CNI International News
ဘေဂျင်း၊ ဧပြီ ၂၄
ကုန်သွယ်ခွန်များ တိုးမြှင့်ခြင်းနှင့် ကုန်သွယ်ရေးစစ်ပွဲများ ဖြစ်ပွားခြင်းသည် နိုင်ငံအားလုံး၏ တရားဝင်မှုရှိသည့် အခွင့်အရေးများနှင့် အကျိုးစီးပွားများကို ထိခိုက်စေကြောင်း တရုတ်သမ္မတ ရှီကျင့်ဖျင် ( Xi Jinping ) က ဧပြီ ၂၃ ရက်တွင် ပြောကြားခဲ့သည်ဟု ရိုက်တာမှ ဖော်ပြခဲ့သည်။
ထို့ပြင် ကုန်သွယ်ရေး စစ်ပွဲကြောင့် နိုင်ငံပေါင်းစုံ ကုန်သွယ်မှုစနစ်ကို ထိခိုက်စေပြီး ကမ္ဘာ့စီးပွားရေး အခင်းအကျင်း ကို သက်ရောက်မှု ရှိစေသည်ဟုလည်း ရှီက ပြောကြားခဲ့ကြောင်း ဆင်ဟွာသတင်းအေဂျင်စီက ဖော်ပြခဲ့သည်။
ရှီသည် ဧပြီ ၂၂ ရက်မှ ၂၄ ရက်အထိ တရုတ်နိုင်ငံသို့ နိုင်ငံတော်ခရီးစဉ်ဖြင့် ရောက်ရှိလာသည့် အဇာဘိုင်ဂျန် သမ္မတ အီလ်ဟမ် အလီယက်ဗ် (Ilham Aliyev) နှင့် ဘေဂျင်းမြို့တော်တွင် အစည်းအဝေး ပြုလုပ်ချိန်က ထိုကဲ့သို့ ပြောကြားခဲ့ခြင်းဖြစ်သည်။
“ကုလသမဂ္ဂနဲ့အတူ နိုင်ငံတကာ အခင်းအကျင်းကို ထိန်းသိမ်းဖို့၊ နိုင်ငံတကာ တရားမျှတမှုကို ကာကွယ်ဖို့ တရုတ် ဟာ အဇာဘိုင်ဂျန်နဲ့အတူ ပူးပေါင်းဆောင်ရွက်ဖို့ အသင့်ရှိပါတယ်”ဟု ရှီက ပြောကြားခဲ့ကြောင်း ဆင်ဟွာမှ ဖော်ပြခဲ့သည်။
ခေါင်းဆောင်နှစ်ဦးသည် တရုတ်နှင့် အဇာဘိုင်ဂျန်အကြား ပြည့်စုံကျယ်ပြန့်သည့် မဟာဗျူဟာမြောက် မိတ်ဖက် ဆက်ဆံရေးကို ထူထောင်ကြောင်း ကြေညာခဲ့ကြသည်။
တရုတ်သမ္မတ ရှီကျင့်ဖျင်နဲ့ အဇာဘိုင်ဂျန် သမ္မတ အီလ်ဟမ် အလီယက်ဗ်ကို တွေ့ရစဉ်
ထိုမဟာဗျူဟာမြောက် ဆက်ဆံရေးတွင် သဘာဝပတ်ဝန်းကျင်၊ ဒစ်ဂျစ်တယ်စီးပွားရေး၊ အသိဉာဏ်ပစ္စည်း မူပိုင်ခွင့်နှင့် လေကြောင်း အာကာသကဏ္ဍတို့ အပါအဝင် ပူးပေါင်းဆောင်ရွက်ရေး သဘောတူစာချုပ် ၂၀ ကို လက်မှတ်ရေးထိုးခဲ့သည်။
အဇာဘိုင်ဂျန်သည် အီရန်၊ ရုရှား၊ ဂျော်ဂျီယာနှင့် အာမေးနီးယားနိုင်ငံတို့နှင့် နယ်နိမိတ်ချင်း ထိစပ်နေပြီး တရုတ်၏ ပတ်လမ်း၊ ရပ်ဝန်း စီမံကိန်းကို အစောဆုံး ထောက်ခံခဲ့သည့် နိုင်ငံများထဲတွင် ပါဝင်ခဲ့သည်။
ရှီသည် ကမ္ဘာလုံးဆိုင်ရာ အခြေခံ အဆောက်အအုံ ဖွံ့ဖြိုးတိုးတက်ရေးကို ဦးစားပေး လုပ်ဆောင်ခြင်းအားဖြင့် တရုတ်၏ ပထဝီနိုင်ငံရေးနှင့် စီးပွားရေးကို ချဲ့ထွင်ရန် အဆိုပါစီမံကိန်းကို ၂၀၁၃ ခုနှစ်က စတင်ခဲ့ခြင်းဖြစ်သည်။
တရုတ်နှင့် အဇာဘိုင်ဂျန်တို့သည် နှစ်နိုင်ငံစလုံးမှ နိုင်ငံသားများအား ဗီဇာကင်းလွတ်ခွင့်ပေးခြင်း၊ နယ်ပယ်ကဏ္ဍ အသီးသီးတွင် ပူးပေါင်းဆောင်ရွက်ခြင်း အစရှိသည့် သဘောတူညီချက်များကိုလည်း လက်မှတ်ရေးထိုးခဲ့ကြောင်း ဆင်ဟွာမှ ဖော်ပြခဲ့သည်။
Source: ရိုက်တာ
