CNI Sport News
၂၀၂၄ ခုနှစ်၊ မေလ ၄
ဒေါ့မွန်အသင်း ကွင်းလယ်လူ မာကိုရူးစ်ဟာ အသင်းနဲ့ စာချုပ်သက်တမ်း မတိုးတော့ဘဲ စာချုပ်ကုန်ဆုံးမယ့် ဒီရာသီအကုန်မှာ ထွက်ခွာမယ်လို့ ပြောခဲ့ပါတယ်။
မာကိုရူးစ်က “ကျနော့်ဘဝရဲ့ တစ်ဝက်ကျော်ကို ဒီကလပ်မှာ ကုန်ဆုံးခဲ့တာဖြစ်ပြီး ခက်ခဲတဲ့ အခိုက်အတန့်တွေ ရှိခဲ့ပေမယ့် နေ့တိုင်း ပျော်ရွှင်ခဲ့ရပါတယ်။ ရာသီအကုန်မှာ နှုတ်ဆက်ဖို့ ခက်မယ်ဆိုတာ ကျနော်သိပါတယ်။ အခု အချိန်မှာတော့ ရှင်းရှင်းလင်းလင်း ရှိသွားပြီဖြစ်ပြီး ကျနော်တို့ကစားရမယ့် အရေးကြီးပွဲစဉ်တွေကို အပြည့်အဝ အာရုံစိုက်နိုင်တော့မှာပါ”လို့ ပြောပါတယ်။
၂၀၁၂ ခုနှစ်မှာ မိုချန်ဂလာဘတ် အသင်းကနေ ဒေါ့မွန်အသင်းကို ပြန်ပြောင်းလာခဲ့တဲ့ အကယ်ဒမီထွက် မာကိုရူးစ် ဟာ အသင်းမှာ ၁၂ နှစ်ကြာ ကစားပြီးနောက် ထွက်ခွာတော့မှာ ဖြစ်ပါတယ်။
ဒေါ့မွန်အသင်းအတွက် ၄၂၄ ပွဲကစားကာ ၁၆၈ ဂိုးသွင်းယူပြီး ၁၂၈ ဂိုးဖန်တီးထားတဲ့ မာကိုရူးစ်ဟာ ဂျာမန် ပိုကယ်လ်ဖလားနဲ့ စူပါဖလားတို့ကို ၂ ကြိမ်စီ ရယူနိုင်ခဲ့တာပါ။
မာကိုရူးစ်ဟာ နည်းပြဟောင်း ကလော့ပ် လက်အောက်မှာ ဒေါ့မွန်အသင်းနဲ့အတူ ၂၀၁၃ ချန်ပီယံလိဂ်ဗိုလ်လုပွဲကို တက်နိုင်ခဲ့ပါတယ်။
မာကိုရူးစ်ဟာ ဒီရာသီ မစတင်ခင်က ဒေါ့မွန်အသင်းခေါင်းဆောင် ရာထူးကနေ နုတ်ထွက်ခဲ့သေးတာပါ။
ဒေါ့မွန်အသင်းဟာ ဒီရာသီ ဘွန်ဒက်လီဂါပြိုင်ပွဲမှာ အဆင့် ၅ နေရာ ရပ်တည်နေပြီး ချန်ပီယံလိဂ်ပြိုင်ပွဲမှာ ဆီမီးဖိုင်နယ်ကို ရောက်ရှိနေပါတယ်။
ဒေါ့မွန်အသင်းဟာ ချန်ပီယံလိဂ် ဆီမီးဖိုင်နယ် ပထမအကျော့ပွဲစဉ်မှာ ပီအက်စ်ဂျီအသင်းကို ၁ ဂိုး- ဂိုးမရှိနဲ့ အနိုင်ရရှိခဲ့ပြီး ချန်ပီယံလိဂ် ဗိုလ်လုပွဲတက်နိုင်ဖို့ မျှော်လင့်နေတာပါ။
ဒေါ့မွန်အသင်းဟာ ဒီနေ့မှာ ဘွန်ဒက်လီဂါပွဲစဉ်အဖြစ် အော့စ်ဘတ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: ESPN
