CNI News

၂၀၂၂ ခုနှစ်၊ အောက်တိုဘာ ၁၉

မြန်မာ - တရုတ် နယ်စပ်ကုန်သွယ်ရေးတွင် တရုတ်နိုင်ငံသို့ နေ့စဉ် ဆန်နှင့် ဆန်ကွဲ ကုန်တင်ကား အစီးရေ ၂၀ မှ ၃၀ ကြား တင်ပို့နေရကြောင်း မူဆယ်ဆန်စပါးကုန်စည်ဒိုင်ထံမှ သိရသည်။

လက်ရှိတွင် ပွင့်လင်းရာသီရောက်ရှိလာပြီး ဆန်စပါးများ အသစ်ထွက်ပေါ်သည့်ကာလဖြစ်သည့်အတွက် ဆန် တင်ပို့မှုသည် ယခင်ထက် ပိုမိုကောင်းမွန်နေခြင်း ဖြစ်သည်ဟု မူဆယ် ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက CNI သတင်းဌာနသို့ ပြောသည်။

“သီတင်းကျွတ်နောက်ပိုင်းမှာပေါ့လေ ဆန်အသစ်တွေက အောက်မြန်မာပြည်မှာ အားလုံးဖြိုင်ဖြိုင်ပေါ်လာပြီ။ နေရာအနှံ့ပေါ်လာပြီ။ ဒီအချိန်မှာ အန်ကယ်တို့ တရုတ်ပြည်ကလည်း အခြေအနေ ပြန်ကောင်းတယ်။ ဒီ့အတွက် ဆန်တို့ ဆန်ကွဲတို့ကတော့ ပြီးခဲ့တဲ့ သီတင်းကျွတ်မတိုင်ခင်ထက် အောက်တိုဘာ ၁၀ ရက် အရင်ထက် နောက်ပိုင်းမှာ ပိုသွားလာတာ တွေ့ရပါတယ်။ ဆန်နဲ့ ဆန်ကွဲက တစ်နေ့ကို အိတ် ၁၀၀၀ လောက်ဆန့်တဲ့ တန် ၅၀ ဆန့် တွဲကား အစီး ၂၀ နဲ့ ၃၀ ကြား ပုံမှန်သွားနေတာကို တွေ့ရှိရပါတယ်။ ဈေးနှုန်းအရဆိုလည်း ဆန်ကွဲတစ်အိတ် ကို မူဆယ်အထိုင်ဈေးပေါ့ ယွမ်ငွေ ၁၂၀ ဝယ်ရတယ်။ ဆန်တစ်အိတ် ၁၄၀ ကနေ ၁၅၀ ကြားကို ရပါတယ်။ ဒါ့ ကြောင့် အခုလို ဆန်အသစ်ပေါ်တဲ့အချိန်ခါမှာ တရုတ်လိုင်းက အခက်အခဲမရှိတဲ့အတွက် အန်ကယ်တို့လို့ တရုတ် ပြည်ကို ပို့နေတဲ့ တရုတ်ကုန်သည်တွေအနေနဲ့ကတော့ ဆန်နဲ့ဆန်ကွဲက တရုတ်ပြည်ကို ပို့ရတာ အကျိုး ရှိတယ်လို့ ပြောချင်တယ်” ဟု ပြောသည်။

ပြီးခဲ့သည့် သီတင်းကျွတ်မတိုင်ခင်ကာလတွင် တရုတ်နိုင်ငံသို့ တစ်နေ့လျှင် ဆန်နှင့် ဆန်ကွဲ ကားအစီးရေ ၅ စီးမှ ၁၀ စီးသာ ဝင်ရောက်နိုင်ပြီး လက်ရှိတွင် အစီး ၃၀ ခန့် ဝင်ရောက်နိုင်ကြောင်း သိရသည်။

ပြည်တွင်းတွင် ဆန်အသစ်များ ပေါ်ချိန်၌ ဆန်ဈေးနှုန်းများ ကျဆင်းလေ့ရှိသော်လည်း ဘင်္ဂလားဒေ့ရှ်နိုင်ငံသို့ ဆန်တန်ချိန် ၂ သိန်းခန့် တင်ပို့ရန်ရှိသည့်အတွက် ဆန်ဈေးနှုန်းသည် ကျသင့်သလောက်မကျဘဲ ဈေးတန်းတစ်ခု၌ ရပ်တန့်နေခြင်းဖြစ်ကြောင်း ဦးမင်းသိန်းက ဆက်ပြောသည်။

ဆန်ရောင်းဝယ်ရေး(ဓါတ်ပုံ-CNI)

“ဆန်အသစ်ပေါ်တဲ့အချိန်ဆို ဈေးကျရမှာ။ ဒါပေသိ ဘင်္ဂလားဒေ့ရှ်ကို Export ထွက်နေတဲ့အတွက် ဆန်ဈေးကျ ရမည့်ကိစ္စက မကျဘဲ တန်းနေတယ်လို့ ခေါ်ရမှာပေါ့။ ကျလည်း မကျသေးဘူး ဘာလို့လဲဆိုတော့ ဆန်အသစ် ပေါ်တဲ့အချိန် ဆန်စပါးတွေ ဖြိုင်ဖြိုင်ထွက်လာတယ်။ ဒီအချိန်မှာ ဘင်္ဂလားဒေ့ရှ်ကို တန်ချိန် ၂ သိန်း ပို့ရမယ်။ အိတ်ရေ သိန်း ၄၀ လောက် ပို့ရမယ်။ အဲဒီကိစ္စအတွက် ဆန်နဲ့ ဆန်ကွဲ မကျဘူး။ အခုလို ဆန်နဲ့ ဆန်ကွဲ ဆန်အသစ် ပေါ်တဲ့အချိန်မှာ ဆန်နဲ့ ဆန်ကွဲ ဈေးမကျတဲ့အတွက်၊ ဆန်ဈေးမကျတဲ့အတွက်၊ စပါးဈေး မကျတဲ့အတွက် လယ်သမားတွေ အဖို့တော့ ပေါ်ဦးပေါ်ဖျားမှာ အကျိုးရှိ ခံစားရတယ်လို့ပဲ ပြောချင်ပါတယ်။ ဒါသိပ်ကောင်းတဲ့ အချိန်ပဲ။ ဆန်ကတော့ ဆန်သား ၉၀ တစ်အိတ်ကို ၄၅၀၀၀ လောက်တော့ ရှိတယ်။ ဆန်ကွဲ တစ်အိတ်ကို ၄၀၀၀၀ ဝန်းကျင်လောက် ရှိပါတယ်” ဟု CNI သို့ ပြောသည်။

ပြည်ပသို့ တင်ပို့သည့် ရက် ၉၀ ဆန်၊ ဧည့်မထ ၂၅ မတ်ဆန်စသည့် ဆန်ကြမ်းများ ဈေးနှုန်းကျဆင်းမှု မရှိသကဲ့သို့ ပြည်တွင်းတွင် စားသုံးနေသည့် ပေါ်ဆန်းမွှေးဆန်များသည်လည်း ဈေးနှုန်းကျဆင်းမှု မရှိသေးကြောင်း ဆန်ရောင်း ဝယ်သူများထံမှ သိရသည်။

ယခုအချိန်တွင် ဧရာဝတီတိုင်းမှ ဆန်များပေါ်နေပြီဖြစ်သော်လည်း စားသုံးမှုများသည့် ရွှေဘိုဆန်မှာ မပေါ်သေး ကြောင်း ဆန်ရွှေဘိုရောင်းဝယ်ရေးမှ ကိုရှိုင်းဝင်းလတ်က CNI သတင်းဌာနသို့ ပြောသည်။

“မပေါ်သေးဘူးဗျ ကျနော်တို့ ဆန်ကကျတော့လေ။ ဧရာဝတီလောက်သာ ပေါ်တာ။ ကျနော်တို့ ရွှေဘိုမြို့ကတော့ မပေါ်သေးဘူး။ ဈေးနှုန်း ခုတလောကလေ။ အရမ်းကြီး အတက်အကျ မရှိဘူး။ ဧရာဝတီဆန်ရော၊ ရွှေဘိုဆန်ရော ပဲ” ဟု ပြောသည်။

ဧရာဝတီတိုင်းဒေသကြီးနှင့် ပဲခူးတိုင်းဒေသကြီးတို့မှ ထွက်ရှိသည့် ဆန်များသည် လက်ရှိ၌ ဘုရင့်နောင်ဆန် ကုန်စည်ဒိုင်သို့ နေ့စဉ် ဝင်ရောက်နေပြီဖြစ်သော်လည်း ဝင်ရောက်သည့် ပမာဏနှင့် အခြေအနေများကို သိရှိရန် ဘုရင့်နောင် ဆန်ကုန်စည်ဒိုင်မှ တာဝန်ရှိသူများကို ဆက်သွယ်သော်လည်း ယင်းကိစ္စနှင့်ပတ်သက်ပြီး ပြန်လည် ဖြေကြားခြင်း မရှိပေ။

ယခုနှစ် မြန်မာနိုင်ငံ ဆန်စပါးစိုက်ပျိုးမှုတွင် ဓာတ်မြေဩဇာ၊ မြေဆီ၊ စက်သုံးဆီ စသည့် သွင်းအားစုစရိတ်များ ကြီးမြင့်ခြင်းနှင့် တချို့သော နယ်မြေများတွင် တည်ငြိမ်မှု မရှိခြင်းတို့ကြောင့် စပါးစိုက်ပျိုးမှု လျော့ကျခဲ့ကြောင်း တောင်သူများထံမှ သိရသည်။

CNI News

၂၀၂၂ ခုနှစ်၊ အောက်တိုဘာ ၁၈

အိမ်သုံးအခြေခံ ဆေးဝါးများအပြင် ဆီးချို၊ သွေးတိုး၊ နှလုံး စသည့် ရေရှည် သောက်သုံးနေရသော ဆေးဝါးများ၏ ဈေးနှုန်းများသည် လက်ရှိတွင် အနည်းငယ် ကျဆင်းလာကြောင်း နိုင်ငံခြားဆေးမျိုးစုံ ရောင်းချသည့် ဆိုင်များထံမှ သိရသည်။

ဆေးကုမ္ပဏီထံမှ ဝယ်ယူသည့်အခါတွင် လက်ရှိ၌ ဆေးမျိုးစုံသည် ၁၀ ရာခိုင်နှုန်းခန့် ကျဆင်းလာကြောင်း ရန်ကုန်မြို့၊ မင်္ဂလာတောင်ညွန့်မြို့နယ်ရှိ ရွှေမင်္ဂလာဈေးမှ နိုင်ငံခြားဆေးမျိုးစုံ လက္ကားရောင်းချသည့် ဆေးဆိုင် မန်နေဂျာတစ်ဦးက CNI သတင်းဌာနသို့ ပြောသည်။

၎င်းက “ဆေးဈေးက ကျတယ်ညီမ။ ကျတယ်ဆိုတာက အစ်ကိုက ဒီကမန်နေဂျာပါ။ ကျတယ်ဆိုတာက ကုမ္ပဏီ ဈေးတွေက ကျတာပါ။ ၁၀ ရာခိုင်နှုန်းလောက်တော့ အားလုံး ကျကြတယ်။ အကုန်လုံးကျတာ ကုမ္ပဏီတိုင်း ကျတာပါ။ သွေးတိုး၊ ကျောက်ကပ် ဘာညာ လေးဘက်နာပေါ့။ နှစ်ခုလုံးကျတာ အားလုံးကျတာ။ ဒီမနက် ဈေး လည်း ကျတယ်” ဟု ပြောသည်။

မြန်မာနိုင်ငံတွင် အသုံးပြုနေသည့် ဆေးဝါးများ၏ ရာခိုင်နှုန်း ထက်ဝက်ကျော်သည် ပြည်ပမှ တင်သွင်းလျက်ရှိ ကြောင်း၊ ဆေးနှင့် ဆေးပစ္စည်း တင်သွင်းရာတွင် ဒေါ်လာဖြင့် ဝယ်ယူတင်သွင်းရသည့်အတွက် ဒေါ်လာဈေး မငြိမ်မသက်ဖြစ်မှုသည် ဆေးဈေးနှုန်းများကို အဆမတန် ကြီးမြင့်စေခဲ့ကြောင်း ဆေးကုန်သည်များက ပြောသည်။

ဆေးများ ရောင်းချနေစဉ် 

လက်ရှိတွင် ဆေးဝါးများ ဈေးနှုန်းကျဆင်းလာသော်လည်း ဈေးနှုန်း မြင့်တက်ချိန်တွင် အများအပြား ဝယ်ယူထားမိ ခဲ့ကြသည့်အတွက် လက်ရှိ၌ ဝယ်ယူမှု နည်းပါးကြောင်း ရွှေပြည့်စုံဈေးမှ ဆေးဆိုင်ပိုင်ရှင် တစ်ဦးဖြစ်သူ ဒေါ်ဝတ်ရည်သွယ်က ပြောသည်။

၎င်းက “ကျတာက နည်းနည်းပဲ ကျတာပါ။ အရင် ၆၀ ရာခိုင်နှုန်းလောက် တက်ထားလို့ရှိရင် အခုက ၁၀ ရာခိုင်နှုန်း လောက်ကိုပဲ ချပေးတာ။ သိပ်အများကြီး မကျသေးဘူး။ ကျတာတော့ ကျတယ်။ တခြား ပြတ်နေတဲ့ ပစ္စည်းတွေက တော့ မကျဘူးပေါ့နော်။ ဆေးပြန် ထပ်မဝင်တဲ့ ဟာတွေကတော့ မကျဘူး။ အရောင်းအဝယ်တွေကတော့ ပါးနေ တယ်။ ဈေးကျတယ်ဆိုတော့ သိပ်မဝယ်ချင်ကြဘူး။ ဈေးတက်တဲ့ အချိန်မှာသာ လူတွေက ဝယ်ချင်ကြတာ။ ပထမ ပိုင်းတုန်းကလည်း ပစ္စည်းပြတ်မှာစိုးလို့ ဝယ်ထားတာတွေက များတော့လေ မဝယ်နိုင်ကြတော့ဘူး။ အရောင်း အဝယ်တွေကတော့ ပါးတယ်” ဟု CNI သတင်းဌာနသို့ ပြောသည်။

ဈေးနှုန်း ထပ်ကျမည်ကို စိုးရိမ်ကြသည့်အတွက် လက်ရှိတွင် ဆေးဝါးရောင်းချသူများက အမြန် ရောင်းချလိုသော် လည်း ဝယ်ယူသူများသည့် ဈေးနှုန်း ထပ်ကျမည့်အချိန်ကို စောင့်ဆိုင်းနေကြကြောင်း သိရသည်။

ဆေးဝါးလက္ကားရောင်းချသည့် ဆိုင်များနှင့် ကုမ္ပဏီများမှ ဆေးဝါးဈေးနှုန်းများသည် ကျဆင်းလာနေသော်လည်း ရပ်ကွက်အတွင်းရှိ လက်လီ ပြန်လည်ရောင်းချသော ဆေးဝါးအရောင်းဆိုင်များ၏ ဈေးနှုန်းများမှာမူ ကျဆင်းမှု မရှိသေးသလို တစ်ဆိုင်နှင့် တစ်ဆိုင် ဈေးနှုန်းများလည်း ကွာခြားလျက်ရှိနေသည်။

CNI News

၂၀၂၂ ခုနှစ်၊ အောက်တိုဘာ ၁၅

အချောထည်ပြုလုပ်ပြီးသား ဝါးအိမ်တဲများအား အပန်းဖြေစခန်းနှင့် စားသောက်ဆိုင်လုပ်ငန်းတို့မှ ဝယ်ယူမှု များပြားနေသည်ဟု ဝါးကုန်ထုတ် သမဝါယမအသင်းမှ ဒုတိယဥက္ကဌ ဦးကျော်ဝင်းက CNI သတင်းဌာနသို့ ပြောသည်။

ထိုသို့ ဝယ်ယူကြရာတွင် ရန်ကုန်၊ မန္တလေးနှင့် နေပြည်တော်တို့မှ အများဆုံး ဝယ်ယူကြကြောင်း ၎င်းက ပြောသည်။

ဦးကျော်ဝင်းက "ဝါးက အခုနောက်ပိုင်းမှာ ကျနော်တို့ ဝါးနဲ့ပတ်သက်ပြီး စိတ်ဝင်စားမှုတွေ မြင့်တက်လာတယ်။ စားသောက်ဆိုင်ရယ်၊ အပန်းဖြေ ဥယျာဉ်တွေမှာ သုံးဖို့ ပိုများတယ်။ နောက် ကိုယ့်ရဲ့စိုက်ပျိုးရေး ခြံတွေမှာ နားနေ ဖို့အတွက် အပန်းဖြေဖို့အတွက် ကိုယ်ပိုင်ခြံတွေထဲမှာ ထည့်ကြတာလည်း များပါတယ်။ လုပ်ပြီးသား သယ်တာ တော့ ပိုများတယ်။ ဝါးအလုံးလိုက်လည်း ဝယ်ကြတယ်။ နောက် လုပ်တဲ့ လူတိုင်း လူတိုင်းမှာလည်း အလုပ်ဖြစ် တယ်ပေါ့။ လက်မှုသမားဆိုလည်း သူသေသေချာချာလုပ် မှာတဲ့လူက အပြည့်ပဲ။ ကျနော်တို့ဆိုရင် ပရိဘောဂနဲ့ ဝါးနားနေဆောင်လေးတွေရယ် ဆောက်လုပ်ရေး လုပ်ငန်းတွေလုပ်တယ်။ အဲဒါလည်း သူ့အော်ဒါနဲ့ သူတော့ အပြည့်ပဲ။ ဆိုတော့ လူတွေစိတ်ဝင်စားမှု အပိုင်းကတော့ ပိုပြီးမြင့်တက်လာတယ်။ အရင်ထက်စာရင် လူတွေက ဈေးနှုန်း သိပ်မကြည့်တော့ပဲနဲ့ လက်ရာ သေသပ်တာတို့ကို ပိုပြီး ကြည့်လာတဲ့ သဘောတော့ရှိတယ်။ သူက ပုံမှန် အားဖြင့်တော့ ထိုင်ရင် ခန္စာကိုယ်ရဲ့ အပူတွေကို ဆွဲစုပ်တဲ့အတွက် အညောင်းအညာပြေတယ်။ နေလို့ ထိုင်လို့ ပိုကောင်းတယ်။ ကျန်းမာရေးအရ အဆင်ပြေတယ်ဆိုပြီးမှ လူတွေက ပိုကြိုက်လာတာလည်း ပါတယ်" ဟု CNI သတင်းဌာနသို့ ပြောသည်။

ဝါးနဲ့ လုပ်ထားသော လုပ်မှုပစ္စည်းများကိုတွေ့ရစဉ်

ဝါးအိမ်တဲတစ်လုံးလျှင် အကျယ်အဝန်း၊ ဝါးအမျိုးအစားနှင့် လိုချင်သည့် ပုံစံပေါ် မူတည်ကာ ဈေးနှုန်းကွာခြားချက်ရှိပြီး ပုံမှန်အားဖြင့် ဝါးအိမ်တဲတစ်လုံးအား ငွေကျပ် ၁ သိန်းခွဲမှ ၁၈ သိန်းခန့်အထိ ရှိကြောင်းနှင့် တစ်ပတ်လျှင် အနည်းဆုံး တစ်လုံးမှစတင်ကာ မှာယူ၊ ဝယ်ယူနေကြကြောင်း သိရသည်။

ဝါးအိမ်တဲများအား ဝယ်ယူမှု များပြားလာသကဲ့သို့ ဝါးဖြင့်ပြုလုပ်ထားသည့် လက်မှုပစ္စည်းများဖြစ်သော စုဘူး၊ မီး အိမ်၊ နာရီ၊ ရေနွေးကရား အစရှိသည်တို့ကိုလည်း စိတ်ဝင်စားမှုရှိကြကာ ဝယ်ယူမှု များပြားကြောင်း သိရသည်။

ဝါးကုန်ကြမ်းရောင်းချသူတစ်ဦးက "ကုန်ကြမ်းမှာတာတော့ ကျနော်တို့က ဝါးအမျိုးအစား ၄၊ ၅၊ ၆ မျိုးလောက် ရှိတော့ ကျနော့်ဆီက မရနိုင်တဲ့ အရာကျတော့ တခြားဆီက မှာတာပေါ့။ အခု ကျနော့်ဆီက မှာတာကြတော့ ကျနော်က အမိုး၊ အကာ သုံးတဲ့ကုန်ကြမ်း ပို့ပေးရတာ များတယ်။ ပြီးခဲ့တဲ့ လကတော့ ကျနော် အဲဒီအမိုးအတွက် သုံးတဲ့ ဆိုဒ်က ၂၀၀၀ လောက်တော့ ပို့ဖြစ်ပါတယ်။ သူ့အချောအထည်ပိုင်း ဖြစ်သွားရင်တော့ မဆိုးဘူးပေါ့ (ဈေးကွက်က)။ ကျနော်တို့ဘက်က ကြည့်ရင်တော့ လုပ်ငန်းဖြစ်မြောက်ရေး လောက်ပဲ ရှိပါတယ်။ ကျနော်တို့ အခုလက်ရှိ ကုန်ကြမ်းတွေဝယ်တဲ့ အချိန်မှာ ဈေးတော့ နည်းနည်းလေး မြောက်လာတာရှိတာပေါ့။ ပွဲစားတွေရဲ့ ဆီဈေး၊ ကားခနဲ့ လမ်းကြောတွေနဲ့ဆိုတော့ အရင်ထက်စာရင် ဈေးနှုန်း နည်းနည်းလေး ပိုလာတာပေါ့။ ဈေး နည်းနည်း မြောက်တယ်ဆိုတာက ဝါးတစ်လုံးပေါ်မှာ ၃၀ (ကျပ်) တက်တာမျိုး၊ ၄၀ (ကျပ်) တက်တာမျိုး အဲဒီလို တစ်ခေါက်နဲ့ တစ်ခေါက် နည်းနည်းလေး တက်တက်လာတာ။ ကျနော်တို့ကလည်း တဆင့်ခံ ဝယ်ရတာ ဆိုတော့ လေ" ဟု CNI သတင်းဌာနသို့ ပြောသည်။

ဝါးနဲ့ လုပ်ထားသော အပန်းဖြေစခန်းကိုတွေ့ရစဉ်

ဝါးကုန်ကြမ်းများကို သဘာဝတောများမှ ထုတ်လုပ်လျက်ရှိကြောင်း၊ နှစ်စဉ်ပျမ်းမျှ ဝါးအလုံးရေ ၁၄၇ သန်း ထုတ်လုပ်ရန် လျာထားခဲ့သော်လည်း နှစ်စဉ်ပျမ်းမျှ ဝါးအလုံးရေ ၁၂၇ သန်း ထုတ်လုပ်နိုင်ခဲ့ကြောင်း သိရသည်။

မြန်မာနိုင်ငံတွင် ဝါးများကို နေရာအနှံ့မှာ စိုက်ပျိုးကြကြောင်း၊ ဝါးအစိမ်း အလုံးလိုက်များလည်း ဝယ်ယူမှု ရှိကြကြောင်း၊ နေရာဒေသနှင့် ဝါးအမျိုးအစားပေါ် မူတည်ပြီး တစ်လုံးလျှင် ၅၅၀၊ ၆၀၀ ကျပ်ခန့် ပေါက်ဈေး ရှိကြောင်း‌ ဝါးကုန်ထုတ် သမဝါယမအသင်းမှ သိရသည်။

ထို့နောက် ပြုလုပ်ပြီးသား ဝါးလက်မှုပစ္စည်းများကို ဝယ်ယူကြသကဲ့သို့ သင်တန်းလာတက်ရောက်ပြီး မိမိ ကိုယ်တိုင် ပြုလုပ်ကြသူများလည်း ရှိကြောင်း၊ လက်ရှိ၌ ဝါးနှင့်ပြုလုပ်သည့် လက်မှုပညာ အချောထည် သင်တန်းများတွင် လာရောက်သင်ကြားသည့် သင်တန်းသားများလည်း များလာကြောင်း ဝါးကုန်ထုတ် သမဝါယမအသင်းမှ သိရသည်။

CNI News

၂၀၂၂ အောက်တိုဘာ ၁၄

မြန်မာ့ရေချို ငါးမြစ်ချင်းငါးများကို ဘင်္ဂလားဒေ့ရှ်နိုင်ငံမှ ဝယ်လိုအား များပြားလာနေသော်လည်း ရခိုင်နယ်စပ် ကုန်သွယ်ရေးမှတဆင့် တင်ပို့ရာတွင် စစ်ဆေးမှုများကြောင့် အချိန်ကြန့်ကြာပြီး နှောင့်နှေးမှုများ ဖြစ်ပေါ်နေ ကြောင်း ရခိုင်ပြည်နယ်ရှိ ကုန်သည်များက ပြောသည်။

ယခုကာလသည် ဘင်္ဂလားဒေ့ရှ်နိုင်ငံတွင် ငါးမဖမ်းရကာလ သတ်မှတ်ထားခြင်းကြောင့် မြန်မာ့ရေချို ငါးမြစ်ချင်း ငါးများကို ဝယ်ယူမှု များပြားလာကြောင်း၊ သို့သော် တင်ပို့ရာတွင် စစ်ဆေးမှုများ ရှိနေ၍ အချိန်ကြန့်ကြာကာ ငါးအရည်အသွေး ကျဆင်းမှုများ ဖြစ်ပေါ်နေကြောင်း စစ်တွေဆိပ်ကမ်းတွင် ငါးမြစ်ချင်း တင်ပို့သည့် မောင်တော ကုန်သည်တစ်ဦးက CNI သတင်းဌာနသို့ ပြောသည်။

၎င်းက “အခုက လမ်းမှာ အစစ်ဆေးတွေ များတာနဲ့ ဘာနဲ့ဆို နည်းနည်း သွားရလာရ အဆင်မပြေဘူးပေါ့။ ရက် ကြာတာပေါ့။ အကန့်အသတ်တွေရှိတော့ ညနေ ၆ နာရီ မသွားရတာတွေ ရှိတော့ ၂ ရက်နဲ့ ရောက်မယ့် ခရီးက ၃ ရက်နဲ့ ရောက်တာတို့ အဲလိုဖြစ်တာပေါ့။ မောင်တောဘက်က သွားမရတော့ စစ်တွေမှာ ကားတွေက ပုံသွားတာ ပေါ့။ အဓိကကတော့ အခက်အခဲကတော့ လမ်းပန်းဆက်သွယ်ရေးပါပဲ။ မောင်တောကဆိုရင်တော့ ကားတစ်စီး ရတာနဲ့ တစ်စီးကို ဘင်္ဂလား(ဘင်္ဂလားဒေ့ရှ်)ကို ပို့လို့ရတယ်။ ဈေးကွက်ပေါ် အချိန်မှီ ရောက်သွားတဲ့အတွက် ငါး ကွာလတီ ကောင်းပြီး ဈေးကောင်းရတာပေါ့။ စစ်တွေကျတော့ စက်လှေအပြည့်မှ သွားနိုင်တော့ ကား ၅ စီး အဲလို စုရတာပေါ့။ ကုန်သည်က ၅ ယောက်လောက်ရှိရင် တစ်ယောက် ၅ စီးလောက် စုလိုက်ရင် ဟိုဘက်ကို ရောက်သွား ရင် ကုန်အဝင်များပြီး ဈေးကျတာတို့၊ ဒီမှာ စောင့်နေရတဲ့အတွက် ငါးကွာလတီကျတာတို့ ဖြစ်တာပေါ့ဗျာ” ဟု ပြောသည်။

အငူမော်လမ်းပေါ်ရှိ ရဲစခန်းတစ်ခုကိုတွေ့ရစဉ်

မြန်မာ - ဘင်္ဂလားဒေ့ရှ် ကုန်သွယ်ရေးတွင် ငါးမြစ်ချင်းသည် အဓိကကျသည့် ကုန်ဖြစ်သည်။

ထို့နောက် စစ်တွေ - အငူမော် - မောင်တော ရေလမ်းနှင့် ကုန်လမ်းကြောင်း အပါအဝင် စစ်တွေ - မောင်တော ပြေးဆွဲနေသည့် ဇတ်ရေယာဉ်နှင့် ကုန်တင်ကား လမ်းကြောင်း တို့ကို ပြီးခဲ့သည့် စက်တင်ဘာလက သက်ဆိုင်ရာ မှ ဖြတ်သန်းခွင့် ပိတ်လိုက်ကြောင်း၊ ထို့ကြောင့် ငါးမြစ်ချင်း တင်ပို့မှုများလည်း အားနည်းသွားကြောင်း သိရသည်။

အဆိုပါ လမ်းပိတ်ထားမှုများကြောင့် မောင်တောသို့ သွားရာ ကုန်သွယ်ရေး လမ်းကြောင်းကို ဖွင့်ပေးစေလိုကြောင်း မောင်တောကုန်သည် ဦးနိုင်မြင့် (အမည်လွှဲ)က ပြောသည်။

၎င်းက “ကျနော်တို့ အငူမော် - မောင်တောက တိုက်ပွဲတွေဘာတွေလည်း ဖြစ်တာ မရှိတော့ဘူးပေါ့နော်။ လမ်းတွေ ဖွင့်စေချင်တယ်။ အဲကျရင် မောင်တော စီးပွားရေးဇုန်ကလည်း အသက်ဝင်လာပြီပေါ့နော်။ နိုင်ငံတော်အတွက် လည်း ဝင်ငွေ တစ်ဖက်တစ်လမ်းက ရှာပေးထားတာပဲလေ။ အခုက လမ်းပိတ်ထားတယ်။ အကုန်လုံး အခက်အခဲ ဖြစ်သွားတာပေါ့။ ကုန်စည်စီးဆင်းမှု ရပ်သွားတဲ့အတွက် အဲဒီအနီးအနားက ရွာတွေ ကုန်ဈေးနှုန်း ကြီးမြင့်တာတို့ ဘာတို့ ခံစားရတာပေါ့နော်။ ကျနော်တို့ ဘင်္ဂလား(ဘင်္ဂလားဒေ့ရှ်)ကို ပို့တဲ့ ပို့ကုန်တွေကလည်း အများကြီး ထိခိုက် သွားတာပေါ့နော်။ ကျဆင်းသွားတာပဲ။ အဲဒီလမ်းကို ဖွင့်စေချင်ပါတယ်” ဟု CNI သတင်းဌာနသို့ ပြောသည်။

ရခိုင်ပြည်နယ်က လမ်းဆုံတစ်ခုကိုတွေ့ရစဉ်

ငါးမြစ်ချင်းများကို ရန်ကုန်မြို့ရှိ ငါးဈေးများနှင့် ငါးမွေးကန်များမှ ဝယ်ယူပြီး အအေးခန်း ကုန်တင်ယာဉ်များဖြင့် ရန်ကုန် - စစ်တွေ လမ်းကြောင်းကနေ စစ်တွေ နယ်စပ်ကုန်သွယ်ရေး စခန်းသို့ တင်ပို့ကြကြောင်း၊ ထို့နောက် စစ်တွေ နယ်စပ်ကုန်သွယ်ရေးစခန်းမှတဆင့် ဘင်္ဂလားဒေ့ရှ်နိုင်ငံသို့ လည်းကောင်း၊ ရန်ကုန် - စစ်တွေ - အငူမော် - မောင်တော လမ်းကြောင့်ဖြင့် မောင်တောနယ်စပ် ကုန်သွယ်ရေး စခန်းမှတဆင့် ဘင်္ဂလားဒေ့ရှ်နိုင်ငံသို့ လည်း ကောင်း တင်ပို့ကြကြောင်း သိရသည်။
လက်ရှိတွင် မောင်တောသို့ သွားရာ ကုန်သွယ်ရေး လမ်းကြောင်းများ ပိတ်ထားသဖြင့် မောင်တော ကုန်သည်များ သည် စစ်တွေနယ်စပ် ကုန်သွယ်ရေးစခန်းမှ တင်ပို့နေရကြောင်း၊ ထိုသို့ စစ်တွေနယ်စပ် ကုန်သွယ်ရေးစခန်းမှ တင်ပို့နေရခြင်းကြောင့် အချိန်ကြန့်ကြာမှုများ ဖြစ်ပေါ်လျက်ရှိကြောင်း သိရသည်။

ရခိုင်ပြည်နယ်နှင့် ဘင်္ဂလားဒေ့ရှ် ကုန်သွယ်ရေးတွင် ရေချို ငါးတစ်မျိုးဖြစ်သည့် ငါးမြစ်ချင်းသည် အဓိကကုန်စည် နှင့် အများဆုံး တင်ပို့မှုရှိနေသည်။ ပြီးခဲ့သည် ဇူလိုင်လတွင် မောင်တောနယ်စပ် ကုန်သွယ်ရေးမှတဆင့် ငါးမြစ်ချင်း တန်ချိန် ၉၀၀ ကျော် တင်ပို့ထားနိုင်ကြောင်း သိရသည်။

CNI News

၂၀၂၂ ခုနှစ်၊ အောက်တိုဘာ ၁၂

သီလဝါစက်မှုဇုန်အတွင်းရှိ တိုယိုတာ မော်တော်ကားကုမ္ပဏီမှ လွန်ခဲ့သည့် ၂ နှစ်တွင် ထုတ်လုပ်ထားပြီးသား Hilux ထရပ်ကားများကို စတင်ထုတ်ရောင်းလာကြောင်း ကားဈေးကွက်အတွင်းမှ သိရသည်။

ထိုသို့ ထုတ်ရောင်းခြင်းကြောင့် ကားဈေးကွက်အတွင်းတွင် အဆမတန် မြင့်တက်ခဲ့သည့် ကားဈေးနှုန်းများသည် လက်ရှိတွင် ဈေးတန်းတစ်ခု၌ တန့်သွားသည်ဟု ရန်ကုန်တိုင်းဒေသကြီး မော်တော်ယာဉ် ထုတ်လုပ်ရေးနှင့် ဖြန့်ဖြူးရောင်းချရေး လုပ်ငန်းရှင်များအသင်း ဥက္ကဋ္ဌ ဦးမင်းမင်းမောင်က CNI သတင်းဌာနသို့ ပြောသည်။

၎င်းက “တိုယိုတာကားတွေ မြန်မာပြည်မှာ မထုတ်လုပ်ဘူး။ အဲဒါက ဟိုးအရင်ထုတ်ထားတဲ့ကားကို လွန်ခဲ့တဲ့ ၂ နှစ်က ထုတ်ထားတဲ့ကားတွေကို ရောက်ထားတဲ့ ကားတွေကို တပ်ဆင်ထုတ်လုပ်ပြီးသား ကားတွေကို မော်ဒယ် နိမ့်သွားမှာဆိုးလို့ အခုမှ ထုတ်ရောင်းတာလေ။ ထုတ်ရောင်းလိုက်တာပေါ့ မဟုတ်ရင် သူတို့ ဂိုဒေါင်ထဲမှာ ဒီအတိုင်း ဖြစ်နေမှာဆိုးလို့လေ။ ဟိုးအရင် ထုတ်ထားတဲ့ဟာပါ အခုထုတ်ထားတဲ့ဟာ မဟုတ်ပါဘူး။ double cab ရောင်း တာလေ။ double cab ကတွေက အကုန်လုံး ၂၀၀၀ (သိန်း) ကျော်လေ။ သူက ၁၇၀၀ နဲ့ ရောင်းတယ်လေ။ ရောင်းတာကို လှိုင်လှိုင်ရောင်းမပေးဘူး။ ပရီအော်ဒါ လက်မခံဘူး။ လက်ခံရင်လည်း ဘယ်နေ့ရမယ် မပြောနိုင်တဲ့ အတွက်ကြောင့်မို့လို့ ကားဈေးက ရိုက်ခတ်မှု မရှိဘူး။ double cab ကတော့ ကျန်တဲ့ကားတွေ ရိုက်ခတ်မှု ရှိ တယ်။ double cab ကတော့ ၂၀၀၀ ဝန်းကျင် ၂၀၀၀ အောက်တော့ ပြန်ဆင်းသွားတာပေါ့။ ပထမ ၂၀၀၀ ကျော် သွားတာကို double cab က။ ကျန်တဲ့ကားတွေပေါ်မှာ သက်ရောက်မှု မရှိပါဘူး လောလောဆယ်။ ဘာလို့ဆို ဒေါ်လာဈေးကြောင့်။ သူရောင်းတဲ့ ဈေးကလည်း ပေါပေါလေးရောင်းတာ အရင်ဈေးနဲ့ ရောင်းတာမှ မဟုတ်တာ။ အခု currency နဲ့ ပေါက်ပြီးတော့ သူက ၁၇၀၀ ဝန်းကျင်ရောင်းတာဆိုတော့ ဘာမှ ကားဈေးအပေါ်မှာ ရိုက်ခတ်မှု တော့ မရှိပါဘူး။ ဒါပေမယ့် မတန်မဈေး ဖြစ်သွားတဲ့ ကားဈေးတစ်ခုကတော့ တန့်သွားတာပေါ့။ အဲဒါတော့ ကောင်းပါတယ်” ဟု ပြောသည်။

Toyota double cap ကားကိုတွေ့ရစဉ် (GETTY IMAGES)

မြန်မာပြည်တွင်းရှိ တိုယိုယာအရောင်းကိုယ်စားလှယ်များက ဟိုင်းလပ်စ်ယာဉ်များအတွက် အော်ဒါအမှာစာများကို အောက်တိုဘာ ၁၁ ရက် (ယမန်နေ့)တွင် စတင်လက်ခံခဲ့သည်ဟု ဂျပန်သတင်းဌာန နစ်ကိုင်းအေးရှားက ရေးသား ထားသည်။
သို့သော်လည်း အကန့်သတ်ဖြင့် ထုတ်လုပ်ရသဖြင့် မော်တော်ယာဉ် အပြည့်အစုံ တပ်ဆင်ပြီးစီး၍ ပေးပို့နိုင်မည့် ရက်အတိအကျကို အာမ မခံနိုင်သေးကြောင်း အရောင်းကိုယ်စားလှယ်တစ်ဦးက မိမိတို့ကို ပြောသည်ဟု နစ်ကိုင်းအေးရှားမှ ဖော်ပြထားသည်။

ပြည်ပမှ မော်တော်ယာဉ် အစိတ်အပိုင်းများကို တင်သွင်းပြီး ပြည်တွင်းတွင် SKD စနစ်ဖြင့် တပ်ဆင်ထုတ်လုပ်နေ သည့် မော်တော်ကား ကုမ္ပဏီအများစုသည် အမေရိကန် ဒေါ်လာဈေးနှုန်း ကွာဟချက်များနှင့် လိုအပ်သည့် အစိတ် အပိုင်းတင်သွင်းရန် အစိုးရမှ ချမှတ်ထားသည့် တင်သွင်းခွင့် မူဝါဒများကြောင့် ဆက်လက် ထုတ်လုပ်ရန် ခက်ခဲနေ ပြီး ရပ်နားထားရသည်ကို တွေ့ရသည်။

သို့သော် စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနမှ ပါမစ်တချို့ကို ပြန်လည်ထုတ်ပေးမည်ဆိုပါက SKD ကားထုတ်လုပ်မှုများသည်လည်း ပြန်လည် လည်ပတ်လာနိုင်ကြောင်း ဦးမင်းမင်းမောင်က ပြောသည်။

Toyota ကားကုမ္ပဏီကိုတွေ့ရစဉ် (GETTY IMAGES)

ပြည်တွင်းတွင် SKD စနစ်ဖြင့် ထုတ်လုပ်တပ်ဆင်နေသည့် ကားအမျိုးအစားများမှ ဆူဇူကီး၊ ဟွန်ဒိုင်း၊ ဂျက်တော၊ နီဆန်း၊ KIA၊ Ford စသည့် ကားအမျိုးအစားများ ဖြစ်ပြီး ထုတ်လုပ်နေသည့် ကုမ္ပဏီ ၁၀ ခုကျော် ရှိကြောင်း သိရသည်။

ရန်ကုန်မော်တော်ကား ရောင်းဝယ်ရေးအသင်းဥက္ကဋ္ဌ ဦးအောင်သန်းဝင်းက “အခု လောလောဆယ် ကျနော်တို့က တော့ ပြီးခဲ့တဲ့ ၁ လကျော် လောက်ကစပြီးတော့ ငြိမ်သွားတာပေါ့နော် ကားဈေးကွက်က။ တော်တော်လေးကို ဈေး ကို ထိုးဆင်းသွားတာပေါ့နော်။ ထိုးဆင်းသွားတယ်ဆိုတာက ဒေါ်လာ ဈေး ၃၀၀၀ ကနေ ၄၀၀၀ နား ကပ်သွားတဲ့ အထိပေါ့နော်။ အဲဒီတုန်းက ကားဈေးက ကိုယ့်ပါးစပ်ထဲမှာ ကိုယ်ခေါ် ရင် ခေါ်သလိုမျိုး ရောင်းနေရတာဆိုတော့ အလုအယက်ကြီး ဝယ်နေကြတာ။

ကားတစ်စီးက ၁၅၀ တန်က ၃၀၀ လောက် ဖြစ်သွားတယ်။ တက်တုန်းက အတက်ကြမ်းသွားတယ်။ အတက်ကြမ်းသွားတဲ့ အခါကျတော့ စီးသမား တွေကလည်း အိမ်မှာစီးတဲ့ကားကို ထုတ် ရောင်းကြတယ်။ တချို့ကျတော့လည်း ငွေမပိုက်ရဲကြဘူး။ ရွှေဝယ်တာတို့ အဲဒါမျိုးလေးတွေ ဖြစ်ကြတာ၊ ကားဝယ် တာ။ အဲတော့ ကားအရောင်းအဝယ် လုပ်တဲ့သူကျတော့ အရင်းအနှီး ရှိပြီးသားလူ သိန်း ၅၀၀၀ ရှိတဲ့သူက ၃၀၀၀ လောက်ရင်းထား ၂၀၀၀ လောက် ချန်ထား ကားဈေးကွက်ထဲမှာ အကုန်လုံး အောပြီး ရင်းလိုက်တယ်။ ရင်းပြီး တော့ ဒီကားတွေ အကုန်လုံးက သူတို့လက်ထဲမှာ အရောင်းအဝယ် လုပ်ကြတယ်။ ဒါပေမယ့် လက်ရှိမှာ ကား အရောင်း အဝယ်မှာ ဝယ်ရောင်းတွေ အားလုံးက ပိုက်ဘောတွေ အကုန် မိကုန်ကြတာပဲ။

အဲတော့ မြတ်ထားတဲ့ ကားလေးတွေက ပြန်ပါသွားမှာပဲ။ ကားတစ်စီးကို ၅၀၊ ၁၀၀ လောက် အသာလေး မြတ်တယ်။ ဒါပေမယ့် အဲဒီ မြတ်တဲ့ဟာတွေက နောက်ပိုင်း ကားဈေးအကျမှာ အဲထက်ကို ပိုဆိုးသွား တယ်။ ဝယ်ရောင်းတွေ လက်ထဲမှာ ပိုက်ဘောမိသွားတာက ဝယ်ထားတဲ့ဈေးနဲ့ လောလောဆယ် ပြန်ရောင်းရမှာ နဲ့က ဒါပေမယ့် အခု ရောင်းလို့ ရ တယ်ဆိုပေမယ့် ရောင်းလို့ကို အဝယ်ကို မလာတော့တာ ဖြစ်သွားတော့ သူတို့ရ တဲ့ အမြတ်နဲ့ ရှုံးတဲ့အမြတ်နဲ့က ရှုံးတဲ့အမြတ်ကတောင် သာရင်သာသွားဦးမှာ အခုက” ဟု ပြောသည်။

ထို့အပြင် ဒေါ်လာလိုအပ်ချက်ကြောင့် ၂၀၂၁ ခုနှစ်၊ အောက်တိုဘာလ ကတည်းက ယာယီပိတ်ထားသည့် ပြည်ပမှ ကားတင်သွင်းခွင့် ပါမစ်များသည်လည်း လက်ရှိအချိန်ထိ ပြန်လည်ဖွင့်ပေးခြင်း မရှိသေးကြောင်း သိရသည်။

လက်ရှိ ကားဈေးကွက်သည် ဒေါ်လာဈေး အတက်အကျ ပေါ်တွင်သာ အပြောင်းအလဲဖြစ်နေပြီး SKD ထုတ်လုပ် ခြင်းနှင့် ပြည်ပမှ ကားတင်သွင်းခွင့် ပါမစ်များ ပြန်လည်ရရှိမှသာလျှင် အရောင်းအဝယ်များ သွက်လာမည် ဖြစ် ကြောင်း၊ ကားဈေးနှုန်းများသည်လည်း လှုပ်ခတ်လာမည် ဖြစ်ကြောင်း ကားမူဝါဒ ကျွမ်းကျင်သူများက သုံးသပ်နေ ကြသည်။

CNI News

၂၀၂၂ ခုနှစ်၊ အောက်တိုဘာ ၁၁

မြန်မာနိုင်ငံမှ တင်သွင်းနေသော မတ်ပဲ၊ ပဲစဉ်းငုံနှင့် ပဲမျိုးစုံ အပါအဝင် နယ်စပ်ကုန်သွယ်ရေး ကုန်စည်များကို ရူပီးငွေဖြင့် ပေးချေခွင့်ပြုရန် အိန္ဒိယဘက်မှ တောင်းဆိုလာကြောင်း အိန္ဒိယနယ်စပ်ကုန်သွယ်ရေး ကုန်သည်များ ထံမှ သိရသည်။

လက်ရှိတွင် ထိုကိစ္စနှင့် ပတ်သက်ပြီး ကမ်းလှမ်းလာသည့် သဘောသာ ရှိသေးကြောင်း၊ တရားဝင် လုပ်ဆောင်မည် ကို မသိရှိရသေးကြောင်း ဧရာကုန်သွယ်မှု ဗဟိုဌာနမှ တာဝန်ခံ ဦးနေဝင်းစိုးက CNI သတင်းဌာနသို့ ပြောသည်။

၎င်းက “လောလောဆယ် သူတို့ဘက်က ကမ်းလှမ်းလာတဲ့ သဘောပဲ ရှိသေးတယ်။ ဒါပေမယ့် နယ်စပ်မှာဖြစ်တဲ့ အတွက်ကြောင့်မို့လို့ နယ်စပ်မှာ သူတို့ချည်းပဲ မဟုတ်ဘူး။ ပဲကိစ္စတွေချည်းပဲ မဟုတ်ဘူး။ တခြားကိစ္စတွေမှာ လည်း ရူပီးနဲ့ တိုက်ရိုက် သွားမယ့်ဟာတွေ အကုန်လုံးပေါ့။ အဓိကကတော့ သူတို့ဘက်က တောင်းဆိုတာဗျ” ဟု ပြောသည်။

အိန္ဒိယဘက်ခြမ်း မိုရေးမှ မြန်မာဘက်ခြမ်း တမူးဘက်သို့အထွက်ဂိတ်ကိုတွေ့ရစဉ်

မြန်မာ - အိန္ဒိယ နယ်စပ်ကုန်သွယ်ရေးတွင် လက်ရှိ၌ ဒေါ်လာဖြင့်သာ ကုန်သွယ်မှု ပြုလုပ်နေကြောင်း၊ ပြီးခဲ့သည့် လများတွင် ရူပီးနှင့် ကျပ်ငွေ တိုက်ရိုက် ကုန်သွယ်ရန် ဗဟိုဘဏ်မှ ထုတ်ပြန်ခဲ့သော်လည်း နောက်ပိုင်းတွင် ဒေါ်လာ လိုအပ်ချက်ကြောင့် အိန္ဒိယသို့ အဓိက တင်ပို့နေသည့် ပဲမျိုးစုံကို ဒေါ်လာဖြင့် ကုန်သွယ်စေခဲ့ကြောင်း သိရသည်။

လက်ရှိ မြန်မာ - အိန္ဒိယ နယ်စပ်ကုန်သွယ်ရေးတွင် ရူပီးဖြင့် ပေးချေမည်ဆိုပါက ဘဏ်နှုန်းများသည် ပြင်ပတွင် ဖြစ်ပေါ်နေသည့် ဈေးကွက်ပေါက်ဈေးဖြင့် ကွာခြားမှု နည်းရန် လိုအပ်သည်ဟု ပဲကုန်သည်တစ်ဦးက ပြောသည်။

၎င်းက “သူတို့ ရူပီးနဲ့ ပေးချေမယ်ဆိုရင် မြန်မာပြည်တွင်းက ဘဏ်မှာ သူတို့အိန္ဒိယကနေ ငွေပေးချေဖို့ အတွက်ကို အိန္ဒိယနဲ့ ချိတ်ဆက်ထားတဲ့ဘဏ် ကျနော်တို့ဘက်မှာ ရှိရမယ်လေ။ အဲဒီဘဏ်ရဲ့ သတ်မှတ်တဲ့ ရူပီးနဲ့ မြန်မာကျပ် ငွေနဲ့ လဲလှယ်တဲ့ နှုန်းထားသည် တကယ့် အပြင်မှာရှိတဲ့ ပေါက်ဈေးနဲ့ ဘဏ်ပေါက်ဈေးနဲ့ ဘဏ်က သတ်မှတ်ထား တဲ့ ဈေးနဲ့ ကွာဟချက် နည်းနိုင်သမျှ နည်းဖို့လိုတယ်ဗျ။ အဲတော့ တင်ပို့တဲ့ တင်သွင်းတဲ့ကိစ္စတွေမှာ ကျနော်တို့ တစ်ဖက်ကပို့သလို ဟိုဘက်ကနေ အဝယ်လည်း ရှိတာပဲ။ အဲတော့ ဒီကိစ္စတွေကို ကျနော်တို့ ဒေါ်လာနဲ့ ဝယ်နေ စရာ မလိုတော့ဘူးပေါ့။ အဲဒီအတွက် ကုန်သွယ်ရေးတော့ Trade ပိုင်းဆိုင်ရာတော့ ပိုပြီးတော့ တက်လာနိုင်ပါ တယ်” ဟု CNI သတင်းဌာနသို့ ပြောသည်။

အိန္ဒိယနဲ့ မြန်မာ ဖြတ်သန်းသွားလာသော တံခါးကိုတွေ့ရစဉ်

မြန်မာနိုင်ငံ စိုက်ပျိုးမြေ ဧရိယာ၏ ၂၀ ရာခိုင်နှုန်းသည် ပဲမျိုးစုံကို စိုက်ပျိုးကြပြီး ၇၂ ရာခိုင်နှုန်းသည် မတ်ပဲ၊ ပဲတီ စိမ်း၊ ပဲစဉ်းငုံ အများဆုံးဖြစ်ကြောင်း သိရသည်။

မြန်မာနိုင်ငံမှ ပြည်ပသို့ ပဲတင်ပို့မှု အနေဖြင့် ၂၀၂၂ - ၂၀၂၃ ဘဏ္ဍာနှစ် ဧပြီလ ၁ ရက်နေ့မှ စက်တင်ဘာလ ၂၃ ရက် နေ့အထိ ပင်လယ်ရေကြောင်းမှ တန်ချိန် ၆ သိန်းကျော် အမေရိကန်ဒေါ်လာ ၅၁၇ သန်းရှိကြောင်း၊ နယ်စပ်မှ တန်ချိန် ၁၄၀၀၀၀ ကျော် အမေရိကန်ဒေါ်လာ ၆၁၄ သန်းကျော် တင်ပို့ထားနိုင်ခဲ့ကြောင်း စီးပွားရေးနှင့် ကူးသန်း ရောင်းဝယ်ရေးဝန်ကြီးဌာန၏ စာရင်းများအရ သိရသည်။

သီတင်းကျွတ်ရုံးပိတ်ရက် ခရီးသွားလာမှု ပုံမှန်ထက် ၁ ဆခန့်မြင့်တက်

CNI News

၂၀၂၂ ခုနှစ်၊ အောက်တိုဘာ ၇

ယခုနှစ် သီတင်းကျွတ် ရုံးပိတ်ရက်အတွင်း ခရီးသွားလာမှု များပြားလာပြီး သီတင်းကျွတ်မတိုင်ခင် ပုံမှန်နေ့ များထက် ၁ ဆခန့် မြင့်တက်လာကြောင်း အောင်မင်္ဂလာအဝေးပြေးကားဝင်းရှိ ကားဂိတ်များထံမှ သိရသည်။

ပုံမှန်အချိန်တွင် တစ်နေ့လျှင် ခရီးသည် ဦးရေသည် ၂၀ ဦးခန့်သာ ရရှိသော်လည်း လက်ရှိတွင် ကားတစ်စီးအပြည့် ရရှိသည်ဟု အောင်မင်္ဂလာအဝေးပြေးကားဝင်းရှိ Crown ကားဂိတ်မှ ဂိတ်မှူးတစ်ဦးက CNI သတင်းဌာနသို့ ပြောသည်။

“များတယ်။ များတော့များတယ်။ အရမ်းကြီး လျှံနေတာပေါ့။ အရင်က တစ်စီးပေါ့ကွာ၊ အရင်တုန်းက တစ်စီး ထွက်မယ်ပေါ့။ တစ်လိုင်းကို ကားတစ်စီးထွက်မယ်ဆိုရင် ပုံမှန်ပါနေကျ ခရီးသည်က ၁၉ ယောက် ပါမှ အယောက် ၂၀၊ ၂၀ ကျော်ပေါ့။ ဒီလိုရက်မျိုးဆို တစ်နေ့ကို တစ်စီးတော့ ပြည့်အောင် ရတာပေါ့ အယောက် ၄၀ ကျော်ပေါ့။ ဒါပေမယ့် ၂ စီး၊ ၃ စီးမျိုး ထွက်လောက်အောင်ထိတော့ ဒါပေမယ့် အရင်တုန်းက ပုံမှန် ၁ စီး ပုံမှန်ပြည့်နေတဲ့ ဂိတ်မျိုးဆိုရင်တော့ ၂ စီးလောက် ၁ ဆလောက် တက်လာတာပေါ့” ဟု ၎င်းက ပြောသည်။

သီတင်းကျွတ် ရုံးပိတ်ရက်အတွင်း ကားလက်မှတ်ခများကို တိုးမြှင့်ကောက်ယူခြင်း မပြုရန် ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ YRTC က ထုတ်ပြန်ထားလျက်ရှိသည်။

ခရီးသည်တင် အဝေးပြေးယာဉ်လိုင်းများအနေဖြင့် တိုးကောက်ခြင်းမရှိသော်လည်း ခရီးသွားလက်မှတ်ရောင်းသည့် အေဂျင်စီတချို့နှင့် ပွဲစားများက တိုးမြှင့်ကောက်ယူမှုများ ရှိနိုင်ကြောင်း Crown ဂိတ်မှူးက ပြောသည်။

အောင်မင်္ဂလာကားကြီးဝန်း ဝင်ပေါက် (ဓါတ်ပုံ-CNI/ပုံဟောင်း)

ဒါ့အပြင် တချို့သော ကားဂိတ်များသည် သီတင်းကျွတ် ရုံးပိတ်ရက်ဖြစ်သော အောက်တိုဘာ ၆ ရက်နေ့မှစ၍ ၉ ရက်နေ့အထိ ကားလက်မှတ်များသည် ရောင်း၍ ကုန်သွားပြီဟုလည်း သိရသည်။

JJ Express မှ မန်နေဂျာ မကျော့ကျော့သက်က “ပြီးခဲ့တဲ့လကတော့ မိုးတွင်းဆိုတော့ သိပ်မသွားဘူးလေ။ အခု ကတော့ သီတင်းကျွတ်တော့ သီတင်းကျွတ်ကာလဆိုတော့ တချို့ကျတော့လည်း ပိတ်ရက်ပြန်ကြမယ်၊ နယ်ပြန် ကြမယ်ဆိုတာမျိုး ရှိတယ်လေ။ ရှိတော့ မဆိုးပါဘူး။ ပြီးခဲ့တဲ့လထက် ဒီလကတော့ တက်လာတာပေါ့။ ဒါပေမယ့် အခုက အစပဲ ရှိပါတယ်။ သေချာတော့ အတိအကျတော့ မပြောနိုင်သေးဘူး။ ဒီ တစ်ရက်၊ နှစ်ရက်ကိုပဲ ဒီ ၅ ရက်၊ ၆ ရက်၊ ၇ ရက်လောက်က စတက်လာတာပေါ့လေ။ ခရီးသွားလေးတွေတော့ မဆိုးတော့ မဆိုးပါဘူး။ ၅ ရက်၊ ၆ ရက်၊ ၇ ရက်၊ ၈ ရက်၊ ၉ ရက်ဆိုရင် လက်မှတ်က မရှိတော့ဘူး အဲလိုမျိုး တက်တော့ တက်လာကြတာပေါ့” ဟု CNI သတင်းဌာနသို့ ပြောသည်။

သီတင်းကျွတ်ပိတ်ရက်အတွက် ကားလက်မှတ်များ ဝယ်ယူရာ၌ လက်ရှိတွင် ဝယ်ယူရလွယ်ကူကြောင်း တောင်ကြီးသို့ သွားရောက်မည့် ကိုထွန်းမင်းက ပြောသည်။

“ကားလတ်မှတ်ကတော့ အရမ်းကြီး အခက်အခဲတော့ မရှိပါဘူး။ ကျနော်တို့က အဖွဲ့လိုက် စုပြီးတော့ မှာကြတာ အဲလောက်ပါပဲ။ အဆင်ပြေပါတယ်။ ပြင်ဦးလွင် - တောင်ကြီးဆိုရင်တော့ ၃ သောင်းလောက်ရှိတယ်” ဟု ပြော သည်။

ကိုဗစ်ကာလအတွင်း ခရီးသွားလာမှု နည်းပါးသွားပြီး ခရီးသည်တင်ကားများအနေဖြင့် ကုန်စည်များကိုသာ အဓိကထား သယ်ယူပို့ဆောင်နေရကြောင်း၊ ယခု သီတင်းကျွတ် ပိတ်ရက်ကြောင့် ခရီးသည်သွားလာမှု ပြန်လည်မြင့်တက်လာသည့်အတွက် ကုန်လက်ခံမှုများကို လျှော့ချနေရသည်ဟု ကားဂိတ်တချို့ထံမှ သိရသည်။

CNI News

၂၀၂၂ ခုနှစ်၊ အောက်တိုဘာ ၆

ဆန်စပါးသီးနှံ စိုက်ပျိုးရေးအတွက် ငွေကျပ် ၁၄၀ ဘီလီယံအထိ ထောက်ပံ့ပေးအပ်သွားရန် စီစဉ်ထားကြောင်း နစကဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ၂၀၂၂ ခုနှစ်၊ အောက်တိုဘာ ၆ ရက်တွင် ပြောသည်။

အောက်တိုဘာ ၆ ရက်နေ့က နေပြည်တော်မှာ ကျင်းပသည့် မြန်မာ့ဆန်စပါးညီလာခံ-၂၀၂၂ အခမ်းအနားမှာ ၎င်းက အထက်ပါ အတိုင်း ပြောသွားခဲ့ခြင်း ဖြစ်သည်။

နစကဥက္ကဋ္ဌက “ မကြာမီ ရောက်ရှိတော့မည့် နွေစပါးရာသီအတွက် ဧက ၈ ဒသမ ၅ သိန်းတွင် အကျိုးတူ လယ်ယာစနစ်(Contract farming)ဆောင်ရွက်ရန်အတွက် နိုင်ငံတော်က တစ်ဧကကို ကျပ် ၂ သိန်းနှုန်းဖြင့် အထူးချေးငွေ စီစဉ်ပေးမည်ဖြစ်ပြီး ဆန်စပါးသီးနှံအတွက် ငွေကျပ် ၁၄၀ ဘီလီယံအထိ ထောက်ပံ့ပေးအပ်သွား ရန် စီစဉ်ပေးထားပါကြောင်း၊ အဆိုပါ ထောက်ပံ့မှုများသည် မျိုး၊ မြေသြဇာ စသည့် သွင်းအားစုအတွက် ထောက် ပံ့မှုဖြစ်ပြီး သက်ဆိုက်သူအားလုံးက အကျိုးရှီစေရေး စနစ်တကျပူးပေါင်း ဆောင်ရွက်ရန်လိုအပ်ပါတယ်”ဟု ပြောသည်။

၂၀၂၂ ခုနှစ်၊ အောက်တိုဘာ ၆ ရက်က မြန်မာ့ဆန်စပါးညီလာခံ-၂၀၂၂ အခမ်းအနားကို တွေ့ရစဉ်

နစက အနေဖြင့် တိုင်းပြည်သာယာဝပြောရေးနှင့် စားနပ်ရိက္ခာဖူလုံရေးဆိုသည့် အမျိုးသားရေးလုပ်ငန်းစဉ် (၂)ရပ်ကို ချမှတ်ဆောင်ရွက်လျက်ရှိကြောင်း၊ မိမိတို့နိုင်ငံ၏ လူဦးရေ ၇၀ ရာခိုင်နှုန်းသည် လယ်ယာလုပ်ငန်းဖြင့် အသက်မွေးဝမ်းကျောင်းပြုနေကြပြီး စိုက်ပျိုးမွေးမြူရေးကိုအခြေခံ၍ နိုင်ငံ့စီးပွားရေး ဖွံ့ဖြိုးတိုးတက်အောင် ဆောင်ရွက်နေကြောင်း၊ ဆန်စပါးသည် အဓိကစိုက်ပျိုးထုတ်လုပ်သည့် သီးနှံဖြစ်ပြီး သီးနှံစိုက်ပျိုး ဧရိယာ အားလုံး၏ ၃၄ ရာခိုင်နှုန်းခန့်ရှိကြောင်း ၎င်းက ပြောသည်။

ထို့နောက် ၂၀၂၀-၂၀၂၁ ခုနှစ်တွင် စုစုပေါင်း စပါးစိုက်ပျိုးဧက ၁၇ သန်းခန့် စိုက်ပျိုးနိုင်ခဲ့ပြီး ၂၀၂၁-၂၀၂၂ ခုနှစ် တွင် မိုးစပါးစိုက်ဧက ၁၅ သန်းခန့်နှင့်နွေစပါးစိုက်ဧက ၂ ဒသမ ၄ သန်း စုစုပေါင်း စပါးစိုက်ပျိုးဧက ၁၇ ဒသမ ၄ သန်းခန့် စိုက်ပျိုးနိုင်ခဲ့ကြောင်း သိရသည်။

မြန်မာ့ဆန်ကို အာဖရိကနှင့် ဥရောပနိုင်ငံများ တင်ပို့ရောင်းချနိုင်ခဲ့ပြီး ဘင်္ဂလားဒေ့ရှ်နိုင်ငံသို့ တတိယအကြိမ် အဖြစ် ဆန်တန်ချိန် ၂ သိန်း ရောင်းချနိုင်ရန် ဆောင်ရွက်လျက်ရှိကြောင်း၊ တန်းမြင့်ဆန်တချို့ကို အာဖရိက နိုင်ငံသာမက တရုတ်နိုင်ငံကိုပါ တိုးမြှင့်တင်ပို့နိုင်ရန် ဆောင်ရွက်လျက်ရှိကြောင်း နစကဥက္ကဋ္ဌက ပြောသည်။

မြန်မာနိုင်ငံသည် ပြည်ပသို့ ၂၀၂၂-၂၀၂၃ ဘဏ္ဍာနှစ် ၆ လတာကာလအတွင်း ဆန်တန်ချိန် ၅ သိန်းကျော်နှင့် ဆန်ကွဲတန်ချိန် ၃ ဒသမ ၆ သိန်း စုစုပေါင်း တန်ချိန် ၈ ဒသမ ၆ သိန်းကျော်ကို နိုင်ငံ ၃၈ နိုင်ငံသို့ တင်ပို့နိုင်ခဲ့ ကြောင်း၊ ယခင်နှစ်ကာလတူထက် ဆန်၊ ဆန်ကွဲ တန်ချိန် ၂ သိန်းကျော် ပိုမိုတင်ပို့နိုင်ခဲ့ကြောင်း နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က ပြောသည်။

လက်ရှိ မြန်မာနိုင်ငံမှ တောင်သူများသည် သွင်းအားစုများဖြစ်သည့် မျိုး၊ မြေသြဇာ၊ စက်သုံးဆီ ဈေးနှုန်းမြင့်မား ခြင်းနှင့် ဝယ်ယူရ ခက်ခဲခြင်းတို့ကြောင့် စိုက်ပျိုးရေးလုပ်ငန်းများ စိုက်ဧကများ လျော့ကျလာနေကြောင်း ပြောသည်။

CNI News

၂၀၂၂ ခုနှစ်၊ အောက်တိုဘာ ၅

ရခိုင်ပြည်နယ်၊ သံတွဲမြို့နယ် ငပလီကမ်းခြေတွင် ဆောင်းဦးပွဲတော်ကို နိုဝင်ဘာလတွင် ကျင်းပရန် စီစဉ်နေ ကြောင်း ရခိုင်ပြည်နယ် ဟိုတယ်နှင့် ခရီးသွားလာရေး ဝန်ကြီးဌာနထံမှ သိရသည်။

ဆောင်းဦးပွဲတော်သို့ လာရောက်မည့် ခရီးသည်များကို ဝန်ဆောင်မှု ပေးနိုင်ရန်အတွက် လက်ရှိတွင် ငပလီရှိ ဟိုတယ်များ ကြိုတင်ပြင်ဆင်မှုများ လုပ်ဆောင်နေပြီဖြစ်ကြောင်း ရခိုင်ပြည်နယ် ဟိုတယ်နှင့်ခရီးသွား ညွှန်ကြားမှု ဦးစီးဌာန ညွှန်ကြားရေးမှူး ဦးတင်ထွန်းအောင်က CNI သတင်းဌာနသို့ ပြောသည်။

ဦးတင်ထွန်းအောင်က “လုပ်ဖို့တော့ စီစဉ်နေတယ်။ လုပ်ဖြစ်ရင်တော့ ပြီးခဲ့တဲ့နှစ်ကလိုပဲ နိုဝင်ဘာလထဲမှာ ဖြစ် မယ်ထင်တယ်။ ပြီးခဲ့တဲ့ နှစ်မှာတော့ နိုဝင်ဘာလ ၁၄ ရက်နေ့မှာ လုပ်တယ်။ ဒီနှစ်လည်း အဲဒီလောက်ပဲ ဖြစ်မယ်။ အောက်တိုဘာကျတော့ မိုးမကုန်သေးဘူးလေ မိုးမလွတ်သေးဘူးပေါ့။ လောလောဆယ် ငပလီကတော့ ခါတိုင်း လည်း ဧည့်သည်အများဆုံးလာတဲ့ အရပ်ဒေသဆိုတော့ ဒီမှာရှိတဲ့ ဟိုတယ်တွေလည်း ဧည့်သည်တွေ လာဖို့အတွက် ကြိုတင်ပြင်ဆင်နေကြတာပေါ့။ သူတို့ မိုးတွင်းက ပိတ်ထားခဲ့တဲ့ဟာတွေ၊ မိုးတွင်းမှာ ဧည့်သည် လက်ခံတာနည်း တော့ အခု ပွင့်လင်းရာသီမှာ ဧည့်သည်လက်ခံဖို့ ပြင်ဆင်နေကြတာပေါ့” ဟု ပြောသည်။

သဲပုံ စေတီကိုတွေ့ရစဉ်

ဆောင်းဦးပွဲတော်ကို ၂၀၁၉ ခုနှစ်မှစ၍ ကျင်းပလာခြင်းဖြစ်ပြီး ၅ ရက်တိုင်တိုင် ကျင်းပလေ့ရှိကြောင်း၊ ပွဲတော်ရက် အတွင်း ဈေးရောင်းပွဲတော်၊ ရခိုင်ရိုးရာဂျင်၊ ဘော်လီဘော၊ စက်ဘီစီးပြိုင်ခြင်း၊ အပြေးပြိုင်ခြင်း၊ ချောတိုင်တက် ခြင်း၊ လွန်ဆွဲပွဲနှင့် သဲပုံစေတီပွဲတော်တို့ ပါဝင်ကြောင်း သိရသည်။

ငပလီကမ်းခြေဒေသသို့ ခရီးသွား ဧည့်သည်များ လာရောက်တည်းခိုရာတွင် ကျန်းမာရေးနှင့် ဘေးကင်းလုံခြုံမှုရှိ သော ဝန်ဆောင်မှု ကောင်းများပေးရန် လိုအပ်သည့်အတွက် သက်ဆိုင်ရာ တာဝန်ရှိသူများနှင့် ဆောင်ရွက်လျက်ရှိ ကြောင်း ဟိုတယ်နှင့် ခရီးသွားဝန်ကြီးဌာနထံမှ သိရသည်။

ငပလီကမ်းခြေဒေသသည် နယ်မြေတည်ငြိမ်မှု ရှိသော်လည်း လက်ရှိ ရခိုင်ပြည်နယ်ရှိ တချို့သော ဒေသများသည် တိုက်ပွဲများ ဖြစ်ပေါ်နေသည့်အတွက် ငပလီသို့ လာရောက်မည့် ပြည်တွင်း/ပြည်ပ ခရီးသွားများ ဘေးကင်းလုံခြုံ ရေး လိုအပ်ကြောင်း Myanmar Voyages International Tourism မန်းနေဂျင်းဒါရိုက်တာ ဦးသက်လွင်တိုးက ပြောသည်။

သဲပုံ ငါးကို တွေ့ရစဉ်

၎င်းက “လုံခြုံရေးကတော့ ပြောရခက်ပါတယ်။ ဘာလို့လဲဆို ရခိုင်နယ်မြေကတော့ အဖြူရောင်နယ်မြေ မဟုတ် တာတော့ သေချာတယ်။ ဒါပေမယ့် ငပလီကတော့ သီးခြားလို ဖြစ်နေတယ်လေ။ မြောက်ပိုင်းနဲ့ မတူဘူးပေါ့။

မတူ တော့ ဖြစ်စဉ်တွေ ဘာတွေလည်း သိပ်မရှိဘူးပေါ့လေ။ ရှိတော့ရှိတယ်ဆိုရင်လည်း ဆိုးဆိုးဝါးဝါး မရှိခဲ့ဘူးပေါ့နော်။ ဒါပေမယ့် ဘာမှ အစိုးမရပါဘူး။ အထူးသဖြင့်တော့ ပြည်တွင်း ခရီးသွားတွေလည်း သတိထားရမှာဖြစ်သလို ပြည်ပ ကလာတဲ့ ဧည့်သည်တွေ တစ်ခုခုမဖြစ်ဖို့ အရေးကြီးတယ်။ ဘယ်လိုအကြောင်းကြောင့်နဲ့မှ တစ်ခုခု ဖြစ်သွားပြီဆို ရင် ကိုယ့်တိုင်းပြည်ရဲ့ Image က ပျက်သွားပြီ။ အဲဒါတွေ မဖြစ်ဖို့အတွက် အားလုံး သတိတရားရှိရှိနဲ့ လုပ်ကြဖို့ တော့ ကျနော်တို့ကတော့ လိုလားတယ်” ဟု CNI သတင်းဌာနသို့ ပြောသည်။

ပြီးခဲ့သည့်နှစ် ငပလီ ဆောင်းဦးပွဲတော်သို့ လာရောက်သည့် ခရီးသွားပြည်သူ များပြားခဲ့သော်လည်း ယခုနှစ်တွင် ယခင်နှစ်များအတိုင်း များပြားရန်ကို မျှော်လင့်ထားကြောင်း ခရီးသွားလုပ်ငန်း လုပ်ကိုင်သူများ မျှော်မှန်းနေကြ သည်။

CNI News

၂၀၂၂ ခုနှစ်၊ အောက်တိုဘာ ၅

ပြည်ပရောက် မြန်မာအလုပ်သမားများအနေဖြင့် အိမ်ပြန်ပို့ရမည့် မိသားစုလွှဲပို့ငွေသည် နိုင်ငံအတွက်သာမကဘဲ အဆိုပါ ရွှေ့ပြောင်းလုပ်သားများအတွက်ပါ အကျိုးရှိကြောင်း အလုပ်သမားဝန်ကြီးဌာနမှ အမြဲတမ်းအတွင်းဝန် ဦးညွန့်ဝင်းက CNI သတင်းဌာနသို့ ပြောသည်။

ပြည်ပရောက် မြန်မာအလုပ်သမားများအနေဖြင့် မိသားစုလွှဲပို့ငွေအား သတ်မှတ်ထားသည့် ဘဏ်များမှ လွှဲပို့ပြီး ထိုလွှဲပို့ထားသည့် အထောက်အထားများကို ပြသပါက အခွန်ကင်းလွတ်ခွင့်ရနိုင်သည့် အနေအထားများရှိကြောင်း ၎င်းက CNI သို့ပြောသည်။

“ပြောချင်တာက နိုင်ငံခြားကနေ မိသားစုလွှဲပို့ငွေဟာ အလိုအလျောက် ငွေဖြူဖြစ်သွားတာဖြစ်ပါတယ်။ ငွေဖြူ ဖြစ်သွားတာ ဖြစ်တဲ့အတွက် သူ့ရဲ့တစ်ချိန်ချိန်မှာ ဒီငွေလွှဲတဲ့ အထောက်အထားတွေကို စုဆောင်းထားပြီးတော့ ကိုယ့်နိုင်ငံအတွင်းမှာ အခြေပစ္စည်းတွေ ဝယ်မယ်ဟေ့ဆိုရင် ဒါအခွန်ကင်းလွတ်ခွင့် ရနိုင်တဲ့အနေအထားတွေ ရှိတယ်။ အဲဒီလို အထောက်အထားမပြဘဲနဲ့ ကိုယ့်နိုင်ငံရောက်တော့မှ အထူးသဖြင့် တရားမဝင် ဟွန်ဒီနဲ့ လွှဲထားတဲ့ ငွေတွေနဲ့ ဝယ်မယ်ဆိုရင်တော့ အခွန်ကိစ္စက နောက်က လိုက်လာမှာပေါ့။ အပြင်အမြင်ကတော့ နိုင်ငံခြားငွေ တအားလိုချင်လို့ ဘာဖြစ်တယ် ညာဖြစ်တယ် မျိုးစုံပြောကြမှာပေါ့။ ဒါပေမယ့် တစ်ဖက်ကပြန်ကြည့်ရင် နိုင်ငံတော်အတွက်လည်း အကျိုးရှိသလို ပြည်ပမှာသွားပြီး လုပ်နေတဲ့ ရွှေ့ပြောင်းလုပ်သားအတွက်ရော ဒါ သူ့ အတွက် အင်မတန်မှအကျိုးရှိတဲ့ ကိစ္စဖြစ်တယ်။ ပြောချင်တာက ကုသိုလ်လည်းရ ဝမ်းလည်းဝဖြစ်တယ်။ နိုင်ငံတော်ကိုလည်း သူအထောက်အကူဖြစ်တဲ့ နိုင်ငံသားဖြစ်ကြောင်း ဂုဏ်ယူလို့ရတယ်။ ကိုယ့်ရဲ့ဝင်ငွေကို ကိုယ်ပြည်တွင်းကို ပြန်လာတဲ့အခါမှာ အခြေပစ္စည်းတွေပေါ့ ကားတို့၊ အိမ်တို့၊ တိုက်ခန်းတို့၊ အိမ်ရာတို့ ဝယ်မယ် ဆိုရင် ဒီလိုဟာတွေမှာ သူ့အတွက် ခိုင်မာတဲ့ငွေရေးကြေးရေးဆိုင်ရာ ခုနကပြောတဲ့ အထောက်အထားတွေ ဒါသူ့အတွက် ပြန်အကျိုးရှိစေမှာဖြစ်ပါတယ်” ဟု အလုပ်သမားဝန်ကြီးဌာနမှ အမြဲတမ်းအတွင်းဝန် ဦးညွန့်ဝင်းက ပြောသည်။

ငါးလုပ်ငန်းခွင်တစ်ခုကို တွေ့ရစဉ်

ထိုသို့ မိသားစုလွှဲပို့ငွေအား သတ်မှတ်၍ လွှဲခိုင်းမည်ဆိုပါက နိုင်ငံတော်စီမံအုပ်ချုပ်ရေးကောင်စီ နစက အနေဖြင့် ပြည်သူများ ယုံကြည်အောင် ဦးစွာလုပ်ဆောင်သင့်ကြောင်း ထိုင်းနိုင်ငံတွင် အလုပ်လုပ်ကိုင်နေသည့် ကိုမိုးလေးက CNI သတင်းဌာနသို့ ပြောသည်။

“ဒါကတော့ ပွင့်ပွင့်လင်းလင်းပြောရင် ယုံကြည်မှုမရှိပါဘူး။ ဒီစနစ်တွေနဲ့ကျတော့ နိုင်ငံကို ပြည်သူတွေ ယုံကြည် အောင် ဆွဲတင်ရမှာ ဒီအစိုးရပေါ့နော်။ ပြည်သူတွေယုံကြည်အောင် ဆွဲတင်မှ ပြည်သူတွေကလည်း ဟိုဟာဖြစ်မှာ ပေါ့။ ခုချိန်မှာ ယုံကြည်မှုက ဘာတစ်ခုမှမရှိဘူး။ ကျနော့်ကို အခုချိန် မြန်မာပြည်ကို ငွေလွှဲပို့ချင်လားဆိုရင် ယုံကြည်တဲ့ အစိုးရရှိရင်တော့ လွှဲချင်တယ်။ အခုလက်ရှိလွှဲနေတဲ့အချိန်မှာ မြန်မာမှတ်ပုံတင်တောင်းတယ်။ ဘယ်ရပ်၊ ဘယ်ရွာ ဘယ်သူ့ဆီလွှဲတယ်။ သူတို့သေချာစုံစမ်းတာပေါ့နော်။ ဒီ wave money သော်လည်းကောင်း ဘယ်လိုပဲလွှဲလွှဲ ဟိုတုန်းကဆို ကိုယ့်ဘာသာဖြစ်သလိုလွှဲလို့ရတယ်။ ဝန်ဆောင်ခဆိုလည်း ဟိုတုန်းကဆို ဈေး သက်သာတယ်။ အခုဆိုရင် သူတို့ နည်းစနစ်တွေများလာတယ်။ ဘဏ်ထဲသော်လည်းကောင်း wave money ထဲသော်လည်းကောင်း ကုန်ကျစရိတ်ပိုများလာတယ်။ ပိုပြီးသက်သာလာတာမဟုတ်ဘူး” ဟု ၎င်းကပြောသည်။
လက်ရှိတွင် ပြည်ပနိုင်ငံများသို့ သွားရောက်အလုပ်လုပ်ကိုင်နေသည့် မြန်မာများအား အိမ်ပြန်ပို့ရမည့် မိသားစု လွှဲပို့ငွေ ပမာဏကို သတ်မှတ်ရန် ဆွေးနွေးလုပ်ဆောင်နေပြီး မည်သည့်ပုံစံဖြင့် သတ်မှတ်ဆောင်ရွက်သွားမည်ကို မသိရှိရသေးကြောင်း သိရသည်။

ပြည်ပနိုင်ငံများတွင် သွားရောက်အလုပ်လုပ်ကိုင်နေသည့် မြန်မာများသည် ပြည်တွင်းသို့ ငွေလွှဲပို့ရာ၌ ဘဏ်များမှ တဆင့် လွှဲပို့ခြင်းမှာ နည်းပါးပြီး ပြင်ပငွေလွှဲဝန်ဆောင်မှုလုပ်ငန်းများမှ လွှဲပို့ခြင်းမှာ များပြားလျက်ရှိသည်။

မြန်မာငွေကြေးနှင့် ဒေါ်လာ

အလုပ်သမားဝန်ကြီးဌာနမှ အမြဲတမ်းအတွင်းဝန် ဦးညွန့်ဝင်းက “မိသားစုလွှဲပို့ငွေဆိုတာ မြန်မာနိုင်ငံကအခုမှ ထလုပ်တော့ ထူးဆန်းနေသလိုဖြစ်နေတာ။ နိုင်ငံရဲ့ စီးပွားရေးဖွံ့ဖြိုးမှုကိုလည်း တစ်ထောင့်တစ်နေရာကနေ ဒါအထောက်အကူပြုတဲ့ကိစ္စတွေဖြစ်တယ်။ ပြီးရင် စိတ်ချလုံခြုံမှုရှိတယ်။
လောလောဆယ် ဟွန်ဒီလုပ်ငန်းနဲ့ တကျဖြစ်နေတဲ့အလုပ်သမားတွေကတော့ ဘဏ်ကိုသွားရမှာ ခက်တယ်။ ဘဏ်တွေက အိမ်အထိ လိုက်မပို့နိုင်ဘူး။ ဒီမှာကတော့ အလုပ်ခွင်ထဲအထိ လာပြီးတော့ ဒါလေးပြောလိုက်တာနဲ့ အိမ်ကို ငွေရောက်သွားတယ် ဆိုတော့။ အလွယ်လုပ်နေတဲ့အခါကျတော့ ဟွန်ဒီလုပ်ငန်းတွေက အားကောင်းနေဆဲပဲ ဖြစ်တယ်။ ဒီလုပ်ငန်းတွေနဲ့ အကျိူး ဖြစ်နေတဲ့ အထူးသဖြင့် ဟွန်ဒီလုပ်ငန်းတွေကတော့ ဒါမျိုးဖြစ်သွားမှာ အရမ်းစိုးရိမ်တာပေါ့။ သူတို့က ဒီ ဈေးကွက် ကြီးထဲမှာ နှစ်ပေါင်းများစွာကြီးစိုးပြီးတော့ အကျိုးအမြတ်တွေ အရမ်းကိုရနေတာ။ ကြီးမားစွာရနေတဲ့ အဖွဲ့တွေ ကတော့ ဒီလို အစိုးရက တရားဝင်လုပ်လာမယ့် အခြေအနေမျိုးကို သူတို့ကတော့ ဘယ်လိုလားမလဲ” ဟု ပြောသည်။

အဆိုပါ ကိစ္စရပ်နှင့်ပတ်သက်၍ ပြည်ပနိုင်ငံတွင် သွားရောက်လုပ်ကိုင်သည့် မြန်မာများအား နည်းလမ်းမျိုးစုံဖြင့် အသိပညာပေးခြင်းများ ဆောင်ရွက်သွားမည်ဖြစ်ကြောင်း သိရသည်။

မိသားစုလွှဲပို့ငွေအားသတ်မှတ်မည့်အထဲတွင် ပြည်ပနိုင်ငံသို့ အေဂျင်စီဖြင့်သော်လည်း မိမိအစီအစဉ်ဖြင့်သော် လည်းကောင်း သွားရောက်လုပ်ကိုင်နေသည့် မြန်မာများအားလုံး လွှမ်းခြုံနိုင်ရန်အတွက် လုပ်ဆောင်မည် ဖြစ် ကြောင်းလည်း သိရသည်။

လက်ရှိတွင် မြန်မာနိုင်ငံမှ လူငယ် လူရွယ်အများအပြားသည် ထိုင်း၊ မလေးရှား၊ ဂျပန်၊ တောင်ကိုရီးယား၊ စင်ကာပူ၊ ဒူဘိုင်း စသည့်နိုင်ငံများတွင် အများအပြားသွားရောက် အလုပ်လုပ်ကိုင်လျက်ရှိသည်။

CNI News

၂၀၂၂ ခုနှစ်၊ အောက်တိုဘာ ၄

မြန်မာ့ပင်လယ်ပြင် ရေပိုင်နက် ငါးဖမ်းဆီးမှုများတွင် နည်းပညာပူးပေါင်း၍ ရုရှားသင်္ဘောများဖြင့် ဆောင်ရွက်ရန် လုပ်ဆောင်နေကြောင်း မြန်မာနိုင်ငံ ငါးလုပ်ငန်းအဖွဲ့ချုပ်ထံမှ သိရသည်။

လက်ရှိ မြန်မာနိုင်ငံမှ ငါးဖမ်းသင်္ဘောများသည် မီတာ ၂၀၀ အထိသာ ဖမ်းဆီးနိုင်ခြင်းကြောင့် မီတာ ၁၅၀၀ မှ ၂၅၀၀ အထိ ဖမ်းဆီးနိုင်သော ရုရှားငါးဖမ်းသင်္ဘော၏ နည်းပညာကို အသုံးပြုနိုင်ရေး ဆွေးနွေးလျက်ရှိနေကြောင်း မြန်မာနိုင်ငံ ငါးလုပ်ငန်းအဖွဲ့ချုပ် ဒုတိယဥက္ကဋ္ဌ ဒေါ်တိုးနန္ဒာတင်က CNI သတင်းဌာနသို့ ပြောသည်။

၎င်းက “ဒီမှာကတော့ အဓိကကတော့ ရေနက် ငါးဖမ်းတဲ့စနစ်ပေါ့နော်။ ရေနက်ဆိုတာက အခု ဆရာမကြီးတို့ နိုင်ငံမှာ ဖမ်းနိုင်တာသည် မီတာ ၂၀၀ လောက်ပဲ ဖမ်းနိုင်ပါတယ် ရေအနက်ပေါ့နော်။ အဲလောက်ထိပဲ သွားနိုင်တဲ့ သင်္ဘောတွေ ရှိပါတယ်။ အဲဒါကြောင့်မို့လို့ သူ့ထက် နက်သွားတဲ့နေရာဆိုရင် ကိုယ့် ငါးဖမ်းသင်္ဘောက မသွားနိုင်ပါ ဘူး။ အဲတော့ ကိုယ့်ရေချိန်က အများကြီးပဲ အကျယ်ကြီး ရှိသေးတယ်ပေါ့နော်။ အဲဒီနေရာမှာဆိုရင် မီတာ ၁၅၀၀ တို့၊ မီတာ ၂၅၀၀ တို့ အဲဒီလောက်ထိ ဖမ်းနိုင်တဲ့ သင်္ဘောတွေက ရုရှားမှာပဲ ရှိတာလေ။ ဒီနိုင်ငံမှာ မရှိဘူး။ မရှိတဲ့ အတွက်ကြောင့် နည်းပညာကို ပူးပေါင်းပြီး ဆောင်ရွက်မယ်ဆိုရင် ကိုယ့်ရေချိန် အားလုံးမှာရှိတဲ့ ငါးကို ဖမ်းနိုင်တဲ့ သဘောမျိုး ဖြစ်သွားမှာပေါ့နော်။ အဲဒါမျိုးဖြစ်မှ နည်းပညာ ပိုပြီး တိုးတက်မှာပေါ့နော်” ဟု ပြောသည်။

ရုရှားငါးဖမ်းသင်္ဘောကိုတွေ့ရစဉ်

မြန်မာ့ပင်လယ်ပြင်ရှိ ငါးသံယဇာတ တည်ရှိနေမှုကို သုတေသနပြုလုပ်ရန်နှင့် အခြားကဏ္ဍများ ပူးပေါင်းဆောင် ရွက်ရန် မြန်မာ - ရုရှား နှစ်နိုင်ငံကြား သဘောတူ လက်မှတ်ရေးထိုးထားပြီဖြစ်ကြောင်း၊ လိုက်နာရမည့် စည်းကမ်း များကို ညှိနှိုင်းမှုများ လုပ်ဆောင်နေကြောင်း၊ နည်းပညာပူးပေါင်း ဆောင်ရွက်မှုများသည် မကြာခင် အကောင် အထည် ဖော်နိုင်မည်ဖြစ်ကြောင်း သိရသည်။

မြန်မာ့ရေနက် ငါးဖမ်းလုပ်ငန်းကို ရုရှား၏ နည်းပညာဖြင့် ဆောင်ရွက်မှုသည် နိုင်ငံတော်အတွက်သာ အဆင်ပြေ မည်ဖြစ်ပြီး ကမ်းရိုးတန်း ငါးဖမ်းလုပ်ငန်းနှင့် မွေးမြူရေးလုပ်ငန်းများအတွက် ထူးခြားတိုးတက်မှုတော့ ရှိလာနိုင် ခြေ မရှိကြောင်း ကျောက်ဖြူမြို့နယ်မှ ကမာမွေးမြူရေး လုပ်ငန်းရှင်တစ်ဦးဖြစ်သူ ဦးခင်အေးမောင်က CNI သတင်းဌာနသို့ ပြောသည်။

၎င်းက “ပင်လယ်ငါးဖမ်း ရေနက်ထဲမှာရှိတဲ့ ငါးတွေကို ကျန်နေတဲ့ငါးတွေ ကမ်းရိုးတန်းမှာ မရှိတော့ဘူး။ ရေနက် မှာပဲရှိတဲ့ ငါးတွေကို ဖမ်းပြီး ထုတ်လုပ်မယ်ဆိုရင်တော့ မြန်မာနိုင်ငံမှာ ရှိတဲ့ ဆင်းရဲသား လူတန်းစားအတွက် ဘယ်လိုမှ အဆင်မပြေဘူး ဆိုတာတော့ သေချာတယ် ဦးလေးကတော့ ဒါပဲ ပြောချင်တယ်။ ဦးလေးတို့ လက်ရှိ ကမ်းရိုးတန်းမှာ လုပ်တဲ့သူတောင် သိန်း ၄/၅/၆ ရာလောက် ရင်းပြီးမှ ငါးနီတူတို့၊ ကင်းမွန်တို့ ဘာတို့ဆိုတာ မီးထွန်းပြီး မွေးတာလေ။ အဲဒါတွေကို ယိုးဒယားကလာတဲ့ နည်းပညာတွေနဲ့ ဖမ်းနေကြတာ။ အဲဒါတောင် ကမ်းရိုး တန်းမှာ မရှိတော့ဘူး။ ပိုက်ဆံနည်းနည်း မရှိတဲ့သူတွေ သိန်း ၁၀၀၊ ၂၀၀ နဲ့ လုပ်လို့ မရဘူး။ သိန်း ၄/၅/၆ ရာ လောက်မှ လုပ်လို့ရတာ။ ဒီလို ရုရှားကနေပြီး ပင်လယ်ရေနက်ထဲမှာ ငါးဖမ်းပြီး လုပ်မယ် တိုးတက်အောင် ကမ်းရိုးတန်းက လူတွေ တိုးတက်အောင် လုပ်မယ်ဆိုရင် ဒီကမ်းရိုးတန်းက လူတွေအတွက် အဆင်ပြေမှာ မဟုတ်ဘူး။ မြန်မာနိုင်ငံ ကမ်းရိုးတန်းတလျှောက်လုံးက လူတွေပေါ့နော် အဆင်မပြေနိုင်ပါဘူး” ဟု ပြောသည်။

ငါးဖမ်းလုပ်ငန်းခွင်တစ်ခုကိုတွေ့ရစဉ်

လက်ရှိ မြန်မာနိုင်ငံ၏ ငါးမွေးမြူရေးနှင့် ငါးဖမ်းလုပ်ငန်းများတွင် ထိုင်းနိုင်ငံမှ နည်းပညာဖြင့်သာ ဆောင်ရွက် လျက်ရှိကြောင်း၊ ငါးဖမ်းလုပ်ငန်း တိုးတက်စေရန် နည်းပညာလိုအပ်သော်လည်း ငွေကြေး အရင်းအနှီးနှင့် ဈေး ကွက်များကို ဖော်ဆောင်ပေးရန် လိုအပ်ကြောင်း ငါးဖမ်းလုပ်ငန်းရှင်များထံမှ သိရသည်။

မြန်မာနိုင်ငံသည် ငါးသံယဇာတ ပေါများသော်လည်း ငါးဖမ်းဆီးရာတွင် အသုံးပြုသည့် ကိရိယာနှင့် နည်းပညာများ လိုအပ်နေကြောင်း၊ ပင်လယ်ပြင်တွင်လည်း မီတာ အနည်းငယ်တွင်သာ ဖမ်းဆီးနိုင်သေးကြောင်း၊ ရေနက်များတွင် ငါး၊ ပုစွန်များ ဖမ်းဆီးနိုင်သည့် နည်းပညာ မရှိကြောင်း၊ ရုရှားနှင့်ပူးပေါင်းနိုင်ပါက မြန်မာနိုင်ငံအတွက် နည်းပညာ နှင့် ကိရိယာပိုင်းဆိုင်ရာ အကူအညီများ ရရှိမည်ဖြစ်ကြောင်း ငါးလုပ်ငန်းဦးစီးဌာနနှင့် ငါးလုပ်ငန်းအဖွဲ့ချုပ်က ပြော သည်။

CNI News

၂၀၂၂ ခုနှစ်၊ အောက်တိုဘာ ၄

ပြည်ပနိုင်ငံများသို့ သွားရောက် အလုပ်လုပ်ကိုင်နေသည့် မြန်မာများကို အိမ်ပြန်ပို့ရမည့် ငွေပမာဏအား သတ်မှတ် ရန် ဆွေးနွေး ညှိနှိုင်းနေဆဲဖြစ်ကြောင်း အလုပ်သမားဝန်ကြီးဌာန အမြဲတမ်းအတွင်းဝန် ဦးညွန့်ဝင်းက CNI သတင်း ဌာနသို့ ပြောသည်။

၎င်းက “နိုင်ငံတကာမှာက နိုင်ငံခြားကို သွားလုပ်တဲ့ ရွှေ့ပြောင်း အလုပ်သမားတွေဟာ ဒီလိုပဲ ကိုယ့်မိခင်နိုင်ငံမှာ ရှိတဲ့ မိသားစုတွေ ဒါမှမဟုတ် သက်ဆိုင်တဲ့သူတွေကို ငွေလွှဲတဲ့ဥစ္စာက ပုံမှန် Practice ပါပဲ။ ကျနော်တို့ နိုင်ငံမှာ သာ အစိုးရကနေ တကယ့် ဖိဖိစည်းစည်းနဲ့ မလုပ်ခဲ့ဘဲနဲ့ သဘောကောင်းပြီး လွှတ်ထားခဲ့တာ ဖြစ်ပါတယ်။ တကယ်တမ်းကျတော့ ဒါက ထူးဆန်းတဲ့ကိစ္စ မဟုတ်ပါဘူး။ ပြောချင်တာက အာရှမှာဆို ဖိလစ်ပိုင်တို့ဘာတို့ ဆိုတာ ရွှေ့ပြောင်းလုပ်သားနဲ့ ပတ်သက်လာရင် အများအပြားပဲ နိုင်ငံတကာကို လွှတ်နေတာ ဖြစ်ပါတယ်။ ပြော ချင် တာကတော့ International Practice ဖြစ်တာကို ကျနော်တို့ နိုင်ငံအနေနဲ့လည်း လုပ်ဖို့ စဉ်းစားနေပြီ။
ဆောင်ရွက်နေတယ်။ ဆွေးနွေးနေဆဲပဲ ဖြစ်တယ်။ ဘယ်တော့စမယ် ဘယ်နှရာခိုင်နှုန်း ပို့ရမယ်။ ပြောချင်တာက လစာရဲ့ နှုန်းထားနဲ့သွားမလား၊ ရာခိုင်နှုန်းနဲ့ သွားမလား ဆိုတာကတော့ ဆွေးနွေးနေဆဲပဲ ဖြစ်ပါတယ်” ဟု ပြော သည်။

ယခုကဲ့သို့ လုပ်ဆောင်ခြင်းသည် MOU ဖြင့် သွားရောက် အလုပ်လုပ်ကိုင်သည့် အလုပ်သမားများ အတွက်သာမက ပြည်ပနိုင်ငံများသို့ အေဂျင်စီများနှင့် ချိတ်ဆက်၍ သွားရောက် လုပ်ကိုင်မည့် သူများနှင့် မိမိအစီအစဉ်ဖြင့် သွား ရောက် လုပ်ကိုင်ကြမည့် သူများအတွက်ပါ ပါဝင်ကြောင်း သိရသည်။

အထည်ချုပ် လုပ်ငန်းခွင်တစ်ခုကိုတွေ့ရစဉ်

ပြည်ပနိုင်ငံသို့ သွားရောက် လုပ်ကိုင်သည့် သူများတွင် ထိုင်းနိုင်ငံတစ်ခုတည်း မဟုတ်ဘဲ နိုင်ငံအများအပြားသို့ သွားရောက် လုပ်ကိုင်နေသူများ အားလုံးဖြစ်ကြောင်းလည်း သိရသည်။

ထိုသို့ အိမ်ပြန်ပို့ရမည့် အနည်းဆုံး ငွေပမာဏအား မည်သည့် ပုံစံဖြင့် လုပ်ဆောင်မည်ဆိုသည်ကို ဆွေးနွေးနေကြ ဆဲ ဖြစ်ကြောင်း အလုပ်သမားဝန်ကြီးဌာန အမြဲတမ်းအတွင်းဝန် ဦးညွန့်ဝင်းက ပြောသည်။

အမြဲတမ်းအတွင်းဝန် ဦးညွန့်ဝင်းက“ဒါကတော့ ဆွေးနွေးနေဆဲ ဖြစ်တယ်ဆိုတော့ အပြတ် ပြောလို့တော့ မရဘူး ပေါ့။ စာချုပ်နဲ့ ပြောမလား။ ညွှန်ကြားချက်အနေနဲ့ ထွက်မလားဆိုတာ ဒါက နည်းလမ်းက မျိုးစုံရှိတာပေါ့။

အေဂျင်စီ တစ်ခုတည်း ပြောလို့ရပေမယ့် အေဂျင်စီနဲ့ မချုပ်ဘဲနဲ့ အလွတ်ထွက်နေတဲ့ လူတွေလည်း ဒီတိုင်းရှိတာပဲ။ ကိုယ့်ဘာသာကိုယ် စားဖိုမှူးနဲ့ သွားနေတာရှိတယ်။ လေယာဉ်မောင်တွေရှိတယ်။ လေယာဉ်မောင်းတဲ့လူတွေရှိ တယ်။ ဆရာဝန်တွေရှိတယ်၊ သူနာပြုတွေရှိတယ်၊ IT ကျွမ်းကျင်သူတွေရှိတယ်။ individual သွားနေတဲ့ လူတွေရှိ တာပေါ့။ သင်္ဘောသားတွေလည်း ရှိတာပေါ့။ မျိုးစုံရှိတာပေါ့။ အားလုံးလွှမ်းခြုံတဲ့ အနေအထားမျိုးလည်းဖြစ်ရမယ်။ ပြည်ပကို သွားရောက် အလုပ်လုပ်တဲ့ ကိုယ့်နိုင်ငံက ရွှေ့ပြောင်းလုပ်သားပေါ့။ ပုံသဏ္ဍန်မျိုးစုံနဲ့ သွားတဲ့ရွှေ့ပြောင်း လုပ်သားတွေက နားလည်လက်ခံ ပါဝင်ဆောင်ရွက်တဲ့ အနေအထားမျိုး ဖြစ်အောင်ရယ်။ နောက် မျှတတဲ့ အနေ အထားမျိုး ဖြစ်အောင်ရယ်က function ပေါ့ အခြေအနေမျိုးစုံပေါ့” ဟု CNI သတင်းဌာနသို့ ပြောသည်။

သစ်စက်တစ်ခုကိုတွေ့ရစဉ်

လက်ရှိတွင် အေဂျင်စီများထံသို့ ထိုကိစ္စနှင့်ပတ်သက်၍ တစ်စုံတစ်ရာ အကြောင်းအကြားထားခြင်းမျိုး မရှိသေး ကြောင်း ပြည်ပအလုပ်အကိုင် အေဂျင်စီများထံမှ သိရသည်။

အစိုးရအနေဖြင့် ပြည်ပ နိုင်ငံခြားဝင်ငွေ လိုချင်သည့်အတွက်ကြောင့် ယခုကဲ့သို့ လုပ်ဆောင်ခြင်း ဖြစ်နိုင်ကြောင်း ဂျပန်သို့ပို့ဆောင်နေသည့် အေဂျင်စီတစ်ခုမှ ကိုနေဦးကိုက CNI သတင်းဌာနသို့ ပြောသည်။

ကိုနေဦးကိုက “တချို့တွေကျတော့ မပို့ကျတော့ဘူးပေါ့လေ။ တချို့ကျတော့ ဘဏ်တိုက်ရိုက် မဟုတ်ဘဲနဲ့ ဟွန်ဒီ နဲ့လွှဲတာ အဲဒါတွေကြောင့်ပါ။ သူတို့က အပြင်ပေါက်ဈေးနီးပါး ပေးထားပါတယ်။ CB ဘဏ်တို့ ဘာတို့ဆိုရင်လေ။ အဲဒါဖြစ်တဲ့အတွက် လွှဲမယ်ဆိုရင်တော့ ရတာပေါ့။ အရင်တုန်းကကျတော့ ငွေကြေးက အရမ်းကွာဟနေတဲ့ အတွက်ကြောင့် ဟိုဟာနဲ့လွှဲကြတာဆိုပေမယ့် အခုက အပြင်ပေါက်ဈေးနဲ့ ပေးထားတာဆိုတော့ လွှဲမယ်ဆိုရင် တော့ ဟိုလိုကြီး ထိခိုက်မှုတော့ မရှိပါဘူး။ တစ်လဘယ်လောက် လွှဲရမယ်ဆိုတာထက် တစ်နှစ် ဘယ်လောက် လွှဲရမယ်ဆိုတာ ဖြစ်ဖို့ပိုများလားလို့။ ဒီဥစ္စာကြတော့ ဘဏ်တိုက်ရိုက်ကျတော့ အစိုးရထဲကို နိုင်ငံခြားငွေ စီးဆင်း တာကို။ တချို့ကျတော့လည်း အဲဒီလိုမလုပ်ချင်ဘူး” ဟု ပြောသည်။

လက်ရှိတွင် ပြည်ပရောက် မြန်မာအများစုသည် ဗဟိုဘဏ်မှ သတ်မှတ်ထားသည့် နိုင်ငံခြားငွေ ပေါက်ဈေးနှင့် အပြင် ပေါက်ဈေးမှာ ဈေးနှုန်း ကွာဟချက်များ ရှိသည့်အတွက် ဘဏ်မှတဆင့် ငွေလွှဲခြင်းအစား အခြားပြင်ပ ငွေလွှဲဝန်ဆောင်မှု လုပ်ငန်းများမှ တဆင့် ငွေလွှဲပို့ကြကြောင်း သိရသည်။

ထို့ကြောင့် ပြည်ပရောက် ရွှေ့ပြောင်း အလုပ်သမားများအတွက် ၎င်းကိစ္စရပ်နှင့်ပတ်သက်၍ အသိပညာပေးခြင်း များအား ဆောင်ရွက်သွားရန် ရှိကြောင်း အလုပ်သမားဝန်ကြီးဌာနမှ သိရသည်။