- By CNI
- Category: အားကစား
- Hits: 965
CNI Sport News
၂၀၂၄ ခုနှစ် ဒီဇင်ဘာ ၄
လက်စတာအသင်းက ဝက်စ်ဟမ်းအသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ပရီးမီးယားလိဂ်ပွဲစဉ်မှာ လက်စတာ အသင်းကို နည်းပြအဖြစ် စတင်ကိုင်တွယ်ခဲ့တဲ့ နစ္စတယ်ရွိုင်းဟာ ပထမဆုံးပွဲကို နိုင်ပွဲနဲ့ စတင်နိုင်ခဲ့ပါတယ်။
ပြီးခဲ့တဲ့ ရက်သတ္တပတ်ကမှ လက်စတာအသင်းနည်းပြသစ်အဖြစ် ခန့်အပ်ခံခဲ့ရတဲ့ နစ္စတယ်ရွိုင်းဟာ ဘရန်ဖိုဒ့် အသင်းနဲ့ ပွဲစဉ်ကို ပွဲကြည့်စင်ပေါ်ကနေ ကြည့်ရှုခဲ့ပြီး ဝက်စ်ဟမ်းအသင်းနဲ့ပွဲစဉ်မှ စတင်ကိုင်တွယ်ခဲ့တာပါ။
လက်စတာအသင်းဟာ နစ္စတယ်ရွိုင်းမကိုင်တွယ်ခင်က ပရီးမီးယားလိဂ်နောက်ဆုံး ၅ ပွဲဆက်တိုက် နိုင်ပွဲ ပျောက်ဆုံးခဲ့ပြီး နစ္စတယ်ရွိုင်းစတင်ကိုင်တွယ်တဲ့ ဝက်စ်ဟမ်းအသင်းနဲ့ပွဲစဉ်မှာ နိုင်ပွဲပြန်လည် ရရှိခဲ့တာ ဖြစ်ပါတယ်။
နစ္စတယ်ရွိုင်းက “အဆုံးမှာ ရလဒ်ကို ကြည့်ပြီး ၃ မှတ်ရရှိခဲ့ပေမယ့် ကျနော်တို့ ရပ်တည်နေတဲ့ နေရာက အရေးကြီးပါတယ်။ ပရီးမီးယားလိဂ်ရဲ့အဆင့်အတန်းကို ကျနော်တို့သိတဲ့အတွက် ကစားတဲ့ပွဲတိုင်းက အရာအားလုံးကို မှန်ကန်အောင်လုပ်ရမယ်ဆိုတာလည်း သိပါတယ်။
ကျနော်တို့ဟာ ဒီထက်ပိုတိုးတက်အောင် လုပ်စရာအလုပ်တွေအများကြီးရှိနေပေမယ့် ၃ မှတ်ရယူနိုင်ခဲ့တဲ့အတွက် အလွန်ပျော်ရွှင်တယ်”လို့ ပွဲအပြီးမှာ ပြောခဲ့တာပါ။
ဘရိုက်တန်နဲ့ ချယ်လ်ဆီးအသင်းနည်းပြဟောင်း ဂရေဟမ်ပေါ်တာက ဒါက ပြီးပြည့်စုံတဲ့ စတင်မှုဖြစ်ပြီး ပရိသတ် တွေက နည်းပြသစ်အပေါ် ယုံကြည်မှုရှိဖို့က အလွန်အရေးကြီးတယ်လို့ မှတ်ချက်ပေးခဲ့ပါတယ်။
လက်စတာ အသင်းဟာ ဒီနိုင်ပွဲကြောင့် ပရီးမီးယားလိဂ်အမှတ်ပေးဇယားအဆင့် ၁၅ နေရာအထိ တက်နိုင်ခဲ့ပြီး တန်းဆင်းဇုန် အထက်ကအသင်းနဲ့ ၄ မှတ်ကွာဟနေတာပါ။
ဝက်စ်ဟမ်းအသင်းကတော့ ဒီရှုံးပွဲကြောင့် ပရီးမီးယားလိဂ်မှာ ၂ ပွဲ ဆက်ရှုံးပွဲကြုံတွေ့ခဲ့ပြီး နည်းပြ လိုပီတီဂွီရဲ့ အနာဂတ်ကလည်း မရေမရာဖြစ်လာခဲ့ပါတယ်။
ဝက်စ်ဟမ်းအသင်းဟာ ဒီပွဲမှာ လက်စတာအသင်းဘက်ကို ဂိုးပေါက်ကန်သွင်းမှု ၃၁ ကြိမ်နဲ့ ဂိုးပေါက်တည့်မှု ၁၀ ကြိမ်အထိရှိခဲ့ပေမယ့် မိနစ် ၉၀ ပြည့်ပြီး နာကျင်အချိန်ပိုမှသာ ချေပဂိုးသွင်းယူနိုင်ခဲ့တာပါ။
ဝက်စ်ဟမ်းအသင်းဟာ ဒီရှုံးပွဲကြောင့် လက်စတာအသင်းရဲ့အထက် အဆင့် ၁၄ နေရာမှာ ရပ်တည်နေပါတယ်။
ဒီတစ်ပတ်ပရီးမီးယားလိဂ် ပွဲစဉ်တွေအဖြစ် လက်စတာအသင်းက ဘရိုက်တန်၊ဝက်စ်ဟမ်းအသင်းက ဝုလ်ဗ်စ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source:BBC
- By CNI
- Category: အားကစား
- Hits: 1417
CNI Sport News
၂၀၂၄ ခုနှစ်၊ ဒီဇင်ဘာ ၃
ဘိုင်ယန်မြူးနစ်အသင်း ကွင်းလယ်လူ ကင်မစ်ရှ်က သူ့ရဲ့အနာဂတ်ကို ဆုံးဖြတ်ချက်ချဖို့ နွေရာသီအထိ စောင့်ဆိုင်းမှာ မဟုတ်ဘူးလို့ ပြောခဲ့ပါတယ်။
ကင်မစ်ရှ်က “ကျနော် နွေရာသီအထိ စောင့်ဆိုင်းမှာ မဟုတ်ပါဘူး။ ဆောင်းရာသီမှာထိုင်ပြီး ပိုကြီးမားတဲ့ပုံကို ကြည့်မှာပါ။ ဇန်နဝါရီမှာ ကျနော်ဟာ မှန်ကန်တဲ့ဆုံးဖြတ်ချက်ကို ချမှာပါ”လို့ အနာဂတ်နဲ့ ပတ်သက်ပြီး ZDF ကို ပြောခဲ့တာပါ။
ကင်မစ်ရှ်နဲ့ ဘိုင်ယန်မြူးနစ်အသင်းတို့ရဲ့ စာချုပ်ဟာ ၂၀၂၅ ခုနှစ်၊ ဇွန်လကျရင် ကုန်ဆုံးမှာဖြစ်လို့ ဂျာမန် ကစားသမားဟာ ရာသီအကုန်မှာ အသင်းကနေ အလွတ်နဲ့ ထွက်ခွာနိုင်တာဖြစ်ပါတယ်။
ဘာစီလိုနာ အပါအဝင် အသင်းအများအပြားက အလွတ်ပြောင်းရွှေ့ကြေးနဲ့ ခေါ်ယူလို့ရမယ့် ကင်မစ်ရှ်ရဲ့ အခြေအနေကို စောင့်ကြည့်မှုတွေ ပြုလုပ်နေတာပါ။
ဘိုင်ယန်မြူးနစ်အသင်းရဲ့ အားကစားဒါရိုက်တာက ကင်မစ်ရှ်အနေနဲ့ အသင်းရဲ့ ဂန္ထဝင်အဖြစ် ဆက်ရှိချင်သလား ဒါမှမဟုတ် ထွက်ခွာပြီး အခြားအသင်းတစ်သင်းမှာ သွားကစားချင်လားဆိုတာ ဆုံးဖြတ်ရမယ်လို့ ပြောထား ပါတယ်။
ကင်မစ်ရှ်ကို တွေ့ရစဉ်
ဂျာမန်သတင်းတွေမှာ ဘိုင်ယန်မြူးနစ်အသင်းဟာ ကင်မစ်ရှ်ကို စာချုပ်သက်တမ်းတိုးဖို့ ဆန္ဒရှိနေတယ်လို့ ဖော်ပြထားပါတယ်။
ကင်မစ်ရှ် ကိုယ်တိုင်ကလည်း သူ့ရဲ့အနာဂတ်ကို နွေရာသီအထိ မစောင့်ဆိုင်းဘဲ ဇန်နဝါရီမှာ ဆုံးဖြတ်မယ်လို့ ပြောခဲ့တာပါ။
အသက် ၂၉ နှစ်အရွယ်ရှိ ကင်မစ်ရှ်ဟာ ဘိုင်ယန်မြူးနစ်အသင်းကို လိုက်ပ်ဇစ်အသင်းကနေ ၂၀၁၅ ခုနှစ် ကတည်းက ရောက်ရှိလာခဲ့ပြီး အခုအချိန်ထိ အသင်းအတွက် ပွဲပေါင်း ၄၀၀ ကျော် ပါဝင်ကစားထားကာ သွင်းဂိုး ၄၀ ကျော် သွင်းယူထားပါတယ်။
ကင်မစ်ရှ်ဟာ ဘိုင်ယန်မြူးနစ်အသင်းနဲ့အတူ ဘွန်ဒက်လီဂါဖလား ၈ ကြိမ်၊ ချန်ပီယံလိဂ်ဖလား ၁ ကြိမ် အပါအဝင် ဆုဖလား အောင်မြင်မှု အများအပြား ရယူနိုင်ခဲ့တာဖြစ်ပါတယ်။
- By CNI
- Category: အားကစား
- Hits: 887
CNI Sport News
၂၀၂၄ ခုနှစ်၊ ဒီဇင်ဘာ ၃
ပြင်သစ်နောက်ခံလူ ယိုရိုဟာ အာဆင်နယ်အသင်းနဲ့ ကစားမယ့် ပရီးမီးယားလိဂ်ပွဲစဉ်မှာ ယူနိုက်တက်အသင်း လူစာရင်းထဲ ပါဝင်လာဖွယ်ရှိနေပါတယ်။
ပြီးခဲ့တဲ့နွေရာသီအပြောင်းအရွှေ့က လိုင်လီအသင်းကနေ ပေါင် ၅၂ သန်းနဲ့ ပြောင်းရွှေ့လာခဲ့တဲ့ ယိုရိုဟာ အာဆင်နယ်အသင်းနဲ့ ရာသီကြိုခြေစမ်းပွဲမှာ ရခဲ့တဲ့ ဒဏ်ရာကြောင့် ခွဲစိတ်မှုခံယူခဲ့ရပြီး အနားယူနေခဲ့ရတာပါ။
အသက် ၁၉ နှစ်အရွယ်ရှိ ယိုရိုဟာ မကြာသေးခင်ရက်သတ္တပတ်တွေမှာ ယူနိုက်တက်အသင်းနဲ့ လေ့ကျင့်မှုတွေ ပြန်လည်ပြုလုပ်နိုင်ခဲ့ပေမယ့် အသင်းရဲ့ပွဲတွေမှာ ပါဝင်နိုင်ခြင်းမရှိသေးတာဖြစ်ပါတယ်။
ယူနိုက်တက်အသင်း နည်းပြ အာမိုရင်က ယိုရိုဟာ အာဆင်နယ်အသင်းနဲ့ပွဲစဉ်မှာ အသင်းအတွက် ပွဲဦးထွက်အဖြစ် ပါဝင်နိုင်တယ်လို့ ပြောခဲ့တာပါ။
အာမိုရင်က “ယိုရိုဟာ အသင်းလူစာရင်းထဲ ပါဝင်လာနိုင်ပါတယ်။ သူဟာ ကောင်းမွန်တယ်လို့ ခံစားနေရပြီး ကြံ့ခိုင်မှုကလည်း ကောင်းမွန်နေတာကြောင့် လူစာရင်းထဲ ပါဝင်လာနိုင်မယ်လို့ ကျနော်ထင်ပါတယ်။ သူဟာ ထူးခြားတဲ့အရည်အသွေးရှိပြီး မြန်ဆန်သလို ခေတ်မီနောက်ခံလူတစ်ဦးပါ။ ဒါပေမယ့် သူ့ကို ကျနော်တို့ ဂရုစိုက်ပြီး မိနစ်နဲ့ လုပ်အားကို စီမံခန့်ခွဲရမှာပါ။ ယိုရိုကစားတာကို မြင်တွေ့ရမယ့်အပေါ် စိတ်လှုပ်ရှားမိတယ်”လို့ ပြောခဲ့ပါ တယ်။
ဒါ့အပြင် နည်းပြ အာမိုရင်က အဲဗာတန်အသင်းနဲ့ပွဲစဉ်မှာ ခြေချင်းဝတ်ကို ရေခဲအိတ်ပတ်ခံထားရတဲ့ အသင်း ခေါင်းဆောင် ဘရူနိုဖာနန်ဒက်စ်ဟာ အာဆင်နယ်အသင်းနဲ့ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်မယ်လို့ အတည်ပြု ခဲ့တာပါ။
ယူနိုက်တက်အသင်းဟာ အာဆင်နယ်အသင်းနဲ့ပွဲစဉ်မှာ ပြီးခဲ့တဲ့ အဲဗာတန်အသင်းနဲ့ပွဲစဉ်က ပွဲထွက်လူ စာရင်းကို အပြောင်းအလဲပြုလုပ်လာဖို့ ရှိနေတယ်လို့ သိရပါတယ်။
ယူနိုက်တက်အသင်းဟာ နည်းပြ အာမိုရင်လက်ထက်မှာ ရလဒ်ကောင်းတွေရရှိထားပြီး ၃ ပွဲကစားထားတာမှာ ၂ ပွဲနိုင်၊ ၁ ပွဲသရေကျထားကာ ပရီးမီးယားလိဂ်အမှတ်ပေးဇယားအဆင့် ၉ နေရာမှာ ရပ်တည်နေတာဖြစ်ပါတယ်။
Source:DailyMail
- By CNI
- Category: အားကစား
- Hits: 1052
CNI Sport News
၂၀၂၄ ခုနှစ်၊ ဒီဇင်ဘာ ၃
ဘာစီလိုနာအသင်းနည်းပြ ဟန်ဆီဖလစ်ဟာ အသင်းသားတွေနဲ့ တစ်နာရီကြာ အရေးပေါ် အစည်းအဝေး ပြုလုပ်ခဲ့ပြီး တိုက်စစ်မှူး လီဝန်ဒေါစကီးနဲ့လည်း တစ်ဦးချင်း တွေ့ဆုံမှု ပြုလုပ်ခဲ့တယ်လို့ စပိန်သတင်းစာ မာကာက ဖော်ပြထားပါတယ်။
ဂျာမန်လူမျိုးနည်းပြ ဟန်ဆီဖလစ်ဟာ လက်စ်ပါးမားစ်အသင်းကို ၂ ဂိုး-၁ ဂိုးနဲ့ အရေးနိမ့်ခဲ့တဲ့ လာလီဂါပွဲစဉ် အပြီးမှာ ဘာစီလိုနာအသင်းသားတွေနဲ့ အရေးပေါ် အစည်းအဝေး ပြုလုပ်ခဲ့တာပါ။
ဘာစီလိုနာအသင်းဟာ လက်စ်ပါးမားစ်အသင်းနဲ့ ပွဲစဉ်မတိုင်ခင် ကစားခဲ့တဲ့ လာလီဂါပွဲစဉ်တွေမှာ ဆိုစီဒက် အသင်းကို အရေးနိမ့်ခဲ့ပြီး ဆယ်လ်တာဗီဂိုအသင်းနဲ့ သရေကျကာ ၃ ပွဲဆက်တိုက်နိုင်ပွဲ ပျောက်ဆုံးခဲ့တာ ဖြစ်ပါတယ်။
ဘာစီလိုနာအသင်းဟာ လာလီဂါ အမှတ်ပေးဇယား ထိပ်ဆုံးနေရာမှာ ရပ်တည်နေပေမယ့် နည်းပြ ဟန်ဆီဖလစ် ဟာ အသင်းသားတွေနဲ့အတူ လက်စ်ပါးမားစ်အသင်းကို အရေးနိမ့်ခဲ့တဲ့ပွဲစဉ်က စွမ်းဆောင်ရည်ကို ပြန်လည် သုံးသပ်မှုတွေ ပြုလုပ်ခဲ့တာပါ။
အဲဒါကြောင့် ဘာစီလိုနာအသင်းဟာ လေ့ကျင့်မှုပြုလုပ်မယ့်အချိန်ကို တစ်နာရီကြာ နောက်ကျပြီးမှ ပြုလုပ်ခဲ့တာ ဖြစ်ပါတယ်။
လီဝန်ဒေါစကီးကို တွေ့ရစဉ်
ဒါအပြင် နည်းပြဟန်ဆီဖလစ်ဟာ ဒီရာသီအသင်းရဲ့ ထိပ်တန်းဂိုးသွင်းရှင် လီဝန်ဒေါစကီးနဲ့ လေ့ကျင့်ရေးကွင်းမှာ တစ်ဦးချင်း စကားပြောဆိုမှုတွေ ပြုလုပ်ခဲ့တာပါ။
လီဝန်ဒေါစကီးဟာ ဒီရာသီမှာ ဘာစီလိုနာအသင်းအတွက် လာလီဂါသွင်းဂိုး ၁၅ ဂိုး သွင်းယူထားပေမယ့် ဆိုစီဒက် နဲ့ လက်စ်ပါးမားစ် ပွဲစဉ်တွေမှာ ဂိုးပေါက် ပျောက်ဆုံးနေခဲ့တာ ဖြစ်ပါတယ်။
ဘာစီလိုနာအသင်းဟာ ရလဒ်တွေ ပြန်ဆိုးရွားမှုကြောင့် ရီးရယ်လ်အသင်းကို ရမှတ်အများကြီး ဖြတ်ထားနိုင် ခဲ့တာကနေ ၁ ပွဲပိုကစားထားပြီး ရမှတ် ၁ မှတ်သာ အသာရတော့တာပါ။
ရီးရယ်လ်အသင်းဟာ ပွဲကျန်ပွဲစဉ်မှာ အနိုင်ရခဲ့ရင် လာလီဂါ အမှတ်ပေးဇယား ထိပ်ဆုံးနေရာကို တက်နိုင်တော့မှာ ဖြစ်ပါတယ်။
အဲဒါကြောင့် နည်းပြ ဟန်ဆီဖလစ်ဟာ အမှားအယွင်း ထပ်မဖြစ်ဖို့နဲ့ ရလဒ်ကောင်းတွေ ပြန်လည်ရယူဖို့အတွက် အသင်းသားတွေနဲ့ အရေးပေါ် အစည်းအဝေး ပြုလုပ်ခဲ့တာပါ။
ဘာစီလိုနာအသင်းဟာ ဒီဇင်ဘာ ၄ ရက်မှာ လာလီဂါပွဲစဉ်အဖြစ် မာယော့ကာအသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
- By CNI
- Category: အားကစား
- Hits: 650
CNI Sport News
၂၀၂၄ ခုနှစ်၊ ဒီဇင်ဘာ ၂
ဘိုင်ယန်မြူးနစ်အသင်း တိုက်စစ်မှူး ဟာရီကိန်းဟာ ဒေါ့မွန်အသင်းနဲ့ ၁ ဂိုးစီ သရေကျခဲ့တဲ့ ဘွန်ဒက်လီဂါပွဲစဉ်မှာ ရရှိခဲ့တဲ့ ကြွက်သားဒဏ်ရာကြောင့် ၂ ပတ်ကြာ အနားယူရဖွယ်ရှိနေပါတယ်။
ဟာရီကိန်းဟာ ဒေါ့မွန်အသင်းနဲ့ပွဲစဉ်မှာ ရရှိခဲ့တဲ့ ဒဏ်ရာကို စကန်ဖတ် စစ်ဆေးမှုတွေ ခံယူအပြီးမှာ ကြွက်သား ဒဏ်ရာ ရရှိခဲ့တယ်လို့ ဘိုင်ယန်မြူးနစ်အသင်းက အတည်ပြုခဲ့တာပါ။
အဲဒါကြောင့် အသင်းဟာ လက်ရှိအချိန်မှာ တိုက်စစ်မှူး ဟာရီကိန်း မပါဝင်ဘဲ အလုပ်လုပ်ရမယ်လို့ ဘိုင်ယန်မြူးနစ်အသင်းရဲ့ ထုတ်ပြန်ချက်ထဲမှာ ဖော်ပြထားပေမယ့် ဘယ်လောက်ကြာကြာ အနားယူရ မလဲဆိုတာတော့ မပါဝင်ခဲ့ပါဘူး။
ဂျာမန်သတင်းစာ Bild က ဟာရီကိန်းဟာ ဒဏ်ရာကြောင့် ၂ ပတ်ကြာ အနားယူရမယ်လို့ ဖော်ပြထားပါတယ်။
ဘိုင်ယန်မြူးနစ်အသင်းဟာ ၂၀၂၄ ခုနှစ်ထဲမှာ ပွဲစဉ် ၅ ပွဲကစားဖို့ ရှိနေပြီး ဟာရီကိန်းဟာ ဒီဇင်ဘာ ၂၀ ရက်မှာ ကစားမယ့် ဒီနှစ်ရဲ့ နောက်ဆုံးပွဲစဉ်ဖြစ်တဲ့ လိုက်ပ်ဇစ်အသင်းနဲ့ပွဲစဉ်မှသာ ပြန်လည် ပါဝင်နိုင်ဖွယ်ရှိနေတာပါ။
ဟာရီကိန်းကို တွေ့ရစဉ်
ဟာရီကိန်းဟာ ဒီရာသီမှာ ဘိုင်ယန်မြူးနစ် အသင်းအတွက် ၁၉ ပွဲ ပါဝင်ကစားထားတာမှာ ဂိုး ၂၀ အထိသွင်းပြီး ခြေစွမ်းပြသနေတာ ဖြစ်ပါတယ်။
အသင်းရဲ့ ထိပ်တန်း ဂိုးသွင်းရှင်ဖြစ်တဲ့ ဟာရီကိန်း ပွဲအချို့ လွဲချော်မှာက ဘိုင်ယန်မြူးနစ် အသင်းအတွက် ထိုးနှက်ချက် ဖြစ်လာနိုင်တာပါ။
ဘိုင်ယန်မြူးနစ်အသင်းဟာ ဒီရာသီ ဘွန်ဒက်လီဂါပြိုင်ပွဲမှာ အမှတ်ပေးဇယား အဆင့် ၂ နေရာမှာ ရပ်တည်နေတဲ့ ဖရန့်ဖတ်အသင်းကို ၄ မှတ်အသာနဲ့ အဆင့် ၁ နေရာမှာ ရပ်တည်နေပါတယ်။
ဘိုင်ယန်မြူးနစ်အသင်းဟာ ကြားရက်မှာ လေဗာကူဆင်အသင်းနဲ့ ဂျာမန်ဖလားပွဲစဉ် ယှဉ်ပြိုင်မှာဖြစ်ပြီး ဒီပွဲပြီးရင် ဟိုင်ဒမ်ဟိုင်းအသင်းနဲ့ ဘွန်ဒက်လီဂါ ပွဲစဉ်ယှဉ်ပြိုင်ရမှာ ဖြစ်ပါတယ်။
- By CNI
- Category: အားကစား
- Hits: 1076
CNI Sport News
၂၀၂၄ ခုနှစ်၊ ဒီဇင်ဘာ ၂
လီဗာပူးလ်အသင်း တောင်ပံကစားသမား ဆာလက်ဟာ ပီအက်စ်ဂျီအသင်းနဲ့ အပြောင်းအရွှေ့အတွက် ဆွေးနွေးမှု ပြုလုပ်နေတယ်လို့ ပြင်သစ်မီဒီယာတွေက ဖော်ပြထားပါတယ်။
ဆာလက်နဲ့ လီဗာပူးလ်အသင်းတို့ရဲ့ စာချုပ်ဟာ ဒီရာသီကုန်ရင် ကုန်ဆုံးပြီဖြစ်ပေမယ့် လီဗာပူးလ်အသင်းဟာ သူ့ကို စာချုပ်သစ် ကမ်းလှမ်းမှု ပြုလုပ်ရခြင်း မရှိသေးပါဘူး။
ဒါကြောင့် ဆာလက်ဟာ လာမယ့် နွေရာသီမှာ လီဗာပူးလ်အသင်းကနေ အလွတ်နဲ့ ထွက်ခွာရဖို့ရှိနေတာ ဖြစ်ပါတယ်။
ဆာလက်က လီဗာပူးလ်အသင်းဟာ သူ့ကို စာချုပ်သစ် ကမ်းလှမ်းရခြင်း မရှိသေးတာကြောင့် ဆက်ရှိဖို့ထက် ထွက်ခွာဖို့က ပိုပြီးဖြစ်နိုင်တယ်လို့ ပြောထားတာပါ။
ဒါအပြင် ဆာလက်ဟာ မန်စီးတီးအသင်းနဲ့ ပွဲအပြီးမှာလည်း ဒီပွဲဟာ လီဗာပူးလ်အသင်း ကစားသမားဘဝ အန်ဖီးလ်မှာ ကစားတဲ့ မန်စီးတီးအသင်းနဲ့ နောက်ဆုံးပွဲစဉ်လို့ ပြောခဲ့ပါတယ်။
ဒီအချိန်မှာ ပြင်သစ်သတင်းစာ L'Equipe က ဆာလက်ဟာ ပီအက်စ်ဂျီအသင်းနဲ့ ဆွေးနွေးမှု ပြုလုပ်ပြီးနောက် လာမယ့် နွေရာသီမှာ ပြင်သစ်ကလပ်ထံ ပြောင်းရွှေ့ဖို့ တံခါးဖွင့်ထားတယ်လို့ ဖော်ပြခဲ့ပါတယ်။
ပီအက်စ်ဂျီအသင်းဟာ အသင်းနဲ့ စာချုပ် ကုန်ဆုံးပြီးနောက် ရီးရယ်လ်အသင်းထံ ပြောင်းရွှေ့သွားခဲ့တဲ့ ဘတ်ပီရဲ့ နေရာကို အစားထိုးဖြည့်ဖို့ ရှာဖွေမှုတွေပြုလုပ်နေတာပါ။
ဆာလက်ကို တွေ့ရစဉ်
ပြင်သစ်ကလပ်ဟာ ပြီးခဲ့တဲ့နွေရာသီမှာ ယူနိုက်တက်အသင်းက ဆန်ချိုနဲ့ နာပိုလီအသင်းက ကာဗီချာတို့ကို ခေါ်ယူဖို့ ကြိုးပမ်းခဲ့ပေမယ့် အဆင်မပြေခဲ့တာ ဖြစ်ပါတယ်။
ပီအက်စ်ဂျီအသင်းဟာ ဘီလ်ဘာအိုအသင်း တောင်ပံကစားသမား နီကိုဝီလီယံစ်ကို စိတ်ဝင်စားကြောင်းလည်း ပြသခဲ့ပေမယ့် လာမယ့်နွေရာသီမှာ ဆာလက်ကိုခေါ်ယူနိုင်ဖို့က သူတို့အတွက် အကောင်းဆုံး အခွင့်အရေးဖြစ်ဖို့ ရှိနေတာပါ။
လီဗာပူးလ်အသင်းဟာ နှစ်သစ် မစတင်ခင်မှာ ဆာလက်ကို စာချုပ်သက်တမ်း မတိုးနိုင်ခဲ့ရင် သူဟာ အင်္ဂလန် ပြင်ပကလပ် အသင်းတွေနဲ့ အပြောင်းအရွှေ့အတွက် လွတ်လပ်စွာ ဆွေးနွေးညှိနှိုင်းလို့ ရရှိမှာဖြစ်ပါတယ်။
ဆာလက်ဟာ လီဗာပူးလ်အသင်းကနေ ထွက်ခွာရဖို့ရှိနေပေမယ့် ဒီရာသီမှာ အသင်းနဲ့အတူ ဆုဖလား အောင်မြင်မှုတွေ ရယူနိုင်ဖို့ မျှော်လင့်ကြောင်း ပြောထားတာပါ။
အသက် ၃၂ နှစ်အရွယ်ရှိ ဆာလက်ဟာ ဒီရာသီမှာ လီဗာပူးလ်အသင်းအတွက် ပွဲပေါင်း ၂၀ ပါဝင် ကစားထားပြီး ၁၃ ဂိုး သွင်းယူကာ ဂိုးဖန်တီးမှု ၁၁ ကြိမ် ပြုလုပ်ထားတာ ဖြစ်ပါတယ်။
Source: Goal
- By CNI
- Category: အားကစား
- Hits: 1365
CNI Sport News
၂၀၂၄ ခုနှစ်၊ ဒီဇင်ဘာ ၂
ယူနိုက်တက်အသင်းနည်းပြ အာမိုရင်က အဲဗာတန်အသင်းကို ၄ ဂိုး-ဂိုးမရှိနဲ့ အနိုင်ရတဲ့ပွဲအပြီးမှာ အဆင့် ၄ အတွင်း ဝင်ရောက်ဖို့ထက် အသင်းရဲ့စွမ်းဆောင်ရည်ကိုပဲ အာရုံစိုက်တယ်လို့ ပြောခဲ့ပါတယ်။
အာမိုရင်က “ကျနော်ဟာ ပရိသတ်တွေအပေါ် ရိုးသားချင်ပါတယ်။ ကျနော်က စွမ်းဆောင်ရည်ကို အာရုံစိုက်ပြီး ရလဒ် မဟုတ်တဲ့အတွက် အဆုံးမှာ ဒါကို မြင်တွေ့ရမှာပါ။ လာမယ့်ပွဲကို အာရုံစိုက်ပြီး စွမ်းဆောင်ရည်ကို ကြည့်ရ မှာပါ။ ပြီးခဲ့တဲ့ ဘိုဒိုဂီလင့်နဲ့ပွဲမှာ ၃ ဂိုး-၂ ဂိုးနဲ့ အနိုင်ရခဲ့ပေမယ့် ကျနော်တို့ ပိုပြီးထိုက်တန်တယ်လို့ ထင်ပါတယ်။ ဒီပွဲ မှာတော့ ကျနော်တို့ ၄ ဂိုး-ဂိုးမရှိနဲ့ အနိုင်ရခဲ့တဲ့အတွက် စွမ်းဆောင်ရည်ကို ဆက်ပြီးအာရုံစိုက်ကာ အာဆင်နယ်နဲ့ပွဲ အကြောင်းတွေးရမှာပါ”လို့ ပြောခဲ့တာပါ။
ယူနိုက်တက်အသင်းဟာ အဲဗာတန်အသင်းနဲ့ပွဲမှာ တိုက်စစ်မှူးတွေဖြစ်တဲ့ ရက်ရှ်ဖို့ဒ်၊ ဇက်ခ်ဇီတို့ရဲ့ သွင်းဂိုးတွေနဲ့ အနိုင်ရခဲ့ပြီး နည်းပြ အာမိုရင်လက်ထက် ပထမဆုံး ပရီးမီးယားလိဂ် နိုင်ပွဲကို ရယူနိုင်ခဲ့တာဖြစ်ပါတယ်။
ယူနိုက်တ်ကအသင်းကို တွေ့ရစဉ်
ယူနိုက်တက်အသင်းဟာ ဒီနိုင်ပွဲကြောင့် ပရီးမီးယားလိဂ်အဆင့် ၉ နေရာအထိ တက်လာနိုင်ခဲ့ပြီး အဆင့် ၄ နေရာ က ဘရိုက်တန်အသင်းနဲ့ ၄ မှတ်သာ ကွာဟတော့တာပါ။
ယူနိုက်တက်အသင်းဟာ ထိပ်ဆုံး ၄ သင်းထဲ ဝင်ရောက်ဖို့ ရမှတ် ကွာဟချက် မများတော့ပေမယ့် နည်းပြ အာမိုရင်က စွမ်းဆောင်ရည်ကိုပဲ အာရုံစိုက်နေတာဖြစ်ပါတယ်။
ဒီပွဲမှာ ယူနိုက်တက်အသင်းအတွက် ၂ ဂိုးသွင်းနိုင်ခဲ့တဲ့ တိုက်စစ်မှူး ဇက်ခ်ဇီဟာ သြဂုတ်နောက်ပိုင်း အသင်း အတွက် ပထမဆုံးသွင်းဂိုးကို ရယူနိုင်ခဲ့တာပါ။
ဒါအပြင် ရက်ရှ်ဖို့ဒ်ကလည်း နည်းပြ အာမိုရင်လက်ထက် ကစားခဲ့တဲ့ ၃ ပွဲမှာ ယူနိုက်တက်အသင်းအတွက် ၃ ဂိုး သွင်းယူထားတာ ဖြစ်ပါတယ်။
အာမိုရင်က ရက်ရှ်ဖို့ဒ်ဟာ အများကြီး လုပ်နိုင်တဲ့သူဖြစ်တဲ့အတွက် ဆက်ပြီး တိုးတက်ဖို့ လိုအပ်တယ်လို့ ပြောခဲ့ တာပါ။
ယူနိုက်တက်အသင်းဟာ ဒီဇင်ဘာ ၅ ရက်မှာ ပရီးမီးယားလိဂ် ပွဲစဉ်အဖြစ် အဆင့် ၂ နေရာမှာ ရပ်တည်နေတဲ့ အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 2485
CNI Sport News
၂၀၂၄ ခုနှစ်၊ ဒီဇင်ဘာ ၂
မန်စီးတီးအသင်းနည်းပြ ဂွာဒီယိုလာက သူထုတ်ပယ်ခံရမယ်ဆိုပြီး လီဗာပူးလ်အသင်း ပရိသတ်တွေရဲ့ သီဆိုမှုကို မမျှော်လင့်ခဲ့ဘူးလို့ လီဗာပူးလ်အသင်းကို ၂ ဂိုး-ဂိုးမရှိနဲ့ အရေးနိမ့်ခဲ့တဲ့ပွဲအပြီးမှာ ပြောခဲ့ပါတယ်။
ဂွာဒီယိုလာက “အန်ဖီးလ်မှာ ကျနော်ဒါကို မမျှော်လင့်ခဲ့ပါဘူး။ လီဗာပူးလ်မှာရှိတဲ့ လူတွေဆီကနေ ဒါကို ကျနော် မမျှော်လင့်ထားပေမယ့်လည်း အဆင်ပြေပါတယ်။ ဒါက ပွဲရဲ့ အစိတ်အပိုင်းဖြစ်ပြီး ကျနော် လုံးဝ နားလည်ပါတယ်။ ကျနော်တို့ဟာ မယုံနိုင်လောက်တဲ့ တိုက်ပွဲတွေမှာ အတူရှိခဲ့ကြပြီး ကျနော် သူတို့ကို လေးစားမှုရှိပါတယ်”လို့ Sky Sports ကို ပြောခဲ့တာပါ။
လီဗာပူးလ်အသင်းဟာ ဒီပွဲမှာ ဂတ်ပို၊ ဆာလက်တို့ရဲ့ သွင်းဂိုးတွေနဲ့ မန်စီးတီးအသင်းကို ၂ ဂိုး-ဂိုးမရှိနဲ့ အနိုင်ရပြီး ပရီးမီးယားလိဂ် အမှတ်ပေးဇယားကို ၉ မှတ်ဖြတ်ပြီး ဦးဆောင်နိုင်ခဲ့တာ ဖြစ်ပါတယ်။
လီဗာပူးလ်အသင်း ပရိသတ်တွေဟာ ဒီပွဲစဉ်ပြီးခါနီးမှာ ဂွာဒီယိုလာကို တိုက်ရိုက်ရည်ရွယ်ကာ “မနက်ကျရင် အလုပ် ထုတ်ခံရတော့မယ်၊ မနက်ကျရင် ခင်ဗျားအလုပ်ကနေ ထုတ်ခံရတော့မယ်”လို့ သီဆိုမှုတွေ ပြုလုပ်ခဲ့ တာပါ။
ဒီအချိန်မှာ မန်စီးတီးအသင်းနည်းပြ ဂွာဒီယိုလာကလည်း ပြုံးပြီး သူ့ရဲ့လက်ချောင်း ၆ ချောင်း ပြန်ထောင်ပြကာ လီဗာပူးလ်အသင်း ပရိသတ်တွေကို တုန့်ပြန်ခဲ့ပါတယ်။
မန်စီးတီးအသင်းကို တွေ့ရစဉ်
ဂွာဒီယိုလာဟာ သူ့ရဲ့လက်ထက်မှာ မန်စီးတီးအသင်းကို ပရီးမီးယားလိဂ်ဖလား ၆ ကြိမ်အထိ ရယူပေးထားတာကို ရည်ရွယ်တဲ့အနေနဲ့ ပြသခဲ့တာပါ။
မန်စီးတီးအသင်းဟာ လက်ရှိအချိန်မှာ ပရီးမီးယားလိဂ် ၄ ပွဲ ဆက်တိုက် အရေးနိမ့်ပြီး အမှတ်ပေးဇယား အဆင့် ၅ နေရာအထိ ကျဆင်းကာ ရလဒ်ဆိုးတွေကို ဆက်တိုက် ကြုံတွေ့နေရတာ ဖြစ်ပါတယ်။
မန်စီးတီးအသင်းဟာ ပြိုင်ပွဲစုံ ၇ ပွဲ ဆက်တိုက် နိုင်ပွဲပျောက်ဆုံးနေပြီး ဂွာဒီယိုလာ အတွက်လည်း သူ့ရဲ့နည်းပြ ဘဝမှာ အဆိုးရွားဆုံး မှတ်တမ်းတစ်ခုကို ကြုံတွေ့နေရတာပါ။
လီဗာပူးလ်အသင်းနည်းပြ အာနီဆလော့ကတော့ ဂွာဒီယိုလာအတွက် ဘယ်သူမှ စိတ်မကောင်း ဖြစ်စရာမလိုဘဲ သူဟာ မန်စီးတီးအသင်းကို ရလဒ်ကောင်းတွေ ပြန်ရအောင် ယူပေးလိမ့်မယ်လို့ ပြောခဲ့ပါတယ်။
မန်စီးတီးအသင်းဟာ ကြားရက်ထဲမှာ ပရီးမီးယားလိဂ် ပွဲစဉ်အဖြစ် နော်တင်ဟမ်ဖောရက်စ်အသင်းနဲ့ ယှဉ်ပြိုင်ရ မှာဖြစ်ပြီး လီဗာပူးလ်အသင်းက နယူးကာဆယ်အသင်းနဲ့ ယှဉ်ပြိုင်ရမှာဖြစ်ပါတယ်။
- By CNI
- Category: အားကစား
- Hits: 2609
CNI Sport News
၂၀၂၄ ခုနှစ်၊ နိုဝင်ဘာ ၃၀
ချယ်လ်ဆီးအသင်းနည်းပြ မာရက်စ်ကာက ငယ်ရွယ်တဲ့ သူ့ရဲ့အသင်းဟာ ပရီးမီးယားလိဂ်ဖလား ရယူနိုင်မယ့် ပြိုင်ပွဲမှာ မပါဝင်ဘဲ ပွဲတိုင်းကို တိုးတက်မှုတွေ ရရှိဖို့အတွက်သာ အာရုံစိုက်ထားတယ်လို့ ပြောခဲ့ပါတယ်။
မာရက်စ်ကာက “ကျနော်တို့ဟာ ပရီးမီးယားလိဂ်ဖလား ရယူနိုင်မယ့်ပြိုင်ပွဲမှာ မပါဝင်ဘူးဆိုတာ အကြိမ်ကြိမ် ပြောခဲ့ပါတယ်။ ကျနော်ဟာ ဖိအားတွေကို အလွန်ကြိုက်ပြီး ဒီနေရာမှာ ရှိချင်ပေမယ့် ကျနော်တို့ အဲ့ဒီနေရာမှာ မရှိပါဘူး။ အသင်း တိုးတက်လာတာက အရေးကြီးပြီး ကောင်းမွန်တဲ့ခံစားချက်ပါ။ တချိန်တည်းမှာ လက်တွေ့ကျဖို့ လိုအပ်ပြီး ကျနော်တို့နဲ့ အခြားအသင်းတွေအကြားက ခြားနားချက်ကို ခင်ဗျားတို့မြင်တွေ့နိုင်ပါတယ်”လို့ ပြောခဲ့ တာပါ။
ချယ်လ်ဆီးအသင်းဟာ ဒီရာသီ ပရီးမီးယားလိဂ်ပွဲစဉ် ၁၂ ပွဲ ကစားအပြီးမှာ မန်စီးတီးနဲ့ လီဗာပူးလ်အသင်းတို့ကိုသာ အရေးနိမ့်ထားပေမယ့် ထိပ်ဆုံးနေရာက လီဗာပူးလ်အသင်းနဲ့ ၉ မှတ် ကွာဟနေတာ ဖြစ်ပါတယ်။
ချယ်လ်ဆီးကစားသမားများကို တွေ့ရစဉ်
နည်းပြ မာရက်စ်ကာဟာ ချယ်လ်ဆီးအသင်းကို နွေရာသီကမှ စတင် ကိုင်တွယ်ခဲ့ပေမယ့် သူ့ရဲ့လက်ထက်မှာ အသင်းဟာ တိုးတက်မှုတွေ ရှိလာခဲ့တာပါ။
ချယ်လ်ဆီးအသင်းဟာ ဒီရာသီ ကွန်းဖရန့်လိဂ် ပြိုင်ပွဲမှာလည်း ရာနှုန်းပြည့်နိုင်ပွဲနဲ့ နောက်တဆင့်ကို တက်နိုင်ခဲ့လို့ ပရီးမီးယားလိဂ်ပြိုင်ပွဲကို ပိုပြီးအာရုံစိုက်လို့ရပြီဖြစ်ပါတယ်။
ချယ်လ်ဆီးအသင်းဟာ ဒီနေ့မှာ ပရီးမီးယားလိဂ် ပွဲစဉ်အဖြစ် အက်စတွန်ဗီလာအသင်းနဲ့ ယှဉ်ပြိုင်ရမှာဖြစ်ပြီး နည်းပြ မာရက်စ်ကာက ဗီလာအသင်းမှာ ထိပ်တန်းနည်းပြရှိပြီး အလွန်ကောင်းမွန်တဲ့ အသင်းဖြစ်တာကြောင့် ခက်ခဲတဲ့ပွဲဖြစ်မယ်လို့ ပြောခဲ့ပါတယ်။
အက်စတွန်ဗီလာအသင်းဟာ ဒီရာသီ ပရီးမီးယားလိဂ်ပွဲစဉ် ၁၂ ပွဲ ကစားအပြီးမှာ ရမှတ် ၁၉ မှတ်ရရှိကာ ချယ်လ်ဆီးအသင်းနဲ့ ၃ မှတ်သာ ကွာဟနေတာ ဖြစ်ပါတယ်။
- By CNI
- Category: အားကစား
- Hits: 1560
CNI Sport News
၂၀၂၄ ခုနှစ်၊ နိုဝင်ဘာ ၃၀
လီဗာပူးလ်အသင်းရဲ့ အဓိကနောက်ခံလူ ကိုနာတေးဟာ ဒဏ်ရာကြောင့် မန်စီးတီးအသင်းနဲ့ ကစားမယ့် ပရီးမီးယားလိဂ် ပွဲကြီးပွဲကောင်းကို လွဲချော်မယ်လို့ အတည်ပြုခဲ့ပါတယ်။
ပြင်သစ်နောက်ခံလူ ကိုနာတေးဟာ အသင်းခေါင်းဆောင် ဗန်ဒိုက်နဲ့ တွဲဖက်ပြီး ဒီရာသီမှာ လီဗာပူးလ်အသင်းရဲ့ ခံစစ်ကို အကောင်းဆုံးဖြစ်အောင် စွမ်းဆောင်ပေးထားနိုင်တာပါ။
ကိုနာတေးဟာ ရီးရယ်လ်အသင်းကို အနိုင်ရခဲ့တဲ့ ချန်ပီယံလိဂ် ပွဲစဉ်မှာလည်း လီဗာပူးလ်အသင်းအတွက် ခြေစွမ်း ပြသနိုင်ခဲ့ပေမယ့် ပွဲပြီးခါနီးမှာ ရီးရယ်လ်အသင်း တိုက်စစ်မှူး အန်းဒရစ်နဲ့ ထိခိုက်မိပြီး ဒူးဒဏ်ရာ ရရှိသွားခဲ့တာ ဖြစ်ပါတယ်။
ကိုနာတေးဟာ ဒီဒဏ်ရာကြောင့် မန်စီးတီးအသင်းနဲ့ပွဲစဉ်ကို သူပါဝင်နိုင်မှာ မဟုတ်ဘူးလို့ ကြေညာခဲ့တာပါ။
ကိုနာတေးဟာ ဒဏ်ရာကြောင့် ၅ ပတ်ကနေ ၆ ပတ်ကြာအထိ အနားယူရမယ်လို့ ဗြိတိန်မီဒီယာတွေက ဖော်ပြထားပါတယ်။
အဲဒါကြောင့် လီဗာပူးလ်အသင်းဟာ ကိုနာတေး မပါဝင်နိုင်တဲ့ပွဲတွေမှာ ဗဟိုခံစစ် နေရာအတွက် ဗန်ဒိုက်နဲ့အတူ ကွမ်ဆက် ဒါမှမဟုတ် ဂိုးမက်ဇ်တို့ကို တွဲဖက်အသုံးပြုရတော့မှာပါ။
ကိုနာတေးကို တွေ့ရစဉ်
ရီးရယ်လ်အသင်းနဲ့ပွဲစဉ်မှာ ဒဏ်ရာရခဲ့တဲ့ နောက်ခံလူ ဘရက်ဒလေလည်း မန်စီးတီးအသင်းနဲ့ ပွဲစဉ်ကို လွဲချော်ဖို့ ရှိနေပါတယ်။
လီဗာပူးလ်အသင်းရဲ့ အဓိကညာနောက်ခံလူ အာနိုးလ်ဟာ ဒဏ်ရာကနေ ပြန်သက်သာလာပြီဖြစ်ပြီး နည်းပြ အာနီဆလော့က သူဟာ ပွဲကစားဖို့ အဆင်သင့်ဖြစ်နေပြီလို့ ပြောထားတာပါ။
ဒါကြောင့် အာနိုးလ်ဟာ မန်စီးတီးအသင်းနဲ့ ပွဲစဉ်မှာ လီဗာပူးလ်အသင်းရဲ့ ပွဲထွက် လူစာရင်းထဲ ပြန်ပါဝင်လာဖို့ ရှိနေပါတယ်။
လီဗာပူးလ်အသင်းရဲ့ အဓိက ကစားသမားတွေဖြစ်တဲ့ ဂိုးသမား အယ်လီဆန်၊ တိုက်စစ်မှူး ဂျိုတာနဲ့ ဘယ်နောက်ခံလူ ဆီမီကတ်စ်တို့ဟာ မန်စီးတီးအသင်းနဲ့ ပွဲစဉ်ကို လွဲချော်ဖို့ ရှိနေတာပါ။
လီဗာပူးလ်အသင်းဟာ ဒီရာသီ ပရီးမီးယားလိဂ်နဲ့ ချန်ပီယံလိဂ်ပြိုင်ပွဲမှာ ရလဒ်ကောင်း ရရှိနေပြီး အမှတ်ပေးဇယား ထိပ်ဆုံးနေရာမှာ ရပ်တည်နေတာဖြစ်ပါတယ်။
Page 107 of 415
Connect with us
