CNI News
၂၀၂၅ ခုနှစ်၊ စက်တင်ဘာ ၁
တရုတ်နိုင်ငံ၊ တီယန်ကျင်းမြို့မှာ ကျင်းပသည့် ရှန်ဟိုင်းပူးပေါင်းဆောင်ရွက်ရေး(SCO) ထိပ်သီး အစည်းအဝေးကို တက်ရောက်နေသည့် အိန္ဒိယဝန်ကြီးချုပ် မိုဒီနှင့် ရုရှားသမ္မတ ပူတင်တို့သည် ၂၀၂၅ ခုနှစ်၊ စက်တင်ဘာ ၁ ရက်က တွေ့ဆုံ ဆွေးနွေးခဲ့ကြသည်။
ထိုသို့ တွေ့ဆုံစဉ် ကုန်သွယ်မှု၊ ဓာတ်မြေဩဇာ၊ အာကာသ၊ လုံခြုံရေးနှင့် ယဉ်ကျေးမှု အပါအဝင် ကဏ္ဍအားလုံး တွင် နှစ်နိုင်ငံ ပူးပေါင်းဆောင်ရွက်မှု ပိုမိုနက်ရှိုင်းစေမည့် နည်းလမ်းများကို ဆွေးနွေးခဲ့သည်ဟု အိန္ဒိယဝန်ကြီးချုပ် မိုဒီက သူ၏ ဖေ့စ်ဘွတ်ခ်စာမျက်နှာကနေ ထုတ်ပြန် ပြောကြားခဲ့သည်။
၎င်းက “ ကုန်သွယ်မှု၊ ဓာတ်မြေသြဇာ၊ အာကာသ၊ လုံခြုံရေးနှင့် ယဉ်ကျေးမှု အပါအဝင် ကဏ္ဍအားလုံးတွင် နှစ်နိုင်ငံ ပူးပေါင်းဆောင်ရွက်မှု ပိုမိုနက်ရှိုင်းစေမည့် နည်းလမ်းများကို ဆွေးနွေးခဲ့ကြသည်။ ယူကရိန်းပဋိပက္ခကို ငြိမ်းချမ်းစွာ ဖြေရှင်းရေး အပါအဝင် ဒေသတွင်းနဲ့ ကမ္ဘာလုံးဆိုင်ရာ ဖွံ့ဖြိုးတိုးတက်မှုတွေအပေါ် အမြင်ချင်းဖလှယ် ခဲ့ကြပါတယ်”ဟု ပြောသည်။
ထို့နောက် မိမိတို့၏ ထူးခြားသော မဟာဗျူဟာ မိတ်ဖက်ဆက်ဆံရေးသည် ဒေသတွင်းနှင့် ကမ္ဘာလုံးဆိုင်ရာ တည်ငြိမ်ရေးအတွက် အရေးကြီးသော မဏ္ဍိုင်တစ်ခုအဖြစ် ဆက်လက် တည်ရှိနေသည်ဟု အိန္ဒိယဝန်ကြီးချုပ် မိုဒီက ပြောသည်။
အိန္ဒိယနှင့် ရုရှားသည် ရှန်ဟိုင်းပူးပေါင်းဆောင်ရွက်ရေး(SCO) အဖွဲ့ဝင် နိုင်ငံများဖြစ်သည်။
