CNI News
၂၀၂၅ ခုနှစ်၊ ဧပြီ ၁၃

မြန်မာနှစ်သစ်ကူး သင်္ကြန်အခါသမယကို ကြိုဆိုသည့်အနေဖြင့် မြန်မာပြည်သူများ ကောင်းခြင်းမင်္ဂလာများနှင့် ပြည့်စုံပါစေကြောင်း မြန်မာပြည်သူများအတွက် အမေရိကန်ပြည်ထောင်စုကိုယ်စား မိမိပြောကြားလိုသည်ဟု အမေရိကန်နိုင်ငံခြားရေးဝန်ကြီး မာကိုရူဘီရိုက ထုတ်ပြန်ခဲ့သည်။

သင်္ကြန်ဆိုသည်မှာ အတိတ်ကို ပြန်ပြောင်း ဆင်ခြင်ပြီး ပိုမိုကောင်းမွန်သည့် အနာဂတ်ကို မျှော်လင့်ကြသည့် ကာလတစ်ခုဖြစ်ကြောင်း၊ ယခုနှစ်တွင် မတ်လ ၂၈ ငလျင်အပြီး၌ ဝမ်းနည်းပူဆွေးမှုနှင့် ပျက်စီးဆုံးရှုံးမှုများ တွေ့ကြုံခဲ့ကြရသည့် လူပေါင်းများစွာနှင့်အတူ မိမိတို့ တစ်ပေါင်းတစ်စည်းတည်း ရှိနေပါသည်ဟု ၎င်းက ပြောသည်။

နိုင်ငံခြားရေးဝန်ကြီး မာကိုရူဘီရိုက “ ဤခက်ခဲသော ကာလအတွင်း မြန်မာပြည်သူများနှင့်အတူ အမေရိကန် ပြည်ထောင်စုက တစ်သားတည်း ရပ်တည်နေပါသည်။ အသက်ကယ်ဆယ်ရေးဆိုင်ရာ လူသားချင်း စာနာထောက် ထားမှု အကူအညီများ ပေးအပ်ခြင်းနှင့် ပြန်လည်ထူထောင်ရေးဆိုင်ရာ ကြိုးပမ်းမှုများကို ပေးအပ်ရာတွင် နိုင်ငံ တကာ အသိုက်အဝန်းနှင့် မိမိတို့ ဆက်လက် ပူးပေါင်းသွားပါမည်” ဟု ပြောသည်။

ထို့နောက် ယခုကဲ့သို့ အခက်အခဲနှင့် ရင်ဆိုင်ရသည့်အခါ မြန်မာပြည်သူများ၏ သတ္တိနှင့်သဒ္ဓါတရားတို့မှာ ယခင် ထက်ပင် ပိုမိုထင်းရှားပေါ်လွင်လှပါကြောင်း၊ အသစ်တဖန် ဖြစ်တည်ခြင်းနှင့် ပိုမိုကောင်းမွန်သည့် မနက်ဖြန် အတွက် မျှော်လင့်ချက်များကို သင်္ကြန်က မိမိတို့ကို ဆင်ခြင်မိစေပါသည်ဟု ၎င်းက ပြောသည်။

နိုင်ငံခြားရေးဝန်ကြီး မာကိုရူဘီရိုက “မြန်မာနိုင်ငံကို ဒီမိုကရေစီ လမ်းကြောင်းပေါ်သို့ ပြန်လည်ရောက်ရှိရန် လုပ်ဆောင်နေသူများကို အားပေးကူညီသွားရန် မိမိတို့ ဆက်လက် သံန္နိဋ္ဌာန်ချထားပြီးဒေသတွင်း ငြိမ်းချမ်းရေး နှင့် လုံခြုံရေးတို့အတွက် ဆက်လက် ပူးပေါင်း ဆောင်ရွက်သွားမည်ဖြစ်သည်။ ယခုသင်္ကြန် အခါသမယနှင့်အတူ နှစ်သစ်တွင် မြန်မာပြည်သူများ အားလုံးအတွက် မျှော်လင့်ချက်နှင့် သတ္တိခွန်အားများ သယ်ဆောင်လာပါစေ ကြောင်း ဆုမွန်ကောင်း တောင်းလိုက်ပါသည်” ဟု ပြောသည်။

မြန်မာနိုင်ငံတွင် ဧပြီ ၁၃ ရက်မှ ၁၇ ရက်အထိ မြန်မာနှစ်သစ်ကူး သင်္ကြန်ရေကစားပွဲတော်ကာလဖြစ်သည်။

အဆိုပါ နှစ်သစ်ကူး သင်္ကြန်ရေကစားပွဲတော်ကို နှစ်စဉ်နှစ်တိုင်း ကျင်းပလျက်ရှိသော်လည်း ယခုနှစ်(၂၀၂၅ ခုနှစ်) မတ်လ ၂၈ ရက်တွင် ငလျင်လှုပ်ခတ်မှုကြောင့် ပြည်သူများ ထိခိုက်ခံစားခဲ့ရခြင်းကြောင့် အဆို၊ အကများ မပါသည့် အေးချမ်းသင်္ကြန်ကို ကျင်းပလျက်ရှိသည်။