CNI Sport News

၂၀၂၄ ခုနှစ်၊ ဇွန်လ ၁၀

ယူနိုက်တက်အသင်း နည်းပြရာထူးအတွက် သတင်းတွေ ထွက်ပေါ်နေတဲ့ ဂျာမန်လူမျိုးနည်းပြ တူချယ်လ်က ယူနိုက်တက်အသင်းကို ကိုင်တွယ်ဖို့ စိတ်ဝင်စားခြင်း မရှိသေးဘူးလို့ ဗြိတိန်မီဒီယာတွေက ဖော်ပြထားပါတယ်။

ယူနိုက်တက်အသင်းဟာ နည်းပြ အဲရစ်တန်ဟတ်ကို ထုတ်ပယ်ခဲ့မယ်ဆိုရင် နည်းပြသစ်အဖြစ် ခန့်အပ်ဖို့ ထည့်သွင်း စဉ်းစားရမယ့် စာရင်းထဲမှာ ဘိုင်ယန်မြူးနစ်အသင်း နည်းပြဟောင်း တူချယ်လ်ကို ထည့်သွင်းထား တာပါ။ 

မန်ချက်စတာကလပ်ဟာ ပြီးခဲ့တဲ့ရာသီကို ပြန်လည်သုံးသပ်မှုတွေ ပြုလုပ်နေတာဟာ မပြီးပြတ်သေးတဲ့အတွက် နည်းပြ အဲရစ်တန်ဟတ်ရဲ့ အနာဂတ်နဲ့ ပတ်သက်ပြီး ဆုံးဖြတ်ချက်ချရခြင်း မရှိသေးတာ ဖြစ်ပါတယ်။ 

ပြီးခဲ့တဲ့ ရက်ပိုင်းအတွင်းမှာ တူချယ်လ်ဟာ ယူနိုက်တက်အသင်း ပူးတွဲပိုင်ရှင် ဆာဂျင်ရက်ကလစ်ဖ်နဲ့ ပြင်သစ်မှာ တွေ့ဆုံမှုတွေရှိခဲ့တာပါ။ 

ယူနိုက်တက်အသင်းကိုတွေ့ရစဉ်

ဒါပေမယ့် တူချယ်လ်ဟာ ပြီးခဲ့တဲ့ရာသီအကုန်မှာ ဘိုင်ယန်မြူးနစ်အသင်းကနေ ထွက်ခွာပြီးနောက် နည်းပြ လောကထဲကို ပြန်မဝင်ချင်သေးဘဲ အနားယူချင်နေတဲ့အတွက် ယူနိုက်တက်အသင်းကို ကိုင်တွယ်ဖို့ စိတ်ဝင်စားခြင်း မရှိသေးတာ ဖြစ်ပါတယ်။

ယူနိုက်တက်အသင်းဟာ အဲရစ်တန်ဟတ်ရဲ့ နေရာမှာ အစားထိုးဖို့ နည်းပြအချို့နဲ့လည်း ချိတ်ဆက်မှုတွေရှိခဲ့ တာပါ။

ယူနိုက်တက်အသင်း နည်းပြရာထူးအတွက် လျာထားတဲ့ စာရင်းထဲမှာ ချယ်လ်ဆီးအသင်း နည်းပြဟောင်း ပိုချက်တီနိုနဲ့ ဂရေဟမ်ပေါ်တာ၊ ဘရိုက်တန်အသင်း နည်းပြဟောင်း ဒီဇာဘီ၊ ဘရန်ဖို့ဒ်အသင်းနည်းပြ သောမက်စ်ဖရန့်ခ်တို့ ပါဝင်နေတာ ဖြစ်ပါတယ်။

အင်္ဂလန်အသင်းနည်းပြ ဆောက်ဂိတ်ကလည်း ယူနိုက်တက်အသင်း နည်းပြရာထူးအတွက် ထိပ်ဆုံးကနေ ရေပန်းစားနေပေမယ့် သူကတော့ ယူရို ၂၀၂၄ ပြိုင်ပွဲပြီးမှ အနာဂတ်ကို ဆုံးဖြတ်ဖို့ ရှိနေတာပါ။

ပြီးခဲ့တဲ့ရာသီမှာ FA ဖလား ရယူနိုင်ခဲ့ပေမယ့် ပရီးမီးယားလိဂ်မှာ ရလဒ်တွေဆိုးပြီး အဆင့် ၈ နေရာနဲ့ အဆုံးသတ်ခဲ့ရတဲ့ ယူနိုက်တက်အသင်းဟာ ယူရိုပြိုင်ပွဲ ဗိုလ်လုပွဲအပြီး နောက်တစ်ရက်အကြာမှာ ရာသီသစ် အတွက် ပထမဆုံးရာသီကြို ခြေစမ်းပွဲကစားဖို့ရှိနေတာ ဖြစ်ပါတယ်။ 

Source: BBC

CNI Sport News

 ၂၀၂၄ ခုနှစ်၊ ဇွန်လ ၈

စီးရီးအေကလပ် နာပိုလီအသင်းဟာ လူကာကူကို ခေါ်ယူဖို့အတွက် ချယ်လ်ဆီးအသင်းနဲ့ ဆွေးနွေးမှုပြုလုပ်ဖို့ အဆင်သင့် ဖြစ်နေပေမယ့် သူတို့ရဲ့ ပထမဆုံးကမ်းလှမ်းမှုဟာ လန်ဒန်ကလပ်က သတ်မှတ်ထားတဲ့ ပြောင်းရွှေ့ကြေးထက် နည်းပါးနေတာ ဖြစ်ပါတယ်။

ပြီးခဲ့တဲ့ရာသီက ရိုးမားအသင်းထံ အငှားနဲ့ သွားရောက်ကစားခဲ့တဲ့ လူကာကူကို ချယ်လ်ဆီးအသင်းက ဒီနွေရာသီ မှာ ရောင်းချဖို့ ဆုံးဖြတ်ထားတာပါ။

လူကာကူကို ခေါ်ယူဖို့ ဆော်ဒီကလပ်တွေ အပါအဝင် အသင်းအချို့က စိတ်ဝင်စားမှုရှိနေတာ ဖြစ်ပါတယ်။ 

ချယ်လ်ဆီးအသင်းကတော့ လူကာကူကို ခေါ်ယူချင်ရင် သူနဲ့ ချုပ်ဆိုထားတဲ့ စာချုပ်ထဲမှာပါဝင်တဲ့ စာချုပ် ဖျက်သိမ်းကြေး ပေါင် ၃၈ သန်းပေးချေရင် ခေါ်ယူလို့ရမယ်လို့ ပြောထားတာပါ။ 

နာပိုလီအသင်းဟာ ကွန်တီကို နည်းပြသစ်အဖြစ် ခန့်အပ်ပြီးနောက် သူနဲ့အတူ အင်တာမီလန်အသင်းမှာ လက်တွဲ ခဲ့တဲ့ လူကာကူကို အသင်းထံ ခေါ်ယူပေးဖို့ ကြိုးစားနေတာ ဖြစ်ပါတယ်။

အဲဒါကြောင့် နာပိုလီအသင်းဟာ လူကာကူအတွက် ချယ်လ်ဆီးအသင်းကို ပေါင် ၁၃ သန်း၊ အပိုဆုကြေး ပေါင် ၂.၅ သန်းနဲ့ ကမ်းလှမ်းမှုပြုလုပ်ခဲ့တယ်လို့ La Repubblica က ဖော်ပြထားတာပါ။ 

လူကာကူနဲ့ကွန်တီကိုတွေ့ရစဉ်

လူကာကူဟာ နည်းပြဟောင်း ကွန်တီရှိတဲ့ နာပိုလီအသင်းထံ ပြောင်းရွှေ့ဖို့ ဆန္ဒရှိတယ်လို့ သတင်းတွေ ထွက်ပေါ်နေသလို အေစီမီလန်အသင်းကလည်း သူ့ကို ခေါ်ယူဖို့အတွက် စိတ်ဝင်စားကြောင်း ပြသခဲ့ပါတယ်။

လူကာကူဟာ အနာဂတ်မှာ အသင်းဟောင်း အန်ဒါလက်ချ်အသင်းထံ ပြန်ချင်နေပြီး ဆော်ဒီကို ပြောင်းရွှေ့ဖို့လည်း လမ်းဖွင့်ထားတယ်လို့ မကြာသေးခင်က အင်တာဗျူးမှာ ပြောခဲ့တာပါ။ 

လူကာကူဟာ ပြီးခဲ့တဲ့ရာသီက ရိုးမားအသင်းအတွက် ၄၇ ပွဲ ကစားခဲ့ပြီး ၂၁ ဂိုးသွင်းယူကာ ခြေစွမ်းပြသနိုင်ခဲ့တာ ဖြစ်ပါတယ်။ 

စီးရီးအေကလပ် အသင်းတွေမှာ ကစားတိုင်း အကောင်းဆုံးပုံစံ ပြသနိုင်ခဲ့တဲ့ လူကာကူကို ခေါ်ယူချင်ရင် နာပိုလီအသင်းဟာ ချယ်လ်ဆီးအသင်းထံ ပိုမိုကောင်းမွန်တဲ့ ကမ်းလှမ်းမှုပြုလုပ်ရဖို့ ရှိနေတာပါ။

နာပိုလီအသင်း တိုက်စစ်မှူး အိုဆင်ဟမ်ဟာ နွေရာသီမှာ အသင်းက ထွက်ခွာဖွယ်ရှိနေတာကြောင့် အီတလီ ကလပ်ဟာ သူ့ကို ရောင်းချပြီး ရရှိလာမယ့် ပြောင်းရွှေ့ကြေးတွေနဲ့ လူကာကူကို ခေါ်ယူဖို့ လုပ်ဆောင်လာဖွယ် ရှိနေတာ ဖြစ်ပါတယ်။ 

Source: Goal

CNI Sport News

၂၀၂၄ ခုနှစ်၊ ဇွန်လ ၈

ဥရောပပြေးခုန်ပစ် ချန်ပီယံရှစ်ပြိုင်ပွဲရဲ့ အမျိုးသမီး ကီလိုမီတာ ၂၀ အပြေးလမ်းလျှောက်ပြိုင်ပွဲမှာ စပိန်နိုင်ငံက ဂါစီယာကာရိုဟာ ပြိုင်ပွဲကို အဆုံးသတ်မယ့် စည်းထဲကို မဝင်ရောက်ခင်မှာ အောင်ပွဲကြိုပြီး ခံခဲ့တာကြောင့် ကျော်တက်ခံခဲ့ရပြီး ကြေးတံဆိပ်နဲ့ လွဲချော်သွားခဲ့ပါတယ်။

ဒီပြိုင်ပွဲမှာ အီတလီနိုင်ငံသူတွေဖြစ်တဲ့ ပယ်လ်မီဆာနိုက ရွှေတံဆိပ်ရရှိခဲ့ပြီး တီရာပလက်တီက ငွေတံဆိပ်နဲ့ ယူကရိန်းနိုင်ငံသူ အိုယန်နိုဗာဆကာက ကြေးတံဆိပ် ရရှိသွားခဲ့တာပါ။

စပိန်နိုင်ငံအလံကို လည်ပင်းပေါ်မှာ ပတ်ထားတဲ့ ဂါစီယာကာရိုဟာ ဒီပြိုင်ပွဲမှာ ကြေးတံဆိပ် ရယူနိုင်ဖို့ နီးစပ်ခဲ့တာ ကြောင့် ပျော်ရွှင်ပြီး လက်ကိုမြှောက်ကာ အောင်ပွဲခံနေခဲ့တာ ဖြစ်ပါတယ်။ 

ဒါပေမယ့် နောက်ဆုံး ၅ မီတာမှာ အိုယန်နိုဗာဆကာက သူမကို ကျော်တက်သွားခဲ့တာကြောင့် ဂါစီယာကာရိုဟာ အလွန်အံ့အားသင့်နေခဲ့တာပါ။

အိုယန်နိုဗာဆကာက “ကြေးတံဆိပ်ဆု ရယူနိုင်ခဲ့တဲ့အတွက် ပျော်ရွှင်စရာ နေ့တစ်နေ့ဖြစ်ခဲ့ပါတယ်။ အရေးကြီးဆုံး က အဖေ၊အမေနဲ့ ယူကရိန်းတစ်နိုင်ငံလုံးကို ကျေးဇူးတင်ကြောင်း ပြောဖို့လိုပါတယ်။ ကျမအတွက်တော့ အလွန် စိတ်လှုပ်ရှားစရာကောင်းတဲ့ အခိုက်အတန့်ပါ။ နောက်ဆုံး ကီလိုမီတာနဲ့ နောက်ဆုံးမီတာမှာ ပင်ပန်းခဲ့ပေမယ့် တိုင်းပြည်အတွက် ဒီဆုတံဆိပ်ကို အရမ်းလိုချင်ခဲ့တာပါ”လို့ ပွဲအပြီး အင်တာဗျူးမှာ ပြောခဲ့ပါတယ်။

ဂါစီယာကာရိုနဲ့ အိုယန်နိုဗာဆကာကို တွေ့ရစဉ်

ဂါစီယာကာရိုဟာ သူမရဲ့ ကစားသမားဘဝမှာ အဓိကဆုတံဆိပ် ရယူဖို့ လွဲချော်ခဲ့တာကြောင့် ပွဲအပြီးမှာ အလွန် စိတ်ပျက်နေခဲ့တာပါ။

ဂါစီယာကာရိုက “နောက်ဆုံးလမ်းကြောင်းမှာ ကျမ အလွန်ပင်ပန်းနေခဲ့ပြီး ဒီပြိုင်ပွဲမှာ အကောင်းဆုံးလုပ်ခဲ့ပါ တယ်။ ဆုတံဆိပ် မရခဲ့တဲ့အတွက် အလွန်စိတ်ပျက်မိပါတယ်။ နောက်ဆုံး ၁၀ မီတာအလိုမှာ ကျမ ဒီဆုတံဆိပ်ကို ရမယ်လို့ထင်ခဲ့ပေမယ့် မရခဲ့ပါဘူး။ အခုဖြစ်ပျက်ခဲ့တာတွေကို စုစည်းပြီး ကျမရဲ့နှလုံးသားကို ကုစားရမယ်”လို့ ဒေသတွင်း မီဒီယာကို ပြောခဲ့ပါတယ်။

ဥရောပပြေးခုန်ပစ် ချန်ပီယံရှစ်ပြိုင်ပွဲကို ဇွန်လ ၇ ရက်ကနေ ၁၂ ရက်အထိ အီတလီနိုင်ငံမှာ ကျင်းပနေတာ ဖြစ်ပါတယ်။

Source: CNA

CNI Sport News

၂၀၂၄ ခုနှစ်၊ ဇွန်လ ၈

ပရီးမီးယားလိဂ်ကို တန်းပြန်တက်လာတဲ့ လက်စတာအသင်းဟာ ဝါရင့်တိုက်စစ်မှူး ဗာဒီကို ၁ နှစ် စာချုပ်သစ် ချုပ်ဆိုခဲ့ပါတယ်။

၂၀၁၂ ခုနှစ်ကတည်းက လက်စတာအသင်းမှာရှိခဲ့တဲ့ ဗာဒီဟာ အသင်းအတွက် ၄၆၄ ပွဲ ပါဝင်ကစားထားပြီး ၁၉၀ ဂိုး သွင်းယူထားတာပါ။

အသက် ၃၇ နှစ်အရွယ်ရှိ ဗာဒီဟာ လက်စတာအသင်းနဲ့ ၂၀၁၅-၁၆ ရာသီက ပရီးမီးယားလိဂ်ဖလား ရယူနိုင်ခဲ့သလို ၂၀၂၀-၂၁ ရာသီမှာ FA ဖလား ရယူနိုင်ခဲ့တာ ဖြစ်ပါတယ်။ 

ဒါအပြင် ဗာဒီဟာ လက်စတာအသင်းနဲ့ ချန်ပီယံရှစ်ပြိုင်ပွဲမှာ ချန်ပီယံဆု ၂ ကြိမ် ရယူနိုင်ခဲ့တာပါ။

ဗာဒီဟာ စာချုပ်သစ်ကြောင့် လက်စတာအသင်းမှာ လာမယ့်ရာသီအကုန်ထိ ဆက်ပြီးရှိမှာ ဖြစ်ပါတယ်။

ဗာဒီက “အသက်ဆိုတာ ကိန်းဂဏန်းတစ်ခုပဲလို့ ကျနော်အမြဲတမ်း ပြောခဲ့ပါတယ်။ ကျနော်တို့ဟာ ပရီးမီးယားလိဂ် ပြိုင်ပွဲမှာ နောက်ထပ် ရာသီတစ်ခုကို စောင့်မျှော်နေပြီး ဘာတွေလုပ်နိုင်မလဲဆိုတာ မြင်တွေ့ရမှာပါ။ ပရီးမီးယားလိဂ်ဟာ ကမ္ဘာ့အကောင်းဆုံးလိဂ်ဖြစ်ပြီး အဲဒီမှာ ဘောလုံးကစားချင်တာပါ”လို့ ပြောပါတယ်။

ဗာဒီကို တွေ့ရစဉ်

လက်စတာအသင်းဟာ ဗာဒီနဲ့အတူ နောက်ခံလူ ဗက်စ်တာဂတ်ကို ၂၀၂၇ ခုနှစ်အထိ စာချုပ်သစ် ချုပ်ဆိုခဲ့ပါတယ်။ 

ဒါပေမယ့် လက်စတာအသင်းဟာ စာချုပ်ကုန်ဆုံးခဲ့ပြီဖြစ်တဲ့ အယ်လ်ဘရိုက်တန်၊ အီဟီနာချိုနဲ့ ပရက်တို့ကို အလွတ်နဲ့ ထွက်ခွာခွင့် ပေးခဲ့တာပါ။ 

အယ်လ်ဘရိုက်တန်ဟာ လက်စတာအသင်းနဲ့အတူ ပရီးမီးယားလိဂ်၊FA ဖလား၊ ကွန်မြူနတီဒိုင်းတို့ကို ရယူနိုင်ခဲ့ပြီး အသင်းမှာ ၁၀ နှစ်ကြာ ကစားခဲ့တာဖြစ်ပါတယ်။

မန်စီးတီးအသင်း ကစားသမားဟောင်း အီဟီနာချိုဟာ လက်စတာအသင်းမှာ ၇ နှစ်ကြာ ကစားခဲ့ပြီး FA ဖလားနဲ့ ကွန်မြူနတီဒိုင်းတို့ကို ရယူနိုင်ခဲ့တာပါ။ 

လက်စတာအသင်းဟာ စာချုပ်ကုန်ဆုံးခဲ့ပြီဖြစ်တဲ့ ကွင်းလယ်လူ အန်ဒီဒီနဲ့ စာချုပ်သစ်အတွက် ဆွေးနွေးမှုတွေ ပြုလုပ်နေတယ်လို့ သိရပါတယ်။

ဒါအပြင် လက်စတာအသင်းဟာ ချယ်လ်ဆီးအသင်းကို ကိုင်တွယ်ဖို့ ထွက်ခွာခဲ့တဲ့ နည်းပြ မာရက်စ်ကာရဲ့နေရာမှာ အစားထိုးဖို့ နည်းပြသစ် ရှာဖွေမှုတွေပြုလုပ်နေတာ ဖြစ်ပါတယ်။

Source:BBC

CNI Sport News

၂၀၂၄ ခုနှစ်၊ ဇွန်လ ၈

အင်္ဂလန်အသင်းဟာ နောက်ဆုံးကစားခဲ့တဲ့ ခြေစမ်းပွဲမှာ အိုက်စလန်အသင်းကို အရေးနိမ့်ခဲ့ပေမယ့် ယူရို ၂၀၂၄ ပြိုင်ပွဲအတွက် အဆင်သင့်ဖြစ်လိမ့်မယ်လို့ နည်းပြ ဆောက်ဂိတ်က ပြောခဲ့ပါတယ်။

ဆောက်ဂိတ်က “ယူရိုပြိုင်ပွဲအတွက် ကျနော်တို့ အဆင်သင့် ဖြစ်နေပါလိမ့်မယ်။ အိုက်စလန်အသင်းနဲ့ပွဲမှာတော့ ကျနော်တို့ဟာ မျှော်လင့်ထားသလို မဖြစ်ခဲ့ပါဘူး။ ကျနော်တို့ဟာ ဒီပွဲမှာ အနိုင်ရယူနိုင်ဖို့ လုံလောက်တဲ့ အခွင့်အရေးတွေ ရှိခဲ့ပါတယ်။ ဒါပေမယ့်လည်း ကျနော်တို့ဟာ အခွင့်အရေးတွေ အများကြီးကို လက်လွှတ်ခဲ့ရ ပါတယ်”လို့ ပြောပါတယ်။

အင်္ဂလန်အသင်းဟာ ယူရို ၂၀၂၄ ပြိုင်ပွဲမတိုင်ခင် နောက်ဆုံး ခြေစမ်းပွဲအဖြစ် အိုက်စလန်အသင်းနဲ့ ကစားခဲ့တာမှာ ၁ ဂိုး- ဂိုးမရှိနဲ့ အရေးနိမ့်ခဲ့တာ ဖြစ်ပါတယ်။

အင်္ဂလန်အသင်းဟာ ဒီပွဲမှာ ဂိုးပေါက်တည့်မှု ၁ ကြိမ်သာရှိခဲ့ပြီး ၂၀၂၁ ခုနှစ်၊ ဇွန်လ နောက်ပိုင်း ဂိုးပေါက်တည့်မှု အနည်းဆုံး ဖြစ်ခဲ့တာပါ။ 

အင်္ဂလန်အသင်းနဲ့ အိုက်စလန်အသင်း ယှဉ်ပြိုင်နေစဉ်

အင်္ဂလန်အသင်း ပရိသတ်တွေဟာ အိုက်စလန်အသင်းကို အရေးနိမ့်ခဲ့တဲ့ အသင်းကို လှောင်ပြောင်မှုတွေ ပြုလုပ်ခဲ့ပြီး နည်းပြ ဆောက်ဂိတ်က ဒါကို သူနားလည်တယ်လို့ ပွဲအပြီးမှာ ပြောခဲ့တာ ဖြစ်ပါတယ်။

ဒါအပြင် ဆောက်ဂိတ်က သူတို့ဟာ ယူရိုပြိုင်ပွဲအတွက် အဆင်သင့် ဖြစ်လိမ့်မယ်လို့လည်း ပြောခဲ့တာပါ။

အိုက်စလန်အသင်းနဲ့ ခြေစမ်းပွဲမှာ နောက်ခံလူတွေဖြစ်တဲ့ ဂျွန်စတုန်းစ်နဲ့ ဂူဟီတို့ ဒဏ်ရာပြဿနာ ကြုံတွေ့ခဲ့ ရပေမယ့် စိုးရိမ်စရာမရှိဘူးလို့ အင်္ဂလန်အသင်းနည်းပြ ဆောက်ဂိတ်က မီဒီယာသမားတွေရဲ့ မေးမြန်းမှုကို ဖြေခဲ့ပါတယ်။

အင်္ဂလန်အသင်းဟာ ဒဏ်ရာကြောင့် အဓိကနောက်ခံလူ မက်ဂွဲယားကို ယူရိုပြိုင်ပွဲရဲ့ အပြီးသတ် လူစာရင်းမှာ ချန်လှပ်ခဲ့ရတာပါ။

အင်္ဂလန်အသင်းဟာ ယူရို ၂၀၂၄ ပြိုင်ပွဲ အုပ်စုအဖွင့်ပွဲစဉ်အဖြစ် ဇွန်လ ၁၆ ရက်မှာ ဆားဘီးယားအသင်းနဲ့ ယှဉ်ပြိုင်ရမှာ ဖြစ်ပါတယ်။

Source:ESPN

CNI Sport News

၂၀၂၄ ခုနှစ်၊ ဇွန်လ ၇

ဒိန်းမတ်ကွင်းလယ်လူ အဲရစ်ဆန်က ယူနိုက်တက်အသင်းမှာ ပွဲကစားချိန်နည်းပါးတာကြောင့် မပျော်ရွှင်ဘူးလို့ ဝန်ခံခဲ့ပြီး ယူရို ၂၀၂၄ ပြိုင်ပွဲအပြီးမှာ သူ့အနာဂတ်ကို ဆုံးဖြတ်သွားမယ်လို့ ပြောလိုက်ပါတယ်။

အဲရစ်ဆန်က “ကျနော်ဟာ အရန်ခုံပေါ်မှာရှိနေတာကိုဘယ်တော့မှ မပျော်ရွှင်ဘူးဆိုတာ သေချာပါတယ်။ ပုဂ္ဂိုလ်ရေးအရဆိုရင် ကျနော်ဟာ အသင်းမှာ ပထမဆုံးရွေးချယ်ခံရတဲ့သူဖြစ်ချင်ပါတယ်။ နည်းပြကတော့ မတူညီတဲ့နည်းလမ်းနဲ့ ကြည့်တာပေါ့။ ဒါပေမယ့် ကျနော်ဟာ ယူနိုက်တက်အသင်းအတွက် ကစားပေးနေတာ ဖြစ်ပြီး ဒီမှာက ကစားသမားကောင်းတွေအများကြီးရှိတာကြောင့် နေရာအတွက် တိုက်ပွဲဝင်ရမှာပါ။ လက်ရှိ အချိန်မှာတော့ ကျနော်ဟာ ယူရိုပြိုင်ပွဲအပေါ် အပြည့်အဝအာရုံစိုက်ထားပါတယ်” လို့ TV2 နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။

၂၀၂၂ ခုနှစ်၊ဇူလိုင်က ယူနိုက်တက်အသင်းထံ အလွတ်နဲ့ ရောက်ရှိလာခဲ့တဲ့ အဲရစ်ဆန်ဟာ ပြီးခဲ့တဲ့ရာသီ ပရီးမီးယားလိဂ်ပြိုင်ပွဲမှာ ၁၂ ပွဲသာပွဲထွက်ခွင့်ရခဲ့ပြီး လူစားဝင်ကစားသမားအဖြစ်သာ ပါဝင်ခဲ့ရတာဖြစ်ပါတယ်။ 

အဲရစ်ဆန်ဟာ ယူနိုက်တက်အသင်းက မန်စီးတီးအသင်းကို အနိုင်ရခဲ့တဲ့ FA ဖလားဗိုလ်လုပွဲမှာလည်း ယူနိုက်တက် အသင်းရဲ့ အရန်လူစာရင်းမှာသာ ပါဝင်ခဲ့တာပါ။ 

အဲဒါကြောင့် အဲရစ်ဆန်က အရန်ကစားသမားအဖြစ်ရှိနေတာကို မပျော်ရွှင်ဘူးလို့ ဝန်ခံခဲ့ပါတယ်။

အသက် ၃၂ နှစ်အရွယ်ရှိ အဲရစ်ဆန်နဲ့ ယူနိုက်တက်အသင်းတို့ ချုပ်ဆိုထားတဲ့ စာချုပ်ဟာ ၁ နှစ်သာကျန်ရှိတော့ တာပါ။ 

ယူနိုက်တက်အသင်းဟာ လာမယ့်ရာသီသစ်မစတင်ခင်မှာ ကစားသမားအချို့ကို ရောင်းချဖို့ ရှိနေပြီး ဒီထဲမှာ အဲရစ်ဆန်လည်း ပါဝင်တယ်လို့ သတင်းတွေထွက်ပေါ်နေတာဖြစ်ပါတယ်။

 တူရကီကလပ်တွေဟာ ပြီးခဲ့တဲ့ ဇန်နဝါရီကတည်းက အဲရစ်ဆန်ကို ခေါ်ယူဖို့ ယူနိုက်တက်အသင်းထံ ချဉ်းကပ်ခဲ့ပေမယ့် အသင်းဘက်က သူ့ကို ဆက်ထိန်းသိမ်းဖို့ ဆုံးဖြတ်ခဲ့တာပါ။

အဲရစ်ဆန်ဟာ ယူနိုက်တက်ကစားသမားဘ၀ ၂ ရာသီအတွင်း ၇၂ ပွဲကစားခဲ့ပြီး ၃ ဂိုးသွင်းယူကာ ကာရာဘောင်းနဲ့ FA ဖလားချန်ပီယံဆုတွေကို ရယူနိုင်ခဲ့တာဖြစ်ပါတယ်။

Source:Metro

CNI Sport News

၂၀၂၄ ခုနှစ်၊ ဇွန်လ ၇

ပရီးမီးယားလိဂ်ကလပ်တွေဟာ လာမယ့်ရာသီ VAR ကိုဆက်ပြီးထားရှိဖို့အတွက် မဲပေးမှုပြုလုပ်ခဲ့တာမှာ ထောက်ခံမဲ ၁၉ မဲ၊ကန့်ကွက်မဲ ၁ မဲပေးခဲ့တာဖြစ်ပါတယ်။

ဝုလ်ဗ်စ်အသင်းဟာ လာမယ့်ရာသီ VAR အသုံးပြုမှုကို ဖျက်သိမ်းဖို့ ပရီးမီးယားလိဂ်ထံ တရားဝင်တင်သွင်းခဲ့ပြီး နောက် မဲပေးဆုံးဖြတ်မှုပြုလုပ်ခဲ့တာမှာ ဝုလ်ဗ်စ်အသင်းကလွဲပြီး ကျန်အသင်းတွေက VAR ကိုဆက်ပြီးထားရှိဖို့ မဲပေးခဲ့ကြတာပါ။ 

VAR အသုံးပြုမှုကို ဖျက်သိမ်းဖို့ဆိုရင် ပရီးမီးယားလိဂ်အသင်း ၂၀ က ၁၄ သင်းဟာ ထောက်ခံ မဲပေးဖို့ လိုအပ်တာဖြစ်ပါတယ်။ 

အဲဒါကြောင့် ပရီးမီးယားလိဂ်ပြိုင်ပွဲမှာ VAR ကို ဖျက်သိမ်းချင်နေတဲ့ ဝုလ်ဗ်စ် အသင်းရဲ့ အဆိုပြုချက်ဟာ အောင်မြင်မှုမရှိခဲ့တာပါ။

ဝုလ်ဗ်စ်အသင်းဟာ မဲရလဒ်ကို စိတ်ပျက်ပေမယ့် VAR ကို ဒီထက်ပိုပြီးကောင်းမွန်အောင်လုပ်မယ့် ပရီးမီးယားလိဂ် ရဲ့ ကတိကဝတ်ကို ကြိုဆိုခဲ့ပါတယ်။ 

ပရီးမီးယားလိဂ်ကလပ်အသင်းတွေဟာ VAR ကို ဖျက်သိမ်းတာထက် လက်ရှိ စနစ်ကို ပိုပြီးကောင်းမွန်အောင် ပြုပြင်မွမ်းမံမှုတွေလုပ်ဆောင်စေချင်နေတာပါ။ ပရီးမီးယားလိဂ်ဟာ ပြီးခဲ့တဲ့ရာသီ က VAR ရဲ့ အမှားအယွင်းတွေကြောင့် ဝေဖန်မှုတွေ ပြင်းပြင်းထန်ထန် ခံခဲ့ရတဲ့အတွက် VAR အသုံးပြုမှုကို ပိုပြီး ကောင်းမွန်လာအောင် လုပ်ဆောင်ရတော့မှာဖြစ်ပါတယ်။ 

VAR ကိုသာ အသုံးမပြုခဲ့ရင် ရာသီတစ်လျှောက်လုံးမှာ မှားယွင်းတဲ့ဆုံးဖြတ်ချက်ပေါင်း ၁၀၀ ကျော်လောက် ရှိလိမ့်မယ်လို့ ပရီးမီးယားလိဂ်က ထောက်ပြထားပါတယ်။

 VAR ကို ဥရောပကလပ်ပြိုင်ပွဲတွေမှာ အသုံးပြု နေတာကြောင့် ထိပ်သီးကလပ်တွေဟာ ဒီနည်းပညာကို ဖျက်သိမ်းလိုခြင်းမရှိတာပါ။

 အဲဒါကြောင့် ပရီးမီးယား လိဂ်ဟာ လာမယ့်ရာသီမှာ မနှစ်ကရာသီလို အမှားအယွင်းတွေ ထပ်ပြီးမဖြစ်အောင် လုပ်ဆောင်ဖို့ ပြင်ဆင်မှု တွေပြုလုပ်နေတာဖြစ်ပါတယ်။

ပရီးမီးယားလိဂ်ဟာ VAR ကို ပိုကောင်းအောင်လုပ်ရမှာဖြစ်သလို လာမယ့်ရာသီမှာ အလိုအလျောက် လူကျွံဘော ဖမ်းတဲ့ နည်းပညာကို အသုံးပြုဖို့လည်း ရှိနေတာဖြစ်ပါတယ်။ 

CNI Sport News

 ၂၀၂၄ ခုနှစ်၊ ဇွန်လ ၇

ကိုပါအမေရိကဖလားပြိုင်ပွဲအတွက် ဘရာဇီးလ်လက်ရွေးစင်အသင်းနဲ့ စတင်ပူးပေါင်းနေပြီဖြစ်တဲ့ ဗီနီစီးယက်စ်က နိုင်ငံအသင်းနဲ့ ပထမဆုံးဆုဖလားအဖြစ် ကိုပါအမေရိကဖလားရယူချင်တယ်လို့ ပြောခဲ့ပါတယ်။

ဗီနီစီးယက်စ်က “ကျနော်ဟာ နိုင်ငံအသင်းနဲ့ ဆုဖလားတွေမရရှိသေးပါဘူး။ အခုဖြစ်လာလိမ့်မယ်လို့ ကျနော် မျှော်လင့်ပါတယ်။ ကျနော်တို့မှာ အလွန်အားကောင်းလာမယ့် မျိုးဆက်တစ်ခုရှိတယ်ဆိုတာ သေချာပါတယ်။ အဲဒါကြောင့် ကိုပါအမေရိကဖလားပြိုင်ပွဲမှာ ဆုဖလားရယူနိုင်ဖို့အတွက် ကောင်းမွန်တဲ့ ပြင်ဆင်မှုတွေ ပြုလုပ် သွားရမှာပါ” လို့ ဘရာဇီးလ်ဘောလုံးအဖွဲ့ချုပ်မီဒီယာကို ပြောခဲ့တာပါ။

၂၀၂၁ ကိုပါအမေရိကဖလားပြိုင်ပွဲနဲ့ ၂၀၂၂ ကမ္ဘာ့ဖလားပြိုင်ပွဲပြီးနောက် ၂၀၂၄ ကိုပါအမေရိကဖလားပြိုင်ပွဲဟာ ဗီနီစီးယက်စ်အတွက် ဘရာဇီးလ်လက်ရွေးစင်ကစားသမားဘ၀ တတိယမြောက်ပြိုင်ပွဲဖြစ်ပါတယ်။ 

မကြာသေးခင် ကမှ ရီးရယ်လ်အသင်းနဲ့ ချန်ပီယံလိဂ်ဖလားရယူနိုင်ခဲ့တဲ့ ဗီနီစီးယက်စ်ဟာ ဒီပြိုင်ပွဲမှာ ဘရာဇီးလ်အသင်းရဲ့ တိုက်စစ်ပိုင်းကို ဦးဆောင်ရဖို့ရှိနေတာပါ။ 

ဘရာဇီးလ်အသင်းရဲ့ အဓိက ကစားသမားဖြစ်တဲ့ နေမာဟာ ဒဏ်ရာ ကြောင့် မပါဝင်နိုင်တဲ့အတွက် ဗီနီစီးယက်စ်ဟာ နေမာရဲ့နေရာအစားဝင်ရောက်ပြီး နိုင်ငံအသင်းကို ဆုဖလား ရရှိအောင် ကူညီပေးရတော့မှာဖြစ်ပါတယ်။

ဘရာဇီးလ်အသင်းဟာ ကိုပါအမေရိကဖလားပြိုင်ပွဲမတိုင်ခင် ပြင်ဆင်မှုအဖြစ် မက္ကဆီကို၊အမေရိကန်အသင်းတို့နဲ့ အမေရိကန်နိုင်ငံမှာ ခြေစမ်းပွဲကစားဖို့ ရှိနေတာပါ။ 

ဘရာဇီးလ်အသင်းဟာ ကိုပါအမေရိကဖလားပြိုင်ပွဲမှာ ကိုလံဘီယာ၊ပါရာဂွေး၊ကော်စတာရီကာတို့နဲ့ တစ်အုပ်စုတည်း ကျရောက်နေတာဖြစ်ပါတယ်။ 

ဘရာဇီးလ် အသင်း ဟာ ကိုပါအမေရိကဖလားပြိုင်ပွဲမှာ ချန်ပီယံဆုကို ၉ ကြိမ်ရရှိထားပြီး နောက်ဆုံးရရှိခဲ့တာက ၂၀၁၉ ပြိုင်ပွဲမှာ ဖြစ်တာပါ။

ဘရာဇီးလ်အသင်းဟာ ပြီးခဲ့တဲ့ ၂၀၂၆ ကမ္ဘာ့ဖလားခြေစစ်ပွဲတွေမှာ ရလဒ်တွေဆိုးခဲ့တာကြောင့် နည်းပြသစ်အဖြစ် ဒိုရီဗယ်လ်ဂျူနီယာကို ခန့်အပ်ထားပြီး သူ့ရဲ့လက်ထက်ကစားခဲ့တဲ့ ခြေစမ်းပွဲ ၂ ပွဲမှာ အင်္ဂလန်အသင်းကို အနိုင်ရ ခဲ့ပြီး စပိန်အသင်းနဲ့ သရေကျခဲ့တာဖြစ်ပါတယ်။

Source:Besoccer

CNI Sport News

၂၀၂၄ ခုနှစ်၊ ဇွန်လ ၇

အင်္ဂလန်အသင်းနည်းပြ ဆောက်ဂိတ်ဟာ ယူရို ၂၀၂၄ ပြိုင်ပွဲယှဉ်ပြိုင်ဖို့အတွက် အပြီးသတ်ကစားသမား ၂၆ ဦး စာရင်းထုတ်ပြန်ခဲ့တာမှာ မက်ဒီဆင်အပြင် မက်ဂွဲယားနဲ့ ဂရီလစ်ရှ်တို့ကိုပါ ချန်လှပ်ခဲ့ပါတယ်။

ယူရိုပြိုင်ပွဲအတွက် ပဏာမကစားသမား ၃၃ ဦးနဲ့ စခန်းသွင်းလေ့ကျင့်နေတဲ့ အင်္ဂလန်အသင်းဟာ အပြီးသတ် လူစာရင်းမှာ ဒီကစားသမား ၃ ဦးအပြင် လီဗာပူးလ်အသင်းက ကာတစ်ဂျုံးစ်နဲ့ ကွင်ဆက်၊အဲဗာတန်အသင်းက ဘရန်ဝိတ်နဲ့ ဘန်လေအသင်းက ဂိုးသမား ဂျိမ်းစ်ထရက်ဖိုဒ့်တို့ကိုလည်း ချန်လှပ်ခဲ့တာပါ။ 

ယူနိုက်တက်အသင်း နောက်ခံလူ မက်ဂွဲယားဟာ ခြေသလုံးကြွက်သားဒဏ်ရာကနေ သက်သာခြင်းမရှိတဲ့အတွက် ယူရို ၂၀၂၄ ပြိုင်ပွဲ ယှဉ်ပြိုင်ဖို့ကို လက်လွှတ်ခဲ့ရတာဖြစ်ပါတယ်။

နည်းပြဆောက်ဂိတ်ဟာ လူငယ်ကစားသမားတွေဖြစ်တဲ့ ဂေါ်ဒွန်၊ကိုးလ်ပါလ်မာ၊ကိုဘီမိုင်နူး၊အီဇီနဲ့ ဝါတန်တို့ကို ယူရို ၂၀၂၄ ပြိုင်ပွဲအတွက် အပြီးသတ်လူစာရင်းမှာ ရွေးချယ်ခဲ့တာပါ။ 

အင်္ဂလန်အသင်းဟာ ဒဏ်ရာကြောင့် ပြီးခဲ့တဲ့ ဖေဖော်ဝါရီကတည်းက ယူနိုက်တက်အသင်းအတွက် ပါဝင်ကစားနိုင်ခြင်းမရှိတဲ့ လုပ်ခ်ရှောကိုလည်း အပြီးသတ် လူစာရင်းမှာ ရွေးချယ်ခဲ့တာဖြစ်ပါတယ်။ နည်းပြ ဆောက်ဂိတ်က လုပ်ခ်ရှောဟာ ပြီးခဲ့တဲ့ရက်သတ္တပတ်တွေ အတွင်းမှာ တိုးတက်မှုတွေရှိလာတယ်လို့ ပြောခဲ့တာပါ။

ဆောက်ဂိတ်က “လုပ်ခ်ရှောဟာ အုပ်စုဒုတိယပွဲစဉ်မှာ ပါဝင်နိုင်မယ်လို့ ကျနော်တို့ထင်ပါတယ်။ သူ့ဟာ အလုပ်ကို ကောင်းမွန်စွာလုပ်ဆောင်နေသလို အရှိန်ကောင်းကောင်းနဲ့ လည်ပတ်နေပါတယ်။ လုပ်ခ်ရှောကို ကျနော်တို့ စွန့်စားပြီးခေါ်ယူခဲ့တာပါ။ လုပ်ခ်ရှောဟာ အတွေ့အကြုံရှိတဲ့သူဖြစ်ပြီး တိုက်စစ်အတွက်လည်း ရွေးချယ်ခွင့် ပေးတဲ့သူပါ” လို့ ပြောခဲ့ပါတယ်။

အင်္ဂလန်အသင်းဟာ လုပ်ခ်ရှောပါဝင်နိုင်ဖွယ်မရှိတဲ့ ယူရို ၂၀၂၄ အုပ်စုအဖွင့်ပွဲစဉ်မှာ ဘယ်နောက်ခံလူအဖြစ် ထရစ်ပီယာကို အသုံးပြုသွားမှာဖြစ်ပြီး ဂျိုဂိုးမက်ဇ်လည်း ဒီနေရာမှာ ကစားနိုင်တာပါ။ အင်္ဂလန်အသင်းဟာ ယူရို ၂၀၂၄ ပြိုင်ပွဲမှာ ဒိန်းမတ်၊ဆားဘီးယား၊ဆလိုဗေးနီးယားတို့နဲ့ တစ်အုပ်စုတည်းကျရောက်နေပြီး အဖွင့်ပွဲစဉ်အဖြစ် ဇွန် ၁၆ ရက်မှာ ဆားဘီးယားအသင်းနဲ့ ယှဉ်ပြိုင်ရမှာဖြစ်ပါတယ်။

Source:ESPN