- By CNI
- Category: နိုင်ငံရေး
- Hits: 964
CNI News
၂၀၂၂ ခုနှစ်၊ ဒီဇင်ဘာ ၂၀
ဥရောပသမဂ္ဂ(EU)နှင့် အာဆီယံ ထိပ်သီးအစည်းအဝေး ခေါင်းဆောင်များ၏ ပူးတွဲ ကြေညာချက်တွင် အမျိုးသား ညီညွတ်ရေးအစိုးရ (NUG)ကို မြန်မာပြည်သူများ၏ တရားဝင် ကိုယ်စားလှယ်အဖြစ် ထောက်ခံခြင်း မရှိကြောင်း NUG က ထုတ်ပြန်ခဲ့သည်။
၂၀၂၂ ခုနှစ်၊ ဒီဇင်ဘာလ ၁၄ ရက်က ပြုလုပ်ခဲ့သည့် EU နှင့် ASEAN ခေါင်းဆောင်များ အစည်းအဝေးတွင် မြန်မာ နိုင်ငံအတွင်း အကြမ်းဖက်မှုများ ချက်ချင်းရပ်တန့်ရန်၊ နိုင်ငံရေး အကျဉ်းသားများ အားလုံးကို လွှတ်ပေးရန်နှင့် လူသားချင်း စာနာမှု အကူအညီများအား ခွဲခြားဆက်ဆံမှုမရှိဘဲ ထိရောက်စွာ ပေးအပ်နိုင်ရေးတို့အတွက် တောင်း ဆို ထားသည်။
အဆိုပါ တောင်းဆိုမှုများသည် အသစ်အဆန်း မဟုတ်သကဲ့သို့ အရေးပါသည့် အချက်အလက်များလည်း မပါဝင်ဘဲ ကျန်ရှိနေသည်ကို တွေ့ရှိရကြောင်း NUG က ဒီဇင်ဘာ ၁၉ ရက်တွင် ထုတ်ပြန်ခဲ့သည်။
ဒီမိုကရေစီအရေး တောင်းဆိုနေကြသူများကိုတွေ့ရစဉ် (GETTY IMAGES)
NUG က “ပူးတွဲကြေညာချက်တွင် အမျိုးသားညီညွတ်ရေးအစိုးရအား မြန်မာပြည်သူများ၏ တရားဝင် ကိုယ်စား လှယ် အဖြစ် ထောက်ခံကြောင်း ဖော်ပြထားခြင်း မရှိသည့်အပြင် တရားမဝင် အကြမ်းဖက် စစ်အာဏာရှင်များ၏ ကြမ်းကြုတ် ယုတ်မာ ရက်စက်မှုများကို ရှုတ်ချကြောင်း ဖော်ပြရန်လည်း ပျက်ကွက်ခဲ့သည်” ဟု ထုတ်ပြန် ချက် တွင် ဖော်ပြထားသည်။
ပြည်သူလူထု၏ ထောက်ခံမှုကို ရရှိရန် ပြည်တွင်းတွင် အဓိကထား ကြိုးစားစေချင်ကြောင်း မြန်မာ့နိုင်ငံရေး လေ့လာသုံးသပ်သူ ဒေါက်တာလှကျော်ဇောက CNI သတင်းဌာနသို့ ပြောသည်။
ဒေါက်တာလှကျော်ဇော်က “NUG ကို နိုင်ငံတကာက ထောက်ခံခံ၊ မထောက်ခံခံ အရေးမကြီးပါဘူး။ အရေးကြီး တာ ပြည်သူလူထုက ဆက်ထောက်ခံဖို့ပဲ၊ အဲဒီအတွက်ပဲ NUG က ဆက်ကြိုးစားသင့်တယ်၊ NUG အနေနဲ့က ပြည်သူလူထုကို ပိုမိုစည်းရုံးအောင်၊ ပိုမိုသွေးစည်းအောင် ပြည်သူလူထုရဲ့ ထောက်ခံမှုကို ရအောင် ပြည်တွင်းမှာ ပဲ အဓိကထားပြီးတော့ ကြိုးစားစေချင်တယ်၊ နိုင်ငံတကာမှာလည်း ဝင်လုပ်ပါ၊ မလုပ်နဲ့လို့တော့ မပြောပါဘူး။ လုပ်ဖို့လိုပါတယ်၊ ဒါပေမဲ့ နိုင်ငံကြီးတွေရဲ့ သဘောထားကို ကိုယ်ကသိထားဖို့ လိုတာတစ်ခုပါပဲ” ဟု ပြောသည်။
မြန်မာပြည်အတွင်း ငြိမ်းချမ်းရေးနှင့် လုံခြုံရေး မတည်မငြိမ် ဖြစ်ပေါ်နေပြီး ဘက်ပေါင်းစုံ အကျပ်အတည်းများကို ကူညီဖြေရှင်းရန် EU နှင့် ASAEN တို့မှ ကြိုးပမ်း အားထုတ်မှုများအား မိမိတို့အနေဖြင့် ပူးပေါင်းဆောင်ရွက်ရန် အသင့်ရှိကြောင်း NUG ၏ ထုတ်ပြန်ချက်တွင် ဖော်ပြထားသည်။
၂၀၂၁ ခုနှစ်က ဒီမိုကရေစီအရေး တောင်းဆိုသူများနဲ့ လုံခြုံရေးအဖွဲ့တို့ ထိပ်တိုက်တွေ့ဆုံစဉ် (GETTY IMAGES)
NUG သည် ပြည်သူရွေးချယ် တင်မြောက်ထားသည့် အစိုးရဖြစ်သည့်အတွက် နိုင်ငံတကာမှ လက်ခံလာနိုင် ကြောင်း ထိုင်းနိုင်ငံအခြေစိုက် မြန်မာအလုပ်သမားအရေး ဆောင်ရွက်ပေးနေသူ ကိုသားကြီးက CNI သတင်းဌာန သို့ ပြောသည်။
၎င်းက “NUG သည် အများပြည်သူ ရွေးချယ်တင်မြောက်တဲ့ အစိုးရတစ်ရပ်ဖြစ်တာ ကမ္ဘာသိအောင် ပြည်သူတွေက ကြေညာထားပြီး ဖြစ်တဲ့အတွက် တဖြည်းဖြည်း လက်မခံတဲ့နိုင်ငံက လက်ခံလာနိုင်တဲ့ အနေအထားရှိပါတယ်။ ဘာကြောင့်လဲဆိုတော့ NUG အစိုးရက လက်နက်ကိုင်ပြီးတော့ သောင်းကြမ်းတဲ့ အုပ်စု၊ တစ်ဦးတစ်ယောက်ထံ၊ အဖွဲ့အစည်း တစ်ခုခုထံက အာဏာယူထားတဲ့ အစိုးရမဟုတ်ဘူးပေါ့၊ ဖောင်တိန် ကိုင်ထားပြီးတော့ အများပြည်သူ ကို မိမိတို့အဖွဲ့အစည်းရဲ့ ဆင်ခြင်တုံဉာဏ်နဲ့ အုပ်ချုပ်တဲ့ အစိုးရတစ်ရပ် ဖြစ်တဲ့အတွက် NUG ဟာ တချိန်ချိန်မှာ ပေါ့၊ အများပြည်သူ တင်မြောက်ရကျိုးနပ်တဲ့ အစိုးရဖြစ်လာမယ် ဆိုတာကိုတော့ အတိအလင်း ပြောလိုတယ်ဗျ” ဟု ပြောသည်။
လက်ရှိတွင် နစကနှင့် NUG တို့သည် နိုင်ငံတကာမှ တရားဝင် အစိုးရအဖြစ် အသိအမှတ်ပြုရေး သံတမန်ရေးရာ၌ အားပြိုင်လျက်ရှိနေသည်။
- By CNI
- Category: နိုင်ငံရေး
- Hits: 581
CNI News
၂၀၂၂ ခုနှစ်၊ ဒီဇင်ဘာ ၁၉
မြန်မာနိုင်ငံ၏ ငြိမ်းချမ်းရေးဖြစ်စဉ်တွင် လူထု၏ အခန်းကဏ္ဍမှာ အရေးကြီးကြောင်း ရခိုင့်ဦးဆောင်ပါတီ (AFP) ဥက္ကဋ္ဌ ဒေါက်တာအေးမောင်က CNI သတင်းဌာနသို့ ပြောသည်။
မည်သည့်အစိုးရမဆို လူထု၏မျက်နှာကို ကြည့်ရမှာဖြစ်ကြောင်း၊ လူထု၏ဆန္ဒမှာ အလွန်အရေးကြီးကြောင်း ၎င်းက ပြောသည်။
ဒေါက်တာအေးမောင်က “အဲဒီတော့ လူထုရဲ့ ဆန္ဒဆိုတာ အလွန်တရား အရေးကြီးပါတယ်၊ မည်သည့်အစိုးရမဆို လူထုရဲ့ မျက်နှာကိုပဲ ကြည့်ရတာကိုဗျ၊ လူထုကို အုပ်ချုပ်တဲ့ ကောင်းမွန်တဲ့ ယန္တရားတစ်ရပ်ကို အပ်နှင်းချင်လို့သာ အစိုးရဆိုတာ လူထုကိုယ်စား အုပ်ချုပ်ပေးကြရတာကိုး၊ အစိုးရတိုင်းကတော့ဗျာ ဘယ်လိုပဲပြောပြော ကောင်းမွန် တဲ့ အမွေတစ်ခုတော့ ပေးခဲ့ချင်တာပဲ၊ လူထုကို ဆိုတော့ လူထုရဲ့ ဆန္ဒအရေးကြီးပါတယ်၊ လူထုက ဘယ်လို အစိုးရ တစ်ရပ်ကို လိုသလဲ၊ လူထုက ဘယ်လို ပတ်ဝန်းကျင်တစ်ရပ်ကို ဖန်တီးဖို့အတွက် အဆင်သင့် ဖြစ်နေကြပြီလား၊ ငြိမ်းချမ်းတဲ့ ပတ်ဝန်းကျင်၊ လူ့အခွင့်အရေး ပြည့်ဝတဲ့ ပတ်ဝန်းကျင်၊ တိုင်းရင်းသားအားလုံး ချစ်ကြည်ပြီးတော့ လက်တွဲနိုင်တဲ့ ပတ်ဝန်းကျင်ဖြစ်အောင် တို့တတွေ မတည်ဆောက်နိုင်တော့ဘူးလား။ တည်ဆောက်ဖို့အတွက် အချိန် မကျသေးဘူးလား။ ဒီလောက် ၇၅ နှစ်လောက် ပေးဆပ်ခဲ့ရတာကိုက နောင်တမရကြသေးဘူးလားဆိုတာ ကျနော်တို့ကပဲ သုံးသပ်ရတာ” ဟု CNI သတင်းဌာနသို့ ပြောသည်။
ငြိမ်းချမ်းရေးတောင်းဆိုကြသူများကိုတွေ့ရစဉ် (GETTY IMAGES)
ထို့ကြောင့် လူထု၊ အစိုးရ၊ လက်နက်ကိုင် အင်အားစုများ၊ တိုင်းရင်းသားများ အနေဖြင့် အကောင်းဆုံးလမ်းကို ရွေးချယ်ရမှာဖြစ်ကြောင်း၊ သွေးမြေကျမှုကင်းသည့် နိုင်ငံတစ်ခု ပေါ်ထွန်းလာစေချင်ကြောင်း ၎င်းက ပြောသည်။
ငြိမ်းချမ်းရေးဖြစ်စဉ်တွင် သက်ဆိုင်သူ အားလုံးပါဝင်မှ ငြိမ်းချမ်းရေးမှာ ရှေ့ဆက်၍ ရမှာဖြစ်ကြောင်း မြန်မာ နိုင်ငံလုံးဆိုင်ရာ ကျောင်းသားများ ဒီမိုကရက်တစ်တပ်ဦး (ABSDF) မှ ပြောရေးဆိုခွင့်ရှိသူ ရဲဘော်အေးလွင်က CNI သတင်းဌာနသို့ ပြောသည်။
၎င်းက “ငြိမ်းချမ်းရေးဖြစ်စဉ်က အဲဒီတုန်းက ပြောခဲ့ပြီးသားပဲ၊ ကျနော်တို့ ဒီမြန်မာပြည်ရဲ့ ငြိမ်းချမ်းရေးဖြစ်စဉ်က သက်ဆိုင်တဲ့သူတွေ အားလုံးပါဝင်မှ ရမယ်၊ သက်ဆိုင်တဲ့လူတွေ အားလုံးပါဝင်တဲ့ အနေအထားတစ်ခု ရှိဖို့လိုတယ်၊ အဲဒါမှပဲ မြန်မာပြည်ရဲ့ ငြိမ်းချမ်းရေးကို ဆက်သွားလို့ရမယ်လို့ ကျနော်တို့ ပြောခဲ့ပြီးပြီ” ဟု ပြောသည်။
ဗမာပြည်သူ့လွတ်မြောက်ရေးတပ်တော်(BPLA)
မိမိတို့ တည်ဆောက်လိုသည့် ဖက်ဒရယ်ဒီမိုကရေစီ ပြည်ထောင်စုအတွက် အားလုံး၏ ညှိနှိုင်းဆွေးနွေးမှုဖြင့် တဆင့်ခြင်း လုပ်ဆောင်ရမှာ ဖြစ်ကြောင်း ငြိမ်းချမ်းရေးလုပ်ငန်းစဉ်ဦးဆောင်အဖွဲ့ (PPST) မှ ပြောခွင့်ရပုဂ္ဂိုလ် ဗိုလ်မှူးကြီး စောကျော်ညွန့်က CNI သတင်းဌာနသို့ ပြောသည်။
၎င်းက “ကျနော်တို့ ဖော်ဆောင်လိုတဲ့ ပြည်ထောင်စု ငြိမ်းချမ်းရေး၊ ကျနော်တို့ တည်ဆောက်လိုတဲ့ ခုနက ဖက်ဒရယ် ဒီမိုကရေစီ ပြည်ထောင်စု အတွက်ဆိုရင်တော့ ဒီမိုကရေစီလို့ ပြောလိုက်မယ်ဆိုရင်လည်းပဲ ဒီမိုကရေစီ အင်အားစုတွေ အားလုံး ပါဝင်ရမှာ ဖြစ်သလို ဖက်ဒရယ်လို့ ပြောလိုက်မယ်ဆိုရင်လည်းပဲ တိုင်းရင်းသား အင်အား စုတွေ အားလုံးပေါ့၊ တိုင်းရင်းသား နိုင်ငံရေးပါတီတွေလည်း ရှိရင် ရှိမယ်၊ တိုင်းရင်းသား တော်လှန်ရေး အဖွဲ့တွေ လည်း ရှိရင်ရှိမယ်၊ အဲဒီလိုမျိုး သက်ဆိုင်တဲ့သူတွေ အားလုံး ပါဝင်စုပေါင်း ညှိနှိုင်း အဖြေရှာနိုင်မယ့် အခင်းအကျင်း ကသာလျှင် ကျနော်တို့ ခုနက ပြောနေတဲ့ ပြည်ထောင်စုငြိမ်းချမ်းရေး ကျနော်တို့ တည်ဆောက်လိုတဲ့ ဖက်ဒရယ် ဒီမိုကရေစီ ပြည်ထောင်စု အတွက်ကတော့ ကျနော်တို့ အားလုံးရဲ့ ညှိနှိုင်းဆွေးနွေးမှု အပေါ်မှာပဲ တဆင့်ပြီး တဆင့် ကျနော်တို့ ဆက်လက် လုပ်ဆောင် သွားရမှာ ဖြစ်တယ်လို့ ကျနော်အဲဒီလိုပဲ နားလည်မှု ရှိပါတယ်” ဟု ပြောသည်။
လက်ရှိတွင် နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ယခု ၂၀၂၂ ခုနှစ်ကို ငြိမ်းချမ်းရေးနှစ်ဟု သတ်မှတ်၍ တိုင်းရင်းသား လက်နက်ကိုင် အဖွဲ့အစည်းအချို့နှင့် ငြိမ်းချမ်းရေး တွေ့ဆုံဆွေးနွေး လျက်ရှိသည်။
- By CNI
- Category: နိုင်ငံရေး
- Hits: 503
CNI News
၂၀၂၂ ခုနှစ်၊ ဒီဇင်ဘာ ၁၉
ရန်ကုန်တိုင်းဒေသကြီးအတွင်းရှိ ရန်ကုန်-ဒလ မြစ်ကူး ချယ်ရီ(၂) ရေယာဉ်ပေါ်တွင် လက်လုပ်မိုင်း တစ်လုံး ပေါက်ကွဲခဲ့၍ အရပ်သား ၁၇ ဦး ဒဏ်ရာရရှိခဲ့ကြောင်း သိရသည်။
၂၀၂၂ ခုနှစ်၊ ဒီဇင်ဘာ ၁၈ ရက်နေ့ ညနေ ၆ နာရီ ၄၀ မိနစ်အချိန်တွင် ပန်းဆိုးတန်းဆိပ်ကမ်းမှ ဒလ ဆိပ်ကမ်း သို့ ထွက်ခွာမောင်းနှင်လာသည့် ပြည်တွင်းကြောင်းအပိုင် ချယ်ရီ(၂) ရေယာဉ်သည် ဆိပ်ကမ်းမှ စတင်မောင်း နှင်ခဲ့ပြီး ကမ်းမှ မီတာ ၅၀ ခန့် အကွာအဝေးသို့ ရောက်ရှိစဉ် ရေယာဉ်၏ အောက်ထပ် နောက်သံလှေခါးအခြေ၌ လက်လုပ်မိုင်းတစ်လုံး ပေါက်ကွဲခဲ့ကြောင်း နစက-က သတင်းထုတ်ပြန်လာခဲ့သည်။
ရန်ကုန်-ဒလ မြစ်ကူး ချယ်ရီ(၂) ရေယာဉ် ဗုံးပေါက်ကွဲ၍ အရပ်သားများ ဒဏ်ရာရသွားစဉ်
အဆိုပါ ဗုံးပေါက်ကွဲမှုကြောင့် အရပ်သား ၁၇ ဦး ထိခိုက် ဒဏ်ရာများ ရရှိခဲ့သည်။
ထိုဖောက်ခွဲမှုကို မည်သည့် လူပုဂ္ဂိုလ် ၊ မည်သည့် အဖွဲ့အစည်းက လုပ်ဆောင်ခြင်း ဖြစ်သည်ကိုတော့ မသိရ သေးပေ။
- By CNI News
- Category: နိုင်ငံရေး
- Hits: 759
CNI News
၂၀၂၂ ခုနှစ်၊ ဒီဇင်ဘာ ၁၈
ရန်ကုန်တိုင်းဒေသကြီးရှိ ရန်ကုန်-ဒလ မြစ်ကူး ချယ်ရီ သင်္ဘောပေါ်၌ ယနေ့ (ဒီဇင်ဘာ ၁၈ ရက်) ညနေပိုင်းက ဗုံးပေါက်ကွဲမှု ဖြစ်ပွားခဲ့သည်။
အဆိုပါ ဗုံးပေါက်ကွဲမှုကြောင့် အရပ်သားများ ထိခိုက်ဒဏ်ရာရှိမှုများ ရှိခဲ့သည်။
ရန်ကုန်-ဒလ မြစ်ကူး သင်္ဘောများကို အောက်ခြေလူတန်းစားများသာ အဓိက စီးနင်း လိုက်ပါလေ့ရှိသည်။ အထူးသဖြင့် ဒလဘက်မှ ရန်ကုန်သို့ အလုပ်လာရောက် လုပ်ကိုင်သူများ အများစု စီးနင်းကြသည်။
သို့သော် ဘယ်နှဦး ထိခိုက်ဒဏ်ရာရရှိခဲ့လဲ၊ သေဆုံးမှုများ ရှိ/မရှိကိုတော့ လတ်တလော မသိရသေးပေ။
- By CNI News
- Category: နိုင်ငံရေး
- Hits: 930
- By CNI
- Category: နိုင်ငံရေး
- Hits: 604
CNI News
၂၀၂၂ ခုနှစ်၊ ဒီဇင်ဘာ ၁၇
ပဲခူးတိုင်းဒေသကြီးနှင့် မကွေးတိုင်းဒေသကြီးတို့တွင် ဆိုင်ကယ်နှင့် စက်ဘီးစီးခြင်းများကို ပိတ်ပင်ထားပြီး စီးနင်း သူများအား ဖမ်းဆီးမှုများ ရှိသည့်အတွက် ဒေသခံ ပြည်သူများအနေဖြင့် သွားရေးလာရေးနှင့် လုပ်ငန်း ဆောင်ရွက် မှုများတွင် အခက်အခဲများ ကြုံတွေ့နေရကြောင်း သိရသည်။
ပဲခူးတိုင်းဒေသကြီး နတ်တလင်းမြို့နယ်၊ ပြည်မြို့နယ်၊ ပေါင်းတည်မြို့နယ်၊ ကြို့ပင်ကောက်မြို့နယ်၊ ဇီးကုန်း မြို့နယ်နှင့် တောင်ညိုကျေးရွာတို့တွင် ယာဉ်ထိန်းရဲများက ဆိုင်ကယ်စီးနင်းခြင်း တားမြစ်ထားသည်။
ထိုသို့ တားမြစ်ထားခြင်းကို မျက်ကွယ်ပြု၍ စီးနင်းသူများကို ဒဏ်ငွေ ဆောင်ခိုင်းစေခြင်းနှင့် ထောင်ဒဏ်များ ချမှတ်ခြင်းများ ပြုလုပ်လျက်ရှိကြောင်း နတ်တလင်းဒေသခံ မဖြိုးဖြိုးက CNI သတင်းဌာနသို့ ပြောသည်။
၎င်းက “ဒီဘက်မှာ ဖမ်းလို့ ဒီဘက်လာတဲ့သူတောင် ဈေးဝယ်တဲ့သူတောင် ကားနဲ့လာရပါတယ်။ စက်ဘီးတွေ တောင် ဖမ်းပါတယ်ရှင့်။ စက်ဘီးတွေလည်း ဖမ်းတယ်၊ ဆိုင်ကယ်တွေလည်း ဖမ်းတယ် အကုန်ဖမ်းပါတယ်ရှင့်။ စက်ဘီးတွေ ဘဲလ်မပါရင် ဖမ်းတယ်ပေါ့။ အခုဆိုရင် ရွာထဲမှာ ဈေးသည်တွေလည်း မလာတော့ဘူး။ ကုန်ပို့တဲ့ သူတွေတောင် နားနေရတယ် အဲလိုဖြစ်နေတယ်။ ကျမတို့ ကုန်သွားသယ်ဖို့ အခုလိုဖမ်းနေတယ် အခက်အခဲ တွေက ရှိနေတယ်။ သုံးဘီးတွေကအစ ဖမ်းတယ်၊ ဆိုင်ကယ်တွေလည်း ဖမ်းတယ်ဆိုတော့ သွားရေးလာရေးက ဘယ်လိုမှ အဆင်မပြေဘူး ဖြစ်နေတယ်။ အခုဟာက သူတို့က ငွေဒဏ်တင်ပါ မဟုတ်ဘူး ထောင်ဒဏ်တွေပါ ချနေတယ်။ ပစ္စည်းတွေပါရင် ပစ္စည်းတွေပါ အကုန်ယူချလိုက်တယ်။ နတ်တလင်း၊ ကြို့ပင်ကောက်၊ ပေါင်းတည် အကုန်ဖမ်းပါတယ်။ ဇီးကုန်းဘက်ကတော့ အတော်အဆိုးဆုံး ဖြစ်ပါတယ်ရှင့်။ အခု တောင်ညိုဘက်ပါ ဆင်းဖမ်း ပါတယ်ရှင့်။ ဈေးမသွားဖြစ်တော့ တောင်ညိုဘက်ကို သွားဝယ်တယ်။ သွားဝယ်တော့ တောင်ညိုဘက်ပါ ပိတ်ထား တဲ့အတွက် အခု ဘယ်မှ မသွားရတော့ဘူး” ဟု ပြောသည်။
ဆိုင်ကယ်စီးနင်းနေသူများကို ယာဉ်ထိန်းရဲက စိစစ်နေစဉ်
ထို့နောက် ပခုက္ကူမြို့နယ်တွင်လည်း ဆိုင်ကယ်စီးနင်းရာတွင် တစ်ဦးတည်းသာ စီးနင်းခွင့် ပြုထားကြောင်း၊ စီးနင်း ရာတွင်လည်း အချိန် အကန့်အသတ်ဖြင့်သာ ခွင့်ပြုထားကြောင်း၊ မနက် ၈ နာရီမှ ညနေ ၅ နာရီအထိသာ ဖြစ် ကြောင်း သိရသည်။
ထိုသို့ လူဦးရေနှင့် အချိန် ကန့်သတ်ထားသည့်အတွက် လုပ်ငန်းများ ဆောင်ရွက်ရာတွင် အချိန်နှောင့်နှေးမှုများ ဖြစ်ပေါ်နေသည်ဟု ပခုက္ကူမြို့မှ ကြက်သွန်ကုန်သည် ဦးလှသောင်းက CNI သတင်းဌာနသို့ ပြောသည်။
၎င်းက “အရင်က မိန်းကလေးနဲ့ ယောင်္ကျားလေး တွဲစီးလို့ရတယ်။ မိန်းကလေး ဒီအတိုင်း စီးလို့ရတယ်။ အခု မရ ဘူး တစ်ယောက်တည်း။ ဆိုင်ကယ်စီးခွင့် မရတော့ မနက် ၈ နာရီပေါ့။ မနက် ၈ နာရီမှ တစ်ယောက်တည်းတဲ့။ လုပ်ငန်းကိုင်ငန်းတွေ အကုန်လင့်(နှေး)သွားကြတာပေါ့၊ အလုပ်ကို မနက် ၉ နာရီထိုးမှ စကြရတယ်။ သွားရေးလာ ရေးက ညနေ ၄ နာရီခွဲလောက်၊ ၅ နာရီလောက်ဆို ရွာပြန်မယ့် အလုပ်သမားတွေက စောစောစီးစီး သိမ်းကုန်ကြ တာပေါ့။ စက်ဘီးနဲ့ကျတော့ အရာမရောက်ဘူးလေ နင်းရပြုရတာ။ ဘာလို့လဲဆိုတော့ နယ်ကလာကြတာ၊ ရွာတွေ ကနေ လာလုပ်ကြတာ” ဟု ပြောသည်။
ပခုက္ကူမြို့နယ်တွင် ဆိုင်ကယ်စီးနင်းရာ၌ တစ်ဦးတည်းသာ ခွင့်ပြုထားသည့်အတွက် နှစ်ယောက် စီးနင်းမိပါက လုံခြုံရေးတပ်ဖွဲ့မှ သေနတ်ဖြင့် ပစ်ခတ်မှုများ ရှိကြောင်း၊ ထိုသို့ ပစ်ခတ်ခံရမှုများကြောင့် ဒေသခံ တချို့လည်း သေဆုံးခဲ့ရသော ဖြစ်ရပ်များရှိကြောင်း ဒေသခံများက ပြောသည်။
ဆိုင်ကယ်စီးနင်းသူက လုံခြုံရေးတပ်ဖွဲ့ရှေ့မှာ ဆန္ဒပြနေစဉ်
တခြားတစ်ဖက်မှာတော့ နယ်ဒေသများရှိ လုံခြုံရေးတပ်ဖွဲ့များကို နွေဦးတော်လှန်ရေး လှုပ်ရှားမှုကနေတဆင့် လက်နက်ကိုင် တိုက်ပွဲဝင်လာကြသည့် ပြည်သူ့ကာကွယ်ရေးတပ်ဖွဲ့(PDF)များသည် ဆိုင်ကယ်များ စီးနင်း၍ ပစ်ခတ် ထွက်ပြေးမှုများ ရှိသည့်အတွက် ယခုလို ဆိုင်ကယ်နှင့်စက်ဘီး စီးနင်းခွင့်များကို ပိတ်ထားလာခြင်း ဖြစ်ကြောင်း ဒေသခံများက ပြောသည်။
နယ်မြို့များတွင် လမ်းပန်းဆက်သွယ်ရေးနှင့် လုပ်ငန်းများ လုပ်ကိုင်ရာ၌ ဆိုင်ကယ်များကိုသာ အဓိကထား အသုံး ပြုနေကြသည့်အတွက် ယခုကဲ့သို့ ဖမ်းဆီး၊ အရေးယူခြင်းများသည် ဒေသခံ ပြည်သူများအတွက် အခက်အခဲ များ စွာ ဖြစ်ပေါ်လျက်ရှိကြောင်း သိရသည်။
နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်က စက်သုံးဆီကို ချွေတာသုံးစွဲသည့် အနေဖြင့် စက်ဘီးကဲ့သို့ ယာဉ် များကို အသုံးပြုစေလိုကြောင်း ပြောကြားထားသည်။
သို့သော်လည်း ဆိုင်ကယ်နှင့်စက်ဘီး စီးနင်းခွင့်များနှင့်ပတ်သက်ပြီး စီးနင်းခွင့် ရှိ/မရှိကိုတော့ တရားဝင် ထုတ်ပြန် ထားခြင်း မရှိပေ။
- By CNI
- Category: နိုင်ငံရေး
- Hits: 598
CNI News
၂၀၂၂ ခုနှစ်၊ ဒီဇင်ဘာ ၁၇
ကုလသမဂ္ဂမှာ အမြဲတမ်း ကိုယ်စားလှယ်အဖြစ် ဦးကျော်မိုးထွန်းကို ဆက်လက် ထားရှိသည့်အတွက် သံတမန် ရေးရာတွင် အောင်မြင်မှုဖြစ်ကြောင်း တရားလွှတ်တော်ရှေ့နေ ဦးကြီးမြင့်က CNI သတင်းဌာနသို့ ပြောသည်။
ဦးကျော်မိုးထွန်းမှာ အမျိုးသားညီညွတ်ရေးအစိုးရ (NUG)က ခန့်အပ်သည့် ဝန်ကြီးဖြစ်သည့်အတွက် သက်ရောက်မှု ရှိလာမည်ဖြစ်ကြောင်း ၎င်းက ပြောသည်။
ဦးကြီးမြင့်က “ဒါကတော့ သံတမန်ရေးအရ အောင်မြင်မှုပေါ့၊ အာဖကန်နစ္စတန်ရယ်၊ ဗမာရယ်ကို ဆက်ထားတယ်၊ သံတမန်ရေးရာ အောင်မြင်မှုလို့ သုံးသပ်လို့ရတယ်၊ ကုလသမဂ္ဂမှာ ဘာဖြစ်ဖြစ် ဗမာရဲ့ အသံကို ပြောခွင့်တော့ ရှိနေသေးတာပဲ၊ အဲဒီသဘောရှိပါတယ်။ ဒါ NUG ရဲ့ ဝန်ကြီးပဲ၊ ဒါ NUG က ခန့်တဲ့ ဝန်ကြီးလေ၊ သက်ရောက်မှု ရှိတာပေါ့၊ NUG က ခန့်တဲ့ သံအမတ်ကြီးပဲ၊ သက်ရောက်မှု ရှိတာပေါ့နော်” ဟု CNI သတင်းဌာနသို့ ပြောသည်။
ဦးကျော်မိုးထွန်းကို ကုလကိုယ်စားလှယ်အဖြစ် လက်ခံပေးရန်တောင်းဆိုနေကြစဉ် (Kyaw Soe Latt)
ဦးကျော်မိုးထွန်းအား ဒီဇင်ဘာ ၁၇ ရက်နေ့ (၇၇)ကြိမ်မြောက် ကုလသမဂ္ဂ အထွေထွေညီလာခံတွင် ကုလမှာ သံအမတ်အဖြစ် အတည်ပြုလိုက်ခြင်းဖြစ်ပြီး လာမည့် ၂၀၂၃ နှစ် ကုလသမဂ္ဂ အထွေထွညီလာခံ ကျင်းပမည့် စက်တင်ဘာလအထိ ဆက်လက် တာဝန်ယူရမှာ ဖြစ်ကြောင်း သိရသည်။
ကုလသမဂ္ဂ အထွေထွေညီလာခံ၏ စည်းမျဉ်း ၂၉ အရ လက်ရှိ ရှိနေသည့်သူကို ဆက်လက် ထားရှိသည့်သဘော သက်ရောက်ကြောင်း သို့သော်လည်း ဘယ်အဖွဲ့ကိုမှ အသိအမှတ်ပြုသည့် သဘောမဟုတ်ဟု သိရကြောင်း နစက ၏ သတင်းထုတ်ပြန်ရေး အဖွဲ့ခေါင်းဆောင် ဗိုလ်ချုပ်ဇော်မင်းထွန်းက VOA သတင်းဌာနသို့ ပြောကြားထားသည်။
ဦးကျော်မိုးထွန်း အနေဖြင့် မြန်မာနိုင်ငံကို ကိုယ်စား ပြု/မပြုဆိုသည်မှာ အမျိုးမျိုး ဖြစ်နေကြောင်း၊ မည်ကဲ့သို့ အပြောင်းအလဲ ဖြစ်လာမလဲဆိုသည်ကို စောင့်ကြည့်ရုံသာရှိကြောင်း ရခိုင်အမျိုးသားပါတီ (ANP) မှ ဥက္ကဋ္ဌ ဦးသာထွန်းလှက CNI သတင်းဌာနသို့ ပြောသည်။
ဒီမိုကရေစီအရေး တောင်းဆိုနေကြစဉ် (GETTY IMAGES)
၎င်းက “ဦးကျော်မိုးထွန်းကလည်း လွန်ခဲ့တဲ့ နှစ်ကလည်း အဲဒီလို တာဝန်ယူထားခဲ့တာတော့ ကျနော်တို့ တွေ့ တယ်၊ အဲဒါက နိုင်ငံကို ကိုယ်စားပြုသလား၊ မပြုသလားတော့ အမျိုးမျိုးပဲ၊ ဦးကျော်မိုးထွန်းကို မြန်မာနိုင်ငံရဲ့ အမြဲတမ်း ကိုယ်စားလှယ်အဖြစ် ဒီအတိုင်း ဆက်ထားမယ်လို့ ပြောတယ်၊ နိုင်ငံကို ကိုယ်စားပြုပြီး သူက မိန့်ခွန်း ပြောခွင့်ရတဲ့ပုဂ္ဂိုလ် မဟုတ်ဘူး။ အဲဒါကြောင့် အပြောင်းအလဲ ဘယ်လောက် ဖြစ်လာမလဲဆိုရင် လွန်ခဲ့တဲ့ တစ်နှစ် မှာလည်း ကျနော်တို့ ကြည့်တယ်၊ ကုလသမဂ္ဂကလည်း ဘာမှ မြန်မာနိုင်ငံကိစ္စမှာ အပြောင်းအလဲ လုပ်ပေးနိုင်တဲ့ အဖွဲ့အစည်းပုံစံမျိုး မဟုတ်တဲ့ ပုံစံမျိုး ဖြစ်နေတယ်၊ အဲဒါကြောင့် အခုချိန်မှာ ဘယ်လောက် အပြောင်းအလဲ ဖြစ်လာမလဲဆိုတော့က စောင့်ကြည့်ရုံပဲရှိတယ်၊ ဖြစ်လာမလား၊ မဖြစ်လာဘူးလားဆိုတာ ကျနော်တို့လည်း အဲဒီလို သုံးသပ်ဖို့ အခက်အခဲရှိတယ်” ဟု ပြောသည်။
နိုင်ငံတကာသံတမန် အသိုင်းအဝိုင်းနှင့် ပြည်တွင်း သံတမန် အသိုင်းအဝိုင်းကြားမှာတော့ နစက နှင့် NUG တို့သည် ၎င်းတို့က တင်သွင်းသည့် ကုလအမြဲတမ်း ကိုယ်စားလှယ်ကို ခန့်အပ်ပေးရေး အပြိုင်ကြိုးပမ်း လျက်ရှိနေသည်။
လက်ရှိ ကုလက ဦးကျော်မိုးထွန်းကို ကိုယ်စားလှယ်အဖြစ် သတ်မှတ်ခြင်းက NUG ၏ ကိုယ်စားလှယ်အဖြစ် သတ်မှတ်ခြင်းမဟုတ်ဘဲ ယခင် အစိုးရများလက်ထက်မှ ကိုယ်စားလှယ် အနေဖြင့်သာ လက်ခံခြင်း ဖြစ်ကြောင်း သိရသည်။
- By CNI
- Category: နိုင်ငံရေး
- Hits: 892
CNI News
၂၀၂၂ ခုနှစ်၊ ဒီဇင်ဘာ ၁၆
ထိုင်းနိုင်ငံတွင် နစ်နာကြေးမပေးဘဲ မြန်မာရွှေ့ပြောင်းအလုပ်သမား အများအပြား အကြောင်းမဲ့ အလုပ်ထုတ်ခံ နေရကြောင်း ထိုင်းရှိ မြန်မာအလုပ်သမားအရေး ဆောင်ရွက်နေသူများက CNI သတင်းဌာနသို့ ပြောသည်။
ယခင်ကလည်း မြန်မာရွှေ့ပြောင်းအလုပ်သမားများသည် ထိုသို့ အကြောင်းမဲ့အလုပ်ထုတ်ပစ်ခြင်းများ ကြုံတွေ့ရသော်လည်း နည်းပါးခဲ့ပြီး လက်ရှိတွင် စက်ရုံ၊ အလုပ်ရုံ အများအပြားမှ အလုပ်ထုတ်ခံရသည့် မြန်မာရွှေ့ပြောင်းအလုပ်သမားများမှာ အများအပြားဖြစ်လာကြောင်း ထိုင်းရှိ မြန်မာအလုပ်သမားအရေး ဆောင်ရွက်နေသူများက ပြောသည်။
ထိုသို့ အလုပ်ထုတ်ခံရသည့် မြန်မာများမှာ MOU ဖြင့် လုပ်ကိုင်နေသူများ၊ ယာယီ နေထိုင် အလုပ်လုပ်ကိုင်ခွင့် လက်မှတ် ကိုင်ဆောင်ထားသူများ၊ တရားမဝင် အလုပ်လုပ်ကိုင်နေသူများ ဖြစ်ကြောင်း ထိုင်းတွင် မြန်မာ ရွှေ့ပြောင်းအလုပ်သမားအရေး ကူညီဆောင်ရွက်ပေးနေသူ ကိုသားကြီးက CNI သတင်းဌာနသို့ ပြောသည်။
“အခုက ထိုင်းနိုင်ငံထဲမှာ တော်တော်များများက အကြောင်းမဲ့ ဘာလို့ အလုပ်ဖြုတ်လဲလို့ မေးရင် ဒီ အလုပ်ဖြုတ် ခြင်းက ရေပန်းစားနေတာက အလုပ်သမားအသစ်တစ်ယောက် လာပြီးတော့လျှောက်ရင် အဲဒီမှာ အလုပ်လျှော က်ခ ပေးရတယ်။ လူတစ်ယောက်ကို ဘတ် ၂၀၀၀ ကနေ ၄၀၀၀ လောက်အထိ ပိုက်ဆံပေးပြီးမှ အဲဒီစက်ရုံ၊ အလုပ်ရုံထဲကို အလုပ်ဝင်ရတယ်။ ဒါကြောင့်မို့လို့ အလုပ်ခွင်ထဲမှာရှိတဲ့ တာဝန်ရှိတဲ့ HR တွေက သူတို့နဲ့ နီးစပ်တဲ့ မြန်မာစကားပြန်တွေ၊ လူပွဲစားတွေပေါ့ အဲဒီလိုလာပြီးတော့ အလုပ်လာသွင်းတယ်။ ၁၀ ယောက်တို့ အယောက် ၂၀၊ ၃၀ တို့ အဲဒီလို လာသွင်းရင် သူတို့ ပိုက်ဆံရတယ်။ ပိုက်ဆံရတော့ အလုပ်သမားအဟောင်းတွေကို အကြောင်းမဲ့ အလုပ်ဖြုတ်လိုက်တယ်။ ဒါတစ်ချက်ပေါ့။ MOU အလုပ်သမားတွေဆိုရင်လည်း စာချုပ်ချုပ်တုန်း က ဒီလိုမဟုတ်ဘူးပေါ့။ စာချုပ်ထဲကအတိုင်း ပေးပါဆိုရင် အဲဒီအလုပ်သမား auto အလုပ်ဖြုတ်ခံရတယ်။ သူတို့က အလုပ်ထုတ်လိုက်ပြီဆိုရင် နေစရာပါ မရှိတော့ဘူးလေ။ အလုပ်ဖြုတ်ခံရပြီဆိုရင် အခန်းပါ မပေးတော့ဘူးလေ။ အခန်းပါမပေးတော့ဘူးဆိုရင် အလုပ်သမားတွေက ဒီအခန်းကနေပါ ထွက်ပေးရတယ်ဆိုတော့ သူတို့ ပိုပြီးတော့မှ ဒုက္ခရောက်တာပေါ့။ ပြန်လည်တရားစွဲဖို့ဆိုတာလည်း သူတို့ မလွယ်ဘူးပေါ့” ဟု ပြောသည်။
အလုပ်ထုတ်ခံရသည့် မြန်မာအလုပ်သမားများ လျော်ကြေးငွေရရှိခဲ့စဉ်
MOU ဖြင့် လုပ်ကိုင်နေသူများ၊ အလုပ်လုပ်ကိုင်ခွင့် လက်မှတ်ကိုင်ဆောင်ထားသူများ အကြောင်းမဲ့ အလုပ် ထုတ်ခံရပါက အလုပ်သမားအဖွဲ့အစည်းများမှ တရားဝင်နည်းလမ်းဖြင့် နစ်နာကြေးငွေရရှိရန် ကူညီဆောင်ရွက် ပေးရသည်မှာ လွယ်ကူသည့်အပြင် အမှန်တကယ်လည်း နစ်နာကြေးငွေရရှိကြကြောင်း ထိုင်းရှိ မြန်မာ အလုပ်သမားအရေး ဆောင်ရွက်နေသူများက ပြောသည်။
သို့သော် တရားမဝင် ဝင်ရောက်၍ လုပ်ကိုင်နေသူများဖြစ်ပါက အလုပ်ရှင်အား အကျိုးအကြောင်းညှိနှိုင်း၍ လျော်ကြေးငွေအဖြစ် လမ်းစရိတ်(သို့မဟုတ်) ရက်အချို့စာအတွက် လုပ်အားခကိုသာ နစ်နာကြေးအဖြစ် ရရှိကြကြောင်း သိရသည်။
ထိုင်းနိုင်ငံတွင် တရားမဝင် အထောက်အထားမဲ့များအား လိုက်လံဖမ်းဆီးနေသည့်အတွက် အလုပ်ရှင်များမှ အရေးယူခံရမည်ကို စိုးရိမ်သည့်အတွက် လုပ်ငန်းခွင်အတွင်းရှိ တရားမဝင် မြန်မာရွှေ့ပြောင်းအလုပ်သမားများအား လက်ရှိတွင် အလုပ်ထုတ်နေခြင်းဖြစ်ကြောင်း FED မှ အမှုဆောင်ဒါရိုက်တာ ဦးထူးချစ်က CNI သတင်းဌာနသို့ ပြောသည်။
“ထိုင်းကဖမ်းဆီးမှုတွေ များလာမှာမို့လို့ သူတို့အရင်တုန်းက တရားမဝင်လက်မှတ်မရှိတဲ့လူတွေကို သူတို့ ခန့်ထား တာရှိတယ်။ နောက်တစ်ခုက အလုပ်မတူတဲ့ အလုပ်သမားတွေကို ခန့်ထားတာလည်း ကြုံရတယ်။ MOU နဲ့ လာတယ်။ ဥပမာ ဒီမှာ ပန်းရံလုပ်မယ်ဆိုရင် ပန်းရံပဲ လုပ်ရတာ။ ဒါကို သူတို့က ပန်းရံလာလုပ်မယ်ဆိုပြီးတော့ တခြား ဥပမာ စားသောက်ဆိုင်မှာ လုပ်တယ်။ ဒါဆိုရင်လည်း ထိုင်းဥပဒေအရ ငြိစွန်းတယ်လေ။ ငြိစွန်းတယ် ဆိုတော့ အဲဒါမျိုးတွေကို ပြန်ဖြုတ်လိုက်တာတို့ လက်မှတ်တွေကို ပြန်စိစစ်တာတို့ အဲဒါမျိုးတွေကိုတော့ ကြပ်ကြပ်မတ်မတ်လုပ်တာမျိုးတော့ တွေ့ရတယ်။ ထိုင်းက သတ်မှတ်ထားတဲ့ ဥပဒေနဲ့ ငြိစွန်းတာတို့ဆို ထိုင်း လုပ်ငန်းရှင်တွေက သူတို့လည်း အန္တရာယ်ရှိတယ်လေ။ သူတို့ပါ အပြစ်ပေးအရေးယူမှာပေါ့ ထိုင်း ဥပဒေအရ။ ဆိုတော့ အဲဒီလိုမျိုး အလုပ်မတူတဲ့လူတို့ လက်မှတ်မရှိတဲ့ လူတို့ အဲဒါတွေကို ဖြုတ်တယ်၊ လူလျှော့တာတွေ တွေ့နေရတယ်” ဟု ၎င်းက ပြောသည်။
ဒီဇင်ဘာ ၉ ရက်နေ့က အလုပ်မရသဖြင့် ဆန္ဒပြခဲ့ကြသည့် မြန်မာအလုပ်သမား ၅၀၀၀ ကျော်
ထို့အပြင် ဒီဇင်ဘာ ၉ ရက်နေ့ကလည်း ထိုင်းနှင့် မြန်မာပွဲစားများက ပင်လယ်စာစက်ရုံကြီးတစ်ခုတွင် အလုပ် ဝင်ခွင့်ရမည်ဟုဆို၍ ထောင်နှင့်ချီသော မြန်မာများအား ငွေကြေးလိမ်လည်တောင်းခံခဲ့ပြီး ၆ လခန့် ကြာသည်အထိ အလုပ်မရရှိသေးသည့်အတွက် မြန်မာ ၅၀၀၀ ကျော်သည် ထိုင်းနိုင်ငံအလုပ်သမား ကူညီစောင့်ရှောက်ရေး ရုံးရှေ့တွင် ဆန္ဒပြခဲ့ကြသေးသည်။
ထိုသူများနှင့်ပတ်သက်၍ အလုပ်သမားအရေးဆောင်ရွက်သူများနှင့် သက်ဆိုင်ရာ ဌာနဆိုင်ရာမှ တာဝန်ရှိသူများ ဆွေးနွေးညှိနှိုင်းခဲ့ကြပြီးနောက် ၎င်းတို့ အလုပ်ရရှိရန်နှင့် လိမ်လည်ခံရသည့် ငွေကြေးများအား ပြန်လည်ရရှိရန် ထိုင်းအာဏာပိုင်များက ဆောင်ရွက်ပေးသွားမည်ဟု အဖြေထွက်ပေါ်လာခဲ့ကြောင်းသိရသည်။
လက်ရှိတွင် မြန်မာအလုပ်သမားများအနေဖြင့် လုပ်ခလစာ ခေါင်းပုံဖြတ်ခံရခြင်း၊ အကြောင်းမဲ့ နစ်နာကြေး မပေးဘဲ အလုပ်ထုတ်ခံရခြင်း၊ အလုပ်သမားခံစားခွင့်အပြည့်အဝမရရှိခြင်းတို့နှင့် ကြုံတွေ့ရပါက အလုပ်သမား အရေးဆောင်ရွက်နေသူများအား အကူအညီတောင်းခံနိုင်သကဲ့သို့ မိမိတို့ မြို့နယ်ရှိ အလုပ်သမား ကာကွယ် စောင့်ရှောက်ရေးရုံးတွင်လည်း တိုင်ကြားနိုင်ကြောင်း ထိုင်းရှိ မြန်မာအလုပ်သမားအရေး ဆောင်ရွက်နေသူများက အကြံပြုထားသည်။
- By CNI
- Category: နိုင်ငံရေး
- Hits: 812
CNI News
၂၀၂၂ ခုနှစ်၊ ဒီဇင်ဘာ ၁၆
လက်ရှိ နွေဦးတော်လှန်ရေးတွင် ပါဝင်တိုက်ပွဲဆင်နွှဲနေကြသည့် လူငယ်အများစုမှာ လူကြီးများ မြှောက်ပေး၍ တိုက်ပွဲဝင်ခြင်း မဟုတ်ကြောင်း နိုင်ငံရေးလေ့လာသုံးသပ်သူ ဦးသန်းစိုးနိုင်က CNI သတင်းဌာနသို့ ပြောသည်။
မြန်မာ့တပ်မတော်၏ မတရားမှုမှာ အလွန်ပြင်းထန်လွန်၍ လူငယ်များ တားမရ၊ ဆီးမရ လက်နက်ဆွဲကိုင်ခဲ့ကြ ကြောင်း ၎င်းက ပြောသည်။
ဦးသန်းစိုးနိုင်က “လူကြီးတွေ လုပ်လို့ ဖြစ်တဲ့ စစ်ပွဲမဟုတ်ပါဘူး။ လူကြီးတွေက အခုပြည်တွင်းစစ် နှစ် ၇၀ ကျော် ဖြတ်သန်းလာရတဲ့ အခြေအနေကို လူကြီးတွေလည်း စိတ်ပျက်နေပါပြီ။ အဲဒီအထဲမှာ အင်အားကြီးတဲ့ အဖွဲ့အစည်း တချို့လည်း ပါတာပေါ့ဗျာ၊ ဒါပေမဲ့ အခုက စစ်ကောင်စီရဲ့ မတရားမှုနဲ့ ဖိနှိပ်မှုတွေ အရမ်းပြင်းထန်၊ ကဲသန်လွန်းလို့ လူငယ်တွေ က တားမရ၊ ဆီးမရ လက်နက်ဆွဲကိုင်ဖို့ ဆုံးဖြတ်ကြတာပါ၊ ဒီဖြစ်လာတဲ့ အခြေအနေဟာ လူအိုတွေက မြှောက် ပေးလို့ လူငယ်တွေ ထပြီး လုပ်ကြတာဟာ ဒီစစ်ကောင်စီရဲ့ လုပ်ရပ်တွေကို ကာကွယ်လိုတဲ့ အချောင်သမား အင်အားစု တစ်သိုက်ရဲ့ ပြောသံဆိုသံပဲ ဖြစ်ပါတယ်၊ တကယ့်ဘဝတွေ မဟုတ်ပါဘူး။ တကယ့် ဘဝတွေကတော့ အခုကတော့ လူကြီးလူငယ် ညီညွတ်တယ်ဗျ၊ အခုက လှုပ်ရှားမှုတွေထဲမှာ တိုက်ပွဲထဲမှာ ပါဝင်ဖို့ကို မိဘတွေက ခွင့်ပြုတယ်၊ လူငယ်တွေကလည်း မိဘတွေကို ခွင့်တောင်းပြီးမှ တိုက်ပွဲထဲမှာ ပါဝင်ကြတာ၊ အဲဒီလို ပါဝင်ဖို့ ဆုံးဖြတ်တာဟာ စစ်ကောင်စီရဲ့ အကြမ်းဖက်မှုတွေဟာ ဂျပန်ဖက်ဆစ်စနစ်ထက် ဆိုးဝါးတဲ့ အခြေအနေ ရောက်ရှိ လာတဲ့အခါမှာ မခံမရပ်နိုင်ဘဲ လုပ်ကြတာ အခုက လူကြီးလူငယ် ပေါင်းစပ်ပြီးတော့ အခုကတော့ တိုက်ပွဲဝင်ကြတဲ့ အခြေအနေဖြစ်တယ်လို့ ကျနော်ကတော့ သုံးသပ်ပါတယ်” ဟု ပြောသည်။
လုံခြုံရေးတပ်ဖွဲ့က လုံခြုံရေးဆောင်ရွက်နေစဉ် (STR – GETTY IMAGES)
လူငယ်ကြောင့် ဖြစ်ရသည့် စစ်ပွဲတစ်ပွဲမျှ မရှိဘဲ၊ လူငယ်များ အသေခံနေရကြောင်း လူမှုကွန်ယက် စာမျက်နှာ များတွင် ရေးသားဖြန့်ဝေမှုများ ရှိနေသည်။ အလားတူ လူငယ်များကြားမှာလည်း မြန်မာနိုင်ငံတွင် ဖြစ်ပွားနေ သော စစ်ပွဲများသည် လူငယ်များကြောင့် မဟုတ်ကြောင်း ပြောဆိုနေကြသည်။
မြန်မာနိုင်ငံတွင် စစ်ပွဲများ ဖြစ်ပွားရခြင်းမှာ စစ်အာဏာရှင် စနစ်ကြောင့်ဟု မြန်မာနိုင်ငံလုံးဆိုင်ရာ ကျောင်းသား များ ဒီမိုကရက်တစ်တပ်ဦး (ABSDF)မှ ပြောရေးဆိုခွင့်ရှိသူ ရဲဘော်အေးလွင်က CNI သတင်းဌာနသို့ ပြောသည်။
လူငယ်များ စစ်သင်တန်းတက်နေစဉ် (SOPA- GETTY IMAGES)
၎င်းက “စစ်ပွဲတွေ ဖြစ်တာကြတော့ စစ်အာဏာရှင် စနစ်ကြောင့်ပဲလေ၊ ဟိုလူ့ကြောင့်၊ ဒီလူ့ကြောင့် မဟုတ်ဘူး၊ စစ်အာဏာရှင် စနစ်ကြောင့်ပဲ၊ စစ်အာဏာ မသိမ်းဘူးဆိုရင်တော့ ဒီစစ်ပွဲတွေက ဒီလောက်အထိ ပြင်းပြင်း ထန်ထန် ဖြစ်လာစရာ မရှိဘူးလေ၊ တိုင်းပြည်မှာ စစ်အာဏာ မသိမ်းခဲ့ဘူး။ အရပ်သားတစ်ပိုင်း အစိုးရရော၊ အရပ်သားအစိုးရရော ဖြတ်သန်းခဲ့တဲ့ အချိန်မှာ ကျနော်တို့ ရှိနေတဲ့ အနေအထားနဲ့ အခုစစ်အာဏာ သိမ်းပြီး နောက်ပိုင်းမှာ မြန်မာပြည်မှာ ကြီးထွားလာတဲ့ စစ်မက်ဖြစ်ပွားမှု အခြေအနေက စစ်အာဏာရှင်စနစ်ကြောင့်ပဲ ဟိုလူ့ကြောင့်၊ ဒီလူ့ကြောင့် မဟုတ်ပါဘူး” ဟု ပြောသည်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့ မြန်မာ့တပ်မတော်မှ နိုင်ငံတော်အာဏာကို အရပ်သားအစိုးရထံမှ ရယူပြီး နောက်ပိုင်း ဆန့်ကျင် ဆန္ဒပြမှုနှင့်အတူ လူငယ်များ၊ ကျောင်းသားများ လက်နက်ဆွဲကိုင်၍ နွေဦးတော်လှန်ရေးတွင် ပါဝင်ဆင်နွှဲလျက်ရှိသည်။