CNI Sport News
၂၀၂၅ ခုနှစ်၊ စက်တင်ဘာ ၂၂
အာဆင်နယ်အသင်းနည်းပြ အာတီတာက မန်စီးတီးအသင်းနဲ့ ၁ ဂိုးစီ သရေကျခဲ့တဲ့ ပရီးမီးယားလိဂ်ပွဲစဉ်မှာ အသင်းရဲ့ လူစာရင်း ရွေးချယ်မှုကို ကာကွယ်ခဲ့ပြီး တစ်ပွဲလုံး ပွဲကိုကြီးစိုးနိုင်ခဲ့တဲ့အတွက် ဂုဏ်ယူတယ်လို့ ပြောခဲ့ပါတယ်။
အာတီတာက “ကျနော်တို့ဟာ ပွဲကိုကောင်းမွန်စွာ စတင်နိုင်ခဲ့သလို တစ်ပွဲလုံးလည်း ကြီးစိုးနိုင်ခဲ့ပါတယ်။ လူတိုင်း က အကောင်းဆုံးရလဒ် ရယူနိုင်ဖို့ ကြိုးစားခဲ့ကြပါတယ်။ ကျနော်တို့ဟာ ပွဲကိုထိန်းချုပ်နိုင်ခဲ့ပြီး တစ်ပွဲလုံး ကြီးစိုး နိုင်ခဲ့တဲ့အတွက် ကစားသမားတွေနဲ့ အသင်းကို အလွန်ဂုဏ်ယူပါတယ်။ ဒါပေမယ့် ရလဒ်ကိုတော့ အလွန်စိတ်ပျက် ပါတယ်။ ပွဲကို ကြီးစိုးနိုင်ခဲ့တာကိုတော့ ကျနော်ဂုဏ်ယူမိတယ်”လို့ ပြောခဲ့ပါတယ်။
အာဆင်နယ်အသင်းဟာ ဒီပွဲစဉ်မှာ ဟာလန်းရဲ့ပွဲချိန် ၉ မိနစ်မှာ သွင်းယူတဲ့ သွင်းဂိုးကြောင့် မန်စီးတီးအသင်းကို ဦးဆောင်ဂိုး ပေးခဲ့ရပြီး မိနစ် ၉၀ ပြည့်ပြီး နာကျင်အချိန်ပို ၃ မိနစ်မှာ မာတင်နယ်လီက ချေပဂိုးသွင်းယူခဲ့တာ ကြောင့် ၁ ဂိုးစီ သရေကျခဲ့တာပါ။
အာဆင်နယ်အသင်းဟာ ဒီရလဒ်ကြောင့် အမှတ်ပေးဇယား ထိပ်ဆုံးနေရာမှာ ရပ်တည်နေတဲ့ လီဗာပူးလ်အသင်းနဲ့ ၅ မှတ်အထိ ကွာဟသွားခဲ့ပါတယ်။
အာဆင်နယ်နဲ့မန်စီးတီးယှဉ်ပြိုင်နေစဉ်
အာဆင်နယ်အသင်းဟာ ဒီပွဲစဉ်မှာ ဘောလုံးပိုင်ဆိုင်မှု ၆၇.၂ ရာခိုင်နှုန်း ရရှိတဲ့အထိ မန်စီးတီးအသင်းကို အသာစီး ကစားနိုင်ခဲ့တာဖြစ်ပြီး ဒါဟာ ဂွာဒီယိုလာကိုင်တွယ်တဲ့ အသင်းတွေနဲ့ ရင်ဆိုင်ချိန်မှာ စံချိန်တင်ရရှိတဲ့ ဘောလုံး ပိုင်ဆိုင်မှု ဖြစ်ခဲ့တာပါ။
မန်စီးတီးအသင်းဟာ ဒီပွဲစဉ်မှာ ဦးဆောင်ဂိုး သွင်းယူပြီးနောက်ပိုင်း တန်ပြန်တိုက်စစ်တွေနဲ့သာ ထိုးဖောက်ဖို့ ကြိုးစားပြီး ခံစစ်မှာ အချိန်ကုန်ဆုံးခဲ့တာ ဖြစ်ပါတယ်။
အာဆင်နယ်အသင်းဟာ လီဗာပူးလ်အသင်းနဲ့ ၅ မှတ် ကွာဟသွားခဲ့ပေမယ့် နည်းပြအာတီတာက သူ့ရဲ့ ကစား သမားတွေဟာ ချန်ပီယံဆု ပြိုင်ပွဲအတွက် အဆင်သင့်ဖြစ်နေတယ်ဆိုတာ ယုံကြည်မှုရှိနေတာပါ။
လီဗာပူးလ်အသင်းဟာ ဒီရာသီ ပရီးမီးယားလိဂ်ပွဲစဉ် ၅ ပွဲ ကစားအပြီးမှာ ရာနှုန်းပြည့် နိုင်ပွဲရရှိထားတာဖြစ်ပြီး အာဆင်နယ်အသင်းကိုလည်း အနိုင်ရရှိထားပါတယ်။
အာဆင်နယ်အသင်းဟာ ကြားရက်ထဲမှာ ကာရာဘောင်း လိဂ်ဖလား တတိယအဆင့် ပွဲစဉ်အဖြစ် ပေါ့ဗေးလ် အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: ESPN
