CNI News

၂၀၂၃ ခုနှစ်၊ ဖေဖော်ဝါရီ ၁၇

ထိုင်းနိုင်ငံတွင် ၂၀၂၃ ခုနှစ်၊ ဖေဖော်ဝါရီလ ၁၃ ရက်နေ့တွင် အလုပ်လုပ်ကိုင်ခွင့် (Work Permit) သက်တမ်းကုန် သည့် မြန်မာရွှေ့ပြောင်း လုပ်သားများအား ၂၀၂၃ ခုနှစ်၊ မေလ ၁၅ ရက်နေ့အထိ ထိုင်းအစိုးရအဖွဲ့မှ ဆက်လက် နေထိုင်ခွင့် ပြုလိုက်သည်။

ထို့အပြင် Work Permit အသစ် ရရှိရန် လိုအပ်သော စာရွက်စာတမ်းများနှင့်အတူ ၂၀၂၃ ခုနှစ်၊ မေလ ၁၅ ရက်နေ့ အထိ လျှောက်ထားနိုင်သည်ဟုလည်း ထိုင်းနိုင်ငံအစိုးရအဖွဲ့မှ အတည်ပြုခဲ့ခြင်း ဖြစ်သည်။

FED မှ အလုပ်သမားတာဝန်ခံ ဦးမင်းဦးက “အလုပ်သမားတွေ အတွက်တော့ ဒါ နည်းနည်းတော့ အချိန်ရသွားတာ ပေါ့နော်။ ဒါပေမယ့် အဓိက အရေးကြီးတာက ဒီ ၁၃ ရက်နေ့ အတောအတွင်းမှာ အလုပ်ရှင်တွေ ကနေပြီးတော့ အွန်လိုင်းကနေတဆင့် ဒီအလုပ်သမားတွေက သက်တမ်း တိုးပါတယ်ဆိုတဲ့ ဟာပေါ့။ ဥပမာ အွန်လိုင်းကနေ အခု သူတို့ လုပ်ပေးထားတဲ့ စနစ်ရှိတယ်။ အဲဒါကနေ စာရင်းသွင်းရင်သွင်း၊ မသွင်းဘူးဆိုရင် ကိုယ်ကိုယ်တိုင် သွားပြီး တော့ အလုပ်သမားနဲ့ အလုပ်အကိုင် ရှာဖွေရေးရုံးမှာ စာရင်းသွားသွင်းရမယ်။ သွားသွင်းထားရမယ်။ အဲဒါဆိုရင် နောက်ပိုင်းမှာမှ Work Permit ဆိုင်ရာ၊ ကိုယ်ရေး အချက်အလက် စစ်ဆေးတာတို့၊ visa လုပ်တာတို့ အဲဒါတွေ နောက်ပိုင်း ၁၅ ရက်နေ့ ၅ လပိုင်းအတွင်း လုပ်လို့ရတယ်ဆိုတဲ့သဘော။ အလုပ်သမားတွေ အတွက်ကတော့ အချိန် ဒီလိုမျိုး ရတဲ့အခါကျတော့ ပြောရမယ်ဆိုရင် နည်းနည်းတော့ ကောင်းတာပေါ့။ အခုလို လုပ်ထားတဲ့ဟာ ကကြတော့ တကယ်လို့ အလုပ်ရှင်တွေက မသွင်းထားဘူး။ တချို့အေးဂျင့်တွေ ပွဲစားတွေက မသွင်းထားဘူးဆိုရင် အဲဒီ အလုပ်သမားတွေပဲ စာရင်းထဲမှာ မပါတဲ့ အလုပ်သမားတွေပဲ ပြဿနာတက်မှာ။ ကောင်းတာကတော့ ကောင်းတယ်။ ရာနှုန်းပြည့်တော့ မဟုတ်ဘူး” ဟု CNI သတင်းဌာနသို့ ပြောသည်။

မြန်မာအလုပ်သမားများ Work Permit လျှောက်နေကြစဉ်

ဘန်ကောက်ရှိ မြန်မာသံရုံးမှ တာဝန်ရှိသူများနှင့် ထိုင်းနိုင်ငံအစိုးရအဖွဲ့မှ တာဝန်ရှိသူများသည် မြန်မာရွှေ့ပြောင်း လုပ်သားများ၏ နေထိုင်ခွင့်နှင့် အလုပ်လုပ်ကိုင်ခွင့် ကိစ္စရပ်များကို ဆွေးနွေးခဲ့ကြပြီးနောက် ယခုကဲ့သို့ ထိုင်းအစိုးရ အဖွဲ့မှ အတည်ပြုခဲ့ခြင်းဖြစ်ကြောင်း သံရုံးက အသိပေး ကြေညာထားသည်။

ထို့ကြောင့် မြန်မာရွှေ့ပြောင်း လုပ်သားများ အားလုံးအနေဖြင့် ကျန်အထောက်အထားများထက် Work Permit အား ဦးစားပေး သက်တမ်းတိုးရန် လိုကြောင်း၊ သက်တမ်းတိုးထားရန် အရေးကြီးကြောင်း Arakan Workers Organization မှ ဒါရိုက်တာ ကိုနိုင်အောင်အောင်က CNI သတင်းဌာနသို့ ပြောသည်။

မြန်မာနဲ့ထိုင်း အစိုးရအဖွဲ့ ဆွေးနွေးနေကြစဉ်

၎င်းက “Work Permit ကို သက်တမ်းတိုးလိုက်ပြီးမှ ပန်းရောင်ကတ် ပုံစံမျိုးတွေ၊ CI ပုံစံမျိုးတွေက ထွက်လာမှာ ဆိုတဲ့ အတွက်ကြောင့် အလုပ်သမားတွေအနေနဲ့ Work Permit ကိုပဲ အဓိက ဦးစားပေးပြီးမှ သက်တမ်းတိုးဖို့ လိုတယ်။ CI စာအုပ် ကိုင်ထားတဲ့ လူတွေပဲ ဖြစ်ဖြစ်၊ ပန်းရောင်ကတ်ကိုင်တဲ့ အုပ်စုတွေပဲဖြစ်ဖြစ်၊ အွန်လိုင်းကနေ ပြီးတော့ ပန်းရောင်ကတ် လျှောက်ထားတဲ့ အုပ်စုတွေပဲဖြစ်ဖြစ်၊ CI စာအုပ် မလုပ်ရသေးတဲ့ လူတွေပဲဖြစ်ဖြစ်၊ ဘာပဲ ဖြစ်ဖြစ် ဒီပုဂ္ဂိုလ်တွေက အကုန်လုံးက Work Permit သက်တမ်း တိုးကို တိုးရတယ်။ Work Permit သက်တမ်း တိုးပြီးခါနီးမှ သူတို့လုပ်ဆောင်ရမယ့် လုပ်ငန်းစဉ်တွေရဲ့ process တွေကို ဆက်သွားရမှာ ဖြစ်တယ်။ ဘယ် လုပ်ငန်းစဉ်ပဲ လုပ်လုပ် အဓိကကတော့ အလုပ်သမားတွေကတော့ ထိုင်းနိုင်ငံအစိုးရ အနေနဲ့ သက်တမ်း တိုးခြင်း၊ မတိုးခြင်းက တစ်ပိုင်းပေါ့။ ဒါပေမယ့် ထိုင်းနိုင်ငံမှာ ရောက်နေတဲ့ ရွှေ့ပြောင်းလုပ်သား မြန်မာတွေကတော့ ဘယ် process ပဲ သွားသွား နောက်က လိုက်လုပ်ရတဲ့ အခါကျတော့ လွယ်ကူတဲ့ လုပ်ငန်းစဉ်တော့ မဟုတ်ဘူးပေါ့။ ခက်ခဲတဲ့ လုပ်ငန်းစဉ်ဖြစ်တယ်။ အဲဒီ ခက်ခဲတဲ့ လုပ်ငန်းစဉ်မှာလည်း ပွဲစားကိုတဆင့် အားကိုး ရပြီးတော့ မြန်မာ နိုင်ငံ အစိုးရရော၊ ထိုင်းနိုင်ငံအစိုးရ ကိုယ်တိုင်က ဒီပွဲစားတွေကို အဓိကဦးစားပေး လုပ်ငန်းစဉ် ထဲမှာ ထည့်ထားတဲ့ အခါကျတော့ အများစုကတော့ ကုန်ကျစရိတ်တွေနဲ့ အကြွေးစရိတ်တွေနဲ့ သံသရာက လည်နေတာပဲလေ” ဟု ပြောသည်။

မြန်မာရွှေ့ပြောင်းအလုပ်သမားများကိုတွေ့ရစဉ်

ယခုကဲ့သို့ သက်တမ်း ကုန်သူများအား ဆက်လက် နေထိုင်ခွင့်ပြုပြီး သက်တမ်းတိုးခြင်း ဆောင်ရွက်ခိုင်းမှုအပေါ် ထိုင်းရှိ မြန်မာရွှေ့ပြောင်း အလုပ်သမားအရေး ဆောင်ရွက်သူများက ကြိုဆိုကြသော်လည်း သက်တမ်းတိုး ပြုလုပ် သည့် ကုန်ကျစရိတ်မှာ ယခင်ကထက် တရွေ့ရွေ့ဖြင့် များပြားလာနေကြောင်း ၎င်းတို့က ထောက်ပြ ကြသည်။

ထို့အပြင် Work Permit အသစ်ရရှိရန် ၂၀၂၃ ခုနှစ်၊ မေလ ၁၅ ရက်နေ့အထိ လျှောက်ထားရမည် ဖြစ်သည့် အတွက် ပွဲစားများ၏ ပေါက်ဈေးမှာလည်း ယခုထက်ပိုမို တောင်းခံကြနိုင်ဖွယ် ရှိကြောင်းလည်း ထိုင်းရှိ မြန်မာ ရွှေ့ပြောင်း အလုပ်သမားအရေး ဆောင်ရွက်သူများက ပြောသည်။

လက်ရှိတွင် အထောက်အထားများ သက်တမ်းတိုးပြုလုပ်ရာ၌ အလုပ်သမား တစ်ယောက်အတွက် ထိုင်းအစိုးရမှ သတ်မှတ်ထားသည့် ပျမ်းမျှ ကုန်ကျစရိတ်မှာ ဘတ်ငွေ ၅၀၀၀ မှ ၆၀၀၀ ကြားတွင်သာ ရှိသော်လည်း မြန်မာ ရွှေ့ပြောင်း လုပ်သားအများစုသည် ပွဲစားများမှတဆင့် ပြုလုပ်ကြရသည့်အတွက် အစိုးရသတ်မှတ် စရိတ်ထက် နှစ်ဆခန့် ပိုမို ပေးရကြောင်းလည်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၆

မြန်မာနိုင်ငံတွင် ကိုဗစ်ကာလအလွန် နိုင်ငံရေးအပြောင်းအလဲ၌ ပြည်ပနိုင်ငံများသို့ ကျောင်းတက်ရန်၊ အလုပ် လုပ်ကိုင်ရန်၊ အခြေချနေထိုင်ရန် စသဖြင့် ထွက်ခွာကြသူ အများအပြားရှိပြီး ထိုထဲတွင် အလုပ်လုပ်ကိုင်ရန် သွားရောက်ကြသည်မှာ အဓိကအများဆုံးဖြစ်ကြောင်း တွေ့ရသည်။

ယခုကဲ့သို့ ပြည်ပနိုင်ငံများ၌ အလုပ်လုပ်ကိုင်ရန်အတွက် ထွက်ခွာသွားကြခြင်းမှာ ပြည်တွင်း၌ အလုပ်အကိုင် ရှားပါးခြင်းနှင့် လုပ်ခလစာ နည်းပါးခြင်းတို့ကြောင့်ဟု ပြည်ပနိုင်ငံများတွင် မြန်မာအလုပ်သမားအရေးဆောင်ရွက်နေသူများက CNI သတင်းဌာနသို့ ပြောသည်။

တောင်ကိုရီးယားနိုင်ငံ ဘူဆန်မြို့ရှိ အလုပ်သမား ရွှေ့ပြောင်းနေထိုင်သူများ ကူညီထောက်ပံ့ရေးစင်တာမှ တာဝန်ခံ ကိုခန့်နေကြည်က “ကိုယ့်အတွက် လုပ်အားခမြင့်တဲ့ အိမ်နီးချင်းနိုင်ငံတွေကို ရွှေ့ပြောင်းပြီးတော့ အလုပ်လုပ်ကြ တာကတော့ ရွှေ့ပြောင်း အလုပ်သမားဆိုတာကတော့ နှစ် ၃၀ လောက် အလွန်ကတည်းက။ သို့သော်လည်း ဒီနောက်ပိုင်းမှာက ပိုပြီးတော့ နိုင်ငံတွေ တိုးတက်မှုတွေ ကွာဟသွားတဲ့အခါမှာ အခြေခံ လုပ်အားခတွေလည်းပဲ ကွာဟမှုတွေ ရှိလာတော့ ပိုပြီးတော့မှ လုပ်အားခများတဲ့ နိုင်ငံတွေကို ကိုယ့်ဒေသမှာ၊ ကိုယ့်နိုင်ငံမှာ အလုပ်အကိုင် တွေလည်း ရှားပါးလာတော့ ရွှေ့ပြောင်းပြီးတော့ အလုပ်လုပ်တဲ့ နှုန်းတွေကလည်း ပိုတက်လာတဲ့ သဘောပဲ။ တောင်ကိုရီးယားကလည်း လွန်ခဲ့တဲ့ ကိုဗစ်ကာလပေါ့ စတဲ့အချိန်မှာတော့ ပြည်ပကနေ အလုပ်သမားတွေ ကိုရီးယားနိုင်ငံထဲကို ဝင်ရောက်ခွင့်တွေ ပိတ်ပင်ထားတာပေါ့။ ပိတ်ပင်ထားတော့ အလုပ်သမား ရှားပါးမှု ပြဿနာ တွေ အရမ်းထိခိုက်တယ်။ အလုပ်သမား လိုအပ်ချက်တွ ဖြစ်လာပြီပေါ့နော်။ အဲဒီမှာ ပြည်ပကနေ အလုပ်သမား တွေကို ထပ်ပြီးတော့ ခေါ်သွင်းတဲ့အခါကျတော့ တော်တော်လေးကို နှုန်းတွေ တက်လာတာပေါ့။ တနေ့တနေ့ ကျနော်တို့ မြန်မာနိုင်ငံလို အနေအထားမျိုးနဲ့တောင်မှ နိုင်ငံရေးစနစ်တွေ အခြေအနေမကောင်းတဲ့ အခြေအနေမှာ တောင်မှ မြန်မာအလုပ်သမားတွေက ဝင်ရောက်မှုနှုန်းတွေ အရင်ကထက်စာရင် အများကြီး တိုးလာတာပေါ့” ဟု ပြောသည်။

ပတ်စပို့လျှောက်သူများနဲ့ ပြည်ပထွက်သူများကိုတွေ့ရစဉ်

လက်ရှိတွင် မြန်မာနိုင်ငံမှ လူအများအပြား ပြည်ပနိုင်ငံသို့ ထွက်ခွာကြရာ၌ တောင်ကိုရီးယား၊ ဂျပန်၊ ထိုင်း၊ မလေးရှား၊ တရုတ်၊ စင်ကာပူ၊ ယူအေအီး အစရှိသည့် နိုင်ငံများသို့ အဓိကအများဆုံး ထွက်ခွာကြပြီး အနောက် နိုင်ငံများသို့လည်း ထွက်ခွာနေကြသည်။

ပြည်တွင်းမှ လုပ်ငန်းရှင်များသည် ကိုဗစ်ကာလတွင် အများအပြား ထိခိုက်ခဲ့ကြသကဲ့သို့ ရပ်နားလိုက်ရခြင်းများ လည်း ရှိခဲ့ကြောင်း၊ ကိုဗစ်အလွန် ကာလတွင်လည်း နိုင်ငံရေး အပြောင်းအလဲဖြင့် ထပ်မံတွေ့ကြုံသောကြောင့် လုပ်ငန်းရှင်များအတွက် အခက်အခဲများရှိကြောင်း ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များ အသင်းမှ ဥက္ကဋ္ဌ ဦးဇော်ဇော်က CNI သတင်းဌာနသို့ ပြောသည်။

လုပ်ငန်းရှင်များမှ လုပ်ခလစာပေးရာတွင် အခြေခံ သတ်မှတ်နှုန်းထားဖြစ်သည့် ကျပ်ငွေ တစ်သိန်းခွဲဝန်းကျင်မှ စတင်ကာပေးခြင်း ဖြစ်သော်လည်း လက်ရှိတွင် အခြေခံကုန်ဈေးနှုန်းများ မြင့်တက်ခြင်းနှင့် မြန်မာငွေတန်ဖိုး ကျဆင်းခြင်းကြောင့် လုပ်ခလစာနည်းသည်ဟု ပြောကြခြင်းဖြစ်ကြောင်း ၎င်းက ဆက်ပြောသည်။

ပြည်ပ ထွက်မည့် မြန်မာများကိုလေဆိပ်မှာတွေ့ရစဉ်

ရှမ်းပြည်နယ်မြောက်ပိုင်း ဟိုတယ်လုပ်ငန်းရှင်များ အသင်းမှ ဥက္ကဋ္ဌ ဦးဇော်ဇော်က “ကျနော်တို့ လုပ်ငန်းရှင်တွေ ဘက်ကကြတော့ တိုးသင့် တိုးထိုက်တဲ့ လူနဲ့ တကယ့် တိုးပေးသင့်တဲ့ လူတွေကို ကြတော့ မရှိမဖြစ် လိုအပ်တဲ့ ဝန်ထမ်းတွေဆိုရင်တော့ ကျနော်တို့က တိုးပေးတာတွေ ရှိတယ်ပေါ့။ ကိုဗစ်ကာလ အလွန်မှာလည်း ခဏ ကျနော် တို့ နိုင်ငံရေးကိစ္စတွေ ဘာတွေနဲ့ ကြတော့လည်း စီးပွားရေး ကောင်းကောင်းမွန်မွန် လုပ်ဖို့ပြုဖို့ကလည်း နည်းနည်း ခက်ခဲလာတဲ့အချိန်၊ ပြီးတော့ အဲဒီကြားထဲမှာမှ ထပ်ပြီးမှ ငွေကြေးတန်ဖိုးတွေက တော်တော်လေး ကွဲလွဲမှုတွေ ဖြစ်သွားတဲ့အတွက် လုပ်ငန်းရှင်တွေဘက်က အခက်အခဲတွေက ခက်ခဲပြီးရင်း ခက်ခဲ၊ ပြဿနာ တစ်ခုပြီးတစ်ခု ရင်ဆိုင်မှုတွေ၊ စိန်ခေါ်မှုတွေ တစ်ခုပြီးတစ်ခု ဖြစ်လာတဲ့ အခါကြတော့ ဒီဝန်ထမ်းတွေဘက်ကို အားမထည့် ပေးနိုင် တာပေါ့” ဟု ပြောသည်။

ထိုသို့ ပြည်ပနိုင်ငံများ၌ အလုပ်လုပ်ကိုင်ရန် ထွက်ခွာကြသူများထဲတွင် အခြေခံ အလုပ်အကိုင်များ လုပ်ကိုင်ရန် သွားရောက်ကြသူ ဦးရေမှာ များပြားကြောင်း၊ သို့သော်လည်း ပညာရှင်အဆင့် အလုပ်အကိုင်များ လုပ်ကိုင်ရန် အတွက် သွားရောက်ကြ သူဦးရေမှာလည်း အတန်အသင့်တော့ရှိကြောင်း ပြည်ပနိုင်ငံများတွင် မြန်မာ အလုပ် သမားအရေး ဆောင်ရွက်နေသူများက ပြောသည်။

ထို့အပြင် ပညာတော်သင် သွားရောက်ကြသူများမှာလည်း များပြားလာသည့်အတွက် ယခုကဲ့သို့ ပြည်ပထွက်ခွာမှု များပြားလာခြင်း၏ နောက်ဆက်တွဲ အနေဖြင့် မြန်မာနိုင်ငံတွင် လူသားအရင်းအမြစ် ဆုံးရှုံးမှုမှာ ဆိုးရွားသည့် လက္ခဏာဖြစ်ကြောင်း ထိုင်းနိုင်ငံရှိ ရွှေ့ပြောင်းအလုပ်သမား အခွင့်အရေးကွန်ရက် MWRN မှ အကြံပေး ဦးအောင်ကျော်က CNI သတင်းဌာနသို့ ပြောသည်။

 ပတ်စပို့လျှောက်သူများနဲ့ စက်ရုံမှာလုပ်နေသူများကိုတွေ့ရစဉ်

၎င်းက “နိုင်ငံတစ်နိုင်ငံရဲ့ အသီးအပွင့်၊ နိုင်ငံရဲ့ သယံဇာတတွေဟာ အဲဒီလူငယ်မျိုးဆက်တွေ ဖြစ်ပါတယ်။ အဲဒီ ပြည်တွင်းမှာ လူငယ်မျိုးဆက်တွေက သူတို့ တတ်ကျွမ်းတဲ့ ပညာရပ်၊ တီထွင်ကြံဆ လုပ်ကိုင်ပြီးမှ တိုင်းပြည်ရဲ့ ဖွံ့ဖြိုးတိုးတက်မှုကို လုပ်ဆောင်ရမယ့် နေရာမှာ တကယ့်အရေးကြီးတဲ့ သယံဇာတ အရင်းအမြစ်တွေ အားလုံးက နိုင်ငံတကာကို အကုန်ရောက်ကုန်ကြတဲ့ အတွက်ကြောင့် တိုင်းပြည်က အနာဂတ်အတွက် ရင်လေးစရာလို့ပဲ သုံးသပ်ချင်ပါတယ်” ဟု ပြောသည်။

ပြည်ပနိုင်ငံများသို့ သွားရောက် လုပ်ကိုင်မည်ဆိုပါက မိမိသွားရောက်မည့် နိုင်ငံမှ ချမှတ်ထားသည့် ဥပဒေများအား သိရှိရန်လိုအပ်ကြောင်း၊ မိမိမသွားခင် ကာလတွင် လေ့လာထားကြရန် လိုအပ်ကြောင်း ပြည်ပနိုင်ငံများတွင် မြန်မာ အလုပ်သမားအရေး ဆောင်ရွက်နေသူများက အကြံပြုသည်။

ပြည်ပနိုင်ငံများမှ ချမှတ်ထားသည့် ဥပဒေများနှင့်ပတ်သက်၍ မသိနားမလည်ပါက မိမိသာလျှင် ခေါင်းပုံဖြတ်ခံရ မည် ဖြစ်ကြောင်း ပြည်ပနိုင်ငံများတွင် မြန်မာအလုပ်သမားအရေး ဆောင်ရွက်နေသူများက ပြောသည်။

CNI News

၂၀၂၃ ခုနှစ်၊ ဖေဖော်ဝါရီ ၁၆

ရုရှားနိုင်ငံသည် ရေနံထုတ်လုပ်မှုကို တစ်နေ့လျှင် စည် ၅ သိန်း သို့မဟုတ် ထုတ်လုပ်မှု၏ ၅ ရာခိုင်နှုန်းကို မတ်လမှ စတင် လျှော့ချသွားမည်ဟု ပြောဆိုထားသော်လည်း ထိုကိစ္စကြောင့် မြန်မာနိုင်ငံ၏ စက်သုံးဆီ ဈေးကွက်အပေါ် သက်ရောက်မှု မရှိနိုင်ကြောင်း စီးပွားရေးလေ့လာသူများက ပြောသည်။

ရုရှားနိုင်ငံက စက်သုံးဆီ လျှော့ထုတ်လုပ်သော်လည်း မြန်မာနိုင်ငံကို ရောင်းချသည့် ပမာဏအား လျှော့ချမှု မရှိကြောင်း၊ ထုတ်လုပ်မှု လျှော့ချလိုက်သည့်အတွက် ကမ္ဘာ့ရေနံဈေးနှုန်း အပြောင်းအလဲ ဖြစ်သွားမှသာလျှင် မြန်မာနိုင်ငံအပေါ် သက်ရောက်မှု ရှိလာမည်ဟု စီးပွားရေးပညာရှင်တစ်ဦးက CNI သတင်းဌာနသို့ ပြောသည်။

ရုရှား စက်သုံးဆီထုတ်လုပ်မှုကိုတွေ့ရစဉ်

၎င်းက “ထုတ်လုပ်မှုသာ လျှော့ချတာလေ မြန်မာမှာ ရောင်းမယ့်ဟာက သူ့ဟာသူ approve ဖြစ်ပြီးသား။ နောက် မြန်မာပြည်ကို ရောင်းမယ့်ဟာကလည်း သူ့ထုတ်လုပ်မှုနဲ့စာရင် ဘာမှ မပြောပလောက်ဘူး။ ဒါပေမယ့် ရုရှားက လျှော့ချလို့ World Price တက်သွားရင်တော့ တက်တဲ့ effect ကတော့ လာမှာပေါ့။ ကြည့်ကြည့်ရမှာပေါ့လေ တခြား ရေနံထုတ်လုပ်နေတဲ့ အဓိက နိုင်ငံတွေကရော ဘယ်လိုအခြေအနေ ရှိလဲ ကြည့်ရမှာပေါ့။ အခုက သူက လျှော့ချတာက အဓိကကတော့ Western Europe Country ပေါ့ ဥရောပနိုင်ငံတွေကို ပို့တဲ့ဟာပေါ့။ ဒါပေမယ့် ဟိုဘက်က သူက Price ကို သတ်မှတ်လိုက်တာကိုး။ ဘယ်လောက်ပဲ ပေးမယ်ဆိုပြီးတော့ သူက မရောင်းချင်ဘူး။ ဒါပေမယ့် မြန်မာကိုတော့ မလျှော့ချပါဘူး။ မလျှော့ချဘူးဆိုတာကလည်း မြန်မာက ဝယ်တဲ့ပမာဏက သူတို့ ရောင်းတဲ့ ပမာဏနဲ့ ဘာမှ ရှိတာ မဟုတ်ဘူးလေ။ သူတို့ရဲ့ ထုတ်လုပ်မှု တစ်ခုလုံးနဲ့ စာရင်ပေါ့လေ” ဟု ပြောသည်။

ရုရှား၏ ရေနံလျှော့ချ ထုတ်လုပ်မှု သတင်းကို အသုံးချ၍ ပြည်တွင်းရှိ စက်သုံးဆီ ကုန်သည်များ၊ သွင်းကုန် လုပ်ငန်းရှင်များနှင့် စီးပွားရေးလုပ်ငန်းရှင်များက ဈေးကစားလာနိုင်သည့်အတွက် နိုင်ငံတော်အစိုးရအနေဖြင့် ထိန်းချုပ်ရန် လိုအပ်ကြောင်း စီးပွားရေးပညာရှင်များက ထောက်ပြကြသည်။

ထို့ကြောင့် နိုင်ငံတော်အစိုးရ အနေဖြင့် နိုင်ငံခြားငွေ ဈေးနှုန်းကို ကိုင်တွယ်သည့်နည်းတူ ယခု စက်သုံးဆီ ကိစ္စ ကိုလည်း ကိုင်တွယ်နိုင်ကြောင်း မြန်မာ့စီးပွားရေး လေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

၎င်းက “အစိုးရရဲ့ ထိန်းချုပ်မှုပေါ်မှာ မူတည်တယ်။ ဈေးကစားတာကို ခွင့်ပြုနေရင်တော့ ခွင့်ပြုထားရင်တော့ ဈေးကစားမှာပဲ။ ဈေးကစားမှာကို ခွင့်မပြုဘူးဆိုရင်တော့ ဟိုတလောကတောင် ကြားတယ်မလား ဗဟိုဘဏ်က နိုင်ငံခြားငွေကို မတရားစွဲတင်ရင် လုပ်တဲ့ကိစ္စတွေကို သူတို့ စကိုင်တွယ်တော့မယ်ဆိုတော့ ကျန်တာတွေလည်း ကိုင်တွယ်မယ်ထင်တယ်ဗျ။ နိုင်ငံတော်က ဘယ်လောက်ထိ သူတို့ကို သတ်မှတ်ခွင့် ပေးထားတယ်။ ဘယ်အပေါ် မှာ ဒါတစ်ခုတော့ အတိုင်းအတာ တစ်ခုတော့ ရှိရမှာပေါ့ဗျာ။ သူတို့လုပ်ချင်တိုင်း လုပ်လို့မရအောင်တော့ ထိန်းချုပ် ရမှာပေါ့ ကျနော်ပြောတဲ့သဘောက။ ထိန်းချုပ်နိုင်ဖို့ နည်းလမ်းတွေတော့ အစိုးရမှာတော့ ဆောင်ရွက်ရမယ့် တာဝန်ကတော့ သူ့မှာ ရှိတာပေါ့ဗျာ” ဟု ပြောသည်။

ရုရှား ရေနံပိုက်လိုင်းကိုတွေ့ရစဉ်

ရုရှားနိုင်ငံသည် ဆော်ဒီပြီးနောက် ကမ္ဘာ့ဒုတိယ အကြီးမားဆုံး ရေနံတင်ပို့သူဖြစ်ကာ ထုတ်လုပ်မှု လျှော့ချမည့် သတင်းကြောင့် Brent ရေနံဈေးကွက်တွင် ရေနံတစ်စည်လျှင် ၈၆ ဒသမ ၆ ဒေါ်လာထိရောက်ရှိလာသည့်အတွက် ၂ ဒသမ ၅ ရာခိုင်နှုန်းကျော် မြင့်တက်သွားသည်ကို တွေ့ရသည်။

ရုရှားနိုင်ငံမှ ဝယ်ယူသည့် စက်သုံးဆီ ဈေးနှုန်းသည် သက်သာသော်လည်း သယ်ယူပို့ဆောင်ရေးစရိတ် မြင့်တက် မှုကြောင့် အဓိက ဝယ်ယူနေသော စင်္ကာပူနိုင်ငံ၏ ဈေးနှုန်းနှင့် အတူတူခန့်ပင် ရှိနေသည်ဟု စီးပွားရေး လုပ်ငန်း ရှင်များက ပြောသည်။

မြန်မာနိုင်ငံသည် ရုရှားနိုင်ငံမှ စက်သုံးဆီ ဝယ်ယူနေသည်မှာ နှစ်နိုင်ငံ အစိုးရချင်း သဘောတူညီမှု G to G ဖြင့် ဝယ်ယူနေခြင်း ဖြစ်သည့်အပြင် ရုရှားထံမှ ဝယ်ယူနေသည့် ပမာဏသည် ပြည်တွင်းသုံးစွဲမှု၏ ၂၅ ရာခိုင်နှုန်းခန့် ရှိကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၅

မြန်မာ - တရုတ် နယ်စပ်ကုန်သွယ်ရေး ဂိတ်ပေါက်တစ်ခုဖြစ်သည့် ကချင်ပြည်နယ်ရှိ ကန်ပိုက်တီ နယ်စပ် ကုန်သွယ်ရေးဂိတ်တွင် မြန်မာကုန်တင်တွဲကားများ တရုတ်နိုင်ငံအတွင်းသို့ ကိုယ်တိုင်မောင်းနှင်၍ ဝင်ရောက်ခွင့် ပြုလိုက်ပြီဖြစ်ကြောင်း ကန်ပိုက်တီမှ ကုန်ကားသမားများထံမှ သိရသည်။

ကိုဗစ် - ၁၉ ကူးစက်ရောဂါ ထိန်းချုပ်သည့် အနေဖြင့် နယ်စပ်ကုန်သွယ်ရေးတွင် မြန်မာကုန်တင်ကား မောင်းနှင် သူများအနေဖြင့် တရုတ်နိုင်ငံသို့ တိုက်ရိုက် ဝင်ရောက်ခွင့်မပြုဘဲ တရုတ် အစားထိုး ယာဉ်မောင်းစနစ်ဖြင့် လုပ်ဆောင်နေရကြောင်း၊ လက်ရှိတွင် ယင်းစနစ်ကို ဖျက်သိမ်းလိုက်ပြီး မြန်မာယာဉ်မောင်းများ ကိုယ်တိုင် မောင်းနှင် ခွင့် ပြုလိုက်ခြင်း ဖြစ်ကြောင်း သိရသည်။

ထိုသို့ မောင်းနှင်ခွင့် ပြုလိုက်သည့်အတွက် ကုန်တင်ကား ပျက်စီးမှု နည်းပါးသွားမည် ဖြစ်သည့်အပြင် မြန်မာ ယာဉ်မောင်းများအတွက် မောင်းနှင်ကြေးများ တိုးမြှင့်လာမည် ဖြစ်သည်ဟု ကန်ပိုက်တီမှ ကုန်ကားပိုင်ရှင် တစ်ဦးဖြစ်သည့် ကိုရှမ်းကြီးက CNI သတင်းဌာနသို့ ပြောသည်။

ကုန်တင်ကားများကိုတွေ့ရစဉ်

၎င်းက “အခု လောလောဆယ်ကတော့ လက်ရှိ အဲဒီလို ဝင်သွားပြီဆိုရင်တော့ တစ်ခုကောင်းတာက ကျနော်တို့ ကားအပျက်အစီးတို့၊ အတိုက်အခိုက်တို့၊ ကားလဲတာတို့ မဖြစ်တော့ဘူးလေနော်။ ပြုပြင်စရိတ် သက်သာသွားမှာ ပေါ့။ အဲလိုမျိုး အပျက်အစီး နည်းသွားမှာလေ။ ကိုယ်တိုင်ဝင်၊ ကိုယ်တိုင်ထွက်ဆိုတော့ အပျက်အစီး နည်းမယ်။ အန္တရာယ်လည်း ကင်းတယ်။ သူတို့ အထဲဝင်သွားပြီဆိုရင် မြန်မာကားသမားတွေက ဘယ်လောက် ရမလဲဆိုရင် ၃ သိန်းတော့ ရမှာပေါ့ မောင်းကြေး။ ဒီအပြင်မှာဆိုရင် ၂ သိန်းပေါ့။ အထဲ ပို့လိုက်ရင် ၃ သိန်းပေါ့။ ၁ သိန်း ပြန်ပိုလာ မှာပေါ့ သူတို့အတွက် ထပ်တိုးလာမှာလေ” ဟု ပြောသည်။

အစားထိုး ယာဉ်မောင်းစနစ်ဖြင့် လုပ်ဆောင်သည့် အချိန်တွင် တရုတ်အစားထိုး ယာဉ်မောင်းများသည် ကုန်တင်ကားများ မောင်းနှင်မှု မကျွမ်းကျင်ခြင်း၊ ကြမ်းတမ်းစွာ မောင်းနှင်ခြင်းများကြောင့် ကုန်ကားပျက်စီးမှုများနှင့် တိမ်းမှောက်မှုများ ဖြစ်ပေါ်သည့်အတွက် မြန်မာကုန်တင်ယာဉ်ပိုင်ရှင်များမှာ နစ်နာခဲ့ရသည်ဟု သိရသည်။

ထိုသို့ ကုန်တင်ယာဉ်များ ပျက်စီးရာတွင်လည်း တရုတ်နိုင်ငံဘက်မှ ပေးဆောင်သည့် လျော်ကြေးငွေသည် အနည်းငယ်သာရှိပြီး ကုန်တင်ယာဉ် ပိုင်ရှင်များက ငွေကြေးစိုက်၍ ပြုပြင်ကြရသည်ဟု ယာဉ်ပိုင်ရှင်များက ပြောသည်။

ထို့အပြင် မြန်မာယာဉ်မောင်းများ ကိုယ်တိုင် မောင်းနှင်ခွင့် ရမည်ဆိုပါက ကုန်တင်ကုန်ချ ပြုလုပ်မှုရာတွင် ယခင် ကထက် မြန်ဆန်လာမည် ဖြစ်သည်ဟု ကုန်ကားသမား ကိုသော်တာအောင်က CNI သတင်းဌာနသို့ ပြောသည်။

တရုတ်ဘက်ခြမ်းမှာ ရောက်နေတဲ့ ကုန်တင်ကားများကို တွေ့ရစဉ်

၎င်းက “ကိုယ့်ဟာကိုယ် မောင်းရတယ်ဆိုရင်တော့ ပိုပြီးတော့ အရင်ကထက်တော့ မြန်သွားမယ်လို့တော့ ထင်ပါ တယ်။ ကိုယ့်ဟာကိုယ် မောင်းတယ်၊ ကိုယ့်ဟာကိုယ် ကုန်သွားချရမယ်ဆိုရင်တော့။ ရှန်တိန်နဲ့ကျတော့ သူတို့က အထဲထဲမှာကျတော့ သူတို့က စီနီယာအတိုင်း ချတာတို့ ဘာတို့၊ တချို့ကျတော့လည်း ကျော်ချတာတို့ ဘာတို့ အထဲမှာ ရှိတာပေါ့ဗျာ။ ဥပမာ ငှက်ပျောခြံကတော့ သူ့ကားကို ခြံက လောပန်းက ပိုက်ဆံပေးပြီး အရင်ချခိုင်း တာတို့ အဲလိုမျိုး ရှိတာပေါ့ ရှန်တိန်နဲ့ကျတော့။ ကိုယ်ကိုယ်တိုင် ဝင်တာကျတော့ ကိုယ့်ကားနဲ့ကိုယ် စီနီယာ အတိုင်း ချတာချပေါ့။ ခြင်းတွဲတွေကတော့ ဝင်တဲ့ကား ဝင်နေကြတာပဲ။ ဒါပေမယ့် အစီးရေကတော့ အများကြီး တော့ မဟုတ်ဘူးပေါ့ဗျာ အလွန်ဆုံး ရှိရင်တော့ ၂၀၀ လောက်တော့ ရှိမှာပေါ့” ဟု ပြောသည်။

ကန်ပိုက်တီ နယ်စပ်ကုန်သွယ်ရေးမှတဆင့် တရုတ်နိုင်ငံသို့ တစ်သျှူးငှက်ပျော၊ ဆန်၊ ပြောင်းနှင့် ဖရဲသီးတို့ကို အဓိက တင်ပို့လျက်ရှိနေပြီး တရုတ်နိုင်ငံမှ အိမ်ဆောက်ပစ္စည်းများ၊ လျှပ်စစ်ပစ္စည်းများနှင့် လူသုံးကုန်များကို ပြန်လည် တင်သွင်းလျက်ရှိကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၄

နယ်စပ်မှတဆင့် ဆန်နှင့် ဆန်ကွဲ တင်ပို့မှုမှ ရရှိသည့် ပို့ကုန်ရငွေအပေါ် မူဝါဒ ပြောင်းလဲ သတ်မှတ်လိုက်ပြီဖြစ် ကြောင်း ဆန်ကုန်သည်များထံမှ သိရသည်။

ပို့ကုန်ရငွေ၏ ၆၅ ရာခိုင်နှုန်းကို ဗဟိုဘဏ် သတ်မှတ်ဈေးဖြင့် တစ်ရက်အတွင်း မြန်မာကျပ်ငွေဖြင့် မဖြစ်မနေ လဲလှယ်ကြရမည်ဖြစ်ပြီး ကျန်ရှိသည့် ၃၅ ရာခိုင်နှုန်းကို ဈေးကွက်ပေါက်ဈေးအတိုင်း သုံးစွဲခွင့်ပြုကြောင်း သတ်မှတ်လိုက်သည်ဟု ဆန်ကုန်သည်များက ပြောသည်။

ယခင် ဆန်နှင့် ဆန်ကွဲ တင်ပို့မှုတွင် ပင်လယ်ရေကြောင်းမှတဆင့် တင်ပို့မှုကိုသာ သတ်မှတ်ထားခြင်းဖြစ်ပြီး လက်ရှိတွင် နယ်စပ်ကုန်သွယ်ရေးတွင်ပါ သတ်မှတ်လိုက်ခြင်း ဖြစ်သည်။

ထို့ကြောင့် နယ်စပ်မှတဆင့် ဆန်တင်ပို့မှု လျော့ကျသွားနိုင်ကြောင်း၊ ဆန်ကုန်သည်များအနေဖြင့် အကျိုးအမြတ် ရရှိမှုအပေါ် တွက်ချက်ပြီး ရောင်းချကြရမည် ဖြစ်ကြောင်း မြန်မာနိုင်ငံ ဆန်စပါးကုန်သည်များအသင်းမှ တာဝန် ရှိသူတစ်ဦးက CNI သတင်းဌာနသို့ ပြောသည်။

၎င်းက “နယ်စပ်သမားတွေကတော့ အရင် ယွမ်တို့၊ ဘတ်တို့နဲ့ ရောင်းတာပေါ့။ သူက ၁၀၀ ရာခိုင်နှုန်း ရနေတော့ နည်းနည်း တွက်ခြေကိုက်တာပေါ့။ ၆၅ ကို သူတို့သတ်မှတ်တဲ့ နှုန်းနဲ့ဆိုရင်တော့ နယ်စပ်သမားလည်း သိပ်တွက်ခြေမကိုက်တော့ဘူး ထင်ပါတယ်။ နယ်စပ်ကတော့ ဆန်ထွက်တာ လျော့သွားနိုင်တာပေါ့။ ပင်လယ်ရေကြောင်း ကတော့ ဒီဟာမျိုးကို သတ်မှတ်ထားတာတော့ ကြာပြီဗျ ပြီးခဲ့တဲ့ ၅ လပိုင်း၊ ၆ လပိုင်းကတည်းက။ ဒီဘက် နယ်စပ် ကိုလည်း ပြောင်းမယ် ပြောင်းမယ် လုပ်နေတယ်။ အခုကတော့ တကယ်ပြောင်းတဲ့ သဘောမျိုး အခုကတော့ စာထွက်တယ်ဆိုတာ။ ကုန်သည်ကတော့ တွက်ပြီး ပြန်ရောင်းရမှာပေါ့။ ၆၅ ကို ၂၁၀၀ နဲ့ရမယ်။ ၃၅ ကို အပြင် ပေါက်ဈေးနဲ့ ရမယ်ဆိုရင် ဘယ်ဈေးနဲ့ ကိုက်နိုင်မလဲဆိုတာက တွက်ချက်ပြီး ရောင်းရမှာပေါ့။ ဒေါ်လာ ၁၀၀ ကို ကျနော်တို့က ၆၅ဒေါ်လာကို သူတို့သတ်မှတ်နှုန်းထားနဲ့ ရောင်းပေးရတယ်။ ကျန်တဲ့ ၃၅ ဒေါ်လာကို ကျနော်တို့ အပြင်ပေါက်ဈေးနဲ့ ရောင်းလို့ရတယ်” ဟု ပြောသည်။

 ဆန်ဆိုင်တစ်ခုကိုတွေ့ရစဉ်

နယ်စပ်ကုန်သွယ်ရေးတွင် ယခင်က ဆန်နှင့် ဆန်ကွဲမှလွဲပြီး ပဲမျိုးစုံ၊ ဆီထွက်သီးနှံ၊ ပြောင်း၊ ရာဘာ၊ ရေထွက် ပစ္စည်း၊ တိရစ္ဆာန်နဲ့ တိရစ္ဆာန်ထွက်ပစ္စည်းများ တင်ပို့မှုမှ ရရှိသည့် ပို့ကုန်ရငွေအပေါ်တွင်သာ ဗဟိုဘဏ်မှ မူဝါဒ သတ်မှတ်ထားသည်ကို တွေ့ရသည်။

မတ်လ ၁ ရက်နေ့တွင် နယ်စပ်မှတဆင့် ဆန်နှင့် ဆန်ကွဲတင်ပို့မှု ပို့ကုန်ရငွေအပေါ် မူဝါဒ သတ်မှတ်မည် ဖြစ်သည့် အတွက် နယ်စပ်ကုန်သည်များအနေဖြင့် ယင်းကာလမတိုင်ခင် ဆန်များကို အချိန်မှီ တင်ပို့နေရကြောင်း၊ ဆန်နှင့် ဆန်ကွဲများ အဝယ်ရပ်တန့်နေပြီး ချင့်ချိန်နေကြရသည်ဟု နယ်စပ်ကုန်သည်များက ပြောသည်။

တရုတ်နယ်စပ် ကုန်သွယ်ရေး၌ ဆန်နှင့် ဆန်ကွဲ တင်ပို့မှုမှ ရရှိသည့် ယွမ်ငွေများကို လဲလှယ်ရာတွင် ပြင်ပ ပေါက် ဈေးသည် တရုတ်ယွမ်ငွေ ၁ ယွမ်လျှင် မြန်မာကျပ်ငွေ ၄၂၆ ကျပ်ရှိကြောင်း၊ ဗဟိုဘဏ်မှ သတ်မှတ်သည့် ဈေးနှုန်း သည် ၃၀၈ ကျပ်သာ ရှိသည့်အတွက် ကုန်သည်များအနေဖြင့် ဆန်တစ်အိတ်လျှင် ၁ သောင်းကျပ်ခန့် နစ်နာဆုံးရှုံး သွားမည် ဖြစ်ကြောင်း မူဆယ် ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက CNI သတင်းဌာနသို့ ပြောသည်။

၎င်းက “လက်ရှိမှာ ဖေဖော်ဝါရီလကုန်မှ ၆၅၊ ၃၅ ကို ငွေကြေးမူဝါဒ ပြောင်းမယ်။ လက်ရှိမှာတော့ ယခင်အတိုင်းပဲ ၁၀၀ ရာခိုင်နှုန်းအပြည့် လွတ်လွတ်လပ်လပ် သုံးစွဲခွင့် ပေးတယ်။ ၁၀၀ ရာခိုင်နှုန်းအပြည့် လွတ်လွတ်လပ်လပ် သုံးစွဲခွင့် ပေးတယ်ဆိုတာက ဥပမာပြောရရင် အန်ကယ်တို့က တရုတ်ပြည်ကို ဆန်ရောင်းရင် ယွမ်ငွေ ၁၀၀ ရ တယ်။ အဲဒီ ၁၀၀ ကို လိုင်စင်ရ ပုဂ္ဂလိက ဘဏ်တွေမှာ သွားလဲမယ်ဆိုရင် ဒီကနေ့ဈေး ၄၂၆ ကျပ်ရမယ်။ ၆၅၊ ၃၅ သတ်မှတ်လိုက်တဲ့ အချိန်ဆိုရင် အန်ကယ်တို့က တရုတ်ပြည်ကို ဆန်ရောင်းလိုက်တယ်။ ယွမ်ငွေ ၁၀၀ ရတယ်။ ယွမ်ငွေ ၁၀၀ ရရင် ယွမ်ငွေ ၆၅ ယွမ်ကို ဗဟိုဘဏ် သတ်မှတ်ဈေးက ၃၀၈ ယွမ်ပဲ ရှိတယ်။ ၃၅ ရာခိုင်နှုန်းကတော့ ၄၂၆ နဲ့ ရမှာပေါ့နော် လွတ်လွတ်လပ်လပ် ပေါက်ဈေးအတိုင်း။ ဒါကြောင့် ၆၅ ရာခိုင်နှုန်းဟာ ၄၂၆ ကျပ် ရမယ့်အစား ၃၀၈ ကျပ်ပဲ ရတဲ့အတွက် ဆန်တစ်အိတ်မှာ ၁၀၀ ရာခိုင်နှုန်းအပြည့် လဲရတုန်းကနဲ့စာရင် ဆန်တစ်အိတ်ကို မြန်မာ ငွေ ၁ သောင်းကျော်လောက် နစ်နာတယ်။ ဆုံးရှုံးသွားတာကို တွေ့ရတယ်။ ချင့်ချိန်နေရတာပေါ့ လမကုန်မီ အမှီ ပို့ရတာပေါ့ ဆန်တွေကို။ ဒါပေမယ့် လောလောဆယ် ဝယ်စရာရှိတာတွေတော့ ရပ်တန့်သွားတယ်။ ရှိတာတွေကိုပဲ ပို့နေတယ်။ ဝယ်တာက အရင်လို အားကောင်းမောင်းသန်နဲ့ မဝယ်နိုင်တော့ဘူး။ ချင့်ချိန်ပြီးတော့ ဝယ်ရတယ်” ဟု ပြောသည်။

ဆန်အိတ်သယ်ရန် အလုပ်သမားများ ပြင်ဆင်နေစဉ်

ထို့နောက် ဆန်နှင့် ဆန်ကွဲတင်ပို့မှုမှ ပို့ကုန်ရငွေများ အပေါ်တွင် မူဝါဒ ပြောင်းလဲ ချမှတ်သည့်အတွက် နယ်စပ်ကုန် သည်များက ဆန်များကို ဈေးနှုန်းလျှော့ပြီး ဝယ်ယူမှု ပြုလာနိုင်ကြောင်း၊ ဈေးလျှော့ဝယ်သည့် အခါတွင် တောင်သူ များ ရောင်းချနိုင်၊ မနိုင်ကို စောင့်ကြည့်ရမည် ဖြစ်ကြောင်း ဘုရင့်နောင် ဆန်ကုန်စည်ဒိုင် အတွင်းရေးမှူး ဦးသန်းဦး က ပြောသည်။

၎င်းက “၆၅၊ ၃၅ သတ်မှတ်လိုက်ရင်တော့ သူတို့ရတဲ့ ပိုက်ဆံ နည်းသွားရင် ဆန်ဈေးက သူတို့ လျှော့ဝယ်ရမှာပေါ့။ လျှော့ဝယ်လို့ ဒီဘက်က တောင်သူဘက်က ရောင်းနိုင်သလား၊ မရောင်းနိုင်သလား ဆိုတာတော့ ဒါကတော့ အခြေ အနေတွေ စောင့်ကြည့်ရမှာပေါ့နော်။ ဟိုဘက်က ပို့ကုန်ရငွေက နည်းသွားရင် သူတို့မကိုက်ရင် ဈေးလျှော့ဝယ်မှာ ပဲ။ ဒါပေမယ့် ပစ္စည်းက ဒီဘက်မှာတော့ စပါးပေါ်တဲ့ ရာသီတော့ မဟုတ်သေးဘူး။ စပါးပေါ်တဲ့ ရာသီက ၄ လပိုင်း လောက်မှ နွေစပါးတွေ လှိုင်လှိုင်ပေါ်မှာဆိုတော့လေ။ ဒီကြားထဲမှာ စပ်ကူးမတ်ကူး ဖြစ်နေတာကိုး” ဟု CNI သတင်း ဌာနသို့ ပြောသည်။

မြန်မာနိုင်ငံတော် ဗဟိုဘဏ်၏ ဒေါ်လာ သတ်မှတ်နှုန်းထားသည် ၁ ဒေါ်လာ ၂၁၀၀ ကျပ်ဖြစ်ပြီး လက်ရှိ ပြင်ပ စျေးကွက် ၁ ဒေါ်လာ ၂၈၀၀ ကျပ်ဝန်းကျင်တွင် ဖြစ်ပေါ်နေသည်ကို တွေ့ရသည်။

ဗဟိုဘဏ်စျေးနှင့် ပြင်ပပေါက်စျေး ၁ ဒေါ်လာကို ကျပ် ၇၀၀ အထက် ကွာဟချက် ရှိနေခြင်းကြောင့် ကုန်သည်များ ပြည်ပတင်ပို့ရာတွင် တွက်ခြေကိုက်ရန်အတွက် ဈေးချဝယ်ယူလာနိုင်ကြောင်း၊ ထို့ကြောင့် နယ်စပ်ပို့ကုန် ဆန်၊ ဆန်ကွဲ စျေးကျဆင်းနိုင်သည်ဟု ကုန်သည်တချို့က သုံးသပ်ကြသည်။

CNI News

၂၀၂၃ ခုနှစ်၊ ဖေဖော်ဝါရီ ၁၃

Nok Air လေကြောင်းလိုင်းသည် ရန်ကုန်-ဘန်ကောက်တိုက်ရိုက် ပြေးဆွဲခြင်းအား မတ်လ ၂၆ ရက်နေ့တွင် ပြန်လည်ပြေးဆွဲမည်ဖြစ်ကြောင်း Nok Air Myanmar မှ တာဝန်ရှိသူတစ်ဦးက CNI သတင်းဌာနသို့ ပြောသည်။

လူမှုကွန်ရက်စာမျက်နှာပေါ်တွင် Nok Air လေကြောင်းလိုင်းသည် ရန်ကုန်-ဘန်ကောက် တိုက်ရိုက်ပြေးဆွဲခြင်းအား ရပ်နားလိုက်ပြီဆိုသော ပျံ့နှံ့နေမှုများနှင့် ပတ်သက်၍ Nok Air Myanmar မှ တာဝန်ရှိသူတစ်ဦးအား CNI သတင်းဌာနမှ ဆက်သွယ် မေးမြန်းလိုက်သည့်အခါတွင် ယခုကဲ့သို့ ပြန်လည် ဖြေကြားခြင်း ဖြစ်သည်။

၎င်းက “ပိတ်လိုက်တာတော့ မဟုတ်ဘူး။ အစ်မတို့ လောလောဆယ်တော့ cancelation တော့ ပြန်လုပ်ထား တယ်။ Flight schedule အပြောင်းအလဲလေး ရှိတာကြောင့်မို့လို့။ ဖေဖော်ဝါရီ ၁၂ ကနေ စရပ်တာ။ မတ်လ ၂၆ on work က ပြန်ပြီးတော့ ပြန်ရှိမှာပေါ့။ Flight က ပြန်ရှိမှာပါ။ Flight schedule အပြောင်းအလဲ ရှိတာကြောင့်မို့လို့ ကြားထဲက ရက်တွေကို ယာယီ ရပ်နားထားတယ်နော်။ မတ် ၂၆ ကနေစပြီးတော့ ပြောရရင်တော့ schedule အသစ်ပေါ့လေ။ Operation Date အသစ်တွေနဲ့ ပြန်ဆွဲမှာဖြစ်တဲ့အတွက်။ ဟိုလိုရပ်လိုက်တာ မဟုတ်တဲ့ အတွက် အစ်မတို့က တစ်စုံတစ်ရာ ထုတ်ပြန်မှာ မဟုတ်ဘူးပေါ့။ ဘာလို့လဲဆိုတော့ ရောင်းချဝယ်ယူလို့ ရနေတာတွေက ရပ်တန့်သွားတာမျိုးတွေ မရှိဘူး။ တစ်ခုပဲ ဒီဖေဖော်ဝါရီလ ကျန်ရှိလဝက်နဲ့ ဟိုဘက် မတ်လ လဝက်လောက် အထိကတော့ အစ်မတို့ Flight တွေ ရှိနေမှာ မဟုတ်ဘူးပေါ့နော်” ဟု CNI သတင်းဌာနသို့ ပြောသည်။

Nok Air လေကြောင်းလိုင်းကိုတွေ့ရစဉ်

ထို့ကြောင့် ထိုင်းနိုင်ငံသို့ Nok Air လေကြောင်းလိုင်းဖြင့် သွားရောက်ချင်သည့် ခရီးသွားများ အနေဖြင့် လက်မှတ် ဝယ်ယူခြင်းအား ပြန်လည်ပြေးဆွဲမည့် မတ်လ ၂၆ ရက်နေ့မှ စတင်ကာ ရွေးချယ်၍ ဝယ်ယူနိုင်ကြောင်းလည်း Nok Air Myanmar မှ တာဝန်ရှိသူတစ်ဦးက ပြောသည်။

Nok Air လေကြောင်းလိုင်းသည် ထိုင်းနိုင်ငံ အခြေစိုက်ဖြစ်ပြီး ဈေးနှုန်းသက်သာသည့် လေကြောင်းလိုင်း တစ်ခုလည်း ဖြစ်သည်။

CNI News

၂၀၂၃ ခုနှစ်၊ ဖေဖော်ဝါရီ ၁၃

ပြီးခဲ့သည့်လက ဆားကြမ်း တစ်ပိဿာလျှင် ၂၃၀ ကျပ် ရရှိသော်လည်း လက်ရှိမှာတော့ ဆားထွက်ရှိမှု များပြားလာခြင်းကြောင့် တစ်ပိဿာ ၁၁၀ ကျပ်သာ ရရှိတော့ကြောင်း ဆားတောင်သူများက CNI သတင်းဌာနသို့ ပြောသည်။

လက်ရှိ ဆားအသစ် ထွက်ပေါ်ချိန်တွင် ဆားဈေးနှုန်း ဆက်တိုက် ကျဆင်းနေသည့် အခြေအနေကို မြန်မာနိုင်ငံ အတွင်းရှိ နေလှန်းဆားတောင်သူများ ရင်ဆိုင်နေရကြောင်း ဆားတောင်သူများထံမှ သိရသည်

မွန်ပြည်နယ်မှ ဆားတောင်သူ ဦးလှတင်က “ ဆားဈေးနှုန်းက အခု ၁၁၀။ ဆားဈေးနှုန်း ကျတာက ဆားဖိုတွေက ဆားထွက်တာက ရာသီဥတု အခြေအနေ ကောင်းတဲ့အခါကျ ဆားထွက်တာပေါ့။ ဆားထွက်တော့ ဆားဈေးက မတည်ငြိမ်ဘူး ကျတာပေါ့။ အခုလက ဆားတွေက ထွက်တဲ့အခါကျတော့ ဆားဈေးက ပွဲစားသမားတွေက တက် တယ်။ ကြိတ်စက်သမားတွေက သူတို့မကိုက်ဘူး။ လျှော့ဝယ်တယ်ပေါ့။ လျှော့ဝယ်တဲ့ အခါကျတော့ အဝယ် နည်း သွားတာပေါ့။ နောက်ပြီး ဈေးက ဆားတောင်သူတွေက မရောင်းနိုင်တော့ အဲဒါကြောင့် ဆားတောင်သူတွေ အတွက် နည်းနည်း အခက်အခဲဖြစ်ပြီး ဈေးကွက် မတည်ငြိမ်ဘူးလေ။ ကျနော်တို့က အခုဆိုလို့ရှိရင် ၂၀၀ တော့ မမှန်းဘူးလေ။ ၁၅၀ လောက် ပုံမှန်ရနေတယ်ဆိုလို့ရှိရင်တော့ မဆိုးဘူးပေါ့။ ၁၅၀ အောက် ကျသွားရင် ကျနော်တို့ တောင်သူတွေက အကျိုးအမြတ် နည်းသွားတာပေါ့” ဟု CNI သတင်းဌာနသို့ ပြောသည်။

ဆားကန်များကိုတွေ့ရစဉ်

ထို့အပြင် ဆားဈေးနှုန်း ကျဆင်းနေသော်လည်း စက်သုံးဆီ၊ အလုပ်သမားစရိတ်၊ အထွေထွေကုန်ကျစရိတ်များ သည် မြင့်တက်နေခြင်းနှင့် ဆားများကို သိုလှောင်ထားရန် ဂိုဒေါင်များ မရှိသည့်အတွက် ရသည့်ဈေးဖြင့် ရောင်းချ နေရသည်ဟု ဆားတောင်သူများက ပြောသည်။

နေလှန်းဆား တစ်ဧက ထုတ်လုပ်ပါက ဆားပိဿာချိန် ၉ ထောင်ခန့် ထွက်ရှိပြီး တစ်ဧကအတွက် ကုန်ကျစရိတ် သည် ၉ သိန်းဝန်းကျင် ရှိကြောင်း၊ ထို့ကြောင့် လက်ရှိ ဖြစ်ပေါ်နေသည့် ဆားဈေးနှုန်းသည် ဆားတောင်သူများ အတွက် အကျိုးအမြတ် ရရှိမှု မရှိသလောက်ဖြစ်နေပြီး အရင်းမျှသာ ရှိနေသည်ဟု ဆားတောင်သူများထံမှ သိရ သည်။

ဆားဈေးနှုန်း ကျဆင်းခြင်းသည် စားသုံးသူအတွက် ကုန်ကျစရိတ် သက်သာစေသော်လည်း ဆားတောင်သူများက တော့ ထိခိုက်စေနိုင်ခြင်းကြောင့် ဈေးနှုန်းတည်ငြိမ်စေရေး ပြည်ပမှ ဆားတင်သွင်းနေမှုများကို ကြီးကြပ်ပေးရန် လိုအပ်ကြောင်း ရခိုင်ပြည်နယ် ဆားလုပ်ငန်းရှင်များအသင်း ဥက္ကဋ္ဌ ဦးသန်းဝင်းက ပြောသည်။

၎င်းက “ဆားထွက်တဲ့ရာသီမှာ ဈေးကျတယ်ဆိုတာက အတိုင်းအတာ တစ်ခုပဲ ကျရပါမယ်။ ဥပမာ တစ်ပိဿာကို ၄၀၀ နှုန်းဖြစ်တဲ့ဟာမှာ ၃၀၀ နှုန်း ဖြစ်ရပါမယ်။ အခုက ၄၀၀ နှုန်း ဖြစ်တဲ့ဟာမှာ ၁၀၀ နှုန်းကို ဆွဲချလိုက်တယ် ဆိုတော့ ဆားအရောင်းအဝယ် လုပ်တဲ့သူ ဆားပွဲစားတွေရဲ့ ပြောစကားကို ဆားတောင်သူတွေက ဂိုဒေါင်မရှိတော့ မိုးရွာမှာစိုးလို့ သူတို့က ရောင်းရတာ ရှိတယ်။ နိုင်ငံခြားက ဆားတွေ ပစ်စလက်ခတ် ဝင်နေတဲ့ဟာကို ကြပ်မတ်ပေး ဖို့ လိုပါတယ်။ အစိုးရရဲ့ သဘောကောင်းမှု အားနည်းချက်ကို ယူပြီးတော့ ဆားကို မှောင်ခိုသွင်းနေတဲ့သူ၊ ဆားကို တာဝန်ခံပြီးတော့ အကာအကွယ် ယူပြီးတော့ ဆားသမားတွေကို ပစ်စလက်ခတ် လုပ်ထားတဲ့သူတွေ ရှိနေသမျှ ကာလပတ်လုံး ကျနော်တို့ရဲ့ ဒေသခံ မြန်မာပြည်မှာရှိတဲ့ ဆားတောင်သူတွေ ဒုက္ခဖြစ်တာပေါ့ဗျာ။ နံပါတ် ၂ အချက်က ကျနော်တို့ တောင်သူတွေ ဆားထုတ်လာတဲ့ဟာတွေကို ယာယီဂိုဒေါင်လေးတွေ ဆောက်ပေးဖို့ လိုပါ တယ်။ နံပါတ် ၃ က အဲဒီထွက်ရှိလာတဲ့ ဆားကောင်း၊ ဆားခဲတွေ၊ ဆားကြမ်းတွေကို ကျနော်တို့ ဘင်္ဂလားဒေ့ရှ် နိုင်ငံနဲ့ တခြားနိုင်ငံတွေကို Export ပို့နိုင်အောင် ဆောင်ရွက်ပေးဖို့ လိုပါတယ်” ဟု CNI သတင်းဌာနသို့ ပြောသည်။

ဆားများသယ်နေကြစဉ်

ဆားတောင်သူများသည် မကြာခဏ ဆားကွင်းဖျက်မိုးနှင့် ကြုံနေရသောကြောင့် ပြီးခဲ့သည့် နှစ်နှစ်ဆက်တိုက် အရှုံးနှင့် ရင်ဆိုင်ခဲ့ရသည်ကို တွေ့ရသည်။

ဆားတောင်သူများက ဆုံးရှုံးမှု ရှိနေသော်လည်း ဆားပွဲစားများနှင့် ဆားကြိတ်သည့် လုပ်ငန်းရှင်များက အကျိုး အမြတ် ရရှိနေသည်ဟု ဆားတောင်သူများက ပြောသည်။

မြန်မာနိုင်ငံတွင် ဆားကို မွန်ပြည်နယ်၊ ရခိုင်ပြည်နယ်နှင့် ဧရာဝတီတိုင်းဒေသကြီးတို့တွင် ဆားလုပ်ငန်းကို လုပ်ကိုင်ကြပြီး နှစ်စဉ် ဆားတန်ချိန် ၄ သိန်းကျော် ထုတ်လုပ်လျက်ရှိကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၁

အောင်ဘာလေထီရောင်းအား ကျဆင်းနေသည့်အတွက် ထီလက်မှတ်များ အလေအလွင့် မဖြစ်စေရန်အတွက် ထီလက်မှတ် အက္ခရာ ၁၀ လုံးအစား ၇ လုံးအထိ လျှော့ချလိုက်ကြောင်း အောင်ဘာလေသိန်းဆုဌာနခွဲထံမှ သိရသည်။

ထီလက်မှတ် အက္ခရာ ၁၀ လုံး ထုတ်ရာတွင် အက္ခရာ ၆ လုံးခန့်သာ ရောင်းသည့်အတွက် မရောင်းရဘဲ ကျန်ရှိနေ သည့် အက္ခရာ ၄ လုံး၏ ထီလက်မှတ်များကို လစဉ် မီးရှို့နေရခြင်းကြောင့် နိုင်ငံတော် ဘဏ္ဍာငွေ လစဉ် သိန်း ၃၀၀ ကျော် ဆုံးရှုံးမှု ဖြစ်ပေါ်နေသည်ဟု ထီလုပ်ငန်းရှင်များက ပြောသည်။

လက်ရှိ ထီအက္ခရာကို ၇ လုံးအထိ လျှော့ချလိုက်ခြင်းကြောင့် ထီလက်ကျန်သည် အစောင်ရေ ၅ သောင်းခန့်သာ ကျန်ရှိတော့မည် ဖြစ်ရာ ထီကံစမ်းသူများအတွက် ထီပေါက်ရန် အခွင့်အလမ်း ပိုများသွားသည်ဟု မဟာလာဘံ ထီဆိုင်ပိုင်ရှင် ဦးအောင်ထွန်းခိုင်က CNI သတင်းဌာနသို့ ပြောသည်။

ထီပေါက်စဉ် ဖွင့်လှစ်နေစဉ်

၎င်းက “အခုဆိုလို့ရှိရင် လက်ကျန်ထီ နည်းသွားတဲ့အတွက်ကို ရောင်းရတဲ့အထဲမှာ များတယ်။ ရောင်းရတဲ့အထဲမှာ များနေတာကြောင့် ထီထိုးကံစမ်းတဲ့ သူတွေရဲ့ လက်ထဲမှာ ဆုမဲတွေ အများကြီး ရောက်သွားမှာ။ အဲသာ ထီထိုးသူ တွေအတွက် အားသာချက်ပေါ့။ ပေါက်ဖို့ နီးစပ်သွားတာပေါ့။ အက္ခရာ ၁၀ လုံး ထိုးတဲ့အချိန်နဲ့ အက္ခရာ ၇ လုံး ထိုး တဲ့အချိန်မှာ ဟိုကောင်က အုပ်ရေနည်းသွားတဲ့အတွက်ကို ထီထိုးတဲ့သူတွေအတွက် ပေါက်ဖို့ အခွင့်အရေး ပိုများ သွားတယ်လို့ ကျနော့်အနေနဲ့ သုံးသပ်ရပါတယ်။ အက္ခရာ ၁၀ လုံး ထုတ်တဲ့အချိန်မှာ အုပ်ရေ ၄ သိန်းကျော်က မရောင်းရတဲ့အထဲ ပါသွားတယ်။ အခုဆိုလို့ရှိရင် ၁ သိန်းတောင် ကျန်မှာ မဟုတ်တော့ဘူး” ဟု ပြောသည်။

ထီအက္ခရာ တစ်လုံးတွင် ထီလက်မှတ် အစောင်ရေ ၈၁၈၁၈ အုပ်ရှိပြီး ထီတစ်အုပ်၏ ကုန်ကျစရိတ်သည် လက်ရှိ တွင် ၁၀၀ ကျပ် ကျော်နေကြောင်း၊ ယခု ထီအက္ခရာ ၇ လုံးသာ ထုတ်ဝေလိုက်သည့်အတွက် ထီအုပ်ရေ ၅ သိန်း ကျော်ခန့်သာ ဖြစ်သွားသည်ဟု သိရသည်။

၂၀၂၃ ခုနှစ်၊ ဇန်နဝါရီလတွင် ထွက်ရှိသည့် ၄၇ ကြိမ်မြောက်တွင် ထီစာအုပ်ပေါင်း ၄၇၀၀၀၀ ကျော် ရောင်းချခဲ့ရပြီး ငွေကျပ်သန်းပေါင်း ၄၇၀၀ ကျော် ရရှိခဲ့သည်။

ထို့နောက် ရောင်းချငွေ၏ ၇၀ ရာခိုင်နှုန်းကို ထီဆုမဲအဖြစ် ချီမြှင့်ပေးခဲ့ကြောင်း အောင်ဘာလေသိန်းဆု ဌာနခွဲထံမှ သိရသည်။

နိုင်ငံရေး အပြောင်းအလဲ မဖြစ်ပွားခင် ကာလတွင် အောင်ဘာလေ ထီရောင်းအားသည် အက္ခရာ ၄၂ လုံး ထုတ်ဝေ ပြီး အုပ်ရေ ၃,၄၀၆,၃၅၆(သုံးဆယ့်လေးသိန်း ခြောက်ထောင် သုံးရာ ငါးဆယ့်ခြောက်)အုပ် ရောင်းချလျက်ရှိသည်။

ထို့နောက် အမြင့်ဆုံး ဆုငွေ ကျပ်သိန်း ၁ သောင်းခွဲအထိ ချီးမြှင့်နိုင်ခဲ့သော်လည်း လက်ရှိတွင် ဆုငွေ သိန်း ၅ ထောင်သာ အမြင့်ဆုံးအဖြစ် ချီးမြှင့်လျက်ရှိသည်။

CNI News

၂၀၂၃ ခုနှစ်၊ ဖေဖော်ဝါရီ ၁၁

ရွှေနှင့်ပြုလုပ်ထားသည့် လက်ဝတ်တန်ဆာပစ္စည်း အချောထည်များကို ဂျပန်နိုင်ငံသို့ တင်ပို့ရန်အတွက် ရန်ကုန်တိုင်း ရွှေလုပ်ငန်းရှင်များအသင်းမှ ပြင်ဆင်နေပြီး ဂျပန်နိုင်ငံမှ လုပ်ငန်းရှင်များသည်လည်း မြန်မာ့ ရွှေထည်များကို ဝယ်ယူရန်အတွက် ကမ်းလှမ်းလာကြောင်း ရန်ကုန်တိုင်းဒေသကြီး ရွှေလုပ်ငန်းရှင်များအသင်းထံမှ သိရသည်။

ယခင်က ဂျပန်နိုင်ငံသို့ ရွှေထည်ပစ္စည်းများ တင်ပို့ခဲ့သော်လည်း ကိုဗစ် - ၁၉ ရောဂါ ကူးစက်မှုများကြောင့် ရပ်တန့် ခဲ့ရပြီး လက်ရှိတွင် ဂျပန်နိုင်ငံက ဝယ်ယူရန် ကမ်းလှမ်းလာကြောင်း၊ မြန်မာနိုင်ငံမှလည်း တင်ပို့ရန်အတွက် အဆင် သင့်ရှိနေကြောင်း၊ လက်ရှိတွင် တင်ပို့ရန်အတွက် ဆွေးနွေးမှုများ လုပ်ဆောင်နေသည်ဟု ရန်ကုန်တိုင်းဒေသကြီး ရွှေလုပ်ငန်းရှင်များအသင်း ဥက္ကဋ္ဌ ဦးမျိုးမြင့်က CNI သတင်းဌာနသို့ ပြောသည်။

“အရင်တုန်းက ဂျပန်ကို ပို့တယ်လေ တောက်လျှောက်။ အခုနောက်ပိုင်း ကိုဗစ်နဲ့ပတ်သက်လို့ ရပ်သွားတယ် လုပ်ငန်းတွေ ရပ်သွားတယ်။ အခုကျတော့ ဟိုဘက်ကလည်း ပြန်ပြီးတော့ ကမ်းလှမ်းတယ်။ ဒီဘက်ကလည်း ပစ္စည်းရောင်းဖို့ ဘာညာအဆင်သင့် ရှိတယ်ပေါ့ ပန်းတိမ်သမားတွေကလည်း။ အခု ဆွေးတော့ ဆွေးနွေးနေကြပြီ။ အတိအကျတော့ မဖြစ်သေးပါဘူး။ ဒီဘက်ကလည်း ကိုဗစ်နဲ့ပတ်သက်လို့ ဘာစည်းကမ်းချက်တွေ ရှိလဲ။ သူတို့ လာတဲ့အခါမှာ ဒီမှာ ဟိုတယ်မှာ တစ်ပတ်နားပေးရတာတို့ ဘာတို့ အဲဒါမျိုး သူတို့က မလိုဘူးပေါ့။ သူတို့က ဒီဘက် က ကိုဗစ်စည်းကမ်းနဲ့ပတ်သက်လို့ မေးကြ မြန်းကြတာ ရှိတယ်။ နောက် ကုန်သွယ်ရေးလိုင်စင်နဲ့ ပတ်သက်လို့ မေးတာ ရှိတယ်။ သူတို့လာမယ်ဆိုရင်တော့ အရောင်းအဝယ် ပြန်ဖြစ်သွားပါပြီ။ ပို့နေကြပါပဲ အရင်ပို့တာကို ကိုဗစ် ကြောင့် ရပ်သွားတာပါ” ဟု ပြောသည်။

မြန်မာ့ရွှေထည်ပစ္စည်းများ

လက်ရှိ ပြည်တွင်းရွှေဈေးကွက်တွင် ရွှေတွင်းများမှ ရွှေကုန်ကြမ်းများ ဝင်ရောက်လျက်ရှိနေကြောင်း၊ ရွှေများ အလုံအလောက် ရှိကြောင်း၊ ဂျပန်နိုင်ငံသို့ တင်ပို့မည်ဆိုပါက ပြည်တွင်းရှိ ရွှေပန်းတိမ်လုပ်ငန်းများ အဆင်ပြေ လာမည်ဖြစ်ပြီး ရွှေဆိုင်များလည်း အရောင်းအဝယ် ကောင်းမွန်လာမည် ဖြစ်သည်ဟု ဥက္ကဋ္ဌ ဦးမျိုးမြင့်က ဆက် ပြောသည်။

ဂျပန်နိုင်ငံသို့ တင်ပို့သည့် ရွှေသည် ပမာဏ နည်းပါးသော်လည်း ပြည်ပသို့ ရွှေတင်ပို့နိုင်သည့်အတွက် ပြည်တွင်း ရွှေဈေးကွက်ကို အနည်းငယ် ထိန်းကျောင်း၍ ရနိုင်သည်ဟု ရွှေဈေးကွက် လေ့လာသုံးသပ်သူတစ်ဦးက ပြောသည်။

“ပြည်ပ ရွှေတင်ပို့နိုင်တာတော့ ကောင်းပါတယ်။ ပြည်တွင်းမှာလည်း ပစ္စည်းတွေ အိုင်မနေတော့ဘူးပေါ့။ အထွက် လည်းနည်းနည်းရှိတော့ ကျနော်တို့ ဈေးနည်းနည်းကျဖို့ အခြေအနေကောင်းတစ်ခု ဖြစ်ကောင်း ဖြစ်လာနိုင်တာ ပေါ့။ အခုက ဒေါ်လာလည်း မလှုပ်ဘူးလေ။ ရွှေတစ်ခုတည်းကပဲ ရောင်းလိုအား ဝယ်လိုအားနဲ့ ဟိုဘက် သွားလိုက်၊ ဒီဘက်သွားလိုက် ဖြစ်နေတဲ့အချိန်ဆိုတော့ အတည်တကျ ပြောလို့မရဘူးပေါ့။ တချို့ကျတော့ ဒီအချက်ကို ထောက်ပြီးတော့ လုပ်ကြတဲ့ စီးပွားရေးလုပ်ငန်းရှင်တွေလည်း ရှိတယ်လေ။ နည်းတာများတာ ဆိုတာထက် တချို့က ပွိုင့်တစ်ခုကို ထောက်ပြီး လုပ်ကြတာ ရှိတယ်။ ဒေတာလေး တစ်ခုပဲ။ ကမ္ဘာ့ဈေးကွက် တွေမှာဆိုရင် ဘာသတင်းထွက်ရင် ဘယ်လိုဖြစ်ရင် ရွှေဈေးက ကောင်းမယ်၊ ကျမယ် ဈေးက တက်မယ် ကျမယ် တကယ်တမ်း ကျတော့ အဲဒီသတင်းက အဲလောက်ကြီး မဟုတ်ဘူး။ ဒါပေမယ့် အဲဒီပွိုင့်ကို ထောက်ပြီးတော့ အရောင်းအဝယ် လုပ်ကြတဲ့ လူတွေပေါ်မှာလည်း မူတည်သေးတယ်” ဟု CNI သတင်းဌာနသို့ ပြောသည်။

ဂျပန်နိုင်ငံသို့ လက်ဝတ်တန်ဆာ ရွှေထည်ပစ္စည်းများ၊ အဆောင်ပစ္စည်း အချောထည်များဖြစ်သည့် ကျားရုပ်၊ ဆင်ရုပ်များစသည်တို့ကို တင်ပို့လျက်ရှိနေကြာင်း သိရသည်။

ကမ္ဘာ့ရွှေဈေးနှုန်း အနည်းငယ် ကျဆင်းလာသည့်အချိန်တွင် ဂျပန်နိုင်ငံသို့ ရွှေတင်ပို့မှု စတင်လာနိုင်ကြောင်း၊ ထို့နောက် တောင်ကိုရီးယားနိုင်ငံမှ မြန်မာနိုင်ငံတွင် ရွှေကို CMP (လက်ခစားစနစ်) ပုံစံမျိုးဖြင့် လာရောက် လုပ်ကိုင်ရန်အတွက် ရှိနေကြောင်း၊ လက်ရှိတွင် ကိုဗစ်စည်းကမ်းသတ်မှတ်ချက်များနှင့် ကုန်သွယ်ရေးဆိုင်ရာ သတ်မှတ်ချက်များအပေါ် စောင့်ကြည့်နေကြသည်ဟု ရွှေလုပ်ငန်းရှင်များအသင်းထံမှ သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၀

ထိုင်းနိုင်ငံတွင် ၂၀၂၂ ခုနှစ်အတွင်းမှ စတင်ကာ MOU စာချုပ်ဖြင့် ရောက်ရှိနေသည့် မြန်မာရွှေ့ပြောင်းလုပ်သား အများစုသည် လုပ်ငန်းခွင်အတွင်း ခေါင်းပုံဖြတ်ခံနေရပြီး အလုပ်သမားအခွင့်အရေး ဆုံးရှုံးမှုများဖြင့် ကြုံတွေ့နေ ကြကြောင်း ထိုင်းအခြေစိုက် အလုပ်သမားအရေး ဆောင်ရွက်သူများက CNI သတင်းဌာနသို့ ပြောသည်။

ထို MOU လုပ်သားများထဲ၌ အများစုသည် စာချုပ်ပါအတိုင်း အလုပ်မရရှိခြင်းကို အဓိကကြုံတွေ့နေရသလို အထောက်အထားများ သိမ်းဆည်းခံထားရခြင်း၊ အကြောင်းမဲ့ အလုပ်ထုတ်ခြင်း၊ လုပ်ခလစာနှင့် လုပ်ငန်းခွင် အတွင်း ထိခိုက်မှုများတွင် တာဝန်ယူမှုမရှိခြင်း စသည့် အခြေအနေများဖြင့် ကြုံတွေ့နေရကြောင်း သိရသည်။

မိမိတို့၏ တိုင်းပြည်တွင် တည်ငြိမ်အေးချမ်းမှု မရှိဖြစ်နေသည်ကို အခွင့်ကောင်းယူ၍ နှစ်နိုင်ငံအစိုးရချင်း သဘော တူညီမှု MOU စာချုပ်ဖြင့် လာရောက် လုပ်ကိုင်သည့် မြန်မာရွှေ့ပြောင်း လုပ်သားများအပေါ် ယခုကဲ့သို့ ခေါင်းပုံ ဖြတ်မှုများ ပြုလုပ်နေကြခြင်းဖြစ်ကြောင်း အလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။

 မြန်မာအလုပ်သမားများကိုတွေ့ရစဉ်

၎င်းက “ခေါင်းပုံဖြတ်တယ်ဆိုတာ လုပ်အားခ မပေးတာပဲ လုပ်အားခကိုပဲ ဖြတ်တယ်လို့ အများစုက နားလည် တယ်။ အလုပ်သမား တစ်ယောက်ချင်းရဲ့ ရသင့်ရထိုက်တဲ့ အခွင့်အရေး မရဘူးဆိုရင် ဒါ အလုပ်သမား ဥပဒေကို ချိုးဖောက်တာပဲ။

အလုပ်သမားအခွင့်အရေးကို ခေါင်းပုံဖြတ်တာပဲ။ MOU အလုပ်သမားတစ်ယောက် ဝင်လာရင် လူမှုဖူလုံရေးခ ဘတ် ၁၀၀၀ သူတို့သွင်းတယ်ပေါ့။ တကယ်တမ်းကျရင် အလုပ်သမား တစ်ယောက်ဟာ နေမ ကောင်းဖြစ်ရင် သူနဲ့သက်ဆိုင်တဲ့ ဆေးရုံဆေးခန်းကို ပို့ပေးရမယ်။ မြန်မာနိုင်ငံကနေ စပြီးထွက်လာ ကတည်းက သူသွင်းထားတဲ့ လူမှုဖူလုံရေးခတွေနဲ့ ကတ်ပြားတွေနဲ့အတူ ဆေးကုသခံယူခွင့် ရှိရမယ်။ နောက် အစိုးရဆေးရုံ တွေမှာ သူတို့ ကျန်းမာရေး အာမခံတွေ ရှိထားပြီးသား ဖြစ်တယ်ပေါ့။ ထိုင်းအစိုးရကလည်း သူကိုယ်တိုင်က သိ တယ်။ မြန်မာနိုင်ငံသား တစ်ဦး တစ်ယောက်ရဲ့ ဒုက္ခအခက်အခဲကို မြန်မာနိုင်ငံ အစိုးရကနေပြီးတော့မှ ထိရောက် တဲ့ အကူအညီ မပေးနိုင်သလို သူတို့အပေါ်ကိုလည်း တစ်စုံတစ်ရာ ဖိအားပေးတာမျိုး၊ တစ်စုံတစ်ရာ မှတ်ချက်ပေး တာမျိုး မလုပ်နိုင်ဘူးဆိုတာကို သူတို့သိတယ်။ ဘာလို့ဆို မြန်မာနိုင်ငံမှာက ကြီးမားတဲ့ပြဿနာတွေ နိုင်ငံရေး ပြဿနာတွေ ရှိနေတဲ့အခါ ကြတော့ အလုပ်သမားအရေးကို သိပ်ပြီးတော့မှ စိတ်ဝင်တစားနဲ့ လုပ်ပေးမယ့် အစိုးရ အဖွဲ့အစည်းဌာန မရှိဘူး” ဟု ပြောသည်။

ထိုသို့ စေလွှတ်ရာတွင် အေဂျင်စီအချို့အနေဖြင့် ထိုင်းအလုပ်ရှင်ဘက်မှ လိုအပ်သည့် လုပ်သားဦးရေထက် ပိုမို၍ စေလွှတ်မှုများရှိကြောင်း၊ စာချုပ်ပါ အလုပ်မဟုတ်သဖြင့် အဆင်မပြေသည့်အတွက် အလုပ်ထွက်မည် ဆိုပါက လည်း အလုပ်ထွက်စာအဖြစ် ငွေကြေးတောင်းခံမှုများ ရှိကြောင်းလည်း သိရသည်။

FED မှ အမှုဆောင်ဒါရိုက်တာ ဦးထူးချစ်က “သူတို့ရဲ့ မူအရ အလုပ်ထွက်ခွင့် လက်မှတ်ပေးရတယ်ပေါ့နော်။ အဲဒီ အလုပ်ထွက်ခွင့်ပြုကြောင်း လက်မှတ် ပေးတယ်။ တချို့ ကုမ္ပဏီတွေ တချို့ အေးဂျင့်တွေက အဲဒီလိုမျိုး လက်မှတ် မပေးတော့ အလုပ်သမားတွေ အနေနဲ့ တော်တော်ခက်ခဲတယ်ပေါ့။ သူတို့ကနေပြီးတော့လည်း အဲဒီ လက်မှတ် မရှိ ရင် တခြားလုပ်ငန်းရှင် အသစ်ကိုလည်း ဆက်လို့မရဘူး။ ဆက်လို့မရနိုင်ဘူး။ အဲဒါကြောင့်မို့လို့ တချို့ အလုပ် သမားတွေက တရားဝင်တာကနေ တရားမဝင် အလုပ်သမားတွေ ဖြစ်သွားတာမျိုးတွေ ကျနော်တို့ တွေ့နေရ တာပေါ့” ဟု ပြောသည်။

ထိုင်းရှိ မြန်မာသံရုံးရှေ့တွင် မြန်မာအလုပ်သမားများကိုတွေ့ရစဉ်

လက်ရှိ မြန်မာ MOU လုပ်သားများ ခေါင်းပုံဖြတ်ခံ နေရခြင်းတွင် အလုပ်ရှာဖွေရေး အေဂျင်စီများ၌ အဓိက ပိုအရေးကြီးကြောင်းနှင့် ၎င်းတို့လုပ်ကိုင်ရမည့် လုပ်ငန်းခွင်နှင့်ပတ်သက်၍ ထိုအေဂျင်စီများမှ မစေလွှတ်ခင်တွင် သေချာစွာ စိစစ်ထားသင့်ကြောင်း ထိုင်းအခြေစိုက် အလုပ်သမားအရေး ဆောင်ရွက်သူများက ပြောသည်။

ထို့အပြင် မြန်မာသံရုံးမှ တာဝန်ရှိသူများ အနေဖြင့်လည်း အလုပ်သမားအရေးနှင့် ပတ်သက်၍ တစ်စုံတစ်ရာ ထိထိ ရောက်ရောက် ဆောင်ရွက်ပေးခြင်းမရှိဘဲ ဆန္ဒပြတောင်းဆိုမှုများ ဖြစ်ပွားမှသာလျှင် လုပ်ဆောင်ပေးခြင်း ဖြစ် ကြောင်း ၎င်းတို့က သုံးသပ်သည်။

ကိုသားကြီးက “ ၂ ရာခိုင်နှုန်း လောက်တောင်မှ သေသွားလို့ သဂြိုလ်တဲ့အခါမှာ မျက်နှာသွားပြတာမျိုးတွေ၊ လျော်ကြေး ရတဲ့အခါမှာ မြန်မာနိုင်ငံမှာ ကျန်ခဲ့တဲ့ မိသားစုတွေကို မျက်နှာကောင်းလုပ်တာမျိုးတွေ ဒီလောက်ပဲ တွေ့ရတယ်။ အဲဒီတော့ မြေပြင်မှာ တကယ်ဖြစ်နေတဲ့ အလုပ်သမားတွေရဲ့ ဒုက္ခအခက်အခဲတွေကို မြန်မာအလုပ် သမား သံအရာရှိတွေ ကူညီတယ်ဆိုတာ မရှိသလောက်ကို ရှားပါတယ်။ အဲဒီတော့ မြန်မာတွေက ဘယ်သူ့ကို ကူညီရသလဲဆိုတာကို တဆက်တည်းပြောရင် ကျနော် အပါအဝင် ထိုင်းနိုင်ငံထဲမှာ အလုပ်သမားအရေး တက်ကြွ လှုပ်ရှားတဲ့ အဖွဲ့အစည်းတွေ၊ တစ်သီးပုဂ္ဂလိက ဖွဲ့စည်းထားတဲ့သူတွေ၊ မြန်မာအချင်းချင်းတွေ ကူညီတာကိုပဲ တွေ့ရတယ်။ ဒါဟာ ဘာကိုသွားပြီးတော့ ညွှန်းနေတာလဲဆိုတော့ ကျနော်တို့နိုင်ငံရဲ့ ဝန်ကြီးဌာနတွေဟာ အဂတိ မကင်းတာရယ်၊ နေရာတစ်စုံတစ်ရာရလာရင် မိမိတို့ရဲ့ မိသားစု အကျိုးစီးပွား အတွက်ပဲ စီးပွားရေးရှာတာကို တွေ့နေရတယ်”ဟု ပြောသည်။

မြန်မာသံရုံးမှ တာဝန်ရှိသူများ အနေဖြင့် အလုပ်သမား အရေးနှင့်ပတ်သက်ပြီး သေချာစွာ ကိုင်တွယ်ဖြေရှင်းပေးပါ က ယခုကဲ့သို့ ခေါင်းပုံဖြတ်ခံရခြင်းများ ကြုံရမည် မဟုတ်ကြောင်းလည်း ထိုင်းအခြေစိုက် အလုပ်သမားအရေး ဆောင်ရွက်သူများက ပြောသည်။

မြန်မာနိုင်ငံရှိ အလုပ်သမားဝန်ကြီးဌာနမှ ထိုင်းနိုင်ငံသို့ MOU စနစ်ဖြင့် မြန်မာရွှေ့ပြောင်း လုပ်သားများအား ပြန်လည်စေလွှတ်မှုကို ၂၀၂၂ ခုနှစ်၊ မေလတွင် စတင်ခဲ့ခြင်းဖြစ်ပြီး လက်ရှိအချိန်ထိ ထိုင်းနိုင်ငံသို့ MOU လုပ်သား စေလွှတ်ထားမှုမှာ လူဦးရေ တစ်သိန်းဝန်းကျင်ခန့် ရှိပြီဖြစ်ကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၁၀

ယခုနှစ် ကြံစိုက်ရာသီတွင် ကြံ ၁ တန်၏ ကြမ်းခင်းဈေးသည် ၉ သောင်းကျပ် ရှိသော်လည်း လက်ရှိ ကြံရာသီ အကုန်၌ သကြားဈေးနှုန်း ကောင်းမွန်သည့်အတွက် ကြံတစ်တန်လျှင် ၉ သောင်းခွဲနှင့် ၁ သိန်းကျပ်အထိ သကြား စက်ရုံများက ဈေးနှုန်းတိုးမြှင့် ဝယ်ယူလာကြသည်ဟု ကြံစိုက်တောင်သူများထံမှ သိရသည်။

တောင်သူများအနေဖြင့် သကြားစက်ရုံများနှင့် ကြံတစ်တန် ၉ သောင်းဖြင့် စာချုပ်ချုပ်ဆိုထားသော်လည်း ပြည်တွင်း သကြားဈေးနှုန်း ကောင်းမွန်နေခြင်း၊ တရုတ်နှင့် ဗီယက်နမ်နိုင်ငံတို့မှ သကြားဝယ်ယူမှုတို့ကြောင့် သကြားဈေးကွက် ကောင်းမွန်နေသည့်အတွက် သကြားစက်ရုံများမှ ကြံဈေးနှုန်းကို တိုးမြှင့်ပေးခြင်း ဖြစ်သည်ဟု စစ်ကိုင်းတိုင်းဒေသကြီးမှ ကြံစိုက်တောင်သူ ဦးမောင်ဆွေက CNI သတင်းဌာနသို့ ပြောသည်။

၎င်းက “ကြံဈေးနှုန်းက ၉ သောင်းခွဲ။ သကြားဈေး ကောင်းတာကိုး။ သကြားကလည်း ဗီယက်နမ် ထွက်တာနဲ့ ဘာနဲ့ဆို စက်ရုံတွေက တောင်သူတွေ ပိုစိုက်အောင်လို့ ပိုပေးတာပေါ့လေ။ တကယ်တမ်းက ၉ သောင်းနဲ့ စာချုပ် ချုပ်ထားတာပေါ့လေ။ သူတို့လည်း ဈေးတက်တော့ ဈေးရတော့ တောင်သူကို ပြန်ပေးတာပေါ့နော်။ ပြည်တွင်း သကြားဈေးပေါ့နော် ဈေးကွက်အရ တရုတ်ဘက်ကလည်း တောင်းတယ်။ ဗီယက်နမ်ကလည်း တောင်းတာကိုး။ အဲဒီအခါကျတော့ သကြားဈေးကွက် ကောင်းတာပေါ့နော်။ ပြီးခဲ့သည့် နှစ်ကတော့ ၆ သောင်းလေ။ ဒီနှစ်ကတော့ စကတည်းက ၉ သောင်းလေ။ အခု ၉ သောင်းနဲ့ စာချုပ်ချုပ်ပြီး ကြံရာသီ ပြီးတော့မှာဆိုတော့ သူတို့ဈေးနှုန်းကို ပြန်တိုးပေးတာပေါ့။ ၉ သောင်းမဟုတ်ဘဲ ၉ သောင်းခွဲပေါ့နော်။ ရှမ်းမြောက် ၉ သောင်းခွဲပါ။ ငွေရည်ပုလဲနဲ့ သင်း ရွှေရည်က ၉ သောင်းခွဲ။ ၁ သိန်းဆိုတာက မြဘုရင်ကတော့ လိုင်းပေါ်မှာတော့ တွေ့တယ်။ ၁ သိန်း ဝယ်တယ် ဆိုတာက သူတို့မှာ ကြံမရှိဘူးလေ” ဟု ပြောသည်။

ကြံစိုက်ခင်းတစ်ခုကိုတွေ့ရစဉ်

ကြံတစ်တန် ၁ သိန်းကျပ်ဖြင့် ဝယ်ယူမည်ကို ရှမ်းပြည်နယ်တောင်ပိုင်းရှိ မြဘုရင် သကြားစက်ရုံက စတင် ကြေညာခြင်းဖြစ်ပြီး ကျန်ရှိသည့် ရှမ်းပြည်နယ် မြောက်ပိုင်းရှိ မိုင်းရယ်သကြားစက်ရုံနှင့် ငွေရည်ပုလဲ သကြား စက်ရုံ၊ စစ်ကိုင်းတိုင်းဒေသကြီးအတွင်းရှိ သကြားစက်ရုံများကမူ ကြံတစ်တန် ၉ သောင်းခွဲကျပ်ဖြင့် ဝယ်ယူမှု ရှိကြောင်း သိရသည်။

လက်ရှိ ကြံဈေးနှုန်းသည် စက်ရုံအရောက် စျေးနူန်းဖြစ်ပြီး ပြည်တွင်း ကြံစိုက်ရာသီ ကာလတစ်လျှောက်တွင် အမြင့်ဆုံး စံချိန်တင် ဈေးနှုန်းတစ်ခုဖြစ်ကြောင်း၊ တောင်သူများအတွက်လည်း အဆင်ပြေသည့် စျေးတန်းတစ်ခု ဖြစ်ကြောင်း သိရသည်။

ထို့အပြင် သကြားစက်ရုံများက ကြံစိုက်တောင်သူများအား စိုက်စရိတ်တချို့ ထုတ်ချေးပေးသည့်အတွက် ယခုနှစ် ကြံစိုက်ရာသီတွင် ကြံစိုက်တောင်သူများအနေဖြင့် ဧက တိုးချဲ့ စိုက်ပျိုးလာနိုင်သည်ဟု စစ်ကိုင်းတိုင်းဒေသကြီး၊ ကသာမြို့နယ်မှ ကြံစိုက်တောင်သူတစ်ဦးက ပြောသည်။

၎င်းက “စိုက်ပျိုးမှု အခြေအနေက ၃၀ ရာခိုင်နှုန်း တိုးမယ်။ ၂၀ ရာခိုင်နှုန်း၊ ၃၀ ရာခိုင်နှုန်း၊ ဒီဈေးနဲ့ဆိုရင် တောင်သူ တွေက စိုက်နိုင်တယ်လေ စိုက်ပျော်တယ်လေ။ သူတို့ကလည်း ဘာဖြစ်လို့ တိုးတာလဲဆို အကြောင်းရင်က စက်ရုံ တွေက ဟိုတုန်းက စိုက်ပျိုးစရိတ် မပေးဘူး။ အခု စိုက်ပျိုးစရိတ်ကို ထုတ်ပေးတယ် ထုတ်ချေးပေးတယ်ပေါ့။ ငွေသား ၃ သိန်း မြေဆီ ၂ သိန်း၊ ၅ သိန်းပေါ့ အဲဒါကတော့ ဝေမာ(သကြားစက်)က ပေးတယ်” ဟု CNI သတင်းဌာန သို့ ပြောသည်။

ကြံများရောင်းချနေစဉ်

ကြံစိုက်ပျိုးရာတွင် လက်ရှိ၌ စိုက်ပျိုးရေး သွင်းအားစုများဖြစ်သည့် ဓာတ်မြေသြဇာ၊ ပိုးသတ်ဆေး အပါအဝင် စိုက်ပျိုးရေး ဆေးမျိုးစုံ၊ စက်သုံးဆီစျေး၊ အလုပ်သမား ငှားရမ်းခများသည် အရင်နှစ်များထက် မြင့်တက်နေသော ကြောင့် ကြံတစ်ဧက စိုက်ပျိုးပါက ၈ သိန်းမှ ၁၀ သိန်းအထိ ကုန်ကျသည်ဟု ကြံစိုက်တောင်သူများက ပြောသည်။

ရာသီဥတု ကောင်းမွန်ပါက ကြံတစ်ဧကလျှင် ကြံတန်ချိန် ၃၀ ခန့် ထွက်ရှိသည်ဟု ကြံစိုက်တောင်သူများထံမှ သိရသည်။

ကြံကို ရှမ်းပြည်နယ် မြောက်ပိုင်းနှင့် တောင်ပိုင်း၊ စစ်ကိုင်းတိုင်းဒေသကြီး အထက်ပိုင်းတို့တွင် အများဆုံး စိုက်ပျိုး ကြပြီး ပဲခူးတိုင်းအရှေ့ပိုင်းနှင့် အနောက်ပိုင်း၊ မန္တလေးတိုင်းဒေသကြီးနှင့် မကွေးတိုင်းဒေသကြီး၊ ရန်ကုန်းတိုင်း ဒေသကြီး ဥက္ကံမြို့နယ်တို့တွင် စိုက်ပျိုးမှုများ ရှိကြောင်း သိရသည်။

CNI News

၂၀၂၃ ခုနှစ်၊ ဖေဖော်ဝါရီ ၉

နယ်စပ်ကုန်သွယ်ရေး ဂိတ်ပေါက်များဖြစ်သည့် မြဝတီ၊ မူဆယ်နှင့် ချင်းရွှေဟော် နယ်စပ်ကုန်သွယ်ရေးတွင် ကုန်ပစ္စည်းသယ်ဆောင်ခွင့်(QR Code) ရရှိပြီးမှသာ ကုန်ပစ္စည်းတင်ပို့ခွင့်ပြုသည့်စနစ်ကို ၂၀၂၃ ခုနှစ် ဖေဖော်ဝါရီ ၁၁ ရက်မှစတင်၍ အသုံးပြုမည်ဖြစ်သည်။

ထို့နောက် ယာဉ်တစ်စီးလျှင် ကျပ် ၅၀၀၀ နှုန်း အခွန်ကောက်ခံသွားမည်ဖြစ်ကြောင်း သိရသည်။

ကုန်သွယ်ရေးဦးစီးဌာန အနေဖြင့် နယ်စပ်ကုန်သွယ်ရေးမှ ပြည်ပသို့ ပဲမျိုးစုံ၊ ပြောင်း၊ နှမ်းနှင့် မြေပဲတင်ပို့ခြင်းကို စနစ်တကျ ကြပ်မတ် ဆောင်ရွက်နိုင်ရေးအတွက် ပို့ကုန်လိုင်စင် ရရှိထားသော ကုန်ပစ္စည်းများ သယ်ဆောင်သည့် ပို့ကုန်ယာဉ်များအနေဖြင့် ကုန်ပစ္စည်း သယ်ဆောင်ခွင့်လက်မှတ်(မျှော)ကို ကြိုတင်ရယူပြီးမှသာ သယ်ဆောင်ခွင့် ပြုလျက်ရှိသည်။

လက်ရှိတွင် လုပ်ငန်းရှင်များ ပိုမိုလွယ်ကူလျင်မြန်စွာ ဆောင်ရွက်နိုင်ရန်အတွက် ကုန်ပစ္စည်းသယ်ဆောင်ခွင့်ကို အွန်လိုင်းစနစ်ဖြင့် ခွင့်ပြုထုတ်ပေးခြင်း ဖြစ်ကြောင်း သိရသည်။

QR Code ဖြင့် ဆောင်ရွက်ရာတွင် လျင်မြန်စွာ ဆောင်ရွက်ပေးရန် လိုအပ်ကြောင်း၊ QR Code စစ်ဆေးသည့် ဂိတ် များတွင် အင်တာနက်လိုင်း ကောင်းမွန်ရန်လိုအပ်ကြောင်း မြန်မာနိုင်ငံ ပြောင်းလုပ်ငန်းအသင်း ဒုတိယဥက္ကဋ္ဌ ဦးသန့်ဇင်ထွန်းက CNI သတင်းဌာနသို့ ပြောသည်။

 မြဝတီကုန်သွယ်ရေးဇုန်ကိုတွေ့ရစဉ်

၎င်းက “QR Code ဖတ်တဲ့ နေရာမှာပေါ့နော်၊ သက်ဆိုင်ရာ ကုမ္ပဏီတွေ ဒီဘက်က လျှောက်တဲ့နေရာမှာ အချက် အလက် ပြည့်စုံတယ်၊ ဒါပေမယ့် မကျလာဘူးပေါ့နော်။ အကြောင်းအမျိုးမျိုးကြောင့် မကျလာဘူးဆိုရင်လည်း ဒါက သိပ်အဆင်မပြေဘူးပေါ့နော်။ တစ်ခါ စစ်ဆေးတဲ့ ဂိတ်တွေမှာလည်း ဒီ QR Code ကို စစ်ဆေးဖို့အတွက် သူတို့ရဲ့ system က ၁၆ မိုင်ဂိတ်မှာရှိတဲ့ စစ်ဆေးတဲ့ ဆော့ဝဲလ်သည် လားရှိုးနဲ့ သိန်းနီကြားမှာရှိတဲ့ ရေပူဂိတ်က စစ်လို့ မရ ဘူး။ အဲတော့ သူ့နေရာမှာပဲ သူစစ်လို့ရတယ်။ ၁၆ မိုင်ဂိတ်ကို ဖြတ်ပြီပေါ့နော် မူဆယ်ကိုသွားဖို့ ၁၆ မိုင်ဂိတ်မှာရှိတဲ့ QR Code စစ်ဆေးတဲ့သူသည် ကျွမ်းကျင်တဲ့သူက တစ်ယောက်တည်း ရှိတယ်၊ အဲဒီတစ်ယောက်ကလည်း အကြောင်းကြောင်းကြောင့် အစည်းအဝေး သွားတက်နေတယ်ဆို၊ မျှော်မှန်းမထားတဲ့ ကိစ္စနဲ့ အပြင်ထွက် နေတယ် တို့ အဲလိုမျိုး ဖြစ်သွားရင်တော့ QR Code စစ်ဖို့အတွက်ကို ကားတွေက တန်းစီ စောင့်နေရမှာပေါ့နော်။ အဲဒါလေး တစ်ချက်တော့ ရှိတယ်။ အဲဒီစခန်းမှာ အင်တာနက်လိုင်းက ကျနေတယ်ပေါ့နော်၊ ဒါက အင်တာနက်ပေါ်မှာ အခြေခံတော့ အင်တာနက်လိုင်း ကျနေလို့ QR Scan ဖတ်လို့ မရလို့ ကြန့်ကြာနေရင်လည်း နှောင့်နှေးစရာတွေ ဖြစ်တာပေါ့နော်” ဟု ပြောသည်။

ထို့နောက် နယ်စပ်ပို့ကုန်လိုင်စင် လျှောက်ထားရန် မလိုသည့် ကုန်စည်များအနေဖြင့် ကုန်ပစ္စည်းသယ်ဆောင်ခွင့် QR Code ကို တိုက်ရိုက် လျှောက်ထားနိုင်ကြောင်း သိရသည်။

ကုန်ပစ္စည်းသယ်ဆောင်ခွင့်(QR Code) ဖြင့် သတ်မှတ်ထားသည့် ကုန်စည်တွင် လယ်ယာထွက်သီးနှံ မပါဝင်သည့် အတွက် ဆန်တင်ပို့မှုအပေါ် သက်ရောက်မှု မရှိဘူးလို့ မူဆယ် ဆန်စပါးကုန်စည်ဒိုင် ဒုတိယဥက္ကဋ္ဌ ဦးမင်းသိန်းက CNI သတင်းဌာနသို့ ပြောသည်။

၎င်းက “QR Code ထုတ်လိုက်လို့လည်း ဘာမှလည်း ရောင်းတာ ဝယ်တာမှာ ဘာမှ မထိခိုက်ပါဘူး။ တို့က ပုံမှန် သွားတာ တို့က တရားဝင် သွားတဲ့ပစ္စည်း။ သူတို့ရေးထားတာက အရင်တုန်းက ကန့်သတ်ပစ္စည်း QR Code နဲ့ သွားရမယ့်ဟာတွေက အဲလိုပါတယ်။ ဘာပဲပြောပြော တို့ကိုတော့ မထိခိုက်ဘူး ဆန်နဲ့ ဆန်ကွဲကိုတော့ QR Code လုပ်တဲ့ကိစ္စက။ ပဲကတော့ ဆီထွက်သီးနှံတစ်မျိုး။ တို့ကျတော့ လယ်ယာထွက်သီးနှံတစ်မျိုး အဲဒါ မတူလို့ သူက ဆီထွက်သီးနှံအုပ်စုထဲ ပါနေတာ” ဟု ပြောသည်။

မြန်မာနိုင်ငံ နယ်စပ်ကုန်သွယ်ရေး ဂိတ်ပေါက်များ ဖြစ်သည့် မူဆယ်၊ မြဝတီနှင့် ချင်းရွှေဟော် ကုန်သွယ်ရေး လမ်းကြောင်းများမှ နယ်စပ်ကုန်တင်ယာဉ်များ အနေဖြင့် ကုန်ပစ္စည်းသယ်ဆောင်ခွင့် QR Code ကို အွန်လိုင်း ကနေ ကြိုတင် လျှောက်ထားရမည်ဖြစ်ကြောင်း သိရသည်။

ကုန်ကားများကိုတွေ့ရစဉ်

အဆိုပါ စနစ်ဖြင့် ကုန်ပစ္စည်းသယ်ဆောင်ခွင့် ပြုခြင်းကို ၂၀၂၃ ခုနှစ်၊ ဖေဖော်ဝါရီ ၁ ရက်မှ ၁၀ ရက်အထိ စမ်းသပ် ကာလအဖြစ် စတင် အသုံးပြုသွားမည်ဖြစ်ကြောင်း၊ စမ်းသပ်ကာလအတွင်း အခကြေးငွေ ကောက်ခံခြင်း မပြုဘဲ ခွင့်ပြုသွားမည်ဖြစ်ကြောင်း သိရသည်။

ပို့ကုန်ပစ္စည်းသယ်ဆောင်သည့် ယာဉ်များသည် ကုန်သွယ်မှုလမ်းကြောင်း တစ်လျှောက် ကုန်စည် စစ်ဆေးရေး ဂိတ်များရှိ တာဝန်ကျ ဝန်ထမ်းများထံသို့ အဆိုပါ QR Code အား ပြသ၍ စစ်ဆေးမှု ခံယူရမည်ဖြစ်ကြောင်း၊ QR Code ပြသ စစ်ဆေးခံနိုင်ခြင်း မရှိသည့် ယာဉ်များအား သက်ဆိုင်ရာ စစ်ဆေးရေးဂိတ်များမှ ဆက်လက် ထွက်ခွာ ခွင့် ပြုမည်မဟုတ်ကြောင်း သိရသည်။

ထို့နောက် အဆိုပါ ယာဉ်များအနေဖြင့် ကုန်ပစ္စည်းသယ်ဆောင်ခွင့်ကို Online မှ ပြန်လည် လျှောက်ထားပြီး QR Code ရရှိပြီးမှသာ ဆက်လက် ထွက်ခွာခွင့် ပြုမည်ဖြစ်ကြောင်း သိရသည်။