CNI International News

နယူးဒေလီ၊ ဧပြီ ၂၅

အိန္ဒိယ၏ ကက်ရှ်မီးယားဒေသတွင် ဖြစ်ပွားခဲ့သည့် စစ်သွေးကြွများ၏ တိုက်ခိုက်မှုကြောင့် အိန္ဒိယနှင့် ပါကစ္စတန် အကြား တင်းမာမှုများ မြင့်တက်လာသဖြင့် နိုင်ငံခြားငွေလဲလှယ်ရေးနှင့် အတိုးနှုန်း ဈေးကစားသည့် ကုန်သည်များ က အခြေအနေကို စိုးရိမ်နေကြောင်း ရိုက်တာမှ ဖော်ပြခဲ့သည်။

ဧပြီ ၂၂ ရက်က ကက်ရှ်မီးယားဒေသရှိ ခရီးသွားများ လာရောက်လေ့ရှိသည့် နေရာတွင် စစ်သွေးကြွများ၏ တိုက်ခိုက်မှုကြောင့် အမျိုးသား ၂၆ ဦးသေဆုံးခဲ့သည်။

ထိုဖြစ်ရပ်သည် ဆယ်စုနှစ် ၂ စုနီးပါးအတွင်း အရပ်သားများကို ပစ်မှတ်ထားသည့် အဆိုးရွားဆုံး တိုက်ခိုက်မှု ဖြစ်ခဲ့သည်။

အိန္ဒိယနိုင်ငံခြားရေးဝန်ကြီး ဗစ်ကရမ် မစ္စရီ (Vikram Misri) ကမူ ထိုတိုက်ခိုက်မှုတွင် နယ်စပ်ဖြတ်ကျော် ဝင်ရောက်လာသည့် စစ်သွေးကြွများ ပါဝင်ကြောင်း ပြောကြားခဲ့သည်။

ကက်ရှ်မီးယား တိုက်ခိုက်ခံရမှု ဝမ်းနည်းကြောင်း ပြသနေကြစဉ်

ထို့နောက် အိန္ဒိယသည် ပါကစ္စတန်နှင့်ချုပ်ဆိုထားသည့် နှစ်ပေါင်း ၆၀ သက်တမ်းရှိသည့် မြစ်ရေမျှဝေသုံးစွဲရေး စာချုပ်ကို ဆိုင်းငံ့ခဲ့သည်။

ထိုတိုက်ခိုက်မှု ဖြစ်ပွားပြီး တစ်ရက်အကြာတွင် အိန္ဒိယနိုင်ငံသုံး ရူပီးငွေကြေး၏ တန်ဖိုးသည် သီတင်းနှစ်ပတ် အတွင်း အဆိုးရွားဆုံး အခြေအနေသို့ ရောက်ရှိသွားခဲ့သည်။

ဧပြီ ၂၄ ရက်တွင် ရူပီးငွေကြေးတန်ဖိုး ကျဆင်းသွားခဲ့ပြီး ၁ ဒေါ်လာလျှင် ၈၅ ဒသမ ၆၆၂၅ ရူပီးအထိ ရှိခဲ့သည်။

ထို့ပြင် စစ်သွေးကြွများ၏ တိုက်ခိုက်မှုကို အိန္ဒိယအစိုးရ၏ တုန့်ပြန်မှုအပေါ် စိုးရိမ်မှုများ မြင့်တက်ခဲ့သဖြင့် ဘဏ်လုပ်ငန်းရှင်များအတွက် စိတ်သောက ရောက်စေခဲ့သည်။

ရူပီးငွေတန်ဖိုး လျော့ကျမှုသည် သက်ဆိုင်ရာ ကဏ္ဍများအပေါ် မည်မျှအထိ အကျိုးသက်ရောက်မှု ရှိစေမည်ဆို ခြင်းကို အတိအကျသိရရန် ခက်ခဲကြောင်းလည်း အမည်မဖော်လိုသည့် ဘဏ်လုပ်ငန်းရှင်တစ်ဦးက ပြောကြားခဲ့ သည်။

Source: ရိုက်တာ