CNI Sport News

၂၀၂၃ ခုနှစ်၊ နိုဝင်ဘာ ၂၁

အာဂျင်တီးနားအသင်းချန်ပီယံဆုရယူနိုင်ခဲ့တဲ့ ၂၀၂၂ ကာတာကမ္ဘာ့ဖလားပြိုင်ပွဲမှာ မက်ဆီဝတ်ဆင်ခဲ့တဲ့ အင်္ကျီ ၆ ထည်ကို လေလံတင်ရောင်းချသွားမှာဖြစ်ပါတယ်။

အာဂျင်တီးနားအသင်းဟာ ပြီးခဲ့တဲ့နှစ် ဒီဇင်ဘာလက ဗိုလ်လုပွဲမှာ ပြင်သစ်အသင်းကို ပင်နယ်တီအဆုံးအဖြတ်မှာ အနိုင်ရပြီး အသင်းခေါင်းဆောင် မက်ဆီက ကမ္ဘာ့ဖလားချန်ပီယံဆုကို ကိုင်မြှောက်နိုင်ခဲ့တာပါ။ မက်ဆီကတော့ နယူးယော့ခ်ရှိ Sotheby's မှာပြုလုပ်မယ့် လေလံပွဲမှာ ဒီအင်္ကျီတွေရောင်းချမှုကနေ ပေါင် ၈ သန်းကျော်ရရှိဖို့ မျှော်လင့်ထားတာဖြစ်ပါတယ်။ ၂၀၂၂ ခုနှစ်က မာရာဒိုနာရဲ့ ‘Hand of God’ ဂျာစီကို ရောင်းချခဲ့တာက ဘောလုံး သမိုင်းမှာ ဈေးအကြီးဆုံး လေလံတင်ရောင်းချမှုဖြစ်ခဲ့ပြီး ပေါင် ၇.၁ သန်းရရှိခဲ့တာပါ။

Sotheby's ရဲ့ အကြီးအကဲ ဝက်ချ်တာက မက်ဆီရဲ့ ကမ္ဘာ့ဖလားအင်္ကျီ ၆ ထည်ရောင်းချမှုဟာ လေလံသမိုင်းမှာ အကြီးကျယ်ဆုံးအချိန်အဖြစ် ရပ်တည်နေတယ်လို့ ပြောခဲ့ပါတယ်။ ဘောလွန်းဒီအော ၈ ကြိမ်ရရှိထားတဲ့ မက်ဆီဟာ ပြိုင်ပွဲတစ်ခုတည်းရဲ့ အုပ်စုအဆင့်၊ ၁၆ သင်းအဆင့်၊ ကွာတားဖိုင်နယ်၊ ဆီမီးဖိုင်နယ်နဲ့ ဗိုလ်လုပွဲမှာ ဂိုးသွင်းယူနိုင်ခဲ့တဲ့ ကမ္ဘာ့ဖလားပြိုင်ပွဲသမိုင်းတစ်လျှောက် ပထမဆုံးကစားသမားအဖြစ်လည်း မှတ်တမ်း တင်နိုင်ခဲ့တာပါ။

နိုဝင်ဘာ ၃၀ ရက်ကနေ  ဒီဇင်ဘာ ၁၄ ရက်အတွင်းပြုလုပ်မယ့် လေလံဆွဲမှုလုပ်ငန်းစဉ်အတွင်းမှာ မက်ဆီရဲ့ အင်္ကျီတွေကို Sotheby's ရုံးချုပ်မှာ အခမဲ့ကြည့်လို့ရမှာဖြစ်ပါတယ်။ ဒီလေလံကနေရရှိတဲ့ ဝင်ငွေတွေရဲ့ အစိတ်အပိုင်းတွေကို ရှားပါးရောဂါခံစားနေရတဲ့ ကလေးတွေရဲ့ လိုအပ်ချက်တွေကို ဖြည့်ဆည်းပေးသွားမှာ ဖြစ်တဲ့အပြင် အခြားပရဟိတလုပ်ငန်းတွေကိုလည်း လှူဒါန်းမှုတွေပြုလုပ်သွားမှာပါ။

မက်ဆီရဲ့ ဂျာစီလေလံတင်ရောင်းချမှုဟာ အားကစားလောကမှာ လေလံတင်ရောင်းချမှုကနေ စံချိန်တင်ရရှိခဲ့တဲ့ NBA နာမည်ကြီး မိုက်ကယ်ဂျော်ဒန်ရဲ့ ပေါင် ၈.၁ သန်းကို ကျော်လွန်ပြီးရရှိသွားနိုင်တယ်လို့ သတင်းတွေမှာ ဖော်ပြထားပါတယ်။

Source:BBC

CNI Sport News

 ၂၀၂၃ ခုနှစ်၊ နိုဝင်ဘာ ၂၁

ယူရိုပြိုင်ပွဲရဲ့ လက်ရှိချန်ပီယံဖြစ်တဲ့ အီတလီအသင်းဟာ ယူကရိန်းအသင်းနဲ့ ဂိုးမရှိ သရေကျပြီးနောက် ယူရို ၂၀၂၄ ပြိုင်ပွဲကို ခြေစစ်ပွဲအောင်မြင်သွားခဲ့ပြီ ဖြစ်ပါတယ်။

အီတလီအသင်းနဲ့ ယူကရိန်းအသင်းတို့ဟာ သရေရလဒ်ကြောင့် အုပ်စုပွဲစဉ် ၈ ပွဲစလုံး ကစားအပြီးမှာ ရမှတ် ၁၄ မှတ်ချင်း တူညီနေပေမယ့် ထိပ်တိုက်တွေ့ဆုံမှုမှာ အီတလီအသင်းက အသာရရှိခဲ့ပါတယ်။

အဲ့ဒါကြောင့် အီတလီအသင်းဟာ အုပ်စု C မှာ ဒုတိယနေရာ ရပ်တည်ကာ ထိပ်ဆုံးနေရာမှာရှိနေတဲ့ အင်္ဂလန် အသင်းနဲ့အတူ ဂျာမနီမှာကျင်းပမယ့် ပြိုင်ပွဲအတွက် ခြေစစ်ပွဲအောင်မြင်ခဲ့တာ ဖြစ်ပါတယ်။ 

အုပ်စုတွင်း တတိယနေရာ ရပ်တည်ခဲ့တဲ့ ယူကရိန်းအသင်းကတော့ ပလေးအော့ဖ် အဆင့်ကနေ ယူရို ၂၀၂၄ ပြိုင်ပွဲ ယှဉ်ပြိုင်ခွင့်ရဖို့ မျှော်လင့်ချက်တွေ ရှိနေပါတယ်။ 

ဒီပွဲစဉ်ရဲ့ နောက်ဆုံးမိနစ်မှာ ယူကရိန်းအသင်း ပင်နယ်တီ ရရှိနိုင်မယ့် အခွင့်အရေး ရခဲ့ပေမယ့် ကွင်းလယ် ဒိုင်လူကြီးက ပေးခဲ့ခြင်းမရှိပါဘူး။ 

ယူကရိန်းအသင်း နည်းပြ ရီဘရော့ဗ်ကတော့ ကွင်းလယ်ဒိုင်လူကြီးနဲ့ VAR တို့ဟာ မှားယွင်းတဲ့ ဆုံးဖြတ်ချက် ချခဲ့တယ်လို့ ပွဲအပြီးမှာ ပြောခဲ့ပါတယ်။

အီတလီအသင်းနဲ့ ယူကရိန်းအသင်း ယှဉ်ပြိုင်နေစဉ်

ရီဘရော့ဗ်က “ကျနော်ကတော့ ဒါကို ပင်နယ်တီလို့ ထင်ပါတယ်။ ဒါပေမယ့် ဒိုင်လူကြီးနဲ့ VAR တို့ရှိပါတယ်။ ကျနော်တို့က ဒါကို ဆုံးဖြတ်တဲ့သူတွေ မဟုတ်ပါဘူး။ ဒီဖြစ်ရပ်ကို စစ်ဆေးဖို့ ဒိုင်လူကြီးက မပြောခဲ့ပါဘူး။ ကျနော့် အမြင်မှာတော့ ဒါက ပင်နယ်တီ ကန်သွင်းရမှာပါ”လို့ ပြောခဲ့တာ ဖြစ်ပါတယ်။

အီတလီအသင်းနည်းပြ စပယ်လက်တီက ယူကရိန်းအသင်းဟာ မိမိတို့ကို ပြဿနာတွေ အများကြီးပေးခဲ့ပြီး အလွန်ကောင်းမွန်တဲ့ အသင်းဖြစ်ကြောင်း ပြသသွားခဲ့တယ်လို့ ပြောပါတယ်။ 

စက်တင်ဘာလကမှ အီတလီအသင်းကို နည်းပြအဖြစ် စတင်ကိုင်တွယ်ခဲ့တဲ့ စပယ်လက်တီဟာ ယူရိုခြေစစ်ပွဲ အောင်မြင်အောင် စွမ်းဆောင်ပေးနိုင်ခဲ့တာ ဖြစ်ပါတယ်။

စပယ်လက်တီက “ယူကရိန်းက အလွန်ကောင်းမွန်တဲ့ အသင်းဖြစ်ကြောင်းကို ပြသသွားခဲ့ပါတယ်။ ဒီပွဲက ကျနော်တို့အတွက် ပွဲကောင်းတစ်ပွဲဖြစ်ခဲ့ပြီး ပထမပိုင်းမှာတင် ကောင်းမွန်တဲ့ ရလဒ်တွေရယူဖို့ အခွင့်အရေး အများအပြား ရရှိခဲ့ပါတယ်။ အခု ကျနော်တို့ အဆင့်တက်သွားပြီဖြစ်ပြီး ပျော်ရွှင်စရာတွေနဲ့ စတင်ရတော့မှာပါ”လို့ ပြောခဲ့ပါတယ်။

ယူရို ၂၀၂၄ ပြိုင်ပွဲအတွက် အိမ်ရှင်ဂျာမနီ အပါအဝင် ခြေစစ်ပွဲအောင်မြင်ပြီးသား အသင်းအရေအတွက် ၂၀ သင်း အထိ ရှိလာပြီဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ နိုဝင်ဘာ ၂၀

ပေါ်တူဂီကွင်းလယ်လူ ဘရူနိုဖာနန်ဒက်စ်ဟာ ဆော်ဒီကလပ်တွေရဲ့ စိတ်ဝင်စားမှုကို ခံနေရပေမယ့် ယူနိုက်တက်အသင်းမှာ ပျော်ရွှင်နေတယ်လို့ ပြောလိုက်ပါတယ်။

ဘရူနိုဖာနန်ဒက်စ်က “ကျနော်ဟာ နိုင်ငံအသင်းနဲ့ ယူနိုက်တက်အတွက်ကိုပဲ အာရုံစိုက်နေပါတယ်။ ယူနိုက်တက်အသင်းမှာ ကျနော်တို့ဟာ လိုချင်တဲ့ပုံစံနဲ့ စတင်နိုင်ခဲ့ခြင်းမရှိပါဘူး။ ကျနော်ကောလာဟလတွေကို မကြည့်သလို ဒါတွေကိုလည်း ဂရုမစိုက်ပါဘူး။ အခုက ကောလာဟလတွေကို ဖြန့်ရတာ အလွန်လွယ်ကူသွားပါပြီ။ ကျနော်ကတော့ ရည်မှန်းထားတဲ့အရာတွေကို အာရုံစိုက်ရတာ ပိုကြိုက်နှစ်သက်ပြီး ယူနိုက်တက်အသင်းမှာ ပျော်ရွှင်နေပါတယ်” လို့ Sport TV Portugal ကိုပြောခဲ့တာပါ။

ဘရူနိုဖာနန်ဒက်စ်ဟာ ဆော်ဒီကလပ်တွေရဲ့ ခေါ်ယူဖို့ ချိတ်ဆက်ခံနေရပြီး ယူနိုက်တက်အသင်းက ပေါ်တူဂီ ကွင်းလယ်လူအတွက် ပြောင်းရွှေ့ကြေး ပေါင်သန်း ၁၀၀ သတ်မှတ်ထားတယ်လို့ သတင်းတွေထွက်ပေါ် ခဲ့တာဖြစ်ပါတယ်။ ၂၀၂၀ ခုနှစ်က ပေါင် ၄၇ သန်းနဲ့ စပို့တင်းလစ္စဘွန်းအသင်းကနေ ရောက်ရှိလာခဲ့တဲ့ ဘရူနိုဖာနန်ဒက်စ်ဟာ ပြီးခဲ့တဲ့နွေရာသီက ယူနိုက်တက်အသင်းရဲ့ တရားဝင်အသင်းခေါင်းဆောင်အဖြစ် ခန့်အပ်ခြင်းခံထားရတာပါ။

ဘရူနိုဖာနန်ဒက်စ်ဟာ ဒီရာသီအစပိုင်းမှာ ရလဒ်ကောင်းတွေရရှိဖို့ ရုန်းကန်နေရတဲ့ ယူနိုက်တက်အသင်းနဲ့အတူ သူလည်း ခြေစွမ်းပြသနိုင်ခြင်းမရှိတာကြောင့် မပျော်မရွှင်ဖြစ်နေတယ်လို့ သတင်းတွေထွက်ပေါ်ခဲ့ပေမယ့် သူကတော့ အသင်းမှာရှိနေရတာ ပျော်ရွှင်တယ်လို့ ပြောခဲ့ပါတယ်။ ယူနိုက်တက်အသင်းနဲ့ ဘရူနိုဖာနန်ဒက်စ်တို့ ချုပ်ဆိုထားတဲ့ စာချုပ်ဟာ ၂၀၂၆ ခုနှစ်အထိ သက်တမ်းရှိနေသေးပြီး နောက်ထပ် ၁ နှစ်သက်တမ်းတိုးဖို့ ရွေးချယ်ခွင့်ရှိနေတာပါ။ 

အသက် ၂၉ နှစ်အရွယ်ရှိ ဘရူနိုဖာနန်ဒက်စ်ဟာ ယူနိုက်တက်အသင်းအတွက် ၂၀၂ ပွဲပါဝင်ကစားထားပြီး ၆၈ ဂိုးသွင်းယူကာ ပြီးခဲ့တဲ့နှစ်က ကာရာဘောင်းဖလားချန်ပီယံဆု ရယူနိုင်ခဲ့တာဖြစ်ပါတယ်။

Source:Metro

CNI Sport News

၂၀၂၃ ခုနှစ်၊ နိုဝင်ဘာ ၂၀

အခုနှစ်ထဲမှာ ဂရမ်းဆလမ်းဆုဖလား ၃ ခုနဲ့ ATP Finals ဆုဖလားတို့ကို ရယူနိုင်ခဲ့တဲ့ ဆားဘီးယား တင်းနစ်သမား ဂျိုကိုဗစ်က ၂၀၂၄ ခုနှစ်ထဲမှာ Golden Slam ရယူနိုင်ဖို့ ရည်မှန်းထားတယ်လို့ ပြောလိုက်ပါတယ်။

ဂျိုကိုဗစ်က “လာမယ့်နှစ်မှာ အိုလံပစ် ရွှေတံဆိပ်ဆုနဲ့ ဂရမ်းဆလမ်းဆုဖလား ၄ ခုကို ရယူနိုင်ပါတယ်။ ကျနော်ဟာ အမြဲတမ်း အမြင့်ဆုံး ရည်မှန်းချက်တွေနဲ့ ပန်းတိုင်အဖြစ် သတ်မှတ်ထားတဲ့ အရာတွေရှိပါတယ်။ အဲ့ဒါက နောက်နှစ်အတွက် မတူညီနိုင်ပါဘူး။ ကျနော့်ခန္ဓာကိုယ်က ကျနော့်စကားကို ကောင်းမွန်စွာ နားထောင်ပါတယ်။ အားကစားမှာရှိတဲ့ အကြီးကျယ်ဆုံး ပြိုင်ပွဲတွေအတွက် စိတ်အားထက်သန်မှုက အခုထိရှိနေတုန်းပါပဲ။ အဲ့ဒါက ကျနော်ရှေ့ဆက်သွားနိုင်ဖို့ တွန်းအားပေးနေတာ”လို့ ပြောခဲ့ပါတယ်။

ဂျိုကိုဗစ်ဟာ နိုဝင်ဘာ ၁၉ ရက်က စင်နာကို အနိုင်ယူပြီး ATP Finals ချန်ပီယံဆုကို စံချိန်တင် ၇ ကြိမ်မြောက် ရယူနိုင်ခဲ့တာ ဖြစ်ပါတယ်။ 

အသက် ၃၆ နှစ်အရွယ်ရှိ ဂျိုကိုဗစ်ဟာ ၂၀၂၄ ခုနှစ်မှာ ကျင်းပမယ့် ပဲရစ်အိုလံပစ်ပြိုင်ပွဲရဲ့ တင်းနစ်တစ်ဦးချင်း အဆင့်မှာ ရွှေတံဆိပ် ရယူချင်တယ်လို့ တူရင်ရှိ သတင်းထောက်တွေကို ပြောခဲ့ပါတယ်။

ဂျိုကိုဗစ်ကို တွေ့ရစဉ်

တင်းနစ်သမိုင်းမှာ Golden Slam ရယူနိုင်ခဲ့တဲ့ ကစားသမား တစ်ဦးတည်းသာရှိပြီး သူကတော့ စတပ်ဖီဂရဗ် ဖြစ်ပါတယ်။ 

စတပ်ဖီဂရဗ်ဟာ ၁၉၈၈ ခုနှစ်ထဲမှာ သြစတြေးလျအိုးပန်း၊ ပြင်သစ်အိုးပန်း၊ ဝင်ဘယ်လ်ဒန်အိုးပန်း၊ ပြင်သစ်အိုးပန်း ဂရမ်းဆုဖလားတွေနဲ့အတူ ဆိုးလ်အိုလံပစ်ပြိုင်ပွဲမှာ ရွှေတံဆိပ်ရယူနိုင်ခဲ့ပါတယ်။

အဲ့ဒါကြောင့် ဂျိုကိုဗစ်ဟာ တင်းနစ်သမိုင်းမှာ ဒီလိုမျိုး Golden Slam အောင်မြင်မှုရယူနိုင်တဲ့ နောက်ထပ် ကစားသမား ဖြစ်လာနိုင်ဖို့ ရည်မှန်းနေတာ ဖြစ်ပါတယ်။ 

ဒါ့အပြင် ဆားဘီးယား တင်းနစ်သမားက ဒီရာသီမှာ ရယူနိုင်ခဲ့တဲ့ အောင်မြင်မှုတွေ အတွက်လည်း အလွန်ဂုဏ်ယူ မိတယ်လို့ ပြောခဲ့တာပါ။

ဂျိုကိုဗစ်က “ဒီနှစ်က ကျနော့်ဘဝမှာ အကောင်းဆုံး ရာသီတွေထဲက တစ်ခုဖြစ်ခဲ့တယ်ဆိုတာ သံသယဖြစ်စရာ မရှိပါဘူး။ ကျနော့်အသင်းနဲ့ ဖြတ်သန်းခဲ့ရတဲ့ ဒီနှစ်ဟာ ကြီးကျယ်တဲ့ ဆုလာဘ်ပါပဲ။ ပြိုင်ပွဲကြီး ၅ ခုမှာ ၄ ခုက ချန်ပီယံဖြစ်ခဲ့ပါတယ်”လို့ ပြောခဲ့တာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ နိုဝင်ဘာ ၂၀

ရိုးမားအသင်း တိုက်စစ်မှူး လူကာကူဟာ ဘယ်လ်ဂျီယံအသင်းက အဇာဘိုင်ဂျန်အသင်းကို ၅ ဂိုး- ဂိုးမရှိနဲ့ အနိုင် ရရှိခဲ့တဲ့ ယူရို ၂၀၂၄ ခြေစစ်ပွဲမှာ ၄ ဂိုးသွင်းပြီး ယူရိုခြေစစ်ပွဲမှာ ဂိုးသွင်းစံချိန်သစ် တင်နိုင်ခဲ့ပါတယ်။

အသက် ၃၀ နှစ်အရွယ်ရှိ လူကာကူဟာ ဒီပွဲက သွင်းယူခဲ့တဲ့ ဂိုးတွေကြောင့် ယူရို ၂၀၂၄ ခြေစစ်ပွဲမှာသွင်းဂိုး ၁၄ ဂိုးနဲ့ ဂိုးသွင်း အများဆုံး ကစားသမားအဖြစ် ရပ်တည်ခဲ့ပါတယ်။

အဲ့ဒါကြောင့် လူကာကူဟာ ယူရိုခြေစစ်ပွဲ တစ်ခုတည်းမှာ ဂိုးသွင်းအများဆုံး ကစားသမားအဖြစ် မြောက်အိုင်ယာ လန် အသင်းက ဒေးဗစ်ဟီလေနဲ့ ပိုလန်အသင်းက လီဝန်ဒေါစကီးတို့ရဲ့ သွင်းဂိုး ၁၃ ဂိုးကို ၁ ဂိုးအသာနဲ့ ကျော်ဖြတ် ပြီး စံချိန်သစ်တင်နိုင်ခဲ့တာ ဖြစ်ပါတယ်။

လူကာကူဟာ လက်ရှိအချိန်မှာ ဘယ်လ်ဂျီယံအသင်းအတွက် ၁၁၃ ပွဲ ကစားထားပြီး ၈၃ ဂိုးသွင်းယူကာ အမျိုးသား လက်ရွေးစင်ဘောလုံးသမိုင်းရဲ့ ဂိုးသွင်းအများဆုံး နံပါတ် ၇ နေရာကို ရောက်ရှိလာခဲ့တာပါ။

နိုင်ငံအသင်းနဲ့ ဂိုး အများဆုံးသွင်းထားသူများ စာရင်းကို တွေ့ရစဉ်

လူကာကူရဲ့ အထက်မှာ ရော်နယ်ဒို၊ အလီဒါယီ၊ မက်ဆီ၊ ချက်ထရီ၊ ဒါဟာရီနဲ့ ပွတ်စ်ကတ်စ်တို့သာ ရှိတာဖြစ်ပါ တယ်။ လူကာကူအတွက်တော့ အဇာဘိုင်ဂျန်အသင်းနဲ့ပွဲက ၄ ဂိုးဟာ သူ့ရဲ့ ဘယ်လ်ဂျီယံ ကစားသမားဘဝ ပထမဆုံး တစ်ပွဲတည်း ၄ ဂိုးသွင်းယူနိုင်ခဲ့တာပါ။

လူကာကူဟာ ဒီရာသီမှာ ကလပ်နဲ့ နိုင်ငံအသင်းအတွက် ၁၉ ပွဲ ကစားထားပြီး ၁၇ ဂိုး သွင်းယူကာ ၁ ဂိုး ဖန်တီး ထားတယ်လို့ အချက်အလက်တွေအရ သိရပါတယ်။ 

ဘယ်လ်ဂျီယံအသင်းဟာ ယူရို ၂၀၂၄ ခြေစစ်ပွဲစဉ် ၈ ပွဲစလုံး ကစားအပြီးမှာ ရမှတ် ၂၀ နဲ့ အုပ်စုတွင်း ပထမနေရာ ရရှိကာ ဒုတိယရရှိခဲ့တဲ့ သြစတြီးယားအသင်းနဲ့အတူ ခြေစစ်ပွဲအောင်မြင်ခဲ့တာ ဖြစ်ပါတယ်။ 

ဘယ်လ်ဂျီယံအသင်းဟာ နည်းပြ တီဒက်စကို ကိုင်တွယ်ခဲ့တဲ့ ဖေဖော်ဝါရီလကတည်းက ရှုံးပွဲမရှိသေးဘဲ ပုံစံ ကောင်းတွေ ပြသနေတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ နိုဝင်ဘာ ၂၀

ဘာစီလိုနာအသင်းကွင်းလယ်လူ ဂါဗီဟာ စပိန်အသင်းက ဂျော်ဂျီယာအသင်းကို အနိုင်ရရှိခဲ့တဲ့ ယူရို ၂၀၂၄ ခြေစစ်ပွဲမှာ ဒူးအရွတ်ဒဏ်ရာရရှိသွားခဲ့တာကြောင့် ကာလရှည်ကြာအနားယူရဖွယ်ရှိနေတယ်လို့ သတင်း ရင်းမြစ်တွေက ESPN ကို ပြောခဲ့ပါတယ်။

စပိန်ဘောလုံးအဖွဲ့ချုပ်ပြောရေးဆိုခွင့်ရှိသူက ဂါဗီရဲ့ ညာဘက်ဒူးကို စမ်းသပ်စစ်ဆေးမှုတွေပြုလုပ်သွားမယ်လို့ အတည်ပြုထားတာပါ။ ဂါဗီဟာ စပိန်အသင်းက ဂျော်ဂျီယာအသင်းကို ၃ ဂိုး- ၁ ဂိုးနဲ့ အနိုင်ရရှိခဲ့တဲ့ပွဲစဉ်ရဲ့ ပွဲချိန် ၂၆ မိနစ်မှာ ဒဏ်ရာရရှိသွားခဲ့တာဖြစ်ပြီး သူ့ရဲ့ ဒူးကိုကိုင်ကာ ငိုကြွေးနေခဲ့တာဖြစ်ပါတယ်။ ဂါဗီဟာ စပိန်နဲ့ ဘာစီလိုနာ အသင်းရဲ့ အဓိက ကစားသမားအဖြစ် ခြေစွမ်းပြသနေတာဖြစ်ပြီး သူ့ရဲ့ဒဏ်ရာဟာ ၂ သင်းစလုံးအတွက် စိတ်ပျက် စရာဖြစ်ခဲ့ရတာပါ။

စပိန်အသင်းနည်းပြ ဒီလာဖူအန်တီက “ကြည့်ရတာတော့ ဂါဗီရဲ့ဒဏ်ရာကပြင်းထန်သလိုပါပဲ။ သူဟာ အလွန် စိုးရိမ်နေပါတယ်။ ကျနော်တို့ဟာ တိကျတဲ့စမ်းသပ်မှုရဲ့အဖြေကို စောင့်ဆိုင်းနေပါတယ်။ စပိန်အားကစား ဒါရိုက်တာနဲ့ ဂါဗီတို့ဟာ ဘာစီလိုနာကိုသွားပြီး နောက်ထပ်စမ်းသပ်မှုတွေကို ပြုလုပ်နေပါတယ်။ ဂါဗီရဲ့ဒဏ်ရာက ကျနော်တို့ ပွဲကိုရှုံးနိမ့်သွားသလိုပါပဲ” လို့ ပွဲအပြီးမှာ သတင်းထောက်တွေကို ပြောခဲ့ပါတယ်။

စပိန်အသင်းဖော် ဖာရန်တောရက်စ်ဟာ ဂျော်ဂျီယာအသင်းဘက်ကို ဂိုးသွင်းယူအပြီးမှာ ဂါဗီရဲ့ ကျောနံပတ်ပါ အင်္ကျီကို ကိုင်ဆောင်ကာ အောင်ပွဲခံမှုပြုလုပ်ခဲ့တာပါ။ 

ဖာရန်တောရက်စ်က “ခြေစစ်ပွဲအဆင့်ကို ကောင်းမွန်စွာ အဆုံးသတ်နိုင်ဖို့အတွက် အရေးကြီးတဲ့နိုင်ပွဲဖြစ်ခဲ့ပေမယ့် ဂါဗီရဲ့ဒဏ်ရာက ခါးသီးတဲ့ခံစားချက်ဖြစ်ခဲ့ပါတယ်။ သူအမြန်ဆုံးပြန်ကောင်းလာနိုင်ဖို့ မျှော်လင့်ပါတယ်။ ဂါဗီရဲ့ ဒဏ်ရာအခြေအနေကို လာမယ့်ရက်ပိုင်းအတွင်းမှာ သိရမှာဖြစ်ပေမယ့် ကျနော်တို့ကတော့ ပြင်းထန်တယ်လို့ ထင်ကြောင်း” ပြောခဲ့ပါတယ်။

စပိန်အသင်းဟာ ယူရို ၂၀၂၄ ခြေစစ်ပွဲစဉ် ၈ ပွဲစလုံးကစားအပြီးမှာ ရမှတ် ၂၁ မှတ်နဲ့ အုပ်စုတွင်း ပထမနေရာ ရရှိကာ ခြေစစ်ပွဲအောင်မြင်ခဲ့တာဖြစ်ပါတယ်။

Source:Espn

CNI Sport News
၂၀၂၃ ခုနှစ်၊ နိုဝင်ဘာ ၁၉

မန်စီးတီးအသင်း ကွင်းလယ်ဖန်တီးရှင် ဒီဘရိုင်းဟာ ကနေဒါရက်ပ် အဆိုတော် Darke ရဲ့ သီချင်းသစ် Wick Man မှာ သီချင်းပူးတွဲ ရေးသားသူအဖြစ် ဖော်ပြခြင်း ခံခဲ့ရတာနဲ့ ပတ်သက်ပြီး ငြင်းဆန်လိုက်ပါတယ်။

Darke ရဲ့ သီချင်းအသစ်ဟာ သောကြာနေ့က ထွက်ရှိခဲ့တာဖြစ်ပြီး သီချင်းရေးသားသူတွေထဲက တစ်ဦးအဖြစ် ဒီဘရိုင်းရဲ့နာမည်ကို ဖော်ပြထားတာပါ။ 

ဘယ်လ်ဂျီယံ လက်ရွေးစင် ကစားသမားဟာ ဒဏ်ရာကြောင့် အနားယူနေရချိန်မှာ ဂီတဘက်ကို ပြောင်းပြီး လုပ်ကိုင်နေတယ်လို့ ဘောလုံးပရိသတ်တွေက ထင်မြင်သွားခဲ့တာ ဖြစ်ပါတယ်။ 

ဒီဘရိုင်းကတော့ သူဟာ Darke ကို အကူအညီမပေးခဲ့ဘူးလို့ ဖြေရှင်းချက်ပေးခဲ့ရတာပါ။

ဒီဘရိုင်းဟာ အခုရာသီ ပရီးမီးယားလိဂ် အဖွင့်ပွဲစဉ်ဖြစ်တဲ့ ဘန်လေအသင်းနဲ့ ပွဲမှာရရှိခဲ့တဲ့ တံကောက်ကြော ဒဏ်ရာကို ခွဲစိတ်ကုသမှု ခံယူထားရပြီး ပြန်လည်ထူထောင်ရေး လုပ်ငန်းစဉ်တွေကို ပြုလုပ်နေရပါတယ်။ 

အသက် ၃၂ နှစ်အရွယ်ရှိ ဒီဘရိုင်းဟာ မန်စီးတီးအသင်းအတွက် ပါဝင်ကစားထားတဲ့ အချိန်အတွင်း ဂိုးဖန်တီးမှု ၁၅၃ ဂိုး ပြုလုပ်ထားပြီး ဒီထဲက ပရီးမီးယားလိဂ်မှာ ၁၀၂ ဂိုး ဖန်တီးထားတာပါ။

အဲ့ဒါကြောင့် ဒီဘရိုင်းဟာ ပရီးမီးယားလိဂ်သမိုင်းမှာ ဂိုးဖန်တီးမှု အများဆုံး ပြုလုပ်ထားတဲ့ စာရင်းရဲ့ နံပတ် ၄ နေရာမှာ ရပ်တည်နေတာ ဖြစ်ပါတယ်။ 

ဘယ်လ်ဂျီယံ ကစားသမားရဲ့ ဂိုးဖန်တီးမှုတွေကြောင့် ပြီးခဲ့တဲ့ရာသီက တိုက်စစ်မှူး ဟာလန်းဟာ ဂိုးအများအပြား သွင်းယူနိုင်ခဲ့သလို မန်စီးတီးအသင်းကလည်း ချန်ပီယံလိဂ် အပါအဝင် ဆုဖလား ၃ လုံးကို ရယူနိုင်ခဲ့တာပါ။

မန်စီးတီးအသင်းကတော့ ဒီဘရိုင်းကို အသင်းအတွက် အမြန်ဆုံး ပါဝင်ကစားပေးနိုင်ဖို့ မျှော်လင့်နေတာ ဖြစ်ပါတယ်။

မန်စီးတီးအသင်းဟာ ဒီရာသီ ပရီးမီးယားလိဂ်ပြိုင်ပွဲမှာ ထိပ်ဆုံးနေရာ ဦးဆောင်နေသလို ချန်ပီယံလိဂ်ပြိုင်ပွဲမှာ လည်း ၁၆ သင်းအဆင့်ကို တက်ရောက်နိုင်ခဲ့ပြီ ဖြစ်ပါတယ်။

Source: CAN 

CNI Sport News
၂၀၂၃ ခုနှစ်၊ နိုဝင်ဘာ ၁၉

ပီအက်စ်ဂျီအသင်း တိုက်စစ်မှူး ဘတ်ပီက အနာဂတ်နဲ့ ပတ်သက်ပြီး ထွက်ပေါ်နေတဲ့ ထင်ကြေးတွေဟာ သူ့ရဲ့ ကွင်းအတွင်း စွမ်းဆောင်ရည်ကို ထိခိုက်မှာ မဟုတ်ဘူးလို့ ပြောလိုက်ပါတယ်။

ဘတ်ပီက “အနာဂတ်နဲ့ ပတ်သက်တဲ့ မေးခွန်းတွေက ကျနော့်အတွက် လေးနက်တဲ့အရာ မဟုတ်ပါဘူး။ ကျနော် ကွင်းထဲမှာ ဒါတွေကို မစဉ်းစားပါဘူး။ ကစားပုံ၊ စွမ်းဆောင်ရည်နဲ့ ဆုဖလားတွေ ရယူနိုင်ဖို့ အကြောင်းကိုပဲ စဉ်းစား ပါတယ်။ ကျနော်အမြဲတမ်း ဒီလိုပဲ လုပ်ခဲ့တာပါ။ ကွင်းပြင်ပမှာ ဖြေရှင်းစရာတွေ အများကြီးရှိပေမယ့် ကျနော့်ကို အောင်မြင်မှု မရအောင် မတားဆီးနိုင်ပါဘူး။ ကျနော့်အတွက် အရေးကြီးဆုံးက အကောင်းဆုံး ကစားဖို့ပါပဲ”လို့ ပြောခဲ့ပါတယ်။

ဘတ်ပီဟာ ပီအက်စ်ဂျီအသင်းနဲ့ စာချုပ်သစ် ချုပ်ဆိုဖို့ အစီအစဉ်မရှိတာကြောင့် အခုရာသီအကုန်မှာ ပြင်သစ် ကလပ်ကနေ အလွတ်နဲ့ ထွက်ခွာလို့ရမှာ ဖြစ်ပါတယ်။

အဲ့ဒါကြောင့် ဘတ်ပီနဲ့ ရီးရယ်လ်အသင်းတို့ရဲ့ အပြောင်းအရွှေ့ သတင်းတွေ ထွက်ပေါ်နေတာ ဖြစ်ပေမယ့် ပြင်သစ် အသင်း ခေါင်းဆောင်ကတော့ အနာဂတ်နဲ့ ပတ်သက်ပြီး ဘာမှပြောဆိုခဲ့ခြင်း မရှိပါဘူး။ 

ဘတ်ပီကတော့ သူဟာ ကွင်းအတွင်းမှာ အကောင်းဆုံး စွမ်းဆောင်နိုင်ဖို့ကိုပဲ အာရုံစိုက်ထားတယ်လို့ ပြောထား ပါတယ်။
ရီးရယ်လ်အသင်းဟာ ဘတ်ပီနဲ့ အပြောင်းအရွှေ့အတွက် ချိတ်ဆက်မှု ပြုလုပ်ခဲ့တယ်ဆိုတဲ့ သတင်းတွေကို မကြာသေးခင်က ငြင်းဆန်ထားသလို ပြင်သစ်တိုက်စစ်မှူးကို ခေါ်ယူဖွယ်မရှိဘူးလို့ စပိန်မီဒီယာတွေက ဖော်ပြ ထားပါတယ်။

လက်ရှိအချိန်မှာ ဘတ်ပီကို ခေါ်ယူနိုင်ဖို့အတွက် လီဗာပူးလ်နဲ့ ဘိုင်ယန်မြူးနစ် အသင်းတို့ကလည်း စိတ်ဝင် စားနေတယ်လို့ သတင်းတွေ ထွက်ပေါ်နေပါတယ်။

အသက် ၂၄ နှစ်အရွယ်ရှိ ဘတ်ပီဟာ ဒီရာသီမှာ ပီအက်စ်ဂျီအသင်းအတွက် ၁၅ ပွဲ ပါဝင်ကစားထားပြီး ၁၅ ဂိုး သွင်းယူထားကာ အသင်းကို လီဂူးဝမ်းပြိုင်ပွဲရဲ့ ထိပ်ဆုံးနေရာကို ပြန်လည်ရောက်ရှိအောင် ပို့ဆောင် ပေးထားတာ ဖြစ်ပါတယ်။

Source: CNA

CNI Sport News
၂၀၂၃ ခုနှစ်၊ နိုဝင်ဘာ ၁၈

ချယ်လ်ဆီးနဲ့ မန်စီးတီးအသင်းတို့ဟာ ဘဏ္ဍာရေးစည်းမျဉ်း ချိုးဖောက်မှုကြောင့် ပရီးမီးယားလိဂ်ကနေ တန်းဆင်း ရဖွယ်ရှိတယ်လို့ ကျွမ်းကျင်သူတွေက သတိပေးလိုက်ပါတယ်။

ပြီးခဲ့တဲ့ရက်ကမှ အဲဗာတန်အသင်းဟာ ပရီးမီးယားလိဂ်ရဲ့ ဘဏ္ဍာရေး စည်းမျဉ်း ချိုးဖောက်ခဲ့တဲ့အတွက် ရမှတ် ၁၀ မှတ် လျှော့ချခံလိုက်ရပြီး တန်းဆင်းဇုန်ထဲ ကျရောက်သွားခဲ့တာပါ။

အဲဗာတန်အသင်းကတော့ ပရီးမီးယားလိဂ်ရဲ့ ဒီပြစ်ဒဏ်အပေါ် အယူခံဝင်သွားမယ်လို့ ပြောထားပါတယ်။ 

အရင်က မန်စီးတီးအသင်းကို အကြံပေးခဲ့ဖူးတဲ့ ရှေ့နေ ဘော်ဆွန်က ချယ်လ်ဆီးနဲ့ မန်စီးတီးအသင်းတို့ဟာ ဘဏ္ဍာရေး စည်းမျဉ်း ချိုးဖောက်ခဲ့ကြောင်း တွေ့ရမယ်ဆိုရင် တန်းဆင်းရနိုင်တယ်လို့ ယုံကြည်နေတာပါ။

အဲဗာတန်အသင်းကို တွေ့ရစဉ်

ချယ်လ်ဆီးအသင်းဟာ ပိုင်ရှင်ဟောင်း အေဘရာမိုဗစ်ချ် လက်ထက်က ငွေပေးချေမှုနဲ့ ပတ်သက်ပြီး စုံစမ်း စစ်ဆေးခံနေရသလို မန်စီးတီးအသင်းကလည်း ပရီးမီးယားလိဂ်ရဲ့ ဘဏ္ဍာရေးစည်းမျဉ်း ချိုးဖောက်မှု စွပ်စွဲချက် ၁၁၅ ချက်နဲ့ ရင်ဆိုင်နေရတာ ဖြစ်ပါတယ်။

အဲဗာတန်အသင်းရဲ့ အယူခံ အောင်မြင်ခဲ့မယ်ဆိုရင် ချယ်လ်ဆီးနဲ့ မန်စီးတီးအသင်းတို့အတွက် သက်သာရာ ရနိုင် ပါတယ်။

ဘော်ဆွန်က “စီရင်ချက်ကို မတွေ့ရဘဲ ဘဏ္ဍာရေးစည်းမျဉ်း ချိုးဖောက်မှုကြောင့် အဲဗာတန်ကို ၁၀ မှတ်လျှော့ ပြစ်ဒဏ် ချမှတ်တာဟာ ကျနော့်အတွက် ကြမ်းတမ်းတယ်လို့ ခံစားရပါတယ်။ ချယ်လ်ဆီးနဲ့ မန်စီးတီးအသင်းတို့ ကသာ ဘဏ္ဍာရေးစည်းမျဉ်း ချိုးဖောက်ကြောင်းတွေ့ရရင် တန်းဆင်းသွားရဖွယ်ရှိပါတယ်”လို့ X မှာ ရေးသားထား တာ ဖြစ်ပါတယ်။

အဲဗာတန်အသင်းဟာ ဒီရာသီ ပရီးမီးယားလိဂ်ပွဲစဉ် ၁၂ ပွဲ ကစားအပြီးမှာ ရမှတ် ၁၄ မှတ် ရရှိထားပေမယ့် ၁၀ မှတ် အလျှော့ ခံခဲ့ရတာကြောင့် ရမှတ် ၄ မှတ်နဲ့ အဆင့် ၁၉ နေရာကို ရောက်ရှိသွားခဲ့တာ ဖြစ်ပါတယ်။ 

Source: Goal