနီးယားအသင်းနဲ့ ခရိုအေးရှားအသင်းတို့ဟာ ၁ မှတ်စီနဲ့ တတိယ၊ စတုတ္ထနေရာတွေမှာ ရပ်တည်နေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၂၁

အင်္ဂလန်အသင်းဟာ ယူရို ၂၀၂၄ ချန်ပီယံ မျှော်လင့်ချက်တွေနဲ့ ရုန်းကန်နေရတယ်လို့ နည်းပြ ဆောက်ဂိတ်က ဒိန်းမတ်အသင်းနဲ့ ၁ ဂိုးစီ သရေကျခဲ့တဲ့ပွဲအပြီးမှာ ပြောခဲ့ပါတယ်။

ဆောက်ဂိတ်က “ကျနော်တို့ရဲ့အဆင့် ပိုပြီးမြင့်ရမယ်ဆိုတာ သိပါတယ်။ အကြီးမားဆုံးအရာက ကျနော်တို့ ရောက်နေတဲ့ ပတ်ဝန်းကျင်နဲ့ ဒီမှာရှိတဲ့ မျှော်လင့်ချက်တွေကို လက်ခံဖို့ပါ။ ဒီစိန်ခေါ်မှုတွေကို ကျနော်တို့ လျှောက်လှမ်းရမှာပါ။ အခုအချိန်မှာ ကျနော်တို့ဟာ အနည်းငယ် လွဲချော်မှုတွေရှိနေပြီး ဒီရလဒ်တွေအတွက် ကျနော့်မှာ တာဝန်ရှိပါတယ်။ ကျနော်တို့ကစားပုံကို စိတ်ပျက်တယ်ဆိုတာ နားလည်ပြီး ပိုကောင်းအောင် လုပ်နိုင်တယ်ဆိုတာ ပြသသွားမှာပါ”လို့ ပြောခဲ့တာပါ။

အင်္ဂလန်အသင်းဟာ ယူရို ၂၀၂၄ ပြိုင်ပွဲ အုပ်စုဒုတိယပွဲစဉ်မှာ ဟာရီကိန်းရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် ဒိန်းမတ်အသင်းကို ချေပဂိုး ပြန်ပေးခဲ့ရတာကြောင့် ရမှတ်ခွဲဝေယူခဲ့ရတာ ဖြစ်ပါတယ်။ 

အင်္ဂလန်အသင်းဟာ ဒီပွဲရလဒ်ကြောင့် အုပ်စုတွင်း ၂ ပွဲ ကစားအပြီးမှာ ရမှတ် ၄ မှတ်နဲ့ ထိပ်ဆုံးနေရာမှာ ရပ်တည် နေပေမယ့် အသင်းပရိသတ် အများအပြားရဲ့ လှောင်ပြောင်မှုကို ခံခဲ့ရတာပါ။

အင်္ဂလန်အသင်း ယူရိုပြိုင်ပွဲ ယှဉ်ပြိုင်နေစဉ်

အင်္ဂလန်အသင်းဟာ ပွဲစဉ် ၂ ပွဲ ကစားအပြီးမှာ ခြေစွမ်းပိုင်းက အထင်ကြီးစရာ မရှိတဲ့အတွက် ပရိသတ်တွေက စိတ်ပျက်နေတာ ဖြစ်ပါတယ်။

အင်္ဂလန်အသင်းခေါင်းဆောင် ဟာရီကိန်းက ဘောလုံးပြိုင်ပွဲတွေမှာ လွယ်ကူတဲ့ ပွဲတွေမရှိဘူးဆိုတာ ပြိုင်ပွဲမစခင် ပြောခဲ့တဲ့အတိုင်း ပြသနေတယ်လို့ ပြောခဲ့ပါတယ်။

ဟာရီကိန်းက “ဘောလုံးရှိတဲ့ အချိန်ရော မရှိတဲ့အချိန်မှာပါ ကျနော်တို့ ပိုကောင်းလာနိုင်ပါတယ်။ အသင်းကောင်း တစ်သင်းရဲ့ လက္ခဏာက ရလဒ်ဆိုပေမယ့် အကောင်းဆုံး မကစားနိုင်ခဲ့ပါဘူး။ နောက်တစ်ဆင့် တက်ဖို့က ကျနော်တို့ရဲ့ နံပါတ်တစ် ရည်မှန်းချက်ဖြစ်ပြီး တိုးတက်အောင်လုပ်နိုင်ပါတယ်။ နောက်ဆုံး ယူရိုပြိုင်ပွဲတုန်းက ကျနော်တို့ဟာ စကော့တလန်နဲ့ ဂိုးမရှိသရေကျခဲ့ပေမယ့် နောက်ဆုံးမှာ ဗိုလ်လုပွဲအထိ ရောက်ရှိခဲ့ပါတယ်”လို့ ပြောခဲ့တာပါ။

အင်္ဂလန်အသင်းဟာ ယူရိုအုပ်စု နောက်ဆုံးပွဲစဉ်အဖြစ် ဆလိုဗေးနီးယားအသင်းနဲ့ ယှဉ်ပြိုင်ရမှာဖြစ်ပြီး အနိမ့်ဆုံး သရေတစ်မှတ်ရယူနိုင်ရင် ၁၆ သင်းအဆင့်ကို တက်ရောက်နိုင်မှာဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၂၀

အက်စတွန်ဗီလာအသင်းဟာ နယ်သာလန်နောက်ခံလူ မတ်ဆန်ကို ခေါ်ယူဖို့ ချယ်လ်ဆီးအသင်းနဲ့ ပြောင်းရွှေ့ ကြေး သဘောတူညီမှု ရရှိခဲ့ပါတယ်။

အက်စတွန်ဗီလာအသင်းဟာ မတ်ဆန်အတွက် ချယ်လ်ဆီးအသင်းကို ပြောင်းရွှေ့ကြေး ပေါင်သန်း ၃၀ ကနေ ၄၀ ကြား ပေးချေရမှာဖြစ်ကာ ဆေးစစ်မှုတွေ ခံယူအပြီးမှာ ၆ နှစ် စာချုပ်ချုပ်ဆိုဖို့ ရှိနေတာပါ။ 

မတ်ဆန်ဟာ ပြီးခဲ့တဲ့ရာသီဝက်က ဒေါ့မွန်အသင်းမှာ အငှားသွားရောက် ကစားခဲ့ပြီး ခြေစွမ်းပြသနိုင်ခဲ့ကာ အသင်း ကို ချန်ပီယံလိဂ် ဗိုလ်လုပွဲ တက်နိုင်အောင် စွမ်းဆောင်ပေးနိုင်ခဲ့ပါတယ်။ 

အက်စတွန်ဗီလာအသင်းဟာ လာမယ့်ရာသီ ချန်ပီယံလိဂ်ပြိုင်ပွဲ ယှဉ်ပြိုင်ရမှာဖြစ်တာကြောင့် မတ်ဆန်ကို ခေါ်ယူနိုင်ဖို့ ကြိုးစားခဲ့တာပါ။

ချယ်လ်ဆီးအသင်းဟာ အပြောင်းအရွှေ့ အစိတ်အပိုင်းအဖြစ် အက်စတွန်ဗီလာအသင်း တိုက်စစ်မှူး ဒူရမ်ကို အလဲအလှယ်ပြုလုပ်ဖို့ ဆွေးနွေးခဲ့ပေမယ့် နောက်ဆုံးမှာ မတ်ဆန်ကို ရောင်းချဖို့ ဆုံးဖြတ်ခဲ့တာ ဖြစ်ပါတယ်။ 

ဒေါ့မွန်အသင်းဟာ အငှားကစားချိန်မှာ ခြေစွမ်းပြသနိုင်ခဲ့တဲ့ မတ်ဆန်ကို ခေါ်ယူဖို့ ကြိုးစားခဲ့ပေမယ့် ချယ်လ်ဆီး အသင်း လိုချင်နေတဲ့ ပြောင်းရွှေ့ကြေး ပေါင် ၃၅ သန်းကို အပြည့်အဝ ပေးချေဖို့ ဆန္ဒမရှိခဲ့တာပါ။ 

မတ်ဆန်ကို တွေ့ရစဉ်

ချယ်လ်ဆီးအသင်းဟာ ပြီးခဲ့တဲ့ ဇန်နဝါရီလက မတ်ဆန်ကို ၁ နှစ် စာချုပ်သက်တမ်း တိုးခဲ့ပေမယ့် ဒီစာချုပ်ထဲမှာ နွေရာသီထွက်ခွာခွင့်ပြုနိုင်တဲ့ စာချုပ်ဖျက်သိမ်းကြေး ပါဝင်နေတာဖြစ်ပါတယ်။

မတ်ဆန်ဟာ လက်ရှိအချိန်မှာတော့ ယူရို ၂၀၂၄ ပြိုင်ပွဲဝင် နယ်သာလန်အသင်းနဲ့အတူ ရှိနေတာကြောင့် အက်စတွန်ဗီလာအသင်းထံ ပြောင်းရွှေ့ဖို့ ဆေးစစ်မှုနဲ့ စာချုပ်ချုပ်ဆိုမှု ပြီးမြောက်ခြင်း မရှိသေးတာပါ။ 

ချယ်လ်ဆီးအသင်းဟာ မတ်ဆန်ကို ၂၀၁၉ ခုနှစ်က PSV အသင်းကနေ ခေါ်ယူခဲ့ပြီး ချာလ်တန်၊ ကိုဗင်ထရီ၊ ဘန်လေနဲ့ ဒေါ့မွန်အသင်းတွေထံ အငှားချခဲ့ပါတယ်။ 

မတ်ဆန်ဟာ ချယ်လ်ဆီးအသင်းအတွက် ၁၆ ပွဲသာ ပါဝင်ကစားခဲ့တာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၂၀

စီးရီးအေကလပ် လာဇီယိုအသင်းဟာ တိုက်စစ်မှူး ဂရင်းဝုဒ်ကို ပေါင်သန်း ၃၀ နဲ့ ခေါ်ယူဖို့ ယူနိုက်တက်အသင်းနဲ့ ဆွေးနွေးမှုတွေပြုလုပ်ခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။ 

လာဇီယိုအသင်းဟာ ပြီးခဲ့တဲ့ရာသီက ဂီတာဖေးအသင်းထံ အငှားနဲ့ သွားရောက်ကစားခဲ့တဲ့ ဂရင်းဝုဒ်ကို ခေါ်ယူဖို့ ကာလရှည်ကြာစိတ်ဝင်စားနေပြီး အခု နွေရာသီမှာ ယူနိုက်တက်အသင်းထံ ချဉ်းကပ်မှုတွေပြုလုပ်လာခဲ့တာပါ။ 

ဂရင်းဝုဒ်အတွက် ကနဦးပြောင်းရွှေ့ကြေး ပေါင်သန်း ၃၀ အပြင် စွမ်းဆောင်ရည်အပေါ်မူတည်ပြီး တိုးမြှင့်လာမယ့် ပြောင်းရွှေ့ကြေးအတွက် နှစ်သင်းကြားဆွေးနွေးမှုတွေဟာ ကောင်းမွန်နေတယ်လို့ သိရပါတယ်။ 

ဂရင်းဝုဒ်ကို လာဇီယိုအသင်းအပြင် စီးရီးအေကလပ်အသင်းတွေဖြစ်တဲ့ ဂျူဗင်တပ်စ်နဲ့ နာပိုလီအသင်းတို့ကလည်း စိတ်ဝင်စားနေကြတာပါ။ 

ဒါ့အပြင် ဂျာမနီ၊စပိန်နဲ့ ပေါ်တူဂီအသင်းတွေကလည်း ဂရင်းဝုဒ်ကို ခေါ်ယူဖို့စောင့်ကြည့် နေတာဖြစ်ပါတယ်။ 

လာဇီယိုအသင်းဟာ ပြီးခဲ့တဲ့နွေရာသီက ဂရင်းဝုဒ်ကို အငှားနဲ့ ခေါ်ယူဖို့ ကြိုးစားခဲ့ပေမယ့် နောက်ဆုံးမှာတော့ ကစားသမားဟာ ဂီတာဖေးအသင်းထံ အငှားနဲ့ ပြောင်းရွှေ့သွားခဲ့တာပါ။ 

ဂရင်းဝုဒ်ဟာ ဂီတာဖေးအသင်းမှာ ခြေစွမ်းပြသနိုင်ခဲ့ပြီး သူ့ရဲ့တိုးတက်မှုတွေကို မြင်တွေ့ခဲ့ရတာကြောင့် လာဇီယို အသင်းဟာ အပြီးသတ်ခေါ်ယူဖို့ ကြိုးပမ်းလာခဲ့တာဖြစ်ပါတယ်။ 

ဂရင်းဝုဒ်နဲ့ သူ့ရဲ့မိသားစုဟာ ဗြိတိန်အပြင်ဘက် မှာ သူတို့ရဲ့ဘဝကို ဆက်ပြီးဖြတ်သန်းချင်နေတာကြောင့် အခြားဥရောပကလပ်အသင်းတွေထံ ပြောင်းရွှေ့ချင်နေ တာပါ။ 

ဂရင်းဝုဒ်ဟာ ဂီတာဖေးအသင်းမှာ အငှားနဲ့ သွားရောက်ကစားချိန်က ၁၀ ဂိုးသွင်းယူပြီး ၆ ဂိုးဖန်တီးနိုင်ခဲ့ ကာ ကလပ်အသင်းရဲ့ တစ်ရာသီအကောင်းဆုံးကစားသမားဆုကို ရရှိခဲ့ပါတယ်။

ဂရင်းဝုဒ်နဲ့ ယူနိုက်တက်အသင်းတို့ချုပ်ဆိုထားတဲ့ စာချုပ်ဟာ ၂၀၂၅ ခုနှစ်ကျရင် ကုန်ဆုံးမှာဖြစ်ပေမယ့် အသင်းဘက်က သူ့ကို ၁ နှစ်သက်တမ်းတိုးဖို့ ရွေးချယ်ခွင့်ရှိနေတာဖြစ်ပါတယ်။

Source:DailyMail

CNI Sport News

၂၀၂၄ ခုနှစ်၊ ဇွန်လ ၂၀

အာဂျင်တီးနားအသင်း ခေါင်းဆောင် မက်ဆီက ၂၀၂၄ ကိုပါအမေရိကဖလားပြိုင်ပွဲမှာ ချန်ပီယံဆုကို သူတို့ရရှိဖို့ ရေပန်းစားတယ်ဆိုတာ ယုံကြည်တယ်လို့ ပြောလိုက်ပါတယ်။

မက်ဆီက “အာဂျင်တီးနားက ဗိုလ်စွဲဖို့ ရေပန်းစားတယ်ဆိုတာ ကျနော်အမြဲတမ်းပြောခဲ့ပြီး ကျနော်တို့ကလည်း အမြဲတမ်း အကောင်းဆုံးပုံစံ ရှိနေပါတယ်။ ကျနော်တို့ဟာ ကမ္ဘာ့ချန်ပီယံဖြစ်တဲ့အတွက် အကောင်းဆုံးဆိုတာ ပြောလို့ရပါတယ်။ ဒီလိုပြောပေမယ့် လမ်းလျှောက်ပြီး ကိုပါအမေရိကဖလားကို ကျနော်တို့ ရယူမယ်ဆိုပြီး ပြောချင်တာ မဟုတ်ပါဘူး”လို့ ပြောခဲ့တာပါ။

၂၀၂၁ ခုနှစ်က ကျင်းပခဲ့တဲ့ ကိုပါအမေရိကဖလားပြိုင်ပွဲမှာ ချန်ပီယံဆုရရှိထားတဲ့ အာဂျင်တီးနားအသင်းဟာ အခုနှစ် ကျင်းပမယ့်ပြိုင်ပွဲမှာ ချန်ပီယံဆုကို ကာကွယ်ဖို့ ယှဉ်ပြိုင်ရမှာ ဖြစ်ပါတယ်။ 

လက်ရှိချန်ပီယံ အာဂျင်တီးနားအသင်းဟာ ဒီပြိုင်ပွဲမှာ ဗိုလ်စွဲဖို့ ရေပန်းအစားဆုံး အသင်းအဖြစ် ထိပ်ဆုံးနေရာမှာ ရပ်တည်နေသလို အသင်းခေါင်းဆောင် မက်ဆီကလည်း သူတို့ဗိုလ်စွဲဖို့ ရေပန်းစားတယ်ဆိုတာ ယုံကြည် နေတာပါ။

အာဂျင်တီးနားအသင်းကို တွေ့ရစဉ်

အာဂျင်တီးနားအသင်းနည်းပြ စကာလိုနီက သူတို့ဟာ ခက်ခဲတဲ့ ကိုပါအမေရိကဖလား ချန်ပီယံဆုကို ကာကွယ်နိုင် ဖို့ မျှော်လင့်တယ်လို့ အဖွင့်ပွဲစဉ်မတိုင်ခင် ပြုလုပ်ခဲ့တဲ့ သတင်းစာ ရှင်းလင်းပွဲမှာ ပြောခဲ့ပါတယ်။

စကာလိုနီက “ကျနော်တို့ ကမ္ဘာ့ဖလားနဲ့ ကိုပါအမေရိကပြိုင်ပွဲမှာ ချန်ပီယံဖြစ်ခဲ့တာက ကောင်းပေမယ့် ဒါက ပြီးသွားပါပြီ။ ဘောလုံးပွဲတွေက ကွဲပြားပြီး အဖြစ်အပျက်တွေ အများကြီး ဖြစ်ပျက်နိုင်ပါတယ်။ ကိုပါအမေရိကဟာ အမြဲတမ်းခက်ခဲပေမယ့် ကျနော်တို့ အကောင်းဆုံး ပြင်ဆင်ထားပါတယ်”လို့ ပြောခဲ့တာပါ။

ကိုပါအမေရိကဖလားပြိုင်ပွဲမှာ ပီရူး၊ ချီလီ၊ ကနေဒါအသင်းတို့နဲ့ တစ်အုပ်စုတည်း ကျရောက်နေတဲ့ အာဂျင်တီးနား အသင်းဟာ အုပ်စုအဖွင့်ပွဲစဉ်အဖြစ် ဇွန်လ ၂၁ ရက် မနက်ပိုင်းမှာ ကနေဒါအသင်းနဲ့ ယှဉ်ပြိုင်ရမှာ ဖြစ်ပါတယ်။ 

Source: besoccer

CNI Sport News

၂၀၂၄ ခုနှစ်၊ ဇွန်လ ၂၀

ယူရို ၂၀၂၄ ပြိုင်ပွဲမှာ အိမ်ကွင်းပရိသတ်တွေ အိပ်မက်ဆက်မက်နေဖို့က ဂျာမနီရဲ့ အလုပ်ဖြစ်တယ်လို့ နည်းပြ နာဂျယ်လ်စမန်းက ဟန်ဂေရီအသင်းကို အနိုင်ရခဲ့တဲ့ အုပ်စုဒုတိယပွဲစဉ်အပြီးမှာ ပြောခဲ့ပါတယ်။

နာဂျယ်လ်စမန်းက “ကွင်းထဲမှာ အားပေးမှုတွေ အလွန်ကျယ်လောင်တာက ကောင်းမွန်တဲ့ ခံစားချက်ကို ပေးပါ တယ်။ ဒါက ကျနော်တို့ကို အကူအညီ ဖြစ်စေပါတယ်။ ဂျာမနီအသင်းမှာ မယုံနိုင်လောက်တဲ့ အတွေ့အကြုံရှိပြီး အောင်မြင်မှု အများအပြား ရယူထားနိုင်တဲ့ ကစားသမားတွေ ရှိပေမယ့် ပရိသတ်တွေရဲ့ အားပေးမှုတွေ လိုအပ်ပါ တယ်။ ပရိသတ်တွေ အိပ်မက်ဆက်မက်နေဖို့က ကျနော်တို့ရဲ့အလုပ်ပါပဲ”လို့ ပြောခဲ့တာပါ။

ဂျာမနီအသင်းဟာ ယူရို ၂၀၂၄ ပြိုင်ပွဲအုပ်စု ဒုတိယပွဲစဉ်မှာ ဟန်ဂေရီအသင်းကို ၂ ဂိုး- ဂိုးမရှိနဲ့ အနိုင်ရရှိခဲ့တာ ကြောင့် ၂ ပွဲကစား ၂ ပွဲနိုင်နဲ့ ၁၆ သင်းအဆင့်ကို တက်ရောက်နိုင်ခဲ့ပြီ ဖြစ်ပါတယ်။

ဂျာမနီအသင်းနည်းပြ နာဂျယ်လ်စမန်းက အိမ်ကွင်းမှာ ကျင်းပတဲ့ ပြိုင်ပွဲမှာ ပရိသတ်တွေရဲ့ အံ့သြဖွယ်ကောင်းတဲ့ အားပေးမှုတွေကို ချီးကျူးမှုပြုလုပ်ခဲ့တာပါ။ 

ဂျာမနီအသင်းသားတွေကိုတွေ့ရစဉ်

ဂျာမနီအသင်း ပရိသတ်တွေဟာ ယူရို ၁၉၉၆ ပြိုင်ပွဲ နောက်ပိုင်းဝေးကွာနေတဲ့ ချန်ပီယံဆုကို အိမ်ကွင်းမှာ ကျင်းပတဲ့ ဒီပြိုင်ပွဲမှာ ရယူနိုင်ဖို့ မျှော်လင့်နေကြတာ ဖြစ်ပါတယ်။

ဒီပွဲစဉ်မှာ အကောင်းဆုံး ကစားသမားဆု ရရှိခဲ့တဲ့ ဂျာမနီအသင်း ခေါင်းဆောင် ဂန်ဒိုဂန်က သူတို့ဟာ ပိုပြီးကောင်း လာသလို တိုးတက်လာတာနဲ့ ပြဿနာအချို့ကို ကျော်ဖြတ်ရမယ်လို့ ပြောခဲ့တာပါ။

ဟန်ဂေရီအသင်းနည်းပြ မာကိုရော့စီက ဂျာမနီအသင်းဟာ ဒီပွဲမှာ ပိုကောင်းတဲ့ အသင်းဖြစ်ပေမယ့် ဒိုင်လူကြီးရဲ့ ဆုံးဖြတ်ချက်အချို့ကို ပွဲအပြီးအင်တာဗျူးမှာ ဝေဖန်ခဲ့ပါတယ်။ 

ဟန်ဂေရီအသင်းဟာ အုပ်စုပွဲစဉ် ၂ ပွဲစလုံး အရေးနိမ့်ခဲ့တာကြောင့် နောက်တစ်ဆင့်တက်ဖို့ မျှော်လင့်ချက် နည်းပါးသွားခဲ့တာပါ။

အုပ်စုတွင်း နောက်ထပ် ပွဲစဉ်တစ်ပွဲဖြစ်တဲ့ စကော့တလန်နဲ့ ဆွစ်ဇာလန်အသင်းတို့ ပွဲကတော့ ၁ ဂိုးစီ သရေကျ သွားခဲ့ပါတယ်။

အဲဒါကြောင့် ဆွစ်ဇာလန်အသင်းဟာ ၂ ပွဲကစား ရမှတ် ၄ မှတ်နဲ့ ဒုတိယ၊ စကော့တလန်အသင်းက ၂ ပွဲကစား ရမှတ် ၁ မှတ်နဲ့ တတိယနေရာမှာ ရပ်တည်နေတာ ဖြစ်ပါတယ်။

Source: ESPN

CNI Sport News

၂၀၂၄ ခုနှစ်၊ ဇွန်လ ၂၀

အင်္ဂလန်ကွင်းလယ်လူ ကိုဘီမိုင်နူးက နည်းပြ အဲရစ်တန်ဟတ်ကို အသင်းမှာ ဆက်ထိန်းထားတဲ့ ယူနိုက်တက် အသင်းရဲ့ ဆုံးဖြတ်ချက်ကို ထောက်ခံတယ်လို့ ပြောလိုက်ပါတယ်။

ကိုဘီမိုင်နူးက “သူနဲ့အတူ အသင်းကို တည်ဆောက်ရတာ ပျော်ပါတယ်။ သူဟာ အသင်းအတွက် ဆုဖလား ၂ လုံး ရယူပေးထားပြီး နောက်ထပ် ရယူနိုင်ဖို့လည်း မျှော်လင့်ပါတယ်။ သူဟာ ကျနော့်ကို ယုံကြည်မှုအပြည့်နဲ့ အသင်းမှာ ကစားခွင့်ပေးတဲ့အတွက် ကျနော်အများကြီး ကျေးဇူးတင်ပါတယ်”လို့ ပြောခဲ့တာပါ။

ဒတ်ချ်လူမျိုးနည်းပြ အဲရစ်တန်ဟတ်ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ ယူနိုက်တက်အသင်းရဲ့ ရလဒ်ဆိုး တွေကြောင့် ထုတ်ပယ်ခံရမယ်လို့ သတင်းတွေ ထွက်ခဲ့ပေမယ့် FA ဖလား ရယူနိုင်ခဲ့တာကြောင့် လာမယ့်ရာသီ အသင်းကို ဆက်ပြီး ကိုင်တွယ်ခွင့်ရမှာ ဖြစ်ပါတယ်။ 

အသက် ၁၉ နှစ်အရွယ်ရှိ ကိုဘီမိုင်နူးဟာ နည်းပြ အဲရစ်တန်ဟတ် လက်ထက်မှာ အဓိက ကစားသမားအဖြစ် ခြေစွမ်းပြသနိုင်ခဲ့ပြီး ယူရို ၂၀၂၄ ပြိုင်ပွဲဝင် အင်္ဂလန်အသင်း လူစာရင်းမှာ ပါဝင်ခဲ့တာပါ။

ကိုဘီမိုင်နူးကို တွေ့ရစဉ်

အဲဒါကြောင့် ကိုဘီမိုင်နူးဟာ နည်းပြ အဲရစ်တန်ဟတ်ကို အသင်းမှာ ဆက်ပြီးထားတဲ့ ယူနိုက်တက်အသင်းရဲ့ ဆုံးဖြတ်ချက်ကို ထောက်ခံခဲ့တာ ဖြစ်ပါတယ်။

ယူနိုက်တက်ကြယ်ပွင့်ဟာ ပြီးခဲ့တဲ့ ဆားဘီးယားအသင်းနဲ့ပွဲစဉ်မှာ အင်္ဂလန်အသင်းအတွက် လူစားဝင်ကစားသမား အဖြစ် ပါဝင်ကစားခွင့်ရခဲ့တာပါ။ 

အင်္ဂလန်အသင်းဂန္ထဝင် ဝိန်းရွန်နီက နိုင်ငံအသင်းအနေနဲ့ ယူရိုပြိုင်ပွဲမှာ ရှုံးထွက်အဆင့်ရောက်ခဲ့ရင် ကိုဘီမိုင်နူးကို ပွဲထွက်လူစာရင်းမှာ အသုံးပြုဖို့ အကြံကြုထားပါတယ်။

ကိုဘီမိုင်နူးက “အရန်ခုံမှာပဲဖြစ်ဖြစ် ပွဲထွက်လူစာရင်းမှာပဲဖြစ်ဖြစ် ကျနော်ဟာ ပွဲကစားဖို့ အမြဲတမ်းအဆင်သင့် ဖြစ်နေပါတယ်။ ဒါပေမယ့် ကျနော်တို့ လူစာရင်းမှာ အလွန်ကောင်းမွန်တဲ့ ကွင်းလယ်ကစားသမားတွေရှိပါတယ်။ ကျနော်ဟာ ပြင်းပြင်းထန်ထန်လေ့ကျင့်နေပြီး အသုံးပြုဖို့ ရွေးချယ်ခံရတဲ့အခါမှာ အဆင်သင့်ဖြစ်နေမှာပါ”လို့ ပြောခဲ့ပါတယ်။

၂၀၂၄ ခုနှစ်ထဲမှာ အင်္ဂလန်အသင်းအတွက် ပွဲဦးထွက်ခွင့်ရခဲ့တဲ့ ကိုဘီမိုင်နူးဟာ လက်ရှိအချိန်ထိ နိုင်ငံအသင်း အတွက် ၄ ပွဲ ပါဝင်ကစားထားတာ ဖြစ်ပါတယ်။ 

Source: Metro

CNI Sport News

၂၀၂၄ ခုနှစ်၊ ဇွန်လ ၂၀

ကမ္ဘာ့အဆင့် နံပါတ် ၃ နေရာမှာ ရပ်တည်နေတဲ့ ဂျိုကိုဗစ်ဟာ ၂၀၂၄ ပဲရစ်အိုလံပစ်ပြိုင်ပွဲမှာ ဝင်ရောက်ယှဉ်ပြိုင် မယ်လို့ ဆားဘီးယားအိုလံပစ်ကော်မတီက ကြေညာခဲ့ပါတယ်။

၂၀၀၈ ခုနှစ်ကတည်းက အားကစားပြိုင်ပွဲတိုင်းကို ဝင်ရောက်ယှဉ်ပြိုင်ခဲ့တဲ့ ဂျိုကိုဗစ်ဟာ သူ့ရဲ့ ၅ ကြိမ်မြောက် အိုလံပစ်ပြိုင်ပွဲအဖြစ် ပဲရစ်အိုလံပစ်ပြိုင်ပွဲကို ဝင်ရောက်ယှဉ်ပြိုင်မှာပါ။ 

ဂျိုကိုဗစ်ဟာ ပထမဆုံးအကြိမ် ဝင်ရောက်ယှဉ်ပြိုင်ခဲ့တဲ့ အိုလံပစ်ပြိုင်ပွဲမှာ ကြေးတံဆိပ် ရရှိခဲ့ပေမယ့် နောက်ဆုံး ယှဉ်ပြိုင်ခဲ့တဲ့ ၃ ကြိမ်မှာ ၂ ကြိမ်က အဆင့် ၄ နေရာနဲ့ အဆုံးသတ်ခဲ့ရတာ ဖြစ်ပါတယ်။

ဂျိုကိုဗစ်ဟာ အိုလံပစ်ပြိုင်ပွဲမှာ ရွှေတံဆိပ်ဆု ရယူနိုင်ဖို့ ပစ်မှတ်ထားနေတာကြောင့် ပဲရစ်အိုလံပစ်ပြိုင်ပွဲဟာ သူ့အတွက် ဦးစားပေးဖြစ်တယ်လို့ ပြီးခဲ့တဲ့ ဧပြီက ပြောထားပါတယ်။

ဂျိုကိုဗစ်ကို တွေ့ရစဉ်

ဆားဘီးယားတင်းနစ်သမားဟာ ပြီးခဲ့တဲ့လက ပြင်သစ်အိုးပန်းပြိုင်ပွဲရဲ့ ကွာတားဖိုင်နယ် ပွဲစဉ်မတိုင်ခင် ဒူးဒဏ်ရာ ကြောင့် ပြိုင်ပွဲက နုတ်ထွက်ခဲ့ရပြီးနောက် ပဲရစ်အိုလံပစ်ပြိုင်ပွဲဟာ သူ့ရဲ့ပထမဆုံး ပြိုင်ပွဲဖြစ်လာမှာပါ။ 

နိုင်ငံအများအပြားဟာ တင်းနစ်ပြိုင်ပွဲမှာ ပါဝင်မယ့် သူတို့ရဲ့ ကစားသမားစာရင်းကို အတည်ပြု ထုတ်ပြန်ထား ကြပါတယ်။

နာမည်ကြီး တင်းနစ်ကစားသမားတွေဖြစ်တဲ့ ရာဖေးလ်နာဒယ်လ်နဲ့ အန်ဒီမာရေးတို့လည်း ဒီပြိုင်ပွဲမှာ ဝင်ရောက် ယှဉ်ပြိုင်ကြမှာဖြစ်ပေမယ့် အချို့ကစားသမားတွေကတော့ ဝင်ရောက်ယှဉ်မပြိုင်ဖို့ ဆုံးဖြတ်ခဲ့ကြတာပါ။

ပဲရစ်အိုလံပစ်ပြိုင်ပွဲရဲ့ တင်းနစ်ပြိုင်ပွဲတွေကို ဇူလိုင် ၂၄ ရက်ကနေ သြဂုတ် ၇ ရက်အထိ Roland Garros မှာ ကျင်းပသွားမှာ ဖြစ်ပါတယ်။

Source: BBC

CNI Sport News

၂၀၂၄ ခုနှစ်၊ ဇွန်လ ၁၉

သြစတြီးယားအသင်းနဲ့ပွဲစဉ်မှာ နှာခေါင်းရိုးကျိုးသွားခဲ့တဲ့ ဘတ်ပီဟာ နယ်သာလန်အသင်းနဲ့ကစားမယ့် ယူရို ၂၀၂၄ ပြိုင်ပွဲ အုပ်စုဒုတိယပွဲစဉ်မှာ ပြင်သစ်အသင်းအတွက် ပါဝင်ဖို့ မသေချာဘူးလို့ သိရပါတယ်။

ပြင်သစ်အသင်းက သြစတြီးယားအသင်းကို ၁ ဂိုး-ဂိုးမရှိနဲ့ အနိုင်ရခဲ့တဲ့ပွဲစဉ်မှာ ဘတ်ပီဟာ ဘောလုံးကို ခေါင်းခုန် တိုက်ရာ ပြိုင်ဘက်အသင်း နောက်ခံလူ ဒန်ဆိုရဲ့ ပခုံးနဲ့ သူ့ရဲ့မျက်နှာထိခိုက်မိပြီး နှာခေါင်းရိုးကျိုးသွားခဲ့တာပါ။ 

အဲဒါကြောင့် ဘတ်ပီဟာ ဆေးရုံကို ခေါ်ဆောင်သွားခံခဲ့ရပြီး အခုအချိန်မှာတော့ ပြင်သစ်လက်ရွေးစင် အသင်းနဲ့ အတူ ရှိနေခဲ့တာ ဖြစ်ပါတယ်။ 

ပြင်သစ်ဘောလုံးအဖွဲ့ချုပ်က ဘတ်ပီဟာ နှာခေါင်းရိုးကျိုးခဲ့ပေမယ့် ခွဲစိတ်ဖို့မလိုအပ်ဘူးလို့ ထုတ်ပြန်ထားတာပါ။

ဘတ်ပီအနေနဲ့ ပြင်သစ်အသင်းရဲ့ လာမယ့် အုပ်စုပွဲတွေမှာ ပါဝင်ခဲ့မယ်ဆိုရင် မျက်နှာဖုံးတပ်ဆင်ပြီး ကစားရမှာ ဖြစ်ပါတယ်။ 

ဘတ်ပီကိုတွေ့ရစဉ်

သြစတြီးယားအသင်းကို အနိုင်ရခဲ့တဲ့ပွဲအပြီးမှာ ပြင်သစ်အသင်းနည်းပြ ဒက်ချမ့်စ်က ဘတ်ပီရဲ့ဒဏ်ရာ အခြေအနေ ဟာ မကောင်းဘူးလို့ ပြောထားတာပါ။

ဒါပေမယ့် ပြင်သစ်အသင်းနည်းပြ ဒက်ချမ့်စ်နဲ့ ဘောလုံးအဖွဲ့ချုပ်တို့က ဘတ်ပီအနေနဲ့ အမြန်ဆုံး ပြန်ကောင်းမွန် ပြီး ယူရိုအုပ်စုပွဲစဉ်တွေမှာ ပါဝင်နိုင်ဖို့ မျှော်လင့်နေတာ ဖြစ်ပါတယ်။

အသက် ၂၅ နှစ်အရွယ်ရှိ ဘတ်ပီဟာ ပြင်သစ်အသင်းအတွက် ပွဲပေါင်း ၈၀ ပါဝင်ကစားထားပြီး ၄၇ ဂိုး သွင်းယူထား ပေမယ့် ယူရိုပြိုင်ပွဲမှာ ဂိုးသွင်းယူနိုင်ခြင်း မရှိသေးပါဘူး။ 

ယူရိုပြိုင်ပွဲမှာ ချန်ပီယံဆု ၂ ကြိမ် ရရှိထားတဲ့ ပြင်သစ်အသင်းဟာ ယူရို ၂၀၂၄ အုပ်စု လက်ကျန်ပွဲစဉ်တွေအဖြစ် ဇွန်လ ၂၁ ရက်မှာ နယ်သာလန်၊၂၅ ရက်မှာ ပိုလန်အသင်းနဲ့ ယှဉ်ပြိုင်ရမှာပါ။

ပြင်သစ်အသင်းအနေနဲ့ အုပ်စုဒုတိယ ပွဲစဉ်ဖြစ်တဲ့ နယ်သာလန်အသင်းနဲ့ပွဲစဉ်မှာ နိုင်ပွဲရယူနိုင်ခဲ့ရင် ၁၆ သင်း အဆင့်ကို စောစီးစွာ တက်ရောက်နိုင်မှာ ဖြစ်ပါတယ်။

Source: BBC