CNI News
၂၀၂၅ ခုနှစ်၊ စက်တင်ဘာ ၂၂
KIA သည် ကချင်ပြည်နယ်၊ ဗန်းမော်မြို့သိမ်း တိုက်ပွဲဖော်ဆောင်နေမှု ရှုံးနိမ့်နိုင်ပြီး မြန်မာ့တပ်မတော်ဘက်က သူပုန်မမွေးရန်လိုအပ်ကြောင်း စစ်ရေးနှင့်နိုင်ငံရေးအကဲခတ်များက ပြောသည်။
ကချင်ပြည်နယ်၊ ဗန်းမော်မြို့၌ ကချင်လွတ်လပ်ရေးတပ်မတော် (KIA) နှင့် PDF ပူးပေါင်းတပ်ဖွဲ့များသည် မြို့သိမ်း တိုက်ပွဲ ဆင်နွှဲနေရာတွင် မြန်မာ့တပ်မတော်ဘက်မှ အသာစီး ပြန်ရကာ နေရာအချို့ကို ပြန်လည် ထိန်းချုပ်နိုင်ခဲ့ သည်။
ထိုဗန်းမော် တိုက်ပွဲတွင် KIA ဘက်မှ ရှုံးမှာဖြစ်ပြီး မြန်မာ့တပ်မတော် အနေဖြင့်လည်း သူပုန် မမွေးရန် လိုအပ် ကြောင်း တိုင်းလိုင် (ရှမ်းနီ) အမျိုးသားများ ဖွံ့ဖြိုးတိုးတက်ရေးပါတီ (TNDP) မှ ဥက္ကဋ္ဌ စိုင်းဋ္ဌေးအောင်က CNI သတင်းဌာနသို့ ပြောသည်။
၎င်းက “ဗန်းမော်ကတော့ KIA ဘက်က ရှုံးမှာပါ။ ဘာကြောင့်လဲဆိုတော့ တဖြေးဖြေးနဲ့ပေါ့။ တပ်မတော်ဘက် ကလည်း သူပုန်မမွေးဖို့ လိုအပ်တာပေါ့။ ချေမှုန်းမယ်ဆိုလည်း အပြီးသတ် ချေမှုန်းနိုင်မှသာ တိုင်းပြည် အေးချမ်း ဖွံ့ဖြိုး တိုးတက်ရေးကို တည်ဆောက်နိုင်မှာ ဖြစ်ပါတယ်။ သူပုန်က အားနည်းပြီဆိုရင် သူတို့ကနေပြီးမှ ငြိမ်းချမ်း ရေးစကား ကမ်းလှမ်းလိုက်၊ လိုက်လျောထားလိုက်။ အဲဒီအခါကြတော့ ဟိုဘက်က အားမွေးလိုက် အားပြည့်ရင် ပြန်တိုက်လိုက်နဲ့ ပြည်သူပဲနစ်နာပါတယ် ဒီကြားထဲမှာ။ စစ်မက် မဖြစ်ပွားဘဲနဲ့သာ နိုင်ငံရဲ့ ဖွံ့ဖြိုးတိုးတက်ရေးကို ဆောင်ရွက်နိုင်မှာ ဖြစ်ပါတယ်။ အခု ဗန်းမော် အခြေအနေကတော့ ဗန်းမော်ကနေ စပြီးမှတော့ KIA အကုန်လုံး ချုပ်ငြိမ်းသွားအောင် နိုင်ငံတော် အစိုးရက ဆောင်ရွက်သင့်တယ်လို့ ကျနော့် အနေနဲ့မြင်တယ်”ဟု ပြောသည်။
KIA – PDF ပူးပေါင်းတပ်ဖွဲ့ကို တွေ့ရစဉ်
ဗန်းမော်မြို့ကနေ ပြန်လည်ဆုတ်ခွာနေရချိန်မှာပဲ KIA သည် မြန်မာ့တပ်မတော်နှင့် ငြိမ်းချမ်းရေး ဆွေးနွေးရန် အတွက် ဆက်သွယ် ကမ်းလှမ်းမှုများရှိနေပြီး နှစ်ဖက် ဆွေးနွေးနိုင်မည့် အခြေအနေကို ညှိနှိုင်းနေကြသည်။
ဗန်းမော်မြို့အား ထိန်းချုပ်နိုင်ရေးအတွက် KIA၊ AA၊ PDF ပူးပေါင်း၍ ၂၀၂၄ ခုနှစ်၊ ဒီဇင်ဘာလတွင် စတင် ထိုးစစ်ဆင် တိုက်ခိုက်ခဲ့ပြီးနောက် လေဆိပ်၊ ဗန်းမော်တက္ကသိုလ်နှင့် မြန်မာ့တပ်မတော်၏ စစ်စခန်းတချို့ကို သိမ်းပိုက်ခဲ့သည်။
ထို့နောက် မြန်မာ့တပ်မတော်က ၂၀၂၄ ခုနှစ်၊ ဒီဇင်ဘာလမှ ၂၀၂၅ ခုနှစ်၊ ဇူလိုင်လအထိ ၈ လတိတိ ခုခံတိုက်ခိုက်ခဲ့ ပြီးနောက် ဩဂုတ် ၄ ရက်မှ စတင်၍ စစ်အင်အားဖြည့်ကာ စစ်ကြောင်း ၇ ကြောင်းဖြင့် ပြန်လည်ထိုးစစ်ဆင်တိုက် ခိုက်ခဲ့သည်။
ထို့ကြောင့် ၂၀၂၅ ခုနှစ်၊ ဩဂုတ် ၄ ရက်မှ စက်တင်ဘာ ၁၁ ရက်အတွင်း KIA-AA-PDF များ စိုးမိုးထားသည့် ဗန်းမော်မြို့ အနီးဝန်းကျင်ရှိ တပ်ဌာနချုပ်နေရာများ၊ ရပ်ကွက်၊ ကျေးရွာနှင့် စခန်းကုန်း နေရာအသီးသီးကို မြန်မာ့တပ်မတော်က ပြန်လည်ထိန်းချုပ်ခဲ့ကြောင်း ထုတ်ပြန်ထားသည်။
ဗန်းမော်မြို့သည် ဧရာဝတီမြစ် အရှေ့ဘက်ခြမ်းရှိ နယ်စပ်ဒေသ ကုန်သွယ်ရေးအတွက် အရေးပါသော မြို့ဖြစ်သည်။
အဆိုပါ ကုန်သွယ်ရေးလမ်းကြောင်းမှာ ဗန်းမော်-တာဆိုင်း-မြို့သစ်-လိုင်ဇာလမ်းကြောင်း၊ ဗန်းမော်-မိုးမောက်-တာဆိုင်း-လိုင်ဇာလမ်းကြောင်း၊ ဗန်းမော်- မိုးမောက်-လွယ်ဂျယ်လမ်းကြောင်း တို့ဖြစ်ပြီး ထိုကုန်သွယ်ရေး လမ်းကြောင်းများကို KIA-AA-PDF ပူးပေါင်းတပ်ဖွဲ့က ထိန်းချုပ်နိုင်ရေး ကြိုးပမ်းခဲ့ခြင်း ဖြစ်သည်။
ဗန်းမော်မြို့အတွင်း စစ်တပ်က ပြန်လည် ထိုးစစ်ဆင် တိုက်ခိုက်မှုကို ပြသထားစဉ်
မြန်မာ့တပ်မတော် အနေဖြင့် လက်နက်ကိုင်အဖွဲ့အစည်းများကို အပြီးသတ် ချေမှုန်း၍ရသော်လည်း မချေမှုန်းဘဲ သူပုန်အဖြစ် မွေးထားသည်ဟု လူအများက ထင်ကြပြီး တကယ်တမ်းမှာ မြန်မာ့တပ်မတော်ဘက်မှ သူပုန်မမွေး ကြောင်း မြန်မာ့နိုင်ငံရေးလေ့လာသုံးသပ်သူ ဒေါက်တာအောင်မျိုးက CNI သတင်းဌာနသို့ ပြောသည်။
၎င်းက “မွေးတယ်၊ မမွေးဘူးဆိုတာက အဲဒါကခက်တယ်။ လူတွေကထင်တာက တပ်မတော်က မွေးတယ်လို့ ထင် တယ်။ တကယ့်တကယ်ကြ တပ်မတော်က မမွေးပါဘူး။ မွေးလို့လည်း မရပါဘူး။ အမေရိကန်တွေလည်း တာလီဘန်တွေကို မမွေးပါဘူး။ အဲဒီတော့ ဘာလဲဆိုတော့ ကိုယ့်အိမ် ကိုယ့်ခြံဝန်းထဲတောင်မှ သစ်ပင်တွေပေါရင်၊ ခြုံတွေပေါရင် တူတူပုန်းတမ်း ကစားလို့ ရတယ်လေ၊ ဒီသဘောပါပဲ။ အဲဒီတော့ အားလုံးက ဒီလောက် ကျယ်တဲ့ နယ်ပယ်ကြီးထဲမှာ ပုန်းအောင်းပြီးတော့ ပြေးပြေး လုပ်လို့ရတယ်။ လူကြားထဲမှာ ပျောက်နေလို့ရတယ်။ ပြောက်ကျားစစ် ဆင်နွှဲလို့ရတယ်။ အဲဒီတော့ တပ်မတော်ကလည်း မွေးမထားပါဘူး။ သို့သော်လည်း စစ်ရဲ့ ပုံစံ ကိုက ဒါက ပြည်တွင်း ပြောက်ကျားစစ်ဆိုတာ အမြစ်ပြတ်သွားဖို့က နိုင်ငံရေးဘက်က ပါမှရတာပေါ့။ ဒါကိုလည်း တစ်ဖက်ကလည်း နိုင်ငံရေးဘက်က ပါအောင်လို့ ရွေးကောက်ပွဲ လုပ်တယ်။ နောက်ကြ PR တို့ဘာတို့ ကိုယ်ပိုင် အုပ်ချုပ်ခွင့်တို့၊ အခြေခံဥပဒေ ပြင်ဆင်တာတို့ ဒါလုပ်တယ်ဆိုရင်တော့ တဖြေးဖြေးနဲ့ ပပျောက်သွားမယ်ဆိုပြီး နိုင်ငံရေးဘက်ကနေ ကစားပေးတယ်လို့ ယူဆတယ်လေ” ဟု ပြောသည်။
KIA-AA-PDF ပူးပေါင်းတပ်ဖွဲ့နှင့် မြန်မာ့တပ်မတော်ကြား ၂၀၂၄ ခုနှစ်၊ ဒီဇင်ဘာ ၄ ရက်မှ ၂၀၂၅ ခုနှစ်၊ စက်တင်ဘာ ၁၁ ရက်အတွင်း တိုက်ပွဲကြီး ၁၆ ကြိမ်၊ ထိတွေ့မှုပေါင်း ၄၉၀ ကြိမ် ဖြစ်ပွားခဲ့ကြောင်း၊ ထိုတိုက်ပွဲများအတွင်း KIA-AA- PDF ဘက်က အလောင်း ၁၆၃ လောင်း၊ လက်နက်မျိုးစုံ ၁၇၈ လက်နှင့် ဆက်စပ်ပစ္စည်းများ သိမ်းပိုက်ရရှိခဲ့ ကြောင်း၊ တပ်မတော်ဘက်ကလည်း အရာရှိ/စစ်သည် အချို့ ကျဆုံးခဲ့ကြောင်း မြန်မာ့တပ်မတော်ဘက်က ထုတ်ပြန်ခဲ့သည်။
လက်ရှိတွင် စစ်ကိုင်းတိုင်းဒေသကြီး အထက်ပိုင်း ကချင်ပြည်နယ်ဝင်ပေါက် ဗန်းမောက်မြို့ သိမ်းပိုက်နိုင်ရေး အတွက် ကချင်လွတ်လပ်ရေးတပ်မတော်(KIA)နှင့် ပြည်သူ့ကာကွယ်ရေးတပ်ဖွဲ့(PDF) ပူးပေါင်း၍ ၂၀၂၅ ခုနှစ်၊ စက်တင်ဘာ ၁၅ ရက်မှ စတင်ကာ ထိုးစစ်ဆင် တိုက်ခိုက်နေကြောင်း သိရသည်။
