CNI News
၂၀၂၅ ခုနှစ်၊ ဧပြီ ၄
မြန်မာနိုင်ငံ၊ မန္တလေးမြို့ရှိ ကျုံးအနောက်ဘက်တွင် မြန်မာနိုင်ငံကြက်ခြေနီအသင်း(MRCS)က ပဏာမကျန်းမာရေးစောင့်ရှောက်မှုပေးသည့် ရွေ့လျားဆေးကုသခန်း(Mobile Clinic) ကို ဧပြီ ၃ ရက်က စတင်ဖွင့်လှစ်ခဲ့သည်ဟု MRCS မှ ထုတ်ပြန်ခဲ့သည်။
ထို့နောက် လူပေါင်း ၁၃၀ ဝန်းကျင်ကို ကျန်းမာရေး စောင့်ရှောက်မှုများ ပေးအပ်ထားပြီဖြစ်ကြောင်း၊ အခြား နေရာများတွင်လည်း ဆက်လက်ဖွင့်လှစ်နိုင်ရန် ဆောင်ရွက်နေကြောင်း မြန်မာနိုင်ငံကြက်ခြေနီအသင်း(MRCS)က ထုတ်ပြန်ခဲ့သည်။
မြန်မာနိုင်ငံ၊ မန္တလေးမြို့အနီ စစ်ကိုင်းမြို့ကို ဗဟိုပြု၍ ပြင်းအား ၇ ဒသမ ၇ အဆင့်ရှိ အလွန်အားပြင်းသော ငလျင်ကြီးတစ်ခုနှင့် နောက်ဆက်တွဲ ငလျင်ငယ်များ လှုပ်ခတ်ခဲ့ခြင်းကြောင့် မန္တလေးတိုင်း၊ စစ်ကိုင်းတိုင်း၊ ပဲခူးတိုင်း၊ မကွေးတိုင်း၊ နေပြည်တော်ကောင်စီနယ်မြေနှင့် ရှမ်းပြည်နယ်တို့တွင် ဧပြီ ၃ ရက်နေ့ နံနက် ၈ နာရီထိ စာရင်းအရ လူ ၃၀၀၀ ကျော် သေဆုံးခဲ့သလို ၄၀၀၀ ကျော် ထိခိုက်ဒဏ်ရာရရှိခဲ့သည်။
ထို့ပြင် လမ်းတံတားများ၊ လူနေအိမ်များ၊ ဟိုတယ်များ၊ ဘာသာရေးအဆောက်အအုံများ၊ ကားများ ပြိုကျပျက်စီး ဆုံးရှုံးခဲ့သည်။
ထို့ကြောင့် ငလျင်ဘေးသင့် ပြည်သူများ ကူညီကယ်ဆယ်ရေးအတွက် ထိုင်း၊ အိန္ဒိယ၊ တရုတ်၊ လာအို၊ ဗီယက်နမ်၊ ရုရှား၊ ဘင်္ဂလားဒေ့ရှ်၊ UAE၊ စင်္ကာပူ၊ ဂျပန်၊ ဘူတန်၊ ဟောင်ကောင်တို့မှ နိုင်ငံတကာ ကူညီကယ်ဆယ်ရေးအဖွဲ့များ ရောက်ရှိလာပြီး ကူညီကယ်ဆယ်ရေး လုပ်ငန်းများ ပါဝင်ဆောင်ရွက်နေသည်။
အလားတူ ရုရှား၊ အိန္ဒိယ၊ တရုတ်၊ ဂျပန်တို့သည် ယာယီဆေးရုံများ မန္တလေးတိုင်းအတွင်း ဖွင့်လှစ်၍ ကျန်းမာရေး စောင့်ရှောက်မှုများ ပေးအပ်လျက်ရှိသည်။
