CNI News
၂၀၂၅ ခုနှစ်၊ မေလ ၈
မြန်မာနိုင်ငံတွင် ဖက်ဒရယ်ဒီမိုကရေစီ တည်ဆောက်ရေးလမ်းကြောင်းအား သွားရာတွင် လက်ရှိမှာ လက်နက်ကိုင် ဖက်ဒရယ်ပုံစံမျိုး ဖြစ်နေပြီး လက်နက်နှင့် ဖက်ဒရယ်တွဲနေသည့် အခြေအနေသည် အန္တရာယ်ကြီးမားကြောင်း ပြည်သူ့ပါတီ(PP)ဥက္ကဋ္ဌ ဦးကိုကိုကြီးက CNI သတင်းဌာနသို့ ပြောသည်။
ထို့ပြင် ဒီမိုကရေစီမရှိဘဲ ဖက်ဒရယ်သည်လည်း မဖြစ်နိုင်ကြောင်း၊ ထို့ကြောင့် ဒီမိုကရေစီနှင့် ဖက်ဒရယ်သည် မျှမျှတတ တွဲ၍သွားရန် လိုအပ်ကြောင်း ၎င်းက ပြောသည်။
ဦးကိုကိုကြီးက “တစ်နိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ်မှာ တိုင်းရင်းသားတွေဘက်က တောင်းဆိုတဲ့ စကားလုံး ဝေါဟာရက ဒီမိုကရေစီနဲ့ ဖက်ဒရယ်ကို အခြေခံသောပြည်ထောင်စု၊ နောက်တော့ ဒီမိုကရေစီ ဖက်ဒရယ်မဟုတ်ဘူး၊ ဖက်ဒရယ်ဒီမိုကရေစီဆိုပြီးတော့ တစ်ခါစကားလုံးရှေ့နောက် ပြောင်းကြတယ်၊ အဲဒီတော့ အခုလက်ရှိ အခြေအနေကတော့ ပြောရရင်တော့ Military Federal ဖြစ်သွားပြီ၊ လက်နက်များများရှိရင် နယ်မြေ များများ သိမ်းနိုင်လို့ရှိရင် ကိုယ့်နယ်ကို ကိုယ်စိတ်ကြိုက် လုပ်နိုင်တယ်ဆိုတဲ့ အခြေအနေ ရောက်သွားတော့ ဒီမိုကရေစီက ပျောက်သလိုဖြစ်သွားပြီ၊ အဲဒီတော့ ဒါကြောင့်မို့လို့ ကျနော်တို့က ဒီမိုကရေစီ မရှိဘဲနဲ့ ဖက်ဒရယ် ဆိုတာလည်း မဖြစ်နိုင်ဘူး၊ အဲဒီတော့ ဖက်ဒရယ်မပါဘဲနဲ့ များတဲ့လူက နိုင်ပြီးတော့ သူစိတ်ကြိုက် လုပ်ချင်တာ လုပ်မယ်ဆိုရင်လည်း ဖက်ဒရယ်ရဲ့ အနှစ်သာရ ပျက်စီးမယ်၊ ဒါကြောင့်မို့လို့ ဒီမိုကရေစီနဲ့ ဖက်ဒရယ်ဟာ မျှမျှတတ နဲ့ တွဲပြီးသွားဖို့လိုတယ်၊ အဲဒီလို မဟုတ်ရင်တော့ အခုအခြေအနေက ဒီမိုကရေစီက ပျောက်သလောက်ကို ဖြစ်သွား ပြီ၊ အဲဒီတော့ လက်နက်နဲ့ ဖက်ဒရယ်နဲ့ တွဲနေတဲ့ အခြေအနေဟာ သိပ်အန္တရာယ်ကြီးတယ်လို့ မြင်ပါတယ်” ဟု ပြောသည်။
ဦးကိုကိုကြီးနဲ့ နစကဥက္ကဋ္ဌကို တွေ့ရစဉ်
အနာဂတ် ဖက်ဒရယ်ဒီမိုကရေစီပြည်ထောင်စု တည်ဆောက်ရေးအတွက် ပြည်နယ်အားကောင်းရေးမူမှ ပြည်ထောင်စု အားကောင်းရေးမူဖြင့်သွားရန် သဘောတူညီချက် ၄ ချက်အား ချမှတ်နိုင်ခဲ့ကြောင်း ကရင်မျိုးသား အစည်းအရုံး (KNU)၊ ကရင်နီအမျိုးသားတိုးတက်ရေးပါတီ (KNPP)၊ ချင်းအမျိုးသားတပ်ဦး (CNF) အပါအဝင် လက်နက်ကိုင်တော်လှန်ရေးအဖွဲ့ ၉ ဖွဲ့က ၂၀၂၄ ခုနှစ်၊ စက်တင်ဘာ ၁၉ ရက်တွင် ထုတ်ပြန်ခဲ့သည်။
အဆိုပါ လက်နက်ကိုင်အဖွဲ့များသည် မြန်မာ့တပ်မတော်နှင့် တိုက်ပွဲများ အပြင်းအထန်ဖြစ်ပွားနေပြီး မြန်မာ့တပ်မတော်နှင့်နစက ဖြုတ်ချရေး ကြိုးပမ်းလျက်ရှိသည်။
ထို့နောက် လက်နက်ကိုင် တိုက်ခိုက်ခြင်းဖြင့် နယ်မြေသိမ်းပိုက်ရေး ဆင်နွှဲလျက်ရှိကြောင်း၊ ထိုနယ်မြေများကို စုစည်း၍ ကိုယ်ပိုင်အုပ်ချုပ်ရေးထူထောင်နိုင်ရန် ကြိုးပမ်းလျက်ရှိနေကြသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကတော့ ဒီမိုကရေစီနှင့်ဖက်ဒရယ်အုပ်ချုပ်ရေး ဆောင်ရွက်ရာတွင် ဒေသကို အခြေခံသည့် ဖက်ဒရယ်စနစ်သာလျှင် အသင့်တော်ဆုံးဖြစ်သည်ဟု ၂၀၂၃ ခုနှစ်၊ စက်တင်ဘာ ၁၀ ရက် က ပြောကြားခဲ့သည်။
ထို့ပြင် ငြိမ်းချမ်းရေး ဆွေးနွေးမှုများတွင် တိုင်းရင်းသားလက်နက်ကိုင် တပ်ဖွဲ့များအနေဖြင့် တိုင်းရင်းသားတို့၏ အရေးကိုသာ တောင်းဆိုလျက်ရှိပြီး ဒေသအရေးကို တောင်းဆိုမှု အားနည်းကြောင်း၊ လူတစ်စုကို ကိုယ်စားပြု သည့် အဖွဲ့အစည်းများ ဖြစ်၍မရဘဲ ဒေသကိုကိုယ်စားပြုသည့် အဖွဲ့အစည်းများ ဖြစ်ရန်လိုကြောင်း၊ တိုင်းရင်း သား လက်နက်ကိုင်များသည် ကိုယ်ပိုင်နယ်မြေများ ရရှိရေး ကြိုးပမ်းနေကြ၍ စစ်ပွဲဆက် ဆင်နွှဲရမည်ဟု နစကဥက္ကဋ္ဌက ပြောကြားခဲ့သည်။
NCA (၈)နှစ်ပြည့် အခမ်းအနားမှာ တက်ရောက်လာသူများကိုတွေ့ရစဉ်
လက်နက်ကိုင်ရှိသမျှ ကာလပတ်လုံး ဖက်ဒရယ်လည်း မရနိုင်သလို ဒီမိုကရေစီလည်း မရနိုင်ကြောင်း၊ ဖက်ဒရယ် စနစ်အား လက်နက်ကိုင်လမ်းစဥ်ဖြင့် အတင်းအကြပ် လုပ်ယူနေပါက ဖက်ဒရယ်နှင့် ဝေးနေမည်ဖြစ်ကြောင်း တိုင်းလိုင် (ရှမ်းနီ) အမျိုးသားဖွံ့ဖြိုး တိုးတက်ရေးပါတီ (TNDP) မှ ဥက္ကဋ္ဌ ဦးစိုင်းဋ္ဌေးအောင်က CNI သတင်းဌာနသို့ ပြောသည်။
၎င်းက “ဥပဒေဘောင်ထဲကနေ ရှိတဲ့လက်နက်ကိုင်လောက်ပဲ ထားသင့်တယ်၊ ဖက်ဒရယ်ကိစ္စမှာ အခုပြည်နယ်ရဲတို့ ဘာတို့ပေါ့၊ အခုလက်နက်ကိုင်ရှိတာတော့ ကြည့်ပါလား စည်းမရှိ၊ကမ်းမရှိ လက်နက်ကိုင်ရှိနေသမျှ ကာလပတ် လုံးကတော့ ဖက်ဒရယ်လည်း မရနိုင်ဘူး၊ ဒီမိုကရေစီလည်း မရနိုင်ဘူး။ ဖက်ဒရယ်လို့ ပြောလိုက်တာနဲ့ တပြိုင်နက် ကျနော်တို့က ဘာရမလဲဆိုတော့ ကိုယ့်ပြည်နယ်နဲ့ကိုယ် စီမံခန့်ခွဲခွင့်တွေရမယ်၊ နောက်ဗဟိုအစိုးရနဲ့ ချိတ်ဆက်ပြီး မှ ကျနော်တို့လုပ်မယ်၊ ပြောပိုင်ခွင့် ဆိုပိုင်ခွင့်တွေ ရလာတာပေါ့နော်၊ ဗဟိုရဲ့ ခွဲတမ်းတစ်ခုပဲ မဟုတ်ဘဲနဲ့ ပြည်နယ် ရဲ့ လုပ်ပိုင်ခွင့်တွေ တော်တော်များများ ရခဲ့ကြမှာပါ ဖက်ဒရယ်လို့ ပြောလိုက်ပြီဆိုရင်တော့။ အဲဒါကို လက်နက် ကိုင် အဖွဲ့အစည်းတွေက အတင်းအကြပ်လုပ်နေတယ် ဆိုရင်တော့ ဖက်ဒရယ်နဲ့လည်း ဝေးမှာပါ။ အဓိက အဲဒီ လက်နက်ကိုင် ဖြစ်နေသမျှကာလပတ်လုံး ကျနော်တို့ အာဏာရှင်အောက်မှာပဲ နေကြရမှာ ဖြစ်ပါတယ်” ဟု ပြော သည်။
ဖက်ဒရယ်သည် အဖြေတစ်ခုဖြစ်သည်ဟု သတ်မှတ်ထားသောကြောင့် ဖက်ဒရယ်စနစ်အတိုင်း သွားကြရန် လုပ်ဆောင်နေကြကြောင်း၊ သို့သော် ထိုနည်းလမ်းအား ကျော်လွန်၍ စဥ်းစားမည်ဆိုလျှင် ပြည်ထောင်စု ပြိုကွဲမည် ဖြစ်ကြောင်း၊ ထိုအကျိုးသက်ရောက်မှုသည် ပြည်တွင်းရေးတွင်သာမက အရှေ့တောင်အာရှ တစ်ခုလုံးပင် ပြဿနာ တတ်နိုင်ကြောင်း စစ်ရေးနှင့်နိုင်ငံရေးအကဲခတ်များက သုံးသပ်ကြသည်။
မြန်မာနိုင်ငံတွင် ဖက်ဒရယ်နှင့်ဒီမိုကရေစီကို အခြေခံသည့် ပြည်ထောင်စုအား တည်ဆောက်ရန် ကြိုးပမ်းနေကြ သည်။
တချို့သော တိုင်းရင်းသားလက်နက်ကိုင်များကတော့ ကွန်ဖက်ဒရေးရှင်း၊ လွတ်လပ်ရေးဆိုသော ရည်မှန်းချက်များ အထိ ထုတ်ဖော်ပြောဆိုလာနေကြသည်။
လက်ရှိ မြန်မာနိုင်ငံတွင် “ဝ”တပ်ဖွဲ့(UWSA)နှင့် မိုင်းလားတပ်ဖွဲ့ (NDAA)တို့သည် လက်နက်ကိုင်တော်လှန်ရေးက နေ ဖက်ဒရယ်ထက်ကျော်လွန်သော ကွန်ဖက်ဒရေးရှင်းအဆင့်ကို ရရှိထားပြီ အုပ်ချုပ်လျက်ရှိနေသည်။
အလားတူ ကိုးကန့်တပ်ဖွဲ့(MNDAA)ကလည်း ၂၀၀၉ ခုနှစ်က လက်လွတ်ခဲ့ရသော အထူးဒေသ(၁)ကို လက်နက် ကိုင် တော်လှန်ရေးနည်းလမ်းဖြင့် ပြန်လည် ရယူထားပြီဖြစ်သည်။
ထို့နောက် TNLA၊ AA၊ KIA၊ CNF စသည့် လက်နက်ကိုင်များကလည်း လက်နက်ကိုင် တော်လှန်ရေးကနေ ၎င်းတို့၏ အုပ်ချုပ်ရေးစနစ်တစ်ခုကို ရရှိအောင် ကြိုးပမ်းလျက်ရှိနေသည်။
