CNI News
၂၀၂၅ ခုနှစ်၊ စက်တင်ဘာ ၂၂
ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)သို့ တပ်မတော်က ကိုယ်စားလှယ်များ စေလွှတ်နေခြင်းသည် မည်သည့် ပုံစံစနစ်ကို အကောင်အထည်ဖော်ရန် ကြိုးပမ်းနေခြင်းလဲနှင့် မည်ကဲ့သို့ ထူးခြားမှုများဖြစ်လာနိုင်လဲ ဆိုသည်ကို စစ်ရေးနှင့်နိုင်ငံရေးအကဲခတ်များမှ သုံးသပ်နေကြသည်။
ယခုလထဲတွင် ဗိုလ်ချုပ်မှူးကြီးမင်းအောင်လှိုင်သည် တပ်မတော်မှ အငြိမ်းစား ဗိုလ်ချုပ်ကြီးများ၊ ဒုတိယဗိုလ်ချုပ် ကြီးများနှင့် ဗိုလ်ချုပ် အဆင့်များ အပါအဝင် အရပ်ဖက် ဝန်ကြီးများကို USDP ပါတီသို့ သွားရောက်၍ လာမည့် ရွေး ကောက်ပွဲမှာ ဝင်ရောက်ယှဉ်ပြိုင်ရန် စေလွှတ်လျက်ရှိသည်။
USDP ပါတီထဲတွင် တပ်မတော် ဝင်ရောက်လာခြင်းက အမိန့်ပေးစနစ်နှင့် ပါတီထဲကို ကူးကြသည့် သဘောဖြစ်ပြီး အဖက်ဖက်ကကြည့်လျှင် စိုးရိမ်စရာကောင်းသည့် အခြေအနေ ဖြစ်နေကြောင်း NCA ထိုးထားသည့် ပအိုဝ်းအမျိုး သား လွတ်မြောက်ရေးအဖွဲ့ချုပ်(PNLO)မှဥက္ကဋ္ဌ ဗိုလ်မှူးကြီးခွန်ဥက္ကာက CNI သတင်းဌာနသို့ ပြောသည်။
၎င်းက “ဒါတွေက မိမိသဘော လွတ်လပ်တဲ့ သဘောဆန္ဒ အလျက်ရောက်တော့ မဟုတ်ဘူးထင်တယ်။ ဗဟိုအမိန့် ပေးမှု အောက်ကနေပြီးတော့ တပ်က အနားယူပြီးတော့ နိုင်ငံရေးပါတီမှာ တာဝန်ထမ်းဆောင်တယ်။ ရွေးကောက် ပွဲ အနိုင်ရလာရင် ရွေးကောက်ပွဲက ပေါ်လာမယ့် လွှတ်တော်တို့ အစိုးရတို့ကိုလည်း တပ်က လူတွေနဲ့ပဲ ဖြည့်ဆည်း သွားမယ့် သဘောမျိုး။ အဲဒီလိုပြင်ဆင်မှုလို့ ယူဆရပါတယ်။ အမိန့်ပေးစနစ်နဲ့ ပါတီထဲကို ကူးကြတဲ့သဘောပါ ဗိုလ်ချုပ်မှူးကြီးသန်းရွေနဲ့ ဗိုလ်ချုပ် မောင်အေးတို့ နှစ်ယောက်က အေးအေးဆေးဆေးပဲ အနားယူ ပြီးတော့ ဒီလွှတ်တော်ကိုတော့ ဗိုလ်ချုပ်ကြီးရွှေမန်းကို အပ်တယ်။ ဗိုလ်ချုပ်ကြီးသိန်းစိန်ကိုတော့ အစိုးရအဖွဲ့ သမ္မတအဖြစ် အပ်တယ်။ လူခွဲပြီးတော့ တာဝန်ပေးအပ်တာ အကွက်လှပါတယ်။ ဒါကြောင့် သူတို့ ၅ နှစ် အုပ်ချုပ် လို့ ရသွားတာ။ အခုကျတော့ အဲဒီပုံစံတော့ မဟုတ်ဘူးထင်တယ်။ အကြီးအကဲတွေက နားမယ့် သဘောတော့ မရှိ ဘူး။ အကြီးအကဲတွေ ကိုယ်တိုင်ကလည်းပဲ ရတဲ့နေရာမှာ ဝင်ယူမယ့်သဘောတွေ ရှိနေတော့ စုဖွဲ့ပုံကိုတော့ ဘယ်လိုပုံစံ ဖန်တီးလာမလဲတော့ ကျနော်တို့ မှန်းလို့မရဘူးပေါ့။ ဒါကြောင့် အဖက်ဖက်က ကြည့်ရင်တော့ စိုးရိမ်စရာကောင်းတဲ့ အခြေအနေလို့တော့ ပြောနိုင်ပါတယ်”ဟု ပြောသည်။
USDP ပါတီကိုတွေ့ရစဉ်
ဗိုလ်ချုပ်မှူးကြီးသန်းရွှေသည် ၂၀၀၈ ဖွဲ့စည်းပုံအခြေခံဥပဒေကို စိတ်ကြိုက်ရေးဆွဲပြီး နိုင်ငံရေးတွင် တပ်မတော်က အစဉ်တစိုက် ပါနေအောင် ထည့်သွင်းပြဋ္ဌာန်းခဲ့ပြီးနောက် ဗိုလ်ချုပ်ကြီးများနှင့် ဗိုလ်ချုပ်များကို အငြိမ်းစားပေး၍ USDP ပါတီသို့ စေလွှတ်ကာ ၂၀၁၀ အထွေထွေရွေးကောက်ပွဲအား ဝင်ရောက် ယှဉ်ပြိုင်ခိုင်းခဲ့သည်။
ထို့နောက် USDP သို့ ဗိုလ်ချုပ်ကြီး ရာထူးကနေ အငြိမ်းစားယူပြီး ဝင်ရောက်သွားခဲ့သော ဦးသိန်းစိန်က ဦးဆောင် ကာ အစိုးရဖွဲ့စည်းခဲ့သလို ဦးမင်းအောင်လှိုင်အား တပ်မတော်ကာကွယ်ရေးဦးစီးချုပ် ရာထူးတိုးမြှင့်ပေးကာ ဗိုလ်ချုပ်မှူးကြီးသန်းရွှေနှင့် ဒုတိယဗိုလ်ချုပ်မှူးကြီးမောင်အေးတို့က အနားယူသွားခဲ့သည်။
တပ်မတော်သည် အရပ်သားပေါ်တွင် ယုံကြည်မှုအားနည်းခြင်း၊ USDP မှ ထွက်ပေါ်လာသည့် ကိုယ်စားလှယ်များ က အမိန့်နာခံသည့် အပိုင်းတွင် ပိုအားကောင်းသည်ဟု ယုံကြည်ပုံရကြောင်း ရန်ကုန်စောင့်ကြည့်အဖွဲ့ဥက္ကဋ္ဌ ဒေါက်တာညိုညိုသင်းက CNI သတင်းဌာနသို့ ပြောသည်.
၎င်းက “တပ်ကို တောက်လျှောက် လေ့လာတဲ့အခါမှာ သာမန်အားဖြင့် အရပ်သားပေါ်မှာ စိတ်ချရတဲ့ အပိုင်းမှာ နည်းနည်း အားနည်းတယ်လေ၊ ဒီအရပ်သားတွေထက်ပေါ့ တပ်က ပုဂ္ဂိုလ်များက ပိုပြီးတော့ ဘာမဆို စည်းကမ်း တကျနဲ့ အမိန့်နာခံမှု ကောင်းကောင်း အလုပ်လုပ်နိုင်တယ်လို့ ယုံကြည်ထားတာကို တွေ့ရတယ်လေ။ USDP အနေနဲ့ ထွက်ပေါ်လာတဲ့ ကိုယ်စားလှယ်တွေကလည်း အမိန့်နာခံတဲ့ အပိုင်းမှာ ပိုပြီးအားကောင်းမယ်လို့ ယုံကြည် ပုံရတယ်လေ။ လာမယ့် လွှတ်တော်မှာ စနစ်တကျနဲ့ သေသေချာချာ ပြင်ဆင်ပြီးတော့ လွှတ်တော်ကြီးကို မောင်းတင်မယ့် သဘောလားတော့ တွေးမိတယ်။ တပ်မတော်က အငြိမ်းစားယူလို့ရှိရင် USDP ပါတီထဲ သွားကြတဲ့ အစဥ်အလာရှိတယ်လေ။ USDP နဲ့တပ်မတော်က တစ်ခုတည်းလိုပဲ၊ တစ်ဖွဲ့တည်းလိုပဲ။ ပြည်သူလူထု အများစု ကလည်း ယုံကြည်ကြတယ်။ USDP ရဲ့မြစ်ဖျားခံရာ သန္ဓေတည်ရာကို ကြည့်မယ်ဆိုရင် တပ်မတော် ဗိုလ်ချုပ်ကြီး များက တည်ထောင်ခဲ့တာ ဖြစ်တော့ပေါ့နော်။ တပ်မတော် အနေနဲ့ကလည်း USDP လွဲပြီး တခြားသော အရပ်သား ဦးဆောင်တဲ့ ပါတီတွေအပေါ်မှာ ယုံကြည်ကိုးစားလိုဟန် မရှိဘူးပေါ့ USDP ပါတီကိုပဲ သွားကြတယ်လို့တော့ အန်တီက မြင်တယ်လေနော်”ဟု ပြောသည်။
အစိုးရအဖွဲ့ဝန်ကြီးများကိုတွေ့ရစဉ်
ဗိုလ်ချုပ်မှူးကြီးသန်းရွှေသည် ၁၉၉၃ ခုနှစ်က ပြည်ထောင်စုကြံ့ခိုင်ရေးနှင့်ဖွံ့ဖြိုးရေးအသင်းကို တည်ထောင်ခဲ့ပြီး လူမှုရေးအသင်းအဖွဲ့ တစ်ခုအနေဖြင့် လှုပ်ရှားခဲ့သော်လည်း ၂၀၁၀ အထွေထွေရွေးကောက်ပွဲ ကျင်းပမည်ဆိုသည့် အခါမှာတော့ စစ်ဗိုလ်ချုပ်ကြီးများကို အငြိမ်းစားပေးကာ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ(USDP)အဖြစ် ပြောင်းလဲ၍ ရွေးကောက်ပွဲ ဝင်စေခဲ့သည်။
ထို့နောက် ၂၀၁၅ အထွေထွေရွေးကောက်ပွဲ ကျင်းပစဉ်ကလည်း တပ်မတော်ကနေ စစ်ဗိုလ်ချုပ်များကို USDP ပါတီထံသို့ စေလွှတ်၍ ရွေးကောက်ပွဲ ဝင်ရောက်ယှဉ်ပြိုင်စေခဲ့သလို ယခု ၂၀၂၅ အထွေထွေးရွေးကောက်ပွဲတွင် လည်း စစ်ဗိုလ်ချုပ်ကြီးများအား USDP ပါတီသို့ စေလွှတ်ကာ ရွေးကောက်ပွဲဝင်ပြိုင်ရန် ဗိုလ်ချုပ်မှူးကြီးမင်းအောင် လှိုင်က စီစဉ်နေကြောင်း နေပြည်တော်ဘက်မှ သတင်းများထွက်နေသည်။
လက်ရှိတွင် USDP ပါတီသို့ စေလွှတ်ခံထားရသော စစ်ဗိုလ်ချုပ်များမှာ အငြိမ်းစားယူသွားကြပြီးဖြစ်သော ဗိုလ်ချုပ်ကြီးအောင်လင်းဒွေး(ငြိမ်း)၊ ဗိုလ်ချုပ်ကြီးတင်အောင်စန်း(ငြိမ်း)၊ ဗိုလ်ချုပ်ကြီးမြထွန်းဦး(ငြိမ်း)၊ ဒုတိယ ဗိုလ်ချုပ်ကြီး ကံမြင့်သန်း(ငြိမ်း)၊ ဒုတိယဗိုလ်ချုပ်ကြီးဖုန်းမြတ်(ငြိမ်း)၊ ဒုတိယဗိုလ်ချုပ်ကြီးသက်ပုံ၊ ဒုတိယဗိုလ်ချုပ် ကြီး တေဇကျော်၊ ဒုတိယဗိုလ်ချုပ်ကြီး လင်းအောင်(ငြိမ်း)၊ ဒုတိယဗိုလ်ချုပ်ကြီး စိုးတင့်နိုင်(ငြိမ်း)၊ ဗိုလ်ချုပ်ဇော်နိုင် ဦး(ငြိမ်း)တို့ အပါအဝင် အစိုးရအဖွဲ့ဝန်ကြီး တချို့လည်း ပါဝင်ကြကြောင်း သတင်းများထွက်ပေါ်နေသည်။
မြန်မာနိုင်ငံတွင် ၂၀၂၅ ခုနှစ်၊ ဒီဇင်ဘာ ၂၈ ရက်၌ မြို့နယ် ၁၀၂ မြို့နယ်မှာ ရွေးကောက်ပွဲ အပိုင်း(၁)ကို စတင် ကျင်းပမည်ဖြစ်ပြီး ကျန် မဲဆန္ဒနယ်များကိုတော့ ၂၀၂၆ ခုနှစ်၊ ဇန်နဝါရီလတွင် ဆက်လက်ကျင်းပမည်ဖြစ်သည်။
