CNI International News
ကိယက်ဗ်၊ ဧပြီ ၂၄
တရုတ်နိုင်ငံသားများသည် ရုရှားရှိ ဒရုန်းထုတ်လုပ်ရေး စက်ရုံတစ်ရုံတွင် ဒရုန်းများ ထုတ်လုပ်မှုကို ကူညီပေး နေကြောင်း ယူကရိန်းသမ္မတ ဇာလန်းစကီး (Volodymyr Zelenskyy) က ပြောကြားခဲ့သည်ဟု အယ်လ်ဂျာဇီးယား မှ ဖော်ပြခဲ့သည်။
ရုရှားသည် တရုတ်ထံမှ ဒရုန်းနည်းပညာကို ခိုးယူဖွယ် ရှိနေသည်ဟုလည်း ၎င်းက ဆိုသည်။
တရုတ်သည် ရုရှားကို လက်နက်များနှင့်ခဲယမ်းများ ထောက်ပံ့ပေးနေပြီး ရုရှားဘက်မှ ကူညီတိုက်ခိုက်ပေးနေသည့် တရုတ်နိုင်ငံသားနှစ်ဦးကို ယူကရိန်းတပ်ဖွဲ့များက ဖမ်းဆီးရမိခဲ့ကြောင်း ဇာလန်းစကီးက ပြောကြားခဲ့ပြီးနောက် ဧပြီ ၂၂ ရက်တွင် ကိယက်ဗ်မြို့တော်၌ ပြုလုပ်သည့် သတင်းစာရှင်းလင်းပွဲမှာ ထိုကဲ့သို့ ပြောကြားခဲ့ခြင်းဖြစ်သည်။
“ဒရုန်းထုတ်လုပ်တဲ့ စက်ရုံမှာ အလုပ်လုပ်နေတဲ့ တရုတ်နိုင်ငံသားတွေနဲ့ ပတ်သက်တဲ့ အချက်အလက်တွေကို တရုတ်နိုင်ငံဆီ ပေးပို့ဖို့ ယူကရိန်းထောက်လှမ်းရေးအဖွဲ့ကို ကျနော် တိုက်တွန်းထားပါတယ်” ဟု ဇာလန်းစကီးက သတင်းစာ ရှင်းလင်းပွဲတွင် ပြောကြားခဲ့သည်။
“ရုရှားနိုင်ငံဟာ တရုတ်အာဏာပိုင်တွေ မသိအောင် ဒရုန်းနည်းပညာတွေကို ခိုးယူဖို့ ဒရုန်းစက်ရုံမှာ အလုပ်လုပ် နေတဲ့ တရုတ်နိုင်ငံသားတွေနဲ့ သဘောတူညီချက် ရယူထားတယ်လို့ ကျနော်ထင်ပါတယ်”ဟု ဇာလန်းစကီးက ပြောကြားခဲ့သည်။
ရုရှားသမ္မတ ပူတင် ဒရုန်းထုတ်လုပ်မှုကို လေ့လာနေစဉ်
“အဲဒီဒရုန်းတွေ ဘယ်လို ထုတ်လုပ်လဲဆိုတဲ့ နည်းပညာဆိုင်ရာ အချက်အလက်တွေ ရှိနေပါတယ်။ တရုတ်အနေနဲ့ သူ့ရဲ့ မိတ်ဖက်နိုင်ငံတွေက ဘာတွေလုပ်နေလဲဆိုတာ သိဖို့ အရေးကြီးလိမ့်မယ် ကျနော် ထင်ပါတယ်”ဟု ဇာလန်းစကီးက ပြောကြားခဲ့သည်။
ရုရှားသည် တရုတ်အစိုးရ မသိဘဲ တရုတ်၏ ဒရုန်းနည်းပညာကို ရယူခဲ့ဖွယ်ရှိသည်ဟု ဇာလန်းစကီးက ပြောကြားခဲ့သည်။
တရုတ်ကတော့ ယူကရိန်း-ရုရှား စစ်ပွဲတွင် ၎င်းတို့ ပါဝင်ပတ်သက်ခြ င်းမရှိကြောင်း ငြင်းဆိုထားသည်။
ယူကရိန်းစစ်ပွဲအတွင်း တရုတ်နိုင်ငံသားများ ပါဝင်နေသည်ဆိုသည့် အချက်အလက်များနှင့် ပတ်သက်ပြီး ယူကရိန်းက အလွန်စိုးရိမ်နေကြောင်းကို ပြောကြားရန်အတွက် ယူကရိန်းနိုင်ငံဆိုင်ရာ တရုတ်သံအမတ် မာရှန်ကွမ် (Ma Shengkun) ကို ဆင့်ခေါ်ခဲ့ကြောင်း ယူကရိန်းနိုင်ငံခြားရေးဝန်ကြီးဌာနက ဧပြီ ၂၂ ရက်တွင် ပြောကြားခဲ့သည်။
ယူကရိန်းစစ်ပွဲအတွင်း ရုရှားဘက်မှ တရုတ်နိုင်ငံသား ၁၅၅ ဦးခန့် ကူညီတိုက်ခိုက်ပေးနေပြီး ၎င်းတို့အနက် ၂ ဦးကို ယူကရိန်းတပ်ဖွဲ့က ဖမ်းဆီးရမိခဲ့ကြောင်း ဇာလန်းစကီးက ပြောကြားခဲ့သည်။
Source: အယ်လ်ဂျာဇီးယား
