- By CNI
- Category: အားကစား
- Hits: 83
CNI Sport News
၂၀၂၄ ခုနှစ်၊ မတ်လ ၂၀
ရီးရယ်လ်အသင်းဂိုးသမား ကော့တွိုက်စ်ဟာ လေ့ကျင့်ရေးကွင်းမှာရရှိခဲ့တဲ့ ဒူးဒဏ်ရာအသစ်ကြောင့် ရာသီအကုန် ထိ အနားယူရဖွယ်ရှိနေပါတယ်။
ကော့တွိုက်စ်ဟာ ပြီးခဲ့တဲ့နှစ် သြဂုတ်က ဒူးအရွတ်ဒဏ်ရာရရှိခဲ့လို့ ခွဲစိတ်ကုသမှု ခံယူခဲ့ရပြီး မကြာသေးခင်ကမှ ရီးရယ်လ်အသင်းနဲ့ လေ့ကျင့်မှုတွေ ပြန်လည်ပြုလုပ်နိုင်ခဲ့တာပါ။
ရီးရယ်လ်အသင်းဟာ ကော့တွိုက်စ်ကို မန်စီးတီးအသင်းနဲ့ ယှဉ်ပြိုင်ရမယ့် ချန်ပီယံလိဂ် ကွာတားဖိုင်နယ်ပွဲစဉ်မှာ ပြန်လည်အသုံးပြုနိုင်ဖို့ မျှော်လင့်ထားတာ ဖြစ်ပါတယ်။
ဒါပေမယ့် ကော့တွိုက်စ်ဟာ ဒဏ်ရာထပ်ပြီး ရရှိသွားခဲ့လို့ ဒီရာသီ လက်ကျန်ပွဲစဉ်တွေမှာ ရီးရယ်လ်အသင်း အတွက် ပါဝင်နိုင်ဖွယ်မရှိတော့ပါဘူး။
ဘယ်လ်ဂျီယံ ဂိုးသမားဟာ ဒဏ်ရာကြောင့် လေ့ကျင့်ရေးကွင်းကနေ မျက်ရည်တွေနဲ့ ထွက်ခွာသွားခဲ့တယ်လို့ ESPN က ဖော်ပြထားတာပါ။
ကော့တွိုက်စ်ဟာ ဒဏ်ရာကြောင့် ရာသီအကုန်ထိ အနားယူရဖွယ်ရှိလို့ ဘယ်လ်ဂျီယံအသင်းနဲ့ ယူရို ၂၀၂၄ ပြိုင်ပွဲ ကို လွဲချော်ဖို့ သေချာသွားပြီ ဖြစ်ပါတယ်။
ကော့တွိုက်စ်ကို တွေ့ရစဉ်
ကော့တွိုက်စ်ကတော့ ဒဏ်ရာကြောင့် ဝမ်းနည်းမိပေမယ့် အရင်ကထက် ပိုပြီးသန်မာစွာနဲ့ ပြန်လာခဲ့မယ်လို့ ပြောထားခဲ့တာပါ။
ရီးရယ်လ်အသင်းဟာ ဒီရာသီအစပိုင်းမှာ ကော့တွိုက်စ်ရဲ့ ဒဏ်ရာကြောင့် ချယ်လ်ဆီးအသင်းဂိုးသမား ကီပါကို ရာသီအကုန်ထိ အငှားနဲ့ ခေါ်ယူခဲ့ရတာ ဖြစ်ပါတယ်။
ဒါပေမယ့် ရီးရယ်လ်အသင်းဟာ ကီပါထက် အသင်းရဲ့ ဒုတိယဂိုးသမား လူနင်ရဲ့ လက်စွမ်းကို ပိုပြီးနှစ်သက်နေတာ ပါ။
အဲဒါကြောင့် ရီးရယ်လ်အသင်းဟာ နောက်ပိုင်းပွဲစဉ်တွေမှာ လူနင်ကိုသာ ပွဲထွက်ဂိုးသမားအဖြစ် အသုံးပြုခဲ့ပြီး အသင်းကလည်း ရလဒ်ကောင်းတွေကို ပိုင်ဆိုင်ခဲ့တာဖြစ်ပါတယ်။
ရီးရယ်လ်အသင်းဟာ ဒီရာသီ လာလီဂါပြိုင်ပွဲမှာ အဆင့် ၂ နေရာက ဘာစီလိုနာအသင်းကို ၈ မှတ်ဖြတ်ပြီး ဦးဆောင်နေတာပါ။
ရီးရယ်လ်အသင်းဟာ နိုင်ငံတကာပွဲစဉ်တွေအပြီး မတ် ၃၁ ရက်မှာ ဘီလ်ဘာအိုအသင်းနဲ့ စပိန်လာလီဂါပွဲစဉ် ယှဉ်ပြိုင်ရမှာ ဖြစ်ပါတယ်။
Source: ESPN
- By CNI
- Category: အားကစား
- Hits: 88
CNI Sport News
၂၀၂၄ ခုနှစ်၊ မတ်လ ၂၀
ယူနိုက်တက်အသင်းခေါင်းဆောင် ဘရူနိုဖာနန်ဒက်စ်က ဒီရာသီမှာ အသင်းနဲ့အတူ FA ဖလားရယူနိုင်ဖို့နဲ့ ပရီးမီးယားလိဂ်ပြိုင်ပွဲမှာ ထိပ်ဆုံး ၄ သင်းထဲ ဝင်ရောက်ဖို့ ပစ်မှတ်ထားတယ်လို့ ပြောခဲ့ပါတယ်။
ဘရူနိုဖာနန်ဒက်စ်က “လက်ကျန်ရာသီအတွက် ကျနော်တို့ရဲ့ ရည်မှန်းချက်က ပရီးမီးယားလိဂ်ပြိုင်ပွဲမှာ ထိပ်ဆုံး ၄ သင်းထဲဝင်ဖို့နဲ့ FA ဖလားကို ရယူနိုင်အောင် ကြိုးစားဖို့ပါ။ ရာသီအကုန်ထိ ဒီရည်မှန်းချက် ၂ ခုကို ရယူနိုင်ဖို့အတွက် ကျနော်တို့ အရာအားလုံးကို လုပ်ဆောင်သွားမှာပါ။ FA ဖလားဟာ ကလပ်အတွက်ရော နိုင်ငံအတွက်ပါ ကြီးမားတဲ့ ဆုဖလားပါ။ ကျနော်တို့ ဗိုလ်လုပွဲကို တက်ချင်ပါတယ်။ ဒါဟာ ခက်ခဲမယ်ဆိုတာ သိပေမယ့် ဗိုလ်လုပွဲကို ရောက်ဖို့ အတွက် အရာအားလုံးကို လုပ်ဆောင်သွားမယ်”လို့ ပြောပါတယ်။
ယူနိုက်တက်အသင်းဟာ ဒီရာသီ ပရီးမီးယားလိဂ်ပြိုင်ပွဲမှာ အဆင့် ၆ နေရာ ရပ်တည်နေပြီး FA ဖလားပြိုင်ပွဲမှာ ဆီမီးဖိုင်နယ်အဆင့်ကို ရောက်ရှိနေတာ ဖြစ်ပါတယ်။
ယူနိုက်တက်အသင်းဟာ ဒီရာသီမှာ ခြေစွမ်းပိုင်း မတည်ငြိမ်တာကြောင့် ရလဒ်တွေဟာ ကောင်းမွန်မှုမရှိခဲ့တာပါ။
ဘရူနိုကို တွေ့ရစဉ်
အဲဒါကြောင့် ချန်ပီယံလိဂ်ပြိုင်ပွဲမှာ အုပ်စုအဆင့်နဲ့ ထွက်ခွာခဲ့ရသလို ကာရာဘောင်းဖလား ပြိုင်ပွဲမှာလည်း စောစီးစွာ ထွက်ခွာခဲ့ရတာ ဖြစ်ပါတယ်။
ယူနိုက်တက်အသင်းအတွက်တော့ FA ဖလားဟာ ဒီရာသီမှာ ရယူနိုင်စရာ တစ်လုံးတည်းသော ဆုဖလားဖြစ်နေ တာကြောင့် ဘရူနိုဖာနန်ဒက်စ် အပါအဝင် တစ်သင်းလုံးက ဒီဆုဖလားကို အရယူချင်နေကြတာပါ။
ယူနိုက်တက်အသင်းဟာ ဒီရာသီ ပရီးမီးယားလိဂ်ပွဲစဉ်ကစားဖို့ ၁၀ ပွဲ ကျန်ရှိနေသေးပေမယ့် အဆင့် ၄ နေရာက အက်စတွန်ဗီလာအသင်းနဲ့ ၉ မှတ်ကွာဟနေတာ ဖြစ်ပါတယ်။
အဲဒါကြောင့် ချန်ပီယံလိဂ် ဝင်ခွင့်ရယူနိုင်ဖို့ ခက်ခဲနိုင်ပေမယ့် ဘရူနိုဖာနန်ဒက်စ်ကတော့ အဆင့် ၄ အတွင်းဝင်ပြီး ရာသီအဆုံးသတ်နိုင်ဖို့ ပစ်မှတ်ထားနေတာပါ။
ယူနိုက်တက်အသင်းဟာ နိုင်ငံတကာပွဲစဉ်တွေအပြီးမှာ ပရီးမီးယားလိဂ်ပွဲစဉ်အဖြစ် မတ် ၃၀ ရက်မှာ ဘရန်ဖို့ဒ် အသင်းနဲ့ ယှဉ်ပြိုင်ရမှာဖြစ်ပြီး FA ဖလားပြိုင်ပွဲမှာတော့ ဆီမီးဖိုင်နယ်ပွဲစဉ်အဖြစ် ကိုဗင်ထရီအသင်းနဲ့ ယှဉ်ပြိုင်ရမှာ ဖြစ်ပါတယ်။
Source: besoccer
- By CNI
- Category: အားကစား
- Hits: 91
CNI Sport News
၂၀၂၄ ခုနှစ်၊ မတ်လ ၁၉
ပေါ်တူဂီအသင်းခေါင်းဆောင် ရော်နယ်ဒိုဟာ မတ်လ ၂၁ ရက်မှာ ကစားမယ့် ဆွီဒင်အသင်းနဲ့ ခြေစမ်းပွဲအတွက် ပေါ်တူဂီအသင်း လူစာရင်းကနေ ထွက်ခွာခဲ့ပါတယ်။
ပေါ်တူဂီအသင်းနည်းပြ မာတီနက်ဇ်ဟာ ရော်နယ်ဒိုကို အသင်းရဲ့ ပဏာမလူစာရင်း ၃၂ ဦးထဲ ထည့်သွင်းခဲ့ပေမယ့် ဆွီဒင်အသင်းနဲ့ပွဲအတွက် ၂၄ ဦးစာရင်းမှာ အယ်လ်နာဆာ အသင်းခေါင်းဆောင် မပါဝင်တော့တာပါ။
ဆွီဒင်အသင်းနဲ့ပွဲမှာ ရော်နယ်ဒို အပြင် ဒါလော့၊ ကန်ဆယ်လို၊ ပါရဲရား၊ အော်တာဗီယို၊ ရူဘင်နာဗက်စ်၊ ဗီတင်ဟာနဲ့ ဂျာအိုဖီးလစ်တို့လည်း မပါဝင်ခဲ့တာ ဖြစ်ပါတယ်။
ဒါပေမယ့် သူတို့တွေဟာ ဆွီဒင်အသင်းနဲ့ ပွဲအပြီး ဆလိုဗေးနီးယားအသင်းနဲ့ ကစားမယ့်ပွဲအတွက် နိုင်ငံအသင်းထံ ပြန်ရောက်လာမယ်လို့ ပေါ်တူဂီဘောလုံးအဖွဲ့ချုပ်က ထုတ်ပြန်ထားတာပါ။
ရော်နယ်ဒိုဟာ အယ်လ်နာဆာအသင်းက အယ်လ်အာလီအသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ဆော်ဒီပရိုလိဂ် ပွဲစဉ်မှာ အသင်းအတွက် ပွဲချိန်ပြည့် ပါဝင်ကစားခဲ့ပြီး အနိုင်ဂိုး သွင်းယူခဲ့ပါတယ်။
ရော်နယ်ဒိုကိုတွေ့ရစဉ်
ရော်နယ်ဒိုဟာ လက်ရှိအချိန်မှာ မိသားစုနဲ့အတူ ဆော်ဒီမှာ အပန်းဖြေ အနားယူနေတာကြောင့် ဆွီဒင်အသင်းနဲ့ ပွဲစဉ်ကို မပါဝင်နိုင်တာလို့ ESPN က ဖော်ပြထားတာ ဖြစ်ပါတယ်။
ဒီရာသီ ဆော်ဒီပရိုလိဂ်ပြိုင်ပွဲမှာ ရော်နယ်ဒိုဟာ ၂၃ ဂိုး သွင်းယူထားပြီး လိဂ်ပြိုင်ပွဲရဲ့ ဂိုးသွင်းအများဆုံး ကစားသမားအဖြစ် ဦးဆောင်နေတာပါ။
၂၀၀၃ ခုနှစ်မှာ ပေါ်တူဂီအသင်းကြီးအတွက် စတင်ပွဲထွက်ခွင့်ရခဲ့တဲ့ ရော်နယ်ဒိုဟာ လက်ရွေးစင်အသင်းအတွက် ၂၀၅ ပွဲ ပါဝင်ကစားထားပြီး ၁၂၈ ဂိုး သွင်းယူကာ နိုင်ငံတကာ သွင်းဂိုးအများဆုံး ကစားသမားအဖြစ် စံချိန်တင် ထားပါတယ်။
ပေါ်တူဂီအသင်းဟာ မတ် ၂၆ ရက်မှာ ဆလိုဗေးနီးယားအသင်းနဲ့ ခြေစမ်းပွဲယှဉ်ပြိုင်မှာဖြစ်ပါတယ်။
Source: ESPN
- By CNI
- Category: အားကစား
- Hits: 91
CNI Sport News
၂၀၂၄ ခုနှစ်၊ မတ်လ ၁၉
ဘာစီလိုနာအသင်းနည်းပြ ဇာဗီဟာ ဒီရာသီလာလီဂါပြိုင်ပွဲမှာ ဒုတိယအကြိမ်မြောက် အနီကတ်ပြ ထုတ်ပယ် ခံရပြီးနောက် ၃ ပွဲ ပယ်ခံရဖွယ်ရှိနေပါတယ်။
ဇာဗီဟာ ဘာစီလိုနာအသင်းက အသလက်တီကိုအသင်းကို ၃ ဂိုး- ဂိုးမရှိနဲ့ အနိုင်ရခဲ့တဲ့ပွဲစဉ်ရဲ့ ပထမပိုင်းမှာ အနီကတ်ပြ ထုတ်ပယ်ခံခဲ့ရတာပါ။
စပိန်လူမျိုးနည်းပြဟာ ကန့်ကွက်မှုတွေကြောင့် ကနဦး အဝါကတ် ပြသခံခဲ့ရပေမယ့် ကွင်းဘေးစည်းမှာ ဆက်ပြီး ဒေါသထွက်နေတာကြောင့် ကွင်းလယ်ဒိုင်လူကြီးရဲ့ အနီကတ်ပြ ထုတ်ပယ်ခြင်းခံခဲ့ရတာ ဖြစ်ပါတယ်။
ဇာဗီဟာ တိုက်ရိုက်အနီကတ်ကြောင့် ၂ ပွဲပယ် ပြစ်ဒဏ်ကျခံရမှာပါ။
ဒါပေမယ့် ဇာဗီဟာ ဒီရာသီ လာလီဂါပြိုင်ပွဲမှာ ဒုတိယအကြိမ်မြောက် အနီကတ်ပြသ ခံခဲ့ရတဲ့အတွက် လိဂ်က သူ့ကို နောက်ထပ် ၁ ပွဲ ထပ်တိုး ပွဲပယ်ပြစ်ဒဏ် ချမှတ်နိုင်တယ်လို့ Diario Sport က ဖော်ပြခဲ့ပါတယ်။
ဇာဗီကို တွေ့ရစဉ်
ဇာဗီအနေနဲ့ ၃ ပွဲပယ်ခံရမယ်ဆိုရင် ဧပြီ ၂၁ ရက်မှာ ကစားရမယ့် ရီးရယ်လ်နဲ့ ဘာစီလိုနာအသင်းတို့ ပွဲစဉ်ကို ပွဲကြည့်စင်ပေါ်ကနေသာ ကြည့်ရှုရတော့မှာပါ။ ဇာဗီဟာ ဘာစီလိုနာအသင်းကို ကိုင်တွယ်ခဲ့တဲ့ ၃ နှစ်အတွင်းမှာ အဝါကတ် ၂၄ ကတ် ပြသခံခဲ့ရပါတယ်။
ဘာစီလိုနာအသင်းဟာ ဒီရာသီအကုန်မှာ နည်းပြရာထူးက ဇာဗီထွက်ခွာမယ်လို့ ကြေညာပြီးနောက်ပိုင်း ကစား ခဲ့တဲ့ပွဲတွေမှာ ရလဒ်ကောင်းတွေ ရရှိထားပြီး စပိန်လာလီဂါ အမှတ်ပေးဇယားအဆင့် ၂ နေရာကို တက်နိုင်ခဲ့တာပါ။
ဒါအပြင် ချန်ပီယံလိဂ်ပြိုင်ပွဲမှာလည်း ကွာတားဖိုင်နယ်အဆင့်ကို တက်နိုင်ခဲ့ပြီး ပြင်သစ်ကလပ် ပီအက်စ်ဂျီအသင်း နဲ့ ယှဉ်ပြိုင်ရမှာ ဖြစ်ပါတယ်။
ဘာစီလိုနာအသင်းဟာ နိုင်ငံတကာပွဲစဉ်အပြီး မတ် ၃၀ ရက်မှာ လာလီဂါပွဲစဉ်အဖြစ် လက်စ်ပါးမက်စ်အသင်းနဲ့ ယှဉ်ပြိုင်ရမှာပါ။
ဘာစီလိုနာအသင်းဟာ ဒီပွဲအပြီး ဧပြီ ၁၀ ရက်မှာ ချန်ပီယံလိဂ် ကွာတားဖိုင်နယ် ပထမအကျော့အဖြစ် ပီအက်စ်ဂျီ အသင်းအိမ်ကွင်းမှာ သွားရောက်ယှဉ်ပြိုင်ရမယ်လို့ သိရပါတယ်။
Source: Goal
- By CNI
- Category: အားကစား
- Hits: 111
CNI Sport News
၂၀၂၄ ခုနှစ်၊ မတ်လ ၁၉
နော်တင်ဟမ်ဖောရက်စ်အသင်းဟာ ပရီးမီးယားလိဂ်ရဲ့ ဘဏ္ဍာရေးစည်းမျဉ်း ချိုးဖောက်ခဲ့တာကြောင့် ၄ မှတ် လျှော့ ပြစ်ဒဏ်ချမှတ်ခံခဲ့ရပါတယ်။
နော်တင်ဟမ်ဖောရက်စ်အသင်းဟာ ၂၀၂၂-၂၃ ရာသီက ပေါင် ၆၁ သန်းအထိ အရှုံးပြခဲ့ပြီး ပရီးမီးယားလိဂ်က သတ်မှတ်ထားတဲ့ တစ်ရာသီပေါင် ၃၅ သန်းထက် ပိုပြီးအရှုံးပြခဲ့တာကြောင့် ရမှတ်လျှော့ ပြစ်ဒဏ်ချမှတ်ခံခဲ့ ရတာပါ။
အဲဒါကြောင့် နော်တင်ဟမ်ဖောရက်စ်အသင်းဟာ ပရီးမီးယားလိဂ်အဆင့် ၁၈ တန်းဆင်းဇုန်ထဲကို ကျရောက်သွား ခဲ့ပြီး လူတန်အသင်းက အဆင့် ၁၇ နေရာကို တက်နိုင်ခဲ့တာ ဖြစ်ပါတယ်။
နော်တင်ဟမ်ဖောရက်စ် အသင်းကတော့ ဒီဆုံးဖြတ်ချက်ကို အလွန်စိတ်ပျက်မိတယ်လို့ ကြေညာချက် ထုတ်ပြန်ခဲ့ တာပါ။
ပရီးမီးယားလိဂ်ဟာ ပြီးခဲ့တဲ့နိုဝင်ဘာက ဘဏ္ဍာရေးစည်းမျဉ်း ချိုးဖောက်လို့ အဲဗာတန်အသင်းကို ၁၀ မှတ်လျှော့ ပြစ်ဒဏ် ချမှတ်ပြီးနောက် ဒုတိယမြောက်အသင်းအဖြစ် နော်တင်ဟမ်ဖောရက်စ်အသင်းကို ရမှတ်လျှော့ပြစ် ဒဏ်ချမှတ်ခဲ့တာ ဖြစ်ပါတယ်။
နော်တင်ဟမ်ဖောရက်စ်အသင်းကို တွေ့ရစဉ်
အဲဗာတန်အသင်းကတော့ ဒီရမှတ် လျှော့ပြစ်ဒဏ်ကို အယူခံဝင်ခဲ့တာမှာ ၁၀ မှတ်ကနေ ၆ မှတ်အထိ လျှော့ချပေး ခြင်း ခံခဲ့ရတာပါ။
နော်တင်ဟမ်ဖောရက်စ် အသင်းကလည်း သူတို့ကို ရမှတ်လျှော့တဲ့ ပြစ်ဒဏ်အပေါ် အယူခံဝင်သွားဖို့ ရှိနေပါတယ်။
နော်တင်ဟမ်ဖောရက်စ်အသင်းဟာ ၂၀၂၂ ခုနှစ်မှာ ပရီးမီးယားလိဂ်ကို တန်းတက်ခဲ့ပြီးနောက် နွေရာသီမှာ ဗြိတိန် စံချိန်တင် ကစားသမားသစ် ၂၂ ဦးအထိ ခေါ်ယူခဲ့ပြီး ၂၀၂၂-၂၃ ရာသီမှာ သူတို့ရဲ့ အသားတင် အပြောင်းအရွှေ့ သုံးစွဲမှုက ပေါင် ၁၄၂.၈ သန်းအထိရှိခဲ့တာပါ။
အဲဒါကြောင့် ပရီးမီးယားလိဂ်ဟာ ဘဏ္ဍာရေးစည်းမျဉ်း ချိုးဖောက်မှုနဲ့ ဇန်နဝါရီက နော်တင်ဟမ်ဖောရက်စ် အသင်းကို စွဲချက်တင်ခဲ့တာ ဖြစ်ပါတယ်။
ပရီးမီးယားလိဂ်ရဲ့ စွဲချက်တင်ခြင်းခံခဲ့ရတဲ့ အသင်းထဲမှာ နော်တင်ဟမ်ဖောရက်စ်အသင်းအပြင် အဲဗာတန် အသင်းလည်း ပါဝင်ခဲ့တာပါ။
အဲဗာတန်အသင်းကတော့ ပရီးမီးယားလိဂ်က သူတို့ကို ဒုတိယအကြိမ်မြောက် ပြစ်ဒဏ်ချမှတ်မှာကို စောင့်ဆိုင်းနေရတာ ဖြစ်ပါတယ်။
Source: BBC
- By CNI
- Category: အားကစား
- Hits: 102
CNI Sport News
၂၀၂၄ ခုနှစ်၊ မတ်လ ၁၉
အသင်းခေါင်းဆောင် မက်ဆီဟာ တံကောက်ကြောဒဏ်ရာကြောင့် အယ်လ်ဆာဗေးဒိုး၊ ကော်စတာရီကာ အသင်းတို့နဲ့ ကစားမယ့်ခြေစမ်းပွဲကို လွဲချော်မယ်လို့ အာဂျင်တီးနား ဘောလုံးအဖွဲ့ချုပ်က ကြေညာခဲ့ပါတယ်။
မက်ဆီဟာ အင်တာမိုင်ယာမီအသင်းက နက်ရှ်ဗီလီအသင်းကို ၃ ဂိုး-၁ ဂိုးနဲ့ အနိုင်ရခဲ့တဲ့ ကွန်ကာကပ်ဖ် ချန်ပီယံများဖလားပြိုင်ပွဲမှာ ဒဏ်ရာရခဲ့တာကြောင့် ဒုတိယပိုင်းအစမှာ လူစားလဲခံခဲ့ရပါတယ်။
အသက် ၃၆ နှစ်အရွယ်ရှိ မက်ဆီဟာ ဒဏ်ရာကြောင့် ပြီးခဲ့တဲ့ ဒီစီယူနိုက်တက်အသင်းနဲ့ မေဂျာလိဂ်ပွဲစဉ်ကို မပါဝင်နိုင်ခဲ့ပါဘူး။
အင်တာမိုင်ယာမီအသင်းနည်းပြ မာတီနိုက မက်ဆီရဲ့ ဒဏ်ရာအခြေအနေကို အပတ်စဉ်တိုင်း အကဲဖြတ်မှု ပြုလုပ်ရမယ်လို့ ပွဲအပြီးမှာ ပြောခဲ့ပါတယ်။
အာဂျင်တီးနားအသင်းဟာ အစောပိုင်းက သူတို့ရဲ့လူစာရင်းမှာ မက်ဆီကို ထည့်သွင်းထားခဲ့ပေမယ့် ကစားသမားရဲ့ ဒဏ်ရာကြောင့် အခုလထဲကစားမယ့် ခြေစမ်းပွဲတွေကို ပါဝင်နိုင်မှာ မဟုတ်ဘူးလို့ ကြေညာချက် ထုတ်ပြန်ခဲ့ပါ တယ်။
မက်ဆီကို တွေ့ရစဉ်
အာဂျင်တီးနားအသင်းဟာ မက်ဆီအပြင် တိုက်စစ်မှူး ဒိုင်ဘားလားနဲ့ ကွင်းလယ်လူ ပလာစီယိုစ်တို့ကိုလည်း ဒဏ်ရာကြောင့် ဆုံးရှုံးခဲ့ရတာ ဖြစ်ပါတယ်။
မက်ဆီကတော့ တံကောက်ကြောဒဏ်ရာကနေ ပြန်လည်ကောင်းမွန်ဖို့အတွက် အင်တာမိုင်ယာမီအသင်းမှာ ပြန်လည်ထူထောင်ရေး လုပ်ငန်းစဉ်တွေကို ဆက်လက် လုပ်ဆောင်သွားမှာပါ။
မက်ဆီဟာ ဒဏ်ရာ အခြေအနေကြောင့် နယူးယော့ခ်ရက်ဘူးလ်၊ နယူးယော့ခ်စီးတီးအသင်းတို့နဲ့ ကစားမယ့် မေဂျာလိဂ်ပွဲစဉ်တွေကို လွဲချော်ဦးမှာ ဖြစ်ပါတယ်။
အင်တာမိုင်ယာမီအသင်းက သူတို့အသင်းခေါင်းဆောင်ကို မက္ကဆီကိုကလပ် မွန်တာရေးအသင်းနဲ့ ကစားမယ့် ကွန်ကာကပ်ဖ်ချန်ပီယံများဖလား ကွာတားဖိုင်နယ်ပွဲစဉ်မှာ ကြံ့ခိုင်မှုအပြည့်နဲ့ ပါဝင်နိုင်ဖို့ မျှော်လင့်နေပါတယ်။
အင်တာမိုင်ယာမီအသင်းဟာ ဒီရာသီမေဂျာလိဂ်ပွဲစဉ် ၅ ပွဲ ကစားအပြီးမှာ ရမှတ် ၁၀ မှတ်နဲ့ အမှတ်ပေးဇယားကို ဦးဆောင်နေတာပါ။
အာဂျင်တီးနားအသင်းဟာ ချန်ပီယံဆုဖလား ကာကွယ်ရမယ့် ၂၀၂၄ ကိုပါအမေရိကဖလား ပြိုင်ပွဲမတိုင်ခင် ဇွန်လထဲမှာ ခြေစမ်းပွဲ ၂ ပွဲယှဉ်ပြိုင်ဖို့ စီစဉ်ထားပြီး မက်ဆီကတော့ ဒီပွဲတွေမှာ နိုင်ငံအသင်းကို ဦးဆောင်နိုင်ဖို့ မျှော်လင့်နေတာဖြစ်ပါတယ်။
Source: ESPN
- By CNI
- Category: အားကစား
- Hits: 85
CNI Sport News
၂၀၂၄ ခုနှစ်၊ မတ်လ ၁၈
FC ဆိုးလ်အသင်းနည်းပြ ကင်ဂျီဒေါင်က ပြီးခဲ့တဲ့ ဂျယ်ဂျူးအသင်းကို အနိုင်ရခဲ့တဲ့ ကေလိဂ်ပွဲစဉ်မှာ ကွင်းလယ်လူ လင်ဂတ်ဟာ အလုပ်ကြိုးစားမှုမရှိဘူးလို့ ဝေဖန်မှု ပြုလုပ်သွားခဲ့ပါတယ်။
ကင်ဂျီဒေါင်က “သူဟာ လူစားဝင်အဖြစ် ကွင်းထဲကို ဝင်ရောက်လာခဲ့ပေမယ့် အလုပ်ကြိုးစားမှု မရှိခဲ့ပါဘူး။ သူ့ရဲ့ နာမည်တန်ဖိုးက ကွင်းထဲမှာ ဘာအဓိပ္ပါယ်မှ မရှိပါဘူး။ ကျနော် ဒါနဲ့ပတ်သက်ပြီး သူ့ကို အတိအကျ ပြောသွားမှာ ပါ”လို့ ပြောခဲ့တာပါ။
FC ဆိုးလ်အသင်းက ဂျယ်ဂျူးအသင်းကို ၂ ဂိုး- ဂိုးမရှိနဲ့ အနိုင်ရတဲ့ပွဲမှာ ယူနိုက်တက်အသင်း ကစားသမားဟောင်း လင်ဂတ်ဟာ လူစားဝင် ကစားသမားအဖြစ် ပါဝင်ခဲ့ရတာဖြစ်ပါတယ်။
ပြီးခဲ့တဲ့ရာသီအကုန်က နော်တင်ဟမ်ဖောရက်စ်အသင်းကနေ ထွက်ခွာပြီးကတည်းက အသင်းလက်မဲ့ ဖြစ်နေခဲ့တဲ့ လင်ဂတ်ဟာ ဖေဖော်ဝါရီကမှ FC ဆိုးလ်အသင်းနဲ့ စာချုပ်ချုပ်ဆိုခဲ့တာပါ။
လင်ဂတ်ဟာ တောင်ကိုရီးယားကလပ်အတွက် ၃ ပွဲ ပါဝင်ကစားထားပေမယ့် ၃ ပွဲစလုံး လူစားဝင်အဖြစ်သာ ကစားခဲ့ရတာ ဖြစ်ပါတယ်။
လင်ဂတ်ဟာ ဒီ ၃ ပွဲစလုံး ခြေစွမ်းပြသနိုင်ခြင်း မရှိသေးပေမယ့် အဝါကတ် ၂ ကြိမ် ပြသခံထားရတာပါ။
လင်ဂတ်ကို တွေ့ရစဉ်
လာမယ့် ရက်သတ္တပတ်တွေမှာ နိုင်ငံတကာပွဲစဉ်တွေ ယှဉ်ပြိုင်ကစားဖို့ ရှိနေတာကြောင့် ကေလိဂ်ပွဲစဉ်တွေကို ရပ်နားမှာဖြစ်လို့ လင်ဂတ်ဟာ အနားရမှာ ဖြစ်ပါတယ်။
အင်္ဂလန်အသင်းနည်းပြ ဆောက်ဂိတ်ဟာ လာမယ့်ခြေစမ်းပွဲတွေအတွက် လက်ရွေးစင်အသင်း လူစာရင်းမှာ လင်ဂတ်ကို မရွေးချယ်တာကြောင့် ကွင်းလယ်ကစားသမားဟာ ၂ ပတ်ကြာအနားရဖို့ ရှိနေတာပါ။
FC ဆိုးလ်အသင်းဟာ ရာသီသစ် ကေလိဂ်ပွဲစဉ် ၃ ပွဲ ကစားအပြီးမှာ ၁ ပွဲနိုင်၊ ၁ ပွဲသရေ၊ ၁ ပွဲရှုံး ရမှတ် ၄ မှတ်နဲ့ အဆင့် ၇ နေရာမှာ ရပ်တည်နေပါတယ်။
FC ဆိုးလ်အသင်းဟာ လာမယ့် ကေလိဂ်ပွဲစဉ်အဖြစ် မတ် ၃၁ ရက်မှာ ဂမ်ဝန်အသင်းနဲ့ ယှဉ်ပြိုင်ရမှာဖြစ်ပါတယ်။
Source: Goal
- By CNI
- Category: အားကစား
- Hits: 97
CNI Sport News
၂၀၂၄ ခုနှစ်၊ မတ်လ ၁၈
မန်စီးတီးအသင်းနည်းပြ ဂွာဒီယိုလာက အသင်းရဲ့ လာမယ့်ပွဲစဉ်ဖြစ်တဲ့ အာဆင်နယ်အသင်းနဲ့ ပရီးမီးယားလိဂ် ပွဲစဉ်ကို ဗိုလ်လုပွဲလို့ ပြောခဲ့ပါတယ်။
ဂွာဒီယိုလာက “ကျနော်တို့ဟာ အာဆင်နယ်နဲ့ ဗိုလ်လုပွဲရှိပါတယ်။ ဒါပေမယ့် လက်ရှိအချိန်မှာ ကျနော်တို့ အနားယူမှုတွေ ပြုလုပ်သွားမှာပါ။ ကျနော်အနာဂတ်ကို မတွေးချင်ပါဘူး။ ကစားသမားတွေဟာ နိုင်ငံအသင်းဆီ သွားရမှာဖြစ်လို့ ပတ်ဝန်းကျင် အပြောင်းအလဲက ကောင်းပါတယ်။ သူတို့ထဲက တချို့ကတော့ သူတို့ရဲ့ မိသားစု တွေနဲ့ တွေ့ဆုံခွင့်ရပါလိမ့်မယ်။ ကျနော်တို့ ပြန်လာတဲ့အချိန်မှာ အာဆင်နယ်နဲ့ပွဲအတွက် ပြင်ဆင်ဖို့ အချိန် ၃ ရက် ရှိပါတယ်”လို့ ပြောပါတယ်။
ဒီရာသီ ပရီးမီးယားလိဂ် ပြိုင်ပွဲပြီးဆုံးဖို့ ၁၀ ပွဲသာ ကျန်ရှိတော့တဲ့အချိန်မှာ မန်စီးတီးနဲ့ အာဆင်နယ်အသင်းတို့ဟာ လီဗာပူးလ်အသင်းနဲ့အတူ ပရီးမီးယားလိဂ် ချန်ပီယံဆုအတွက် ပြိုင်ဆိုင်မှုတွေ ပြင်းထန်နေတာဖြစ်ပါတယ်။
ဂွာဒီယိုလာကို တွေ့ရစဉ်
အာဆင်နယ်အသင်းဟာ ၆၄ မှတ်နဲ့ အဆင့် ၁ နေရာမှာ ရပ်တည်နေပြီး လီဗာပူးလ်အသင်းက ရမှတ်တူ၊ ဂိုးကွာခြား ချက်နဲ့ အဆင့် ၂၊ မန်စီးတီးအသင်းက ရမှတ် ၆၃ မှတ်နဲ့ အဆင့် ၃ နေရာမှာ ရပ်တည်နေတာပါ။
ပြီးခဲ့တဲ့ရာသီက အာဆင်နယ်အသင်းဟာ ပရီးမီးယားလိဂ်ဖလားကို ရယူနိုင်ဖို့ နီးစပ်ခဲ့ပေမယ့် နောက်ပိုင်းပွဲတွေမှာ ရလဒ်တွေဆိုးခဲ့တာကြောင့် မန်စီးတီးအသင်းဟာ နောက်ဆုံး ၆ နှစ်အတွင်း အမှတ်ပေးဖလားကို ၅ ကြိမ်မြောက် ရယူနိုင်ခဲ့တာ ဖြစ်ပါတယ်။
အာဆင်နယ်အသင်းဟာ ရာသီသစ် မစတင်ခင် မန်စီးတီးအသင်းနဲ့ ယှဉ်ပြိုင်ခဲ့တဲ့ ကွန်မြူနတီဒိုင်းပွဲစဉ်မှာ ပင်နယ်တီ အဆုံးအဖြတ်နဲ့အနိုင်ရခဲ့သလို ပရီးမီးယားလိဂ် အိမ်ကွင်းပွဲစဉ်မှာလည်း မန်စီးတီးအသင်းကို ၁ ဂိုး- ဂိုးမရှိနဲ့ အနိုင်ရရှိခဲ့တာပါ။
ဂွာဒီယိုလာကတော့ ပြီးခဲ့တဲ့ရာသီကလိုပဲ အိမ်ကွင်းပရိသတ်တွေရှေ့မှာ အာဆင်နယ်အသင်းကို အနိုင်ရယူနိုင် မယ်လို့ ယုံကြည်နေပါတယ်။
မန်စီးတီးနဲ့ အာဆင်နယ်အသင်းတို့ဟာ မတ် ၃၁ ရက်မှာ ယှဉ်ပြိုင်ကြမှာ ဖြစ်ပါတယ်။
Source: Metro
- By CNI
- Category: အားကစား
- Hits: 93
CNI Sport News
၂၀၂၄ ခုနှစ်၊ မတ်လ ၁၈
တူရကီစူပါလိဂ်ပွဲစဉ် တစ်ပွဲဖြစ်တဲ့ ထရက်ဇွန်စပေါ်နဲ့ ဖီနာဘာချီအသင်းတို့ ပွဲစဉ်အပြီးမှာ ထရက်ဇွန်စပေါ်အသင်း ပရိသတ်တွေဟာ ကွင်းအတွင်းပြေးဝင်ကာ ဖီနာဘာချီအသင်း ကစားသမားတွေကို တိုက်ခိုက်ခဲ့တာ ဖြစ်ပါတယ်။
ဒီပွဲမှာ ဖီနာဘာချီအသင်းက အိမ်ရှင် ထရက်ဇွန်စပေါ်အသင်းကို ၃ ဂိုး-၂ ဂိုးနဲ့ အနိုင်ရရှိခဲ့တာပါ။
ပွဲချိန် ၈၇ မိနစ်မှာ တိုက်စစ်မှူး ဘတ်ရှုအာယီက ဖီနာဘာချီအသင်းအတွက် အနိုင်ဂိုး သွင်းယူအပြီးမှာ ပြိုင်ဘက် ပရိသတ်တွေက ကွင်းအတွင်း အရာဝထ္ထုတွေနဲ့ ပစ်ပေါက်ခဲ့တာကနေ နှစ်သင်းကြား တင်းမာမှုတွေ မြင့်တက်လာ ခဲ့တာ ဖြစ်ပါတယ်။
ဖီနာဘာချီအသင်း ကစားသမားတွေဟာ ကွင်းလယ်ဒိုင်လူကြီးက ပွဲသိမ်းခရာ မှုတ်ပြီးချိန်မှာ ကွင်းအတွင်း အောင်ပွဲခံမှု ပြုလုပ်ခဲ့ကြတာပါ။
ဒီအချိန်မှာ ပရိသတ်တစ်ဦးက ကွင်းထဲပြေးဝင်ကာ ဖီနာဘာချီအသင်း နောက်ခံလူ အိုဆာရီကို တိုက်ခိုက်ခဲ့တာ ဖြစ်ပါတယ်။
ဖီနာဘာချီအသင်း ကစားသမားတွေနဲ့ ပရိသတ် ခိုက်ရန်ဖြစ်ပွားနေစဉ်
ဖီနာဘာချီတိုက်စစ်မှူး ဘတ်ရှုအာယီကလည်း ထရက်ဇွန်စပေါ် ပရိသတ်တစ်ဦးနဲ့ ထိပ်တိုက်တွေ့ခဲ့ပြီး ကန်ခဲ့တာ ကို ရုပ်သံတွေမှာ မြင်တွေ့ခဲ့ရတာပါ။
အိမ်ရှင်ပရိသတ် အများအပြားဟာ ကွင်းအတွင်း ဝင်ရောက်လာခဲ့တာကြောင့် ဖီနာဘာချီ ကစားသမားတွေဟာ ကွင်းထဲကနေ ထွက်ပြေးခဲ့ကြရတာဖြစ်ပြီး လုံခြုံရေးတပ်ဖွဲ့တွေက ကစားသမားတွေကို အကာအကွယ်ပေးဖို့ ကြိုးစားခဲ့ရပါတယ်။
ဒီအဖြစ်အပျက်နဲ့ ပတ်သက်ပြီး တူရကီပြည်ထဲရေးဝန်ကြီး အလီယာလီကာယက “အားကစားဆိုတာ လူကြီး လူကောင်း ဆန်ရမှာပါ။ ဘောလုံးကွင်းတွေမှာ အကြမ်းဖက်မှု ကျူးလွန်တာက လုံးဝလက်ခံနိုင်စရာမရှိပါဘူး”လို့ X လူမှုကွန်ယက်မှာ ရေးသားခဲ့တာပါ။
ဒီရာသီ တူရကီစူပါလိဂ်ပြိုင်ပွဲမှာ အငြင်းပွားဖွယ်ရာ အဖြစ်အပျက်တွေ ဆက်တိုက်ဖြစ်နေတာဖြစ်ပြီး ဒီဇင်ဘာလ တုန်းကလည်း အန်ကာရာအသင်း အကြီးအကဲက ကွင်းထဲဆင်းပြီး ကွင်းလယ်ဒိုင်လူကြီးကို တိုက်ခိုက်ခဲ့တာ ဖြစ်ပါတယ်။
အဲဒါကြောင့် တူရကီစူပါလိဂ်ပွဲစဉ်တွေကို ရပ်ဆိုင်းခဲ့ရသလို ဒိုင်လူကြီးရဲ့ ဆုံးဖြတ်ချက်အပေါ် ကန့်ကွက်မှု အများအပြားနဲ့လည်း ကြုံတွေ့ခဲ့ရတာပါ။
၂၀၂၃-၂၄ ရာသီ တူရကီစူပါလိဂ် ပွဲစဉ် ၃၀ ကစားအပြီးမှာ ဖီနာဘာချီအသင်းဟာ အဆင့် ၂ နေရာမှာ ရပ်တည်နေ ပြီး အဆင့် ၁ နေရာက ဂါလာတာစာရေးအသင်းနဲ့ ၂ မှတ်ကွာဟနေတာ ဖြစ်ပါတယ်။
Source: ESPN
- By CNI
- Category: အားကစား
- Hits: 98
CNI Sport News
၂၀၂၄ ခုနှစ်၊ မတ်လ ၁၈
ယူနိုက်တက်အသင်းနည်းပြ အဲရစ်တန်ဟတ်က လီဗာပူးလ်အသင်းကို အချိန်ပိုမှာ အနိုင်ရပြီး FA ဖလား ဆီမီးဖိုင်နယ် တက်နိုင်ခဲ့ပြီးနောက် အသင်းဟာ ဘယ်ပြိုင်ဘက် အသင်းကိုမဆို အနိုင်ယူနိုင်တယ်လို့ ပြောလိုက်ပါတယ်။
အဲရစ်တန်ဟတ်က “အသင်းဟာ အံ့သြစရာကောင်းတဲ့ အရာတွေကိုလုပ်နိုင်ဖို့ ယုံကြည်ချက်နဲ့ စွမ်းအင်တွေရှိပါ တယ်။ လီဗာပူးလ်အသင်းကို အနိုင်ယူနိုင်ခဲ့တာကြောင့် ဘယ်ပြိုင်ဘက်ကိုမဆို ကျနော်တို့ အနိုင်ယူနိုင်တယ်လို့ ထင်ပါတယ်။ ပထမ ၃၅ မိနစ်ဟာ ဒီရာသီ ကျနော်တို့ရဲ့ အကောင်းဆုံးမိနစ် ဖြစ်ခဲ့ပါတယ်။ ကစားသမားတွေဟာ ဒီပွဲကို အနိုင်ရယူနိုင်ဖို့ ခိုင်မာတဲ့ယုံကြည်ချက်ရှိခဲ့ပါတယ်။ ဒါကို ကျနော်တို့လိုချင်ခဲ့ပြီး ရလည်းရယူနိုင်ခဲ့ပါတယ်” လို့ ပြောကြားခဲ့ပါတယ်။
FA ဖလား ကွာတားဖိုင်နယ်ပွဲစဉ်အဖြစ် ယှဉ်ပြိုင်ခဲ့တဲ့ပွဲမှာ ယူနိုက်တက်အသင်းဟာ အချိန်ပိုမှာ လီဗာပူးလ်အသင်း ကို ၄ ဂိုး- ၃ ဂိုးနဲ့ အနိုင်ရရှိခဲ့တာ ဖြစ်ပါတယ်။
ဒီပွဲမှာ ယူနိုက်တက်အသင်းဟာ တိုမီနေးရဲ့ သွင်းဂိုးနဲ့ ဦးဆောင်နိုင်ခဲ့ပေမယ့် မက်အယ်လစ္စတာနဲ့ ဆာလက်တို့က လီဗာပူးလ်အသင်းအတွက် ၂ ဂိုးဆက်တိုက်သွင်းပြီး ပထမပိုင်းမှာ လီဗာပူးလ်အသင်းက ၂ ဂိုး-၁ ဂိုးနဲ့ အနိုင်ရနေခဲ့ တာပါ။
ယူနိုက်တက်အသင်းအတွက် ချေပဂိုးကို ဒုတိယပိုင်းပြီးဆုံးဖို့ မိနစ်အနည်းငယ်အလိုမှာ အန်တိုနီက သွင်းယူခဲ့လို့ ၂ ဂိုးစီသရေနဲ့ အချိန်ပိုဆက်လက် ယှဉ်ပြိုင်ခဲ့ရပါတယ်။
အဲရစ်တန်ဟတ်ကို တွေ့ရစဉ်
အချိန်ပိုမှာ အီလီယော့က လီဗာပူးလ်အသင်းအတွက် ဦးဆောင်ဂိုး သွင်းယူနိုင်ခဲ့ပေမယ့် ရက်ရှ်ဖို့ဒ်က ချေပဂိုးသွင်း ပြီး အာမတ်က အနိုင်ဂိုး သွင်းယူခဲ့တာကြောင့် ယူနိုက်တက်အသင်း အနိုင်ရပြီး ဆီမီးဖိုင်နယ်တက်နိုင်ခဲ့တာပါ။
အာမတ်ဟာ ဂိုးသွင်းအပြီးမှာ အင်္ကျီချွတ် အောင်ပွဲခံခဲ့လို့ နှစ်ဝါတစ်နီနဲ့ ထုတ်ပယ်ခံခဲ့ရပါတယ်။
ယူနိုက်တက်အသင်းနည်းပြ အဲရစ်တန်ဟတ်က အနိုင်ဂိုးသွင်းယူခဲ့တဲ့ အာမတ်ကို ချီးကျူးမှု ပြုလုပ်ခဲ့ပါတယ်။
အဲရစ်တန်ဟတ်က “ကျနော်သူ့အတွက် အလွန်ပျော်ရွှင်ပါတယ်။ သူဟာ ဒဏ်ရာကနေ ပြန်လာနိုင်ခဲ့ပေမယ့် သူ့ရဲ့နေရာမှာ ပြိုင်ဆိုင်မှုတွေ အများကြီးရှိနေတာကြောင့် သူနဲ့ထိုက်တန်တဲ့ ပွဲကစားချိန်ကို အမြဲတမ်းမရခဲ့ပါဘူး။ ဒါပေမယ့် သူဘာလုပ်နိုင်လဲဆိုတာကို ကျနော်တို့သိပြီး သူလုပ်နိုင်ခဲ့တဲ့အရာအတွက် အလွန်ပျော်ရွှင်တယ်”လို့ ပြောကြားခဲ့ပါတယ်။
ယူနိုက်တက်အသင်းဟာ FA ဖလား ဆီမီးဖိုင်နယ်ပွဲစဉ်အဖြစ် ကိုဗင်ထရီအသင်းနဲ့ ယှဉ်ပြိုင်ရမှာဖြစ်ပြီး နောက်ထပ် ဆီမီးဖိုင်နယ်ပွဲစဉ်မှာတော့ ချယ်လ်ဆီးနဲ့ မန်စီးတီးအသင်း ယှဉ်ပြိုင်ရမှာဖြစ်ပါတယ်။
Source: ESPN