CNI Sport News
၂၀၂၃ ခုနှစ်၊ ဒီဇင်ဘာ ၄
ဖူလ်ဟမ်အသင်းကို အနိုင်ရရှိခဲ့တဲ့ ပရီးမီးယားလိဂ်ပွဲမှာ လှပတဲ့သွင်းဂိုးတွေ သွင်းယူခဲ့တဲ့ လီဗာပူးလ်အသင်းရဲ့ သွင်းဂိုးတွေက စပါယ်ရှယ်တွေပဲလို့ နည်းပြကလော့ပ်က ချီးကျူးလိုက်ပါတယ်။
ကလော့ပ်က “ကျနော်ဒီလိုမျိုး ဂိုးတွေကို ပွဲအချို့မှာ မြင်တွေ့ဖူးပေမယ့် ပွဲတစ်ပွဲတည်းမှာ ဒီလိုမျိုးလှပတဲ့ သွင်းဂိုး တွေ အများကြီး သွင်းယူတာကိုတော့ မမြင်တွေ့ဖူးပါဘူး။ အာနိုးလ်ရဲ့ ပြစ်ဒဏ်ဘောက မယုံနိုင်စရာကောင်းပြီး မက်အယ်လစ္စတာရဲ့ ကန်သွင်းမှုကလည်း တကယ်ကို ကောင်းမွန်ခဲ့ပါတယ်။ အန်ဒိုရဲ့ ဂိုးကတော့ တကယ်ကို အရေးပါခဲ့ပါတယ်။ အာနိုးလ်ရဲ့ အနိုင်ဂိုးကိုတော့ ကျနော်မမြင်တွေ့လိုက်ရပေမယ့် သွင်းဂိုးအားလုံးကတော့ စပါယ်ရှယ်ဂိုးတွေပါပဲ”လို့ ပြောခဲ့ပါတယ်။
လီဗာပူးလ်အသင်းဟာ ဒီပွဲမှာ ပွဲချိန် ၈၆ မိနစ်အထိ ဖူလ်ဟမ်အသင်းကို ၃ ဂိုး- ၂ ဂိုးနဲ့ အရေးနိမ့် နေခဲ့ပေမယ့် နောက်ကျ ချေပဂိုးနဲ့ အနိုင်ဂိုးတွေကြောင့် ၄ ဂိုး- ၃ ဂိုးနဲ့ အနိုင်ရရှိခဲ့ပါတယ်။
အဲ့ဒါကြောင့် လီဗာပူးလ်အသင်းဟာ အန်ဖီးလ်ကွင်းမှာ ရလဒ်ကောင်း ရယူနိုင်ခဲ့တဲ့ မှတ်တမ်းကောင်းကို ဆက်ပြီး ထိန်းသိမ်းနိုင်ခဲ့ပါတယ်။
လီဗာပူးလ်အသင်း နည်းပြ ကလော့ပ်ကို တွေ့ရစဉ်
လီဗာပူးလ်အသင်းဟာ ဒီနိုင်ပွဲကြောင့် ပရီးမီးယားလိဂ် အမှတ်ပေးဇယား အဆင့် ၂ နေရာကို တက်လှမ်းနိုင်ခဲ့ပြီး ထိပ်ဆုံးနေရာက အာဆင်နယ်အသင်းနဲ့ ၂ မှတ်ကွာဟနေတာ ဖြစ်ပါတယ်။
ဖူလ်ဟမ်အသင်းနည်းပြ မာကိုဆေးလ်ဗားက လီဗာပူးလ်အသင်းရဲ့ သွင်းဂိုးတွေဟာ အလွန်ကောင်းမွန်ပေမယ့် သူတို့ရှုံးနိမ့်ဖို့ မထိုက်တန်ဘူးလို့ ပြောခဲ့ပါတယ်။
မာကိုဆေးလ်ဗားက “ကျနော်တို့ဟာ ဒီရလဒ်ထက် ပိုပြီးထိုက်တန်ပါတယ်။ ကျနော်တို့ဟာ လီဗာပူးလ်အသင်းလို အသင်းကို ချေပဂိုးတွေသွင်းပြီး ဦးဆောင်ဂိုးလည်း ရယူနိုင်ခဲ့ပါတယ်။ ဒါက မလွယ်ကူပေမယ့် ကျနော်တို့ လုပ်နိုင် ခဲ့ပါတယ်။ သူတို့ရဲ့သွင်းဂိုးတွေက ကမ္ဘာ့အဆင့် သွင်းဂိုးတွေဖြစ်ပြီး ဒီလို အခြေအနေမျိုးမှာ တစ်ခုခုလုပ်ဖို့က မလွယ်ကူပါဘူး”လို့ ပြောခဲ့ပါတယ်။
လီဗာပူးလ်အသင်းဟာ ကြားရက်ထဲမှာ ပရီးမီးယားလိဂ် ပွဲစဉ်အဖြစ် ရှက်ဖီးယူနိုက်တက်အသင်းနဲ့ ယှဉ်ပြိုင်ရမှာ ဖြစ်ပြီး ဖူလ်ဟမ်အသင်းကတော့ နော်တင်ဟမ်ဖောရက်စ်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Daily Mail
