CNI News

၂၀၂၅ ခုနှစ်၊ မေလ ၂၁

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်၏ တရုတ်သာမက အမေရိကန်နှင့်ပါ ထိတွေ့ဆက်ဆံရေး မူဝါဒက ဘယ်ကို ဦးတည်နေသလဲဆိုသည့်အပေါ် စစ်ရေးနှင့်နိုင်ငံရေးအကဲခတ်များကြား သုံးသပ်လျက်ရှိနေကြသည်။

နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်သည် ပြီးခဲ့သည့် မေလ ၈ ရက်နေ့က ရုရှားနိုင်ငံ၊ မော်စကိုမြို့၌ ရုရှားရုပ်သံလိုင်း RT နှင့် တွေ့ဆုံမေးမြန်းမှုတွင် တရုတ်သာမက အမေရိကန်နှင့်ပါ ထိတွေ့ဆက်ဆံရန်ရှိကြောင်း ပြောကြားခဲ့သည်။

မြန်မာနိုင်ငံသည် အမေရိကန်နှင့် မိတ်ဆွေနိုင်ငံတစ်ခုဖြစ်ကာ တရုတ်သည် အိမ်နီးချင်းဖြစ်သကဲ့သို့ မဟာဗျူဟာ‌ မြောက် မိတ်ဖက်၊ ဆွေးမျိုးပေါက်ဖော် နိုင်ငံဖြစ်ကြောင်း၊ ထိုနှစ်နိုင်ငံလုံးနှင့်ပတ်သက်၍ အကောင်းဆုံး ဖြစ်အောင် ထိတွေ့ဆက်ဆံသွားရန် ရှိကြောင်း နစကဥက္ကဋ္ဌက ပြောသည်။

နစကဥက္ကဋ္ဌနဲ့ ရုရှားသတင်းဌာန RT တွေ့ဆုံနေစဉ်

မြန်မာနိုင်ငံကဲ့သို့ နိုင်ငံငယ်အနေဖြင့် အင်အားကြီး နိုင်ငံတစ်ခုတည်းကို နိုင်ငံရေးအရ ချဉ်းကပ်ခြင်းထက် ပြိုင်တူ သွားခြင်းက ပို၍ကောင်းမွန်ကြောင်း ငြိမ်းချမ်းရေးလုပ်ငန်းစဉ်တွင် ပါဝင်လုပ်ဆောင်နေသူ ဦးခွန်းဆိုင်က CNI သတင်းဌာနသို့ ပြောသည်။

၎င်းက “ဒီဥစ္စာက ကျနော်တို့ နိုင်ငံတွေအားလုံး ထားရှိရမယ့် သဘောထားပဲပေါ့လေ။ ကျနော်တို့ နိုင်ငံငယ်တွေက ဒီအချိန်မှာ ဘယ်သူ့ကို ရန်သူထားရမလဲ၊ ဘယ်သူ့ကို မိတ်ဆွေထားရမလဲဆိုတဲ့ ပြဿနာမှာ အားလုံးကို မိတ်ဆွေ ထားရမယ်ဆိုတာက ၂၀၀၈ နဲ့ ကိုက်ညီရုံတင်မကဘူး။ ကျနော်တို့ လွတ်လပ်ရေး ရပြီးကတည်းက နိုင်ငံတကာ အားလုံးနဲ့ မိတ်ဆွေရင်းခြာဖြစ်တယ်။ ဒီဥစ္စာက မူအရ ပြောသွားတယ်လို့ပဲ ယူဆပါတယ်။ အရမ်းကပ်ဖို့ဆိုတာ တော့ မဖြစ်နိုင်တော့ဘူး။ ကပ်တာဆိုတာက အကုန်လုံးကို ပြိုင်တူကပ်ရမှာ ဖြစ်တယ်။ တစ်ဖက်ကို ပိုကပ်တာမျိုး တော့ မဖြစ်သင့်ဘူးပေါ့။ ဒီလို အားလုံးနဲ့ တပြေးညီ တပြေးတည်း ကပ်တယ်ဆိုရင် ကိုယ့်အတွက်လည်း ကောင်း တယ်။ နိုင်ငံကြီးတွေကလည်း နိုင်ငံအငယ်တွေအပေါ်မှာ နားလည်ပေးရမှာပေါ့” ဟု ပြောသည်။

မြန်မာနိုင်ငံ၏ နိုင်ငံခြားရေးမူဝါဒသည် လွတ်လပ်ပြီး တက်ကြွသည့် နိုင်ငံခြားရေးမူဝါဒဖြစ်ကာ နိုင်ငံအားလုံးနှင့် မိတ်ဝတ်မပျက် ဆက်ဆံရေး ကျင့်သုံးသည့် နိုင်ငံဖြစ်သည်။

လက်ရှိတွင် ပထဝီနိုင်ငံရေးအရ နိုင်ငံကြီးများသည် နိုင်ငံငယ် သို့မဟုတ် အခြားနိုင်ငံများကို မျက်စောင်းထိုး နေကြကြောင်း၊ ထို့ပြင် တရုတ်နှင့် အမေရိကန်၏ ပြဿနာသည် နှစ်နိုင်ငံတည်းဖြင့် ပြဿနာ မဖြစ်နိုင်ဘဲ အခြားနိုင်ငံများ ပါဝင်လာမှ ပို၍ ရှုပ်သွားနိုင်ကြောင်း နစကဥက္ကဋ္ဌက ပြောသည်။ 

သမ္မတပူတင်၊ သမ္မတဒေါ်နယ်ထရမ့်၊ သမ္မတရှီကျင့်ဖျင်တို့ကိုတွေ့ရစဉ်

တရုတ်နှင့် အမေရိကန်တို့၏ ပဋိပက္ခက ပြင်းထန်လာခဲ့သည်ရှိသော် မြန်မာနိုင်ငံအနေဖြင့် နိုင်ငံကြီးတစ်ခုကို ရွေးချယ်ခြင်းထက် နိုင်ငံကြီးအားလုံးဖြင့် ကောင်းမွန်သည့် ဆက်ဆံရေးရှိစေရေး လုပ်ကိုင်တတ်ရန် လိုကြောင်း တရုတ်-မြန်မာအရေးလေ့လာသုံးသပ်သူ ဒေါက်တာ လှကျော်ဇောက CNI သတင်းဌာနသို့ ပြောသည်။

၎င်းက “ကျမတို့ ဒီနိုင်ငံတွေအားလုံးက အကုန်လုပ်တတ်ကိုင်တတ်သွားတယ်။ တရုတ်ကိုလည်း ကောင်းအောင် ဆက်ဆံတယ်၊ အမေရိကန်ကိုလည်း ကောင်းအောင်ဆက်ဆံတယ်။ အခုဂျီနီဗာမှာ လုပ်နေတဲ့ အစည်းအဝေးတွေပဲ ကြည့်ပါဦး မကြားဖူးဘူး။ ထရမ့်က တင်ထားတဲ့ ၁၀၀ ရာခိုင်နှုန်းကို အကုန်လျှော့ပစ် ရတာလေ။ ရက်ပေါင်း ၉၀ အတွင်း။ ရက်ပေါင်း ၉၀ အတွင်းမှာလည်း သူတို့ နှစ်ဖက်က အခု အဆင့်မြင့် ကုန်သွယ်ရေးအရာရှိများရဲ့ စေ့စပ် ဆွေးနွေးပွဲတွေ လာနေတယ်။ တရုတ်နဲ့ အမေရိကန် ပဋိပက္ခက ကျမတို့ ထင်သလောက် မပြင်းထန်ဘူးဆိုတာ တစ်အချက်။ နှစ်အချက်က သူတို့တကယ်လို့ ပဋိပက္ခ ပြင်းထန်လည်း ကျမတို့ အနေသာကြီး။ တရုတ်ကိုလည်း ကျမတို့ ကောင်းကောင်းမွန်မွန်ဆက်ဆံ။ အမေရိကန်ကိုလည်း ကောင်းကောင်းမွန်မွန်ဆက်ဆံ၊ ရုရှားကိုလည်း ကောင်းကောင်းမွန်မွန်ဆက်ဆံ။ ဒါ ကျမတို့ နိုင်ငံငယ်လေးတွေက လုပ်တတ်ကိုင်တတ်ဖို့လိုတဲ့ အချက်တွေ။ ဘယ်သူ့ကိုမှ ရွေးစရာမလိုဘူး။ တရုတ်ကိုရွေးပြီး အမေရိကန်ကို တွယ်လိုက်မယ်။ အမေရိကန်ရွေးပြီး တရုတ်ကို တွယ်လိုက်မယ် ဒါမျိုးက သိပ်ကို သံတမန်နည်း မကျွမ်းကျင်တဲ့ လူတွေလုပ်တဲ့ကိစ္စဗျ” ဟု ပြောသည်။

အမေရိကန်သည် လက်ရှိတွင် မြန်မာနိုင်ငံအား အခွန် ၄၄ ရာခိုင်နှုန်းအထိ တိုးမြင့်ကောက်ခံထားပြီး ဖွံ့ဖြိုးဆဲ နိုင်ငံတစ်ခုအား အခွန်တိုးကောက်ခြင်းသည် မဖြစ်သင့်ကြောင်း၊ နိုင်ငံတစ်ခုတည်းကို မှီခိုနေရသည့် ကုန်သွယ်မှု ကိစ္စများအား ရှောင်ရှားပြီး နိုင်ငံအားလုံးဖြင့် မျှ၍ ကုန်သွယ်မှုလုပ်ခြင်းက ပိုကောင်းကြောင်း နစကဥက္ကဋ္ဌက ရုရှားခရီးစဉ်မှာ ပြောခဲ့သည်။

လက်ရှိ မြန်မာနိုင်ငံတွင် မြန်မာ့တပ်မတော်နှင့် လက်နက်ကိုင် အင်အားစုများကြား တိုက်ပွဲများ အပြင်းအထန် ဖြစ်ပွားနေသည်။

ထိုတိုက်ပွဲများတွင် အမေရိကန်ဘက်ယိုင်သည့် လက်နက်ကိုင်များနှင့် တရုတ်ဘက်ယိုင်သော လက်နက်ကိုင်များ ဖြစ်သည်။