- By CNI
- Category: ဆောင်းပါး
- Hits: 537
CNI Sport Article
၂၀၂၃ ခုနှစ်၊ မေလ ၂၁
ရိုးမားအသင်းဟာ ပြီးခဲ့တဲ့ရက်ပိုင်းက ကစားခဲ့တဲ့ ယူရိုပါလိဂ် ဆီမီးဖိုင်နယ် ဒုတိယအကျော့ ပွဲစဉ်မှာ လေဗာကူ ဆင် အသင်းနဲ့ ဂိုးမရှိ သရေကစားပြီး နှစ်ကျော့ပေါင်း ရလဒ် ၁ ဂိုး- ဂိုးမရှိနဲ့ အနိုင်ရကာ ယူရိုပါလိဂ် ဗိုလ်လုပွဲကို တက်လှမ်းသွားခဲ့ပါတယ်။
ဒါဟာ မော်ရင်ဟိုရဲ့ လက်အောက်မှာ ရိုးမားအသင်း ဥရောပပြိုင်ပွဲတွေရဲ့ ဗိုလ်လုပွဲကို ၂ နှစ် ဆက်တိုက် တက်နိုင် ခဲ့တာပဲ ဖြစ်ပါတယ်။
စပါယ်ရှယ်ဝမ်းလို့ လူသိများတဲ့ မော်ရင်ဟိုဟာ ရိုးမားအသင်းကို ပထမဆုံး ကိုင်တွယ်တဲ့ ရာသီမှာ ယူရိုပါ ကွန်းဖရန့်စ်လိဂ် ချန်ပီယံဆုကို ရယူပေးနိုင်ခဲ့တာ ဖြစ်ပါတယ်။
ရိုးမားအသင်းဟာ ဒီပြိုင်ပွဲရဲ့ ပထမဆုံး ချန်ပီယံအသင်း အဖြစ်လည်း မှတ်တမ်း တင်နိုင်ခဲ့တာပါ။ မော်ရင်ဟို ရိုးမား အသင်းကို မရောက်ခင်တုန်းက ဥရောပဖလားပြိုင်ပွဲတွေရဲ့ ဗိုလ်လုပွဲနဲ့ နှစ်ပေါင်း ၃၀ ကျော်ကြာ ဝေးကွာခဲ့ပြီး ဆု ဖလား ရခဲ့တာကတော့ ၁၉၆၀-၆၁ ရာသီက ဖြစ်ပါတယ်။
အခုတော့ ရိုးမားအသင်းဟာ ဥရောပပြိုင်ပွဲတွေရဲ့ ဗိုလ်လုပွဲကို ၂ နှစ်ဆက်တောင် တက်ရောက်နိုင်ခဲ့ပြီ ဖြစ်ပါ တယ်။
ဒါဟာ မော်ရင်ဟိုရဲ့ သက်ရောက်မှုဖြစ်ပြီး ပေါ်တူဂီ လူမျိုးနည်းပြဟာ သူကိုင်တွယ်ခဲ့တဲ့ အသင်းတွေက တချို့ကို ဥရောပပြိုင်ပွဲတွေမှာ အောင်မြင်မှုရအောင် ကိုင်တွယ်နိုင်ခဲ့တဲ့ ဂုဏ်ပုဒ်မျိုးကို ရိုးမားအသင်းမှာ ဆက်ပြီး လုပ်ပြ နေခဲ့တာပါ။
ရိုးမားအသင်း အောင်ပွဲခံနေကြစဉ်
ဒါတောင် မော်ရင်ဟိုဟာ ကစားသမားတွေ ဝယ်ယူဖို့ ရိုးမားအသင်းက ဘတ်ဂျတ် အလုံအလောက် ချပေးခြင်းကို မခံခဲ့ရဘဲ စွမ်းဆောင် ပြနေခြင်း ဖြစ်ပါတယ်။
ဒါပေမယ့် မော်ရင်ဟိုဟာ နာမည်ကြီး ကစားသမားတွေကို အလွတ်နဲ့ အသင်းဆီ လာရောက်အောင် ဆွဲဆောင်နိုင် ခဲ့တာပါ။
ဒါကတော့ ဒိုင်ဘားလား၊ မာတစ်၊ ဘယ်လော့တီတို့ဖြစ်ပြီး ပီအက်စ်ဂျီ ကွင်းလယ်ကစားသမား ဝစ်ချ်နယ်လ်ဒန်း ကိုလည်း အသင်းမှာ အငှားနဲ့ လာရောက်ကစားအောင် ခေါ်ယူနိုင်ခဲ့ပါတယ်။ မော်ရင်ဟိုဟာ ရှိတဲ့အသင်း လူ အင်အားကို လူငယ် ကစားသမားတွေနဲ့ ပေါင်းစပ်ပြီး အောင်မြင်မှု လမ်းကြောင်းပေါ် ရောက်အောင် တည်ဆောက် ပေးနေခဲ့တာပါ။
လက်ရှိ ရိုးမားအသင်းမှာ ရှိနေတဲ့ ကစားသမားတွေဟာ မော်ရင်ဟို အတွက်ဆို အသေခံပြီး တိုက်ပွဲဝင်မယ့် သူတွေ လည်း ဖြစ်ပါတယ်။
အခြား သူကိုင်တွယ်ခဲ့တဲ့ အသင်းတွေမှာလည်း မော်ရင်ဟိုအတွက် နေရာပြောင်းပြီးတောင် ကစားပေးတဲ့ သူတွေ အများကြီး ရှိခဲ့တာပါ။
ဒါတွေက နည်းပြလောကမှာ မော်ရင်ဟို အောင်မြင်ခဲ့တဲ့ အကြောင်းအရာတွေဖြစ်ပြီး သူကလည်း ကစားသမား တွေ သူ့အတွက် ကစားပေးချင်စိတ်ရှိအောင် ပြုလုပ်တတ်တာ ဖြစ်ပါတယ်။
ပြီးခဲ့တဲ့ လေဗာကူဆင်နဲ့ပွဲမှာ မော်ရင်ဟိုဟာ အသင်းအတွက် အနစ်နာခံပြီး ကစားပေးခဲ့တဲ့ ကစားသမားတွေကို ချီးကျူးမှု ပြုလုပ်သွားခဲ့တာပါ။
ရိုမားအသင်းသားတွေနဲ့ မော်ရင်ဟိုကို တွေ့ရစဉ်
ရိုးမားအသင်းဟာ အရင်က တော့တီတို့ လက်ထက်မှာ နာမည်ကျော်ခဲ့ပေမယ့် နောက်ပိုင်းမှာ အောင်မြင်မှုတွေ လည်း မရတော့လို့ အသင်းပုံရိပ်တွေဟာ ကျဆင်းလာခဲ့ပြီး ဥရောပမှာလည်း ဘာမှမဟုတ်တော့တာ ဖြစ်ပါတယ်။
ဒါပေမယ့် မော်ရင်ဟို ရောက်လာပြီးချိန်မှာ သူ့ရဲ့ပုံရိပ်နဲ့အတူ ရိုးမားအသင်းရဲ့ ပုံရိပ်ကလည်း တဟုန်ထိုး တိုးတက် လာတော့တာပါ။
မော်ရင်ဟိုဟာ စပါးအသင်းက လွဲပြီး သူကိုင်တွယ်တဲ့ အသင်းတိုင်းမှာ ဆုဖလားရအောင် ကိုင်တွယ်တက်တဲ့ အစဉ်အလာကို ရိုးမားအသင်းမှာလည်း ဆက်ထိန်းခဲ့ပြီး ဥရောပမှာလည်း ၂ နှစ်ဆက်တိုက် ချန်ပီယံဆု ရရှိအောင် ကိုင်တွယ်ပေးဖို့ လက်တစ်လှမ်းအကွာကို ရောက်ရှိလာခဲ့ပါတယ်။
ပေါ်တူဂီလူမျိုး အနေနဲ့ ရိုးမားအသင်းအတွက် ယူရိုပါလိဂ်ဖလားသာ ရယူပေးနိုင်ခဲ့မယ်ဆိုရင် အီတလီကလပ်ရဲ့ ဂန္တဝင်အဖြစ် သတ်မှတ်ခံရနိုင်ပေမယ့် သူကတော့ ဒီအရာထက် အသင်းကို အောင်မြင်မှုနဲ့ ပရိသတ်တွေကို ဆု ဖလားနဲ့အတူ ပျော်ရွှင်စေချင်တဲ့ ခံစားချက်တွေသာ ရရှိစေလိုတယ်လို့ ယူရိုပါလိဂ် ဗိုလ်လုပွဲ တက်အပြီးမှာ ပြော ထားပါတယ်။
မော်ရင်ဟိုကို တွေ့ရစဉ်
မော်ရင်ဟိုဟာ ပြီးခဲ့တဲ့နှစ်က ယူရိုပါကွန်းဖရန့်စ်လိဂ် ရယူပြီးချိန်မှာ မျက်ရည်ကျခဲ့သလို၊ အခုလည်း ယူရိုပါလိဂ် ဗိုလ်လုပွဲအပြီးမှာ မျက်ရည် ကျနေခဲ့တာက ရိုးမားအသင်းကို အောင်မြင်မှု ဘယ်လောက်အထိ ရစေချင်လဲဆိုတာ ကို ပေါ်လွင်စေတာပါ။
ဒါပေမယ့် ရိုးမားအသင်းရဲ့ ဘတ်ဂျက် သုံးစွဲမှုအပေါ် မော်ရင်ဟိုက ဝေဖန်မှုတွေ မကြာခဏ ဆိုသလို ပြောနေသလို လက်ရွေးစင်အသင်းတွေနဲ့ ပီအက်စ်ဂျီအသင်းတို့ရဲ့ ချိတ်ဆက်မှုတွေကြောင့် အီတလီကလပ်ကို စွန့်ခွာသွားနိုင်တဲ့ အရိပ် အယောင်တွေလည်း ရှိနေတာ ဖြစ်ပါတယ်။
မော်ရင်ဟိုကတော့ ဒီသတင်းတွေကို ငြင်းဆန်ထားပေမယ့် သူရှိနေတဲ့ အချိန်မှာ ရိုးမားအသင်းကို ဥရောပရဲ့ အသင်းကြီး တစ်သင်းဖြစ်အောင် တည်ဆောက်ပေးနေပြီး ရောမမြို့အထက်မှာ ဥရောပဆုဖလားကြီးနဲ့ နောက် တစ်ကြိမ်ထပ်ပြီး အောင်ပွဲခံနိုင်အောင် နည်းဗျူဟာတွေ ချမှတ်နေပြီလည်း ဖြစ်ပါတယ်။
- By CNI
- Category: အားကစား
- Hits: 441
CNI Sport News
၂၀၂၃ ခုနှစ်၊ မေလ ၁၈
ဘရန်ဖို့ဒ်အသင်း တိုက်စစ်မှူး အိုင်ဗန်တိုနေးဟာ အင်္ဂလန်ဘောလုံးအဖွဲ့ချုပ်(အက်ဖ်အေ)ရဲ့ လောင်းကစား စည်းမျဉ်းကို ချိုးဖောက်ခဲ့တဲ့အတွက် ၈ လကြာ ပွဲပယ်ပြစ်ဒဏ် ချမှတ်ခံခဲ့ရတာ ဖြစ်ပါတယ်။
အိုင်ဗန်တိုနေးဟာ ၂၀၁၇ ခုနှစ်၊ ဖေဖော်ဝါရီလ ၂၅ ရက်ကနေ ၂၀၂၁ ခုနှစ်၊ ဇန်နဝါရီလ ၂၃ ရက်ကြားထဲမှာ လောင်းကစား စည်းမျဉ်းချိုးဖောက်မှု ၂၃၂ ခုရှိခဲ့တာကို ဝန်ခံခဲ့တဲ့အတွက် အက်ဖ်အေရဲ့ အရေးယူမှုကို ခံခဲ့ရတာပါ။
အဲဒါကြောင့် အင်္ဂလန်တိုက်စစ်မှူးဟာ ဘောလုံးနဲ့ ပတ်သက်ခွင့် ၈ လကြာ ပိတ်ပင်ခံခဲ့ရတာဖြစ်ပြီး ဒါဟာ ချက်ချင်း အကျိုးသက်ရောက်မှု ရှိမှာဖြစ်လို့ ၂၀၂၄ ခုနှစ်၊ ဇန်နဝါရီလ ၁၇ ရက်အထိ ဘောလုံးပြန်ကစားခွင့်ရမှာ မဟုတ်ပါဘူး။
ဒါအပြင် အိုင်ဗန်တိုနေးဟာ ဒဏ်ကြေးငွေ ပေါင် ၅၀,၀၀၀ ချမှတ်ခံခဲ့ရပြီး အနာဂတ် အပြုအမူအတွက် အက်ဖ်အေ ရဲ့ သတိပေးခြင်းကိုလည်း ခံခဲ့ရတာပါ။
ဘရန်ဖို့ဒ် တိုက်စစ်မှူးဟာ ဒီပြစ်ဒဏ်တွေနဲ့ ပတ်သက်ပြီး အယူခံဝင်လို့ရပေမယ့် အင်စတာဂရမ်မှာ တင်ထားတဲ့ သူ့ရဲ့ကြေညာချက်မှာတော့ အယူခံဝင်ဖို့ အစီအစဉ်ရှိ၊ မရှိကို ဖော်ပြထားခြင်းမရှိပါဘူး။
အင်္ဂလန်အသင်းမှာ ကစားနေတဲ့ အိုင်ဗန်တိုနေးကို တွေ့ရစဉ်
အိုင်ဗန်တိုနေးက “ကျနော့်ကို ဘောလုံးနဲ့ ပတ်သက်ခွင့် ၈ လကြာ ပိတ်ပင်ထားတဲ့ အကြောင်းကြားစာကို ရရှိထား ပါတယ်။ ၈ လကြာ ဘောလုံး မကစားနိုင်တော့တဲ့အတွက် သဘာဝအတိုင်း စိတ်ပျက်မိပါတယ်။ ဒီအချိန်မှာ ကျနော် ဘာမှတ်ချက်မှ မပေးချင်ပါဘူး။ အခုအချိန်မှာတော့ ကျနော်ချစ်တဲ့ ပွဲတွေကို နောက်ရာသီမှာ ပြန်ကစား နိုင်ဖို့အတွက်သာ အာရုံစိုက်ထားတယ်”လို့ ရေးသားထားပါတယ်။
အသက် ၂၇ နှစ်အရွယ်ရှိ အိုင်ဗန်တိုနေးဟာ ဒီရာသီမှာ ဘရန်ဖို့ဒ်အသင်းအတွက် ပရီးမီးယားလိဂ် ပွဲပေါင်း ၃၃ ပွဲ ပါဝင်ကစားထားပြီး ဂိုး ၂၀ အထိ သွင်းယူထားကာ အသင်းကို အမှတ်ပေးဇယား အဆင့် ၉ နေရာမှာ ရပ်တည် နိုင်အောင် စွမ်းဆောင်ပေးထားတာပါ။
အိုင်ဗန်တိုနေးဟာ ပွဲပယ်ကြောင့် ဒီရာသီ ဘရန်ဖို့ဒ်အသင်းရဲ့ လက်ကျန်ပွဲစဉ်တွေဖြစ်တဲ့ စပါး၊ မန်စီးတီး အသင်းတို့ နဲ့ပွဲစဉ်မှာ ပါဝင်နိုင်တော့မှာ မဟုတ်ပါဘူး။
အိုင်ဗန်တိုနေးဟာ ပြီးခဲ့တဲ့ စက်တင်ဘာလကမှ ဆောက်ဂိတ်ရဲ့ လူစာရင်းမှာ ပထမဆုံးအကြိမ် ရွေးချယ်ခံခဲ့ရပြီး မတ်လက ယူကရိန်းကို အနိုင်ရခဲ့တဲ့ ယူရို ၂၀၂၄ ခြေစစ်ပွဲမှာ အင်္ဂလန်အတွက် ပထမဆုံးပွဲစဉ်အဖြစ် ပါဝင်ခွင့် ရခဲ့ တာပါ။
အိုင်ဗန်တိုနေးရဲ့ အင်္ဂလန်အသင်းဖော် ထရစ်ပီယာဟာ စပါးကနေ အသလက်တီကိုအသင်းထံ ပြောင်းရွှေ့မယ့် အပြောင်းအရွှေ့ကို လောင်းကြေးထပ်နိုင်ဖို့ အခြားသူတွေကို အချက်အလက် ပေးခဲ့တာကြောင့် အက်ဖ်အေက ၂၀၂၀ ခုနှစ်၊ ဒီဇင်ဘာလက ၁၀ ပတ်ကြာပိတ်ပင်တဲ့ ပြစ်ဒဏ် ချမှတ်ခဲ့တာ ဖြစ်ပါတယ်။
Source: BBC
- By CNI
- Category: ဆောင်းပါး
- Hits: 692
CNI Sport Article
၂၀၂၃ ခုနှစ်၊ မေလ ၁၄
မြန်မာအမျိုးသမီး အသင်းကတော့ ကမ္ဘောဒီးယားမှာ ကျင်းပနေတဲ့ ဆီးဂိမ်းစ်ပြိုင်ပွဲမှာပဲ ထိုင်းအမျိုးသမီးအသင်း ကို ဆီမီးဖိုင်နယ်မှာ အနိုင်ရပြီး ဗိုလ်လုပွဲ တက်လှမ်းသွားခဲ့ပါပြီး။
ထိုင်းအသင်းကို ၂ ဂိုး- ဂိုးမရှိနဲ့ အရေးနိမ့်နေတာကနေ ၄ ဂိုး ပြန်သွင်းပြီး အရှုံးမပေးတဲ့ စိတ်ဓါတ်တွေ ပြသကာ ပြန်လာနိုင်ခဲ့တာလည်း ဖြစ်ပါတယ်။
တကယ်တော့ မြန်မာအမျိုးသမီး အသင်းကို ဒီအဆင့်ထိ ရောက်လာမယ်လို့ကို ဘယ်သူကမှ မျှော်လင့်ထားခြင်း မရှိပါဘူး။ ဒါက အုပ်စုတွင်း မဲခွဲမှုနဲ့ နောက်ဆုံး ကစားခဲ့တဲ့ ပွဲရလဒ်တွေကြောင့် မြန်မာအသင်းဟာ အုပ်စုတွင်းမှာ ဆို ကမ္ဘာ့ဖလားပြိုင်ပွဲဝင်မယ့် ဗီယက်နမ်၊ ဖိလစ်ပိုင်တို့နဲ့ တစ်အုပ်စုတည်း ကျနေတာကြောင့် အုပ်စုကနေ လှည့် ပြန် လာရမှာပဲလို့ တွေးထင်ခဲ့ကြတာပါ။
ပြီးတော့ ဒီပွဲမတိုင်ခင် ကစားခဲ့တဲ့ အိုလံပစ်ခြေစစ်ပွဲမှာ ကိုယ့်ထက် အဆင့်နိမ့်တဲ့ အီရန်အသင်းကို အိမ်ကွင်းမှာ တင် အရေးနိမ့်ခဲ့တာ ဖြစ်ပါတယ်။
ဒီအချက်တွေကြောင့် မြန်မာအမျိုးသမီးအသင်းကို ဆီးဂိမ်းစ်ပြိုင်ပွဲမှာ အိမ်ဖြည့် အဆင့်အနေနဲ့ သတ်မှတ်ခဲ့ကြ တာပါ။ အဲဒီအချိန်မှာ မြန်မာနိုင်ငံ ဘောလုံးအဖွဲ့ချုပ်က အလှည့်အပြောင်း တစ်ခုကို မြန်မြန် ပြုလုပ်ခဲ့ပါတယ်။
ဒါကတော့ ပြိုင်ပွဲယှဉ်ပြိုင်ဖို့ ရက်ပိုင်း နီးလာတဲ့ အချိန်မှာ မြန်မာအမျိုးသမီးအသင်း နည်းပြချုပ်အဖြစ် ဂျပန် လူမျိုးနည်းပြ တက်ဆူရိုကို ခန့်အပ်လိုက်တာပါ။
မြန်မာနဲ့ထိုင်း ယှဉ်ပြိုင်နေစဉ်
ဂျပန်လူမျိုးနည်းပြဟာ အသင်းကို အချက် ၂ ချက်သာ ပြင်ဆင်ဖို့ အချိန်ရခဲ့တယ်လို့ အုပ်စုပွဲ မတိုင်ခင် ပွဲကြို သတင်းစာ ရှင်းလင်းပွဲမှာ ပြောခဲ့ပါတယ်။
ဒါကတော့ အသင်းသားတွေ ကိုယ့်ကိုယ်ကို ယုံကြည်မှု ပြန်ရလာဖို့နဲ့ အသင်းရဲ့ အားသာချက်တွေကို ကောင်းမွန် စွာ အသုံးချနိုင်ဖို့လို့ ပြောခဲ့တာဖြစ်ပြီး ပွဲဦးထွက်ဖြစ်တဲ့ ဖိလစ်ပိုင်နဲ့ပွဲမှာတင် သူပြောခဲ့တဲ့ စကားကို အကောင် အထည် ဖော်နိုင်ခဲ့တာပါ။
ကိုယ့်ထက် အရပ်အမောင်းနဲ့ ကိုယ်ခန္ဓာကြီးမားတဲ့ ဖိလစ်ပိုင်အသင်းကို အကောင်းဆုံး ကစားသွားပြီး ပွဲပြီး ဆုံးချိန်မှာ သွင်းယူတဲ့ ပင်နယ်တီဂိုးနဲ့ အနိုင်ယူပြီး အုပ်စုအဖွင့် လှခဲ့တာ ဖြစ်ပါတယ်။ အစောပိုင်းက မြန်မာ အမျိုးသမီးအသင်းကို မယုံကြည်ခဲ့တဲ့ သူတွေကတောင် အသင်းကို ချီးကျူးမှုတွေ ပြုလုပ်ခဲ့ကြပါတယ်။
ဒုတိယပွဲမှာတော့ ဆီးဂိမ်းစ် လက်ရှိချန်ပီယံ ဗီယက်နမ်ကို အရေးနိမ့်ခဲ့ပါတယ်။
မြန်မာအမျိုးသမီး အသင်းနည်းပြဟာ အားလုံးကို တောင်းပန်ခဲ့ပြီး နောက်ပွဲအတွက် အာရုံစူးစိုက်မှု အပြည့်နဲ့ ပြင်ဆင်ခဲ့တာကြောင့် မလေးရှားအသင်းကို ဂိုးပြတ်အနိုင်ရပြီး ဆီမီးဖိုင်နယ်ကို တက်နိုင်ခဲ့ပါတယ်။ ဆီမီးဖိုင်နယ် မှာ ဆီးဂိမ်းစ်ပြိုင်ပွဲရဲ့ ဒုတိယ အအောင်မြင်ဆုံး အသင်းဖြစ်တဲ့ ထိုင်းအသင်းနဲ့ တွေ့ဆုံခဲ့ပါတယ်။
မြန်မာအမျိုးသမီး ကစားသမားများကို တွေ့ရစဉ်
မြန်မာအသင်းဟာ ထိုင်းအသင်းနဲ့ တွေ့ဆုံတိုင်း အရေးနိမ့်နေကြဖြစ်တဲ့အတွက် ကြေးတံဆိပ်သာ လုရတော့မယ် လို့ မှတ်ချက်ပေးသူတွေ အများကြီး ရှိခဲ့ပါတယ်။ မြန်မာအမျိုးသမီး အသင်းနည်းပြကတော့ စကားကို အပိုအလို မပြောဘဲ အကောင်းဆုံး ပြင်ဆင်ပြီး ယှဉ်ပြိုင်မယ်လို့ ပြောခဲ့ပါတယ်။
ထိုင်းအသင်းဟာ ပွဲအစပိုင်းမှာတင် မြန်မာအသင်းရဲ့ အမှားအယွင်းတွေကို အခွင့်ကောင်းယူပြီး စောစောစီးစီး ၂ ဂိုး သွင်းယူနိုင်ခဲ့တာကြောင့် အားလုံးထင်မှတ်ထားသလို ဖြစ်သွားပြီလားလို့တောင် တွေးခဲ့မိပါတယ်။
ဒါပေမယ့် မြန်မာအသင်းဟာ ဂျပန်နည်းပြ လက်ထက်မှာ ပုံသွင်းထားတဲ့အတိုင်း လုံးဝအရှုံးမပေးဘဲ တိုက်ပွဲဝင် စိတ်ဓါတ် အပြည့်နဲ့ ကစားခဲ့တာကြောင့် ဒုတိယပိုင်းအစ ၁၀ မိနစ်အတွင်းမှာ ထိုင်းအသင်းကို ပြန်ပြီး ဦးဆောင် နိုင်ခဲ့တာပါ။
မြန်မာအသင်း အတွက်တော့ နာကျင်အချိန်ပိုမှာ နောက်ထပ် တစ်ဂိုး သွင်းယူပြီး ထိုင်းအသင်း ပြန်မလာနိုင်အောင် ပါ လုပ်ခဲ့တာ ဖြစ်ပါတယ်။
ပြိုင်ပွဲ မစတင်ချိန်မှာ အုပ်စုက လှည့်ပြန်မယ်လို့ အားလုံးက ထင်ထားတဲ့ မြန်မာအမျိုးသမီး အသင်းကတော့ ဆီးဂိမ်းစ် ရွှေတံဆိပ်ဆုကို ရယူနိုင်ဖို့ အနီးဆုံး အနေအထားထိ ရောက်ရှိလာခဲ့တာပါ။
မြန်မာအမျိုးသမီးအသင်းဟာ ဆီးဂိမ်းစ်ပြိုင်ပွဲမှာ နောက်ဆုံး ဗိုလ်လုပွဲ တက်နိုင်ခဲ့တာက ၂၀၀၅ က နောက်ဆုံး ဖြစ်ပြီး ၁၈ နှစ်အကြာမှ ပထမဆုံးအကြိမ် ပြန်လည် တက်လှမ်းနိုင်ခဲ့တာ ဖြစ်ပါတယ်။
မြန်မာအမျိုးသမီးအသင်းကိုတွေ့ရစဉ်
ဆီးဂိမ်းစ်ပြိုင်ပွဲမှာ အမြင့်ဆုံး ငွေတံဆိပ်သာ ရဖူးတဲ့ အမျိုးသမီးအသင်း အတွက်တော့ ပထမဆုံးအကြိမ် ရွှေတံဆိပ်ဆုရနိုင်ဖို့ မျှော်လင့်ချက် ရှိလာခဲ့တာဖြစ်ပြီး ဗိုလ်လုပွဲမှာတော့ အုပ်စုတွင်းမှာ တွေ့ခဲ့တဲ့ ဗီယက်နမ်နဲ့ တွေ့ရတော့မှာပါ။
မြန်မာအသင်း အနေနဲ့ ရွှေတံဆိပ်ဆုကို ရနိုင်မယ်ဆိုရင် ဗီယက်နမ်ကို အနိုင်ရပြီး ရှုံးကြွေးပါ ပြန်ဆပ်နိုင်မယ့် တစ်ချက်ခုတ် နှစ်ချက်ပြတ် အခွင့်အရေးကို ရယူနိုင်မှာ ဖြစ်ပါတယ်။
တကယ်လို့ ဗီယက်နမ်နဲ့ ပွဲမှာ ခြေချော်လက်ချော် ဖြစ်ခဲ့မယ်ဆိုရင်လည်း မြန်မာအသင်းရဲ့ စွမ်းဆောင်ရည်ကို အားလုံးက အသိအမှတ် ပြုနိုင်လိမ့်မယ်လို့ ထင်မြင်မိပါတယ်။
မေလ ၁၅ ရက်မှာ ကစားမယ့် ဗိုလ်လုပွဲမှာ ဗီယက်နမ်ကပဲ လက်ရှိ ဆီးဂိမ်းစ် ချန်ပီယံဘွဲ့ကို ဆက်ထိန်းမှာလား ဒါမှမဟုတ် မြန်မာက ပထမဆုံးအကြိမ် ရွှေတံဆိပ်ဆု ရယူပြီး အမိမြေကို ပြန်လာနိုင်မလားဆိုတာ စောင့်ကြည့်ရ တော့မှာ ဖြစ်ပါတယ်။
- By CNI
- Category: ဆောင်းပါး
- Hits: 496
CNI Sport Article
၂၀၂၃ ခုနှစ်၊ မေလ ၇
အာဂျင်တီးနား အသင်းခေါင်းဆောင် မက်ဆီဟာ အခုရာသီအကုန်မှာ ပီအက်စ်ဂျီကနေ ထွက်ခွာဖို့ ဆုံးဖြတ် လိုက်ပြီဆိုတဲ့ သတင်းဟာ ဒီရက်သတ္တပတ်အတွင်းမှာ လှုပ်ခတ်မှုတွေ ရှိခဲ့ပါတယ်။
မက်ဆီဟာ ပီအက်စ်ဂျီက ထွက်ခွာဖို့ အရင်ကတည်းက ဆုံးဖြတ်ထားပေမယ့် ဆော်ဒီကို အသင်းခွင့်ပြုချက် မရဘဲ သွားခဲ့တာကြောင့် ၂ ပတ်ကြာ ဆိုင်းငံ့တဲ့ အရေးယူမှုခံခဲ့ရပြီးနောက် ဒီသတင်းတွေဟာ ပိုပြီး သေချာသွားခဲ့တာ ဖြစ်ပါတယ်။
မက်ဆီနဲ့ ပီအက်စ်ဂျီတို့ ချုပ်ဆိုထားတဲ့ စာချုပ်က အခုရာသီအကုန်မှာ အဆုံးသတ်တော့မှာ ဖြစ်ပါတယ်။
အစောပိုင်းက ၁ နှစ် သက်တမ်းတိုးဖို့အတွက် မူအရ သဘောတူညီမှုတွေ ရှိခဲ့ပေမယ့် ပီအက်စ်ဂျီ ပရိသတ်တွေရဲ့ ဆက်ဆံပုံတွေဟာ မက်ဆီအတွက် စိတ်ပျက်စရာတွေ ဖြစ်ခဲ့ရပါတယ်။ ဘာစီလိုနာအသင်းမှာ အထိခံလို့ မရတဲ့ ကစားသမားအဖြစ် ရှိခဲ့တဲ့ မက်ဆီဟာ ပီအက်စ်ဂျီအသင်းမှာ ပရိသတ်တွေရဲ့ လှောင်ပြောင်မှုတွေကို မကြာခဏ ခံနေရတာပါ။
ကမ္ဘာ့ချန်ပီယံဖြစ်တဲ့ မက်ဆီအတွက်တော့ ဒီလိုမျိုး ပြုလုပ်မှုကို အာဂျင်တီးနားနဲ့ ဘာစီလိုနာအသင်းမှာ မကြုံတွေ့ ခဲ့ရတော့ အလွန်အံ့အားသင့်နေတာ ဖြစ်ပါတယ်။ အဲလို အချိန်ကတည်းက မက်ဆီကို ခေါ်ယူဖို့ အသင်းဟောင်း ဘာစီလိုနာအသင်း အပါအဝင် ဆော်ဒီကလပ်တွေနဲ့ မေဂျာလိဂ်ကလပ် အင်တာမိုင်ယာမီ အသင်းတို့က ချိတ်ဆက် နေခဲ့တာပါ။
ဆော်ဒီမှာ အပန်းဖြေထွက်နေတဲ့ မက်ဆီနဲ့မိသားစုကိုတွေ့ရစဉ်
မက်ဆီဟာ လော်ရီးယန့်အသင်းကို အရေးနိမ့်တဲ့ ပွဲအပြီး ဆော်ဒီကို ခရီးထွက်သွားချိန်မှာ အသင်းနဲ့ ဆက်ဆံရေး ဟာ အဆိုးဆုံး အခြေအနေကို ရောက်ခဲ့ပြီး ပီအက်စ်ဂျီအသင်းဟာ သူတို့ရဲ့ ခွင့်ပြုချက်မရဘဲ ဒီလိုလုပ်ခဲ့တဲ့ မက်ဆီ ကို ၂ ပတ်ကြာ အသင်းနဲ့ ပူးပေါင်းခွင့်ပေးမှာ မဟုတ်သလို အဲဒီကာလအတွင်းမှာ ရရှိမယ့် လုပ်ခလစာကိုလည်း မပေးချေဖို့ ဆုံးဖြတ်ခဲ့တာပါ။
ဒီအချိန်မှာ ပရိသတ် တချို့ဟာ နေမာရဲ့ အိမ်ရှေ့ သွားရောက်ပြီး မက်ဆီနဲ့ နေမာကို အသင်းကနေ ထွက်ခွာဖို့ အော်ဟစ်မှုတွေ ပြုလုပ်ခဲ့ကြပါတယ်။ နာမည်ကျော် ကစားသမား ၂ ဦးအပေါ် ပီအက်စ်ဂျီ ပရိသတ်တွေရဲ့ ဆက်ဆံ ပုံဟာ တော်တော်လေး ဆိုးခဲ့ပြီး မက်ဆီလို ကစားသမားအပေါ် တန်ဖိုးမထားတက်လို့ ဝေဖန်မှုတွေ ပြုလုပ်ခဲ့တာပါ။
မက်ဆီနဲ့ ပီအက်စ်ဂျီတို့ရဲ့ အခြေအနေကို စောင့်ကြည့်နေတဲ့ ဆော်ဒီကလပ် အသင်းတွေဟာ ဒီအခွင့်အရေးကို အရယူဖို့ ကမ်းလှမ်းမှုတွေတောင် ပြုလုပ်လာခဲ့တာ ဖြစ်ပါတယ်။
အရင်ကတည်းက ဆော်ဒီဟာ သူတို့ရဲ့လိဂ်ကို လူတွေပိုပြီး စိတ်ဝင်စားလာအောင် နာမည်ကြီး ကစားသမားတွေကို ငွေကြေး အများအပြားပေးပြီး ခေါ်ယူဖို့ စီမံချက်ရှိနေတာပါ။ အဲဒါကြောင့်လည်း ဆော်ဒီကလပ် အယ်လ်နာဆာ အသင်းဟာ မက်ဆီရဲ့ ကာလကြာရှည်ပြိုင်ဘက် ရော်နယ်ဒိုကို တစ်နှစ်ကို ဒေါ်လာသန်း ၂၂၀ လုပ်ခလစာပေးပြီး ခေါ်ယူထားတာ ဖြစ်ပါတယ်။
ပီအက်စ်ဂျီအသင်းမှာ ကစားနေတဲ့ မက်ဆီကိုတွေ့ရစဉ်
အခုအချိန်မှာ သူတို့ရဲ့ နောက်ထပ် ပစ်မှတ်က မက်ဆီဖြစ်လာခဲ့ပြီး အယ်လ်နာဆာရဲ့ ပြိုင်ဘက် အယ်လ်ဟီလယ် အသင်းရဲ့ တရားဝင် ကမ်းလှမ်းမှုကို အာဂျင်တီးနား ကစားသမားဟာ လက်ခံရရှိထားခဲ့ပါတယ်။
အယ်လ်ဟီလယ် အသင်းဟာ ရော်နယ်ဒို အယ်လ်နာဆာမှာ ရနေတဲ့ လုပ်အားခထက် ပိုပြီးပေးဖို့ ဆုံးဖြတ်ထားပြီး တစ်နှစ်ကို ဒေါ်လာသန်း ၄၀၀ နဲ့ ကမ်းလှမ်းမှု ပြုလုပ်ထားတာပါ။
မက်ဆီဟာ ခရီးသွား လုပ်ငန်းဆိုင်ရာ ဆော်ဒီရဲ့ သံတမန်ဖြစ်တဲ့အတွက် ဆော်ဒီနိုင်ငံက တာဝန်ရှိသူတွေဟာ ဒီအပြောင်းအရွှေ့ကို ဖြစ်မြောက်ဖို့ ဝိုင်းဝန်း ကြိုးစားပေးနေကြတာလည်း ဖြစ်ပါတယ်။
အဲဒါကြောင့် မက်ဆီအနေနဲ့ ဆော်ဒီကို ပြောင်းလာခဲ့မယ်ဆိုရင် ရော်နယ်ဒိုနဲ့ ပြိုင်ဘက်အဖြစ် ပြန်လည် ရင်ဆိုင်ရ တော့မှာဖြစ်ပြီး ဆော်ဒီလိဂ်ကလည်း တစ်ကမ္ဘာလုံးမှာရှိတဲ့ ပရိသတ်တွေကို ဆွဲဆောင်နိုင်တော့မယ်ဆိုတာ အသေအချာပါပဲ။
ရော်နယ်ဒိုနဲ့မက်ဆီကိုတွေ့ရစဉ်
ဘာစီလိုနာနဲ့ အင်တာမိုင်ယာမီ အသင်းတို့ဟာ မက်ဆီကို ခေါ်ယူနိုင်မယ်ဆိုရင် ဆော်ဒီကပေးတဲ့ မက်လောက် စရာ လုပ်ခလစာမျိုးကို ပေးချေနိုင်ဖို့ မရှိပေမယ့် အာဂျင်တီးနား ကစားသမားကို ခေါ်ယူနိုင်ဖို့အတွက် လက်လျှော့ မှာ မဟုတ်ပါဘူး။
လက်ရှိအချိန်မှာ မက်ဆီရဲ့ အနာဂတ်နဲ့ ပတ်သက်ပြီးတော့ ကစားသမားရဲ့အပေါ်မှာ မူတည်နေတာဖြစ်ပြီး သူ့ရဲ့ ဆုံးဖြတ်ချက်ကို စောင့်ဆိုင်းနေရတာ ဖြစ်ပါတယ်။
မက်ဆီဟာ ရော်နယ်ဒိုလိုပဲ ဥရောပမှာ အောင်မြင်မှုအားလုံးကို ရယူထားပြီးဖြစ်လို့ စိန်ခေါ်မှု အသစ်တွေအတွက် ဥရောပမြေကို စွန့်ခွာချင်ရင် စွန့်ခွာနိုင်တာပါ။ ဒါပေမယ့် မက်ဆီအနေနဲ့ ငွေကြေးအတွက် ဥရောပကနေ ထွက်ခွာဖို့ စဉ်းစားပါ့မလားဆိုတဲ့ အချက်ကလည်း ရှိနေတာ ဖြစ်ပါတယ်။
အဲဒါကြောင့် မက်ဆီအနေနဲ့ ပြိုင်ဘက်ကြီးရှိရာ ရော်နယ်ဒို နောက်လိုက်ပြီး ဆော်ဒီကို ပြောင်းမလား၊ အသင်း ဟောင်း ဘာစီလိုနာရဲ့ ကမ်းလှမ်းမှုကို လက်ခံပြီး အိမ်ပြန်မလား ဒါမှမဟုတ် ဒေးဗစ်ဘက်ခမ်း ပူးတွဲပိုင်ဆိုင်တဲ့ အင်တာမိုင်ယာမီကို ပြောင်းပြီး အမေရိကန်မှာ ခြေချမလားဆိုတာကို ရာသီအကုန်မှာ မြင်တွေ့ရမှာ ဖြစ်ပါတယ်။
- By CNI
- Category: ဆောင်းပါး
- Hits: 583
CNI Sport Article
၂၀၂၃ ခုနှစ်၊ ဧပြီ ၂၃
ဆယ်စုနှစ် တစ်ခုကျော်ကြာအောင် ယူနိုက်တက်မှာ ကစားခဲ့တဲ့ ဂိုးသမား ဒီဂီယာနဲ့ အသင်းတို့ ချုပ်ဆိုထားတဲ့ စာချုပ်ဟာ ဒီရာသီအကုန်မှာ ကုန်ဆုံးတော့မှာ ဖြစ်ပါတယ်။
ယူနိုက်တက်အသင်းဟာ ဖာဂူဆန် ခေတ်ထဲကရှိခဲ့တဲ့ ဒီဂီယာကို စာချုပ်သက်တမ်းတိုးဖို့ ဆွေးနွေးမှုတွေ ပြုလုပ် နေပေမယ့် သဘောတူညီမှုတော့ မရသေးပါဘူး။ စပိန်ဂိုးသမားဟာ ယူနိုက်တက်အသင်းမှာ ဂန္တဝင် ကစားသမား တစ်ဦးအဖြစ် ရှိခဲ့ပေမယ့် နှုတ်ဆက်ဖို့ အချိန်ရောက်ပြီ ဖြစ်ပါတယ်။
ဒီဂီယာဟာ ဂိုးဖမ်းရာမှာ ကောင်းမွန်ပြီး ခဲရာခဲဆစ် ဂိုးတွေကိုတောင် မရမက ကာကွယ်နိုင်တဲ့ သူအဖြစ် နာမည် ကျော်ကြားတဲ့သူ ဖြစ်ပါတယ်။
ဒါပေမယ့် မော်ဒန်ဘောလုံး ခေတ်မှာတော့ ဂိုးသမားတစ်ဦးဟာ ဂိုးဖမ်း တက်ရုံတစ်ခုတည်းနဲ့ မရတော့ဘဲ အသင်း ဂိုးရဖို့အတွက် တိုက်စစ်လမ်းကြောင်းတွေ ဖွင့်ပေးအောင် လုပ်ပေးရမှာ ဖြစ်ပါတယ်။ တစ်ခါတစ်ရံမှာဆိုရင် တိုက်စစ်မှူး ဂိုးရဖို့အတွက် ဂိုးဖန်တီးမှုတွေတောင် ပြုလုပ်ပေးရမှာပါ။
ဒါတွေကို ဒီဂီယာရဲ့ ပြိုင်ဘက် ဂိုးသမားတွေဖြစ်တဲ့ အီဒါဆန်နဲ့ အလီဆန်တို့ဆီမှာ မြင်တွေ့ရမှာ ဖြစ်ပါတယ်။ ဒီဂီယာဟာ ဒီလိုအပိုင်းတွေမှာ တော်တော်လေး အားနည်းတာ တွေ့ရပါတယ်။
ဒီဂီယာနဲ့ နည်းပြ အဲရစ်တန်ဟတ်ကိုတွေ့ရစဉ်
ဒီဂီယာဟာ ဘောလုံးပို့ပေးတဲ့ ၁၀ လုံးမှာ ၈ လုံးလောက်က ပြိုင်ဘက် ကစားသမားတွေဆီကိုသာ ရောက်ခဲ့ပြီး ကျန်တဲ့ ၂ လုံးလောက်သာ ကိုယ့်အသင်းသားဆီကို ရောက်နေတာပါ။
အခုနောက်ပိုင်း ဂိုးသမားတွေဟာ သူတို့ဆီကို ဘောလုံးရောက်တဲ့ အချိန်မှာ တည်တည်ငြိမ်ငြိမ်နဲ့ ရှိနေပြီး ဒီဂီယာ ကတော့ စိုးရိမ်စိတ်တွေများပြီး ကန်တင်ပေးတာတွေတောင် အလွဲလွဲအချော်ချော် ဖြစ်ခဲ့ရပါတယ်။
အခု မော်ဒန်ခေတ်ရဲ့ ဘောလုံးကစားနည်း ပုံစံတွေကို လိုက်မှီဖို့အတွက် ဒီဂီယာဟာ တော်တော်လေး အားနည်း နေပါတယ်။ အနီးစပ်ဆုံးပွဲဖြစ်တဲ့ ဆီဗီလာနဲ့ ယူရိုပါလိဂ် ကွာတားဖိုင်နယ်မှာဆို ဒီဂီယာဟာ တော်တော်လေးကို အမှားအယွင်း များခဲ့တာဖြစ်ပြီး ဆီဗီလာအသင်း သွင်းယူသွားတဲ့ ၃ ဂိုးစလုံးဟာ သူနဲ့ မကင်းခဲ့တာကို မြင်တွေ့ ခဲ့ရပါတယ်။
ယူနိုက်တက်အသင်း တာဝန်ရှိသူတွေကတော့ ၂၀၁၁ ကတည်းက အသင်းကို ရောက်လာပြီး နှစ်ပေါင်းများစွာကြာ အသင်းရဲ့ ဂိုးပေါက်ကို ကာကွယ်ခဲ့တဲ့ ဒီဂီယာကို ဆက်လက် ထိန်းသိမ်းချင်ခဲ့ပေမယ့် ဆီဗီလာနဲ့ပွဲက အဖြစ် အပျက်တွေကြောင့် အသင်းတာဝန်ရှိ သူတွေနဲ့ ပရိသတ်တွေကပါ စပိန်ဂိုးသမား နေရာကို ဂိုးသမား အစားထိုးပြီး ခေါ်ယူဖို့ တိုက်တွန်းမှုတွေ ရှိနေကြတာ ဖြစ်ပါတယ်။
ဂိုးမပေးရဖို့ ကာကွယ်နေတဲ့ ဒီဂီယာ
နည်းပြ အဲရစ်တန်ဟတ်က အသင်းကို ရောက်ကတည်းက အသင်းမှာရှိတဲ့ ကစားသမားတွေနဲ့ ချိတ်ဆက်ပြီး တိုက်စစ်လမ်းကြောင်း ရှာဖွေနိုင်တဲ့ ဂိုးသမားကို လိုချင်ခဲ့ပေမယ့် အသင်းရဲ့ ဝါရင့်ဂိုးသမား ဒီဂီယာကို ဒီလိုမျိုး ဖြစ်လာမယ့် အထင်နဲ့ အငှားဂိုးသမားတွေကို ခေါ်ပြီး ဒီဂီယာကိုသာ ယုံယုံကြည်ကြည်နဲ့ တာဝန်ပေးခဲ့ပါတယ်။
ဒီဂီယာဟာ ဒီရာသီ ပရီးမီးယားလိဂ်မှာ ဂိုးမပေးရအောင် ပွဲအများအပြား စွမ်းဆောင်နိုင်တဲ့ ဂိုးသမားအဖြစ် ရှိနေ ပေမယ့် ပရီးမီးယားလိဂ် အသင်းကြီး အနေနဲ့ ဂိုးတွေ အများအပြားကို ခွင့်ပြုခံထားရပါတယ်။
ဒီဂီယာဟာ ယူနိုက်တက်အသင်းမှာ တစ်ပတ်လုပ်ခ ပေါင် ၄ သိန်း နီးပါးရနေပြီး ကလပ်အသင်း ဘက်ကတော့ လုပ်ခလစာလျှော့ပြီး စာချူပ်သစ် ချုပ်ချင်နေတဲ့ပုံပါ။ ပရိသတ်အချို့ကတော့ အသင်းမှာ ၁၂ နှစ်ကြာ ကစားခဲ့တဲ့ ဒီဂီယာနဲ့ အသင်းတို့ဟာ ဒီအချိန်မှာ လမ်းခွဲဖို့က အကောင်းဆုံး အဖြေလို့ သုံးသပ်နေကြတာဖြစ်ပြီး သူ့ကို ခမ်းခမ်း နားနားနဲ့ နှုတ်ဆက်ကာ ထိပ်တန်းအဆင့်ရှိ လူငယ်ဂိုးသမားနဲ့ အစားထိုးဖို့ ပြောခဲ့ကြပါတယ်။
ဒါမှလည်း အဲဒီ လူငယ်ဂိုးသမားဟာ အဲရစ်တန်ဟတ် သွားချင်တဲ့ ပုံစံအတိုင်း လိုက်လုပ်လိမ့်မယ်လို့ ပြောခဲ့တာ ဖြစ်ပါတယ်။ ဒါပေမယ့် ဒီဂီယာဟာ ယူနိုက်တက်မှာ ကစားသမားဘဝ အဆုံးသတ်ချင်တယ်လို့ အရင်တုန်း ပြော ထားတာပါ။
ဒါပေမယ့် ဒီဂီယာနဲ့ ယူနိုက်တက်တို့အကြား ညှိနှိုင်းမှုတွေ ပြုလုပ်လို့ မရရင်တော့ နှုတ်ဆက်ဖို့ အချိန် ကျရောက် လာမှာ ဖြစ်ပါတယ်။
ဒီဂီယာနဲ့ ဆုဖလားကို တွေ့ရစဉ်
ဒီဂီယာဟာ ယူနိုက်တက် အသင်းအတွက် ပြိုင်ပွဲစုံ ၅၃၅ ပွဲ ပါဝင်ကစားခဲ့တာဖြစ်ပြီး ပရီးမီးယားလိဂ်မှာ ကစားခဲ့တဲ့ ၄၀၇ ပွဲမှာတော့ ပေးဂိုး မပေးရအောင် ၁၄၄ ပွဲအထိ စွမ်းဆောင် ထားပါတယ်။ ဒီဂီယာဟာ ယူနိုက်တက်အသင်း ကစားသမားဘဝမှာ ပရီးမီးယားလိဂ်၊ အက်ဖ်အေဖလား၊ ကာရာဘောင်းဖလားနဲ့ ကွန်မြူနတီဒိုင်း ချန်ပီယံဆုတွေ ကို ရယူနိုင်ခဲ့တာ ဖြစ်ပါတယ်။
ယူနိုက်တက်အသင်းဟာ ဒီဂီယာ နေရာ အစားထိုးဖို့အတွက် ဘရန်ဖို့ဒ် ဂိုးသမား ဒေးဗစ်ရိုင်ယာ၊ ပေါ်တူဂီ ဂိုးသမား ဒီယိုဂိုကော်စတာနဲ့ ဘိုင်ယန်မြူးနစ် ဂိုးသမား ဆွန်းမားတို့ အပါအဝင် ဂိုးသမားအချို့ကို ဆန်ကာတင် စာရင်းထဲ ထည့်သွင်းထားပါ။
ယူနိုက်တက် အသင်းဟာ လာမယ့် နွေရာသီ အပြောင်းအရွှေ့မှာ ကမ္ဘာ့အဆင့်မှီ ဂိုးသမားတစ်ဦးကို ရှာဖွေနေပြီး ဒီဂီယာကို စာချုပ်သက်တမ်း တိုးခဲ့ရင်တောင် အရန်ဂိုးသမားအဖြစ်သာ အသုံးပြုသွားဖွယ်ရှိနေတာ ဖြစ်ပါတယ်။
ဒါကြောင့် ယူနိုက်တက် အသင်းနဲ့ နှုတ်ဆက်ဖို့ ဒီဂီယာ အချိန်ကျရောက်ပြီးလားဆိုကိုတော့ စောင့်ကြည့်ရပေတော့ မည်။
- By CNI News
- Category: ဆောင်းပါး
- Hits: 708
CNI Sport Article
၂၀၂၃ ခုနှစ်၊ ဧပြီ ၂
လာမယ့် နွေရာသီ အပြောင်းအရွှေ့ မတိုင်ခင် ဒီရက်ပိုင်း ကြားနေရတာက မက်ဆီရဲ့ အပြောင်းအရွှေ့ သတင်းတွေ ပါ။ မက်ဆီနဲ့ ပီအက်စ်ဂျီ အသင်းတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး အခု အချိန်ထိ စာချုပ်သစ်အတွက် သဘောတူညီမှု မရရှိသေးပါဘူး။
အဲဒါကြောင့်လည်း အပြောင်းအရွှေ့နဲ့ ပတ်သက်တဲ့ ထင်ကြေးတွေဟာ ဆက်တိုက်ဆိုသလို ထွက်ပေါ်နေခဲ့တာ ဖြစ်ပါတယ်။
ပီအက်စ်ဂျီကလည်း မက်ဆီကို လက်မလွှတ် ခံချင်တာကြောင့် စာချုပ်သစ်ချုပ်ဆိုဖို့ ကြိုးစားနေတာပါ။
မက်ဆီကလည်း ပီအက်စ်ဂျီအသင်းနဲ့ ဒုတိယရာသီမှာ ခြေစွမ်းပြပြီး ဂိုးတွေ သွင်းယူနေသလို၊ ဂိုးတွေ ဖန်တီးနေ တာကြောင့် ပျော်ရွှင်မှုတွေ ရှိနေပေမယ့် အခုနောက်ပိုင်းမှာ စိတ်ပျက်စရာတွေ ကြုံတွေ့နေရတာ ဖြစ်ပါတယ်။
ပီအက်စ်ဂျီအသင်း ချန်ပီယံလိဂ် ၁၆ သင်း အဆင့်ကနေ ထွက်ခဲ့ရပြီးနောက် မက်ဆီ အပါအဝင် အဓိက ကစား သမားတချို့ကို ပီအက်စ်ဂျီအသင်း ပရိသတ်တွေက ပစ်မှတ်ထား တိုက်ခိုက်တာ ခံနေရပါတယ်။
နိုင်ငံတကာပွဲစဉ်တွေ မတိုင်ခင် နောက်ဆုံး ကစားခဲ့တဲ့ ပွဲမှာဆိုရင် ပီအက်စ်ဂျီ အသင်းဟာ ရှုံးပွဲကြုံတွေ့ပြီးနောက် မက်ဆီဟာ ပရိသတ်တွေရဲ့ လှောင်ပြောင်မှုတွေကို ခံနေရတာ ဖြစ်ပါတယ်။
မက်ဆီ ကိုယ်တိုင်ကလည်း ဒီအခြေအနေအပေါ် စိတ်ပျက်နေပြီး ဥမင်ထဲကို တန်းပြီး ဝင်သွားခဲ့တဲ့အထိ ဘယ်လောက်ထိ ဖြစ်သွားခဲ့လဲဆိုတာကို မြင်တွေ့ခဲ့ရတာပါ။
မက်ဆီဟာ ဘာစီလိုနာမှာ ကစားချိန်က ရလဒ်ဆိုးရင်တောင် ပရိသတ်တွေရဲ့ ဝေဖန်မှုတွေ မခံခဲ့ရပေမယ့် ပြင်သစ် မှာတော့ အခြေအနေတွေဟာ ပြောင်းပြန်ဖြစ်နေတာ ဖြစ်ပါတယ်။
ပီအက်စ်ဂျီအသင်း ရလဒ်ကောင်းရင် ချီးကျူးမှုဟာ အများကြီး မရပေမယ့် အသင်းရှုံးပွဲ ကြုံတွေ့ရင်တော့ မက်ဆီ ဟာ ပြင်သစ်သတင်းစာတွေ၊ ဘောလုံးဝေဖန် သုံးသပ်သူတွေနဲ့ ပီအက်စ်ဂျီ ကစားသမားဟောင်းတွေရဲ့ ထိုးနှက်မှု တွေ ခံနေရတာပါ။
အဲဒါတွေကြောင့်လည်း မက်ဆီဟာ ပီအက်စ်ဂျီနဲ့ စာချုပ်သစ် ချုပ်ဆိုဖို့ ကြန့်ကြာနေတာ ဖြစ်ပါတယ်။ ဒီအချိန်မှာ အသင်းဟောင်း ဘာစီလိုနာ အသင်းကတော့ မက်ဆီကို ပြန်လည်ခေါ်ယူဖို့ ချိတ်ဆက်နေပြီ ဖြစ်ပါတယ်။
ဘာစီလိုနာအသင်း အကြီးအကဲ လာပေါ်တာ အပါအဝင် အသင်း တာဝန်ရှိသူတွေဟာ မက်ဆီကို ပြန်ခေါ်ယူချင်တဲ့ သူတို့ရဲ့ဆန္ဒတွေကို ဖုံးကွယ်ထားခြင်း မရှိပါဘူး။
မက်ဆီအတွက် အသင်းက အမြဲတမ်း တံခါးဖွင့် ထားတယ်လို့ လာပေါ်တာ အပါအဝင် နည်းပြ ဇာဗီ ကိုယ်တိုင်က ပြောထားတာပါ။ ဘာစီလိုနာရဲ့ လက်ရှိ ကစားနေတဲ့ ကစားသမားတွေကလည်း မက်ဆီသာ ပြန်လာရင် ပြင်သစ် မှာလို မဟုတ်ဘဲ ပျော်ရွှင်စေရမယ်လို့ အာမခံထားတာ ဖြစ်ပါတယ်။
မက်ဆီဟာ ၂၀၂၁ က ဘာစီလိုနာအသင်းနဲ့ စာချူပ်သက်တမ်း တိုးချင်ပေမယ့် ဘဏ္ဍာရေး အခက်အခဲတွေကြောင့် မတိုးခဲ့ရဘဲ ထွက်ခွာခဲ့ရတာ ဖြစ်ပါတယ်။ မက်ဆီကလည်း မထွက်ခွာချင်ပေမယ့် ထွက်ခဲ့ရလို့ သတင်းစာ ရှင်းလင်း ပွဲမှာ ငိုကြွေးခဲ့ရတဲ့အထိ ဖြစ်ခဲ့တာပါ။
မက်ဆီဟာ ပီအက်စ်ဂျီ ရောက်ခဲ့ပေမယ့်လည်း အားလပ်ရက်တွေမှာဆို ဘာစီလိုနာ ပြန်လာပြီး အသင်းဖော် ဟောင်းတွေနဲ့ ပြန်လည် တွေ့ဆုံကာ ညစာစားခဲ့တာတွေလည်း ရှိခဲ့ပါတယ်။
မက်ဆီအတွက်တော့ ဘာစီလိုနာ အသင်းဟာ ကစားသမားဘဝ တစ်လျှောက်လုံး ရှိခဲ့တဲ့ နေရာဖြစ်ပြီး သူ့အိမ်လို ဖြစ်နေတယ်ဆိုတာ အသေအချာပါပဲ။ အဲဒါကြောင့်လည်း မက်ဆီနဲ့ ဘာစီလိုနာ သတင်းဟာ ဒီရက်ပိုင်း ကျယ်ကျယ်ပြန့်ပြန့် ထွက်ပေါ်နေခဲ့တာ ဖြစ်ပါတယ်။
ဒါပေမယ့် မက်ဆီကို လိုချင်တဲ့ အသင်းဟာ ဘာစီလိုနာ တစ်သင်းတည်းတော့ မဟုတ်ပါဘူး။
မေဂျာလိဂ်ကလပ် အင်တာမိုင်ယာမီနဲ့ ဆော်ဒီကလပ် အသင်းတွေကလည်း မက်ဆီကို ခေါ်ယူဖို့ စိတ်ဝင်စားနေပြီး ချိတ်ဆက်မှုတွေ ပြုလုပ်နေတာပါ။
အင်တာမိုင်ယာမီအသင်းဆို ပူးတွဲပိုင်ရှင် ဒေးဗစ်ဘက်ခမ်းနဲ့ မက်ဆီကို အသင်းထံ လာရောက်ဖို့ ဆွဲဆောင်နေတာ ဖြစ်ပါတယ်။
မကြာသေးခင်က ထွက်ပေါ်ခဲ့တဲ့ သတင်းတွေ အရဆိုရင် မေဂျာလိဂ်ဟာ မက်ဆီကိုခေါ်ပြီး သူတို့လိဂ်ကို လူတွေ အာရုံစိုက်လာအောင် ဆွဲဆောင်နိုင်ဖို့အတွက် အသင်းအားလုံးက ကစားသမားရဲ့ လုပ်ခလစာကိုတောင် ဝိုင်းပြီး ထောက်ပံ့ပေးဖို့ စီစဉ်နေခဲ့တာပါ။
ဒီလိုပါပဲ ဆော်ဒီကလပ် အသင်းတွေကလည်း ရော်နယ်ဒိုကို အယ်လ်နာဆာက ခေါ်ယူပြီးနောက် မက်ဆီကိုပါ ထပ်ပြီးခေါ်ယူဖို့ ကြိုးစားနေခဲ့တာ ဖြစ်ပါတယ်။
ရော်နယ်ဒို ရနေတဲ့ တစ်နှစ်လုပ်ခ ယူရိုသန်း ၂၀၀ ထက်တောင် မက်ဆီကို ပိုပြီးပေးဖို့ စီစဉ်နေတာပါ။ ဒါကြောင့် လည်း မက်ဆီ အတွက်တော့ သွားရမယ့် အသင်းကို ကိုယ်တိုင်စိတ်ကြိုက် ရွေးချယ်ပြီး သွားလို့ရတာ ဖြစ်ပါတယ်။
ဒါပေမယ့် မက်ဆီကတော့ အခုအချိန်ထိ အနာဂတ်နဲ့ ပတ်သက်ပြီး အရိပ်အမြွက်တောင် ချပြခြင်း မရှိတာပါ။ ဒါကြောင့်လည်း လာမယ့်ရာသီ မက်ဆီ ဘယ်အသင်းမှာ ရှိနေလဲဆိုတာကို ခန့်မှန်းရ ခက်နေတာ ဖြစ်ပါတယ်။
အခုအချိန်မှာ အားလုံးကလည်း မက်ဆီရဲ့ ပြောစကားကို စောင့်နေတာဖြစ်ပြီး အာဂျင်တီးနား အသင်း ခေါင်းဆောင်ကတော့ လက်ရှိအချိန်မှာ ပရော်ဖက်ရှင်နယ် ဆန်ဆန် ပီအက်စ်ဂျီ အသင်းအတွက်သာ အာရုံစိုက်ဖို့ ဆုံးဖြတ်ထားတာပါ။
ရာသီကုန်ချိန်မှသာ အနာဂတ်နဲ့ ပတ်သက်ပြီး ဆုံးဖြတ်ချက် ချသွားမှာဖြစ်ပြီး အဲဒီအချိန်ရောက်မှ မက်ဆီ နောက် ရာသီ ကစားမယ့်အသင်းကို သိရှိနိုင်မှာလည်း ဖြစ်ပါတယ်။
ဒါပေမယ့် အားကစား စာမျက်နှာတွေမှာတော့ မက်ဆီရဲ့ အနာဂတ်နဲ့ ပတ်သက်တဲ့ သတင်းတွေကို ကစားသမား ဆုံးဖြတ်ချက် မချမချင်း ထင်ကြေး အမျိုးမျိုး ဖော်ပြခံနေရတာကို မြင်တွေ့ရဖို့ ရှိနေသေးတာ ဖြစ်ပါတယ်။ အဲဒါကြောင့် လာမယ့်ရာသီမှာ မက်ဆီ ဘယ်အသင်းမှာ ကစားမလဲဆိုတာကို စိတ်ဝင်စားဖွယ် စောင့်ကြည့်ရတော့ မှာ ဖြစ်ပါတယ်။
- By CNI
- Category: Watch TV
- Hits: 210
- By CNI
- Category: Watch TV
- Hits: 256
- By CNI
- Category: အားကစား
- Hits: 282
CNI Sport News
၂၀၂၃ ခုနှစ်၊ မတ်လ ၃၀
ရက်ရှ်ဖို့ဒ်ဟာ ယူနိုက်တက်အသင်းနဲ့ စာချုပ်သစ် ချုပ်ဖို့အတွက် တစ်ပတ်လုပ်ခ ပေါင် ၅ သိန်း တောင်းဆိုထား တယ်ဆိုပြီး ထွက်ပေါ်နေတဲ့ သတင်းတွေဟာ အဓိပ္ပါယ်မရှိဘူးလို့ ပြန်တုန့်ပြန်ခဲ့ပါတယ်။
ရက်ရှ်ဖို့ဒ်က “ဒါဟာ လုံးဝကို အဓိပ္ပါယ်မရှိပါဘူး။ ကလပ်နဲ့ ကျနော်ဟာ တစ်ဖက်နဲ့တစ်ဖက် လေးစားမှုရှိပြီး ဒါကလည်း ဒီအတိုင်း ဆက်ရှိနေမှာပါ။ ကျနော့်ရဲ့ အာရုံစူးစိုက်မှုက လိဂ်မှာ တက်နိုင်သမျှ အကောင်းဆုံး အဆုံးသတ်ဖို့နဲ့ ဆုဖလားတွေ ရယူနိုင်ဖို့အတွက်ပါပဲ”လို့ တွစ်တာမှာ ရေးသားခဲ့တာပါ။
အသက် ၂၅ နှစ် အရွယ်ရှိ ရက်ရှ်ဖို့ဒ်ဟာ ဒီရာသီမှာ အကောင်းဆုံး ခြေစွမ်းပြသနေပြီး ပြိုင်ပွဲစုံ ၂၇ ဂိုးအထိ သွင်းယူထားတာ ဖြစ်ပါတယ်။
ရက်ရှ်ဖို့ဒ်နဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ ၂၀၂၄ ခုနှစ်၊ ဇွန်လမှာ ကုန်ဆုံးမှာဖြစ်ပြီး စာချုပ်သစ် အတွက် သဘောတူညီမှု မရရင် ယူနိုက်တက် အသင်းဟာ အင်္ဂလန် ကစားသမားကို အလွတ်နဲ့ ဆုံးရှုံးရမှာပါ။
အဲရစ်တန်ဟတ်နဲ့ ရက်ရှ်ဖို့ဒ်ကိုတွေ့ရစဉ်
ကြာသပတေးနေ့က ထွက်ပေါ်လာတဲ့ သတင်းမှာ တစ်ပတ်လုပ်ခ ပေါင် ၅ သိန်းထက်ပိုတဲ့ စာချုပ်သစ်ကို စောင့်ဆိုင်းနေတယ်လို့ ဖော်ပြထားပါတယ်။
ဒါပေမယ့် ယူနိုက်တက်ဘက်ကတော့ အသင်းရဲ့ ရောင်းချမှု အစီအစဉ် မပြီးဆုံးမချင်း ရက်ရှ်ဖို့ဒ်ကို စာချုပ်သစ် ကမ်းလှမ်းဖို့ တွန့်ဆုတ်နေတယ်လို့ သိရပါတယ်။
ရက်ရှ်ဖို့ဒ်ကတော့ ဒီလို ထွက်ပေါ်နေတဲ့ သတင်းတွေဟာ အဓိပ္ပါယ်မရှိကြောင်းနဲ့ ဆွေးနွေးညှိနှိုင်းမှုတွေ ပြုလုပ်နေ ချိန်အတွင်းမှာ ယူနိုက်တက်ကို လေးစားသွားမယ်လို့ ပြောခဲ့ပါတယ်။ လက်ရှိအချိန်မှာ ရက်ရှ်ဖို့ဒ်ကို ခေါ်ယူဖို့ ပြင်သစ်ကလပ် ပီအက်စ်ဂျီအသင်းက စိတ်ဝင်စားနေပါတယ်။
ယူနိုက်တက် အသင်းဘက်ကတော့ အကယ်ဒမီထွက် ကစားသမားကို အသင်းမှာ ဆက်ထိန်းသိမ်းဖို့အတွက် စာချုပ်သစ် ချုပ်ဆိုနိုင်ဖို့ ပစ်မှတ်ထားနေတာ ဖြစ်ပါတယ်။
ပြီးခဲ့တဲ့ နိုင်ငံတကာ ရက်သတ္တပတ်မှာ အင်္ဂလန်အတွက် မပါဝင်နိုင်ခဲ့တဲ့ ရက်ရှ်ဖို့ဒ်ဟာ နယူးကာဆယ်နဲ့ ကစားမယ့် ပရီးမီးယားလိဂ် ပွဲမှာတော့ ယူနိုက်တက်အတွက် ပါဝင်နိုင်ဖွယ်ရှိနေတာ ဖြစ်ပါတယ်။
Source: Metro
- By CNI
- Category: အားကစား
- Hits: 348
CNI Sport News
၂၀၂၃ ခုနှစ်၊ မတ်လ ၃၀
ပြီးခဲ့တဲ့ သောကြာနေ့က ဘာလီမှာ ကျင်းပမယ့် ပြိုင်ပွဲအတွက် တရားဝင်မဲခွဲမှု အစီအစဉ်ကို ဖျက်သိမ်း လိုက်ရတာ ကြောင့် ဖီဖာဟာ ယူ-၂၀ ကမ္ဘာ့ဖလားပြိုင်ပွဲ အိမ်ရှင်အဖြစ်ကနေ အင်ဒိုနိးရှားကို ဖယ်ရှားဖို့ ဆုံးဖြတ်လိုက်ပါတယ်။
ဘာလီအုပ်ချုပ်ရေးမှူး ဝါရမ်ကိုစတာက ဒီပြိုင်ပွဲမှာ အစ္စရေးအသင်းကို လက်ခံကျင်းပဖို့ ငြင်းဆန်ခဲ့ပြီးနောက် ဖီဖာ က ဒီမဲခွဲမှုကို ဖျက်သိမ်းခိုင်းခဲ့တယ်လို့ အင်ဒိုနီးရှားဘောလုံးအဖွဲ့ချုပ်က ပြောပါတယ်။
ယူ-၂၀ ကမ္ဘာ့ဖလားပြိုင်ပွဲကို အခုနှစ် မေလ ၂၀ ရက်ကနေ ဇွန်လ ၁၁ ရက်အထိ ကျင်းပသွားမှာ ဖြစ်ပါတယ်။
အင်ဒိုနီးရှားဟာ အစ္စရေးနဲ့ တရားဝင် သံတမန် ဆက်ဆံရေးမရှိဘဲ မကြာသေးခင်က ဆန္ဒပြတဲ့ သူတွေဟာ ပါလက်စတိုင်းကို ထောက်ခံတဲ့အနေနဲ့ ဒီပြိုင်ပွဲမှာ အစ္စရေး ပါဝင်မှာကို ရပ်တန့်ဖို့ ဆန္ဒပြ တောင်းဆိုခဲ့ကြတာပါ။
အင်ဒိုနီးရှားနိုင်ငံဟာ အစ္စရေးအသင်း ခြေစစ်ပွဲ မအောင်မြင်ခင်ကတည်းက ၂၀၁၉ မှာ ဒီပြိုင်ပွဲအတွက် အိမ်ရှင်အဖြစ် ကျင်းပခွင့် ရထားတာ ဖြစ်ပါတယ်။
ဖီဖာ ဥက္ကဋ္ဌ အင်ဖန်တီနိုနဲ့ အင်ဒိုနီးရှား သမ္မတ ဂျိုကိုဝီဒိုဒိုကိုတွေ့ရစဉ်
ဖီဖာဟာ သူတို့ရဲ့ ဥက္ကဋ္ဌ အင်ဖန်တီနိုနဲ့ အင်ဒိုနီးရှား ဘောလုံးအဖွဲ့ချုပ်ဥက္ကဋ္ဌ အဲရစ်သိုဟီရာတို့ကြား တွေ့ဆုံပြီး နောက် အခုလို အိမ်ရှင်အဖြစ်ကနေ ဖယ်ရှားတဲ့ ဆုံးဖြတ်ချက်ကို ချခဲ့တာ ဖြစ်ပါတယ်။
ဖီဖာက “လက်ရှိ အခြေအနေတွေကြောင့် ၂၀၂၃ ယူ-၂၀ ကမ္ဘာ့ဖလားပြိုင်ပွဲကို အိမ်ရှင်အဖြစ် ကျင်းပမယ့် အင်ဒိုနီးရှားကို ဖယ်ရှားဖို့ ဖီဖာက ဆုံးဖြတ်လိုက်ပါပြီ။ လက်ရှိမှာ ပြိုင်ပွဲ ကျင်းပမယ့် ရက်စွဲကို ပြောင်းလဲသွားမှာ မဟုတ်ဘဲ အိမ်ရှင်အသစ်ကို အမြန်ဆုံး ကြေညာပေးသွားမှာပါ။ အင်ဒိုနီးရှား ဘောလုံးအဖွဲ့ချုပ်အပေါ် အလား အလာရှိတဲ့ ပိတ်ပင် အရေးယူမှုတွေကို နောက်ပိုင်းမှာ ဆုံးဖြတ်ချက် ချနိုင်တယ်”လို့ ကြေညာချက် ထုတ်ပြန်ခဲ့ တာပါ။
အင်ဒိုနီးရှားအသင်းဟာ အစောပိုင်းက ခြေစစ်ပွဲ ဝင်ပြိုင်စရာ မလိုဘဲ ယူ-၂၀ ကမ္ဘာ့ဖလားပြိုင်ပွဲကို ယှဉ်ပြိုင်ခွင့် ရခဲ့ပေမယ့် အခုအချိန်မှာတော့ အိမ်ရှင်အဖြစ်က ဖယ်ရှားခံရလို့ ပြိုင်ပွဲဝင်ရောက် ယှဉ်ပြိုင်ခွင့်ပါ ဆုံးရှုံးခဲ့ရပြီ ဖြစ်ပါတယ်။
အဲရစ်သိုဟီရာက “အင်ဒိုနီးရှားဟာ ဖီဖာအဖွဲ့ဝင် ဖြစ်တဲ့အတွက် နိုင်ငံတကာ ဘောလုံးကိစ္စရပ်တွေမှာ စည်းမျဉ်း တွေကို လိုက်နာဖို့ လိုပါတယ်။ ဖီဖာရဲ့ ဒီခက်ခဲတဲ့ ဆုံးဖြတ်ချက်ကို ဘောလုံးချစ်တဲ့သူ အားလုံး လက်ခံဖို့ တောင်းဆို ချင်ပါတယ်။ ဘောလုံးအသွင်ပြောင်းဖို့၊ သန့်ရှင်းပြီး မြင့်မားတဲ့ ဘောလုံးဆီ သွားဖို့အတွက် ဖီဖာကို သက်သေပြဖို့ အချိန်တန်ပြီ”လို့ ပြောခဲ့ပါတယ်။
Source: BBC/ CNA
- By CNI
- Category: အားကစား
- Hits: 273
CNI Sport News
၂၀၂၃ ခုနှစ်၊ မတ်လ ၂၉
စပိန်အသင်းကွင်းလယ်လူ ရိုဒရီဟာ စကော့တလန်အသင်းကို အရေးနိမ့်ခဲ့တဲ့ ယူရို ၂၀၂၄ ခြေစစ်ပွဲအပြီးမှာ ပြိုင်ဘက်အသင်းရဲ့ကစားပုံကို အမှိုက်သရိုက်ဆိုပြီး တံဆိပ်ကပ်ကာ ဝေဖန်မှုတွေ ပြုလုပ်ခဲ့ပါတယ်။
ရိုဒရီက “သူတို့ကစားပုံကို လေးစားရမှာဖြစ်ပေမယ့် ကျနော့်အတွက်ကတော့ အမှိုက်သရိုက်ပါပဲ။ သူတို့ဟာ အမြဲတမ်းအချိန်ဖြုန်းတယ်၊ရန်စကစားတယ်၊ပြီးရင် လဲကြနေကြတယ်။ကျနော့်အတွက်တော့ ဒါက ဘောလုံး မဟုတ်ပါဘူး။ကျနော်တို့ဟာ အနိုင်ရချင်တဲ့အတွက် ဒါဟာ အနည်းငယ်တော့ စိတ်ပျက်ဖို့ကောင်းပါတယ်။ အချိန် တွေဖြုန်းတီးတာဟာ တကယ်ကိုခက်ခဲပါတယ်။ဒါပေမယ့် သူတို့မှာ လက်နက်ရှိပါတယ်။ကျနော်တို့လည်း လက်နက်တွေအသုံးပြုရမှာဖြစ်ပြီး နောက်တစ်ကြိမ် ဒီလိုမျိုးအရာတွေအတွက် သင်ယူရမှာပါ” လို့ ပြောခဲ့တာပါ။
ဒီပွဲမှာ စကော့တလန်အသင်းဟာ စပိန်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ဂိုးတွေကို တိုမီနေး တစ်ဦး တည်းက ၂ ဂိုးစလုံးသွင်းယူခဲ့တာပါ။စကော့တလန်အသင်းအတွက်တော့ ၁၉၈၄ နောက်ပိုင်း နှစ်ပေါင်း ၃၉ နှစ် အကြာမှ စပိန်အသင်းကို ပထမဆုံးအကြိမ်နိုင်ပွဲ ပြန်လည်ရယူနိုင်ခဲ့တာဖြစ်ပါတယ်။ ဒီပွဲမှာ ၂ ဂိုးသွင်းယူခဲ့တဲ့ တိုမီနေးဟာ ပြီးခဲ့တဲ့ ဆိုက်ပရပ်စ်ကို အနိုင်ရခဲ့တဲ့ပွဲမှာလည်း စကော့တလန်အသင်းအတွက် ၂ ဂိုးသွင်းယူခဲ့တာပါ။
အဲဒါကြောင့် တိုမီနေးဟာ စကော့တလန်အတွက် နောက်ဆုံး ၂ ပွဲမှာ သွင်းဂိုး ၄ ဂိုးအထိ သွင်းယူနိုင်ခဲ့တာ ဖြစ်ပါ တယ်။တိုမီနေးကတော့ ဒီလိုမျိုးအရာကို တစ်ခါမှမမြင်တွေ့ဖူးဘူးလို့ ပွဲအပြီးမှာ ပြောခဲ့တာပါ။
တိုမီနေးက “ဒီနေရာကို ကြည့်လိုက်ပါ။ဒီလိုမျိုးကို တစ်ခါမှမမြင်တွေ့ဖူးပါဘူး။မယုံနိုင်စရာပါပဲ။ နည်းပြက ဒါဟာ စကော့တလန်ကစားသမားတွေအဖြစ်နဲ့ အမွေအနှစ်တွေဖန်တီးဖို့ ကျနော်တို့ရဲ့အခွင့်အရေးတွေဖြစ်ပြီး ဒါတွေက နှစ်ပေါင်း ၂၀ နဲ့ ၃၀ အတွင်း လူတွေမှတ်မိတဲ့ညဆိုပြီး ပြောခဲ့ပါတယ်။ပရိသတ်တွေကို ကျေးဇူးတင်ရုံနဲ့ မလုံ လောက်ပါဘူး။ကျနော်တို့ တကယ်ကို ကောင်းမွန်စွာ လုပ်နိုင်ခဲ့ပါတယ်။ကျနော် ဒီထက်ဂိုးတွေသွင်းပြီး ဖန်တီးမှု တွေပြုလုပ်ချင်ပါသေးတယ်” လို့ ပြောခဲ့ပါတယ်။
စကော့တလန်အသင်းဟာ ယူရို ၂၀၂၄ ခြေစစ်ပွဲအုပ်စုပွဲစဉ် ၂ ပွဲကစားအပြီးမှာ ၂ ပွဲနိုင်၊ ရမှတ် ၆ မှတ်နဲ့ အုပ်စု ထိပ်ဆုံးနေရာမှာ ဦးဆောင်နေပြီး စပိန်က ၃ မှတ်နဲ့ ဒုတိယ၊ ဂျော်ဂျီယာ၊ နော်ဝေနဲ့ ဆိုက်ပရပ်စ်တို့က တတိယ၊ စတုတ္တနဲ့ ပဉ္စမနေရာတွေမှာ ရပ်တည်နေကြတာဖြစ်ပါတယ်။
Source:DailyMail
#စကော့တလန်#စပိန်အသင်း#ရိုဒရီ#ဘောလုံး#cnisportnews#CNIMyanmar
- By CNI
- Category: ဆောင်းပါး
- Hits: 1757
CNI Sport Article
၂၀၂၃ ခုနှစ်၊ မတ်လ ၂၆
ရော်နယ်ဒို အတွက်တော့ ကစားတဲ့ ပွဲတိုင်းမှာ စံချိန်တွေ တင်နေတာဖြစ်ပြီး အခုလည်း နိုင်ငံတကာ ပွဲအများဆုံး ကစားသမားဆိုတဲ့ စံချိန်ကို တင်လိုက်ပြန်ပြီ ဖြစ်ပါတယ်။
ရော်နယ်ဒိုဟာ လက်ချင်စတိန်းကို ၄ ဂိုး- ဂိုးမရှိနဲ့ အနိုင်ရခဲ့တဲ့ ယူရို ၂၀၂၄ ခြေစစ်ပွဲမှာ ပေါ်တူဂီအတွက် ပါဝင် ကစားခဲ့ပြီးနောက် ကူဝိတ်ကစားသမား မူတာဝါရဲ့စံချိန်ကို ၁ ပွဲအသာနဲ့ ကျော်ဖြတ်ပြီး ၁၉၇ ပွဲနဲ့ စံချိန်တင် နိုင်ခဲ့ တာပါ။
ရော်နယ်ဒိုရဲ့ ဒီစံချိန်ဟာ ကစားသမားတိုင်း ချိုးဖျက်ဖို့ တော်တော်လေး ခက်ခဲတာ ဖြစ်ပါတယ်။
ရော်နယ်ဒိုဟာ အသက် ၃၈ နှစ် အရွယ်ရှိပြီ ဖြစ်ပေမယ့် အခုအချိန်ထိ နိုင်လိုစိတ် ပြင်းပြနေပြီး ပွဲတိုင်းကို ပွဲချိန်အပြည့် ပါဝင်ကစားဖို့ စိတ်အားထက်သန်နေတာပါ။
နိုင်ငံတကာ ကစားသမားဘဝမှာ ရော်နယ်ဒိုဟာ ပွဲအရေအတွက် အများဆုံး ကစားသမားဆိုတဲ့ စံချိန်မတင်နိုင် ခင်မှာ ဂိုးအများဆုံး ကစားသမားဆိုတဲ့ စံချိန်ကိုလည်း တင်ထားတာ ဖြစ်ပါတယ်။ ဒါကြောင့် ရော်နယ်ဒိုဟာ အီရန် ဂန္တဝင် အလီဒါယီရဲ့စံချိန်ကို ကျော်ဖြတ်ပြီး စံချိန်တင်ထားတာပါ။
ချန်ပီယံလိဂ်ဖလား ၅ ကြိမ်ဆွတ်ခူးထားသူ ရော်နယ်ဒိုကိုတွေ့ရစဉ်
ပေါ်တူဂီ ကစားသမားဟာ လက်ချင်စတိန်းအသင်းနဲ့ ပွဲမှာ ၂ ဂိုး သွင်းယူပြီးနောက် နိုင်ငံတကာသွင်းဂိုး ၁၂၀ အထိ ရှိလာခဲ့ပြီး သူ့ရဲ့စံချိန်ကို ကျော်ဖြတ်နိုင်ဖို့ အနီးစပ်ဆုံးလို့ ပြောလို့ရတဲ့ မက်ဆီတောင် လိုက်မှီဖို့ ၂၁ ဂိုးအထိ လိုနေ တာ ဖြစ်ပါတယ်။
ရော်နယ်ဒိုကတော့ သူ့စံချိန်ကို တခြား ကစားသမားတွေ လိုက်ဖို့ဆိုတာထက် သူကပဲ သူ့ရဲ့စံချိန်တွေကို ချိုးဖျက် ပြီး စံချိန်သစ်တွေကို တင်နေတာပါ။ ပေါ်တူဂီအသင်းအတွက် ၂၀၀၃ မှာ စတင် ပွဲထွက်ခွင့်ရတုန်းက ဆယ်ကျော် သက် အရွယ်သာရှိသေးတဲ့ ကောင်လေးတစ်ယောက်က ဒီလိုစံချိန် မှတ်တမ်းတွေကို တင်နိုင်မယ်လို့ ဘယ်သူကမှ တွေးထင်ထားမှာ မဟုတ်ပါဘူး။
ဒါပေမယ့် ရော်နယ်ဒိုကတော့ အခုအချိန်မှာ ဒါကို လုပ်ပြနေပြီ ဖြစ်ပါတယ်။ ဘယ်သူတွေကပဲ ဝေဖန်မှုတွေ ပြုလုပ် ပြုလုပ် ရော်နယ်ဒိုကတော့ သူ့အလုပ်ကိုပဲ သူဆက်လုပ်ပြီး ဝေဖန်မှုတွေကို တုန့်ပြန်ခဲ့တာပါ။
ရော်နယ်ဒိုဟာ အခုအချိန်ထိ အနားယူဖို့ အကြောင်းကို မတွေးထားသေးသလို ထုတ်ဖော်လည်း ပြောထားခြင်း မရှိတာကြောင့် နောက်ထပ် စံချိန်မှတ်တမ်းတွေကို ထပ်ပြီး ရေးထိုးဖို့လည်း ရှိနေတာ ဖြစ်ပါတယ်။
ကမ္ဘာ့ဘောလုံးလောကမှာ ရော်နယ်ဒို စံချိန်တွေ အများကြီး တင်ထားတဲ့အထဲကမှ ထူးခြားတဲ့ စံချိန်တွေကို ဖော်ပြပေးချင်ပါတယ်။
ပထမဆုံး ပြောပြချင်တာကတော့ ရော်နယ်ဒိုဟာ ကမ္ဘာ့ဖလားပြိုင်ပွဲ ၅ ကြိမ်ဆက် ဂိုးသွင်းယူနိုင်တဲ့ ပထမဆုံး ကစားသမား ဖြစ်ပါတယ်။
နိုင်ငံအသင်းအတွက် ရော်နယ်ဒို ဖရီးကစ်ကနေ ဂိုးသွင်းနေစဉ်
ရော်နယ်ဒိုဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲ အုပ်စုတွင်း ပွဲစဉ်ဖြစ်တဲ့ ဂါနာနဲ့ပွဲမှာ ဂိုးသွင်းပြီးနောက် ဒီစံချိန် မှတ်တမ်းကို တင်နိုင်ခဲ့တာဖြစ်ပြီး ဒီလိုစံချိန်ကို တင်နိုင်ဖို့အတွက်ဆိုရင် လက်ရွေးစင်အသင်းမှာ နှစ်ပေါင်း ၂၀ ကြာ ပါဝင် ကတိကဝတ်ပြုနိုင်မှ ရမှာဖြစ်ပါတယ်။
ရော်နယ်ဒိုကတော့ ၂၀၂၆ ကမ္ဘာ့ဖလားပြိုင်ပွဲကိုလည်း ပါဝင်ကစားချင်နေပြီး သူ့ရဲ့စံချိန်ကို ဘယ်သူကမှ မချိုးဖျက် နိုင်အောင်အထိ လုပ်ဆောင်ချင်နေတာပါ။
နောက်ထပ် ထင်ရှားတဲ့ စံချိန်ကတော့ ချန်ပီယံလိဂ် သွင်းဂိုး အများဆုံးဖြစ်ပြီး ၁၄၀ ဂိုးနဲ့ ရပ်တည်နေတာပါ။
သူ့နောက်မှာ အနီးစပ်ဆုံး လိုက်နေတာကလည်း ပြိုင်ဘက်ကြီးဖြစ်တဲ့ မက်ဆီဖြစ်ပြီး ၁၂၉ ဂိုးနဲ့ သူ့အနောက်မှာ ရှိနေတာ ဖြစ်ပါတယ်။ ဒါတောင် ရော်နယ်ဒိုက အခုနှစ် ချန်ပီယံလိဂ်ပြိုင်ပွဲမှာ ဝင်မကစားတာတောင် သူ့ကို မကျော်ဖြတ် နိုင်သေးတာ ဖြစ်ပါတယ်။
နောက်ထပ် မှတ်တမ်းတွေကတော့ ချန်ပီယံလိဂ်ပွဲ အများဆုံး ကစားသမားနဲ့ ချန်ပီယံလိဂ် ၅ ကြိမ် ရယူထား နိုင်သူဖြစ်ပါတယ်။
နောက်ထပ် အလွန်ကောင်းတဲ့ စံချိန်ကတော့ ချန်ပီယံလိဂ် ဗိုလ်လုပွဲ ၃ ကြိမ်မှာ ဂိုးသွင်းနိုင်တဲ့ တစ်ဦးတည်းသော ကစားသမား ဖြစ်ပါတယ်။ ချန်ပီယံလိဂ် ဗိုလ်လုပွဲ တက်ဖို့တောင် မလွယ်တဲ့အချိန်မှာ ရော်နယ်ဒိုလို ဗိုလ်လုပွဲ ၃ ကြိမ်မှာ ဂိုးသွင်းနိုင်တဲ့ ကစားသမားဖြစ်ဖို့ကလည်း မလွယ်တဲ့ အခြေအနေပါ။
ချန်ပီယံလိဂ် ဗိုလ်လုပွဲမှာ ဂျူဗင်တပ်စ်အသင်းဘက်ကို ရော်နယ်ဒို နောက်ပြန်ကန် ဂိုးသွင်းနေစဉ်
အင်္ဂလန်၊ စပိန်နဲ့ အီတလီ ၃ နိုင်ငံစလုံးမှာလည်း ရော်နယ်ဒိုဟာ ဆုဖလားအားလုံးကို ရနိုင်ခဲ့တဲ့အထိ သူ့ရဲ့ အောင်မြင်မှုတွေကို ပြောရမယ်ဆိုရင် ပြီးဆုံးနိုင်မှာ မဟုတ်ပါဘူး။
ရော်နယ်ဒိုရဲ့ ထင်ရှားတဲ့ နောက်ထပ် စံချိန်တစ်ခုကတော့ အမျိုးသား နိုင်ငံတကာ ဘောလုံးသမိုင်းမှာ ဟတ်ထရစ် ၁၀ ကြိမ်ပြည့်တဲ့ ပထမဆုံး ဘောလုံးသမားဖြစ်ခဲ့သလို ယူရိုနဲ့ ကမ္ဘာ့ဖလားခြေစစ်ပွဲ ၂ ခုပေါင်းမှာ သွင်းဂိုး ၂၂ ဂိုး အထိ သွင်းထားပြီး ဂိုးအများဆုံး သွင်းထားတဲ့ သူအဖြစ် ရှိနေခဲ့တာပါ။
ရော်နယ်ဒိုဟာ ပြီးခဲ့တဲ့ နိုဝင်ဘာလထဲမှာ ကစားသမားဘဝ သွင်းဂိုး ၈၀၀ ပြည့်တဲ့ ပထမဆုံး ကစားသမားအဖြစ် စံချိန်တင်နိုင်ခဲ့ပြီး မက်ဆီက မကြာသေးခင်ကမှ ဒီစံချိန်ကို လိုက်မှီခဲ့တာ ဖြစ်ပါတယ်။
ရော်နယ်ဒိုဟာ စံချိန်မှတ်တမ်းတွေနဲ့ ပတ်သက်ပြီး ပြောခဲ့ဖူးတဲ့ စကားတစ်ခွန်းတော့ ရှိပါတယ်။
ဒါကတော့ "သူက စံချိန်မှတ်တမ်းတွေနောက်ကို လိုက်နေတာ မဟုတ်ပါဘူး။ စံချိန်မှတ်တမ်းတွေကသာ သူ့ နောက်ကို လိုက်နေတာ"ဆိုပြီး ပြောထားခဲ့တာပါ။ ဒါက တကယ့်လက်တွေ့မှာလည်း မှန်ကန်နေတာ ဖြစ်ပါတယ်။
ရော်နယ်ဒိုကတော့ ကစားသမားဘဝ အနားယူသွားရင်တောင် သူ့စံချိန်မှတ်တမ်းတွေကို လူငယ်ကစားသမားတွေ ချိုးဖျက်ဖို့ ကြိုးစားမှာကို ဂုဏ်ယူစွာကြည့်ရင်းနဲ့ နောက်ထပ် စံချိန်အသစ်တွေကို ထပ်ပြီး တင်နိုင်ဦးမလား ဆိုတာ ကို စိတ်ဝင်စားဖွယ် စောင့်ကြည့်ရမှာလည်း ဖြစ်ပါတယ်။
Page 3 of 78