CNI Sport News

၂၀၂၂ ခုနှစ်၊ နိုဝင်ဘာ ၂၂

ဆန္ဒပြနေတဲ့ အီရန်ပရိသတ်တွေက သူ့ကစားသမားတွေကို သတ်ဖို့ ကြိုးစားနေတယ်လို့ အီရန်အသင်းနည်းပြ ကားလို့စ်ကွီရော့စ်က ဝေဖန်လိုက်ပါတယ်။

ကားလို့စ်ကွီရော့စ်က “ဒီကလေးတွေ ပြီးခဲ့တဲ့ရက်ပိုင်းက ဘယ်လိုနေထိုင်ခဲ့ရလဲဆိုတာ ခင်ဗျားတို့ တွေးမိမှာ မဟုတ်သလို၊ သိနိုင်မှာလည်းမဟုတ်ပါဘူး။သူတို့ဟာ ဘောလုံးကစားချင်တာကြောင့်သာ ရှိခဲ့တာပါ။ ဘာတွေပဲ လုပ်လုပ်၊ဘာတွေပဲပြောပြော သူတို့က သတ်ပစ်ချင်နေကြတယ်။သူတို့မှာ တိုင်းပြည်နဲ့လူမျိုးအတွက် ကစားပေးဖို့ မျှော်လင့်ချက်တစ်ခုပဲရှိတာပါ” လို့ ပြောခဲ့တာပါ။

အီရန်အသင်းဟာ တနင်္လာနေ့က ကစားခဲ့တဲ့ ကမ္ဘာ့ဖလားပွဲစဉ်မှာ အင်္ဂလန်အသင်းကို ၆ ဂိုး - ၂ ဂိုးနဲ့ အရေးနိမ့် ခဲ့တာဖြစ်ပါတယ်။အီရန်ပရိသတ်တွေရဲ့ လှောင်ပြောင်မှုတွေ၊ အော်ဟစ်မှုတွေကြောင့်လည်း ကြယ်ပွင့် ကစား သမားတွေဟာ နိုင်ငံတော်သီချင်းကို သီဆိုဖို့ ငြင်းဆန်ခဲ့ကြတာပါ။ဒါပေမယ့် ခါလီဖာ နိုင်ငံတကာ အားကစား ကွင်းမှာ ဆန္ဒပြနေတဲ့ ပရိသတ်တွေဟာ ကစားသမားတွေကို ဝေဖန်မှုတွေပြုလုပ်နေဆဲပါပဲ။

ကားလို့စ်ကွီရော့စ်က “ကစားသမားတွေလုပ်ဆောင်ခဲ့တာတွေအတွက် ကျနော်ဂုဏ်ယူပါတယ်။သူတို့တွေဟာ ၂၀၁၄ နဲ့ ၂၀၁၈ မှာ ပရိသတ်တွေရဲ့အားပေးမှုကို အပြည့်အ၀ရရှိခဲ့ပါတယ်။ဒီနေ့ဖြစ်တဲ့အရာတွေကို ခင်ဗျားတို့ လည်း မြင်တွေ့ခဲ့တာပါပဲ။အသင်းကို အားပေးဖို့ အဆင်သင့်မဖြစ်သေးတဲ့ ပရိသတ်တွေအနေနဲ့ အိမ်မှာပဲ နေသင့် ပါတယ်။ကျနော့်ကစားသမားတွေဟာ လက်ရှိအချိန်မှာ အာရုံစူးစိုက်မှုအကောင်းဆုံးမဟုတ်ဘူးဆိုတာ လူတိုင်း သိပါတယ်။သူတို့ဟာ ဒီလိုတွေကြောင့် ဒုက္ခတွေရောက်နေကြတယ်”လို့ ပြောခဲ့တာပါ။

ဒီပွဲမှာ အီရန်ပရိသတ်တွေဟာ နိုင်ငံတော်သီချင်းဖွင့်ချိန်မှာ လှောင်ပြောင်ခဲ့ကြသလို ပရိသတ်တချို့ဟာ “အမျိုးသမီး၊အသက်၊လွတ်လပ်မှု”ဆိုတဲ့ ဆိုင်းဘုတ်တွေကို ကိုင်ဆောင်ထားခဲ့ကြတာဖြစ်ပါတယ်။အီရန်နိုင်ငံမှာ ပြီးခဲ့တဲ့လတွေအတွင်း လူထုဆန္ဒပြပွဲတွေကို ပြင်းထန်စွာ ဖြိုခွင်းမှုတွေနဲ့ ကြုံတွေ့ခဲ့ရတာပါ။အသက် ၂၂ နှစ် အရွယ်ရှိ မာရှာအာမီနီကို ရဲတပ်ဖွဲ့က ဖမ်းဆီးထိန်းသိမ်းထားချိန်မှာ သေဆုံးမှုဖြစ်ပွားခဲ့တာဖြစ်ပါတယ်။

အဲဒါကြောင့် ဆန္ဒပြမှုတွေပြင်းထန်လာခဲ့ပြီး အီရန်လုံခြုံရေးရဲတပ်ဖွဲ့ဝင်တွေရဲ့ ဖြိုခွင်းမှုကြောင့် ဆန္ဒပြသူ ၄၀၀ ကျော်သေဆုံးကာ ၁၆,၈၀၀ ကျော်ဖမ်းဆီးခံခဲ့ရတယ်လို့ လူ့အခွင့်အရေးလှုပ်ရှားသူတွေက ပြောခဲ့ပါတယ်။

Source:Mirror

CNI Sport News

၂၀၂၂ ခုနှစ်၊ နိုဝင်ဘာ ၂၂

အာဂျင်တီးနား အသင်းခေါင်းဆောင် မက်ဆီက သူ့ရဲ့ ကြီးမားတဲ့ အိပ်မက်ကို အကောင်အထည် ဖော်ဖို့အတွက် ဒီကမ္ဘာ့ဖလားပြိုင်ပွဲက နောက်ဆုံး အခွင့်အရေး ဖြစ်တယ်လို့ ပြောလိုက်ပါတယ်။

မက်ဆီက “ ဒါက ကျနော့်ရဲ့ နောက်ဆုံး ကမ္ဘာ့ဖလားဖြစ်နိုင်သလို၊ ကျနော့်မှာ ရှိနေတဲ့ ဒီအိပ်မက်ကြီးကို အကောင် အထည်ဖော်ဖို့အတွက် နောက်ဆုံး အခွင့်အရေးလည်း ဖြစ်နိုင်ပါတယ်။ ရုပ်ပိုင်းဆိုင်ရာလည်း အလွန်ကောင်းမွန် နေပြီး အကောင်းဆုံး အခိုက်အတန့်မှာ ရှိပါတယ်။ ပုဂ္ဂိုလ်ရေးအရရော ရုပ်ပိုင်းဆိုင်ရာအရပါ ဘာပြဿနာမှ ရှိမနေ ပါဘူး”လို့ ပြောခဲ့တာပါ။

အသက် ၃၅ နှစ်အရွယ်ရှိ မက်ဆီဟာ ဒီကမ္ဘာ့ဖလားပြိုင်ပွဲကို ၅ ကြိမ်မြောက်အဖြစ် ဝင်ရောက် ယှဉ်ပြိုင်မှာဖြစ်ပြီး သူ့ရဲ့ နောက်ဆုံး ကမ္ဘာ့ဖလားပြိုင်ပွဲလို့ ပြောထားတာ ဖြစ်ပါတယ်။

အာဂျင်တီးနားအသင်းနဲ့ မက်ဆီ လေ့ကျင့်ခန်းလုပ်နေစဉ် (AFA)

ဘောလွန်းဒီအောဆုကို ၇ ကြိမ် ရရှိထားတဲ့ မက်ဆီဟာ ကမ္ဘာ့ဖလားပြိုင်ပွဲကို တစ်ကြိမ်မှ ရယူနိုင်ခြင်း မရှိသေး တာပါ။ အာဂျင်တီးနားအသင်း ခေါင်းဆောင်ဟာ ၂၀၁၄ က ကမ္ဘာ့ဖလားရဖို့ နီးစပ်ခဲ့ပြီး ဗိုလ်လုပွဲမှာ ဂျာမနီကို အရေးနိမ့်ခဲ့တာ ဖြစ်ပါတယ်။
မက်ဆီက “ ကျနော့်ကြောင့် အာဂျင်တီးနား မဟုတ်တဲ့ လူတွေအများအပြားက အာဂျင်တီးနားကို ချန်ပီယံ ဖြစ်စေ ချင်ကြတာက လှပတဲ့အရာပါ။ ကျနော့်ရဲ့ ကစားသမားဘဝ တစ်လျှောက် ကမ္ဘာတစ်ဝှမ်းဆီကနေ ရရှိခဲ့တဲ့ ချစ်ခြင်း မေတ္တာတွေအတွက် ကျေးဇူးတင်ပါတယ်။ ကျနော်တို့ အခြားကမ္ဘာ့ဖလားတွေထက် ပိုပြီးကောင်းမလားဆိုတာ မသိပါဘူး။ ကျနော်တို့ဟာ ကိုယ့်ကိုယ်ကို ပျော်ရွှင်စွာနဲ့ လုပ်ဆောင်သွားမယ်”လို့ ပြောပါတယ်။

အာဂျင်တီးနား အသင်းဟာ ကာတာကမ္ဘာ့ဖလားပြိုင်ပွဲမှာ ဗိုလ်စွဲဖို့ ရေပန်းအစားဆုံး အသင်းတွေထဲက တစ်သင်း အဖြစ် ရှိနေတာ ဖြစ်ပါတယ်။ အာဂျင်တီးနားအသင်းဟာ ကမ္ဘာ့ဖလားချန်ပီယံဆုကို ၂ ကြိမ် ရရှိထားပြီး နောက်ဆုံး ရရှိခဲ့တာက ၁၉၈၆ က ဖြစ်တာကြောင့် အခုနှစ်ပြိုင်ပွဲမှာ ချန်ပီယံဆုရယူဖို့ တစ်သင်းလုံးက စိတ်အားထက်သန် နေ တာပါ။

အာဂျင်တီးနားအသင်းဟာ ဒီပြိုင်ပွဲမှာ ဆော်ဒီ၊ မက္ကဆီကို၊ ပိုလန်တို့နဲ့ တစ်အုပ်စုတည်း ကျရောက်နေတာ ဖြစ်ပါ တယ်။

Source: BBC

CNI Sport News

၂၀၂၂ ခုနှစ်၊ နိုဝင်ဘာ ၂၁

ဂျိူကိုဗစ်ဟာ ATP Finals ပြိုင်ပွဲဗိုလ်လုပွဲအဖြစ် ကစားခဲ့တဲ့ပွဲမှာ ကတ်စပါရုဒ်ကို အနိုင်ရပြီး ချန်ပီယံဆုကို ၆ ကြိမ်မြောက်ရယူကာ ဖက်ဒဲရားရဲ့ စံချိန်နဲ့ တူညီသွားခဲ့ပြီဖြစ်ပါတယ်။

ဂျိူကိုဗစ်ဟာ ဗိုလ်လုပွဲမှာ ကတ်စပါရုဒ်ကို ၇-၅၊ ၆-၃ နဲ့ အနိုင်ရရှိခဲ့ကာ ရာသီပိတ်နောက်ဆုံးပွဲကို ချန်ပီယံဆု ရယူကာ အဆုံးသတ်နိုင်ခဲ့တာပါ။ဂျိူကိုဗစ်ဟာ ATP Finals ချန်ပီယံဆုကို ၂၀၁၅ က နောက်ဆုံး ရယူခဲ့တာဖြစ်ပြီး အခုတစ်ကြိမ်ရယူနိုင်ခဲ့တာကြောင့် ဖက်ဒဲရားနဲ့အတူ ဒီပြိုင်ပွဲမှာ အကြိမ်အရေအတွက် အများဆုံးချန်ပီယံဆုကို ရယူနိုင်တဲ့သူ ဖြစ်လာခဲ့ပါတယ်။

ဒီချန်ပီယံဆုကို ၇ နှစ်ကြာပြီးမှ ပထမဆုံးအကြိမ်ပြန်လည်ရယူနိုင်ခဲ့တာက သူ့အတွက် ပိုပြီးချိုမြိန်တယ်လို့ ဆားဘီးယားတင်းနစ်သမားက ပြောခဲ့တာပါ။ဂျိူကိုဗစ်က “ဒါဟာ အနက်ရှိုင်းဆုံးကျေနပ်စရာတစ်ခုလို့ ခံစားရပြီး တစ်ချိန်တည်းမှာ ဒီနှစ်ကြုံတွေ့ရတဲ့ အခြေအနေတွေကြောင့် ကြီးမားတဲ့သက်သာရာရမှုဖြစ်ခဲ့ပါတယ်။ဒီနှစ် အစောပိုင်းမှာ ကြုံတွေ့ရတဲ့ သြစတြေးလျအခြေအနေတွေလည်းပါဝင်ပါတယ်။အနာဂတ်မှာ ဘာဖြစ်မလဲဆိုတာ မသိပေမယ့် ဆုဖလားရဖို့ စိတ်ထဲမှာ ဆာလောင်မှုတွေက ကြီးမားနေတယ်ဆိုတာ သိသာပါတယ်” လို့ ပြောခဲ့ပါ တယ်။

ဂျိူကိုဗစ်ဟာ ကိုဗစ်ကာကွယ်ဆေးမထိုးတာကြောင့် အခုနှစ်ရာသီပြိုင်ပွဲအများအပြားကို ယှဉ်ပြိုင်ခွင့်မရခဲ့ပေမယ့် ပြက္ခဒိန်တစ်နှစ်တာအတွင်း ဆုဖလား ၅ ခု ရယူနိုင်ခဲ့တာပါ။ဒီဆုဖလားတွေကတော့ ATP Finals အပါအဝင် အီတလီအိုးပန်း၊ ဝင်ဘယ်လ်ဒန်ချန်ပီယံ၊ တယ်လ်အဗစ်အိုးပန်းနဲ့ အက်စ်တာနာအိုးပန်းတို့ ဖြစ်ပါတယ်။

အသက် ၃၅ နှစ်အရွယ်ရှိ ဂျိူကိုဗစ်ဟာ လက်ရှိအချိန်မှာ ကမ္ဘာ့အဆင့်ရပ်တည်မှု ၅ နေရာမှာ ရှိနေတာ ဖြစ်ပါ တယ်။ပြီးခဲ့တဲ့နှစ်က သြစတြေးလျကနေ ပြည်နှင်ဒဏ်ခံခဲ့ရတဲ့ ဂျိူကိုဗစ်ဟာ လာမယ့်နှစ်မှာတော့ သြစတြေးလျ အိုးပန်းပြိုင်ပွဲကို ယှဉ်ပြိုင်ဖို့အတွက် ဝင်ခွင့်ရခဲ့ပြီလို့လည်း သိရပါတယ်။

Source:BBC

CNI Sport News

၂၀၂၂ ခုနှစ်၊ နိုဝင်ဘာ ၂၁

ဟာရီကိန်းက အသင်းခေါင်းဆောင်ဟောင်း ဝိန်းရွန်နီရဲ့ အင်္ဂလန်ဂိုးသွင်းအများဆုံးဆိုတဲ့စံချိန်ကို အမြန်ဆုံး ချိုးဖျက်ချင်တယ်လို့ ပြောလိုက်ပါတယ်။

ဟာရီကိန်းက “ဖြစ်နိုင်ရင် ဝိန်းရွန်နီရဲ့ စံချိန်ကို အမြန်ဆုံးချိုးဖျက်နိုင်ဖို့ မျှော်လင့်ထားပါတယ်။ဒါနဲ့ ပတ်သက်ပြီး လူတွေက ဒီအကြောင်းကို ပြောမယ်ဆိုတာကို သိထားပါတယ်။ဒါပေမယ့် ပွဲအပေါ်ကိုပဲ အာရုံစိုက်ရတာ ပိုပြီး ကြိုက်နှစ်သက်ပါတယ်။ကျနော်တို့အသင်းမှာ အခွင့်အရေးတွေဖန်တီးနိုင်မယ်ဆိုတာကို သိပြီး တွေ့ရမယ့်အသင်း တွေနဲ့ အဆင်သင့်ဖြစ်နေဖို့ လိုအပ်ပါတယ်။ဝိန်းနဲ့ ကစားခဲ့ရတာ ကျနော့်အတွက် တကယ်ကံကောင်းပြီး သူနဲ့ နီးစပ်ခွင့်ရတဲ့အတွက်လည်း အလွန်ဂုဏ်ယူတယ်”လို့ ပြောခဲ့တာပါ။

ဟာရီကိန်းက အင်္ဂလန်အသင်းရဲ့ ဂိုးသွင်းအများဆုံးကစားသမားဖြစ်တဲ့ ဝိန်းရွန်နီရဲ့စံချိန်ကို လိုက်မီဖို့ ၂ ဂိုးသာ လိုတော့တာပါ။ဝိန်းရွန်နီက ၅၃ ဂိုးသွင်းယူထားပြီး ဟာရီကိန်းက ၅၁ ဂိုးသွင်းယူထားတာ ဖြစ်ပါတယ်။ အဲဒါ ကြောင့် စံချိန်ချိုးဖျက်ပြီး စံချိန်သစ်တင်နိုင်ဖို့ အင်္ဂလန်အသင်းခေါင်းဆောင် ဟာရီကိန်းက မျှော်လင့်နေတာ ပါ။ဟာရီကိန်းဟာ ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲမှာ ဂိုးသွင်းအများဆုံးရွှေဖိနပ်ဆုကို ရယူနိုင်ခဲ့ပါတယ်။

စပါးတိုက်စစ်မှူးဟာ အဆိုပါပြိုင်ပွဲမှာ ၆ ဂိုးအထိ သွင်းယူခဲ့ပြီး အင်္ဂလန်အသင်းကို ဆီမီးဖိုင်နယ်အဆင့်အထိ ပို့ဆောင်ပေးနိုင်ခဲ့တာပါ။ဟာရီကိန်းဟာ ၁၉၆၆ က အင်္ဂလန်အတွက် ကမ္ဘာ့ဖလားချန်ပီယံဆုကို ဘော်ဘီမိုးကိုင် မြှောက်ပြီးနောက်ပိုင်း ပထမဆုံးကိုင်မြှောက်ခွင့်ရတဲ့ အင်္ဂလန်အသင်းခေါင်းဆောင်ဖြစ်လာဖို့လည်း မျှော်လင့် နေတာပါ။

ဟာရီကိန်းက “၂၀၁၈ ကမ္ဘာ့ဖလားကစားရတာ ကံကောင်းခဲ့ပြီး ပြိုင်ပွဲကြီးတစ်ခုရဲ့ အတွေ့အကြုံတွေကို ရခဲ့ပါတယ်။ဆုဖလားရယူနိုင်ဖို့ ဒီတစ်ခုကို ကျနော်တကယ်မျှော်လင့်တာပါ။ကျနော်တို့မှာ အတွေ့အကြုံရှိတဲ့ သူတွေနဲ့ လူငယ်တွေပေါင်းစပ်ထားပါတယ်။၄ နှစ်အတွင်းမှာ ကျနော်တို့ရော ဒါမှမဟုတ် အသင်းက ဘယ်ကို ရောက်နေပြီလဲဆိုတာ ဘယ်သူကသိနိုင်မှာလဲ” လို့ ပြောခဲ့တာပါ။

အင်္ဂလန်အသင်းဟာ ကမ္ဘာ့ဖလားပြိုင်ပွဲမှာ အီရန်၊ဝေးလ်စ်၊ အမေရိကန်တို့နဲ့ တစ်အုပ်စုတည်းကျရောက်နေပြီး ဗိုလ်စွဲဖို့ ရေပန်းစားနေတဲ့ အသင်းတွေထဲက တစ်သင်းအဖြစ် ရှိနေတာဖြစ်ပါတယ်။

Source:ChannelNewsasia

CNI Sport News

၂၀၂၂ ခုနှစ်၊ နိုဝင်ဘာ ၂၁

ကာတာနဲ့ အီကွေဒေါအသင်းတို့ ကစားခဲ့တဲ့ ၂၀၂၂ ကမ္ဘာ့ဖလားပြိုင်ပွဲရဲ့ အုပ်စုအဖွင့်ပွဲစဉ် ဒုတိယပိုင်းမှာ ကွင်း အတွင်းရှိ ထိုင်ခုံထောင်ပေါင်းများစွာ လွတ်နေခဲ့တာဖြစ်ပါတယ်။

ပထမပိုင်းအပြီးမှာ ပရိသတ်တွေဟာ ထိုင်ခုံတွေကနေ ထွက်ခွာခဲ့ကြတာဖြစ်ပြီး ဒုတိယပိုင်းမှာပြန်ပြီး ဝင်ရောက် မလာခဲ့တာကြောင့် ထိုင်ခုံတွေအများကြီး လွတ်နေခဲ့တာပါ။ဒီပွဲစဉ်ရဲ့ပထမပိုင်းမှာ အီကွေဒေါအသင်းက ကာတာ အသင်းကို ၂ ဂိုး- ဂိုးမရှိနဲ့ ဦးဆောင်နေခဲ့တာကြောင့် အိမ်ရှင်ပရိသတ်တွေဟာ စိတ်ပျက်ပြီး ကွင်းထဲကို ပြန်မလာ တော့တာဖြစ်နိုင်တယ်လို့ သတင်းမှာ ဖော်ပြထားပါတယ်။ပွဲပြီးဆုံးချိန်မှာလည်း ဒီရလဒ်အတိုင်းပဲ အီကွေဒေါ အသင်းက အနိုင်ရခဲ့တာပါ။

ကာတာနဲ့ အီကွေဒေါပွဲကို လာရောက်ကြည့်ရှုသူ ပရိသတ်ပေါင်း ၆၇,၃၇၂ ဦးရေရှိကြောင်း ကြေညာခဲ့ပေမယ့် ကွင်းအတွင်းထိုင်ခုံအလွတ်တွေ အများအပြားရှိခဲ့တာကို မြင်တွေ့ခဲ့ရတာဖြစ်ပါတယ်။အီကွေဒေါပရိသတ်တွေ ကတောာ့ အသင်းကို ဂုဏ်ပြုဖို့ ပွဲပြီးဆုံးချိန်ထိ ရှိခဲ့ကြတာပါ။အားကစားကွင်းအတွင်းမှာရှိနေတဲ့ ဘောလုံး ပွဲဝေဖန်သုံးသပ်သူ ဂယ်ရီလိုင်နီကာက “ပွဲအစမှာတော့ အပြည့်ရှိနေပုံရပါတယ်။ဒုတိယပိုင်းလည်း ရောက်ရော ထိုင်ခုံအလွတ်တွေအများကြီးပဲ”လို့ ပြောခဲ့ပါတယ်။

အင်္ဂလန်တိုက်စစ်မှူးဟောင်း အလန်ရှီးယားကလည်း “ပွဲချိန်က တစ်နာရီကျော်ပဲရှိသေးပေမယ့် ထွက်သွားတဲ့သူ တွေက အများကြီးပါပဲ။သူတို့တွေဟာ ကွင်းထဲကို ပြန်လာတော့မှာမဟုတ်ဘူး” လို့ ပြောခဲ့တာပါ။ဒီပြိုင်ပွဲအတွက် လက်မှတ်ပေါင်း ၃ သန်းနီးပါးရောင်းချခဲ့ရပြီး ဒီထဲမှာ ကာတာနိုင်ငံကို ၃၇ ရာခိုင်နှုန်းအထိ ရောင်းချခဲ့ရတယ်လို ဖီဖာက ပြီးခဲ့တဲ့လက ပြောထားခဲ့ပါတယ်။

ပြီးခဲ့တဲ့ ၂၀၁၈ ကမ္ဘာ့ဖလားပြိုင်ပွဲတုန်းကလည်း ဥရုဂွေးနဲ့ အီဂျစ်တို့ ကစားတဲ့ ပွဲချိန်အတွင်း ထိုင်ခုံတွေ ထောင်ပေါင်းများစွာလွတ်ခဲ့လို့ ဖီဖာက စုံစမ်းစစ်ဆေးမှုတွေ ပြုလုပ်ခဲ့ရသေးတာဖြစ်ပါတယ်။

Source:Metro

CNI Sport Article

၂၀၂၂ ခုနှစ်၊ နိုဝင်ဘာ ၂၀

ဒီရက်ပိုင်းမှာ ၄ နှစ်မှ ၁ ကြိမ် ကျင်းပတဲ့ ကမ္ဘာ့ဖလားပြိုင်ပွဲနဲ့ ပတ်သက်တဲ့ သတင်းတွေထက် ရော်နယ်ဒိုရဲ့ အင်တာဗျူးက လူတိုင်းကို လွှမ်းမိုးသွားခဲ့တာ ဖြစ်ပါတယ်။

တစ်နေ့နည်းနည်းစီ ထွက်ပေါ်လာတဲ့ အင်တာဗျူး အချက်အလက်တွေအပေါ် လူတွေကလည်း စိတ်ဝင်တစား စောင့်ကြည့်နေခဲ့ကြတာ ဖြစ်ပါတယ်။ ဒီအင်တာဗျူးကြာချိန်က မိနစ် ၉၀ ကြာမြင့်ခဲ့တာဖြစ်ပြီး ရော်နယ်ဒိုဟာ ပီယာစ်မော်ဂန်နဲ့ အင်တာဗျူး ပြုလုပ်ပြီး သူ့စိတ်ထဲမှာ ရှိနေတဲ့ ခံစားချက်တွေကို ချပြခဲ့တာပါ။

ပရိသတ်တွေ တော်တော်များများလည်း ဒီအင်တာဗျူးထဲမှာ ပါဝင်တဲ့ အကြောင်းအရာကို သိပြီးကြလောက်ပြီလို့ ထင်ပါတယ်။ ဒါဆိုရင် ဒီအင်တာဗျူးမှာ ရော်နယ်ဒိုရဲ့ ပြောဆိုမှုတွေက မှန်ကန်ခဲ့လား၊ မှားခဲ့လားပေါ့။

ရော်နယ်ဒိုက သူဟာ ယူနိုက်တက်အသင်းရဲ့ သစ္စာဖောက်မှုကို ခံစားခဲ့ပြီး အသင်းကနေ ထွက်ခွာဖို့ တွန်းအားပေး ခံခဲ့ရတယ်လို့ ပြောခဲ့ပါတယ်။ အသင်းရဲ့ အကြီးအကဲတွေအပြင် နည်းပြတန်ဟတ်လည်း ပါဝင်တယ်လို့ ပြောသွားခဲ့ပါတယ်။ အမှန်တော့ ရော်နယ်ဒို ကိုယ်တိုင်ကလည်း နွေရာသီက ယူနိုက်တက်ကနေ ထွက်ခွာဖို့ ကြိုးစားခဲ့တာပါ။

ရော်နယ်ဒိုကို ခေါ်ယူဖို့ ထိပ်တန်းကလပ် အသင်းကြီးတွေ အများအပြားက နောက်ဆုတ်ခဲ့လို့ နောက်ဆုံး ယူနိုက်တက်မှာပဲ ဆက်ရှိခဲ့တာ ဖြစ်ပါတယ်။ ရော်နယ်ဒိုက သူ့အပေါ် လေးစားမှု မရှိတဲ့ နည်းပြ တန်ဟတ် အပေါ် မှာ သူမလေးစားဘူးလို့ ပြောခဲ့ပါတယ်။

ရော်နယ်ဒိုနဲ့ ယူနိုက်တက်ပိုင်ရှင်များကိုတွေ့ရစဉ်(talkSPORT)

ရော်နယ်ဒိုဟာ သူကိုယ်တိုင် ခံစားခဲ့ရလို့ ဒီလိုပြောတာ ဖြစ်နိုင်ပေမယ့် ယူနိုက်တက်နဲ့ စာချုပ်ရှိချိန်မှာ နည်းပြ တစ်ဦးအပေါ် ဒီလိုမျိုးပြောတဲ့ အပေါ်မှာ ဝေဖန်မှုတွေ ခံခဲ့ရပါတယ်။

ယူနိုက်တက်အသင်းရဲ့ တိုးတက်မှုက ဖာဂူဆန်စ် မရှိတဲ့ အချိန်ကတည်းက ဘာမှပြောင်းလဲမှု မရှိဘူးလို့ ရော်နယ်ဒို ရဲ့ ပြောမှုဟာ မှန်ကန်ခဲ့တာပါ။

တကယ်လည်း ယူနိုက်တက်အသင်းဟာ မန်စီးတီး၊ လီဗာပူးလ်၊ ချယ်လ်ဆီးတို့ရဲ့ ကျော်တက်ခြင်းကို ခံခဲ့ရပြီး ပရီးမီးယားလိဂ်ဖလားကို ၂၀၁၃ ကတည်းက မရတော့သလို နောက်ဆုံးရခဲ့တဲ့ ယူရိုပါလိဂ်ဖလားကိုလည်း ၂၀၁၇ မှာ ရယူခဲ့တာ ဖြစ်ပါတယ်။ အဲ့ဒါကြောင့် ဆုဖလားလက်မဲ့ဖြစ်တာ ၅ နှစ်ရှိပြီလည်း ဖြစ်ပါတယ်။

ဝိန်းရွန်နီကို ဝေဖန်မှု အပိုင်းမှာတော့ ယူနိုက်တက် ပရိသတ်တွေတောင် နှစ်ခြမ်းကွဲသွားတဲ့ အနေအထားမှာ ရှိခဲ့ပါတယ်။ ရော်နယ်ဒိုက သူဟာ ဝိန်းရွန်နီထက် ပိုပြီးကြည့်ကောင်းလို့ မနာလိုဖြစ်ပြီး သူ့ကို ဝေဖန်ခဲ့တယ်လို့ ပြောခဲ့တာ ဖြစ်ပါတယ်။

ရော်နယ်ဒိုနဲ့ ဝိန်းရွန်နီကို တွေ့ရစဉ် (Sport)

စပါးနဲ့ပွဲမှာ လူစားဝင်ဖို့ ငြင်းဆန်ပြီး ဥမင်ထဲကို တန်းပြီး ထွက်ခွာသွားတဲ့ ရော်နယ်ဒိုရဲ့ အပြုအမူကို ဝိန်းရွန်နီက ဝေဖန်ခဲ့တာပါ။ ရော်နယ်ဒိုဟာ ရုပ်ရည်ပိုင်းနဲ့ ပတ်သက်ပြီး ပြန်ပြောခဲ့တာကြောင့် ဝိန်းရွန်နီရဲ့ အမာခံ ပရိသတ် တွေက တော်တော်လေးကို ဒေါသထွက်ခဲ့ကြတာပါ။

ဝိန်းရွန်နီကတော့ ရော်နယ်ဒိုဟာ အသက်အရွယ်ပိုင်းနဲ့ ပတ်သက်ပြီး ကိုင်တွယ်ဖို့ ခက်ခဲနေတယ်လို့ ပြောခဲ့ပါ တယ်။ အသင်းပိုင်ရှင် ဂလေဇာမိသားစုနဲ့ ပတ်သက်ပြီးတော့လည်း ရော်နယ်ဒိုက ပြောခဲ့ပါသေးတယ်။ ဒါကိုတော့ တကယ်ကို မှန်ကန်ခဲ့တဲ့ အချက်ဖြစ်ခဲ့ပါတယ်။

ဂလေဇာမိသားစုက ယူနိုက်တက်ကို ဈေးကွက် ရှာဖွေရေးအသင်းလို့ပဲ သတ်မှတ်ပြီး သူတို့အတွက် ပိုင်ရှင်ရဖို့ပဲ စိတ်ဝင်စားကာ အသင်းကို ဂရုမစိုက်ဘူးလို့ ပြောခဲ့တာပါ။ တကယ်လည်း ဂလေဇာမိသားစုဟာ သူတို့အကျိုး အတွက်ပဲ ကြည့်ပြီး အသင်းအပေါ် ရင်းနှီးမြှပ်နှံမှုတွေ ပြုလုပ်ဖို့ ပျက်ကွက်ခဲ့တာ ဖြစ်ပါတယ်။

အဲ့ဒါကြောင့်လည်း ယူနိုက်တက် ပရိသတ်တွေဟာ ဂလေဇာ မိသားစုအပေါ် ဆန့်ကျင်တဲ့ ဆန္ဒပြမှုတွေ လုပ်ခဲ့ပြီး ဒါကို ရော်နယ်ဒို ကလည်း ထောက်ခံခဲ့တာပါ။ ရော်နယ်ဒိုဟာ ဒီအင်တာဗျူးမှာ မန်စီးတီးအသင်းဆီ ရောက်ဖို့ နီးစပ်ခဲ့ပေမယ့် ဆာအဲလက်စ်ဖာဂူဆန်ကြောင့် ယူနိုက်တက်ကို ပြန်လာတဲ့ အကြောင်းကိုလည်း ထည့်သွင်း ပြောခဲ့တာပါ။

ရော်နယ်ဒိုနဲ့ နည်းပြဟောင်း ဖာဂူဆန်ကိုတွေ့ရစဉ်(Goal)

ရော်နယ်ဒိုဟာ ရာသီသစ် မစတင်ခင် ရာသီကြိုခြေစမ်းပွဲ ခရီးစဉ်အားလုံးကို မပါဝင်နိုင်ခဲ့တာ ဖြစ်ပါတယ်။

ရော်နယ်ဒိုဟာ မိသားစု အကြောင်းပြချက်နဲ့ ဒီခရီးစဉ်ကို မပူးပေါင်းနိုင်ခဲ့တာဖြစ်ပြီး တကယ်လည်း သူ့ရဲ့ သမီး ဖြစ်သူ နေမကောင်းတာကြောင့် ဖြစ်တယ်လို့ ပြောခဲ့ပါတယ်။ အသင်းတာဝန်ရှိသူတွေက သူဒီလို ပြောတာကို မယုံကြည်ကြလို့ စိတ်မကောင်း ဖြစ်ရတယ်လို့လည်း ရော်နယ်ဒိုက ပြောပါတယ်။

ပေါ်တူဂီကစားသမားဟာ စပါးနဲ့ ပွဲမှာ လူစားဝင်ဖို့ ငြင်းဆန်ခဲ့ရတဲ့ အကြောင်းအရင်းက နည်းပြ တန်ဟတ်က သူ့အပေါ် ဆက်ဆံပုံတွေကြောင့် ဖြစ်တယ်လို့လည်း အင်တာဗျူးထဲမှာ ပြောခဲ့တာပါ။

မန်စီးတီးနဲ့ ပွဲမှာ ရှုံးနေတဲ့အတွက် လေးစားလို့ လူစားမထည့်သွင်းခဲ့တာလို့ ပြောပြီး စပါးနဲ့ ပွဲမှာ ပွဲပြီးဖို့ ၃ မိနစ် အလိုမှ လူစားလဲဖို့ လုပ်ဆောင်ခဲ့တဲ့ အပေါ်မှာ ရော်နယ်ဒိုက အဲရစ်တန်ဟတ် အပေါ်မှာ ဒေါသထွက်နေခဲ့တာ ဖြစ်ပါတယ်။

ရော်နယ်ဒိုနဲ့ အဲရစ်တန်ဟတ်ကိုတွေ့ရစဉ် (Football365)

သူက ဒီလိုမျိုးဝင်ပြီး ကစားရမယ့် ကစားသမား မဟုတ်ဘူးလို့ ပြောခဲ့တာပါ။ ဒီလို အခြေအနေတွေကြောင့် ရော်နယ်ဒိုနဲ့ အဲရစ်တန်ဟတ်တို့ရဲ့ ဆက်ဆံရေးက သေချာပေါက် ပျက်ပြယ်သွားပြီ ဖြစ်ပါတယ်။

ဒါကြောင့်လည်း ရော်နယ်ဒိုနဲ့ ယူနိုက်တက်တို့ဟာ ဇန်နဝါရီ အပြောင်းအရွှေ့မှာ လမ်းခွဲရဖို့ ရှိနေပြီ ဖြစ်ပါတယ်။ ယူနိုက်တက် ကစားသမားတွေအပြင် ဝါရင့်ကစားသမားတချို့ကလည်း ရော်နယ်ဒိုနဲ့ လမ်းခွဲဖို့ ပြောနေကြပြီ ဖြစ်ပါ တယ်။

ရော်နယ်ဒိုကလည်း ဒီလိုဖြစ်လာနိုင်တဲ့ အခြေအနေကို တွေးပြီးမှ အင်တာဗျူး ဖြေခဲ့တာ ဖြစ်နိုင်ပါတယ်။ ကမ္ဘာ့ဖလားပြိုင်ပွဲ အပြီးမှာတော့ ဒီအခြေအနေကို ရှင်းရှင်းလင်းလင်း တွေ့မြင်ရတော့မှာလည်း ဖြစ်ပါတယ်။

CNI Sport News

၂၀၂၂ ခုနှစ်၊ နိုဝင်ဘာ ၁၉

အာဆင်နယ်အသင်း တောင်ပံကစားသမား မာတင်နယ်လီက ပရီးမီးယားလိဂ် ဆုဖလားကို ရယူနိုင်ဖို့ အိမ်မက် မက်နေတယ်လို့ ပြောလိုက်ပါတယ်။

မာတင်နယ်လီက “ကျနော် ဆုဖလားတွေ ရယူချင်တယ်၊ ချန်ပီယံဖြစ်ချင်တယ်။ ကလပ်အသင်း၊ ပရိသတ်တွေနဲ့ ကျနော်တို့မှာရှိတဲ့ ကစားသမားတွေဟာ တစ်ခုခု အနိုင်ရဖို့ ထိုက်တန်တယ်လို့ ကျနော်ထင်ပါတယ်။ ပရီးမီးယား လိဂ်နဲ့ ချန်ပီယံလိဂ် ရဖို့က ကျနော့် အိမ်မက်ပါပဲ။ ဒါကို ကျနော် အိမ်မက် မက်နေပေမယ့် ကျနော်တို့ဟာ စွမ်း ဆောင်ရည်ကို ဆက်ပြီး ထိန်းသိမ်းရပါမယ်။ ပွဲတိုင်းကို အနိုင်ယူချင်တဲ့ စိတ်နဲ့ ဆက်သွားရမယ်”လို့ The Player’s Tribune ကို ပြောခဲ့တာပါ။

အာဆင်နယ်အသင်းဟာ ဒီရာသီ ပရီးမီးယားလိဂ် ပြိုင်ပွဲမှာ ခြေစွမ်း တသမတ်တည်းနဲ့ ဖြတ်သန်းနေတာဖြစ်ပြီး ရှုံးပွဲ ၁ ပွဲနဲ့ သရေပွဲ ၁ ပွဲသာ ရှိခဲ့တာ ဖြစ်ပါတယ်။ လန်ဒန်ကလပ်ဟာ ကမ္ဘာ့ဖလားပြိုင်ပွဲ မတိုင်ခင် နောက်ဆုံး ယှဉ်ပြိုင်ခဲ့တဲ့ ပွဲစဉ်အပြီးမှာ ဒုတိယနေရာက မန်စီးတီးအသင်းကို ၅ မှတ်ဖြတ်ပြီး အမှတ်ပေးဇယား ထိပ်ဆုံး နေရာမှာ ဦးဆောင်နေတာပါ။

အာဆင်နယ်ကစားသမား မာတင်နယ်လီကို တွေ့ရစဉ်(Football365)

မာတင်နယ်လီဟာ ဒီရာသီ အာဆင်နယ်အသင်း ပရီးမီးယားလိဂ် အမှတ်ပေးဇယား ထိပ်ဆုံးနေရာမှာ ရပ်တည် နိုင်အောင် အဓိက စွမ်းဆောင်ပေးခဲ့တဲ့ ကစားသမားတစ်ဦးလည်း ဖြစ်ပါတယ်။

မာတင်နယ်လီဟာ ဒီရာသီမှာ အာဆင်နယ် အသင်းအတွက် ၅ ဂိုး သွင်းယူထားပြီး စွမ်းဆောင်ရည် ကောင်းတွေကို ပြသထားတာပါ။ ဒါကြောင့်လည်း ကမ္ဘာ့ဖလားပြိုင်ပွဲဝင် ဘရာဇီးလ်အသင်း လူစာရင်းမှာ ရွေးချယ်ခံခဲ့ရတာ ဖြစ်ပါတယ်။

မာတင်နယ်လီ ပါဝင်တဲ့ ဘရာဇီးလ်အသင်းဟာ ကမ္ဘာ့ဖလားပြိုင်ပွဲမှာ ဆားဘီးယား၊ ဆွစ်ဇာလန်၊ ကင်မရွန်းတို့နဲ့ တစ်အုပ်စုတည်း ကျရောက်နေပြီး အဖွင့်ပွဲစဉ်အဖြစ် ဆားဘီးယားအသင်းနဲ့ နိုဝင်ဘာလ ၂၄ ရက်မှာ ယှဉ်ပြိုင်မှာ ဖြစ်ပါတယ်။

Source: Metro

CNI Sport News

၂၀၂၂ ခုနှစ်၊ နိုဝင်ဘာ ၁၉

စပိန်အသင်းနည်းပြ လူးဝစ်အင်းနရစ်က ၂၀၂၂ ကမ္ဘာ့ဖလား ချန်ပီယံဆုကို စပိန်အသင်း မရခဲ့ဘူးဆိုရင် မက်ဆီ ပါဝင်တဲ့ အာဂျင်တီးနားနဲ့ ဆွာရက်စ်ပါဝင်တဲ့ ဥရုဂွေးကို ရစေချင်တယ်လို့ ပြောလိုက်ပါတယ်။

လူးဝစ်အင်းနရစ်က “ကျနော်တို့ ကမ္ဘာ့ဖလားကို မရခဲ့ဘူးဆိုရင် အာဂျင်တီးနားကို ရစေချင်ပါတယ်။ မက်ဆီလို ကောင်းမွန်တဲ့ ကစားသမားတစ်ဦးက ကမ္ဘာ့ဖလားမရပဲ အနားယူ ရမယ်ဆိုတာက မျှတမှုမရှိပါဘူး။ ပြီးတော့ ဆွာရက်စ် ပါဝင်တဲ့ ဥရုဂွေးကိုလည်း ရစေချင်တယ်”လို့ ပြောခဲ့တာပါ။

လူးဝစ်အင်းနရစ်ဟာ မက်ဆီနဲ့ ဆွာရက်စ်ကို ၂၀၁၄ ကနေ ၂၀၁၇ အထိ ဘာစီလိုနာအသင်းမှာ နည်းပြအဖြစ် ဆောင်ရွက်ခဲ့ပြီး ဆုဖလားအောင်မြင်မှု အများအပြားကို ရယူနိုင်ခဲ့တာ ဖြစ်ပါတယ်။

ကာတာကမ္ဘာ့ဖလားဟာ မက်ဆီနဲ့ ဆွာရက်စ်တို့ရဲ့ နောက်ဆုံး ကမ္ဘာ့ဖလား ဖြစ်တာကြောင့် ဒီပြိုင်ပွဲမှာ ချန်ပီယံ ဆု ရယူနိုင်ဖို့ စိတ်ဆန္ဒ ပြင်းပြနေကြတာပါ။

လူးဝစ်အင်းနရစ်နဲ့ စပိန်အသင်းကိုတွေ့ရစဉ်

လူးဝစ်အင်းနရစ်ဟာ ကမ္ဘာ့ဖလားပြိုင်ပွဲဝင်မယ့် စပိန်အသင်း လူစာရင်းမှာ အတွေ့အကြုံ နည်းပါးတဲ့ ကစားသမား တွေ ရွေးချယ်ထားပေမယ့် ဘယ်အသင်းကိုမှ ကြောက်နေမှာ မဟုတ်သလို အောင်မြင်မှု ရယူနိုင်ဖို့ မျှော်လင့် ထား တယ်လို့ ပြောခဲ့ပါတယ်။

လူးဝစ်အင်းနရစ်က “ လူငယ်တွေနဲ့ပတ်သက်ပြီး ကျနော်စိတ်ပူခြင်း မရှိပါဘူး။ ကျနော်တို့ ရည်ရွယ်ချက်က အုပ်စုထိပ်ဆုံးမှာ ရပ်တည်နိုင်ဖို့ပါ။ ၁၆ သင်းအဆင့်မှာလည်း ဘယ်အသင်းနဲ့ ရင်ဆိုင်ရမလဲဆိုတာ ကျနော်တို့ သိပြီးသားပါ။ ဆီမီးဖိုင်နယ်မှာဆိုရင် ဘရာဇီးလ်အုပ်စုထဲက တစ်သင်းသင်းနဲ့ ကစားရမှာပါ။ ဘယ်အသင်းကိုမှ ကြောက်နေမှာ မဟုတ်ပါဘူး”လို့ ပြောခဲ့တာပါ။

စပိန်အသင်းဟာ ကမ္ဘာ့ဖလားပြိုင်ပွဲမှာ ဂျာမနီ၊ ဂျပန်၊ ကော်စတာရီကာတို့နဲ့ တစ်အုပ်စုတည်း ကျရောက်နေပြီး အုပ်စုအဖွင့်ပွဲအဖြစ် ကော်စတာရီအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: CNA

CNI Sport News

၂၀၂၂ ခုနှစ်၊ နိုဝင်ဘာ ၁၉

ဒုံးကျည်ပစ်ခတ်ကျရောက်မှုကြောင့် ပိုလန်နိုင်ငံရှိ လူ ၂ ဦးသေဆုံးခဲ့ရပြီးနောက် ပိုလန်လက်ရွေးစင်အသင်းဟာ တုန်လှုပ်ခဲ့ရတယ်လို့ အသင်းခေါင်းဆောင် လီဝန်ဒေါစကီးက ပြောပါတယ်။

လီဝန်ဒေါစကီးက “ဒါဟာ လွယ်ကူတဲ့ အခိုက်အတန့်မဟုတ်ခဲ့ပါဘူး။လူတိုင်းက ရှင်းပြချက်တွေ၊ အချက်အလက် တချို့ကို စောင့်နေခဲ့ကြရပါတယ်။ကံမကောင်းစွာနဲ့ပဲ ထိတဲ့လူတွေက သေဆုံးသွားခဲ့ကြပါတယ်။ဒါဟာ အလွန် ခက်ခဲတဲ့အခြေအနေဆိုတာ သေချာပါတယ်” လို့ ဒိုဟာမြို့မှာရှိတဲ့ ပိုလန်အသင်းလေ့ကျင့်ရေးစခန်းမှာ ပြောခဲ့တာပါ။

လီဝန်ဒေါစကီးနဲ့ ပိုလန်အသင်းသားတွေဟာ ဒုံးကျည်ကျရောက်ခဲ့ချိန်မှာ ကာတာသို့ မသွားခင် ချီလီနဲ့ ကစားရမယ့် ခြေစမ်းပွဲအတွက် ဝါဆောမှာ လေ့ကျင့်မှုတွေ ပြုလုပ်နေခဲ့ချိန်ဖြစ်ပါတယ်။ဒီ ဒုံးကျည်ပစ်လွှတ်မှုဟာ ရုရှားရဲ့ တိုက်ရိုက်တိုက်ခိုက်မှုမဟုတ်ဘူးဆိုတာကို သိခဲ့ရပြီးနောက် စိုးရိမ်မှုလျော့ပါးသွားခဲ့တယ်လို့လည်း ဘာစီလိုနာ အသင်းတိုက်စစ်မှူးက ပြောခဲ့တာပါ။

လီဝန်ဒေါစကီးက “ဖြစ်ပျက်တဲ့အရာတွေကို ရှင်းလင်းစွာသိပြီးနောက်မှာတော့ ကျနော်တို့ အနည်းငယ်ငြိမ်သက် သွားခဲ့ပြီး ကျနော်တို့ လုပ်ဆောင်နေတဲ့အရာကို ပြန်လည်အာရုံစိုက်ဖို့ လိုအပ်ခဲ့ပါတယ်။ဒါကို တစ်ကြိမ်တစ်ခါ တော့ ကြုံဖူးခဲ့ပေမယ့် နောက်တစ်ကြိမ်တော့ မကြုံချင်တော့ဘူး”လို့ ပြောခဲ့တာဖြစ်ပါတယ်။

လီဝန်ဒေါစကီးဦးဆောင်တဲ့ ပိုလန်အသင်းဟာ ဒီပြိုင်ပွဲမှာ ဗိုလ်စွဲဖို့ ရေပန်းစားနေတဲ့ အာဂျင်တီးနား၊ မက္ကဆီကို၊ ဆော်ဒီတို့နဲ့ တစ်အုပ်စုတည်းကျရောက်နေပြီး မက္ကဆီကိုနဲ့ နိုဝင်ဘာလ ၂၂ ရက်မှာ ယှဉ်ပြိုင်ရမှာပါ။

လီဝန်ဒေါစကီးက “ပြိုင်ဘက်တွေက ကျနော့်ကို ပိုပြီးအာရုံစိုက်ဖို့ အဆင်သင့်ပါပဲ။အခြားကစားသမားတွေက ကျနော့်အနားကို ကပ်တဲ့အချိန်မှာ ကျနော်တို့အသင်းအတွက် နေရာလွတ်တွေရသွားပါလိမ့်မယ်။ဒါကို ဒီပြိုင်ပွဲမှာ အသုံးချနိုင်ဖို့ လိုအပ်ပါတယ်။ဘယ်သူပဲ ဂိုးသွင်းသွင်းအရေးမကြီးပါဘူး။အသင်းနိုင်ပွဲရဖို့ကသာ အရေးကြီးတယ်” လို့ ပြောခဲ့ပါတယ်။

Source:Besoccer